TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ وتی کسانیں درشانے ءَ گوشتگ کہ گوادر ءَ چینی انجینئرانی کاروان ءِ سر ءَ مجید بریگیڈ ءِ سرمچاراں اُرش کتگ-

آئی ءَ گوشتگ کہ جنگ انگت برجاہ اِنت، گیشیں اھوال دیمتر ءَ شنگ کنگ بنت اِنت –

بلوچستان ءِ تیابدپی شھر گوادر ءَ چینی کمپنی ءِ گاڑیانی کاروان سلاہ بنداں نشانگ کتگ-

گوادر ءِ ھند پکیر کالونی ءَ مروچی سھب ءِ ساھت نُھ ءُ نیم ءِ نزیک ءَ سلاہ بندیں مردماں گوادر پکیر کالونی پھل ءِ نزیک ءَ پاک چائنہ نامی کمپنی ءِ کاروان ءِ سر ءَ اُرش کتگ-

دمگی مردمانی رد ءَ دو ادارانی گوزگ ءَ پد ھم ترندیں تیرگواری ءُ تراکانی توار اشکنگ بوگ ءَ اَنت ءُ دمگ ءِ راہ در پوج ءَ بستگ ءُ شھری لوگانی توک ءَ بند کتگ اَنت-

بازیں جاھاں دامگی اھوال ھم بند کنگ بیتگ اَنت-

امریکہ ءِ ریاست ھوائی ءَ کوہ ءِ ماؤوی ءَ کپتگیں آس ءَ بیران بیتگیں مردمانی لاشانی کشگ برجاہ انت ءُ ھمے وڑ لڈ ءُ بار کرتگیں مردم واتر وتی میتگ ءَ پیداک اَنت-

ھال سرکنوکیں ادارہ ایسوسء ایٹڈ پریس ءِ رد ءَ ماؤوی ءِ روکپتی زر ءَ ھستیں سداں کرناں آبادیں کوھنیں شھر لاھینا ءَ شنگ ءُ شانگ بیتگیں آس ءَ کم چہ کم ھشتاد ءُ نُھ مردم بیران بیتگ اَنت ءُ کساسی دروشم ءَ سرجمیں دمگ ستکگ ءُ پُر بیتگ-

واکداراں ھال داتگ کہ پٹ ءُ پول ءِ وھد ءَ گمان بوگ ءَ اِنت بیرانیانی کساس گیشتر بوت کنت-

لاھینا ءِ جھمننداں وت ءَ کساسی رنگ ءَ رکینتگ ءُ در اتکگ اَنت ءُ وتی تاوانانی کساس کنگ ءَ واتر وتی میتگ ءَ ایگ ءَ اَنت-

ریاست ھوائی ءِ گورنر جاش گرین ءَ گوشتگ کہ ایمرجنسی ءِ ٹیم پٹ ءُ پول کنگ ءَ انت ءُ انسانی چُنڈ ءُ چانڈیں جسماں پٹگ ءَ اَنت-

لاھینا ءَ سدانی کچ ءَ لوگ ستکگ ءُ پر بیتگ اَنت ءُ زندگی ءَ بچ اتگیں مردمانی واستا دمانی رنگ ءَ لوگ جوڑ یک مزنیں مشکلے ءِ دیمپان ءَ کم بہ اِنت-

شھر ءَ رھوتی اھوال سستگ اَنت ءُ سِی ءِ کساس ءَ موبائل ٹاور بند اَنت ءُ چریشی ءِ سبب ءَ اھوالانی گرگ ءَ جیڑھانی دیمپانی کنگ کپگ ءَ اِنت ءُ کوہ ءِ رودراتکی لمب ءَ آیوکیں بازیں ھپتگاں بجلی بند بیت اِنت-

ماؤوی ءِ ایمرجنسی منیجرز ھنچین جاھانی شوھاز اِنت کہ اود ءَ بے لوگ بوتگیں مردماں لوگ بہ دنت-

