TBP Balochi

روکپتی بلوچستان ءِ بنجاھی شھر زاھدان ءَ یک بندیگیں مردمے پاھو دیگ بیتگ-

گیشیں اھوالانی رد ءَ زاھدان ءِ مزنیں زندان ءَ مروچی یک بندیگیں مردمے نشہ باپاری ءِ بھتام ءَ پاھو دیگ بیتگ-

پاھو دیگ بیتگیں مردم ءِ پجار سی ءُ ھشت سالی ئیں ابراھیم عالیزئی جھمنند کریمپور زاھدان ءِ نام ءَ زانگ بیتگ-

اھوالانی رد ءَ ابراھیم ایرانی سال سیزدہ سد ءُ نود ءُ ھشت ءَ گرگ بیتگ ءُ چریشی ءَ پد آئی ءِ سر ءَ ایرانی آمیدگس ءَ نشہ باپاری ءِ بھتام جتگ ءُ آئی ءَ را مروچی پاھو داتگ –

زانگ بہ بیت گوستگیں روچ ءَ ھم زاھدان ءِ جھمنندین مردمے ماں کرمان ءِ زندان ءَ پاھو دیگ بیتگ ات-

اھوالانی رد ءَ ھمے سال ءِ بندات ءَ داں انیگ ءَ پنجاہ ءُ ھشت یک سد ءُ پنجاہ ءُ نُھ مردم پاھو دیگ بیتگ انت کہ آیانی چار زالبول ھوار اَنت کہ اے جتا جتائیں زنداناں پاھو دیگ بیتگ اَنت-

بلوچ تھریک ءُ زالبولانی کِرد

نبشتہ کار: ماہ گل بلوچ

دی بلوچستان پوسٹ

پہ یک ھاسیں مکسدے ءَ لھتیں مردم یکجاہ بنت ءُ جھد کن انت گڑا ھمیشی ءَ تھریک گوش اَنت، تھریک پہ وڑ وڑیں مکسداں برجاہ بنت، دنیا تہ ءَ باز تھریک بوتگ اَنت کہ آیانی مکسد چہ یکے دومی ءَ گستا بوتگ انت-

ھمے ھساب ءَ بلوچ ءِ تھریک پہ یک ھاسیں مکسدے ءَ دیم ءَ جنزگ ءَ اِنت، بلوچ ءِ آجوئی جُنز مروچی بندات نہ بوتگ بلکیں اے جنگ چہ ھزاراں سال پیش بندات بوتگ ءُ دیم ءَ جُنزگ ءَ اِنت- اے جنگ ءِ یک مسالے ھمیش اِنت وھدے انگریز بلوچستان ءِ سر ءَ کبزہ کن اَنت، گڑا آگاابداکریم، میر مھراب ھان ءُ دگہ بازیں بلوچ انگریزانی ھلاپ ءَ جنگ کن انت وتی ساہ ءَ پہ ڈیھ ءِ رکینگ ءَ ندر کن اَنت، انگریزاں پد پاکستان وڑیں ملکے بلوچستان ءِ سر ءَ کبزہ کنت بلوچ تھریک ھمے ھساب برجاہ انت ءُ زوراکانی ھلاپ ءَ جنزگ ءَ اِنت-

اے جنگ ءِ تہ ءَ بلوچ ورنا پیر ءُ آجزاں ھوار بلوچ زالبولانی بلاھیں کِردے ھست۔ دُنیا کجام تھریک ءَ بچارئے گڑا زالبولانی یک بلاھیں کردے گندگ بیت ھمے ڈول ءَ بلوچ تھریک ءِ تہ ءَ زالبولانی بلاھیں کردے ھست۔ آ چاگردی ءُ سیاسی کار بہ بیت یا بلوچ ڈیھ ءِ آجوئی ءِ جنز ھمک جاہ ءَ زالبول گوں وتی پت ءُ براتاں ھمگام اَنت ءُ اوشتاتگ اَنت۔

بلوچ تھریک ءِ تہ ءَ پہ جھد ءَ زالبولانی ھر وڑیں جھد گندگ بیت، گوستگیں وھد ءَ بانڑی ءُ دگہ بازیں شیزالیں کرد بوتگ اَنت، کسے لُمہ کریمہ ءِ وڑ ءَ جھد کنگ ءَ اِنت، کسے ڈاکٹر مھرنگ ءُ داکٹر سبیہ ءُ سمی یا کہ آدگہ شیرزالیں زالبولانی وڑ ءَ کہ آ پہ بیگواھیں مردمانی آجوئی ءَ ھر وڑیں درد ءُ اندوھاں برداش کنگ ءَ اَنت۔

مرچی بلوچ زالبولانی جھد ءَ دگہ رنگے آورتگ بانک شاری ءُ بانک سمُیہ ءِ وڑ ءَ چہ وتی ساہ ءَ سرگوستگ اَنت پدائی کنگ ءَ اَنت۔ اگاں دنیا ءِ تھریکانی تہ ءَ زالبولانی کرد گندگ بنت ھمے وڑ ءَ بلوچ تھریک ءِ تہ ءَ بلوچ زالبوالانی بلاھیں کردے ھست۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

