TBP Balochi

روس ءِ پلامرزی کنوکیں جنگولین ٹولی ویگنر ءَ ٹاہ داتگ کہ آیان یوکرین ءِ رودراتکی شھر باخموت دستیگ کتگ بلے دومی نیمگ ءَ سروک ولاددیمیر زیلنسکی ءَ گوشتگ کہ داں انگت ءَ اود ءَ جنگ برجاہ اِنت-

ھال سر کنوکیں ادارہ اے ایف پی ءِ رد ءَ باخموت ءَ انگیر کنگ ءَ ویگنر ءِ ٹولی ءَ روس ءِ لشکر ءِ کمک کتگ-

زانتکارانی گوشگ اِنت اے شھر ءِ اسٹریٹیجک ءِ گچینی اے کساس ءَ گیش نہ اِنت بلے آئی ءِ گرگ ءَ روس ءُ یوکرین ءِ لشکر ءِ جنگ برجاہ اِنت-

ویگنر ءِ سروک یوگنی ھرگوژن ءَ وتی ٹیلی گرام چینل ءَ گوشتگ کہ کمانڈراں سٹی ھال ءُ مرکز ءِ سر ءَ دستیگی کتگ ءُ ایشی ءِ سر ءَ روس ءِ بیرک مک کتگ-

آیانی گوشگ اِنت کہ اے ویگنر پرائیوٹ ملٹری کمپنی یے ءُ اے پوجی اَنت کہ ایاں باخموت ءِ سر ءَ وتی دستیگی کتگ ءُ کانونی رنگ ءَ مئیگ اِنت-

بیست مارچ ءَ یوگنی ھرگوژن ءَ ٹاہ داتگ کہ آئی ءِ جنگولاں شھر ءِ ھپتاد درسد وتی کنٹرول ءَ کتگ-

سروک ولادیمیر زیلنسکی ءَ گوشتگ آئی ءِ لشکر وتی ڈیھ ءِ پھریزی ءَ کنگ ءَ اِنت-

آئی ءَ گوشتگ کہ من منت ءَ گراں کہ آئی ءِ لشکر اودیوکا، مرینکا ءُ گیش گچینی باخموت ءِ نزیک ءَ اَنت ءُ مروچی اود ءَ پرکار اَنت-

یوکرین ءِ واکداراں گشتگ کہ شمبے ءِ روچ ءَ باخموت ءِ نزیک ءَ کساس بیست ءُ ھپت کیلو میٹر ءِ دوری ءَ کوستیاتینو ءَ روس ءِ میزائل اُرش ءَ سَے مردین ءُ سَے زالبول بیران بیتگ اَنت ءُ یازدہ زدگ بیتگ اَنت-

یوکرین ءِ سروک ءِ گوشگ اِنت کہ اود ءَ اُرش بیتگ ا جاہ نندگی جابے بیتگ کہ اود ءَ لس شھری جھمنند بیتگ اَنت ءُ لس مھلوک نشانگ کنگ بیتگ-

ڈونیسک ءِ ھندی پولیس ءَ گوشتگ کہ روس ءَ ایس 300 ءُ یورگان ءَ میزائلاں گون ءَ اُرش کتگ – پولیس ءِ گوشگ اِنت اے اُرش شانزدہ اپارٹمنٹس، ھشت پرائیویٹ لوگ، یک کنڈرگارٹن، یک انتزامیہ ءِ ماڑی یے، سَے گاڑی ءُ یک گیس پائپ لائن نشانگ بیتگ اَنت-

سائیکالوجی ءِ نوزدہ سالیگیں نودر للیا ءِ گوشگ اِنت کہ اے ھالان من ءَ سرپدی رس اتگ کہ ات دمگ ءَ اُرش بیتگ- من باز وشاں اے وھد ءَ لوگ ءَ نہ بیتگ آں –