واکداراں پیس بک ءَ گوشتگ کہ چار ھزار ءُ پنچ سد مردم ءَ شیلٹر درکار اِنت – سول ایئرپیٹرول ءِ رد ءَ یک ھزار ءُ شش سد ءُ دو لوگ تباہ بیتگ اَنت کہ ایشانی توک ءَ گیشتر جھمنندی لوگ اَنت-

ھوائی ءَ کپتگیں آس راجدپتر ءَ مزنیں ھدائی کھرے گوشگ بیتگ ےُ ایشی ءَ نوزدہ سد ءُ شست ءِ سونامی ءَ گیش ھم تباھی کتگ-

ریاست ھوائی ءَ سال نوزدہ سد ءُ چل ءُ شش ءَ بیمناکیں سونامی یے اتکگ کہ ایشی ءَ چہ یک سد ءُ پنجاہ مردم مرتگ اَنت ایشی ءَ پد ریاست ءَ ھمک جاہ ءَ سائرن ایمرجنسی سسٹم جنگ بیتگ کہ ھمک ماہ چک ءُ تان کنگ بیتگ-

بلوچستان ءِ دمگ کیچ تمپ ءَ گوستگیں شپ ءَ پاکستانی پوج ءَ بلوچی زبان ءِ آشوبی گشندہ منھاج مکتار ءُ گوستگیں روچاں پوج ءِ گون ءَ جنگ ءَ جنگ بیتگیں کامران بلوچ ءِ گس ءِ سر ءَ بیڑ برتگ ءُ بازیں مردمے آوار جتگ ءُ گون وت برتگ اَنت-

گیشیں اھوالانی رد ءَ گوستگیں شپ ءِ ساھت دو ءَ تمپ کونشکلات ءَ پاکستانی پوج ءَ منھاج مکتار ءُ پوج ءِ دیم پہ دیمی ءَ جنگ بیتگیں کامران بلوچ ءِ لوگانی سر ءَ بیڑ برتگ ءُ بازیں مردم آوار جتگ ءُ برتگ اَنت-

آوار جنگ بیتگیں مردمانی تہ ءَ لھتے ءِ پجار عارف ء پنڈوک، زھیر ء ظفر، شازیب ء رھمدل، بھار ء جان مھمد ءُ ندیم ء قادر بکش ءِ ناماں زانگ بیتگ اَنت-

دمگی مردمانی رد ءَ پوج ءَ مردمانی آوار جنگ ءِ ھواری ءَ کامران بلوچ ءِ مانش ءِ سر ءَ مک کنگ بیتگیں بیرک ھم پوج ءَ دور کتگ ءُ گون وت برتگ-

زانگ بہ بیت گوستگیں روچاں دشت مزن بند ءَ پوج ءِ میان ءَ جنگ بیتگیں کامران گوستگیں روچ ءَ ماں تمپ کونشکلات ءَ کل ءُ کسارت کنگ بیتگ ءُ ایشی ءِ ھواری ءَ مردماں وتی لیکھانی درشانی ءَ ادیرہ ءِ سر ءَ آزاد بلوچستان ءِ بیرک مک کتگ ات-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل “آشوب ” ءَ شنگ کرتگیں درشانے ءِ تہ ءَ کیچ ءُ پنجگور ءَ پاکستانی پوج ءِ سر ءَ بوتگیں اُرشانی زمہ واری منّ اِتگ ءُ گوشتگ کہ اے اُرشاں یک کارمندے مُرتگ ءُ چار زدگ بوتگ انت –

جارکش میجر گوھرام بلوچ ءَ رِد ءَ بلوچستان لبریشن فرنٹ ءِ سرمچاراں گْوستگیں شپ ءِ دہ ءَ کیچ ءِ ھند سامی ءَ کلات ءِ سر ءَ برجاھیں دُژمنیں پوج ءِ بُنجل ءِ پھازگی سَنگرانی سر ءَ راکٹ ءُ وتکاریں سلاھاں گوں اُرش کُتگ، اُرش ءِ آسر ءَ زورگریں پوج ءِ یک کارمندے ھما جاہ ءَ مُرتگ ءُ دو زدگ بوتگ انت –

