TBP Balochi

بلوچستان ءِ دمگ کیچ ءَ پاکستانی پوج ءَ یک لوگے ءِ سر ءَ بیڑ برتگ ءُ یک ورنایے آوار جنگ ءَ پد بیگواہ کرتگ-

سر بیتگیں ھالانی رد ءَ کیچ ءِ دمگ تمپ ءَ دَہ جولائی ءِ شپ ءِ ساھت دو ءَ پاکستانی پوج ءَ بیڑ برتگ ءُ یک ورنایے آوار جتگ ءُ بیگواہ کتگ-

آوار جنگ بیتگیں ورنا ءِ پجار ھکمت الی ء ماسٹر برکت ءِ نام ءَ زانگ بیتگ –

زانگ بہ بیت بلوچستان ءَ ورنایانی آوار جنگ ءُ بیگواہ کنگ ءِ درچ بازیں وھداں چہ برجاہ اَنت-

ھمے وڑ ءَ گوستگیں روچ ءَ بلوچستان ءِ بنجاھی شھر شال ءَ گوستگیں روچ ءَ بلوچ یکجھتی کمیٹی ءِ نیمگ ءَ بیگواھیانی ھلاپ ءَ زھرشانی کنگ بیتگ ات-

ھمے داب ءَ بلوچستان ءِ دمگ کلات ءَ ھم گوستگیں روچ ءَ بیگواھیں مردمانی کھولانی نیمگ ءَ دگ بند کنگ ءُ نندانک جنگ بیتگ ات-

بلوچستان ءَ پاکستانی پوج ءِ نیمگ ءَ مردمانی بیگواہ کنگ ءِ ایمنسٹی انٹر نیشنل ءَ ھم گوستگیں روچ ءَ یک پریس ریلزے ءَ پدردی درشان کتگ ات-

ھمے وڑ ءَ سوئزرلینڈ ءِ شھر جنیوا ءَ گوستگیں روچ ءَ میان اُستمان ءِ کونسل برائے انسانی ھکوک ءِ پنجاہ ءُ سیمی نیاد ءَ اسرائیل ءَ انسانی ھکانی لگتمالی ءِ سر ءَ ایراد گپتگ ات-

اسرائیل ءِ رھشون ءَ گوشتگ ات کہ پاکستان مردمانی بیگواہ کنگ ءَ وتی دستاں بہ دار ایت کہ اود ءَ مردمانی بیگواھیانی اھوال بازیں دیم ءَ آیگ ءَ اَنت ءُ ایشی ءِ سر ءَ گامگیج زیرگ بہ بیت –

ھندوستان ءِ گوریچانی روکپتی ریاستاں گوستگیں دو روچاں چہ بشی ھور، توپان ءُ لوھڑیں توپان برجاہ اَنت داں انگت ءَ سی ءُ ھپت مردم بیران بیتگ اَنت-

ٹائمز آف انڈیا ءُ این ڈی ٹی وی ءِ رد ءَ سَے شمبے ءَ مھکمہ ءِ موسمیات ءَ گوشتگ کہ جمنا کور ءِ اپ ترندیں رنگے ءَ گیش بیتگ –

اے آپ ءِ لوھڑانی سبب ءَ سرکار ءَ بنجاھی شھر دھلی ءُ ھریانہ ءَ اژدری جاڑیگ کتگ اَنت-

دھلی ءِ واکداراں توپان ءِ ترس ءَ کور لمبانی مردمانی کش بندات کتگ – آ شھر ءِ جتا جتائیں ریلیف بنجلاں برگ بوگ ءُ اَنت –

ناردن ریلوے ءَ گوشتگ کہ مروچی سھب ءِ ساھت شش ءَ جمنا کور ءِ کوھنیں ریل سروس بند کنگ بیتگ – سر وزیر نرندرمودی ءَ ھما چل پردیش ءُ اترکھنڈ ءِ سروزیراں بنجاھی سرکار ءِ نیمگ ءَ کمک ءِ ستک داتگ-

نیشنل ڈیزاسٹر ریسپانس فورس ءِ سی ءُ ھشت ٹیم جتا جتائیں ریاستاں کمکی پرکاریاں بھر زورگ ءَ اَنت-

دھلی ءِ سروزیر اروند کیجروال ءَ گوشتگ کہ گوستگیں چل سالاں اولی رند ءَ دھلی ترندیں ھور ریکارڈ کنگ بیتگ اَنت-

