TBP Balochi

ھندوستان ءِ اروناچل پردیش ءَ چین ءِ نیمگ ءَ یازدہ جاھانی نام ءِ بدل کنگ ءِ گامگیج رد کنان ءَ گوشتگ کہ اے ھروھد ءَ ھندوستان ءِ اٹوٹ انگ اِنت-

این ڈی ٹی وی ءِ رد ءَ شمبے ءِ روچ ءَ چین ءِ نیمگ ءَ اروناچل پردیش ءَ وتی گپانی گیش کنگ ءَ اود ءَ یازدہ جاھانی نوکیں نام دیم ءَ آورتگ اَنت-

اے سیمی رند اِنت کہ چین اروناچل پردیش ءِ نام ءِ بدل کتگ اَنت چین ءَ اروناچل پردیش ءَ را ” ژنگنان ” ءِ نام داتگ کہ تبت ءِ زرباری نیمگ اِنت-

ھما نامانی کہ شنگ کرتگین جاھانی نام کہ چین ءَ شنگ کرتگ انت کہ آیانی توک ءَ پنچ کوھی دمگ اَنت، دو پٹی ھند، دو جھمنندی جاہ ءُ دو کور دپ اَنت-

ایشی ءَ پیش سال دوھزار ءُ ھژدہ ءُ بیست ءُ یک ءَ نوکیں نامانی لڑ شنگ بیتگ اَنت سال دوھزار ءُ ھژدہ ءَ شش ءُ سال دوھزار ءُ بیست ءُ یک ءَ پانزدہ جاھانی نام مٹ کتگ اَنت –

نئی دھلی ءَ یک درشانے ءَ گوشگ بیتگ کہ “چین ناماں مٹ کنگ اِنت بلے ایشی ءِ راستی مٹ نہ بیت اِنت “-

وزارت ھارجہ ءِ جارکش ارندم باگچی ءَ گوشتگ کہ ما رپورٹ دیستگ کہ اے اولی رند نہ اِنت چین جاھانی نام ءَ مٹ کنگ ءِ کوشش ءَ اِنت ءُ ما ایشی ءَ تچک ءَ رد کن ایں –

جارکش وزارت ھارجہ ءَ گوشتگ کہ اروناچل پردیش ھروھد ءَ انڈیا ءِ اٹوٹ انگ ءُ نہ منوکیں بھر اَنت –

چین ءِ سرکاری روتاک گلوبل ٹائمز ءِ رد ءَ واکدارانی گوشگ اِنت اے راستی ءَ’ من اتگیں جغرافیائیانی نام ‘ اَنت چارشمبے ءِ روچ ءَ مذھب ءِ پیشوا دلائی لامہ ءِ اروناچل پردیش ءِ وھد ءَ لھتے روچاں پد چین ءَ دو ھزار ءُ ھبدہ ءَ نامانی مٹ کنگ ءَ اولی رند ءَ لڑ شنگ کتگ اَنت –

سال نوزدہ سد ءُ پنجاہ ءُ نُھ ءَ دلائی لامہ ءُ تبت ءَ تتکگ ءُ اروناچل پردیش ءَ میار بندی ءَ اتکگ ءُ چین 1950 ایشی ءَ ھمالیاں دمگ ءَ کنٹرولے گپتگ اَنت-

من پَہ تو پَھر بَنداں اَبَّا جان

نبشتہ کار: ھَوَا بلوچ

دی بلوچستان پوسٹ

اَبَّاجان من چَہ ترا پَھِلی لوٹ آں کہ منی کِرّ ءَ چُشیں لبز نیست کہ من تئی کِرْدْ ءُ باؤستانی بابت ءَ چیزے نِبشتہ بِہ کَن آں ، من ھَردیں کہ نَدْ ءَ دَست ءَ کَن آں ترا جیڑاں کہ پَہ تو من وتی ھیالاں دَرشان بِہ کناں بَلّے منی نَدْ من ءَ مُدام کَرْوج اِیت ءُ تئی گْرَان بَھائیں کِرْدْانی دیم ءَ لبز وتی پَسّواں دے اَنت-

اَبَّا جان او اَبّلِی منی ، وَھدے من نَدْ دَست ءَ کُت نَہ زاناں چے نِبشتہ بِہ کَن آں چَہ کُج ءَ بُنگیج بِہ کَن آں کہ تئی داتگیں دَرس ءُ سوجانی کِسّھاں گوں لبزاں من دیم ءَ آؤرت نَہ کَن آں منی اے چاریں دانک تئی شان ءُ کِرْدْ ءِ دیم ءَ شَرّمندگ بَنت تئی کِرْدْ ءُ جُھد وت وتئی پَجّار ءَ کَنت ءُ گواڑگیں پُلّاں شُون دَنت پرچاکہ تئی کِرْدْ ءَ وت ءَ جھان ءِ دیم ءَ پَدّر کُرت ءُ تئی داتگیں کُربانی ءَ وت ءَ سَرجمیں راجدَپتر ءَ زندگ کُت ۔