میجر گوھرام ءِ رِد ءَ سرمچاراں یک دگہ اُرش ءِ مرچی بزاں شمبے ءِ روچ ءِ بیگاہ ءَ پنجگور ھند سَندے سر ءَ گریڈ اسٹیشن ءَ برجاھیں پاکستانی پوج ءِ پانگس سر ءَ دز بمب اُرشے کُتگ –

جارکش ءِ رِد ءَ اے اُرش ھما وھد ءَ کنگ بوتگ وھدیکہ آ چاردہ اگست ءِ شاتکامیانی تیاریاں دزگٹ بوتگ انت ،اُرش ءَ دُژمنیں پوج ءِ دو کارمند زدگ بوتگ انت ءُ اْرش ءَ گریڈ اسٹیشن ءِ 10/13 ءِ وی ٹرانسفارمر ءِ سَے فیڈر ءَ لین ءِ روگ ءُ آھگ بند بوتگ کہ چریشی ءَ عیسائی،تسپ کلگ ءُ سوردو ءِ لین بند بوتگ اَنت-

جارکش ءَ گڈسر ءَ گوشتگ کہ بلوچستان لبریشن فرنٹ اے اُرشانی زمہ واری ءَ منّ ایت ءُ پہ ماتیں سرڈگار ءِ دیمپانی ءَ ناشرکاریں پاکستانی پوج ءِ سر ءَ مئے اُرش بلوچستان ءِ آجوئی تاں برجاہ مان انت –

بلوچستان ءِ جتا جتائیں ھند ءُ دمگاں بوتگیں دگ ءِ وئیلاں کسانیں جنکوے ءَ ھوار پنچ مردم بیران ءُ ھپت زدگ بوتگ انت –

گیشیں ھالانی رِد ءَ بلوچستان ءِ دمگ جعفرآباد ، ڈیرہ اللہ یار ءَ کسانین جنکویں دگ ءِ آ نیمگ ءَ رؤگ ءَ بوتگ کہ تیز رؤکیں ٹرکے ءَ ڈیکر کتگ –

وئیل ءَ بیران بوتگیں جنکو پولیس ءَ نادراھجاہ ءَ سرکتگ ءُ ٹرک ءِ ڈرائیور دزگیر کتگ –

دومی نیمگ ءَ بلوچستان ءِ دمگ لورلائی ءَ شال دگ ءَ ٹرکے ءَ پرپٹے ڈیکر کتگ چریشی ءَ پرپٹ سوار بیران بوتگ – ریسکیو ءَ جون دست گپتگ ءُ نادراھجاہ ءَ سر کتگ –

لورلائی ءِ واکدارانی رِد ءَ وئیل ءَ بیران بوتگیں مردمے پجار نہ بوتگ وھدیکہ آئی جون ھنگت نادراھجاہ ءَ انت –

ھمے وڈ ھب ءِ دمگ ساکران دگ ءَ تیز رؤکیں ڈمپر ء دو پرپٹ سوار ڈیکر کتگ انت چریشی ءَ ھردو زدگ بوتگ انت – زدگ بوتگییں ھردو مردم نادراھجاہ ءَ برگ بوتگ انت ءُ اودا درمان کنگ ءَ پد گیشیں الاج ءِ ھاتر ءَ کراچی ءَ برگ بوتگ انت –

پنچپائی مشوانی ٹاؤن ءِ نزیک ءَ لندن دگ ءِ سر ءَ ٹوڈی گاڑی ءَ پرپٹ ءِ ڈیکر کتگ چریشی ءَ یک مردمے بیران ءُ سَے زھگ زدگ بوتگ انت –

بیران بوتگیں مردمے پجار حاجی درمحمد سمالانی انت ءُ زھگ آئی ءِ نماسگ بوتگ انت –

چہ کلات ءَ ھال ایگ ءَ انت کہ مغلزئی ءَ اے ٹی سی گاڑی ءِ بریکانی نہ گرگ ءَ ٹرلرے ءَ گوں ڈیک وارتگ چریشی ءَ کنڈیٹر اے ٹی سی عطاء اللہ جھمنند شال ھما دمان ءَ بیران بوتگ وھدیکہ ڈرائیور روزی خان ء وزیر خان اچکزئی جھمنند شال زدگ بوتگ –

