TBP Balochi

چین ءَ نود روچ ءِ مُھلت انت کہ بلوچستان ءَ در بہ ایت ءُ بہ روت اگاں ناں آئی ءِ بگیری ءَ اُرشانی تہ ءَ چد ءُ گیشتر ترندی آرگ بیت اِنت – جارکش جیئند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ وتی آفیشل ٹیلی گرام چینل “ھکل” ءَ شنگ کرتگیں درشان ءِ تہ ءَ گوادر ءَ آپریشن “زِر پھازگ” ءِ سرجمیں ھال شنگ کرتگ ءُ گوشتگ کہ اے اُرش بی ایل اے مجید برگیڈ ءِ دو پدائی سنگتاں کُتگ ءُ چریشی ءَ چین ءِ چار جھمنند ءُ کم چہ کم یازدہ پوجی کارمند مُرتگ انت –

جارکش جیئند بلوچ ءِ رِد ءَ مروچی بزاں یکشمبے روچ ءَ بلوچ لبریشن آرمی ءِ پدائی یونٹ مجید برگیڈ ءَ بلوچستان تیاب دپی دمگ گوادر ءَ سھب ءِ ادار نُھ ءُ ھژدہ ءَ، بی ایل اے آپریشن “زرپھازگ” ءِ سیمی بھر ءِ بندات کتگ کہ دو اَدار ءَ گیش برجاہ بوگ ءَ پد نیمروچ ءَ سوبمندی ءَ گوں آسر بوتگ – اے آپریشن ءَ مجید برگیڈ ءِ دو پدائیاں ھوار بی ایل اے ءِ انٹیلیجنس ونگ ءُ ٹیکٹیکل ونگ ءَ بھر زرتگ، چہ اے آپریشن ءَ زورگیریں پاکستان ءِ کمک کار چین ءِ چارجھمنند کُشتگ انت ءُ آیانی پھازوکیں کم چہ کم یازدہ نگھپانیں پوجی کارمند ھم کُشتگ انت، وھدیکہ بازینے زدگ بوتگ انت –

جارکش ءِ رِد ءَ اے اُرش ماں گوادر ءَ جوڈیشل کمپلیکس ءِ نزیک ءَ چیرمین اسحاق چار راھ ءِ سر ءَ ھما وھد ءَ کنگ بوتگ وھدیکہ چینی انجینئیرانی کاروان مزنیں پھازگی ٹولی ءِ ھمرائی ءَ چہ بالی پٹ ءَ در آتکگ ءُ دیم پہ گوادر پورٹ ءَ رؤگ ءَ بوتگ- اے کاروان ءَ چینی جھمنندانی چار گاڑی ھوار بوتگ انت، وھدیکہ آیانی پھازگ ءَ پہ پاکستان آرمی ءِ شش، پولیس ءِ یکے، اے ٹی ایف ءِ یک گاڑی ءُ یک بکتر بندے ھوار بوتگ انت – اے کاروان ءَ آرمی ءِ چارسد ءُ چِل برگیڈ ءِ روٹ پروٹیکشن ءِ کمک ھم گون بوتگ بلے بلوچ پدائی جوانیں رپک ءُ ھنراں گوں اے جاہ ءَ سر بوگ ءَ سوبمند بوتگ انت، سنگر گپتگ ءُ اولسر ءَ گرنیڈ لانچراں گوں اُرش کتگ ءُ کاروان پہ اوشتگ ءَ لاچار کتگ چریشی ءَ پد نیم ادار ءَ تاں کاروان ءِ سر ءَ تیرگواری ءُ گرنیڈ لانچر آس داتگ چریشی ءَ چار چینی جھمنند ءُ یازدہ پوجی کارمند مرتگ انت –

جیئند بلوچ ءِ رِد ءَ اے آپریشن بی ایل اے مجید برگیڈ دو تمردیں پدائی نوید بلوچ ء خدابخش پنام ءِ اسلم بلوچ جھمنند دشت نگور ءُ مقبول بلوچ ء پھلان پنام ءِ قائم بلوچ جھمنند آواران گیشکور ءَ کتگ – آپریشن ءِ سرجم بوگ ءَ پد آیاں تاں دیراں وتی مھکمیں سنگرانی تہ ءَ پاکستانی پوج ءِ گوم ءَ جنگ داتگ ءُ دژمن سک باز تاوان داتگ – تیرانی ھلاس بوگ ءَ پد آیاں گڈی تیرے پلسپہ وتیگی کتگ ھردو تمردیں پدائیاں گڈی تیر وتی سر ءَ جتگ ءُ وت ءَ نمیران کتگ –

