TBP Balochi

شال پریس کلب ءِ دیم ءَ زورانسری آوار جنگ بوتگیں مردمانی یل نہ کنگ ءِ بگیری ءَ بیگواھیں مردمانی پانکجنیں گل وائس فار بلوچ مسنگ پرسنز ءِ دراج کشیں زھرشانی بنجل ءَ مروچی پنچ ھزار ءُ نود ءُ ھشت روچ سرجم بوتگ انت –

مروچی پی ٹی ایم لورلائی ءِ باسک آصف پشتون، غنی پشتون، عبدالقدیر پشتون ءَ دگہ مردماں بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ پشتون راج اے وھدیں گرانتریں دورے ءِ تہ ءَ گوزگ انت، ھر چاریں نیمگاں زلم ءُ زوراکی ءِ جمبراں مانشاں اتگ – یک نیمگے زورگیری ءِ برجاہ دارگے ھاتر ءَ بلوچ ءُ پشتونانی چکچینی بوگ ءَ انت ءُ دومی نیمگ ءَ راج ءِ پرزند وتی پاکیں ھوناں گوں سرڈگارے پھریزگ انت – ھزارانی کچ ءَ راج ءِ شرپ داریں پرزنداں زورگیریں پوج ءِ دیم ءَ سراں کپن بستگ –

ماما کدیر گوشتگ کہ دومی نیمگ ءَ ھما مردم اَنت وتی راجی زمہ واریانی پیلو کنگ وتی جاہ ءَ آیان ءَ اے مارشت نیست کہ راج جنگ آماچ اِنت ءُ ورنایانی جون بے کپن ءَ کپتگ اَنت۔ بلوچ ءُ پشتونانی گس ماندارگ بیگ ءَ اَنت، بلوچ جنینانی سر ءَ اُرش کنگ ءُ بیگواہ کنگ بیگ ءَ اَنت۔ ڈاکٹر، استاد ءُ زانوگراں ھوار ھمک بھرگاں سیادی داروکیں مردم نشانگ کنگ بیگ ءَ اَنت۔ شست ھزار مرد ءُ سیسد جنین ریاستی چیریں بندیگجاھاں آزارانی دیمپان اَنت زورانسری آوار جنگ بوتگیں مردمانی کھول پہ وتی دوستیگیں مردمانی یل کنائینگے ھاتر ءَ تُن ءُ شد ءِ سما ءَ نہ اَنت ءُ بلوچستان ءِ جتائیں ھند ءُ دمگاں پریس کلب ءُ دمکاں زھرشانی کنگ ءَ اَنت –

آئی ءَ گوشتگ کہ یک نیمگے ءَ جون کپگ ءَ انت ءُ ما انگت ءَ پہ وتی تماھاں سرگنوک ایں، بلوچانی گسانی سر ءَ جیٹ بمبگواری کنگ ءَ اَنت ما پہ وتی روزگار ءَ جیڑگ ءَ اَنت – مارا پہ ھما مردماں جیڑگ لوٹ ایت کہ چیریں بندیگجاھاں آزار سگگ ءَ اَنت بلوچ ءِ کساں کسانیں زھگ پریس کلبانی دیم ءَ شدکشیں زھرشانی گدان ءَ نشتگ ءُ پہ وتی دوستیگیں مردمانی وش ءُسلامتی آجوئی ءَ زھرشانی کنگ ءَ اَنت۔ آ سھب ءَ وانگجاھے روگ ءِ بدل ءَ پریس کلبانی دیم ءَ کائنت – آیا مئے تہ ءَ اے مارشت ھست اِنت کہ اے زھگ وانگجاھاں بہ رو انت بلے مارا بس وتی زھگانی باندات ءِ پگر انت –

