TBP Balochi

پاکستانی پوج ءَ چہ بلوچستان ءَ دگہ دو مردم زورانسری آوار جتگ-

بلوچستان ءِ دمگ ھُزدار ءَ پاکستانی پوج ءَ دو مردم زورانسری آوار جنگ ءَ پد بیگواہ کتگ اَنت-

ٹی بی پی اھوال پترءَ سر بیتگیں ھالانی ردءَ گوستگیں شپ ءِ نُھ ءِ وھد ءَ پاکستانی پوج ءُ چیریں ادارھانی کارندھاں ھُزدار ءَ جعفرآباد ءِ ھند ءَ چہ دو مردم جاوید زھری ء میر حسن زھری ءُ علی حسن زھری ء غلام نبی زھری ھما وھد ءَ آوار جتگ اَنت وھدے آ دوئیں جاوید زھری ءِ دکان ءَ ساڑی بیتگ اَنت-

دمگی اھوالانی ردءَ جاوید زھری ءَ دھکانکاری ءُ دکانداری کتگ ءُ وتی لاپ شوھاز کتگ، وھدے کہ آ زورانسری آوار جنگ ءَ پد نوشکی ءَ سی ٹی ڈی ءِ دروگیں میڑ ءَ کُشگ بیتگیں تابش زھری سیادیں-

دمگی واکدارانی نیمگ ءَ اے درگت ءَ داں انگت ھچ وڑیں درشان دیما نیتکگ-

ٹی پی بی ءَ مارچ 2023 ءِ گُڈی ءَ دو ھپتگاں بلوچستان ءِ جتائیں دمگاں چہ زورانسری آوار جنی ءِ کچ کساس یکجاہ کتگ اَنت- نکش کتگیں کچانی ھساب ءَ مارچ ءِ گُڈی دوئیں ھپتگاں 24 مردم بیگواہ کنگ بیتگ- پنچ یل کنگ بیتگ ءُ پنچ ءِ لاش دزکپتگ اَنت-

ھمے سال ءَ بلوچستان ءَ زورانسری آوار جنی ءُ بیگواھیں مردمانی لاشانی دزکپگ ءِ وئیل ءِ تہ ءَ گیشی گندگ اَتکگ- جھانی انسانی ھکانی گل بلوچستان ءَ اے وئیلانی سر ءَ دلپدردی ءِ درشان کتگ-

ندرپہ واشک ءِ شھیدانی نام ءَ

نبشتہ کار : تلار بلوچ

دی بلوچستان پوسٹ

من ءَ هما روچ یات اِنت پہ من یک ناوشیں هالے اتک ءُ منی گوانکو ءَ توار کُت سنگتے ءَ من ءَ هال کُرت من ءَ گوش ات ئِے تو سرپدے لھتے مردم جنگ بوتگ تو سرپدے؟ من گوشت اناں نیست چی بوتگ زاناں باریں تو هالاں کن ؟ من ءَ گُش ایت اَنچو هال اِنت اویز اکبر ءُ الیاس شھید کنگ بوتگ اَنت منی دل ءَ چہ یک آسردگیں دردے دراتک منی چمّانی ارس هار گران بوت من ءَ ھمے دمان ءَ سیاہ دیمگے ءَ گپت زمین ءُ آسمان سیاہ ءُ تھار ءُ گوشگ ءَ منی سر ءَ لُمبگ ءَ لگ ات اَنت-

همے روچ منی زند ءِ بیمانکیں ءُ درد ءَ چَہ سرریچیں روچے اَت من ءَ هچ تَب ءَ آرام نہ اِتگ پد ءَ دل ءَ مار اِت دل ءَ جیڑ اِت اے راجی جُنزے ءُ راجی جُنزانی تہ ءَ اے دابیں وئیل بنت پہ بلوچستان ءُ پہ بلوچ راجی باندات ءَ ندّر بوتّگیں بیل ءُ همبل نمیران اَنت داں جھان هست اِنت آ هست اَنت “هونے پہ هک ءَ ریچ اییت هاک ءِ تہ ءَ بیگواه نہ بیت” مروچی ھزارانی هساب ءَ بلوچ مرتگ اَنت بلے راجدپتر ءَ بس هما یات کنگ بنت کہ آ کردانی واهُند بوتگ اَنت- منی ارواھاں شُمئے مروچی اولی سالرُوچ اِنت شمارا شُمئے سالروچ مراد بات –