جارکش ءِ رِد ءَ نمیرانیں سنگت پدائی نوید بلوچ سال دوھزار ءُ نوزدہ ءَ، ءُ نمیرانیں سنگت پدائی مقبول بلوچ سال دوھزار ءُ دوازدہ ءَ بلوچ راجی آجوئی زرمبشت ءِ سلاہ بندیں جھد ءَ بندوک بوتگ انت وھدیکہ سال دوھزار ءُ بیست ءُ یک ءَ آھاں مجید برگیڈ ءِ تہ ءَ رزاکاری وتی کرد پیلو کتگ – مجید برگیڈ ءِ رھبندانی رِد ءَ آیانی چار ءُ ٹپاس بوتگ ءُ باور کنائینتگ کہ پدائی پہ زور یا جزباتی اے پیسلہ ءِ بھر نہ بوتگ انت پد ءَ شش ماھ ءَ تاں آیانی ٹریننگ کنگ بوتگ ءُ آ وتی مشن ءِ تیاری ءَ گلائیش بوتگ انت ءُ کساس دو سالانی اوپار ءُ ودار ٹریننگ ءَ پد مروچی آیاں وتی مشن سوبمندی ءَ گوں آسر کتگ –

جیئند بلوچ ءِ رِد بلوچ لبریشن آرمی نمیرانیں پدائی نوید بلوچ ءُ نمیرانیں پدائی مقبول بلوچ ءِ بے بھائیں دیمھونی ءُ تمردی ءَ آیاں دروت ندر کنت اے کول ءَ کنت کہ بی ایل اے آجوئی پیش یا رند ءَ ھچ وڑ نمیران بوتگیں سرانی دیمھونی ءَ شموشگ ءَ نیلیت ءُ راجدپترے تہ ءَ آیانی اے دیمھونی سھریں لپزاں گوں نبشتہ کنگ بنت –

جارکش جیئند بلوچ ءِ رِد ءَ بی ایل اے جمھوریہ چین ءِ دیم ءَ اے گپ ءَ تچک کنت ءُ آئی مکن کنت کہ بلوچستان یک زورگپت ءُ بھر کتگیں استانے، بلوچ گوستگیں ھپتاد ءُ ھپت سالاں وتی آجوئی ءِ جنگ ءَ کنگ ءَ انت، چین بلوچستان ءِ تہ ءَ ناکہ تھنا زورگیریں پاکستان ءِ کمک ءَ کنگ ءَ انت ءُ اے زورگیری ءَ گیش مھکم کنگ ءَ ھوار انت بلکیں سیندک ءُ گوادر پورٹ ءِ دروشم ءَ بلوچ ءِ مال ءُ مڈیانی لٹ ءُ پُل ءَ شریدار انت – ما مدامی جمھوریہ چین مکن کُتگ کہ آ بلوچستان ءِ تہ ءَ وتی لٹ ءُ پُل ءَ بند بہ کنت در بہ ایت، ما دوبر مکن کنیں اے گپ ءَ تچک کنیں کہ دری ڈیھانی سرمایہ کاری بس بلوچ راج ءِ مرزی ءُ منشا ءُ بلوچستان ءِ آجوئی پد بوت کنت – اشی ءَ ابید زورگیر ءِ گون ءَ کنگ بوتگیں درسیں مساماں بلوچ نہ منیت، بلکیں آ گوں دژمن ءَ کنگ بوتگ انت ءُ اے وڑیں دژمن ءِ شَور بستگیں ھمبستگانی بگیری ءَ بلوچ زرمبشت ءِ سلاہ بندیں جھد آیانی پھازگ ءَ پہ اوشتوک انت –

بی ایل اے ءِ جارکش جیئند بلوچ ءِ رِد ءَ اگاں چین نود روچانی تہ ءَ چہ بلوچستان ءَ وتی پروجکٹاں بند نہ کنت ءُ در نہ ایت گڑا بلوچ لبریشن آرمی چین ءِ بگیری ءَ وتی اُرشانی تہ ءَ ترندی ءُ گیشی کاریت – ما اے گپ ءَ تچک کنیں کہ چین ءِ بازیں گچینی سر ءُ جاہ مئے نشانگ ءَ انت ءُ مئے سرمچار آیانی سر ءَ اُرش کنگ ءَ ساجو انت – اگاں جمھوریہ چین ءَ جوانیں رویشت ءِ پیش دارگ ءَ سوبمند نہ بوت گڑا مئے اُرشانی نوکتریں درچ ءِ ھاتر ءَ تیار بہ بیت –

گڈسر ءَ جارکش جیئند بلوچ ءَ گوشتگ کہ بی ایل اے یکرندے پد ءَ اے کول ءَ کنت کہ بلوچستان ءِ تہ ءَ زورگیریں پاکستان ءِ سرجمی ءَ در آیگ ءَ تاں مئے اُرش ترندی ءَ گوں برجاہ مان انت –

سربوتگیں ھالانی رِد ءَ بلوچستان ءِ دمگ پنجگور ءُ سوراب ءَ چاردہ اگست ءِ تیاری ءِ چن ءُ لانچ ءَ دزگٹیں ڈپٹی کمشنر ءِ کارگسانی سر ءَ دز بمب اُرش کنگ بوتگ، وھدیکہ پنجگور ءُ کیچ ءَ پاکستانی پوج ءِ سر ءَ ھم اُرش کنگ بوتگ –

