5000 روچ : وی بی ایم پی ءِ پہ انساپ ءَ یکشلیں جد ءُ جھد
ٹی بی پی گچینی
زارین بلوچ
بیگواھیں بلوچانی ھاتر ءَ پہ انساپ ءِ لوٹ کنگ ءَ یک دھک ءَ چہ پُر جزمیں باسکانی یک ٹولی ءِ بلوچستان ءِ بُندر شال ءِ ترندیں گرم ءُ ھڈاں پتروکیں سارتی ءِ دیمپانی کنگ ءَ اَنت۔ اے مردم کہ اشاں وائس فار بلوچ مسنگ پرسنز (VBMP) ءِ بُنھِشت ایر کُتگ، کہ اگبالانی ھاتر ءَ کارکنوکیں یک گل اَنت۔ اشاں راستی ءِ شوھاز ءَ بے باوریں کساس ءَ جنجال ءُ بزگیانی دیمپانی کنگ کپتگ۔ جسمانی دروشم ءَ اُرش کنگ ءُ ھراسگ کنگ ءَ گوار گیر کانودی دزگیری ءُ شدت ءِ سگگ، وی بی ایم پی ءِ باسکاں اے درست دیستگ اَنت۔ بلے چُشیں جنجال ءُ سکیاں پد ھم آیانی گام نہ لرز اِتگ اَنت۔ شمبے، یک اپریل ءَ وی بی ایم پی ءِ پُر امینیں زھرشانی ءَ 5000 روچ سرجم بیتگ اَنت۔
شال ءَ VBMP ءِ زھرشانی بنجل ءَ، بازیں کھول ھمک روچ یک ھواریں مکسدے ءِ ھاتر ءَ یکجاہ بنت۔ ایشانی تہ ءَ پیریں مات وتی بیگواھیں بچانی شوھاز ءَ اَنت، گوھار وتی بیگواھیں براتاں پولگ ءَ اَنت، لوگیگ پہ وتی لوگ واجھاں بے تاھیر اَنت، ءُ جِنِک وتی پِتاں شوھاز کنگ ءَ اَنت۔ بنجل ءِ گدان ءِ باھوٹی اِنت، آ درستاں یک دومیگ ءِ ھمراھی ءَ ایمنی رس اِیت، اے زانگ ءَ چہ کہ آ وتی جھد ءَ تھنا نہ اَنت۔ اگاں چہ آ وتی دوستیگانی واتری ءَ پہ جھد کنگ ءَ اَنت، اوست ھما شئے اِنت کہ آیاں پُر جزم دار ایت۔ ھمک روچ آ اے اوست ءَ گوں پاد کائنت کہ جاور جتا بنت، بلے مدامی ءِ وڑ ءَ، روچ ءِ برکت بیگ ءَ پد آ دل برداشتگی ءُ بے امیتی ءَ گوں واتر بنت اِنت۔ بد بھتی ءَ، بازیں مردم گوں ھمے اوست ءِ پجیگ ءَ چہ اے جھان ءَ رپتگ اَنت کہ آیانی تہ ءَ داں انگت یک آسے پئیم ءَ روک اَنت۔
ھمک روچ، وی بی ایم پی ءِ زھرشانی بنجل ءَ کھول گیر کانودی پئیم ءَ بندیگیں وتی دوستیگاں گوں یکجاھی ءِ درشانگ ءَ پہ چیدگی شُد ھڑتال کن اَنت۔ چہ سھب ءَ بگر داں روچ ءَ، ابید ورگ ورگ ءَ تمبو ءَ نندوک بنت، کہ اے ھما سنگینیں جاوارانی درانگازی ءَ کن اَنت کہ آیانی دیمپانی اِیشانی دوستیگیں مردماں بندیگ جاھاں کنگ کپ اِیت، کہ آودہ آ ابید کجام بھتام اگں کیس ایر کنگ بنت۔ وتی ورگانی دیمھونی دیگ ءَ گوں، کھول بلوچ بیگواھیں مردمانی نگیگیں جاورانی بابت ءَ سما ودی کنگ ءِ جھد کنگ ءَ اَنت۔