زورانسری آوار جتگیں مردمانی کھولانی درد

ٹی بی پی شونگال

زورانسری بیگواھیں رشید بلوچ ءِ مات گوستگیں پنچ سالاں چہ وتی بَچ ءِ یل بیگ ءِ اوست ءَ چہ آگ جھان ءَ رپت۔ علی اصغر بنگلزئی ءِ زورانسری بیگواھی ءَ دو دھک سرجم بیتگ اَنت، سمیع بلوچ ءِ کماش ءَ داں دوازدہ سالاں آئی ءَ ودار کُت ءُ چہ اے جھان ءَ پہ مدامی رپت۔ ڈاکٹر اکبر مری ءِ زھگ گوستگیں چاردہ سالاں وتی کماش ءِ ودار ءَ روچاں گوازینگ ءَ اِنت۔ علی حیدر ءَ وتی کسان سالیگیں زند پریس کلبانی دیم ءَ زھرشانیانی تہ ءَ گوازینت بلے آئی ءِ ودار پہ پِت ءِ واتری ءَ داں آسر نہ بیتگ۔ سمی ءُ مِھلب چاردہ سالاں چہ ڈاکٹر دین محمد ءِ واتری ءَ پہ وھد ءَ ھساب کنگ ءَ اَنت ءُ توتک ءِ قلندرانی کھول یک دھکے ءَ چہ وتی دوستیگانی وداریگ اَنت۔ اے بلوچستان ءَ زورانسری بیگواھی ءِ آماچ بیتگیں ھزاراں کھولاں چہ لھتینانی کسہ اَنت۔

اکتوبر سال دو ھزار ءُ نھ ءَ زورانسری بیگواھیں مردمانی کھولاں وائس فار بلوچ مِسنگ پرسنز ءِ بنُھشت ایر کُتگ اَت گوں ھمے واھگ ءَ کہ بوت کنت گوں ھواریں جد ءُ جھد ءَ آیانی دوستیگ یل کنگ بہ بنت بلے وائس فار بلوچ مِسنگ پرسنز ءِ زھرشانی بنجل ءَ پنچ ھزار روچ سرجم بیتگ اَنت ءُ انگت ھم بلوچستان ءَ زورانسری بیگواھیانی یکشلی برجاہ اِنت ءُ بلوچ مات وتی بچانی ودارانی تہ ءَ اے جھان ءَ یل دئیگ ءَ اَنت۔

رشید بلوچ ءِ مات ءَ پنچ سالانی تہ ءَ وتی چُک ءِ یل کنائینگ ءَ پہ آمید گسانی در ٹُک اِتگ اَنت ءُ خضدار ءُ شال ءَ وائس فار بلوچ مِسنگ پرسنز ءِ زھرشانیاں ھم ھوار بیتگ ءُ وتی زھگ ءِ یل کنائینگ ءَ پہ توار چِست کُتگ اَت بلے زھگ یل نہ بوت ءُ زورانسری بیگواھیں زھگ ءِ دردانی پجیگ ءَ آ چہ اے جھان ءَ رپت۔

وائس فار بلوچ مِسنگ پرسنز ءِ سروک ماما قدیر بلوچ ءَ وتی ورناھیں بچ ءِ زورانسری بیگواھی ءَ پد تیرسبتگیں جون ءِ دزگرگ ءَ پد ھم پُر امیت اَنت زھرشانی جنُز بیگواھیں مردمانی یل کنائنگ ءِ سوب جوڑ بیت اَنت ءُ آ گُش ایت کہ داں بیت کہ آ بیگواھیں مردمانی آجوئی ءِ جُنز ءَ برجاہ داریت۔

زورانسری بیگواھیانی سوب ءَ بلوچستان ءَ مردمانی درد بندات بیتگ اَنت، کہ چریشی ءَ ھزارانی کھول سانمند اَنت ءُ ھمک روچی ءِ رد ءَ بیگواھیانی تہ ءَ گیشی پیداک اِنت۔ بلوچستان ءُ پاکستان ءِ سیاسی پاٹی وھدے اپوزیشن ءَ بنت گُڑا اے سنگینیں جیڑھے ءِ سر ءَ توار چِست کن اَنت بلے سرکار ءَ آیگ ءَ پد ھاموش بنت۔ بلوچستان ءَ برجاھیں زورانسری بیگواھی ءِ پئیمیں سنگینیں جیڑھے گیواری درگیجگ نہ بیت گُڑا اِدے جاور گنتریں ھرابیانی آماچ بنت اِنت۔

