TBP Balochi

بلوچستان ءِ دمگ کیچ ءَ سلاہ بندیں مردماں پاکستانی پوج ءِ سر ءَ اُرش کرتگ ءُ چار کارندہ کُشتگ اَنت – ءُ ھمے وڑ سلاہ بنداں پوجی کارندھانی توپک گون وت برتگ اَنت-

دی بلوچستان پتر ھال ءَ سر بیتگیں اھوالانی رد ءَ مروچی سھب ءَ زامران ءِ ھند سادیم ءِ ھند ءَ پاکستانی پوج ءِ راھسر سلاہ بندیں مردماں بستگ ءُ آیانی سر ءَ اُرش کرتگ-

دمگی مردمانی رد ءَ اُرش ءَ چار کارندہ مرتگ اَنت ءُ اُرشکاراں سلاہ دستیگ کتگ ءُ گون وت برتگ اُنت ءُ چریشی ءَ پد پوج ءِ بازیں کارندہ دمگ ءَ اتکگ ءُ سر بیتگ اَنت-

اُرش ءِ زمہ واری تنی وھدی کس ءَ پہ وت ءُ نہ زرتگ بلے دمگ ءَ بلوچ آجوئی لوٹوکیں سلاہ بندیں گل جاڑیگ اَنت-

ھمے وڑ ءَ پنجگور ءِ شھر ءَ پوج ءِ بنجاھی بنجل ءِ واستا جوڑ کنگ بیتگیں پھریزی پانگس ءِ سر ءَ ناشناساں دزبمبے چگل داتگ ءُ پشت مانداتگ ءُ شتگ اَنت-

شانگ بہ بیت گوستگیں بیست ءُ چار ادارانی توک ءَ پنچمی اُرش اِنت کہ پوج ءِ سر ءَ بوگ ءَ اَنت چد ءُ پیش گوستگیں شپ ءَ سبی ڈھاڈر ‘کلم چوک ءَ ناشناساں دزبمبے چگل داتگ ءُ ھمے وڑ ھاران ءَ البت بنجل ءُ کولواہ ءُ رود بنجل ءِ سر ءَ سلاہ بنداں اُرش کتگ اَنت-

پاکستانی لشکری بنشون ءِ نیمگ ءَ تنی وھدی دگہ تاوانانی درگت ءَ گپ دیم ءَ نیتکگ اَنت –

جھانی مالداری ءِ پنڈ (آئی ایم ایف) ءَ جنگ آماچیں یوکرین ءِ واستا پانزدہ ارب ءُ شست کروڑ ڈالر دیگ ءِ گپ وتی نیاد ءُ کرتگ – آئی ءَ گوشتگ کہ اے زَر یوکرین ءَ آیوکیں چار سالانی توک ءَ کِست کِست ءَ رس اَنت-

ھال سرکنوکیں روئٹرز ءِ رد ءَ شمبے ءِ روچ ءَ منّگ بیتگ آئی ایم ایف ءِ اے پیکج میان اُستمانی وامانی داروکیں نیاد ءِ بھر اَنت- چریشی ءِ سر ءَ گوستگیں سیزدہ ماھانی توک ءَ روس ءِ اُرش ءَ ڈیھ ءِ زرکاری ءَ پھریزگ ءَ یک سد ءُ پانزدہ ارب ڈالر دیگی اِنت-

چریشی ءَ پیش آدینگ ءَ امریکہ ءِ سَے واکداراں یوکرین ءِ روس ءِ ھلاپ یَ جنگ ءَ دو ٹک شش بلین ڈالر کہ امریکہ ءِ لشکر ءِ کمکی پیکج ءِ جار بیگی اِنت چریشی ءَ برزی پھریزی ءِ ریڈار، اینٹی ٹینک راکٹ ءُ تیل کشین ٹرک ھوار اَنت-