وائس فار بلوچ مسنگ پرسنز (VBMP) ءِ بندات ءِ شوھاز 2001 چہ جنگ بیت کنت وھدیکہ علی اصغر بنگلزئی نامیں گُد دوچوکیں (درزی) لشکریانی دست ءَ دومی رند ءَ دزگیر کنگ بیتگ اَت۔ آئی ءَ دو دھک ءَ چہ بُرز ءِ وھد گوستگ، بلے آ داں انگت لوگ ءَ واتر نہ بیتگ البت، اکتوبر 2009 ءَ سئے باسک ماما قدیر بلوچ، نصر اللہ بلوچ ءُ فرزانہ مجید ءَ ، VBMP ءِ بنھشت ایر کُت۔ آیانی پر ایمنیں جد ءُ جھد ءِ بندات شال پریس کلب ءِ دیم ءَ ادارکی بنجل ءِ جنگ ءَ چہ بیتگ اَت، کہ ایشی ءِ تہ ءَ بیگواھیں مردمانی سلامتی ءَ گوں یل کنائنگ ءِ لوٹ کنگ بیتگ اَت۔ بنجل بے کساسیں سکی ءُ چکاسانی نیام ءَ ھم برجاہ بیتگ، جنجال ءُ سکیانی دیمپانی کنان ءَ اوست ءُ جزم ءِ چیدگ جوڑ بیتگ۔ آیانی توار ءِ دارگ ءِ پد مہ پد کوشست کنگ ءَ ابید ھم، وی بی ایم پی ءِ بیگواھیں مردمانی کھول ءِ جھگیری ءُ اے جیڑہ نیمگ ءَ میان اُستمانی دلگوش گور کنائنگ ءَ ھچ پئیمیں کمی نیتکگ۔
بلوچ بیگواھیں مردمانی کھول VBMP ءِ پر ایمنیں جھد ءِ تہ ءَ سرین ءِ ھڈ ءِ ارزشت ءَ دار اَنت۔ علی اصغر بنگلزئی ءِ بیگواھی ءَ دو دھک ءَ چہ گیشتر وھد گوزتگ بلے آئی کھول انگت ھم آئی پھازیتگیں واتری ءِ واھگ دار اَنت۔ آ انگت ھم شال ءُ دگہ جاھاں بیوکیں زھرشانی ءُ نندانکاں گندگ بنت، کہ آیاں پلے کارڈ دست ءَ اَنت ءُ آئی پھازیتگیں واتری ءِ لوٹ کنگ ءَ اَنت۔ آئی بچ، فاروق بنگلزئی ءَ وتی ورنائیں زند ءِ مزنیں بھر ءِ وتی پِت ءِ ساھگ ءَ ابید گوازینتگ اَنت۔ کھولاں وتی نگیگیں جاورانی نیمگ ءَ دلگوش گور کنگ ءِ ھاتر ءَ بازیں پریس کانفرنس ءُ زھرشانی کُتگ اَنت، ءُ انساپ ءِ شوھاز ءَ بیگواھیں مردمانی کمیشن ءَ بگر داں سپریم کورٹ آف پاکستان ءَ ھمک در ٹُک اِتگ اَنت بلے آیانی دزبندی ءِ سر ءَ کسی گوش ءَ مور ھم نہ وارتگ ۔ کھول ءَ بنگلزئی ءِ “زورانسری بیگواھی”ءِ سابت کنگ ءَ پہ درستیں منانک آمید گِس ءَ داتگ اَنت، بلے ھمک رند ءَ، آیانی اوست کُشگ بیتگ اَنت پرچہ کہ “مزن واکداراں” آمید گسانی سر ءَ کیس ءِ تہ ءَ دیر کنگ ءَ پہ زور پِر داتگ ءُ جیڑہ گیشتر مانگیشینتگ اَنت۔