بلوچستان ءِ دمگ کیچ ءِ ھند گھنہ ءَ پاکستانی پوج ءَ بیڑ برتگ ءُ دو مردم آوار جتگ ءُ برتگ اَنت-

گیشیں ھالانی رد ءَ گوستگیں شپ ءِ ساھت چار ءَ پاکستانی پوج ءَ گھنہ ءَ یک لوگے ءِ سر ءَ بیڑ برتگ ءُ اود ءُ دو ورنا آوار جنگ ءَ پد بیگواہ کتگ اَنت-

آوار جنگ بیتگیں مردمانی پجار صغیر ء رحیم بخش ءُ اختر ء علی ءِ ناماں زانگ بیتگ اَنت-

ھال ءِ راست کنان ءَ چاگردی ترامجاھاں ڈاکٹر شبیر رند ءَ نبشتگ کتگ ءُ گوشتگ کہ شبیر آئی ءِ ناکو زھگ اِنت –

پوج ءِ نیمگ ءَ بلوچستان ءَ مردمانی آوار جنگ ءُ بیگواہ کنگ ءِ درچ یکشل ءَ برجاہ اَنت کہ گوستگیں روچ ءَ ھاران ءَ عزیز نامیں ورنایے ھم پوج ءَ آوار جتگ ءُ بیگواہ کتگ ات کہ چد ءُ پیش چہ ھزدار ءَ جاوید زھری ءُ علی حسن زھری نامیں دو مردم پوج ءَ آوار جتگ ءُ بیگواہ کتگ ات اَنت-

انڈین پریمئر لیگ 2023 ( آئی پی ایل 16 ھم گوشگ بیت) سِی ءُ یک مارچ ءَ بندات بوتگ اے آئی ءِ شانزدھمی ایڈیشن انت کہ ایشی ءِ بنگیج سال دوھزار ءُ ھپت ءَ بورڈ آف کنٹرول آف کرکٹ ان انڈیا ءَ کتگ اے رندی آئی ءِ میزبانی ءَ انڈیا کنگ ءَ انت – آئی پی ایل 16 ءِ سرجمی ءَ ھپتاد ءُ چار گوازی انت ءُ مروچی آئی ءِ چارمی ءُ پنچمی گوازی کنگ بوتگ انت –

مروچیگیں گوازی راجستان رویال ءُ سنرائز حیدرآباد، ممبئی انڈین ءُ رویال چیلنجرز بینگلور ءِ میان ءَ کنگ بوتگ انت کہ راجستان ءَ ھپتاد ءُ دو رن ءُ رویال چیلنجر ءَ ھشت وکٹاں گوازی کٹ اِتگ انت –

مروچی اولی گوازی راجیب گاندھی انٹرنیشنل کرکٹ گوازی پٹ ءَ راجستان رویال ءُ سنرائز حیدرآباد ءِ میان ءَ کنگ بوتگ کہ راجستان ءَ ھپتاد ءُ دو رناں گوازی کٹ اِتگ –

راجستان ءُ سنرائز ءِ میان ءَ بوتگیں گوازی ءَ سنرائز ءَ ٹاس کٹ اِتگ ءُ اول سر ءَ بالنگ کنگ ءِ پیسلہ کُتگ – راجستان ءَ بیٹنگ کنان ءَ بیست اوررانی تہ ءَ پنچ وکٹانی تاوان ءَ دو سد ءُ سَے رنانی ٹارگٹ ایر کتگ کہ سن رائزز بیست اوررانی تہ ءَ ھشت وکٹانی تاوان ءَ ٹارگٹ پروش نہ کتگ ءُ یک سد ءُ سِی ءُ یک رن جوڈ کتگ ءُ گوازی کٹگ ءَ بے سوب بوتگ – راجستان ءُ سنرائزر ءِ میان ءَ بوتگیں گوازی ءِ شرتریں لیبی آر آر ءِ جوس بٹلر بوتگ کہ آئی ءَ بیست ءُ دو بالاں پنجاہ ءُ چار رن جوڈ کتگ انت –