ھزدار ءِ دمگ وڈھ آڑینجی ءَ کیو دشت ءِ میتگ ءَ دل ءُ لاپ ءِ نادراھی گیش بوتگ –

زالبول ءُ زھگاں ھوار سَے مردمانی بیرانی ءِ ھال انت وھدیکہ دگہ بازینے نادراھی ءِ آماچ انت –

دمگی اھوالکار ءِ رِد ءَ دو روچانی میان ءَ چار مردم بیران بوتگ انت کہ آھانی تہ ءَ گنج حاتون ء سلیمان کہ آئی ءِ اُمر سِی ءُ پنچ سال انت چار سالی نمرہ ء حافظ محمد نور، بیست ءُ پنچ سالی شاہ بی بی ء عبدالعزیز بیران بوتگ انت – چہ دمگ ءَ سربوتگیں ھالانی رد ءَ دل ءُ لاپ نادراھی روچ پہ روچ گیش بوان انت –

دمگی مردمانی رِد ءَ سَے روچ انت کہ اے نادراھی دمگ ءَ تالان بوتگ بلے تنی وھدی ھچ وڈیں جانسلامتی ءِ گامگیج زورگ نہ بوتگ –

آئی ءَ گوشتگ کہ اگاں ھمے زوتاں دمگ ءَ جانسلامتی ءِ ٹیم سر نہ بوتاں گڈا گیشتر مردم مرگ ءِ دیمپان بوت کن انت –

روکپتی بلوچستان ءِ بنجاھی شھر زاھدان ءَ مروچی سھب ءَ ناشناسیں سلاہ بندین مردماں پولیس ءِ بنجل ءِ سر ءَ بیڑ برتگ ات کہ چریشی ءَ آیاں بنجل وتی دستیگی ءَ کتگ ات-

چرے اُرش ءَ دو پولیس کارندھانی پجار دیم ءَ اتکگ اَنت کہ آیانی پجار علیرضا کیخا سرباز ءُ مبین رشیدی ءِ نام ءَ زانگ بیتگ اَنت-

زانگ بہ بیت سھبی سلاہ بندیں مردماں زاھدان ءَ پولیس بنجل پانزدہ ءَ اُرش کتگ ات کہ اود ءَ آیاں بنجل وتی دستیگی ءَ کتگ ات داں دیراں ھردوکیں نیمگاں جنگ ءُ چوپ بازیں وھداں برجاہ ات –

ایرانی رسانکدر ءِ رد ءَ زاھدان ءَ پولیس ءِ بنجل ءِ سر ءَ چار سلاہ بندین مردماں اُرش کتگ ءُ آ بنجل ءِ تہ ءَ پترتگ اَنت –

دومی نیمگ ءَ ایرانی پولیس ءِ تیرگواری ءَ سَے لس مردمانی زدگ بوگ ءِ ھم ھال ھست اَنت-

زانگ بہ بیت اے پولیس بنجل ءَ دیم ءَ گوستگیں سال ءِ سِی ستمبر ءَ مردماں زھرشانی کتگ ات ءُ چریشی ءَ پولیس ءَ تیرگواری کنان ءَ سد ءِ کساس ءَ لس مردم بیران بیتگ ات اَنت-

سرکاری پھناتاں اے وئیل ءِ درگت ءُ سلاہ بندانی جنگ ءِ اھوال دیم ءَ نیتکگ انت بلے جنگ آسری بیتگ- ءُ نانکہ تنی وھدی دگہ گلاں اے وئیل ءِ زمہ واری من اتگ –

امریکہ ءَ وتی کیمیائی سلاھانی بنجل سرجمی ءُ ڈرورینتگ ءُ بار داتگ –

ھال سر کنوکیں ادارہ اے ایف پی ءِ رد ءَ امریکہ ءِ سروک جوبائیڈن ءَ آدینگ ءِ روچ ءَ دو دھکاں کوھنین کیمیائی سلاھانی بنجل تباہ کنگ ءِ جار جتگ بیتگ-