چمشانک: The Metamorphosisکتاب فرانز کافکا

نبشتہ کار: لقمان آسکانی

دی بلوچستان پوسٹ

پرانز کاپکا ءِ نبشتگیں “میٹامورفوسس ” یک جُھلگ ءُ دُور ھیالیں گِدارے کہ آ وت ءَ پجّا آرگ ، بیگانگی ءُ زندگی (وجودیت) ءِ بُنگپ ءِ سر ءَ گُمان دیگ ءَ اِنت ۔ 1915 ءِ اے چاپ بوتگیں لبزانکی مَڈّی کاپکا ءِ مشور تریں کاراں چے یکّے بوت ، ءُ اے گِدار ءِ جوانی ءُ راست ناکی ءَ وانوک وتی اندر ءَ گار ءُ بیگواہ کُت اَنت ۔ اے کِسّہ گریگور سامسا ءِ کنارگاں گردیت کہ آ باپاری ءِ کار ءُ بارانی تہ ءَ مُدامی سَپر کنت ، آ یک سُھبے پاد کئیت ءُ پُولگ ءَ لَگّ اِیت ، آ یک مزنیں لُولُّکے ءِ دْروشم ءَ مَٹّ بیت اِنت ۔ اے ناگتیں مَٹّ بوھگ گریگور ءِ پھم ءَ چے ڈَنّ بیت ءُ وتی زندگی ءِ اندر ءَ تھنائی ءُ بے کدری ءَ گوں نندیت ءُ ھیال ءِ چھرانکی دْروشم ءَ کار کنگ ءَ لَگّ اِیت ۔ وھدیکہ آ وتی نوکیں جاوراں گوں دُوچار بیت ، گِدار گریگور ءُ آئی ءِ کُٹم ءُ تمن ءِ نیام ءَ کِرد ءِ شوھازگ ءَ لَگّ اِیت ، بزاں تْرس ءُ بیم ، کست ءُ کینگ ءُ بے دردی ءَ ھوار آئی ءِ مَٹّ بوھگ ءِ پسّو بند ءَ دنت ۔

کاپکا ءِ اے نبشتگیں گِدار ءِ انداز زیات وتشناسی بزاں وتی پجّا آرگ ءِ سر ءَ اِنت کہ وانوک ءَ گریگور ءِ تھی جیڑہ ءُ زندگی ءِ اندر ءَ دؤر دنت ءُ نبشتہ کار ءِ نیمگ ءَ ساز اِتگیں ندارگ ءِ اکس کاری یکشل ءَ بیان کنگ ءُ اسلی چاگرد ءِ کارمرزی ءَ پدّر کنگ ءَ اِنت ۔ اے کِسّہ ءِ تہ ءَ تکانسُری ءُ کندارینگی ھردوکیں ھیالات پھم ءِ تہ ءَ ودی بیت اِنت ۔ کاپکا ءَ اِزمکاری ءَ ابید مِر مِرانکیں بچکند ءِ ساھت ءَ گوں نہ اُمیتی ءِ بُنکی ءُ اندری مارشتاناں گوں ھمدپ کنگ ءَ اِنت ۔ آئی ءَ چہ اے گِدار ءِ تہ ءَ ڈکھ ءُ مونجائی ءِ جتائیں دابے گندگ ءَ کیت اِنت ۔

میٹامورفوسس ءِ جوانتریں بھر ایش اِنت کہ وانوک ءِ ارواہ ءِ اندر ءَ چیھانٹانی جوانی ءَ در کنت ، کاپکا ءَ بزاں پجّا آرگ ، بیگانگی ، زندگی ءِ پیمیں بُنگپانی شوھازگ ءِ ھَد ءُ سمسراں گوں بندوک اِنت ۔ اے گِدار انسان ءِ زندگی ءِ وڑ ءُ پیم چاگرد ءِ رھبند ءُ وتی جند ءِ واھشتانی باروا مزنیں جُستے چِست کنت اِنت ۔ در انسانی اسرات ءُ بُن ءُ بیھ ئیگی نگدانک ءِ دْروشم ءَ کار کنت اِنت۔

ایشاں چے پد میٹامورفوسس کارست ءِ ھساب ءَ تونگّر نہ اِنت ، چُشکہ گریگور ءِ مَٹّ بوھگ ءُ آئی ءِ کُٹم ءِ رد ءِ اَمل آئی ءِ کُٹم ءِ ھر مردم نپسیاتی اسرات نزیک نزیکی ءَ زاھر کُت اَنت ۔ مردم سیاد ءُ وارسانی چیریں سُر ءُ پُر ھمگرنچی ءُ نازرکی ءَ گوں درا کُت اَنت ۔

پد ءَ ھم لھتیں وانوکاں بیانیہ زُور چیر دیانت ئےِ کاپکا ءِ نبشتگ کنگ ءِ انداز زیات پسّو ءِ شوھازگ اِنت ، جُست ءَ نہ سرجمیں پلاٹ ءِ رِداں اِنچو ارزشت نہ دنت ۔ ھر وانوکے کہ زندگی ءِ بُن بیھ ءُ بے اوستی ءِ جاورالاں کندارینگی بازیاں کَڈّن کنت ایشی ءَ چے پد گِدار ءِ تہ ءَ ابہام ءُ پُراسراریں منزلے آئی ءِ تہ ءَ گیشی کنت اِنت ۔