آئی ءَ گوشتگ لہ گڈی رند ءَ 1982 ءَ بیست ءُ چار اداراں یک سد ءُ شست ءُ نُھ ملی میٹر ھور بیتگ –

آئی ءِ گوشگ ات کہ بدبھتی ءَ آپ رو ترندیں ھورانی پدرند چارگ نہ بیتگ ءُ جوڑ کنگ نہ بیتگ اَنت- دومی نیمفبءَ واکدارانی گوشگ اِنت کہ چندرتل ءَ سَے سد ءَ گیش تر ءُ تابی مردم گٹ اَنت –

ھندوستان ءِ لشکر ءَ چندی گڑھ ءَ چتکارا یونیورسٹی ءَ 910 نودر مھکمیں جاھاں برتگ اَنت – ترندیں ھورانی سبب ءَ یونیورسٹی ءِ کش ءُ گور آپ ءَ اَنت-

پبلک ورکس ڈیپارٹمنٹ ءَ گوشتگ کہ پنجاپ ءَ کساس یک سد ءُ پنجاہ دگ ءُ دَہ پُھلاں تاوان رس اتگ-

بلوچستان ءِ بنجاھی شھر شال ءَ پشین اسٹاپ ءَ گاڑی ءِ سر ءَ تیرگواری کنگ بوتگ چریشی ءَ دو لیویز کارمند بیران بوتگ انت –

ھالانی رِد ءَ شال ءَ پشین اسٹاپ ءَ سلاہ بندیں مردماں ویگو گاڑی ءِ سر ءَ تیرگواری کتگ – تیرگواری ءَ دو لیویز کارمند بیران بوتگ انت –

تیرگواری ءَ بیران بوتگیں لیویز کارمنندانی پجار سپاھی محمد یوسف ءُ لیویز کارمند ضیاءالدین ناماں چہ بوتگ انت وھدیکہ یک رھگوزیں زھگے ھم تیرانی آماچ بوتگ ءُ زدگ بوتگ کہ آ ھما دمان ءَ نزیکیں نادراھجاہ ءَ برگ بوتگ –

وئیل ءِ درگت ءَ تنی وھدی ھچ وڈیں ھال ءُ ھبر بوگ ءَ نہ انت کہ کجام سوب ءَ اے کارمند کُشگ بوتگ انت پولیس ءُ کانود جوڈ کنوک گیشیں پٹ پول کنگ ءَ انت –

گُلزمین ءِ لاڑکیں سَمو

نبشتہ کار: زھیر بلوچ

دی بلوچستان پوسٹ

“پہ مڑایے ایر کتگ زندگی دست ءِ دل ءَ “
“گُلزمین اوبادگاں چو نپت ءُ بیر ءَ گْرند اتگ”

چوناھی ءَ ھمُک بنی آدم ءَ وتی زند ءَ گوں مھر اِنت ھرکس ءَ زند ءِ لزت ءُ وشی دوست بنت، ھرکس وتی زندمان ءَ وشھالی ءَ گوازینگ لوٹ ایت۔

بلے جُست اِیش اِنت کہ زندگی کجام وھد ءَ وشھال بیت؟ اے جُست ءِ پسو الم ھمے بیت کہ تئی چپ ءُ چاگرد ءَ وشھالی ءُ ایمنی بہ بیت۔ تئی کھول ءِ مردم ، سنگت ءُ ھمبل تئی ھمبراہ بہ بنت۔ تئی میتگ ءُ چاگرد امن ءُ ایمن بہ بنت تو ھرجاہ بُہ لوٹ ئے شُت بہ کن ئے، ترا ھچ چیز ءِ تُرس مہ بیت گُڑا تو زند ءَ پہ ایمنی گوازینت کن ئے ءُ اے وشھالی ءُ ایمنی ھما وھد ءَ بنت کہ تو وتی گلزمین ءِ وتواجہ بہ بہ ئے ءُ آجوئیں زندمان ءِ واجہ بہ بہ ئے۔