شھیدی یک دادے هرکس ءَ را پہ دیم نہ رَس ایت منی ھَنکین سک باز ابیتک اِنت مرچی شمئے یاتگیراں من ءَ انگیر کُتگ منی همبلاں سَد رند ءَ شمئے توسیپ ءَ کناں شمئے توکل ءُ شیردلی ءَ سُھریں دروت ندر کناں شمئے ستاہ ءَ ھپتمی آسمان ءَ چو برز بہ کناں بلے انگت ءَ پہ منی ستاہ ءِ مھتاج نہ ات –

2017 ءَ بلوچستان ءِ هَند واشک ءَ پاکستان زورگیریں لشکر ءَ جتا جتائیں دَمگ ءُ میتگاں وتی انگیر ءَ کنت ءُ وتی سُر ءُ پُراں گیش کنت همایان دو مردم زوگیریں لشکر ءِ دست ءَ جنگ ءُ شھید کنگ بیت ایشانی تہ ءَ شھید غلام قادر ءُ شھید اکرم بلے بنت سک باز بژن بیت اگاں ما بچاریں بلوچستان ھر دَمگ زورگیریں لشکر ءِ زُلم زوراکیانی آماچ اَنت مشکے بہ بیت، آواران بہ بیت یا ایدگے دَمگ کُل زُلم ءُ زُوراکیانی آماچ اَنت کُلامی آس شنزیں نوبت سائیل اَنت سک باز مردم بـے میارا جنگ بنت بلے اَنچیں تُرسے مئے بلوچ راج ءِ جان ءَ کَپتگ ھر دابیں وئیل بنت مردم بیوانک هچ توار چِست نہ کن اَنت اے جنگ تاں بلوچستان ءِ آجوئی برجم اِنت بلوچ راج ءِ ورنا کماش زالبول پہ وتی راج ءُ راجی زمین ءَ پہ ندر بوگ ءَ هچ چَک ءُ پد نہ بیت واشک ءِ تمردیں شھیداں سُھرچکیں دروت سُھرچکیں دروت پہ بلوچستان ءِ کُلیں شھیداں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

امریکہ ءُ ترندیں توپان ءُ تروکیں گوات ءِ سبب ءَ بیوکیں تباھی ءَ کم چہ کم بیست ءُ دو مردم بیران ءُ بازیں کچے ءَ مردم زدگ بیتگ اَنت-

ھال سرکنوکیں ادارہ روئٹرز ءِ رد ءَ واکدارانی گوشگ اِنت آدینگ ءِ شپ ءَ امریہ ءِ ریاست الینائے، ارکنساس، انڈیانہ ءُ ٹینیسی ءَ توپانی گوات ءِ سبب ءَ بیرانیانی ھال اتکگ اَنت-

ترندیں توپان ءِ سبب ءَ بازیں لوگاں ھوار دگہ جاھاں تاوان رس اتگ-

کوچکی دمگ ءُ شھر تباھی ءِ ندارگ ءَ پیش کنگ ءَ اَنت – واکدارانی رد ءَ آرکنساس ءَ کم چہ کم پنچ، الینائے ءَ چار ءُ انڈیانہ ءَ سَے مردم بیران بیتگ اَنت-

الینائے ءِ شھر ءَ بلوٍیئر ءَ یک دمگی تھیٹرے ءِ کود ءِ کپگ ءَ یک مردمے بیران بیتگ ءُ چِل مردم زدگ بیتگ اَنت کہ ایشانی توک ءَ پنچ کس بے کساس زدگ اَنت-

پولیس ءِ رد ءَ ھما وھد ءَ تھیٹر توپان ءِ تروکیں گوات ءِ زد ءَ اتکگ کہ اود ءَ ھمے وھد ءَ کنسرٹ ھلگ ءَ بیتگ کہ اود ءَ دو سد ءُ شست مردم جاڑیگ بیتگ اَنت-