بَلّے اَبَّا جان من بس ھمئے گُش آں ترا اِشتاپی کَنگی نَہ اَت ترا اَنگت باز پَند بُرَگی اَت ترا اَنگت کوھانی آرپیں پِت بُوّگی اَت ترا اَنگت جَلَگی اَت کہ اے دْرَاجیں پَند ءِ تَہ ءَ مارا تئی پَنتانی مَیار گوں تئی گاماں ھَوار دیم ءَ کِنزَگی اَت اَبّلِی تو پَہ من یک کتابے ءِ دروشُم ءَ اِت ئِے من ھم پَھر بَنداں کہ من چَہ وتی آرپیں پِت ءَ چے آئی ءِ سَسّا ءُ ھیالاں گوں راجی جُنز ءِ مارشتاں سَر ریچاں اَبَّا جان من اَنگت گُش آں کہ تو کَمُوکیں ماتھل کُتیں

اَبَّاجان من ءَ یات اِنت تو من ءَ مُدام گُشت منی چُک بس بُوان وتی بَد ءُ نیک ءَ بِہ زان وت ءَ جوان جاہ بیار وتی ھَکانی پَد جَنگ ءَ بِہ زان وتی راج ءِ بَزّگی ءَ بِہ مار وتی ایردستی ءَ بِہ زان کہ ترا وت زُبانے ھَست ترا وت بَھشت رَنگیں زمینے ھَست کہ زورَاکیانی آماچ اِنت گوستگیں ھَپتاد سال اِنت کہ مئے وَتن گیر مَھذب اِیں دُژمنے ءِ لَگتَانی چیر ءَ اِنت بَلّے بلوچستان ءَ بیست سال بیت کہ جنگ یک شَل ءَ بَرجاہ اِنت اے بیستیں سالانی توک ءَ بے کِساس وَرناہ ، پیر، کماش ءُ زالبولاں دیمونی داتگ زمین زادگیں وَرنایاں مُدام لشکر ءِ بھگیری گوں تُرندی ءَ جنگ بَرجاہ داشتگ ءُ دُژمن بے وار ءُ لَاچَار کُتگ، اے جنگ بلوچ ءِ گُڈّی جنگ اِنت اے جنگ وت واجھی یے جنگ اِنت اے جنگ ءِ تَہ ءَ بَزّگی ، واری ، بے لوگی ،دَر پَہ دَری دُرست مردُم ءِ سَر ءَ کاینت اَنچو گُش اَنت کہ جنگ بے رَھم بیت جنگ دوست ئیگ ءُ مھروانیں مردُماں چَہ ترا سِند اِیت تئی ھَنکِین ءُ میتگ تئی شھر ءُ دیار تئی لوگ ءُ جاگھاں تَباہ ءُ ویرندان کَنت بَلّے لَھتیں مردُماں وت ءَ را مُھکم کَنگی اِنت پرچاکہ اے جنگ ءِ آکِبَت آجوئی اِنت مارا ءُ شُمارا وتی زند ءِ واھشت ءُ وشی سَرڈگار ءِ ھاتر ءَ کُربان کَنگی اَنت پَہ زمین ءِ ھاتر ءَ ھَمنچوک کُربانی بِہ دئے اِیں کَمّ اَنت مَروچی ما زندگیں راجانی دَرْوَرْ دئِے اِیں ھمئے گُش اِیں کہ پَہ زندگ بُوّگ ءِ ھاتر ءَ دیمونی دئیگی اِنت ھمئے دیمونیانی برورد باندا مئے راج ءَ نوکیں زندے بَکشائیت او مئے آؤکیں پَدریچ وتی جِند ءِ سَر زمین ءِ سَر ءَ پَہ اِیمِن ءُ آجوئیں زنِدمانے گوازینت کَنت ۔

مَروچی وَرناہ ءُ کماشاں ھمئے پیسلہ کَنگی اِنت کہ گُلامی ءِ زند مارا ھچ وَڑ ءَ کَبول نَہ اِنت ءُ دُژمن ھَر وَڑ ءَ زُلم ءُ زورَاکی بِہ کَنت ما پَہ زمین ءُ راج ءِ رَکّینَگ ءَ وتی ساہ ءُ سَراں کُربان کَنگ ءَ ھچ چَکّ ءُ پَد مَہ بِہ اِیں دُژمن ءِ ھَر زُلم ءُ زورَاکیانی دیم ءَ میلانک بُوّگی اِنت دانکہ دُژمن بِہ زانت بلوچ پَہ وتی زمین ءِ ھاتر ءَ ھَر وَڑیں جُھد کُرت کَنت ءُ ھَر وَڑیں کُربانی دات کَن اَنت پَہ تئی زُلم ءُ زورَاکیاں ھچبر پُشت کِنز نَہ بیت ۔

اَبَّا جان تو ھَر وَھد ءَ گُشت مَروچی مئے دُژمن اَنچو نِزور ءُ لَاچَار بُوّتگ کہ مئے مات ءُ گُوھاراں زندانی کَنگ ءَ اِنت مئے زمین ءِ سَر ءَ پَہ زُور اَتکگ ءُ نِشتگ مئے مال ءُ مَڈیاں اَچ مارا پُلَگ ءَ اِنت ھَر نیمگ ءَ بلوچ ءِ گِدَانْ جَمبُور اِنت بَلّے پَہ مُھکمی راجی لوٹ ءِ توار چو بولان ءُ سیاھیجی ءِ بالاد ءَ مِک اِنت۔

من گوں وَت ءَ ھَوار سَرجَمیں ایردستیں مَھلوک ھمئے گُشگ لوٹ آں اگاں کَسّے زورَاک ءِ زورَاکیانی دیم ءَ پَد کِنز اِیت گُڑا آ کَدی ھم سوبمَند نَہ بیت ۔