امریکہ ءِ یک کلانیں سپارت کارے ءَ گوشتگ کہ ڈنی وزیر بلنکن آیوکیں ھپتگ ءَ برسلز ءَ نیٹو ءِ وزارائے ھارجہ ءَ گند ءُ نند ءِ وھد ءَ سلاہ ءِ جؤڑینگ ءُ روس ءِ گھگیری ءُ یوکرین ءِ پسھی اُرشانی پلامرزی کنگی اِنت-

دومی نیمگ ءَ سروک پوتن ءَ ھارجہ پالیسیانی نوکتریں بنگپانی سر ءَ پیش کنان ءَ گوشتگ روسی وزیر ھارجہ سرگئی لاوروف ءَ گوشتگ کہ آیانی ڈیھ گیر دوستیں ریاستانی نیمگ ءَ وتی سلامتی ءُ دیمروئی ءَ ترسگ ءَ اِنت –

دومی نیمگ ءَ بیلاروس ءِ سروک الیگزینڈر لوکا شینکو ءَ گوشتگ کہ روس ءَ اژدری ءِ واستا آئی ءِ ڈیھ ءَ البراعظمی ءِ جوھری میزائل دارگ بیت اِنت –

روس ءَ پیسر ءَ ھم بیلاروس ءِ ٹیکٹیکل جوھری سلانی ایر کنگ ءِ پیسلہ کتگ ءُ ایشی ءِ جار ھم پیش جنگ بیتگ –

بلوچستان ءِ تیاب دپی دمگ گوادر ءِ گیشتریں ھند ءُ دمگاں ورگی آپ نیست انت –

گوستگیں بازیں روچ ءِ بیت کہ گوادر ءِ بازیں دمگ ءُ وارڈاں ساپیں ورگی آپ نیست، مردم پہ ورگی آپ ءِ پِٹے ءَ تلوسگ ءَ انت –

ورگی ساپیں آپ ءِ ھاتر ءَ دمگی مردماں چیف سیکریٹری ءُ سوبائی سیکریٹری پی ایچ ای ءَ گوں گامگیج زورگ ءِ لوٹ کتگ –

سپلائی اسکیم انڈسٹریز ءِ گیشتریں دمگ ءُ وارڈاں ورگی ساپیں آپ رسگ ءَ نہ انت –

بلوچستان ءِ دمگ خاران ءُ سبی ءَ سلاہ بندیں مردماں پاکستانی لشکریانی بنجل اُرشانی تہءَ نشانگ کُتگ اَنت۔ 

اھوالانی ردءَ خاران ءِ ھند البت ءَ پاکستانی لشکریانی بنجل ءِ سرءَ سلاہ بندیں نیمگ چہ اُرش کنگ بیتگ۔ اے نیام ءَ تراک ءُ ترندیں تیرگواریانی توار گُوشدارگ بیتگ اَنت۔

دومی نیمگ ءَ بلوچستان ءِ دمگ سبی ءِ ھنکین  ڈھاڈر ءِ قلم دین چارراہ ءِ سرءَ ناشناسیں مردماں پاکستانی لشکریانی چیک پوسٹ ءِ سرءَ دستی بمب ءِ دور داتگ ءُ تتکگ اَنت کہ آ ترندیں تراکے ءَ گوں تراکیتگ۔

اھوالانی ردءَ دوھیں اُرشانی تہءَ لشکریانی تاوانانی دیمپانی کنگ کپتگ، البت واکدارانی نیمگ ءَ اَے درگت ءَ داں انگت ھچ پئیمیں درشان دیما نئیتکگ ءُ نانکہ اے اُرشانی زمہ واری داں انگت کجام ھم گل ءَ زرتگ اَنت۔

بلوچستان لبریشن فرنٹ ءِ جارکش میجر گھرام بلوچ ءَ رسانکدراں شنگ کُتگیں درشانے تہءَ گُشتگ کہ بی ایل ایف ءِ  سرمچاراں 29 مارچ ءَ کیچ ءِ ھند کولواہ، سگگ بلور ءَ پاکستانی پوج ءِ دو چاریگ تیر جَتگ ءُ کُشتگ اَنت۔