البتہ میٹامورفوسس یک مزنیں رنجناکیں لبزانکی کارے کہ وتی زندگی ءِ بُنگپ انسان ءِ جاورال ءِ ھوری ءَ وانوک ءَ وتی اندر ءَ بیگواہ کنت ۔ کاپکا ءِ اے نبشتگیں رم آئی ءِ ھیالات ءُ کِسّہ ءِ گوماں ھوار ، ءُ اے گِدار ءَ آ مردمانی واست ءَ الم بوان کہ انسانی زانت ءِ جُھلانکی ءُ چاگرد ءِ چیر ءُ سریں جیڑھانی زانگ ءِ واست ءَ باز ارزشت دار اِیت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اردن پبلک سکیورٹی ڈیپارٹمنٹ ( پی ایس ڈی) ءَ یکشمبے ءِ روچ ءَ گوشتگ ات کپ ناشرکاری ءِ بھتام ءَ سَے باگی ءِ مردم زرباری رودراتک ءِ سیمسر ےَ پولیس ءِ گون ءَ تیرگواری ءِ میان ءَ کُشگ بیتگ اَنت-

عرب نیوز ءِ رد ءَ شمبے ءِ روچ ءَ پولیس ءِ تیرگواری ءَ بیران بیتگین مردمانی تہ ءُ دو کس بندیگ بیتگ اَنت کہ ھمے زوتاں یک بنجلے ءَ تتکگ ءُ شتگ بیتگ اَنت-

بیران بیتگیں مردمانی سیمی مردن الحسینیہ سیل ءِ باسکے بیتگ ءُ سرکار ءَ چیرتریں مردمانی لڑ ءَ ھوار بیتگ ءُ گوستگیں سال ءِ شانزدہ دسمبر ءَ اردن ءِ زرباری دمگاں پیٹرول ءِ نھادانی گیشی ءِ ھلاپ ءَ بیوکیں زھرشانیانی وھد ءَ کرنل عبدالزاق الدلابیح ءِ کوش ءَ ھوار بیتگ-

پبلک سکیورٹی ڈیپارٹمنٹ ءِ جارکش عامر السرطاوی ءَ گوشتگ کہ پولیس ءَ سعودی عرب ءُ اردن ءِ زرباری رودراتک ءِ سیمسر ءَ یک دوریں جاھے ءَ تتکگیں بندیگانی بنجل ءِ نشانگی کتگ بیتگ-

جارکش ءَ گوشتگ کہ ھیلکاری پولیس ءِ انگیر ءَ اتکگیں ءُ تتکگین مردماں پولیس ءِ سر ءَ وتکاریں سلاھانی گون ءَ پولیس ءِ سر ءَ تیرگواری بندات کتگ چریشی ءَ پسھی تیرگواری ءَ ھرسَے کشگ بیتگ اَنت-

جارکش ءَ گوشتگ کہ اے مردمانء ڈی این اے ٹیسٹ ءُ کھول ءِ مردمانی سبب ءَ پجار دیم ءَ اتکگ اَنت- آئی ءَ گوشتگ کہ بندیگاں چہ جیل ءَ تچگ ءِ پٹ ءُ پول برجاہ اِنت-

زانگ بہ بیت زرباری اُستان معان ءَ پٹرول ءِ نھادانی گیش بوگ ءِ جنگ ءُ چوپ بیتگ ات کہ چریشی ءَ پولیس ءِ ڈپٹی ڈائریکٹر کرنل ڈاکٹر عبدالرزاق الدلابیخ ءِ سرا تیر لگ اتگ ءُ چریشی ءَ آ بیران بیتگ ءُ واکداراں اے ناشری جنگ ءُ چوپے ءِ نام داتگ ات-

پد ءَ سکیورٹی لشکر ءَ معان ءِ شر ءَ ڈپٹی ڈائریکٹر کرنل عبدالرزاق الدلابیخ ءِ کوشکارانی ھلاپ ءَ بیڑ برتگ ءُ پد ءَ باگیانی بنجل ءِ سر ءَ اُرش کتگ ءُ ھمے وھد ءَ کوش ءَ ھواریں مردمے کُشگ بیتگ ات ءُ سکیورٹی لشکر ءِ سَے کارندہ کُشگ بیتگ ات اَنت پنچ زدگ بیتگ ات اَنت ھشت مردم دزگیر اش کتگ ات-

سربوتگیں ھالانی رِد ءَ بلوچستان ءِ بنجاھی شھر شال ءَ دُزانی تیرگواری ءَ پت گوں ھمراھے چُک ءَ بیران بوتگ انت ، وئیل ءِ بگیری ءَ مردمانی زھرشانی وھدیکہ لورلائی ءَ دو ٹولیانی میان ءَ تیرگواری ءَ یک مردمے بیران ءُ دو زدگ بوتگ انت –

شال ءَ ڈنگی ءِ وئیلانی تہ ءَ گیشی اتکگ، دمگی مردم چریشی ءَ دلسیاہ، نوکتریں ھالانی رِد ءَ دُزانی تیرگواری ءَ دگہ دو مردم بیران بوتگ انت –

بلوچستان ءِ مستریں ءُ بنجاھی شھر دُز ءُ ڈنگانی دیمپان انت کہ اودا ھمک روچ مردم پُلگ بوگ ءَ انت یک ماھے ءِ میان ءَ ھپت مردم اے وئیلاں کُشگ بوتگ انت –