بیران ءُ زدگ بوتگیں مردم کلات ءِ پولیس ءَ نادراھجاہ ءَ برتگ انت کہ اودا چار ءُ ٹپاس ءَ پد ھردو شال ءَ دیم دیگ بوتگ انت –

سربوتگیں ھالانی رِد ءَ بلوچستان ءِ دمگ ھزدار ءَ ناشناسیں سلاہ بندیں مردماں پولیس کارمندانی سر ءَ اُرش کتگ، پولیس ءَ پسوی تیرگواری کتگ بلے اُرشکار درآیگ ءُ روگ ءَ سوبمند بوتگ انت –

اھوالکار ءِ رِد ءَ اے اُرش گوستگیں شپ ءَ ھزدار ءِ دمگ محمد شئی کھٹان ءَ پولیس چیک پوسٹ ءِ نزیک ءَ بوتگ کہ سلاہ بندیں مردماں پولیس کارمند جلیل احمد ءِ سر ءَ اُرش کتگ، پولیس ءَ پسوی تیرگواری کُتگ ارشکار تچگ ءُ رؤگ ءَ سوبمند بوتگ انت ھچ وڈیں جانی تاوان نہ بوتگ –

پولیس ءِ نیمگ ءَ اُرشکارانی پٹ پول برجاہ انت –

دمگی مردماں وئیلے بگیری ءَ زھرشانی کتگ ءُ چہ بُرزی تبک ءِ واکداراں گوں لوٹ کتگ کہ پولیس کارمندانء پھازگ ءَ گامگیج بہ زوریت ءُ آھانی سپاھیاں گیش بہ کنت –

دومی نیمگ ءَ شال ءِ دمگ قمبرانی دگ ءَ جنکانی مزنیں وانگجاھے نزیک ءَ دزبمب ءِ دست کپتگ –

بم ڈسپوزل ءَ دز بمب ناکارہ کتگ – سریاب ءِ ایس ایچ او ءِ گوشگ انت جنکانی مزنیں وانگجاھ ءَ بمب دست کپتگ – ھالے سر بوگ ءَ بم ڈسپوزل ءَ وت ءَ ھمے جاہ ءَ سر کتگ ءُ دزبمب ناکارہ جوڈ کتگ – اے درگت ءَ گیشیں پٹ پول برجاہ انت –

مشکے : بلوچ راج گوں ھما راجاں ھوار اِنت کہ آیاں بھ زوراکی ءِ دیم ءَ سر جھل نہ کرتگ ءُ ایردستی نہ من اتگ ، مروچی ھم درانڈیھ بہ بیت یا گلزمین بلوچ راج ھرچ وڑیں سکی سگگ ءَ اِنت ءُ وتی آجوئی ءِ جھد ءَ دیم ءَ برگ ءَ اِنت۔اے گپ 11 اگست ، سوگند سرسبزی روچ ءِ درگت ءَ بی این ایم مشکے ھنکین ءِ چیردستی ءَ برجاہ دارگ بیتگیں مچی ءَ تْران کنان بی این ایم ءِ ھنکینی راھشوناں درشانتگ اَنت۔

گوں مراگِش ءَ تْران کنان استاد مھران ءَ گْوشتگ کہ بلوچستان چہ بِندات ءَ آجو ءُ وت واجھیں ڈیھے بوتگ پہ بلوچستانءِ پھریزگ ءَ بلوچ ءِ پیر ءُ کماشاں وتی ھون ریتکگ ءُ بلوچستان پھز اتگ۔اے گپ راستے کہ دری زوراکانی زوراکیانی آماچ بوتگ بلے بلوچستان ءُ بلوچ راج ءَ بھ دری راجانی ایردستی نہ من اتگ ءُ پہ وتی راجی آجوئیءِ پھریزگ ءِ مدام جاڑیگ بوتگ۔