اے سَاھت ءَ ھَر بلوچ ءَ جنگ ءَ بَھر زُورَگی اِنت پیر ءُ کماش بَنت یاکہ وَرناہ ءُ زالبول کُلاں یکمُشت بُوّگی اِنت ءُ ھون واریں دُژمن پْروش دئیگی اِنت ۔ وَھدیکہ مردُم ءَ گوں زمین ءَ مھر بیت گُڑا اُمر اوں کِساس کَنگ نَہ بیت بلکیں تُوکل ءُ زِرد ءِ پیسلہ اَرزِشت دار اِیت کہ تو ماتیں زمین ءِ رَکّینَگ ءَ چے کُت کَن ئِے۔

وَھدیکہ من ءَ اَبَّا جان ءِ شھیدی ئِے ھال سَر بُوّت گُڑا من سَک مُلور ءُ بے تاھیر بُوّت آں کہ چَہ من ءَ منی مھروانیں اَبَّا گِسَر بُوّت اے سَاھت منی ھیال ءَ چَہ کیامت ءَ کَمتِرّ نَہ بُوّتگ اے سَاھت ءَ منی چَمّانی اَرس تَرمپ، تَرمپ ءَ رِیچان ءُ مُلور بُوّتاں من ءَ ھمئے سَما بُوّت کہ گُش ئِے آزمان منی سَر ءَ کَپت منی چَمّانی رُژن لَھم لَھم ءَ شُتاں پَدا بازیں جیڑگ ءَ رَند من وتءَ چِت ءُ نَزّ آؤرت ءُ گُشت اَبَّا تو وت گُشتگ اے راہ کُربانی ءِ راہ اِنت اگاں مَروچی ما کُربان مَہ بِہ اِیں گُڑا پَہ آؤکیں پَدریچ ءَ اے گُلامی ءِ سیاھیں شَپ کَدی ھم بَام نَہ بیت-

آجوئی مئے ءُ شُمئے راج ءَ یک وَشھالیں زندئے دَنت گُلامیں راج ءُ گُلامیں زند ءَ اے جھان ءَ ھچ وَڑیں بستار نیست اے زندِمان پَہ آجوئی ءَ وَش اِنت بَلّے آجوئی ھون لوٹ اِیت دانکہ ما وتی ساہ ءُ سَراں کُربان مَہ کَن اِیں چَہ گُلامی ءِ مُھکم اِیں سانکلاں آجو بُوّت نَہ کَن اِیں بَلّے اے راستیں گَپّے کہ پِت ئِے رَوَگ ءَ زَھگ ءَ سَک دَرد بیت پَہ زَھگ ءَ مَزنیں تاوانے ھم بیت بَلّے ھمئے ھون ءُ کُربانی مئے آجوئی ءِ مانزمان اَنت من ءَ اَنچو سَما بُوّگ ءَ اِنت اَبَّا جان تو منی دیم ءَ نِشتگ ئِے ءُ من ءَ سِکِین ءُ دلبَڈی دئیگ ءَ ئِے کہ من باندا وت ءَ چَہ اے راہ ءَ گار مَہ کَن آں تو من ءَ ھمئے گُشگ ءَ ئِے کہ جُھد شُمئے ئیگ اِنت ءُ شُمئے کوپَگ ءَ اِنت اے کِسّہ ھلاس نَہ بیت اَبَّا جان تو اَنُوں مئے میَان ءَ ساڑی نَہ ئِے بَلّے ھما پِگر کہ تئی بُوّتگ آ پِگر چوں ساچان اِیں جَمبَر ءَ ساھگ اِنت ، اَبَّا جان تئی رَندگیری تئی داتگیں پَنت ءُ سوج پَہ من یک کتابے ءِ دروشُم ءَ اَنت من مُدام اَنچو ترا وَانگ ءَ باں گُمان بیت تو منی دیم ءَ نِشتگ ئِے ءُ منی رَھشونی ءَ کَنگ ءَ ئِے ۔

تئی زمین مھریں بچکنداں من مُدام گیرکاراں من جَزماں کہ منی آرپیں پِت ءِ رتکگیں ھون آجوئی ءِ مستاگ باں ، اَروَاہ آسُودگ بات اَبَّا جان ھَواریں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ساھگریں ودار

نبشتہ کار: کندیل بلوچ

دی بلوچستان پوسٹ

زندگ بوگّ ءِ واستا برے برے بلاهیں سگّ ءُ اوپارے لوٹ ایت زند لھتے اَنچیں ساهت سوگات کنت کہ آ ساهتاں چہ زندگ بوگّ ءَ چہ ملکموت ءِ گُلائیش کنگ شرتر اِنت مرچی همے پیمیں تاهکُشیں ساهت من ءَ سوگات کنگ بوتگّ اَنت-