آئی ءَ گُشتگ کہ ڈیھی چاریگ ناصر ء خداداد جھمنند شاپک نوک آباد، سدھیر ء میار جھمنند کولواہ کرکی سرمچاراں 29 مارچ ءَ سگگ بلور ءَ ھما وھدءَ نشانگ کُتگ اَنت وھدے آ کولواہ ءِ تنزیلہ پوجی بنجل ءَ چہ ڈن ءَ دراتکگ اَنت۔ سرمچاراں آ سگگ بلور ءِ تہءَ دارگ ءِ جھد کُتگ بلے آیاں اوشتگءَ ابید پدءَ پوجی کیمپ ءِ نیمگ ءَ تتکگ اَنت، چریشی ءِ پد سرمچاراں تیرگواری کُتگ ءُ دوھیں کُشتگ اَنت۔

جارکش ءَ گُشتگ کہ ناصر ء خداداد 2014 ءَ چہ پاکستانی پوج ءَ پہ چاریگی کنگ ءَ بیتگ آ بازیں سرمچارانی کوشارینگ ءِ تہءَ ھوار بیتگ۔ اے چاریگ  شاپک، تجابان، تربت ءُ کولواہ ءَ ھم بازیں پوجی بیڑانی تہءَ ھوار بیتگ۔  اِشی  ابید ھم دگہ بازیں چاگردی سلکاریانی تہءَ ھم ھوار بیتگ۔

جارکش ءَ دیمترءَ گُشتگ کہ سدھیر ء میار یک سرمچارے بیتگ کہ آئی ءَ 2019 ءَ پاکستانی پوج ءِ دیما سرجھل کُتگ ءُ پسنی ءَ لڈ اِتگ ءُ ھمودءَ پہ دژمن ءَ کارءَ بیتگ۔ آ بازیں وھداں چہ کولواہ ءُ کش ءُ کِری دمگانی تہءَ بلوچ سرمچارانی بگیرءَ سُرپُر ءَ بیتگ۔ آ سرمچارانی ٹِک کنائنگ، رندگیری ءُ پوجی زوراکیانی تہءَ ھم دژمن ءِ ھمراہ بیتگ۔

میجر گھرام بلوچ ءَ گُشتگ کہ  بلوچستان لبریشن فرنٹ ءَ دو راجی جرمکار آیانی گُڈی آسر ءَ سرکُتگ اَنت۔ چہ لس مھلوک ءَ دزبندی کنیں کہ آ چُشیں ڈیھی کارندھاں چہ دیر بہ بنت۔ سرمچار اشاں کدی ھم کجا ھم نشانگ کُت کن اَنت۔

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجیں گل وائس فار بلوچ مسنگ پرسنز ءِ زھرشانی برجاہ، زھرشانی بنجل ءَ مروچی چار ھزار ءُ نھ سد ءُ نود ءُ نھ روچ سرجم بوتگ انت –

بلوچستان ءِ دمگ چہ مچ بولان ءَ سیاسی ءُ چاگردی باسک جاوید بلوچ، محبوب بلوچ، ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

ھمے وھد ءَ سَے سالاں پش زورانسری آوار جنگ بوتگیں مٹھا خان مری ءِ لوگبانک ءُ آئی ءِ کھول ءِ مردم ھم بنجل ءَ ساڑی بوتگ انت –

آئی ءَ وتی تامری درشان ءِ تہ ءَ گوشتگ کہ مٹھا خان یل کنگ بہ بیت آ بیگناہ یے، اگاں آئی ءِ سر ءَ کتکاری ءِ الزام ءِ ھست گڈا آمیدگس ءَ آرگ بہ بیت – آئی ءَ گوشگ ات کہ ما سک باز دلسیاہ انت، گِس ءِ یکیں کمائینوک ءُ آروک بیتگ آ جم چہ ما پچ گرگ بوتگ، پہ رب ءَ بہ چاریت آئی ءَ یل بہ کن ایت ءُ مارا سکون ءَ زند گوزینگ ءَ بل ایت –