سمی ءُ مھلب ءِ جاور ھم ھمینچو سنگین اَنت۔آیانی پِت ڈاکٹر دین محمد بلوچ 2009 ءَ پاکستانی لشکریاں چِست کُتگ اَت۔ دویں گوھار ھما وھد ءَ گونڈو بیتگ اَنت، وھدیکہ آیانی پِت بیگواہ بیتگ اَت: سمی ءِ امبر دہ سال ءِ نزیک بیتگ۔ ءُ مھلب ھشت سال ءِ بیتگ۔ دویں گوھار ھما وھد ءَ چہ وتی پِت ءِ پھازیتگیں واتری ءَ پہ جھد کنگ ءَ اَنت۔ 2013 ءَ، 14 ءُ 15 سالی سمی بلوچ بیگواھیں مردمانی بازیں زھرشانیانی بھر بیتگ، آئی ءَ وتی جاورھالانی نیمگ ءَ دلگوش گور کنائینگ ءِ ھاتر ءَ شال ءَ داں اسلام آباد 3000 کلومیٹر دراجیں راجدپتری لانگ مارچ کُتگ اَت۔ آئی ءَ اقوام متحدہ ءُ یورپی یونین ءِ جھگیراں گوں نیاد کُتگ اَت، راجی ءُ میان اُستمانی اگبالانی گلاں گوں دزبندی کُتگ، بیگواھیں مردمانی کمیشن ءِ دیم ءَ شُتگ، بلوچستان ھائی کورٹ ءُ سپریم کورٹ ءِ در ٹُک اِتگ اَنت، ءُ زھرشانی ءُ شُد ھڑتال ءِ رھشونی کُتگ، بلے ھچ پائدگ نہ رس اتگ۔ آئی ءَ ھما پاکستان ءِ مزن وزیر عمران خان ءُ انسانی اگبالانی وزیر شیریں مزاری ءَ گوں نیاد کُتگ کہ آئی ءَ جندی دروشم ءَ آ باوری داتگ اَت کہ درستیں بیگواھیں مردم پہ سلامتی لوگ ءَ آرگ بنت۔ اے سوگند ھم نیم بُندگ بیت اَنت-
وتی پِت ءِ بیگواھی ءِ سیزدہ سالاں پد، دویں گوھار کہ کدی کودکیں زھگ بیتگ اَت، نی ورنائیں جنین اَنت۔آ نہ زان اَنت کہ آ چورہ اَنت اگاں ناں، آئی ءِ مات ءَ باور نہ کنت کہ آ آروسی اِنت اگاں جنوزام اِنت۔ آیانی زند چہ پِت ءِ بیگواھی ءِ آسر ءَ چپ بیتگ اَنت۔ انچش کہ سمی ءَ نبشتگ “ھما روچی “ڈاکٹردین محمد” بیگواہ بیت، ءُ ھمے پئیماں دگہ بازیں شئے ھم بیگواہ بیتگ اَنت۔ ما یک لوگے ءِ باھینتگ، کہ کدی پُر ایمن اَنت۔ وشی ءُ شاتمانی؛ مئے کسانی۔ ما یک ماتی ءِ بچ، یک جنینے ءِ لوگ واجہ ءُ سئے زھگانی پِت باھینتگ۔ وھدیکہ آ بیگواہ کنگ بیتگ اَت مئے سرجمیں زند ازابی بیتگ ۔ مئے کھول اذاب ءَ بیتگ، چاگردی،مالی، زھنی ءُ جسمانی پئیم ءَ تکلیپ ءَ بیتگ۔ منی نادراھیں مات ءَ آئی کمک ءُ ھمراھداری ءَ ابید مارہ رودینتگ۔ آ درست گار بیتگ اَنت کہ گوں ما بندوک بیتگ۔
دویں گوھار اے جھد ءَ تھنا نہ اَنت بلکیں آیانی پئیمیں بے کساس اَنت۔ 2016 ءَ بیگواہ بیتگیں نودربر رھشون شبیر بلوچ ءِ گوھار سیما بلوچ اِنت، ذاکر مجید ءِ مات اِنت، کہ 2009 ءَ بیگواہ کنگ بیتگ کہ داں انگت واتر نہ بیتگ۔ آئی ءِ گوھار فرزانہ مجید کہ VBMP ءِ سروکاں چہ یکے ۔ بیگواھیں راشد حسین بلوچ ءِ پیریں مات باس خاتون اِنت، کہ 2018 ءَ اماراتی لشکریاں دزگیر کُتگ ءُ گیر کانودی پئیم ءَ پاکستان ءَ دیم داتگ اَت۔ ورنائیں علی حیدر اِنت، کہ آئی ءِ اُمبر 8 سال بیتگ وھدے آئی ءِ پِت 2010 ءَ بیگواہ کنگ بیتگ اَت، ءُ وھدے آ 11 سالیگ اَت ، آئی ءَ وتی پِت ءِ شوھاز ءَ شال داں اسلام آباد کم چہ کم 1200 میل پَند مساپری کُتگ اَت۔ آ وتی پِت واتری ءَ پہ زھرشانی کنان ءَ VBMP ءِ بنجل ءَ مزن ءَ بیتگ بلے پِت واتری ءَ ابید ورنائیں علی حیدر وت بیگواہ بیتگ اَت۔