آئیءَ گوشتگ وھدے انگریزاں بلوچستانءِ بادشاہ میر مھراب ھانءَ ھمے گْوشتگ کہ تو منی پرمان ءِ پابند ءُ منی کوتلی بہ بہ ئے بلے مھراب ھان انگریزانی ایردست بیگ ءَ ساڑی نہ بوت پمیشکا انگریزاں گوں وتی لشکر ءَ بلوچستانءِ سر ءَ ارس کرت ءُ 1839 ءَ بلوچستان زور گیپت۔ ھمے ایردستی ءِ بگیری ءَ بلوچاں ڈیھ پھزی ءِ راہ گچینت ءُ انگریز ءِ بگیری ءَ چیرکی جنگ بنا کرت ءُ انگریز ماں بلوچ گلزمین ءَ پہ ایمنی ءَ نندگ ءَ نہ اشت اَنت ، ھمے ارشانی پد ءَ پہ انگریزاں باز جیڑہ ودی بوتگ۔

دیمترا آئی ءَ گْوشتگ وھدے دومی جھانی جنگ ءَ پد انگریز چہ ھرچ نیمگ ءَ ایردستیں راجاں ماں بست گڑا آ چہ اے دمگ ءَ در کپگ ءَ لاچار بوت ، چہ انگریز ءَ در کپگ ءَ 11 اگست 1947 ءَ بلوچستان ءِ آجوئی سرسبز اِت ءُ بلوچ یک رندے پد ءَ وتی گلزمین ءِ وتواجہ جوڑ بوت اَنت۔آجوئی ءِ رسگ ءَ پد آیاں نوکیں دودانی پد ءَ گچینکاری کرت۔ بلوچستان گوں جھان ءِ کوپگے ءَ دیم ءَ جزگ ءَ ساڑی اَت ، آئی ءِ دو پارلیمان اَت اَنت ، جھگیرانی پارلیمان (زیریں پارلیمان ) ءُ گچینی پارلیمان ( بالائیں پارلیمان)۔بلے انگریزاں اے دمگ ءَ پہ وتی سیتانی پانک ءَ پانگے پکار اَت پمیشکا آیاں ھندوستان دو جاہ ءَ ونڈ کرت ءُ پاکستان ءِ نام ءَ ڈیھے جوڑ کرت۔وتی جھانی سیتانی دیمپانی ءَ پہ انگریزاں بلوچستان ءِ آجوئی مزنیں اڑاندے اَت ، آیاں چیراندری پاکستان ءِ کمک کرت ءُ بلوچستان پاکستان ءِ ایردست کنائینت۔

استاد مھرا ن ءَ گْوشتگ کہ یازدہ اگستءِ دارگ ءِ مول ھمیش اِنت کہ ما وتی پہ آجوئی ءِ گرگ ءَ کرتگیں مسام ءَ یات بہ کن ایں، سوگند ءَ بہ سبز این ءُ پاکستان ءُ دری ٹیکاں ھمے کلوہ ءَ بہ شکسا ایں کہ بلوچستان ءَ وھدے چہ انگریز وڑیں زوراکی ءَ وتی ڈیھ ءِ آجوئی پچ گیپتگ گڑا پاکستان ءِ بنیاد ءُ منک ءُ اینچو مگیم نہ اَنت کہ بلوچستان ءِ سر ءَ وتی سردستی ءَ برجاہ داشت بہ کنت ، الم آ زوراکی کنت ، کشت ءُ کشار کنت انچوش کہ داں انیگ ءَ آئی ءَ ھمینچو بلوچ کشتگ کہ انگریزاں وتی سد سال ءِ سردستی ءِ میان نہ کشتگ ، گار ءُ گمسار نہ کرتگ۔ پرچا کہ زوراک مدام ھمے وش منی ءَ بیت کہ آ گوں زوراکی ءَ راجانی وتواجھی ایرموش کرت کن اَنت بلے مردم ءِ گْوستانک چوشیں زوراکیانی سوبمندی ءِ گواھی نہ دنت۔