گیشیں ھالانی رِد ءَ مروچی یکشمبے ءِ روچ ءَبلوچستان ءِ دمگ پنجگور ءَ ناشناسیں پرپٹ سواراں پنجگور ءِ ڈی سی کارگس ءِ تہ ءَ دز بمب ءِ چگل داتگ ءُ در شُتگ انت –

تراک ءِ توار چہ دُور ءَ مردماں اشکُتگ ءُ تراک ءَ پد پولیس ءُ پوج ءَ وت ءَ ھمے جاہ ءَ سر کتگ ءُ چار ءُ ٹپاس کتگ –

ھمے وڈ چہ سوراب ءَ ھمے ھال آیگ ءَ انت کہ ناشناسیں مردماں سوراب ڈپٹی کمشنر ءِ کارگس ءَ چاردہ اگست ءِ چن ءُ لانچ ءَ دزگٹیں ٹولی دز بمب اُرش ءِ نشانگ کتگ انت –

چہ پنجگور ءَ اے ھال ھم آیگ ءَ کہ گچک ءِ ھند ءَ پاکستانی پوج ءُ سلاہ بندیں مردمانی میان ءَ میڑے بوتگ بلے ھچ وڈیں جانی تاوان ءِ ھال نیست –

کیچ ءِ شھر تربت گنہ ءَ برجاھیں پاکستانی پوج ءِ پانگس ءِ سر ءَ ھم ناشناسیں سلاہ بنداں اُرش کتگ –

پولیس ءِ رِد ءَ اے اُرشاں ھچ وڈیں جانی تاوان نہ بوتگ –

ھمے کہ چاردہ اگست نزیک بیت بلوچستان ءَ اُرشانی درچ گیش بنت، چدوپیسر مروچیگیں روچ ءَ بلوچستان ءِ دمگ ھاران ءَ چاردہ اگست ءِ درگت ءَ برجاھیں فٹبال گوازی ءِ سر ءَ پد ماں پد دو تراک بوتگ انت –

بلوچستان ءِ جتا جتائیں ھند ءُ دمگاں بوتگیں اُرشانی زمہ واریاں گیشتر بلوچ آجوئی لوٹوکیں سلاہ بندیں گل منّ انت بلے تنی وھدی اے اُرشانی زمہ واری ھچ گل ءَ نہ منّ اِتگ انت –

سربوتگیں ھالانی رِد ءَ چہ ھزدار ءَ پاکستانی پوج ءَ ورنایے زورانسری آوار جتگ ءُ بیگواہ کتگ –

گیشیں ھالانی رِد ءَ گوستگیں شپ ءَ پاکستانی پوج ءَ چہ بلوچستان ءِ دمگ ھزدار کھنڈ ءَ سرگودھا شھدربرجاھے نودربر شمس بلوچ زورانسری آوار جتگ ءُ بیگواہ کتگ کہ ھما انت بیگواہ انت –

ھالانی رِد ءَ شمس بُنکی ءَ ھزدار ءِ دمگ مولہ ءِ نندوک انت کہ ھنو وانگ ءِ ھاتر ءَ ادارکی ھزدار ءِ شھر ءَ اتکگ بوتگ –

دوشی شپ ءَ بگر تاں ھنو چہ بلوچستان ءَ شش مردمانی زورانسری آوار جنی ءِ ھال اتکگ انت کہ گوستگیں شپ ءَ کیچ ءِ دمگ تمپ ءَ پاکستانی پوج ءَ لشکر کشی کنان ءَ پنچ مردم زورانسری آوار جتگ ءُ بیگواہ کتگ انت –

چہ تمپ ءَ زورانسری آوار جنگ بوتگیں مردمانی تہ ءَ عارف ء پنڈوک، شاھزیب ء رحمدل، بہار ء جان محمد، قادر بخش ءُ عزیز ء اسلم ھوار انت –

ھمے وڈ ھمے ھپتگے سَے روچانی تہ ءَ کساس بست مردم زورانسری آوار جنگ بوتگ انت چدو پیش گوستگیں دو روچانی میان ءَ پاکستانی پوج ءَ سرجمیں بلوچستان چاردہ مردم زورانسری آوار جتگ ءُ بیگواہ کتگ انت –

بیگواھیں مردمانی تہ ءَ چہ پنجگور ءَ یکے، ھزدار ءَ دو، تربت ءَ دو، چہ کراچی ءَ یکے، شال ءَ یکے ءُ وھدیکہ کیچ ءِ جتا جتائیں ھند ءُ دمگاں سیزدہ مردم زورانسری آوار جنگ بوتگ انت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ مروچی پنچ ھزار ءُ یکسد ءُ سِی ءُ شش روچ سرجم بوتگ انت – مروچی بی ایس او ءِ بنجاھی جنرل سیکریٹری ماما عظیم بلوچ، سیکریٹری اطلاعات بالاچ قادر، صمند بلوچ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشان اِتگ –