مھکمہ ءِ موسمیات ءَ شیواری داتگ کہ ڈیھ ءِ رودراتکی بھراں گرند ءُ گروکانی ھواری ءَ ھور ھم بیت اِنت ءُ بجلیانی بند بوگ ءُ توپان ءِ سبب ءَ درچکانی کپگ ءِ ھم گمان ھست اِنت-

سی این این ءِ رد ءَ کم چہ کم ھپت ریاستاں پنجاہ ءَ گیش توپانی تروکیں گواتانی ھال بیتگ اَنت – ارکنساس ءَ سی ءُ چار ھزار ءَ گیش مردم بجلی ءَ زبھر بیتگ اَنت-

آرکنساس ءِ بنجاھی شھر لٹک راک ءَ ولیم ولیمز ءَ یک دمگی سپر مارکیٹے ءَ کار ءَ اِنت کہ آئی ءِ گوشگ اِنت آئی ءِ نزیک ءَ توپانی تروکیں گوات اتکگ اَنت بلے گنج اِنت من زندگاں –

آئی ءِ گوشگ اِنت کہ ھما وھد ءَ توپانی تروکیں گوات اتکگ بیتگ اَنت پد ءَ آ ڈن ءَ دراتکگ گڑا من دیستگ مردم زدگ اَنت-

یک ھپتگے ءَ پیش زرباری ریاست مسی سپی ءُ الاباما ءَ توپانی تروکیں گواتاں تباھی کتگ بیتگ کہ چریشی ءَ کساس بیست ءُ سَے مردم بیران بیتگ ات اَنت-

تنی وھدی ھشت ھزار ءُ چارسد مردمانی بیرانی ءِ ھبر راست بوتگ انت وھدیکہ چاردہ ھزار ءَ گیش دمگی مردم زدگ بوتگ انت، بلے اے ھما انت کہ سرجمیں پکا بوتگ انت –

اقوام متھدہ ءِ انسانی ھکانی برزی تبک ءِ کمشنر وولکر ترک ءَ اے گپ ءِ پدرائی کتگ کہ یوکرین ءِ برجاھیں جنگ ءَ ھشت ھزار ءُ چار سد شھری جنگ بوتگ انت ءُ چاردہ ھزار زدگ بوتگ انت –

ترک ءَ اقوام متھدہ ءِ انسانی ھکانی کونسل ءِ پنجاھ ءُ دومی نشست ءَ یوکرین ءَ نوکتریں جاورھالانی سر ءَ تران کتگ –

یوکرین ءِ بگیری ءَ روس ءِ جنگ ءَ انسانی ھک ءُ میان استمانی انسانی ھکانی لگتمالی ھمک روچی کارے جوڈ بوتگ ” اے درگت ءَ ترک ءَ سال دوھزار بیست ءُ دو ءِ فروری ماہ ءَ برجاھیں جنگ ءِ درگت ءَ سرپدی داتگ -.

وولکر ترک ءَ گوشتگ کہ تنی وھدی ھشت ھزار ءُ چارسد دمگی مردمانی بیرانی ءِ ھبر راست بوتگ انت وھدیکہ چاردہ ھزار ءَ گیش زدگ بوتگ انت بلے اے کچ سرجمی ءَ پکا نہ انت چو ھما برپ ءَ مانپوشتگیں کوھ ءِ گوں چماں چارگ انت –

آئی ءَ گوشتگ کہ زند ءِ میان استمانی نھاد ءِ درگت درساں گیش جنجالانی دیمپان انت چریشی ءَ کساس 1.6 ارب مردمانی زند ءُ مالاں تاوان رستگ ءُ بازیں ڈیھانی مھکمی ترس ءِ تہ ءَ انت –

ترک ءَ گوشتگ کہ وردنی رہداری معاہدہ ءَ میان استمان ءَ پھریزگ ءُ جھان ءَ کروڈاں مردمانی زند ءِ واست ءَ اژدری انت –