بلے مرچی بلوچ گُلزمین ءِ سر ءَ ناں وشھالی ھست ءُ ناں ایمنی ھست، چی ءَ کہ بلوچ ڈیھ مرچی باروٹی لشکر ءِ ایردست انت، اے ایردستی ءَ چہ بلوچ راج ءَ ھرچیز پُل اِتگ۔ مرچی بلوچ وتی جند ءِ لوگ ءِ تہ ءَ ایمن نہ انت ءُ تُرس ءِ آماچ انت، مرچی بلوچ ءِ ننگ ءُ ناموس نہ رّک اِتگ۔ گُڑا چُشیں جاورانی تہ ءَ وتی جندی زند ءَ گوں مھر کنگ وتی راج ءِ گوما ناھکی انت۔ چی ءَ کہ مرچی تئی راجی مُچانکی زند زوال ءُ لگتمال اِنت گُڑا جندی زند ءِ وشیاں چون کن ئے۔

پمشکا مرچی ھزارانی کساس ءَ بلوچ ورنا وتی راجی مُچانکی زند ءِ رکینگ ءِ ھاتر ءَ زورگریں لشکر ءِ دیم ءَ اوشتاتگ انت ءُ گھگیری کنگ ءَ انت، ھزارانی کساس ءَ بلوچ راج ءِ تنگوئیں بچاں وتی ساہ ءُ سرانی دیمونی داتگ انت ءُ اے کاروان انگت برجاہ اِنت۔

ھمے وڑ ءَ مرچی وتی راجی زندمان ءِ رکینگ ءِ پِڑ ءَ بلوچ زالبول ھم ایر کپتگ انت ءُ وتی جندی زندمان ءِ وشی اِش ببا داتگ انت ءُ وت ءَ ندر کنگ ءَ انت۔

چوناھی ءَ چد ءُ پیش ھم بلوچ زالبول وتی گلزمین ءُ راج ءِ ھاتر ءَ ھمُک پِڑ ءَ جُھد ءَ ھوار بوتگ انت۔ بلے نو بلوچ راج ءِ شیرزالیں جنک پہ وتی گُلزمین ءِ آجوئی ءِ ھاتر ءَ وت ءَ پِدائی کنگ ءَ انت۔ منی دل ءَ اے بلوچ راجی جُنز ءِ مزنیں سوبمندی انت کہ مرچی شیرزالیں بلوچ گُھاراں سلاہ چِست کتگ ءُ براتانی ھمکوپگ انت۔

شھید پِدائی شاری بلوچ ءَ پَد شھید پدائی سُمیہ بلوچ ءِ پہ وتی ماتیں گُلزمین ءِ آجوئی ءِ ھاتر ءَ وت ءَ پدائی کنگ ءَ زورگریں اِستان ءَ را اے باور کنائینتگ کہ بلوچ راج تئی زوراکیانی دیم ءَ وتی سر ءَ ھچ وڑ ءَ جھل نہ کنت۔ بلکیں وتی راجی پجار ءِ رکینگ ءِ ھاتر ءَ ھرچ وڑیں دیمونی دیگ ءَ چَک ءُ پَد نہ بیت۔

شھید پدائی سُمیہ بلوچ ءَ زورگریں لشکر ءِ زوراکی وتی چماں گوں دیستگ انت۔ کھول ءِ زورآنسری آوارجنی ءَ ھوار وتی میتگ ءِ سُتکگیں گسانی پُر دیستگ انت۔ وتی زند ءِ ھمبراہ شھید ریھان جان ءِ سِنچ ءُ لیکہ ءُ کُربانی ءِ شاھزانتی دیستگ۔ شھید پدائی سُمیہ بلوچ یک مھکمیں لیکھے ءِ واھُند بوتگ۔ شھید ءَ وتی گُلزمین ءَ گوں ستک ءُ دل مھر بوتگ۔ پمشکا شھید پدائی سُمیہ بلوچ ءَ وتی جندی زندمان ءِ بدل ءَ وتی راجی زندمان ءِ وشھالی ءِ راہ گچین کتگ۔ چُشیں مزنیں شاھزانتیں لیکہھے ءِ واھُند ھجبر پہ مرگ گار نہ بنت ءُ راجدپتر ءِ تہ ءَ آیوکیں پدریچ ءِ واستا راجدوستی ءُ جھد ءِ سکین جوڑ بنت ءُ پہ مُدامی ابدمان بنت۔شھید پدائی سُمیہ بلوچ ءِ داتگیں دیمونی پہ بلوچ زالبول ءُ بلوچ ورنایاں مادنیں کِشکے پشت گیج ایت ءُ اے کشک ءَ داں گُلزمین ءِ آجوئی ءَ شھیدانی کاروان جُنزان بیت۔