آئی ءَ گوشتگ کہ مٹھا خان ءِ دو زھگ کہ بید ءِ پت ءَ سک باز پریشان انت اے زھگانی پت زاھر کنگ بہ بیت آئی ءَ انساپ دیگ بہ بیت –

گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ ماتیں سرڈگار بلوچستان ءِ سینگ ءِ تل جنگ ءُ چہ شھدائے بلوچستان ءَ ودی بوتگیں ورنا، زھگ ءُ کماش وتی مات ءِ راکینگ ءِ ھاتر ءَ تیر وارتگیں جانے ءَ پگر ءُ نزریہ ءِ ھاتر ءَ، ماتیں ھاک ھاتر ءَ مدامی ءِ ھاتر ءَ مات ءِ دلبند ءَ واب کپتگ انت –

ماما قدیر ءَ گوشتگ کہ مروچی ھم پاکستان ءِ زر زریریں کشندھانی دست ءَ مرگ ءُ زند میان ءَ اوشتوکیں بلوچ ورنا وتی راجی سوچ ءِ سر ءَ برجم انت، ورنا، کماش ءُ زالبولانی راجی سیاست ءِ تہ ءَ راستی ءَ گوست بگر تاں مروچی یک کرد ءِ بوتگ ءُ ھنگت ھست انت بلے اے کردانی ھمراھی ءَپاکستان ءِ جوڈ کتگیں رسترانی ھم کردے بوتگ کہ روچ مروچی آ سیاسی گند ساپ نہ بوگ ءَ انت – سنگتانی جھد ءُ دیمھونی ءُ جاورانی شریں سانمندی ءِ سوب ءَ گل ءَ جوانی ءَ دیمروئی کتگ – گل ءِ درگت ءَ دومی مردمانی ھیال ءُ شرگداری ءِ پہ دل شرپ کنگی انت – شریں شور ءُ سلاھ وتیگی کنگی انت بلے شرط ھمیش انت کہ گوں نیک نیتی ءُ املی کار کنگ بہ بیت –

گوریچانی اوگانستان ءِ دمگ جوزجان ءَ یک وانگجاھے ءِ سر ءَ بمب تراک ءِ کنگ بوتگ کہ چریشی ءَ دو نودربر بیران ءُ چار زدگ بوتگ انت –

دمگی پولیس ءِ جارکش عبدل ستار حلیمی ءَ اھوالکاراں گوں تران کنان ءَ گوشتگ کہ قش تیپے میتگے ءَ یک وانگجاھے ءِ سر ءَ بمب اُرش ءِ کنگ بوتگ –

چم دیستیں گواھانی گوشگ انت اے اُرش جنکانی وانگ جاہ ءِ سر ءَ کنگ بوتگ بلے تنی وھدی اے اُتش ءِ زمہ واری ھچ گل ءَ نہ منّ اِتگ –

یش راج فلمز ءِ بینر ءِ چیر ءَ جوڑ کنگ بیتگیں یک تامرے ءِ تہ ءَ بالی وڈ ءِ دو نامی ئیں جاسوس ’ٹائیگر ‘ ءُ ’پٹھان ‘ یکیں وھد ءَ گندگ بنت-

امریکہ ءِ روتاک ورائٹی ءِ رد ءَ آیاں یش راج اسٹوڈیوز ءَ چہ راست کتگ کہ شاہ رخ خان ءُ سلمان خان’ پٹھان ءِ دیم ءَ ٹائیگر ‘ ھردو یکیں وھد ءَ آیگ ءَ اَنت تامر ءِ شوٹنگ جنوری 2024 ءَ بندات کنگ بیت اِنت-

یش راج فلمز ءِ نیمگ ءَ تچکی ءَ تامر ءِ جوڑ کنگ ءِ راستی نہ بیتگ –

شاہ رخ خان، دیپیکا پاڈوکون ءُ جان ابراھم ءِ تامر پٹھان ءَ ھندوستان ءَ داں ھمے سال ءَ داں انگت ءَ درستیں تامراں گیش 130 ملین ڈالر کمائی کتگ –