وی بی ایم پی ءِ باسکاں بلوچستان ءِ تہ ءَ زورانسری بیگواھیانی بگیر ءَ وتی پُر ایمنیں زھرشانیانی مزنیں چکاسانی دیمپانی کنگ کپتگ۔ آیاں اُرش، گیر کانودی دزگیری، لٹ شاپی ءُ پھازگی ادارگانی چیردستی ءَ کارکنوکیں استانی واکدار ءُ “ملیشییا” آئی ءِ نیمگ ءَ چہ بیھارانی نشانگ کنگ بیتگ اَنت۔ اے جنجالاں ابید ھم، وی بی ایم پی ءِ باسکاں بیگواھیں مردمانی ءُ آیانی کھولانی ھاتر ءَ انساپ ءِ لوٹ کنان ءَ وتی پر ایمنیں زھرشانی ءُ مھلوک ءِ توار بیگ ءِ جد ءُ جھد برجاہ داشتگ۔
2022 ءَ کراچی ءَ یک زھرشانی ءِ نیام ءَ، بیگواھیں مردمانی کھول ءِ سر ءَ پولیس ءُ پھازگی لشکر اُرش کن اَنت۔ آیانی لٹ شاپی کنگ بیتگ اَت، آ ھراسگ کنگ بیتگ اِت اَنت، پولیس وین ءَ مان کنگ بیتگ اَت اَنت، ءُ زندان ءَ برگ بیتگ اِت اَنت۔ ھمے روچے ءِ بارو ءَ گپ کنان ءَ سمی دین بلوچ نبشتہ کنت کہ: آئی ءُ دگہ جھدکاراں شامات جنگ بیتگ اَت ءُ دگانی سر ءَ کَشّان کنگ بیتگ اَت، آیانی گوشی پچ گرگ بیتگ اِت اَنت۔ آیانی چادر چہ سراں دیر کنگ بیت اَنت ءُ وھدے مئے سراں چہ چادر کشگ بیت اَنت گُڑا، پولیس اپسر ءَ گوں تژن گُشت کہ ” یک برے ایشانی شلوار کشگ بہ بنت، گُڑا اے وت زھرشانی کنگ یل کن اَنت – آیاں’سبکیں جنین’ گُشگ بیتگ ءُ اے درستیں کاراں پہ نام کٹگ ءِ ھاتر ءَ کنگ ءِ بھتام جنگ اَت۔ “ترا گمان بیت کہ تو یک رھشونی یے ءُ چہ درستاں دیم ءَ اَت۔ ما ترا درس وانین این”، سمی بلوچ ءَ یک پولیس کارندھے ءِ بابت ءَ گپ کنان ءَ گُشت۔
وی بی ایم پی ءِ زھرشانی بنجل ءِ سر ءَ پد مہ پد اُرش ءُ پُرشت پروش ءِ دیمپان اِنت۔ناشناسیں مردماں بلوچ بیگواھیں مردمانی اکس پچ گِپت اَنت، کہ چریشی ءَ کھول پریشان بیتگ اَنت۔ چد ءُ گیشتر، بنجل ءِ گدان، کہ پہ انساپ ءّ شوھازوکاں یک اوست ءُ یکجاھی ءِ چیدگ ءِ زانگ بیت، ایشی ءَ مان دارگ ءُ ڈرینگ بیتگ۔ اے وئیل راستی ءُ ھساب کتاب ءِ جنگ ءَ پر ایمنیں زھرشانی کنوکاں دیمپانیں چکاساں پدر کنت۔