مروچی ایم ـ چناسوامی کرکٹ گوازی پٹ ءَ بوتگیں دومی گوازی ممبئی انڈین ءُ رویال چیلنجرز بینگلور میان ءَ بوتگ کہ رویال چیلنجر ءَ ھشت وکٹاں گوازی کٹ اِتگ –

ممبئی انڈین ءُ رویال چیلنجرز بینگلور ءِ میان ءَ بوتگیں گوازی ءَ رویال ءَ ٹاس کٹ اِتگ ءُ اولسر ءَ بالنگ کنگ ءِ پیسلہ کتگ کہ ممبئی انڈین ءَ بیٹنگ کنان ءَ بیست اوررانی تہ ءَ ھپت وکٹانی تاوان ءَ یکسد ءُ ھپتاد ءُ یک رنانی ٹارگٹ ایر کتگ کہ آر سی بی ءَ دو وکٹانی تاوان ءَ شانزدھمی اورر ءَ ٹارگٹ پروشتگ ءُ گوازی وتی ٹیم ءِ نام ءَ کتگ –

انڈین ءُ رویال چیلنجرز ءِ میان ءَ بوتگیں گوازی ءِ شرتریں لیبی رویال ءِ پب دو پلیسسز بوتگ کہ آئی ءَ چِل ءُ سَے بالاں ھپتاد ءُ سَے رن جوڑ کتگ –

بلوچستان ءِ دمگ قلات ءِ ھنکین منگچر ءَ ناشناسیں مردماں پاکستانی لشکریانی سرءَ دستی بمباں گوں اُرش کُتگ۔

ھندی اھوالانی ردءَ ناشناسیں مردماں منگچر ءَ پاکستانی لشکریانی بنجاھی کیمپ ءِ پھازگی چوکی ءِ سرءَ دستی بمب ءِ دور داتگ کہ آ ترندیں تراکے ءَ گوں تراکیتگ۔

تراکءَ پد دمگ ءَ تیرگواریانی توار ھم گُوشدارگ بیتگ البت واکداراں تاوانانی بابت ءَ ھچ پئیمیں اھوال شنگ نہ کُتگ۔

بلوچستان ءَ گوستگیں دوروچانی تہءَ پاکستانی لشکریانی سرءَ ھپت اُرش کنگ بیتگ اَنت۔ چہ ایشاں پنچ اُرشانی زمہ واری بلوچ لبریشن آرمی ءُ یکے ءِ زمہ واری بلوچستان لبریشن فرنٹ ءَ من اِتگ اَنت وھدیکہ مروچی بیتگیں اُرش ءِ زمہ واری داں انگت ھچ گل ءَ نہ من اِتگ۔

روس ءِ اُرش ءَ پد یوکرین ءَ دو سد ءُ شست ءُ دو ایتھلیٹس جنگ بیتگ اَنت ءُ سَے سد ءُ شست ءُ سَے گوازی جاہ تباہ کنگ بیتگ اَنت-

ھال سرکنوکیں روئٹرز ءِ رد ءَ شمبے ءِ روچ ءَ انٹرنیشنل فیڈریشن آف جمناسٹک ءَ گند ءُ نند ءِ وھد ءَ یوکرین ءِ وزیر گوازی ویدیم گُتسیت ءَ روس ءِ کجان ایتھلیٹ ءَ اولمپکس ءِ یا دگہ گوازیانی دیمداری ءَ اجازت دیگ نہ بیت اِنت-

آئی ءَ گوشتگ آ درستاں گیش اے جنگ ءِ پلامرزی ءَ کنت ءُ اے جنگ ءِ پلامرزی ءَ برجم داشتگیں نیاداں ھم بھر زور ایت-

میان اُستمانی اولمپک کمیٹی ءَ روس ءُ بیلاروس ءَ ایتھلیٹس ءِ پدریج ءَ میان اُستمانی دیمپانیاں بھر زورگ ءِ شپارس کتگ بلے آئی ءَ وت ءَ گیر جانبدار کتگ –