مروچی یکشمبے ءِ روچ ءَ شال سریاب ءَ قمبرانی دگ ءَ پرپٹ ءِ پُلگ ءِ ھاتر ءَ دو مردم کُشگ بوتگ انت، وئیل ءِ بگیری ءَ سریاب ءِ جھمننداں دگ بند کتگ ءُ زھرشانی کتگ –

تیرگواری ءَ بیران بوتگیں مردمانی پجار عبدالکریم ءُ اعجاز ءِ ناماں چہ بوتگ انت کہ ھردو پت ءُ چُک انت – چہ اے وئیلاں دمگی مردمانی دل ءَ تُرس ءِ پیداک بوتگ –

درنگاز کنوکانی رِد ءَ واکدار ءُ پھازگی لشکر شھر ءِ ایمنی آرگ ءَ دلگوش دیگ ءَ نہ انت شھر چہ دُز ءُ ڈنگاں پُر انت آھاں چہ سر وزیر ءَ لوٹ کتگ کہ وئیل ءِ بگیری ءَ گامگیج بہ زوریت –

درنگاز کنوکانی رِد ءَ شال ءَ اے دابیں وئیل ھمک روچ گیش بوان انت یک ماھے ءِ میان ءَ ھپت مردم کُشگ بوتگ انت وھدیکہ شال ءِ جھمنندیں مردمانی مال وتی جاہ ءَ نوں آھانی جند پھریز نہ انت –

درنگاز کنوکاں لوٹ کتگ کہ قمبرانی دگ ءَ بوتگیں وئیل ءِ کتکار زوت دزگیر کنگ بہ بنت وھدیکہ شال ءِ نگیگیں جاورانی شر کنگ ءَ واکدار زوت گامگیج بہ زور انت –

دومی نیمگ ءَ بلوچستان ءِ دمگ لورلائی ءَ دو ٹولیانی میان ءَ تیرگواری ءَ وئیل ءَ یک مردمے بیران ءُ دو زدگ بوتگ انت –

تیرگواری ءِ وئیل ءَ جمال خان شمبوزئی بیران بوتگ وھدیکہ گل محمد شمبوزئی ءُ عبدالحکیم شمبو زئی زدگ بوتگ انت –

تیرگواری ءِ وئیل لورلائی ءِ دمگ کلی شمبو زئی ءَ بوتگ ءُ وئیل ءَ بیران ءُ زدگ بوتگیں مردم وت ماں وت پِت ءُ چک اَنت –

ھمے گوشگ بوگ انت وئیل زمینی جیڑوے سوب ءَ بوتگ –

سربوتگیں ھالانی رِد ءَ مکران کوسٹل ہائی وے ءَ ڈیزل ءَ پُریں ٹرکے ءِ چپی بوگ ءَ سَے مردم بیران، پنجگور ءَ گیس سلینڈر ءِ ترکگ ءَ یک مردمے بیران ءُ یکے زدگ بوتگ- وھدیکہ دالبندین ءَ دگ ءِ وئیل ءَ یک مردمے بیران ءُ دو زدگ بوتگ انت ـ

گیشیں ھالانی رِد ءَ مکران کوسٹل ہائی وے ءَ بسول ءِ نزیک ءَ ایرانی ڈیزل ءَ پُریں ٹرک ءِ چپی بوتگ، چریشی ءَ ٹرک ءَ آس لگ اِتگ ءُ سَے مردم سُتکگ ءُ بیران بوتگ انت –

اورماڑہ ءِ ایس ایچ او ءِ سرکماش عابد شفیع ءِ رِد ءَ ایرانی ڈیزل ءَ پُریں ٹرک گوادر ءَ بگر تاں شال ءَ رؤگ ءَ بوتگ تیز روگ ءِ سوب ءَ چپی بوتگ –

بُن گپتگیں ٹرک ءِ آس توسینگ بوتگ ءُ وئیل ءَ بیران بوتگیں مردمانی جون اورماڑہ ءِ درمان جاہ ءَ برگ بوتگ انت – پولیس ءِ رِد ءَ ھرسَے مردم پجارگ نہ بنت –

دگہ وئیلے پنجگور چتکان ءَ دیم ءَ اتکگ کہ پنچر دکانے ءَ گیس سلینڈرے ءِ ترکگ ءَ یک مردمے بیران ءُ یکے زدگ بوتگ-

پولیس ءِ رِد ءَ چتکان ءِ بنجاھی دگ ءَ پنچرے ءِ دکانے ءَ گیس سلینڈر ءِ ترک اِتگ چریشی ءَ نظام ء عصا بیران ءُ کفایت اللہ ء عطاء محمد زدگ بوتگ –

اھوالکار ءِ رِد ءَ ھردو مردم پنچر دکان ءَ کار ءَ بوتگ انت –

دومی نیمگ ءَ بلوچستان ءِ دمگ دالبندین ءَ چہ ھال انت کہ دو گاڑیانی ڈک ورگ ءَ یک مردمے بیران ءُ دو زدگ بوتگ انت –