آئی ءَ گوشتگ کہ بلوچ راج جھان ءَ گوں ھما راجاں ھوار اِنت کہ آ راجاں بھ کسی ایردستی نہ من اتگ جھان ءِ مزنیں زوراکاں گوں ھوار ھما راج کہ اسلام ءِ نام ءِ سر ءَ سھرائی ءَ وت ءَ بلوچ ءِ دوست پیش کنت بلے چیراندری منگلی ریچیں سیاہ مار ءِ پیم ءَ بلوچ ءَ وت ءَڈنگ ئِے جتگ۔بلوچ ھچ ناسرپد نہ اِنت بلوچ جْوانے ءَ سرپد اِنت کہ من ءَ پہ وتی راجی سیت ءُ پہ وتی آیوکیں پدریچ ءِ آجوئی ءُ پہ آئی ءِ پانک ءَ چی کنگی اِنت۔

بی این ایم ءِ گْوستگیں سی سی باسک ڈاکٹر شئے ءَ تران کرتگ ءُ گْوشتگ مروچی مئے اے مچی ءَ ھما مردم ساڑی اَنت کہ آیانی گسانی تہ ءَ یک یک شھیدے ھست اِنت ، ھما شھید کہ آیاں پہ وتی راج ءِ باندات ءَ جیڑ اتگ ءُ وتی ساہ نْدر کرتگ اَنت۔ آیانی لیکہ ءُ سسا سک بلند ءُ برزاد بیتگ اَ نت پمیشکا ما آیانی رندگیری کن ایں۔

دیمتر آئیءَ گْوشتگ یازدہ اگست ھما روچ اِنت کہ بلوچ ءَ را سد سال ءَ رند چہ انگریز ءَ آجوئی رس اتگ ۔زوراک ءُ گیشواھی کنوکیں راجاں مدام دگہ راجانی پل ءُ پانچ بیڑ برتگ انچوش پہ بلوچ ءَ ھم مدام آیانی نپت ءُ بیراں گْورتگ بلے بلوچ ءَ سر داتگ ، وتی منگہ ءُ ماتیں گلزمین نہ داتگ۔انچوش کہ ما گپ اش کرتگ کہ الی مھمد مینگل ءِ ، نورا مینگل یا کہ ھمل جیھند ءُ بلوچ ھان ءِ ، اے ھما مردم بوتگ اَنت کہ ایشاں گوں زورگراں جنگ کرتگ۔انگریز سد سال ءَ بلوچستان ءِ سر ءَ سردست اَنت بلے گڈ ءَ بلوچاں آ چہ وتی سرڈگار ءَ در کرت اَنت ءُ آجوئی گیپت پمیشکا اے روچ ءِ پہ بلوچاں مزنیں ارزشتے ھست اِنت۔

آئی ءَ درائینت ، اے مزنیں گپے کہ مئے مردم ھمینکس کہ در پہ در بیتگ اَنت ، بلے آیاں وتی مول ءُ لیکہ یلہ نہ کرتگ ، گوں وتی سسا ءُ شھیدانی جھد ءَ بندوک اَنت۔ واری ءُ بزگی سگگ ءَ اَنت بلے چہ وتی مول ءَ پشت ءَ نہ شتگ اَنت۔ اے پہ ما بلائیں گپے کہ مروچی ما وتی کار یلہ کرتگ ءُ اد ءَ مچ بیتگ ایں کہ چار گپ گوش دار ایں۔ اے بلوچ راج ءِ آیوکیں پدریچ اِنت۔ درست اے گپ ءَ بہ زان اَنت کہ بلوچ ءَ مروچی وتی جنگ ھما ھنداں آؤرتگ کہ نی منزل چماں اندر اِنت ، اوست پزور اِنت۔ بوت کنت کہ آجوئی ءِ جنگانی تہ ءَ پند سک دراج بہ اَنت ، پنجاہ سال ، سد سال گْوز ایت بلے اے دْرچ کہ روگ ءَ اِنت وتی منزل ءَ الم سربیت اِنت۔