من ءَ بلاهیں مُدتے بوتگ کہ من اِے سیاه ءُ تھاریں کوٹی ءِ باهوٹ کنگ بوتگ انت تاں منی دست گوں سانکلاں بستگ اِت انت چم گوں سیاهیں گُدے ءَ جون گوں دیوال ءَ تیکہ داتگ اَت نیم مُرتگ ءُ نیم زندگ اِت انت همے وهد ءَ من ءَ هر وڑیں هیال دل ءَ اَتک من چم نز کُت انت منی مات گوں وداریگیں چماں گوں دمبُرتگیں پاداں دست ءِ چہ نزوری ءَ سکّ لرزگ ءَ اِت انت منی دیم ءَ میلانک اَت گوش ئے مات ءَ را گوں من دراجیں گّپ ءُ ترانے کنگی اَت من چم اَنگت پچ نہ کُتگ اِت انت همے پٹی کہ منی چماں بستگ اَت سکّ ترند بستگ اَت من وتی چمانی پچ کنگ ءِ جُھد کُت بلّئے سوبین نہ بوت انت بلّئے وهدئے من مات ءَ را دیست منی چماں جھان روشناه بوت پرچا کہ من ءَ سکّ دیر اَت من مات نہ بالی مُرگے هم نہ دیستگ اَت من پاد آیگ ءِ جُھد کُت بلّئے منی وس ءَ چہ ڈن اَت من لوٹ ات مات ءَ گوں پُر مھریں آمبازاں بزوراں گوں مات ءَ وتی بندیگی ءِ کّسھاں بیاراں بلّئے بگّندئے مات ءَ را چہ من گّیش هبر کنگی اَت هو مات ءِ هبر چہ منی ءَ چہ گّیشتر بنت کہ مات ءَ اِے پنچیں سال گوں کُجام آزابیاں گوازینتگ انت پہ منی شوهاز ءَ چینچو گّرانیں پندے بُر اتگ تُنیگّیں چم پنچ سالیگیں اُمیت ءِ راهسراں وداریگاں کہ بلکّیں بیت ءُ زندمان ءِ تاموریں جھان ءَ رُژناه بکّنت-

چیا کہ ودار سریچیں کیپاں چمانی هرس بادینتگ انت ءُ زِرد گوں اَنگراں بریتکگ من اگاں پہ تو واتر بہ باں تُنیگّیں چمانی برپ بستگّیں ارساں چو ساچانیں جمبر ءَ شلاں دانکہ سرجمیں ڈن ءُ ڈگار سیراپ بہ بنت پہ هزار مُرادیں دل ءِ ترا وتی پُرمھریں امبازاں زوراں ءُ گِلگانی گُکاں پریچاں ترا گوشاں تئی جگر بُریں زھیراں من ءَ چوں چوں بے چاڑ کُتگ بلّئے اِے ودار کدی آسر بیت همے ودار ودار ءَ زندگانی درد ءُ رنجانی باهوٹ اِنت من یکّیں ساهت ءَ ترا سرجم ءَ ونت نہ کُت بلّئے من ءَ سما بوت تو چے پیم بزگ بوتگ ئے –

بلّئے تو گوں من سکّ گّلہ ات اَنت کہ اِنچو وهد انت من پہ ترا ودار کُتگ تو یکّ روچے منی چارگ ءَ نیتکگ ئے بلّئے من چوں ترا گُشاں من پہ ترا چوں آتک کناں منی پاد گوں زُلّم ءِ سانکلاں بّستگ اَنت من چوں ترا بُگوشاں اِے اَهد ءِ زوراکاں من ءَ چے پیم چکّ پروش کُتگ من چوں بہ گوش آں کہ من زندگ نہ یاں اِے تھنا منی جون اِنت کہ سر ءَ بار اِنت-

من ءَ گوں مات ءَ باز گّپ کنگی اَت بلّئے مات ءَ من ءَ موه نہ دات کہ من بیاهاں گوں مات ءَ وتی سرجمیں گّپاں بہ کن آں من مات ءَ را گُشگ لوٹ اتگ اَت من تو دوئیں زندانی بوتگّیں من آگاں زالّمے زنداناں زندانی بوتگ اَنت گُڑا ترا منی گماں زندانی کُتگ اماں من ءَ پھل کن من پہ تو وت ءَ را سر کُت نہ کُت، من چہ همے هیالاں سماّ کُت اِے وابے بوتگّ
کُج اِنت مات-

اماں من زاناں تو اَنگت جیڑے کہ من ءَ کُجام گناه ءِ سزا رسگ ءَ اِنت بلّئے تو زان ئے اِے آس مرچی بلوچستان ءِ همُکّ گدان ءَ روک اِنت همُکّ لوگ ءَ چہ یکّ بچّے بیگواه اِنت اِیوک ءَ تو نہ اِت کہ اِے آس ءَ سُتکگ ئے تئی وڑیں هزاراں شیرزالیں مات چہ کرناں پہ وتی بچانی ودار ءَ نیشتگ اَنت لھتے گوں دل ءِ درداں چو تئی پیم ءَ رپتگ اَنت او لھتے وتی زند ءِ پشت کپتگیں روچانی هساب ءَ اَنت –

بلّئے من گُشاں اِے درداں همُک مردم آشناه بوت نہ کنت اِے آگریچیں دردانی آسریچیں درونت ءَ هما زانت ءُ.سرپد اِنت کہ آ وت همے آس ءَ سوچگ ءَ اِنت آ کہ چے دردانی آتراپ ءَ نہ گوستگ انت چہ تو زانت اِے جنتر چوں دروش ایت- بلّئے چو من زاناں تو نہ مُرتگے تو کُشگ بوتگ ئے –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل اے سرمچاراں نوشکی ءُ کلات ءَ دو جتاجتائیں اُرشاں زورگریں پاکستانی پوج نشانگ کتگ کہ دُژمن ءِ یک کارندھے کُشتگ ءُ چار ٹپی کتگ اَنت-