ھالانی رد ءَ دگ وئیل دالبندین ءِ شھدگ ءَ لاگاپ ءِ نزیک ءَ بوتگ وئیل ءَ بیران بوتگیں مردمے جون ءُ زدگ بوتگیں پرنس فہد نادراھجاہ ءَ سرکنگ بوتگ انت – بیران بوتگیں نوشکی ءِ جھمنند انت – زدگ بوتگیں مردم پہ گیشیں الاج ءِ ھاتر ءَ شال ءَ دیم دیگ بوتگ –

سر بیتگین ھالانی رد ءَ روکپتی بلوچستان ءِ جھمنند ماں کرمان ءَ پاھو دیگ بیتگ-

اھوالانی رد ءَ زاھدان ءِ جھمنندیں مردمے ماں کرمان ءَ نشہ باپاری ءِ بھتام ءَ پاھو دیگ بیتگ –

پاھو دیگ بیتگیں مردم ءِ پجار عبدالھادی ریکی شاھوزئی ء مھمد حسین جھمنند زاھدان ءِ نام ءَ زانگ بیتگ –

اھوالانی رد ءَ آ ایرانی سال نود ءُ نُھ ءَ ماں کرمان ءَ گرگ بیتگ ءُ پد ءَ اود ءَ آئی ءِ سر ءَ پاھو اتکگ بیتگ –

اھوالانی رد ءَ عبدالھادی ءِ سر ءَ ایرانی آمیدگس ءَ بھتام جتگ کہ آئی ءَ را نشہ گون بیتگ ءُ چرے پژدر ءَ آئی ءِ سر ءَ پاھو ءِ ھکم اتکگ بیتگ-

زانگ بہ بیت روکپتی بلوچستان ءَ بندوکیں مردم یکشل ءَ پاھو ءِ دیمپانی اَنت – کہ ایشانی سر ءَ گیشتریں بھتام نشہ ءِ باپاری ءِ جنگ بوگ ءَ اَنت –

روکپتی بلوچستان ءَ لس سیاسی ءُ چاگردی مردمانی گوشگ اِنت کہ ایران ءِ سرکار مردماں روزگار نہ دنت ءُ چریشی ءَ اود ءَ مردم گیشتر دو کار گچین کن اَنت کہ آیانی توک ءَ یکے نشہ ءِ باپاری ءُ دومی تیل کشی اِنت –

بلوچ راج ءِ رَدی

نبشتہ کار: مھرین بلوچ

دی بلوچستان پوسٹ

دُنیا ءِ گْوستانک ءَ وان ئے گُڑا سرپد بَہ ئے کہ تھنا بلوچ راجی آشوب ءُ آجوئی ءِ جنگ اِنت کہ آئی ءِ تہ ءَ زُبان دوستی ءِ ھاٹیگ نیست۔ ما منّ ایں کہ ماں اسکول، کالج ءُ کارجاھاں ھِندی ءُ پارسی ءِ وانگ، نبیسّگ ءُ کارمرز کنگ مئے راج ءِ یک بے وسی ءُ مجبوری یے بلے وتی دزھُورکی وھد ءُ ماں شوشل میڈیا ءَ وتی کلوہ ءُ پوسٹاں ماں ھِندی ءَ نبیسّگ مئے مجبوری یے وَ نہ اِنت بلکیں ماں پیسبوک، وٹس ایپ ءُ دِگہ شوشل میڈیا ءِ پتر ءَ دری زُباناں نبیسّگ ءُ پوسٹ کنگ مئے مجگی گُلامی ءِ یک ٹوھیں نشانی یے۔ گِند ئے مرچاں ٹیکنولوجی ءِ زمانگ اِنت، موبائل ءُ انٹرنٹ ءِ وڑیں آسراتیانی سبب ءَ دُنیا باز تیز اِنت ءُ تیزی ءَ دیمروی ھم کنگ ءَ اِنت۔ دُنیا ءِ ھر کُنڈ ءَ پیسوک، وٹس ایپ، یوٹیوب ءُ انسٹاگرام ءِ وڑیں پتراں ھر راج ءِ وانِندہ وتی جِند ءِ زُبان ءَ پوسٹ ءُ کلوھاں نبشتہ کن اَنت بلے مئے بلوچ راج ءِ رَدکپتگیں وانِندہ وتی دزھُورکی ءُ بے سرکاری ئیں وھد ءَ ھم پارسی ءُ ھِندی ءَ نبشتہ کن اَنت۔