بنجل ءَ اتکگیں مردمانی گوم ءَ تران کنان ءَ گل ءِ کمک سرکماش ماما قدیر بلوچ ءَ گوشتگ کہ بلوچ چاگرد ءَ گلامی ءِ ریشگ مھکمی ءَ نہ اشتگ انت ھمے ھاتر ءَ ریاست ءَ پرایمنیں جھد ءِ کندم کنگ ءَ وتی زور جتگ ءُ زوراکی ءِ سرجمیں سیمسر گوازینتگ انت –

ماما قدیر بلوچ ءَ گوشتگ کہ ریاست وتی زوراکیانی برجاہ دارگ ءَ وتی ناشرکاری شوربندیانی رِد ءَ روان انت، آئی ءِ اے کار پدر انت کہ پوج ھمک روچ بلوچ سیاسی باسک، نودربر، ورنا، ڈاکٹر، وکیل، انسانی ھکانی باسکاں ھوار ھر تک ءُ پھناتاں سیادی داروکیں مردماں آوار جنگ ءُ بیگواہ کنگ ءَ انت ءُ آیاں وتی زندانانی تہ ءَ ازیت دنت ءُ نمیران کنت، وھدیکی اے بلوچ پرزندانی ژانگولیں جون ھم ویرانگاں چگل دیگ بوگ ءَ انت –

آئی ءَ گوشتگ کہ تنی وھدی ھزارانی کچ ءَ زورانسری آوار جنگ بوتگیں مردمانی جون دست کپتگ انت وھدیکہ ھزارانی کچ ءَ آوار جتگ ءُ بیگواہ کتگ انت، سدانی کچ ءَ زالبول ءُ زھگ ءُ کماش ھم ھوار انت کہ پوج ءِ زوراکیانی نشانگ بوتگ انت ھمے وڈ ھمے سالانی تہ ءَ ریاست ءَ وتی زوراکیاں ھزاراں بلوچ نمیران کتگ انت –

ماما قدیر بلوچ ءَ گوشتگ کہ ریاست ءِ اے زورانسری آوار جنی ءُ نمیرانی ءِ درچ تاں ھما وھد ءَ برجاہ مان انت تانکہ زور بیگواھیں مردم یل کنگ مہ بنت، بلوچ وتی منزل ءَ سر مہ بنت یاکہ گلامی ءَ مہ من انت بلے پدا ھم بلوچ راج ءِ پرایمنیں جھد ءِ گیشی ءُ دیمھونیاں چہ ھمے گندگ بیت کہ بلوچ راج نوآبادیانی ریاستی اے کوش جاہ ءَ گوزیت ءُ وتی منزل ءَ سربیت –

سربوتگیں ھالانی رِد ءَ ھاران ءَ چاردہ اگست ءِ درگت ءَ برجاھیں گوازی ءِ فیسٹیولانی میان ءَ دو جتائیں جاھاں بمب اُرش ءِ ھال انت، دومی نیمگ ءَ جاؤ، ھرنائی، گچک،شاپک ءُ تربت ءَ پاکستانی پوج ءُ کریش پلانٹ ءِ سر ءَ اُرش کنگ بوتگ انت –

ھاران ءَ گوازی ءِ فیسٹیولانی سر ءَ بوتگیں اُرشاں ھچ وڈیں جانی تاوان ءِ ھال نیست وھدیکہ تراک ءَ پد ھردو جاھانی لیبی ءُ لیب چاروکاں پٹ یل داتگ ءُ تتکگ انت –

ھالانی رِد ءَ اے اُرش دو دمان ساری بزاں ادار شش ءَ ھاران ءِ شھر ءِ بنجاہ ءَ شھید نواب اکبر خان بگٹی ءِ پٹ برجاھیں فٹبال ءُ والی بال گوازی ءِ میان ءَ بوتگ انت ھمے وھد ءَ ھاران ءَ بچکانی مزنیں وانگ جاھے کرکٹ گوازی ءِ میان ءَ ھم تراک بوتگ –

اھوالکار ءِ رِد ءَ ھردو اُرش چاردہ اگست ءِ درگت ءَ برجاھیں گوازی فیسٹیولانی سر ءَ کنگ بوتگ انت –

اے گوازی دمگی گوازی ءِ اپسر حبیب کبدانی ءِ سروکی ءَ برجاہ بوتگ انت، وھدیکہ کرکٹ گوازی ءَ سروکی ءَ آصف بادینی کنگ ءَ بوتگ – اے گوازیانی تہ ءَ والی بال، فٹبال، بیڈمنٹن ءَ ھوار دگہ گوازی ھم ھوار انت –