بلوچستان لبریشن فرنٹ ءِ جارکش میجر گھرام بلوچ ءَ رسانکدرءَ شنگ کُتگیں درشانے تہءَ گُشتگ کہ بی ایل ایف ءِ سرمچاراں کیچ ءِ دمگ ڈنک ءَ پاکستانی پوجءِ دو کارندہ کُشتگ اَنت۔

آئی ءَ گُشتگ کہ سرمچاراں ڈنک ءَ پاکستانی لشکریانی چوکی ءَ پھازگی دیوکیں کارندھانی سر ءَ وتکاریں مزنیں سلاھاں گوں اُرش کُتگ کہ ایشی ءِ آسر ءَ دو کارندہ مُرتگ اَنت۔

میجر گھرام بلوچ ءَ گُشتگ کہ بلوچستان لبریشن فرنٹ اے اُرش ءِ تہ ءَ دو کارندھانی کوش ءِ زمہ واری ءَ من اِیت۔ زورگپتگیں بلوچستان ءِ آجوئی ءَ داں قوضہ گیریں لشکری ءُ آئی کمکارانی سر ءَ اُرش برجاہ بنت۔

‏‎بلوچ لبریشن آرمی ءِ جارکش جئیند بلوچ ءَ رسانکدراں شنگ کُتگیں یک درشانے تہ ءَ گُشتگ کہ مئے سرمچاراں زامران، کولواہ، خاران، پنجگور ءُ ڈھاڈر ءَ جتاھیں اُرشانی تہءَ قوضہ گیریں پوج نشانگ کُتگ، اُرشانی آسر ءَ دژمنیں پوج ءِ پنچ کارندہ مُرتگ ءُ گِپت ٹپی بیتگ اَنت۔

بی ایل اے ءِ جارکش ءَ گُشتگ کہ سرمچاراں مروچی سھب ءَ ادار ھشت ءِ نزیک ءَ کیچ دمگ ءِ زامران ھنکین ءَ سادیم ءِ ھند ءَ زورگیریں پاکستانی پوجءِ یک گاڑی ءِ ھما وھدءَ دگ بستگ ءُ اُرش کُتگ کہ آ ترءُگرد کنگ ءَ بیتگ۔ آئی ءَ گُشتگ کہ سرمچاراں نوکیں ءُ وتکاریں سلاہ کارمرز کُتگ اَنت، کہ اِشی آسر ءَ گاڑی ءَ سواریں دژمنیں پوج ءِ چاریں کارندہ شیر احمد، لانس نائیک محمد اصغر، سپاھیگ محمد عرفان ءُ سپاھیگ عبدالرشید ھما دمان ءَ مُرتگ اَنت۔

‏‎جئیند بلوچ ءَ گُشتگ اُرش ءِ آسر ءَ دژمنیں پوجءِ گاڑی سرجم ءَ تباہ بیتگ وھدیکہ سرمچاراں درستیں کُشگ بیتگیں کارندھانی سلاہ ءُ شورو دستیگ کُتگ اَنت۔

‏‎درشان ءِ تہءَ دیمترءَ گُشگ بیتگ کہ بی ایل اے ءِ سرمچاراں دومی اُرش مروچی پنجگور شھر ءَ قوضہ گیریں پاکستانی پوج ءِ بنجاھی بنجلءِ پھازگی چوکی ءَ اوشتاتگیں سپاھیگانی سرءَ دستی بمب ءِ گوما کُتگ، تراک ءِ آسرءَ دژمنءِ یک کارندہ ئے ھما دمان ءَ مُرتگ۔

‏‎جیئند بلوچ ءَ گُشتگ کہ گوستگیں شپ ءَ بی ایل اے ءِ سرمچاراں شپ ءِ ادار نُھ ءِ نزیک ءَ کولواہ، رود ءَ قوضہ گیریں پاکستانی پوج ءِ بنجل ءِ سرءَ مزنیں سلاھاں گوں اُرش کُتگ کہ چریشی ءِ تہءَ دژمنیں پوجءِ کم چہ کم دو کارندہ ٹپی بیتگ اَنت وھدیکہ دژمن ءَ گیشتر جانی ءُ مالی تاوان ءِ دیمپانی کنگ کپتگ۔