اے درستیں دیمپانیاں ابید ھم، بیگواھیں بلوچ مردمانی جھد ءَ گوں VBMP ءِ جزم مھکم اِنت۔ آیاں ھمینکس زوراں گوں دارگ بیت، آ دو ھمینچو مھکمی ءَ گوں دیما کائنت۔ گل ءِ پُر ایمنیں زھرشانی یک دھکے ءَ چہ بُرز ءِ وھد اِنت کہ برجاہ اِنت، مزنیں چکاسانی دیمپانی کنگ ءَ ابید ھم، بلوچ بیگواھیں مردمانی کھولاں پدر کُتگ کہ داں وھدے آیانی دوستیگ پہ سلامتی واتر آرگ نہ بنت، آ پد کِنز نہ بنت۔ VBMP ءَ وتی پر ایمنیں لیکہ ءِ سوب ءَ نامداری گِپتگ۔
گل ءِ توار چِست کنگی یکشلی جھد ءَ زورانسری بیگواھیانی جیڑہ ڈیھی ءُ میان اُستمانی دلگوش گور کنائینتگ۔ وی بی ایم پی بیگواھیں مردمانی مکسد ءِ ھاتر ءَ سمائی ودی کنگ ءُ کمک یکجاہ کنگ ءَ سوبمبند بیتگ۔ VBMP ءِ سانمندی رسانکدر ءِ ودوکیں کوریج، لس مھلوک ءِ دلگوش ءُ بلوچستان ءِ جاورھالانی میان اُستمانی تک ءَ گندگ بیت کنت۔
سرکار زورانسری بیگواھی ءِ جیڑہ ءِ گیوار کنگ ءَ جوانیں گام زیرگ ءَ بے سوب بیتگ، چریشی ءِ سوب ءَ بیگواھیں مردمانی کھول ءِ تہ ءَ بے باوری ءُ بے امیتی ودی بیتگ۔ 2011 ءَ اڈ دیگ بیتگیں زورانسری بیگواھیانی پَٹ ءُ پول کنوکیں پہ نامی ئیں کمیشن اے جیڑہ گیوار کنگ ءَ بے سوب بیتگ۔ 2020 ءِ یک ترندیں چمشانکے ءَ، انٹرنیشنل کمیشن آف جیورسٹس (ICJ) ءَ گُشتگ کہ کمیشن وتی مکسد ءَ “سرجمی ءَ بے سوب” بیتگ۔ چد ءُ گیشتر، کمیشن ءَ ابید کجام ھم جوانیں منانک ھزارانی کچ ءَ کیس ھلاس کُتگ اَنت ءُ انساپ ءِ شوھاز ءَ ایشی ءِ در ءَ ٹکوکیں بیگواھیں مردمانی کھول کم شرپ کنگ بیتگ اَنت۔
انچش VBMP وتی پرایمنیں زھرشانی ءِ 5000 می روچ ءَ دارگ ءَ اِنت، اے پرایمنیں گھگیری بدلی ءُ تاکت ءِ یاتگیری ءِ چیدگ اِنت۔ VBMP ءِ نگیگیں جاورانی تہ ءَ ھاموش بیگ ءَ انکار کنگ راجدپتر ءِ سوبمند تریں جُنزانی پر ایمنی ءِ سر بندوکیں جھد ءِ پد ءُ گوانک اِنت۔ انسانی اگبالانی ھاتر ءَ اِشانی جزم ءِ تہ ءَ ھچ کمی نئیتکگ، بے کساسیں چکاسانی دیمپانی ءَ پد ھم، گھگیری ءِ ھما پاداریں جزبگ کہ آئی ءَ VBMP ءِ گدان یک دھکے ءَ چہ گیشتر وھداں چہ برجاہ داشتگ ءُ بے کساسیں مردماں آیانی انساپ ءِ گرگ ءِ جھد ءَ جُنز ءُ سکین دنت۔ انچو کہ ما VBMP ءِ شانداریں سپر ءِ سر ءَ چمشانک دئیں، ما انسانی اگبال ءِ دیمروی ءِ ھاترا آیانی دم نہ برتگیں کوشست ءُ بلوچستان ءَ بزگ ءُ زوراکی آماچ ءُ نا آشنائیں مردمانی توار جوڑ بیگ ءِ ایشانی مھنت ءَ دست کنیں۔