جارکش جیئند بلوچ ءَ گْوشتگ کہ بی ایل اے ءِ سرمچاراں گوستگیں شپ ءَ نوشکی ءِ دمگ کیشنگی ءَ بلغانی ءِ ھند ءَ برجاھیں زورگریں پاکستانی پوج ءِ بُنجل نشانگ کتگ، سرمچاراں دُژمن ءِ بُنجل سر ءَ گرنیڈ لانچر ءَ چہ بازیں گولھے آس داتگ ءُ مزنیں سلاہ کارمرز کتگ انت –

جیئند بلوچ ءِ گوشگ ءِ رِد ءَ اُرش ءِ آسر ءَ دژمن ءِ یک کارندھے ھما دمان ءَ مرتگ ءُ کم چہ کم سے کارندہ ٹپی بیتگ اَنت وھدے کہ اُرش ءَ زورگریں پوج ءِ بُنجل ءَ ھم تاوان رس اِتگ-

درشان ءِ تہ ءَ دیمتر ءَ گْوشگ بیتگ کہ بی ایل اے سرمچاراں کلات ءِ دمگ منگچر ءَ زورگریں پاکستانی پوج ءِ بُنجاھی بُنجل ءِ پھازوکی چوکی ءِ سر ءَ دستی بمب ءَ گوں نشانگ کتگ، چریشی ءِ آسر ءَ چوکی ءَ ساڑی ئیں یک کارندھے سک ٹپی بیتگ-

جیئند بلوچ ءَ دیمتر ءَ گْوشتگ کہ بلوچ لبریشن آرمی اے اُرشانی زمہ واری ءَ منّ اِیت- وتواجھیں ڈیھ ءِ مول ءُ مراد ءَ تاں مئے اُرش برجاہ بنت-

آئی پی ایل ءِ شانزدھمی سیزن ءَ پنچ دگہ نوکیں کانود آرگ بوتگ اَنت –

آئی پی ایل 2023 کرکٹ گوازی برجاہ، چنئی ءَ بیست اوررانی تہ ءَ ھپت وکٹانی تاوان ءَ دوسد ءُ ھبدہ رن جوڑ کتگ، پَسھیءَ لکھنو ءَ بیست اوورانی تہ ءَ ھپت وکٹانی تاوان ءَ دوسد ءُ پنچ رن جوڑ کت کتگ ءُ دوازدہ رن ءَ بے سوب بوتگ –

چنئی ءِ چیپک گوازی پٹ ءَ مروچی آئی پی ایل 2023 ءِ ششمی گوازی چنئی سپر کنگز ءُ لکھنو سپر جائنٹس ءِ میان ءَ کنگ بوتگ کہ ھردو نیمگاں رنانی ھئور بوتگ – ھردو ٹیمانی نیمگ ءَ سرجمی ءَ چارسد ءُ بیست ءُ دو رن جوڑ کنگ بوتگ انت ءُ اے گوازی چنئی ءَ دوازدہ رناں کٹ اِتگ – چنئی ءَ بیست اوورانی تہ ءَ ھپت وکٹانی تاوان ءَ دوسد ءُ ھبدہ رنانی ٹارگٹ ایر کتگ کہ ٹارگٹ ءِ پروشگ ءِ ھاتر ءَ لکھنو ءَ بیست اوورانی تہ ءَ ھپت وکٹانی تاوان ءَ بس دوسد ءُ پنچ رن جوڑ کتگ ءُ دوازدہ رناں گوازی ہار داتگ – لکھنو ءِ نیمگ ءَ روی بشنوئی جوانی ءَ بالنگ کتگ ءُ چنئی ءِ نیمگ ءَ معین علی ءُ مشیل سینٹنر ءَ گوازی ءِ کٹگ ءَ جوانیں کردے پیلو کتگ –

مرچیگیں گوازی ءَ لکھنو ءِ کپٹن ایل راھل ءَ ٹاس کٹ اِتگ ءُ اولسر ءَ بالنگ کنگ ءِ پیسلہ کتگ – چنئی ءِ نیمگ ءَ اولسر سر ءَ ریتوراج گائیکواڈ ءُ ڈیوون کانوے جوانی ءَ گوازی کنان ءَ ءُ اولی پاور پلے ءَ بید تاوان ءَ ھپتاد ءُ نُھ رن جوڑ کتگ – چنئی ءِ اولی وکٹ دھمی اوور ءِ اولی بال ءَ کپتگ کہ ریتو راج آؤٹ بوتگ کہ آئی ءِ سِی ءُ یک بالاں پنجاہ ءُ ھپت رن جوڑ کتگ ات ءُ سرجمی رن یک سد ءُ دہ بیتگ اَنت چریشی ءَ پد وکٹانی کپگ بندات بوت ءُ رن ھم جوڑ بوان اِت اَنت- کانوے ءَ بیست ءُ نُھ بالاں چِل ءُ ھپت، شیوم دوبے ءَ شانزدہ بالاں بیست ءُ ھپت، معین علی ءَ سینزدہ بالاں نوزدہ، بین اسٹوکس ءَ ھشت بالاں ھشت، رویندرجڈیجہ ءَ شش بالاں سَے ءُ کپٹن دھونی ءَ سَے بالاں دوازدہ رن جوڑ کتگ – امباتی رائیڈو ءَ چاردہ بالاں بیست ءُ ھپت ءُ مشیل سینٹنر ءَ یک بالے ءَ یک رنے جوڑ کتگ ءُ ناٹ آؤٹ بوتگ ھمے وڑ بیست اوررانی تہ ءَ چنئی ءَ دوسد ءُ ھبدہ رن جوڑ کتگ انت –