گُڈسر ءَ شھید پدائی سُمیہ بلوچ ءِ داتگیں دیمونی ءَ ستاشانی ءُ دروت ندر کن آں۔ شھید ءِ دیمونی ءِ مُز آجو بلوچستان اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر شال ءَ بلوچ نودربرانی زورانسری آوار جنی ءِ تہ گیشی ءُ سالم بلوچ ءُ ایندگہ بیگواھیں مردمانی ھاتر ءَ بلوچ یکجھتی کمیٹی ءِ چیردستی ءَ زھرشانی کنگ بوتگ زھرشانی بلوچ نودربراں ھوار ھر تک ءُ پھناتاں سیادی داروکیں مردماں مزنیں کچے ءَ بھر زرتگ –

درنگاز کنوکانی دست ءَ بیگواھیں مردمانی اکس بوتگ انت ءُ آھاں بلوچستان ءَ زورانسری آوار جنیانی ھلاس کنگ ءُ بیگواھیں مردمانی یل کنگ ءِ لوٹ کتگ –

ھمے وھد ءَ درنگاز کنوکانی گوشگ ات کہ ریاست ءِ پھازگی ادارھانی زمہ داری انت کہ نودربرانی پھریز ءَ بہ کن انت بلے بلوچستان ءَ جاور چپ انت ادا نودربرانی پھریزگ وتی جاہ ءَ ادا لٹ پُل ءُ زورانسری آوارجنی ءِ دابیں انسانانی ھکانی لگتمالی ءَ پھازگی ادارھانی دست مان انت –

آھانی گوشگ ات کہ سرکار، آمیدگس، ءُ رسانکدراں ھوار درسیں ادارہ نودربرانی ھکانی پھازگ ءَ بے سوب بوتگ انت ءُ ناکہ اے درگت گامگیج زورگ انت –

بلوچ یکجھتی کمیٹی ءِ رھشونانی گوشگ ات کہ چہ کیچ ءَ چار جون ءَ سالم ء عبدالستار ءُ دگہ یک ورنایے چہ گس ءَ آوار جنگ ءُ بیگواہ کنگ بوتگ انت سَے روچاں بازیں ازیت دیگ ءَ پد اکرم یل کنگ بوتگ سالم تنی وھدی بیگواہ انت ءُ ریاستی ادارھانی زنداناں بندیگ انت ھما پھازگی ادارھاں کہ سالم ءِ پھازگ ءِ زمہ داری گون انت ھما وت آئی ءِ جان ءِ دشمن انت – سالم ھمے واست ءَ بندیگ کنگ بوتگ کہ آئی ءَ وتی وارسے ءِ یل کنائینگ ءِ جھد ءَ توار چست کتگ بوتگ –

آھانی گوشگ ات کہ ھمے وڈ ڈی جی خان، کراچی ءَ ھوار دگہ بازیں دمگاں ورنا آوار جنگ بوتگ انت کہ آھانی بنکی ءُ انسانی ھکانی لگتمالی ئے – سالم ءَ ھوار معراج اسلم ءُ ایندگہ درسیں بیگواھیں نودربراں وتی وانگ ءِ ھاتر ءَ گس یل داتگ انت بلے آھاں آسراتی دیگ ءِ بدل ءَ زورانسری آوار جنگ بوگ ءَ انت کہ اے یک زوراکی ءَ کمتر نہ انت – زورانسری آوار جنی ءِ جیڑھے گیش گیواری ءِ بدل ءَ بلوچستان ءَ چدوگیشتر مردم آوار جنگ ءُ بیگواہ کنگ بوگ ءَ انت ھمے وڈیں کارانی کنگ ءَ ریاست ءِ بگیری ءَ نپرت گیش بنت –

آھاں دیمتر ءَ گوشتگ کہ نودربر بلوچ چاگردے باندات انت آھاں اے وڈ زورانسری آوار جنگ ءُ بیگواہ کنگ بلاھیں جرمے – تربت ءَ آوار جنگ بوتگیں سالم بلوچ ءَ ھوار درسیں بیگواھیں مردم یل کنگ بہ بنت ءُ بلوچستان ءَ زورانسری آوار جنی ءِ درچ ھلاس کنگ بہ بیت –