روکپتی بلوچستان ءِ بنجاھی شھر زاھدان ءَ ایرانی آمیدگس ءِ ھکم ءَ بندیگیں مردمے پاھو دیگ بیتگ-

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ مزنیں زندان ءَ بندیگیں مردمے مروچی بامسار ءَ پاھو دیگ بیتگ-

پاھو دیگ بیتگیں مردم ءِ پجار سِی سالی ئیں چراگ علی بامری جھمنند دلگان ءِ نام ءَ زانگ بیتگ –

اھوالانی چراگ ایرانی سال سیزدہ سد ءُ نود ءُ نھ ءَ بزانکہ سَے سال ءَ پیسر کوش ءِ بھتام ءَ گرگ بیتگ ءُ پد ءَ ایرانی انکلابی دادگاہ ءَ پاھو ءِ ھکم داتگ بیتگ-

اھوالانی رد ءَ چراگ پشمبے ءِ روچ ءَ ماں پاھو ءِ واستا جتائیں یل کوٹی ءَ برگ بیتگ ءُ مروچی سھب ءَ جلاد ءَ آئی ءِ ساہ گپتگ ءُ پاھو داتگ بیتگ-

زانگ بہ بیت روکپتی بلوچستان ءَ بندوکیں مردم یکشل ءَ پاھو دیگ بیگ ءَ اَنت ءُ آیانی توک ءَ گیشترین مردم نشہ باپاری ءِ بھتام ءَ پاھو دیگ بیگ ءَ اَنت-

بلوچستان ءِ دمگ کیچ تمپ ءُ دشت ءِ میانی کوہ مزن بند ءَ پوج ءِ لشکر کشی ءِ میان ءَ جنگ بیتگیں دو مردمانی نماز جنازہ مروچی وانگ بیتگ اَنت-

گیشیں اھوالانی رد ءَ مزن بند دشت ءَ پوج ءِ میان ءَ جنگ ءَ نمیران بیتگیں دو ورنایانی لاش ماں کھولاں دست گپتگ ءُ مروچی ھردوک کل ءُ کسارت کنگ بیتگ اَنت-

جنگ بیتگیں مردمانی پجار سناء ء مھمد رھیم جھمنند دشت ھسادیگ ءُ کامران جھمنند کونشکلات ءِ ناماں زانگ بیتگ ات اَنت-

جنگ بیتگین سنا ماں گوادر نیاآباد ءَ کل ءُ کسارت کنگ بیتگ کہ اود ءَ بازیں کچے ءَ مردماں بھر زرتگ ءُ زمین ءِ میار کتگ- ءُ ھمے وڑ ءَ کامران ماں تمپ کونشکلات ءَ کل ءُ کسارت کنگ بیتگ-

جنگ بیتگیں مردمانی گڈی دیدار ءَ آزاد بلوچستان ءِ بیرک ھم گندگ ءَ اتکگ کہ اود ءَ مردماں وتی ھمسنتی ءِ درشان ءِ لیکہ ءَ گڈی دیداری ءَ بیرک ماں ادیرہ ءِ سر ءَ مِک کتگ-

زانگ بہ بیت گوستگیں سَے روچاں مزن بند ءَ داں انگت ءَ پوج ءِ لشکر کشی مروچی ھم برجاہ اِنت ءُ اے مردم گوستگیں روچ ءَ جنگ بیتگ ءُ آیانی لاش انتزامیہ ءَ تربت سول ھسپتال ءَ رسینتگ انت ءُ اود ءَ آ پجار کنگ ءُ کھولانی دست ءَ دیگ بیتگ اَنت-

یک دراجیں مُدتے ءَ پد بلوچستان ءَ پوج ءِ میان ءَ جنگ بیتگیں مردمانی نماز جنازہ ءِ ھواری ءَ بلوچستان ءِ بیرک گندگ ءَ آیگ ءَ اِنت کہ چد ءُ پیسر لس مھلوک ءَ ھمے زوتاں اے دابیں چیزانی توک ءَ ترس ءُ ھیال گمان کتگ بیتگ-