دومی نیمگ ءَ بلوچستان ءِ دمگ تربت گوگدان ءَ ناشناسیں سلاہ بندیں مردماں کرش پلانٹ ءِ سر ءَ اُرش کرتگ اُرش ءَ دو مردم مُرتگ انت –

اھوالکارانی رد ءَ سلاہ بندیں مردماں دوشی شپ ءِ چار ءَ اُرش کرتگ ءُ پنجاپ ءِ دمگ ملتان ءِ جھمنندیں دو مردم ساقب ء مرسلین ءُ صدام ء یامین آوار جتگ اَنت ءُ پدا تیر جتگ ءُ کُشتگ اَنت –

ھمے وڈ مروچی یکشمبے ءَ ناشناسیں سلاہ بندیں مردماں بلوچستان ءِ جتا جتائیں ھند ءُ دمگ جھاؤ، ھرنائی، گچک ءُ شاپک ءَ پاکستانی پوج ءِ پانگسانی سر ءَ اُرش کتگ ءُ پوج جانی ءُ مالی تاوان داتگ –

اھوالکار ءِ رِد ءَ سلاہ بندیں مردماں راکٹ ءُ وتکاریں سلاھاں گوں پاکستانی پوج ءِ پانگسانی سر ءَ اُرش کتگ –

اے اُرشانی زمہ واری تنی وھدی ھچ گل ءَ نہ منّ اِتگ انت بلے چدوپیش اے دابیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ انت-

بلوچستان ءِ دمگ ھرنائی ءَ اشکرانی کاریز زھریں گیس ءِ پُر بوگ ءَ دو مزور بیران بوتگ انت –

لیویز ءِ رِد ءَ اے وئیل شھرگ ءِ مائن ایریا نمبر 151، بلاک نمبر چار اشکرانی کاریز نمبر دو ءَ بوتگ کہ اودا ءَ زھریں گیس ءِ پُر بوگ ءَ دو کاریز کار بیران بوتگ انت –

لیویز ءِ رِد ءَ یک کاریز کارے ءِ جون در کنگ بوتگ دومی ءِ درکنگ ءِ کوشست بوگ ءَ انت – اے ھم گوشگ بوگ ءَ انت دگہ کاریز کار ھم کاریز تہ ءَ ھست انت – مزور وتی کمک ءِ وت اے کاراں کنگ ءَ انت –

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں درشان ءَ گوشتگ کہ سرمچاراں دوشی شپ ءِ دہ ءُ نیم ءَ کیچ ءِ بُنجاھی شھر تُربت ءَ بالی پَٹ ءِ ٹوھیں دروازگ ءِ دپ ءَ برجاھیں پاکستانی لشکر ءِ پانگس ءِ دو سنگرانی سر ءَ یکیں وھد ءَ گوں وتکار ءُ ٹوھیں سلاھاں اُرش کُرتگ۔ اُرش ءَ یک کارمندے مُرتگ ءُ دو ٹپی بیتگ انت۔

جارکش ءَ گوشتگ چو مدامی وڑ ءَ اُرش ءَ پد پروش وارتگریں لشکر ءَ داں دیر ءَ لَس آبادی ءِ سر ءَ تیرگْواری کُرتگ۔

میجر گوھرام بلوچ ءَ گوشتگ تربت شھر ءَ پولیس پھازداری ءِ نیمون ءَ پاکستانی لشکر ءِ گون ءَ تَر ءُ تاب، دَگانی بندگ ءُ پٹ ءُ پول کنگ ءُ لشکر ءِ پانگساں پھریزگ ءَ اِنت،گْوستگیں شپ ءَ دوجاہ ءَ مئے سرمچار ءُ پولیس ھما وھد ءَ دیم پہ دیم بیتگ اَنت وھدے پاکستانی لشکر ءَ دگ بستگ ءُ پٹ ءُ پول کنگ ءَ بیتگ، پولیس کارمند گشتِر بلوچ اَنت پمشکا سرمچاراں نشانگ نہ کُرتگ اَنت۔

جارکش ءَ گوشتگ زورگیپتیں بلوچستان ءَ پاکستانی لشکر ءَ ابید آدگہ لشکر مدام گَل ءَ کڈن کُرتگ اَنت کہ آ دُژمنیں پاکستانی لشکر ءِ کمکار جوڑ مہ بنت،پاکستانی لشکر بلوچستان ءَ بلوچ ءِ چکچینی ءَ کنگ ءَ اِنت۔ھر مردم ءُ لشکر کہ دُژمنیں لشکر ءِ بھر بنت ءُ راجی آجوئی ءِ جُھد ءَ زورگر ءِ ھمراھداری ءَ کن اَنت اِبرت ءِ نشان جوڑ کنگ بنت۔