لکھنو ءِ نیمگ ءَ روئی بشنوئی جوانتریں بالر بوتگ کہ آئی ءَ چار اووراں بیست ءُ ھشت رن داتگ ءُ سَے وکٹ گپتگ انت، سَے وکٹ مارک ووڈ ءَ ھم گپتگ بلے آئی ءَ چار اووراں سِی ءُ شش رن داتگ، یک وکٹ ءِ اویس خان ءَ گپتگ کہ آئی ءَ سَے اووراں سِی ءُ نُھ رن داتگ –

دوسد ءُ ھژدہ رنانی ٹارگٹ پروشگ ءَ وھدیکہ لکھنو ءِ اولی لیبی کائل میئرس ءُ راھل پٹ ءَ ایر کپتگ انت گڑا آھاں ھم جوانی ءَ گوازی تیزی ءَ گوں برجاہ داشتگ – 5.3 ءِ اوور ءَ وھدیکہ لکھنو ءِ نیمگ ءَ اولی وکٹ میئرس آوٹ بوتگ اے وھدی ھپتاد ءُ نھ رن جوڑ بیتگ انت بلے ایشی ءَ پد ھشتاد ءُ دو اسکور ءَ دگہ دو وکٹ کپتگ انت کہ چریشی ءَ لکھنو نزور تر اِتگ – چوش کہ ھر یک بیٹس مینے اتکگ آھاں تیزی ءَ گوں رن جوڑ کنگ ءِ جھد کتگ بلے ایشی ءِ برورد اے در اتک انت کہ 13.2 اوور ءَ لکھنو ءِ ٹیم ءِ نیم ڈن ءَ ات ءُ ایشی ءَ ھوار آھاں یک سد ءُ سِی رن جوڑ کتگ ات – اے وھد ءَ ھوڈا ءَ دو، کپٹن راھل ءَ بیست، کرونال پانڈیا ءَ نھ ءُ مارکس اسٹوئنس ءَ بیست ءُ یک رن جوڑ کتگ ات ءُ اؤٹ بوتگ اِت اَنت – پد ءَ رند ءَ نکولس پورن ءَ ھژدہ بالاں سِی ءُ دو ءُ کرشنپا گوتم ءَ یانزدہ بالاں ھبدہ رن جوڑ کتگ ات ناٹ آؤٹ ات – آیوش بدونی ءَ ھم ھژدہ بالاں بیست ءُ سَے ءُ مارک ووڈ ءَ سَے بالاں دھ رن آؤرتگ ءُ ناٹ آؤٹ بوتگ ات – بیست اوورانی تہ ءَ لکھنو ءَ ھپت وکٹانی تاوان ءَ دوسد ءُ پنچ رن جوڑ کنگ ءَ دوازدہ رناں گوں پروش وارتگ –

چنئی نیمگ ءَ بالرانی تہ ءَ معین علی جوانتر بوتگ کہ آئی ءَ چار اووراں بس بیست ءُ شش رن داتگ ءُ چار جوانیں وکٹ گپتگ – تشار پانڈے ءَ دو وکٹ گپتگ انت بلے آئی ءَ چار اووراں چِل ءُ پنچ رن داتگ – یک وکٹے مشیل ءَ ھم گپتگ کہ ائی ءَ چار اووراں بیست ءُ یک رن داتگ – دیپک ءَ چار اووراں پنجاہ ءُ پنچ رن داتگ ایندگہ بالرانی ھم بازیں رنے داتگ بلے چنئی ءِ بیٹس میناں رنانی ھما کوھے جوڑ کتگ ات پہ کٹگ ءَ بس بوت اَنت –

دلگوش: آئی پی ایل شانزدھمی سیزن ءَ پنچ دگہ نوکیں کانود آرگ بوتگ انت – اولی ایش انت کہ امپیکٹ پلیئر رھبندانی رِد ءَ ٹیماں موکل دیگ بیت کہ آ گوازی ءِ میان ءَ چاردھمی اوور ءَ پیسر لیبی ءِ ھوار کت کن انت کہ دومی لیبی ءِ جاہ ءَ بیٹنگ، بالنگ ءُ پیلڈنگ کت کنت، بلے کپٹن ءِ بوت نہ کنت – کپٹن ٹاس ءِ وھد ءَ امپیکٹ ءِ نام ءَ امپائر ءَ بہ گوش ایت کہ آئی ءَ گوازی ءَ زرت کنت –

دومی ایش کہ چد ءُ پیسر ٹاس ءَ پیسر ھردو ٹیماں وتی ٹیم ءِ جار جنگی بوتگ پرچا کہ آھانی لڑ میچ ریفری ءَ دیگ بوتگ انت بلے نوں ھر یک ٹیم ءِ وتی پلیئنگ الیون ءِ جار ءَ ٹاس ءَ پد ھم جت کنت –

سیمی : آئی پی ایل 2023 ءِ سیزن ءَ وائیڈز ءُ نو بال ءِ ھاتر ءَ ھم ڈی آر ایس زورگ بیت، لیبیاں فیلڈ امپائر ءِ چی وائیڈ بال ءُ نو بال چار ءُ ٹپاس موکل بیت –