اے گامگیج دنیا ءِ مزنیں بیرانی سبب سرپد بیوکیں سلاھانی بنجل ءِ ھلاسی ءِ مزنیں گامے سرپد بوگ ءَ بوتگ اَنت-

سروک بائیڈن ءَ گوشتگ مروچی من ءَ پھر اِنت کہ امریکہ ءَ کیمیائی سلاھانی بنجل ءِ گڈی بھر سلامتی ءَ تباہ کتگ – اے گامگیج دنیا ءِ کیمیائی سلاھانی ترسناکی ءَ رکگ ءِ واستا نزیک ءَ آرگ بیتگ –

سال نوزدہ سد ءُ نود ءُ ھپت ءَ کیمیائی سلاھانی ھلاس کنگ ءِ یک کنونشنے ءِ سر ءَ دنیا ءِ بازیں ڈیھاں دزنشان جتگ بیتگ – امریکہ ءَ ھم اے مسام ءِ سر ءَ دزنویس جنوکانی توک ءَ گڈی ڈیھ اِنت کہ آئی ءَ اے سلاہ بار داتگ اَنت-

اے ھم گمان کنگ بیت اِنت بازیں ڈیھاں سلاہ چیر داتگ اَنت- کیمیائی سلاھانی سر ءَ بندش جنوکیں میان اُستمانی گل ءَ امریکہ ءِ اے جار مزنیں سوبمندی یے گوشتگ –

امریکہ ءَ کیمیائی سلاھانی ھلاسی ءِ جار سد سال ءَ رند دیم ءَ اتکگ، ھمے داب ءَ دومی جھانی جنگ ءِ وھد ءَ کیمیکل گیس ابید گر ءُ داری ءَ کارمرد بیتگ اَنت – کیمیائی گیس ءِ کارمردی ءَ بازیں بیرانیانی ھواری ءَ پوجی ھم بازیں کچے ءَ لنگ بیتگ اَنت –

میان اُستمانی گل ءَ گوشتگ کہ امریکہ ءِ سروک ءِ اے جار ءَ چہ زانگ بیت اِنت سرجمیں دنیا ءَ من اتگیں کیمیائی سلاھانی بنجل پروشگ بیتگ ءُ اے امل دوبر کنگ نہ بیت اِنت-

کیمیائی سلاھانی ھلاپ ءَ کار کنوکیں میان اُستمانی گل ءِ ڈائریکٹر جنرل فرنینڈو آریاس ءَ گوشتگ کہ میان اُستمانی کمیونٹی ءِ مول ءُ مرادانی گرگ ءِ دراھیں ڈیھ ءُ امریکہ ءَ مراد ءَ باتی گوش ایت –

امریکہ ءِ سروک ءَ گوشتگ کہ اے اولی رند اِنت زانتگین ءُ من اتگیں سلاھانی یک بنجلے منگ ءِ گون ءَ تباہ کتگ –

سربوتگیں ھالانی رِد ءَ تیاب دپی دمگ گوادر ءَ سلاہ بندیں مردماں ورنایے زورانسری آوار جتگ ءُ بیگواہ کتگ –

گیشیں ھالانی رِد ءَ بلوچستان ءِ تیاب دپی دمگ گوادر ءَ فقیر کالونی ءِ کرکٹ پٹ ءِ نزیک ءَ سلاہ بندیں مردماں قادر بخش دشتی ءِ زھگ توپک ءِ زور ءَ زورانسری آوار جتگ ءُ بیگواہ کتگ –

پولیس ءِ رِد ءَ اشانی جیڑہ وت ماں وتی جیڑوے وھدیکہ وئیل ءِ بگیری ءَ ورنایے کھول ءِ نیمگ ءَ گوادر پولیس تانہ ءَ ارزی نبشتہ کنگ بوتگ –

گوادر پولیس ءِ رِد ءَ آوار جنوک زانگ بوتگ انت پولیس ورنایے یلا کنائینگے جھد ءَ کنگ ءَ انت –