میجر گوھرام بلوچ ءَ گَل چہ بلوچ راج ءَ دزبندی کنت کہ آ چہ  پاکستان ءِ وتگڑیں آجوئی ءِ شاتکامی مراگشاں گستاہ بہ بیت، وتگڑیں آجوئی ءِ شاتکامی مراگش،لشکر ءُ آئی ءِ کمکار مئے نشانگ ءَ اَنت،بلوچ راج چہ ایشاں وت ءَ گستاہ بہ دار ایت۔

جارکش ءَ گوشتگ بلوچستان لبریشن فرنٹ اے اُرش ءِ زمہ واری ءَ منّ ایت ءُ زورگریں لشکر ءُ ریاست ءِ سیتانی سر ءَ مئے اُرش داں بلوچستان ءِ آجوئی ءَ گوں تْرندی ءَ برجاہ بنت اِنت۔

کیچ ءِ بیتگیں ناسازیں کارِست ءِ ھما ھکیکی رُجھان چے بیتگ و چے بیت کنت ؟

نبشتہ کار: آبد ازیز الرھمن بلوچ

دی بلوچستان پوسٹ

چوناھا سرجمیں بلوچستان ءَ ما بِچار اِیں گُڑا مارا لس مھلوک ءُ آبادی ءِ مزنیں کِساسے ءَ نیکراہ (دین) دوست گِندگ ءَ کیت، بلے بلوچستان ءِ تہ ءَ بلوچ گوں وتی بلوچ ءَ ھچ بر پہ مذھب ءِ نام ءِ سر ءَ تنگ نہ کتگ، پرچا کہ بلوچ یک سماج(چاگرد) منّوکین ءُ برابر تبیں راجے ۔ بلوچ ءَ مرچی مار اِتگ کہ مذھبی وتگڑین ءُ ملا (نیکراہ ) ءِ سر ءَ سیاست کنَگ ءُ نیکراھی ءِ مِیڑ راجانی تہ ءَ تاوان دیگ ءِ سوب بنت، پرچا کہ یک راجے کہ وت ما وتی مِیڑ ءِ تہ ءَ تو دور دے ئے گُڑا ترا اَلّم ءِ پنت زورگ کپ اِیت کہ تو آ راج ءَ نِشہ ءِ وڑیں سلّیں کارے ءِ تہ ءَ دور بہ دے یاکہ تو آ راج ءَ نیکراہ (مذھب) ءِ نام ءِ سر ءَ میڑ بہ دے ، ھمے رنگ ءَ مرچی ما کیچ ءَ بیتگیں اے ناوشیں کارِست، ھمے وڑ گِندگ ءَ کیت؛ کہ یک رھدربرے کہ یک گپے ءِ سر ءَ کشگ بیت ءُ پد ءَ اے گپ بُرز برگ بیت ماں نیکراہ ءَ جوڑینگ بیت بلے پد ءَ ھما دینی دانِشمند ھم اے بابت ءَ وتی ھما بلوچی رِوایتی یاکہ اسلامی تب ءِ جِرگے کن اَنت ، ھمے جرگہ ءِ واستا آؤکیں رھدربر روپ ء برکت ملک آباد تربت ءَ ماں ناشُناسیں مردمانی دست ءَ کشگ بیت، چریشی ءَ چہ ھمے پدّر بیت کہ ناکہ اے بابت ءَ ھما مُلّایاں اے وڑیں وتگڑیں پیسلھے کتگ کہ مرد کشگ بہ بیت ناکہ دگہ سلّ کاریں ملّایاں یک رِوایتی جِرگے کتگ کہ اے جِرگہ ما اسلام ءِ تہ ءَ ھم بجائیں ءُ ما راجی سوب ءِ تہ ءَ ھم بجا اِنت ، اگاں ما مسلہ یاکہ “جیڑہ” ءِ جِند ءَ بہ من اِیں؛ گُڑا مارا ھمے چیز ءُ ھمے پنت گِندگ ءَ کیت کہ ما اے جیڑہ ءَ سمجگ ءَ نہ اِیں ءُ ما مسلہ ءَ دگہ شِکلے ءَ پدّر کنگ ءَ ایں، چریشی ءَ چہ مئے راج ءِ تہ ءَ مسلہ ءُ جیڑہ گنتِر ھرابی ءِ نیمگ ءَ کارمرز بنت ءُ بلوچ گنتِر وت ماں وت ءَ ماں مزھبی جیڑھانی سر ءَ ھر روچ برات کشی ءِ آماچ بیت ، باید ھمیش اِنت کہ اے جیڑہ ءَ ما پوہ بِہ اِیں ءُ اے جیڑہ ءِ آسر ءَ ءُ (رُجھان) ءَ مزھبی میڑ ءِ تہ ءَ بدل مہ کن اِیں ، مارا لوٹ اِیت کہ ما اے جیڑہ ءِ بابت ءَ پِکر بہ کن اِین ءُ گیشتر بہ جیڑ اِیں کہ اے جیڑہ ءِ ھما بُنیادی زمّہ وار کے انت ءُ کے بیت کنت ؟