گِند ئے یک راجدوست ءُ زُبان دوستیں بلوچے وتی دزھُورکی ءِ وھد ءَ شوشل میڈیائی پوسٹاں ماں وتی جِند ءِ زُبان ءَ نبشتہ بہ کنت۔ بلے ما گِندگ ءَ ایں کہ ماں شوشل میڈیا ءَ مئے بازیں بلوچ بانُکاریں ٹِک ٹاک اسٹار، وتگڑیں راجی ازمکار ءُ جاھلیں وانِندہ پیسبوک، وٹس ایپ ءُ انسٹاگرام ءَ وتی پوسٹاں اردو ءُ پارسی ءَ نبشتہ کن اَنت۔ انی اے وڑیں مردماں کَے سرپد بہ کنت کہ اے انٹرنٹ ءُ موبائل ءِ آسراتی تھنا پہ بلوچ ءَ نہ اِنت، اے پیسبوک ءُ دِگہ شوشل میڈیا ءِ ایپزاں دُنیا ءِ دِگہ راج ءِ وانِندہ ھم کارمرز کنگ ءَ اَنت۔ ھمے روسی، چینی، اربی، ھندی ءُ بنگالی ءِ وڑیں دنیا ءِ دگہ بازیں راجے ھست کہ شوشل میڈیا ءَ وتی جِند ءِ زُبان ءَ کارمرز کن اَنت۔ گُڑا باید اِنت بلوچ راج ھم وتی شوشل میڈیا ءَ وتی جِند ءِ زبان ءَ بوان ایت ءُ نبشتہ بکنت۔ ما یک گپے تچک ءَ گْوش ایں کہ انگریزی ءَ بوان اِت پرچا کہ مرچیگیں ڈیجیٹل زمانگ ءَ تھنا ھما راج دیمروی کن اَنت وھدیکہ آ راج انگریزی ءَ گیشتر دلگوش بہ کن اَنت ءُ زبر بنت۔ مرچاں میڈیکل سائینس، انجینئرنگ ءُ ٹیکنولوجی دْراہ گوں انگریزی ءَ ھمگرنچ اَنت، کارجاہ ءُ کارگِسی زُبان ھم انگریزی اِنت، انگریزی یک میان اُستمانی زُبانے پمیشکا تھنا ھما راج دیمروی کن اَنت وھدیکہ آ راج اول وتی جِند ءِ راجی زُبان ءُ دومی انگریزی ءَ بوان اَنت۔ اگاں انگریزی، پارسی ءُ ھِندی ءِ وانگ ءُ نبیسّگ ءَ زبر ئے بلے وتی جِند ءِ راجی زُبان ءَ ونت ءُ نبشتہ کُت نہ کن ئے گُڑا بزان کہ تو ناوانندھے ئے، تو بےسوتیں جاھلے ئے۔

گِند ئے تو وت یک ساھت ءُ دمانے ءَ ھم نہ جیڑ ات کہ من پرچا وتی جند ءِ راجی زُبان ءَ ڈالچار کنان ءَ ھِندی یا پارسی ءَ پوسٹ کنگ ءَ آں۔ تو ھِندی ءِ دْراجیں پوسٹاں نبشتہ کن ئے چہ ایشی ءَ زانگ بیت کہ تو ھِندی ءَ وَ زبر ئے، تو وانِندھیں بلوچے ئے، اگاں ترا وتی راج ءُ راجی زُبان بلوچی دوست بوتیں گُڑا تو مُدام بلوچی ءَ نبشتہ کُتگ اَت۔ چہ تئی بلوچی پوسٹاں تئی رِندگیراں ھم بلوچی وانگ ءُ دربرگ ءِ دلبڈی داتگ اَت کہ بلوچی بوان اِت ءُ نبشتہ بہ کن اِت۔ مرچی دُنیا ءِ ھر ایردستیں راج انٹرنٹ ءِ پیسبوک، وٹس ایپ ءُ یوٹیوب ءِ وڑیں آسراتیاں پہ وتی زُبان ءِ دیمروی ءُ زِندگ دارگ ءِ ھاتر ءَ کارمرز کنگ ءَ اَنت۔ گُڑا باید اِنت شمئے وڑیں راجدوست ءُ زُبان دوست کہ بلوچی ءُ بلوچیت نام ءِ سر ءَ کمائی کنگ ءَ اَنت وتی پوسٹاں بلوچی ءَ بہ دے اَنت۔

گِند ئے ما اِے وَ نہ گْوشگ ءَ ایں کہ شما بلوچ زالبول یا بْرات ٹِک ٹوک ءُ پیسبوک ءَ کارمرز مہ کن اِت، بلوچ راج یک آزات ھیال ءُ راجمستری ءِ منّوکیں راجے کہ آئی ءِ تہ ءَ مردین ءُ زالبول ءِ ھک برابر اِنت بلے مارا وتی راجی زمہ واری بے ھیال نہ کنگی اَنت۔ باید اِنت ما بلوچ ھم دُنیا ءِ دگہ راجانی وڑ ءَ موبائل ءُ انٹرنیٹ ءِ آسراتی ءَ پہ وتی راجی زُبان ءُ راجدوستی ءِ ھاتر ءَ کارمرز بہ کن ایں، پیسبوک ءُ شوشل میڈیا ءَ مُدام بلوچی ءَ پوسٹ بہ کن ایں کہ مئے رَندگیریں بلوچ چہ مئے بلوچی پوسٹاں سان(اسر) بہ زور اَنت ءُ ھرکَس چہ پیسبوک، یوٹیوب ءُ وٹس ایپی وانگجاھاں بلوچی وانگ ءُ دربرگ ءِ جُھد بہ کنت، باید اِنت شُما مُدام یا کدی کدی وتی ٹِک ٹوکی تامُرانی تہ ءَ راج ءَ بلوچی وانگ ءُ دربرگ ءِ پیگام، سکین ءُ دلبڈی ھم بدے اِت کہ راج ءِ تہ ءَ بلوچی وانگ ءُ دربرگ ءِ ھمت ءُ بیسہ ودی بہ بیت۔