اِشی ءَ ھوار گوستگیں شپ ءَ بی ایل اے ءِ سرمچاراں خاران ءَ البت ءِ ھندءَ ھم قوضہ گیریں پاکستانی پوجءِ بنجاھی بنجل مزنیں سلاھاں گوں نشانگ کُتگ، سرمچاراں راکٹ ءُ گرنیڈ لانچراں گوں دژمن ءِ کیمپ ءِ سرءَ بازیں گولہ آس داتگ اَنت کہ اِشی آسر ءَ کم چہ کم سئے کارندہ ٹپی بیتگ اَنت وھدیکہ اُرش ءِ تہءَ بنجل ءَ باز تاوان رستگ۔

جارکش ءَ دیمترا گُشتگ کہ بی ایل اے ءِ سرمچاراں گوستگیں روچ ءَ دگہ یک اُرش یے ءَ سبی ءِ ھنکین ڈھاڈر ءِ قلم دین چارراہ ءِ سرءَ بستگیں دژمنیں پوج ءِ چوکی ءَ اوشتاتگیں کارندھانی گوں دستی بمب اُرش ءَ نشانگ کُتگ اَنت، اُرش ءِ آسر ءَ دو کارندہ ٹپی بیتگ اَنت۔ اُرش ءَ پد پروش وارتگیں دژمن ءِ کارندھاں کورکائی تیرگواری کُتگ۔

‏‎جیئند بلوچ ءَ گُشتگ کہ اے درستیں اُرشانی زمہ واری ءَ بلوچ لبریشن آرمی من اِیت ءُ ما اے اھدءَ پدءَ نوک کنیں کہ دژمن پوجءِ درکپگ ءَ داں مئے اُرش گوں ترندی ءَ برجاہ مان اَنت۔

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار (5000) روچ سرجم بوتگ انت، بنجل ءَ وی بی ایم پی ءِ سرکماش نصراللہ بلوچ، کمک سرکماش ماما قدیر بلوچ ءُ دگہ مردم بیگواھیں مردمانی کھولاں گوں نشتگ انت وھدیکہ مروچی بی ایس او پجار ءِ سرکماش زبیر بلوچ گوں وتی کابینہ ءِ ھمراھی ءَ بنجل ءَ اتکگ ءُ دلپدردی درشان اِتگ –

ھمے وھد ءَ گل ءِ کمک سرکماش ماما قدیر بلوچ ءَ گوشتگ کہ وی بی ایم پی ءِ جوڈ کتگیں زھرشانی بنجل ءَ مروچی پنچ ھزار روچ سرجم بوتگ انت – مروچیگیں روچ پہ ھمے ھاتر ءَ ارزشت داریت کہ ھزارانی کچ ءَ زورانسری آوار جنگ بوتگیں مردمابی یل کنائینگ ءُ در کانودی سدانی کچ ءَ بلوچانی کوش ءِ بگیری ءَ بندات کنگ بوتگیں پُرایمنیں جھد ءَ بازیں وھدے ءَ گون سبر ءُ اوپار ءُ ھاٹیگ ءَ، کشندہ ٹولیانی نیمگ ءَ کُشگ ءِ بیھاراں ابید ھم اے دراجیں سپر بُراِتگ ءُ پنچ ھزار روچ سرجم کتگ انت – اے پنچ ھزار روچانی میان ءَ ما گوں ھما دلسیاھیانی تہ ءَ گوستگ انت آھانی درشانی ءَ ھمے واست ءَ نہ کناں کہ من اے نلوٹاں کہ بلوچ راجی زرمبشت ءِ تہ ءَ وتی جانانی دیمھونی دیوکیں ورنا ، چیریں ادارھانی زنداناں ازیت سگگوکیں بلوچ پرزند، بلوچانی گوم ءَ بؤوکیں در انسانی رویش، آھانی سر ءَ بووکیں زلم زوراکی، انسانی جونانی کم شرپی ءُ یک مزنیں دژمن ءِ گوم ءَ جنگ کنوکیں بلوچ راج کہ ھما وڈ دیمھونی دیگ انت گڈا آھانی دیم ءَ مئے اے جنجال ءُ کربانی ھچ نہ انت –

“اے پنچ ھزاریں روچانی پرایمنیً جھد ءِ میان ءَ بلوچ سیاسی پاٹی، نودربرگل، انسانی ھکانی گل ءُ بلوچ راج ءِ ھمراہ داری ءَ مئے جزبگ مھکم کتگ ءُ مارا دلبڈی داتگ -.