چارمی کانود : ھر بالے ءِ ان فیئر مومنٹ بیت گڑا آ ڈاٹ بال گوشگ بیت وھدیکہ دیم ءِ ٹیم ءَ پنچ گیشیں رن رس ایت –

پنچمی کانود ایش انت کہ سُلو اوور ریٹ ءِ سر ءَ جرمانہ ءَ نود ملٹ ءِ میان ءَ ٹیم ءَ بیست اوور سرجم کنگی انت اگاں سرجم نہ بوت دگہ یک لیبی ءِ باؤنڈری لین ءِ بدلا سِی گز ءِ تہ ءَ پیلڈنگ کنگی انت –

روکپتی بلوچستان ءِ دمگ ایرانشھر ءَ یک تیل کشیں گاڑی یے کپتگ ءُ چریشی ءَ چہ آئی ءِ ڈرائیور بیران بیتگ –

گیشیں ھالانی رد ءَ چہ ھاش ءَ پانزدہ کلو میٹر دور ایرانشھر ءِ راہ ءَ یک تیل کشیں گاڑی یے کپتگ کہ آئی ءِ ڈرائیور زدگ بوتگ ءُ پد ءَ آئی ءَ وتی ٹپ نہ سگ اتگ ءُ بیران بیتگ-

بیران بیتگیں ڈرائیور ءِ پجار شھرام پسکوئی جھمنند سوران ءِ نام ءَ زانگ بیتگ-

روکپتی بلوچستان ءَ دگ ءِ وئیل یکشل ءَ پیش آیگ ءَ اَنت کہ گوستگیں ھپتگ ءَ بہ گر داں انیگ ءَ دَہ مردم بیران ءُ ھشت زدگ بیتگ اَنت-

اے وئیل روکپتی بلوچستان ءِ بنجاھی شھر زاھدان ءَ ھوار جتاجتائیں جاھاں پیش اتکگ اَنت-

وئیلانی آسر ءَ بیران بیتگیں گیشتریں مردم تیل ءِ باپاری بیتگ اَنت کہ وتی لاپ ءِ والینگ ءَ تیل کشی ءِ سبب ءَ مرگ ءِ ارجان بیتگ اَنت-

رودراتکی بلوچستان ءُ روکپتی بلوچستان ءِ سیمسرانی مردمانی گیشیں زرکاری گوں تیل ءِ باپار ءَ بندوک اِنت بلے اے تیل ءِ باپار اود ءَ بازیں جان ءُ ساھانی زند ءِ ارجان بوگ ءَ اِنت –

تیل کشی ءَ ھواریں مردمے ءِ گوشگ اِنت کہ روچ ءِ ٹک ءَ دراتکگیں باپاری مھلوک پہ وتی لاپ ءِ شوھاز ءَ در کپ ایت گڑا آئی ءَ وتی زند ءِ ساہ ءُ جانانی سر ءَ بازیں تُرسانی دیمپانی کنگ کپ ایت یا آ ایران ءِ لشکر ءِ تیرانی آماچ بیت یا دگانی سر ءَ ترند روکیں وئیلانی آماچ بیت اِنت-

کراچی ءِ ائیرپورٹ ءَ کیچ ءِ جھمنندے بیگواہ ءُ ھُزدار ءَ پاکستانی پوج ءِ نیمگ ءَ بیڑبرگ ءِ بگیری ءَ زھرشانی کنوکانی سر ءَ تیرگواری-

گیشیں ھالانی رِد ءَ بلوچستان ءِ دمگ کیچ ءِ تھسیل تمپ سرنکن ءِ جھمنندیں ورناہ چہ کراچی ایئرپورٹ ءَ بیگواہ کنگ بیتگ-

کھول رِد ءَ تمپ سرنکن ءِ جھمنند رحمدل بلوچ ء اسماعیل بلوچ کراچی ایئرپورٹ ءَ چہ ابو دبئی ءَ روگ ءَ بیتگ کہ 23 مارچ 2023 ءَ چہ کراچی ائیرپورٹ ءَ زورانسری بیگواہ کنگ بیتگ-

رحمدل ءِ مستریں برات ءِ گْوشگ اِنت کہ رحمدل مزنیں مدتے ءَ چہ دبئی ءَ پوریاگری کنگ ءَ بیتگ کہ گوستگیں ماہ وھدے آ چُٹیانی کُٹگ ءَ پد واتر دبئی روگ ءَ بیتگ کہ چہ کراچی ائیرپورٹ ءَ بیگواہ بیتگ وھدے مارا آئی ءِ بیگواھی ءِ ھال سر بیتگ گڑا ائیرپورٹ واکداراں گوں ھال کتگ بلے آیاں ھچ وڑیں سرپدی نداتگ-

آئی ءَ گْوشتگ کہ اے ائیرپورٹ واکدارانی زمہ واری اِنت کہ آ مئے گوم ءَ ھمراھداری بکن اَنت ،پرچاکہ آ چہ ائیرپورٹ ھاک ءَ بیگواہ اِنت-

بیگواھیں ورنا ئے کھول ءَ رحمدل ءِ یل کنائینگ دزبندی کتگ ءُ گْوشتگ کہ آئی ءَ دیم ءَ بیار اَنت-

گُڈی ءَ آئی ءَ کمشنر مکران ءُ دگہ ھمگرنچیں واکداراں چہ دزبندی کتگ کہ آ رحمدل ءِ یل کنائینگ ءَ وتی زمہ واری ءَ پیلو بکن اَنت-