گُڑا باید اِنت ما وت ءَ دلپروش ءُ دلگران مہ کن ایں، پْروش مہ ور ایں کہ من وانگجاھاں بلوچی نہ ونتگ پمیشکا انی من ھچ نہ زان آں یا من بلوچی نبیسّگ ءَ سُست آں بلکیں ما وت ءَ راجی زُبان ءِ جُھدکار، ھزمتکار ءُ سرمچار جوڑ بکن ایں گیش ءَ چہ گیش بلوچی وانان بکن ایں۔ گِند ئے راستی وَ ایش اِنت کہ بلوچی کَس ءَ ماں وانگجاھاں نہ ونتگ، ما دْراہ چہ ھمے موبائلاں بلوچی وانگ ءُ دربرگ ءَ ایں۔ اگاں ما دہ یا دوازدہ سال پہ ھِندی ءُ پارسی ءِ دربرگ ءَ دے ایں گُڑا بل اِت کہ یک ماھے پہ بلوچی ءِ دَرونت ءُ زُبان دوستی نبشتانکانی وانگ ءَ ھم ھیل بہ کن ایں۔ گِند ئے شمارا کس نہ گْوش ایت شُما اولی ھپتگ ءَ بلوچی نبشتہ بہ کن اِت۔ اگاں تو بلوچی ءِ کسانیں گالرِداں ونت کن ئے گُڑا اِے ھم گنج اِنت۔

مارا وتی موبائل پہ بلوچی زُبان ءِ دیمروی ءَ کارمرز کنگی اَنت پمیشکا باید اِنت شما ھندی ءُ پارسی نبشتہ کنوک، ٹِک ٹوک ءُ راجی گْوشکندہ اول بلوچی دَرونتاں بوان اِت پرچاکہ راست نبیسّگ ءِ ھیل ءُ سرپدی چہ درَونتانی وانگ ءَ رس ایت۔ مارا اول بلوچی درونت ءُ زبان دوستی نبشتانک وانگی اَنت کہ مئے تہ ءَ پہ بلوچی زُبان ءَ مھر ودی بہ بیت۔ مارا مُدام بلوچی نبشتہ کنگ ءُ وتی ردیانی راست کنگ ءِ جزبہ بہ بیت گُڑا ما دیمروی کن ایں۔

شالا راجی زُبان ءِ جھدکار ءُ ھزمتکار بات اِت، بلوچستان ءُ بلوچی شالا دیمروی بکنات۔ شالا انچوش بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءَ ریاستی کارشونیں مڈی

ٹی بی پی شونگال

چہ جنگ ءَ سانمندیں بلوچستان ءَ ریاست ءِ پرمان ءِ برجاہ دارگ ءِ ھاتر ءَ پاکستان ءِ واکدارانی تکاں بازیں شوربندی اَڈ داتگ اَنت، کہ اِیشانی تہ ءَ گمانی پئیم ءَ کُشندہ ٹولیانی کمک ءَ گوں سیاسی ادارگانی سان ءِ ھلاس کَنگ اِنت، سیاسی باسکانی زورانسری بیگواھی ءُ ریاستی ادارگاں گوں بگیری دارگ ءِ پد ءَ کوچ ھم ھوار اِنت۔

ریاست ءِ سر ءَ اے بھتام جنگ بیت اِنت کہ بلوچستان ءِ جتاجتائیں دمگانی تہ ءَ، منشیات پروش، نیکراھی ناشرکار، زمین دُز ، ریاست ءِ کمک اش گون انت ءَ سردار ءُ بلوچ آجوئی بگیریں مردمانی سر ءَ اڈ داتگیں کُشندہ ٹولی ٹھینگ بیتگ اَنت۔ کہ آ بلوچستان ءِ تہ ءَ ریاست ءِ کرد ءَ پیلو کنگ ءَ اَنت۔ اےکُشندہ ٹولی، پاکستانی سرکار ءَ چہ ھم گیشتر تاکت دار اَنت ءُ ریاستی واکدارانی تکاں آ آجوئی ءِ جُنز ءِ دارگ ءُ اگاں ھلاس کَنگ ءِ بدلی ءَ، دُزی ءَ ڈُنگی، پہ تاوان بیگواہ کنگ ءُ کُشگ ءِ پدراھیں اجازت دیگ بیتگ۔

اے کشندہ ٹولیانی تہ ءَ یکے ھزدار ءِ ھنکین وڈھ ءَ شفیق مینگل ءِ مستری ءَ اڈ دیگ بیتگ۔ ھمے زیتاں مینگل ٹک ءِ سردار ءُ بلوچستان نیشنل پارٹی ءِ سروک اختر مینگل ءُ شفیق مینگل یکے دومیگے بگیری ءَ وڈھ ءَ سنگر جنوک اَنت ءُ بھتام جنگ ءَ اَنت۔

بلوچستان نیشنل پارٹی ءَ شفیق مینگل ءِ بگیر ءَ سرجمیں بلوچستان ءَ پرگ بندیں ھڑتال ءِ جار جتگ ءُ آیانی شفیق مینگل ءِ سر ءَ بھتام اِنت کہ آ ریاست ءِ مستری ءَ تاکت ءِ کمک ءِ سر ءَ بلوچستان ءِ تہ ءَ مردمانی بے وار کنگ ءُ بیگواہ کنگ ءَ ھوار اِنت۔