میان اُستمانی اولمپک کمیٹی ءَ دوھزار ءُ بیست ءُ چار ءَ پیرس ءَ اولمپکس ءَ آئی ءَ بھر زورگ ءِ پیسلہ کتگ – یوکرین ءَ آدینگ ءِ روچ ءَ دوھزار ءُ بیست ءُ چار ءَ گیمز ءَ آئی ءِ ایتھلیٹس ءَ کوالیفائنگ دیمپانیاں روس ءِ کھلاڑیانی ھمراھی ءَ گوازی کنگ ءِ اجازت نیست اِنت- انٹرنیشنل اولمپک کمیٹی ءَ یوکرین ءِ اے پیسلہ ءِ سر ءَ ایراد گپتگ-

روئٹرز لس رنگ ءَ بیران بیتگیں ایتھلیٹس ءُ تباہ بوتگیں گوازیانی پٹانی بارو ءَ راستی نہ کتگ اَنت-

فروری دوھزار ءُ بیست ءُ دو ءَ روس ءِ اُرش ءَ پد بازیں ایتھلیٹساں کمکی کارانی رنگ ءَ ڈیھ ءِ پھریزگ ءَ سلاہ چست کتگ –

کُشگ بیتگیں ایتھلیٹس ءِ سکیٹر دمترو شاریر باخموت ءَ روس ءِ پوج ءِ کاروائی ءُ ڈیکاتھلون ءِ یہ ایتھلیٹ والادیمیر ایدوشچرک ءَ ڈیھ ءِ پھریزی ءَ جنگ بیتگ اَنت-

بلوچستان ءِ بنجاھی شھر شال ءَ پریس کلب ءِ دیم ءَ وائس فار بلوچ مسنگ پرسنز ءِ زورانسری بیگواھیانی بگیرءَ زھرشانی بنجل مروچی 5001 می روچءَ برجاہ اِنت۔ بلوچستان بار ءِ جنرل سیکرٹری چنگیز بلوچ ءُ دگہ وکیلاں اَتکگ ءُ گوں کھولاں یکجاھی درشان اِتگ۔

اے وھدءَ گل تنظیم ءِ وائس چیئرمین ماما قدیر بلوچ ءَ گُشتگ کہ بلوچ سیاسی باسکانی گیر کانودی زورانسری بیگواھیانی بگیرءَ جدوجھد برجاہ مان اِیت۔ آئی ءَ گُشتگ کہ گوستگیں 75 سالاں چہ زلم شدت ءُ زورزیاتی ءِ یک انچیں چاگرد ءِ ودی کنگ بیتگ، کہ اِدءَ وشیں آپ ءِ جاہءَ ھونانی شھجوہ تچگ ءَ اِنت۔

آئی گُشگ اَت کہ پاکستان ءِ روش گوں بلوچاں ھاکم ءُ گلامانی اِنت انچش کہ واھند ءِ گوں وتی گلام ءَ ھم نہ کنت ھزارانی کچ ءَ بے میاریں بلوچ زندمان گوں مرگ ءَ ھمگرنچ اَنت ءُ جتاھیں بندیگ جاھاں زندانی اَنت ءُ وتی جرمکاریانی بزانت ءَ شوھاز کنان ءَ وتی سرءَ زوراکی ءُ شدت سگگ ءَ اَنت۔

“آ اے ھم سرپد نہ اَنت کہ آ کجام جرمکاریانی پُشدر ءَ زوراکیانی آماچ اَنت ءُ آیانی کھول شُد ھڑتالی بنجل جتگ وتی دوستیگانی یل کنائنگ ءِ لوٹ کنان ءَ داں مرگ شُد ھڑتالی کیمپ جنگ ءَ لاچار بنت اِنت گُڑءَ لھتیں جھگیر کائنت ءُ آیاں دروگیں اوست دئینت ءُ شُد مرگ ھڑتال ءِ ھلاسی ءِ لوٹ کن اَنت کہ ما لھتیں روچانی تہءَ شمے دوستیں مردماں دیما کار اِنت بلے عملی گامگیج گندگ نہ بیت۔”

ماما قدیر بلوچ ءَ گُشتگ کہ وھدے زلم ءُ شدت ءُ جناورگری چہ ھداں سر گوز بہ بیت گُڑءَ مھلوک لاچار بنت کہ آیانی بگیر ءَ بہ اوشت اَنت گُڑءَ چُشیں راج انچیں تاگت جوڑ بنت ءُ دیما کائنت کہ آیانی دارگ ممکن نہ بیت اِنت۔