بلکیں ما اے جیڑہ ءِ سر ءَ سیاست مہ کن این ءُ وتی دانشمندی ءَ پدّر مہ کن اِیں، ما ھمے جُھد ءَ بہ کن اِیں کہ ما اے جیڑہ ءَ پد گیشتر اے وڑیں وتگڑیں سوچ ءِ تہ ءَ وتی براتانی ھون ءَ نہ ریچ اِین ءُ مسلہ ءَ سمج اِیں ، اگاں دین ءِ ھما پیگمبر بیتگ اَنت آیانی کِرد اے وڑیں جیڑھانی بابت ءَ چے بیتگ اَنت مارا ھما وڑ ءَ اے جیڑ ھَل ءِ نیمگ ءَ برگی اِنت، پرچا کہ ما بچار اِیں مرچی لھتے ملّا ھم ھست دین ءِ سر ءَ سیاست کنت ءُ وتی دانشمندی ءَ پیشدارگ ءِ جھد ءَ کنت ءُ چہ ھَک ءَ دور بیت ءُ ایمان ئِے ھم کمزور بیت، پرچا کہ آ ھر جیڑہ ءِ سر ءَ وتی زَدّ ءَ دیم ءَ کار اِیت ءُ پہ ھسد مسلہ جوڑ کنت ، باید ھمیش اِنت اے جیڑہ ءَ بلوچ راج بہ سمج اِیت ءُ بلک اِیت کہ رؤپ ءِ کوش چِہ وجہ ءَ بیتگ ءُ اسل جیڑہ چے بیتگ۔

ماں دانک ءِ گُڈ سر ءِ یک لچھے ۔
“بِچار من ءَ را کُشتگ اش”
“کُشندھے نبی کتگ”
“بِچار من ءَ را کُشتگ آش”
“کُشندھے نبی کتگ”
“ھما کہ مُرگاں گم نہ دات”
“من ءَ را چون کُشت کنت”
“ھما کہ تُن ءُ گُژنگی ھدا ءِ دین ئِے شنگ کتگ”
“ھمائی نام ءَ مُلّا یے گرد ایت مرگ بھر کنت”
“برو بچار تائپ ءَ سنگاں انگت ھون بر اَنت”
“اَ پیر زال ءِ کسّہ ءَ ملّا نِند اَنت وت کن اَنت”
“ھمائی ءَ کُشندہ ھمزھے ھُدا ءِ نام ءَ بہ کشت اَنت”
“ھما کہ مُرگاں گم نہ دات من ءَ را چوں کشت کنت”
“اِد ءَ ھسد پہ کشتگیں رؤپ ھمائی ءِ نام کتگ”
“اے دُز بچار مپتین اَنت ملّا اَنت ءُ ھاجی اَنت”
“نشہ بھا کن اَنت ھسد پہ مردماں کُش اَنت”
“وتی پہ ھونی ئیں دست ءِ شودگ ءَ رسول ءِ نام ءَ گر اَنت”
“ھما کہ مُرگاں گم نہ دات من ءَ را چوں کشت کنت”
“دو گال ءِ وانگ ءَ نزانت مرگ ءِ پتو ءَ دنت”
“اے نوکیں دین ءِ ٹھیکِدار واجھیں ھُدا بچار”
“اے نوکیں دین ءِ ٹھیکِدار واجھیں ھدا بچار”
“زانتکاریں ماسٹر ءَ شپّکیں مردمے کش اِیت “
“اللہ بگند نہ بیت لاڈکیں نام کارمرز بیت”
“اِد ءَ مسیت گوں کرآن سچ اِیت کسّے گپ ھم نہ کنت”
“اِد ءَ مسیت گوں کرآن سچ اِیت کسّے گپ ھمن نہ کنت”
“بس وتی پہ دژمنی من ءَ اے گِس ءَ کُش اَنت”
“ھما کہ مُرگاں گم نہ دانت من ءَ را چون کشت کنت”
“بچار من ءَ را کشتگ کُشندہ ءِ کتگ
ھما کہ مُرگاں گم نہ دات من ءَ را چوں کشت کنت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ لبریشن آرمی ءِ مجید بریگیڈ ءَ گوادر ءَ چار چینی شھریاں ھوار سیزدہ پوجیانی کوش ءِ زمہ واری من اتگ ءُ گوادر ءِ آپریشن سرجم کرتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ کہ مجید بریگیڈ ءِ دو فدائین نوید بلوچ ء خدا بخش پنام ءِ اسلم بلوچ جھمنند دشت نگور تربت ءُ مقبول بلوچ ء پھلان پنام ءِ قائم جھمنند آواران گیشکور ءَ مروچی سھب ءَ گوادر ءَ چینی انجنیئرانی یک گچینی کاروانے انگیر کتگ ءُ اُرش کتگ-