آئی ءَ گوشتگ کہ جھان ءِ تہ ءَ مروچی راجی زرمبشت ھمے شوربندیانی ردد ءَ جھد ءَ دیم ءَ برگ ءَ انت vbmp ھم پہ ھمے ھاتر ءَ جوڈ کنگ بوتگ کہ بلوچستان ءَ چیریں ادارہ ءُ ریاستی پوج ءِ زوراکی، بلوچ نودربر، سیاسی باسک، وکیل ، ماسٹر ءُ زانتکارانی زورانسری آوار جنی ءُ آھانی ژانگولیں جونانی دور دیگ ءِ درگت ءَ.اقوام متھدہ رسانکدر، انسانی ھگانی گلاں دگہ میان استمانی ادارھاں سرپدی دیگ ـ ھمے درچ ءِ سیاسی ءُ جمھوری وڈو ڈول وتیگی کتگ ءُ وی بی ایم پی ءَ شال ءَ زھرشانی بنجل اڈ داتگ ءُ اشی ءِ ھمراھی ءَ اقوام متھدہ، انسانی ھکانی گل ءُ میڈیا سرپدی داتگ انت –

ھمے وڈ بلوچستان ءَ بیگواھیں مردمانی ژانگولیں جونانی دست کپگ ءِ درگت ءَ اقوام متھدہ، انسانی ھکانی کونسل، یورپی یونین امریکہ کنیڈا ءَ ھوار ایندگہ ڈیھ سرپدی داتگ انت کہ آئی ءِ برورد اے در اتکگ انت کہ اقوام متھدہ ءَ انسانی ھکانی کونسل ءَ یک ٹولی ءِ پاکستان ءَ دیم داتگ –

ھمے وھد ءَ بی ایس او ءِ سرکماش زبیر بلوچ ءَ گوشتگ کہ پنچ ھزار روچ انت کہ شال ءِ پریس کلب ءِ دیم ءَ بیگواھیں مردمانی کھول، جنین ءُ.مردین زھرشانی ءَ نشتگ انت بلے اے بنکی جیڑہ ھمک روچ گند انت بلے ھنگت سرکار ءَ وتی چم بند کتگ انت ءُ بلکنہ اشی ءِ تہ ءَ گیشی ھم آرگ بوتگ ـ ھمے زوتاں زھگ ءُ زالبولانی سر ءَ وتگڑیں بھتام جنگ بوتگ دزگیر کنگ بوتگ انت کہ اشی ءِ گر ءُ دار ءِ ھاتر ءَ مارا بھیسیت ءِ یک راج ءِ یکجاھ بوگ ءُ اشی ءِ دیما اوشتگی انت

بلوچستان ءِ دمگ چمن ءُ کش ءُ ھوری دمگاں زمین چنڈ سما کنگ بیتگ ءُ زمین چنڈ ءِ سبب ءَ لوگ ءِ کود ءِ کپگ ءُ سلے جنکو بیران بیتگ اَنت-

لیویز ءِ رد ءَ زمین چنڈ ءِ سبب ءَ مزن شھدگ ءِ نزیک ءَ بلالزئی ءِ ھند ءَ یک لوگے ءِ کود کپتگ ءُ سَے جنکو بیران بیتگ اَنت ءُ لوگ ءِ چیر ءَ چیر تر اتگیں زالبولے ءَ ھوار پنچ زھگ زدگ بیتگ اَنت-

زانگ بہ بیت گوستگیں روچ ءَ سَے ٹک شش ءِ زمین چنڈ بیتگ – زمین چَنڈ زانتکار ءِ رد ءَ زمین چنڈ ءِ بنجل چہ شال ءَ پنجاہ کلو میٹر رودراتکگ گوریچاناں بیتگ-