دومی نیمگ ءَ ھُزدار ءِ دمگ شاہ نورانی میندارو ءَ پاکستانی پوج ءَ لوگ لوگ ءَ بیڑبرتگ-

وئیل بگیری ءَ مھلوک ءَ زھرشانی کنان ءَ شھدگ بند کتگ، میتگ مردمانی گوشگ اِنت کہ پوج ءِ کارندہ بیڑبرگ دودمان ءَ لگتمال کتگ ءُ مردم لَٹ ءُ کُٹانی نشانگ کتگ اَنت اشی ءِ بگیری ءَ مھبت پکیر ءُ شاہ نورانی ءَ سرجمی ءَ شٹرڈاؤن ءُ پیہ جام ھڑتال برجاہ ءَ اِنت-

میتگ مردمانی گوشگ اِنت کہ پوج ءِ مزنیں کچے ءَ مردم شماری نام سر ءَ دمگ ءَ سر بیتگ اَنت چریشی ءَ پد لوگانی سر ءَ بیڑبرگ بندات کتگ- ھمے میان ءَ مردین ءَ ابید زھگ ءُ زالبول ھم لَٹ ءُ کُٹانی نشانگ کتگ اَنت –

دومی نیمگ ءَ چاگردی رسانکدر ءَ شنگ بیتگیں یک تامُرے ءَ گندگ کئیت کہ زھرشانی کنوکانی سر ءَ پوج تیرگواری کنگ ءَ اِنت بلے تنی وھدے دمگی انتزامیہ نیمگ ءَ ھچ وڑیں درشان دیم ءَ نیتکگ-

برتانیہ ءِ در سرکاری گل پریسیڈیم نیٹ ورک ءَ شمبے ءِ بیگاہ ءَ اے گپانی درشانی کتگ کہ تالباناں یک پند جنوک ءُ سیل کنوکے ءَ ھوار برتانیہ ءِ سَے جھمنند اوگانستان ءِ زنداناں بندیگ کتگ انت –

گل ءِ رِد ءَ آ بندیگیں مردمانی کھولانی گوم ءَ نزیکیں کنگ ءَ انت –

دومی نیمگ ءَ برتانیہ ءِ دفتر خارجہ ءَ وتی درشانے ءِ تہ ءَ گوشتگ کہ ما اوگانستان ءَ بندیگیں برتانیہ ءِ جھمنندانی گوم ءَ قونصلر ءَ ھال اھوالانی برجاہ دارگ ءُ آھانی کھول ءِ کمک ءَ پہ کار کنگ ءَ ایں –

پریسیڈیم ءِ باسک سکاٹ رچرڈز ءَ اسکائی نیوز ءَ گوں تران کنان ءَ گوشتگ کہ مارا باور انت کہ آ وش ءُ سلامت انت، آھانی شریں وڈی ءَ چار گزار بوگ ءَ انت –

آئی ءَ گوشتگ کہ مئے گور ءَ پہ باور کنگ ءَ ھچ چشیں سوب ءِ نیست کہ ما بگوشیں آھانی سر ءَ زوراکی کنگ بوتگ –

ھمے گوشگ بوگ ءَ انت کہ تالباناں آھانی تہ ءَ دو جنوری ماہ ءَ بندیگ کتگ ءُ سیمی ءِ ھچ وڈیں ھال نیست کہ کدی گرگ ءُ بند کنگ بوتگ

روکپتی بلوچستان ءِ دمگ راسک ءَ نیکراھی وانگ جاہ ءِ نودربرے ایرانی چیریں ادارھانی کارندھاں آوار جتگ ءُ بیگواہ کتگ-

آوار جنگ بیتگیں ورنا ءِ پجار راسک ءِ نیکراھی وانگجاہ ءِ نودربر حسین آسکانی ء بابو جھمنند چراغان راسک ءِ نام ءَ زانگ بیتگ اَنت-

ھالانی رد ءَ گوشگ بیتگ کہ حسین اسکانی ءِ ناکو آدھم آسکانی چرییشی ءَ پیش چیریب ادارھانی کارمنداں آوار جتگ ءُ برتگ –

ادھم آسکانی روکپتی بلوچستان ءِ نامی ئیں عالم دین عبدالغفار نقشبندی ءِ نزیکیں باسکاں چہ یکے بیتگ-

روکپتی بلوچستان ءَ مردمانی زورانسری آوار جنی ءُ بیگواھیانی ھما وھد ءَ بندات بیتگ انت کہ اود ءَ یک ماھو بلوچ ءِ نام ءَ بندات بیتگیں زرمبشت ءَ پد بنا بیتگ اَنت-

زانگ بہ بیت روکپتی بلوچستان ءِ بنجاھی شھر زاھدان ءَ گوستگیں سال ءِ سِی ستمبر ءَ بندات بیتگیں زھرشانی ءَ سد ءَ گیش مردم کشگ بیتگ اَت انت ءُ بازین کچے ءَ زدگ بیتگ ات اَنت-

روکپتی بلوچستان ءَ مردمانی بیگواھیانی ھلاپ ءَ مھلوک ءِ زھرشانی ھم گندگ ءَ اتکگ اَنت کہ اود ءَ مھلوک ءِ وتی مردمانی یل کنگ ءِ لوٹ ءَ کنگ ءَ اَنت-