بلوچستان ءِ دمگ کلات منگچر ءَ بیگواھیں نوید لانگو، شاہان بلوچ، قذافی نیچاری، کفایت نچاری ءُ محمد حسن ءِ کھولاں وتی دوستگیں مردمانی زورانسری آوار جنی ءِ بگیری ءَ زھرشانی کنان ءَ کراچی تاں شال ءَ رؤکیں شھدگ ءِ سر ءَ نندانک جتگ ءُ شھدگ سرجمی ءَ بند کتگ –

کھول ءِ نیمگ ءَ دگ سھب ءِ ادار ھپت ءِ نزیک ءَ بند کنگ بوتگ، زھرشانی میان ءَ بیگواھیں نوید ءِ گھار ءَ گوں اھوالکاراں تران کنان ءَ گوشتگ کہ نوید احمد لانگو سال دوھزار پانزدہ ءِ پانزدہ اپریل ءَ چہ منگچر ءِ بازار ءَ پوجی کارمنداں آوار جتگ ءُ گوں وت برتگ کہ ھما انت آئی ءِ ھچ ھال اھوال نیست –

آئی ءَ گوشتگ کہ درسیں بیگواھیں مردم یل کنگ بہ بنت یا آمیدگس ءَ آرگ بہ بنت تانکہ ما اے درد ءُ ازیت ءَ رکیت بہ کن ایں –

آئی ءِ گوشگ ات کہ اگاں مئے دوستگیں مردم آمیدگس ءَ آرگ نہ بنت گڈا کم چہ کم مارا آھانی درگت ءَ سرپدی دیگ بہ بیت ءُ مارا مئے دوستگیں مردمانی گوم ءَ ھال ءُ اھوال کنائینگ بہ بیت تانکہ مئے دل ءَ تسلہ ءِ بہ رسیت –

زھرشانی ءِ میان ءَ بیگواھیں شاہان بلوچ ءِ زھگ ءَ تران کنان ءَ گوشتگ کہ منی پت گوستگیں سال دوھزار بیست ءُ دو ءِ پوجی کارمنداں آوار جتگ ءُ بیگواہ کتگ –

آئی ءِ گوشگ ات کہ منی وتی پت ءِ یل.کنائینگے ھاتر ءَ باز براں زھرشانی کتگ در پہ در بوتگ انت بلے ھچ نہ رستگ –

آئی ءَ گوشتگ کہ منی پت ءَ ھوار درسیں بیگواھیں مردم یل کنگ ءُ آمیدگس ءَ آرگ بہ بنت یا مئے دوستگیں مردمانی گوم ءَ ھال اھوال کنائینگ بہ بیت تانکہ مارا تسلی بہ رسیت –

زانگ بہ بیت دو ماہ ساری بیست ءُ یک مئی دوھزار ءُ بیست ءُ سَے ءَ ھم نوید لانگو، شاہان بلوچ، قذافی نیچاری، کفایت نچاری ءُ محمد حسن ءَ ھوار ایندگہ بیگواھیں مردمانی ھاتر ءَ آھانی کھولانی نیمگ ءَ زھرشانی کنگ بوتگ ات کہ سرکاری مردماں آ باور کنائینگ بوتگ انت بلے آئی ءِ سر ءَ روچ مروچی گامگیج زورگ نہ بوتگ –

بلوچستان ءِ دو جتا جتائیں دمگ ڈیرہ بگٹی ءُ آواران ءَ دو زالبولاں وتکشی کتگ-

وتکشی کنوکانی پجار عبدلولی شاھی خراسانی ءِ زال ھانزادی ءُ ندا ءِ ناماں زانگ بیتگ اَنت-

کوھلو ءَ وتکشی ءِ وئیل ھپت جولائی ءَ پیش اتکگ کہ اود ءَ دمگی مردماں وئیل ءِ راست کنان ءَ گوشتگ کہ کوھلو ءِ تھسیل گرسنی ءِ ھند ءَ گربی گرسنی ءَ ھانزادی نامیں یک زالبولے ءَ گریبی ءُ شد ءِ سبب ءَ وتکشی کتگ-

زانگ بہ بیت گربی گرسنی ءِ جھمنند اے وھد ءَ ھم گریبی ءِ گڈی سیمسر ءَ زندگی گوازینگ ءَ اَنت-

دمگی مردمانی رد ءَ وتکشی کنوکیں زالبول ءِ ھشت جنک اَنت ءُ درستاں مستریں جنک یازدہ سالیگ اِنت، ءُ زھگانی پت پیر ءُ کماش اِنت ھچ کار کت نہ کنت ءُ گنوک اِنت-