اسٹنٹ کمشنر نوید عالم ءِ رد ءَ زمین چنڈ کم بیتگ بلے نیزورین لوگانی اوپار ءَ نہ بیتگ –

روکپتی بلوچستان ءِ تیابدپی شھرچھبار ءَ ایرانی پولیس ءَ یک تیل کشیں گاڑی ءِ رندگیری کتگ ءُ چریشی ءَ چہ گاڑی کپتگ –

ھالانی رد ءَ گوشگ بیتگ کہ مروچی سھب ءَ ایرانی پولیس ءَ چھبار ءَ یک تیل کشیں گاڑی ءِ رندگیری ءِ کتگ ءُ چھبار ءَ ھپت کیلو میتر ءِ دوری ءَ تیس کوپان نوک آباد ءَ گاڑی کپتگ –

ھالانی رد ءَ گاڑی ءِ کپگ ءَ پد گاڑی ءَ آس لگ اتگ ءُ گاڑی ءِ ڈرائیور بیران بیتگ –

وئیل ءِ ھلاپ ءَ مھلوک ءَ زھرشانی کنان ءَ دگ بند کتگ ءُ چریشی ءَ ھردوکیں نیمگاں اوشتوکیں گاڑیانی لین لگ اتگ ءُ بازیں مساپرے مھتل بیتگ-

مھلوک ءِ گوشگ اِنت کہ گاڑی ءِ آس کپگ ءُ پد ءَ پولیس ءَ گاڑی ءَ آس کپتگیں جاوراں یل کتگ ءُ شتگ چریشی ءَ چہ گاڑی ءِ ڈرائیور بیران بیتگ-

روکپتی بلوچستان ءَ گوستگیں سال ءَ رپورٹ بیتگیں اھوالانی توک ءَ 82 تیل کشیں مردم ھمے رنگ ءَ دگ وئیل یا ایرانی لشکر ءِ تیرانی سبب ءَ بیران بیتگ اَنت –

بلوچستان ءِ دمگ نوشکی ءَ ناشناسیں سلاہ بندیں مردماں تیرگواری کتگ یکے کُشتگ ءَ یکے ٹپی کتگ-

کُشگ بیتگیں مردم ءِ کھول ءَ میت ءِ ھمراھی ءَ سی ڈی شھدگ زھرشانی نندانک جتگ ءَ بند کتگ-

گیشیں ھالانی رِد ءَ گوستگیں شپ ءِ ساھت سے ءَ آر سی ڈی شھدگ ءِ سر ءَ برجاھیں مھپل ھوٹل ءِ نزیک ءَ ناشناسیں مردماں تیرگواری کتگ ءُ محمد حیات نامیں مردمے کُشتگ ءُ آیانی ھمراہ محمد یعقوب جمالدینی ٹپی کتگ-

اُرشکار ھما دمان ءَ تتکگ اَنت، وئیل ءِ بگیری ءَ کُشگ بیتگیں محمد حیات گرگناڑی ءِ کھول ءَ شمبے ءِ روچ ءَ میت ءِ ھمراھی ءَ آر سی ڈی شھدگ ءِ سر ءَ نندانک جتگ چریشی ءَ چہ شال ءُ تفتان ءِ بُنجاھی شھدگ ءِ سر ءَ گاڑیانی روگ ءُ آیگ ءَ مھتل بیتگ ءُ گاڑیانی دراجیں لین لگ اِتگ-

ماہ ءِ رمضان ءَ مساپر ءُ ٹرانسپوراں تُرندیں دلسیاھی ءِ دیمپان کنگ کتگ- ایس پی عبدالروف بڑیچ ڈی ایس پی ءُ ایس ایچ او ءِ ھمراھی ءَ کھول ءَ گوں گپ ءُ رپ کتگ ءُ کُشکاراں زوت دزگیر کنگ ءِ باور کنائینتگ ءُ کھول ءَ زھرشانی ھلاس کتگ- ھمے وھد ءَ بی این پی ءِ سنٹرل کمیٹی ءِ باسک میر خورشید جمالدینی ءُ دگہ سیاسی پارٹیانی راھشون ساڑی بیتگ اَنت-