سلمان خان ءُ کترینہ کیف ءِ نامدارین تامر “ایک تھا ٹائیگر ” 2012 ءَ شنگ بیتگ ءُ ایشی ءِ دومی بھر “ٹائیگر زندہ ہے ” 2017 ءَ شنگ بیتگ ءُ باسکوپ “سنیما گھر ” ءَ سر نام بیتگ –

سلمان خان ءِ تامر “ٹائیگر3 “گوستگیں سال ءِ نومبر ءَ دیوالی دودمان ءَ شنگ بیتگ-

تامر ٹائیگر ءَ سلمان خان ءَ انڈین انٹیلیجنس ایجنسی را ءِ ایجنٹ اویناش سنگھ راٹھور ءِ کرد پیلو کتگ ات ءُ تامر ءَ کترینہ کیف ءَ پاکستانی چیریں ادارہ آئی ایس آئی ءِ ایجنٹ پیش دارگ بیتگ –

دومی نیمگ ءَ ھمے سال ءَ شنگ بیتگیں تامر پٹھان ءِ توک ءَ شاہ رخ خان درانڈیھی ھندوستانی ایجنٹ ءِ کرد پیلو کتگ ءُ ھمے وڑ دیپیکا پاڈوکون ءَ پاکستانی ایجنٹ روبینہ محسن ءِ کرد پیلو کنگ ءَ گندگ بیتگ –

پٹھان تامر ءَ سلمان ھم گندگ ءَ اتکگ کہ آ تامر ءِ گڈسر ءَ سلمان خان شاہ رخ خان ءَ گوش ایت کہ من ءَ وتی کار برجاہ دارگی اِنت پرچاکہ راج ءِ آیوکیں باندات زھگانی آسرو ءَ یل کنگ نہ بیت اِنت –

بلوچستان ءِ دمگ پنجگور ءَ شپ ءِ وھد ءَ پاکستانی پوج ءَ بیڑبرتگ ءُ یک ورنایے زورانسری بیگواہ کتگ-

گیشیں ھالانی رِد ءَ گوستگیں شپ ءَ پاکستانی پوج ءَ پنجگور ءِ دمگ خدابادان ءَ لوگے ءِ سر ءَ بیڑبرتگ ءُ مظایر حسین ء ذاکر حسین آوار جتگ ءُ ناشناسیں جاھے ءَ برتگ-

کھول ءَ وئیل راست کتگ ءُ گْوشتگ کہ پوج ءَ لوگ سر ءَ بیڑبرتگ ءُ ورناہ ناشناسیں جاھے ءَ برتگ، تنی وھدے آ یل کنگ نہ بیتگ-

آیاں گْوشتگ کہ کسان سالی ئیں مظاھر حسین یک نادُراھیں زھگے آئی ءَ نندگ ءُ پاداھگ ءِ ھاتر ءَ جنجالی دیمپانی کپ اِیت- آئی ءَ گْوشتگ کہ کسان سالی ءَ چہ آئی ءَ وتی لوگ ءَ نیم درزن ءَ گیش مرگ دیستگ اے نگیگیں جاوراں آئی ءَ سک زھنی ترس آماچ ءِ دیمپان اِنت-

آیاں مظاھر ءِ یل کنائینگ ءِ لوٹ کتگ گوشتگ کہ لوگ ءَ مظاھر حسین ءَ اَبید دگہ مردین کھول تہ ءَ نیست اے کسان سالی ئیں چُک ءَ بیگواہ کنگ زُلم ءِ گُڈی سیمسر اِنت دزبندی اِنت کہ زوت یل بکن اَنت ئِے-