جارکش ءَ گوشتگ کہ آپریشن زرپھازگاں داں دو اداراں برجاہ داشتگ ءُ چریشی ءَ کساس چار چینی شھریاں ھوار نُھ پوجی کُشتگ انت ءُ بازیں کچے ءَ زدگ کتگ اَنت-

جارکش ءَ گوشتگ مروکانی کساس گیش بوت کن اَنت ءُ آپریشن ءِ سرجم بوگ ءَ مجید بریگیڈ ءِ فدائینانی تیرانی ھلاس بوگ ءَ گڈی تیر پہ وت ءَ گچین کتگ ءُ شھیدی منگہ پہ وت زرتگ-

جارکش ءَ گوشتگ گیشیں درشان زوت رسانکدراں شنگ کنگ بیت اِنت-

بلوچستان ءَ نیکراھی ناشرکاری ءِ توم

ٹی بی پی شونگال

پاکستان ءِ واکداریں ادارگاں بلوچ راجی آجوئی ءِ جھد ءِ ھلاس کنگ ءِ ھاتر ءَ گمانی دروشم ءَ بلوچستان ءَ پراہ ءُ شاھگانیں پالیسی اڈ داتگ اَنت، کہ ایشانی تہ ءَ نیکراھی ناشرکاراں بلوچ چاگرد ءَ مھکم کنگ ءُ بلوچ جُنز ءِ راہ ءِ دارگ ءِ کوشست ھوار اَنت۔

بلوچ چاگرد راجدپتری رد ءَ سیکولر مزاجے ءِ سر ءَ بندوک اِنت بلے چہ گوستگیں دو دھکاں بلوچستان ءَ نیکراھی ناشرکاری ءَ مزنیں کچے ءَ تالان کنگ ءِ پرکاریں دروشم ءَ کوشست برجاہ اَنت۔ بلوچستان ءَ یکشل ءَ انچائیں وئیل دیم ءَ پیداک اَنت کہ چریشاں جتائیں نیکراھیانی نیام ءَ رواداری ءِ سر ءَ بندوکیں بلوچ چاگرد ءَ نیکراھی رد ءَ ناشرکاری ءِ نیمگ ءَ برگ بیگ ءَ اَنت۔

بلوچستان ءِ مکران دمگ اے وھد ءَ بلوچ جنگ ءَ چہ سک سانمند اِنت ءُ بلوچ جنگ ءِ پلامرزی کنوکیں تک ءُ پروگریسو ادارگاں یکشلی ءَ گوں نیکراھی ناشرکار نشانگ کنگ ءَ اَنت۔ پنجگور ءِ جِنکانی اسکول ماندارگ بیتگ اَنت، سَوتی مراگش دارگ بیتگ اَنت، گودار ءَ اوسس اسکول ءِ پرنسپل سر زاھد آسکانی کُشگ بیتگ، تُربت ءِ بلوچ لبزانکاراں کئوش ءِ بیھار دیگ بیتگ اَنت ءُ گوستگیں روچاں تربت ءَ عطا شاد ڈگری کالج ءِ نودربر ءُ بولان اسکول ءِ استاد عبدالروف بلوچ نیکراھی ءِ لگتمال کنگ ءِ نام ءَ تاکتوریں تکانی پلامرزیں نیکراھی ناشرکاراں کُشتگ۔

بلوچ آجوئی ءِ جُنز ءَ بندوکیں ادارگ ءُ راجدوستیں پاٹی یکشل ءَ بھتام جنگ ءَ اَنت کہ پاکستانی پوج ءِ مستری ءَ بلوچستان ءَ کشمیر جھاد ءَ بندوکیں جنگولاں مھکم کنگ ءُ بلوچستان ءَ آبات کنگ بئیگ ءَ اَنت دانکہ بلوچ چاگرد نیکراھی ناشرکاری ءِ نیمگ ءَ برگ بہ بیت ءُ انیگیں تُربت وئیل ءَ بلوچ راجدوست پاٹی شاہ میر عزیز ءَ بندوک کنگ ءَ اَنت کہ آئی ءِ سر ءَ نیکراھی ءِ نام ءَ پیسر ءَ کوشکاری ءِ بھتام کنگ بیتگ اَنت۔

بلوچستان ءَ راجی سیاست ءِ سر ءَ بے جاریں بندش اِنت ءُ پاکستان ءِ تاکتوریں ادارگاں نیکراھی ءِ نام ءَ سیاست کنوکیں سرجمیں آجوئی اِنت۔ سیاسی ادارگانی ءُ پاٹیاں بلوچستان ءَ نیکراھی ناشرکاری ءِ دارگ ءُ نیکراھی رواداری ءِ برجاہ دارگ ءِ ھاتر ءَ گامگیج زیرگ لوٹ ایت، اگاں بلوچستان ءَ نیکراھی ناشرکاری ءِ دارگ ءَ سیاسی تاکت بے سوب بیت اَنت گُڑا بلوچ چاگرد بے کساسیں تاوانانی دیمپان بیت اِنت۔