ھمے وڑ ءَ چہ آواران ءَ ھم اھوال اَنت کہ گیشکور ءَ گوستگیں روچاں ندا نامیں جنکے ءَ وتکشی کتگ بلے تنی وھدی وتکشی کنگ ءِ سبب زانگ نہ بیتگ –

ھندوستان ءِ گوریچانی اُستاں ترندیں ھور ءُ توپان ءُ آپانی لوھڑانی سبب ءَ کم چہ کم بیست ءُ دو مردم بیران بیتگ اَنت-

ھال سرکنوکیں ادارہ روئٹرز ءِ رد ءَ بشی ھورانی سبب ءَ بنجاھی شھر دھلی ءَ وانگجاہ بند کنگ بیتگ اَنت ءُ ھمے داب ءَ کوہ ھمالیہ ءِ دامن ءَ ھستیں ریاست ھماچل پردیش ءُ اتراکھنڈ ءَ مھلوک لوگانی توک ءَ نندگ ءِکڈنی کنگ بیتگ اَنت-

ھندوستان ءِ روتاک ٹائمز آف انڈیا ءِ رد ءَ ھماچل پردیش، اتراکھنڈ، جموں و کشمر ءُ پنجاب ءَ توپان ءُ ھارانی سبب ءَ کم چہ کم بیست ءُ دو مردم بیران بیتگ اَنت-

گوستگیں روچ ءَ گوریچانی ریاست ھماچل پردیش ءَ توپانی ھارانی آیگ ءَ یک پھلے پرشتگ ءُ بازیں میتگ آپ ءَ وتی ارجان جتگ اَنت-

توپان ءَ گٹیں مردم ھیلی کاپٹر ءِ گون ءَ ڈن ءَ آرگ بیتگ اَنت-

ریاست ءِ پنجاب ءَ ھوار گوریچانی اُستان ءُ دھلی ءِ دگ ءُ دمک توپان ءَ گپتگ اَنت لھتے جاھاں پھزداراں ربڑی کشتی جوڑ کرتگ ءُ لوگاں گٹیں مردم کش اتگ ءُ مھکمیں جاھاں برتگ اَنت-

ھماچل پردیش ءِ سروزیر سکھوندر سنگھ ءَ چاگردی رسانکجاھاں شھریاناں لوگانی توک ءَ نندگ ءِ دزبندی کتگ –

مھکمہ ءِ موسمیات ءِ رد ءَ ھماچل پردیش ءِ جتا جتائیں ھنداں یک ماھے ءِ ھور ءَ یکیں روچ ءَ گورتگ –

واکدارانی رد ءَ یک جون ءَ بندات بیتگیں بشی ھور ءَ پد دھلی ءَ یک سد ءُ دوازدہ درسد، پنجاب ءَ سد درسد، ءُ ھماچل پردیش ءَ کساسی ھپتاد درسد ھور بیتگ اَنت-

روکپتی بلوچستان ءِ بنجاھی شھر زاھدان ءَ یک بندیگیں مردمے پاھو دیگ بیتگ-

گیشیں اھوالانی رد ءَ زاھدان ءِ مزنیں زندان ءَ مروچی یک بندیگیں مردمے نشہ باپاری ءِ بھتام ءَ پاھو دیگ بیتگ-

پاھو دیگ بیتگیں مردم ءِ پجار سی ءُ ھشت سالی ئیں ابراھیم عالیزئی جھمنند کریمپور زاھدان ءِ نام ءَ زانگ بیتگ-

اھوالانی رد ءَ ابراھیم ایرانی سال سیزدہ سد ءُ نود ءُ ھشت ءَ گرگ بیتگ ءُ چریشی ءَ پد آئی ءِ سر ءَ ایرانی آمیدگس ءَ نشہ باپاری ءِ بھتام جتگ ءُ آئی ءَ را مروچی پاھو داتگ –

زانگ بہ بیت گوستگیں روچ ءَ ھم زاھدان ءِ جھمنندین مردمے ماں کرمان ءِ زندان ءَ پاھو دیگ بیتگ ات-

اھوالانی رد ءَ ھمے سال ءِ بندات ءَ داں انیگ ءَ پنجاہ ءُ ھشت یک سد ءُ پنجاہ ءُ نُھ مردم پاھو دیگ بیتگ انت کہ آیانی چار زالبول ھوار اَنت کہ اے جتا جتائیں زنداناں پاھو دیگ بیتگ اَنت-