ھندوستان ءِ کرکٹ ٹیم ءِ گوستگیں آل راؤنڈر سلیم درانی بیران بیتگ کہ آئی ءِ اُمر ھشتاد ءُ ھشت سال بیتگ-

پریس ٹرسٹ آف انڈیا ءِ رد ءَ سلیم درانی وتی برات جھانگیر درانی ءِ ھمراھی ءَ جام نگر گجرات ءَ نندوک بیتگ –

سلیم درانی ھمے سال ءِ جنوری ءَ مَگون ءِ ھڈ ءِ سرجری ءِ بیتگ – کپگ ءِ سبب ءَ آئی ءِ ھڈ شک اتگ –

آ وش تب ءُ راست دستیں بیٹینگ کنوک ءُ اسپنرے بیتگ- سلیم درانی ءُ بیست ءُ نُھ ٹیسٹ میچ کتگ اَنت چریشانی توک ءَ یک ھزار ءُ دو سد ءُ دو رنز اسکورے کتگ – ائی ءَ ٹیسٹ کرکٹ ءِ ھپتاد ءُ پنچ وکٹے گپتگے –

آ وتی اے جادوئی ءِ اسپیل ءِ واستا یاد کنگ بیت اَنت سال نوزدہ سد ءُ ھپتاد ءُ یک ءَ انڈیا ءَ ویسٹ انڈیز ءَ وتی اولی ٹیسٹے کٹ اتگ سنیل گواسکر ءَ ھمے میچ ءَ وتی ٹیسٹ ڈیبیو کتگ بیتگ –

سلیم درانی ھندوستانی ھما کرکٹرانی تہ ءَ ھوار اِنت کہ آئی ءَ ھمے ٹیسٹ ءِ دومی اننگز ءِ کلائیو لائیڈ ءُ گیری سوبرز ءَ آؤٹ کتگ بیتگ آئی ءَ ھبدہ آورزاں بس بیست ءُ یک رنز جوڑ کتگ بیتگ ءُ ھندوستان ٹیم ٹیسٹ ءَ ھپت وکٹانی کٹگ ءَ سوبمند بیتگ-

آئی ءِ بیرانی ءِ سر ءَ پدردی درشان کنان ءَ ھندوستان ءِ گوستگیں ٹیسٹ کرکٹر وی وی ایس لکشمن ءَ ٹوئٹر ءَ پوسٹ کتگ ءُ گوشتگ کہ ’ ھندوستان ءِ اولی ارجن داد گروکیں کرکٹر ءُ پبلک ڈیمانڈ ءِ سر ءَ چکہ جنوکیں کھلاڑی، سلیم درانی – اوشانی – آئی ءِ کھول ءُ سنگت ءُ لوٹوکاں دل ءِ گون ءَ ھمدردی ءِ درشان اِنت-

گوستگیں ٹیسٹ کرکٹر روی شاستری ءَ داد پیش کنان ءَ گوشتگ کہ ’ھندوستان ءِ درستاں کلرفل کرکٹر،سلیم درانی – ریسٹ اِن پیس ‘-

سلیم درانی کَے اِنت کجا ودی بیتگ

سلیم درانی سال 1934 ءَ ماں کابل ءَ ودی بیتگ ءُ سلیم درانی بینٹگی ءَ وتی مٹ وت بیتگ کہ آئی ءَ مھلوک ءِ واھشتانی سرجم کنگ ءَ آیانی لوٹ ءِ پد ءَ چکہ جتگ ءُ وت ءَ مھلوک ءِ دل ءَ جاگہ داتگ-

آئی ءَ 1962 ءَ پورٹ آف سپین ءَ ویسٹ انڈیز ءِ ھلاپ ءَ ٹیسٹ سنچری کتگ – آئی ءَ وتی گڈی ٹیسٹ فروری1973 ءَ انگلینڈ ءِ ھلاپ ءَ بریبورن اسٹیڈیم ءَ کتگ کہ اود ءَ آئی ءَ 1960 ءَ وتی ڈیبیو کتگ ءُ بیٹنگ ءَ کساس ءَ بیست ءُ پنچ رنز ھلاس کتگ –