آزمانک: من ءُ منی کٹور

نبشتہ کار: شھزاد نسیر

دی بلوچستان پوسٹ

منی ھدا زانت کہ من یک بے وسیں زالے آں۔ مرد ھیرونی یے من گُدے دوچاں ءُ وتی لاپ ءِ شوھاز آں منی نام ماھاتون اِنے ءُ منی لوگ واجہ ءِ نام شاھداد اِنت من ءَ ھمائیں مات ءُ پتاں گوں اے مرد ءَ سور داتگ، منی زند وَ چہ ھمود ءَ ھتم اِنت، کہ ھما وھد ءَ منی آروس بوتگ من واھشت داشتگ بوتگ کہ منی آروس کہ بیت من گوں وتی لوگ واجہ ءَ سک گَل ءُ شادان بہ آں، بلے من نزاناں اے منی بھت اِنت، اگاں ھما مرد ءِ بھت من آں۔ برے برے من گوں وتی ایوکی ءَ سک دل سْیاہ باں گڑا وتی کٹور ءَ دیم ءَ کن آں ءُ وتی وھد ءَ گوں لاپ ءِ شوھاز ءَ گوازین آں دل نہ گْوش ایت کہ ھمساھِگے ءِ لوگ ءَ برو، چیاکہ اگاں ھمساھِگے ءِ لوگ ءَ بہ رواں، گڑا منی ھمساھگ داں زندگ اَنت دِگر ءِ پُچکانی شودگ ءَ دزھورک نہ بنت۔ گڑا من ھیال کن آں، کہ من چیا بہ رواں گوں اے سِلیں کاراں گون وتی دپ ءَ ناپاک بہ کن آں۔ پمیشکا من ءُ منی کٹور چہ اے ھمساھگاں گھتراں۔ منی زند ءِ ھمراہ وَ نیم شلوگوے بوت، کہ بئیت ءُ گوں من دیوانے بہ کنت، کہ اڑے! برے برے منی دل ھم لوٹ ایت کہ من ھم کْوھنیں یاتانی چِکّو ءَ بہ چنڈان ءُ چہ یکے “ھو اڑے وھد” ءِ ھبر ءَ چہ وتی لِلّک ءَ بہ کَش آں بلے “زندگی ءِ چے ئِے تماہ ءَ کہ دل بہ لوٹ ءُ دس مہ رس ایت۔”

دل ھیال باز کنت دل ھیران بیت کہ چہ اِے بے اُمیتیں وھد ءَ چہ گھتر اِنت کہ من جنوزام بہ بیتین آں یا کلمانٹ بوتیناں بلے پد ءَ دل ھیال کنت کہ اے رنگ ءَ ، بزاں دوتکگیں گُد، پن ءُ مزواک چہ من ءَ دیر بنت ءُ من یک پروشتگیں تھتے ءِ وڑ ءَ کُنڈے ءَ کپاں ءُ بس پس کاینت ءُ منی روتاں چُنڈ اَنت ءُ پد ءَ داں یکے توکل بہ کنت ءُ بئیت منی داراں بہ زور ایت ءُ آچ ءَ بہ دنت۔ جنوزامی ھم بے رنگیں یک بے واجھیں زندے کہ ھدا بکن کہ کس ءَ اے زند مہ رسات۔

من وتی مرد ءَ چہ بس ھمے وتی زند ءِ اُمیت ءَ داراں کہ آ بس پہ من رنگے ءُ بس پہ من نامے کہ ھست اِنت داں اے دگنیا ءَ سپر بہ کنت ءُ پمّن آ دگنیا ءِ پشت بہ کپ ایت بلے گپے زان ئے؟ مئے وڑیں بے وسیں زال چہ ھچ گماں نہ چُٹ ایت اِد ءَ اے دگنیا ءِ گم ءُ دلچُنڈی ءُ آ دگنیا ءِ پد ءَ دگہ یک بے زانتیں ھساب کہ باریں منی کُرتن ءُ کُنِش چے بنت۔

شپ ءُ روچ منی وھد منی زند گوں ھمے داب ءَ گْوزگ ءَ اِنت ءُ من نوں چہ کس ءَ گِلگ نہ داراں ءُ بس گوں وتی کٹور ءَ من وتی وھد ءَ گْوزینگ ءَ آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