شفیق مینگل ءِ سر ءَ سے بھتام اَنت کہ آجوئی لوٹوکیں گلانی باسکانی زورانسری بیگواھی ءُ کُوشانی تہ ءَ ھوار اِنت، توتک ءِ تہ ءَ در اتکگیں ھواریں کبرانی بھتام ھم شفیق مینگل ءِ سر ءَ لڈگ بیتگ ءُ بلوچستان ءَ نیکراھی ناشرکارانی ھیلکاری ءُ باھوٹی دیگ ءَ ھم آ ھوار اِنت۔ شفیق مینگل چہ سرکار ءَ ھم گیشتر تاکت دار ایت ءُ ھزدار ءَ لیویز ءِ ھشت کارمندانی کُشگ ءَ پد ھم آجوئی ءَ گوں زند گوازینگ ءَ اِنت۔ شفیق مینگل ءِ بگیر ءَ منانکاں ابید ھم آمید گِس اگاں سرکار آئی ءِ ھلاپ ءَ گامگیج زُرت نہ کن اَنت۔

شفیق مینگل ءُ ھوتمان پئیمیں مردم ریاست ءِ کارشونیں مڈی اَنت، وھد ءُ جاورانی پد ءَ آ ھاموش بنت بلے پد ءَ کارکپگ ءِ وھد ءَ آیاں نوکیں ڈبہ دیگ بنت اِنت ۔ پاکستان ءُ بلوچستان ءَ گچینکاریانی چِن ءُ لانچ برجاہ اَنت ءُ گچینکاریانی نزیک آیگ ءَ ھوار شفیق مینگل ھزدار ءَ یک برے پد ءَ سُر ءُ پُر ءَ پرمایگ بیتگ ءُ کیچ ءَ گمانی دروشم ءَ منشیات پروشانی مستر ھوتمان ڈیھی تاکتوریں تکانی کمک ءَ گوں ڈسٹرکٹ کونسل ءِ چیرمین گچین کنگ بیتگ۔ کُشندہ ٹولی ءُ منشیات پروشانی درگت ءَ ریاست ءِ شوربندیانی سوب ءَ بلوچستان ءِ لکھانی کچ ءَ مھلوک سانمند اَنت ءُ اِیشانی اے پالیسی یکشلی ءَ برجاہ بہ مان اَنت گُڑا بلوچ راج ءِ تہ ءَ بے باوری گیشتر ود ایت اِنت۔

جنگانی بدیں بولی

نبشتہ کار: سگار بلوچ

دی بلوچستان پوسٹ

“وش نہ اَنت جنگانی بدیں بولی”
“کہ وتی دوستیں مرُدماں رولی”

ما تاں در کسانی ءَ ھمے کِسہ ءُ بتلانی میان ءَ رُستگ ءُ پاد اتکگیں ءُ دائم ءَ ھمے جیڑ اتگ کہ جنگانی کِسہ ڈولدار اَنت ءُ جنگ کنگ ارزان اِنت، بلے ھردیں کہ مزن بواں بوتگ اِنت جنگانی کِسہ ءِ گرنچ مئے چمانی دیم ءَ بوتگ اَنت تاں ما جیڑ اتگ جنگ کنگ ارزان نہ اِنت، بلے پہ زمین ءُ ننگ ءَ جھد کنگ، سپر کنگ،گھگیری کنگ ءُ جنگ کنگ ءِ ارزِشت دگرے۔ جنگانی کِسہ ءَ ءُ نبیستگیں ردانک ءَ ما وانین ءُ جیڑیں کہ جنگ دپانی گپ اِنت ءُ ارچ ماتی بچ جنگ کُت کنت۔ بلے اے گپ ءَ چا شموشکار اِنت کہ جنگ ھما ماتانی تلاھیں بچاں کُتگ کہ آھاں وتی مادریں زمین ءِ مھر مارِتگ ءُ زمین ءِ ھک ءُ ارزِشت پھم اتگ جنگانی تہ ءَ کھسانی لڑ کپتگ اَنت کہ زندگیں انسان ءَ ابکہ کن اَنت کہ اے بامرداں چہ ٹول اے ساھتاں جیڑ اتگ ءُ جنگ کُتگ، گُلامی ءِ درد، مات ءُ گوھارانی ننگ ءِ پامالی، تاسوکیں بچانی بیگواھی، روڑانی سر ءَ شپ ءُ روچ کنوکیں مات ءُ گوھارانی چمانی ارس، اے دُرست ھمے جنگانی بدیں بولی اَنت کہ ارچ ساھت مئے چمانی دیم ءَ زاھر اَنت۔ اے ھمے جاور اَنت کہ مارا جند ندرانی کِسہ، گُڈی تھرانی کِسہ ءُ ھپتاد ءُ دو ءِ ساھت ءِ سنگرانی کِسہ پہ وانگ ءُ چارگ ءَ دیم ءَ اتکاگاں۔

اے ساھتانی زیبائی ءُ جلواناکی ھما کُنگریں بامرد پھمت کناں کہ سنگر اش داشتگ اَنت ءُ شپ ءُ روچ جنگ ءَ انت، ھما تلاھیں بچ اش زانت کن اَنت کہ کوہ ءُ دگ ءُ پند نچار اَنت ءُ شپ ءُ روچ پہ وتی مھرمین زمین ءَ جھد کنگ ءَ انت، اے جنگانی بولی زیبانک اَنت بس پھمگ ءُ زانگ لوٹ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