TBP Balochi

بلوچستان ءِ دمگ ھزدار ءَ پاکستانی پوج ءَ یک مردمے دزگیر کنگ ءَ پد بیگواہ کتگ-

گیشیں اھوالانی رد ءَ ھزدار کھنڈ ءِ جھمنند فضل یعقوب ء مھمد یعقوب گوستگیں شپ ءِ ساھت یک ءِ نزیک ءَ چہ جند ءِ لوگ ءَ زورانسری آوار جنگ بیتگ-

کھول ءِ رد ءَ ھپت ویگو گاڑیاں سواریں پاکستانی پوج ءِ کارمند لوگ ءَ مانریتکگ اَنت ءُ زھگ ءُ زالبول اش لٹ ءُ کُٹانی نشانگ اش کتگ انت ءُ فضل بلوچ دزگیر کنگ ءَ پد ناشناسیں جاھاں برتگ ات ءُ چریشی ءَ پد آئی ءِ درگت ءَ ھچ اھوال نیست اِنت-

کھول ءِ گوشگ اِنت چریشی ءَ پد پولیس اسٹیشن ءَ شتگ اِنت وئیل ءِ ھال داتگ گڑا پولیس ءَ ناروائیں ھیال درشان کتگ اَنت ھمے وڑ پد ءَ ڈپٹی کمشنر ھزدار ءَ رھوت کتگ ءُ وئیل ءِ بارو ءَ گپ جتگ گڑا آئی ءَ گپ اشکتگ ءُ پون بند کتگ-

کھول ءِ گوشگ اِنت فضل بلوچ بھاوالدین زکریا یونیورسٹی ملتان ءَ گریجویشنے کتگ ءُ آ ایجوکیشنل گل سیو اسٹوڈنٹس فیوچر ءِ بنھشت ایر کنوک ءُ گل ءِ گوستگیں سروک ھم بیتگ-

زانگ بہ بیت دو روچ ءَ پیسر فضل بلوچ ءِ براتزتک شمس بلوچ ھم پاکستانی پوج ءُ چیریں ادارھانی کارمنداں آئی ءِ لوگ ءَ آوار جتگ ءُ گون وت برتگ کہ داں انگت بیگواہ اِنت ھمے داب ءَ دمگی انتزامیہ ارزی ءِ نبشتگ کنگ ءَ ابید ایس ایچ او عبداللہ پندرانی کھول ءَ ترسینگ اِنت-

روکپتی بلوچستان ءَ پاھو ءِ ھکم ءِ آیگ ءَ پد بندیگیں ورنایے زمانتے سر ءَ یل کنگ بیتگ-

گیشیں اھوالانی رد ءَ روکپتی بلوچستان ءِ بنجاھی شھر زاھدان ءَ گوستگیں سال ءِ پنچ اکتوبر ءَ ڈیھ ءِ ھلاپ ءَ بیوکیں زھرشانیانی پژدر ءَ دزگیر بیتگیں شعیب میر بلوچ زئی یل کنگ بیتگ-

گیشیں اھوالانی رد ءَ شعیب میر بلوچ زئی گوستگیں سال ءَ دزگیر کنگ بیتگ ءُ چریشی ءَ پد آئی ءِ سر ءَ ایرانی آمیدگس ءَ پاھو ءِ ھکم داتگ بیتگ –

شعیب میر بلوچ زئی ءِ بندیگی ءِ ھلاپ ءَ چاگردی ترامجاھاں کمپئن ھم ھل اتگ ءُ انسانی ھکانی باسکاں ھم آئی ءِ یل کنگ ءِ لوٹ کتگ بیتگ-

شعیب میر بلوچ زئی گوستگیں روچ ءَ زمانت ءِ سر ءَ ماں زاھدان ءِ زندان ءَ یل کنگ بیتگ ءُ وتی گس ءَ سر بیتگ-

زانگ بہ بیت روکپتی بلوچستان ءَ زھرشانیانی پژدر ءَ بازین مردمے دزگیر کنگ ءُ بازیں مردمے کشگ ءُ زدگ کنگ بیتگ ات اَنت-

اے زھرشانی گوستگیں سال ءِ ستمبر ماھ ءَ بندات بیتگ ات اَنت کہ چریشی ءَ پد اود ءَ ھونی جاور ودی بیت اَنت-

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ وتی آفیشل ٹیلی گرام چینل آشوب ءَ شنگ کرتگیں درشان ءِ تہ ءَ بلوچستان ءِ دمگ مشکے، گچک، شاپک، جھاؤ، پیراندر، مالار ءُ کولواہ ءَ پاکستانی پوج ءِ سر ءَ بوتگیں اُرشانی زمّہ واری منّ اِتگ ءُ گوشتگ کہ مئے سرمچاراں چاردہ اگست ءِ مراگشاں دزگٹیں زورگریں پاکستانی پوج ءِ بُنجل ءُ پانگسانی سر ءَ اُرش کُتگ ءُ اے اُرشاں کم چہ کم دہ کارمند مرتگ ءُ دہ زدگ بوتگ انت –

جارکش میجر گوھرام ءِ رِد ءَ بلوچستان لبریشن فرنٹ ءِ اُرشانی دْرچ چہ دوازدہ اگست ءَ بندات بوتگ اَنت – دوازدہ اگست ءِ شپ ءِ ھشت ءَ پنجگور ءِ کھن گچک ءَ برجاھیں زورگریں پوج ءِ بُنجل ءِ سر ءَ راکٹ ءُ ٹوھیں سلاھانی سر ءَ اُرش کُتگ، اُرش ءَ یک پوجی کارمندے مُرتگ ءُ یکے زدگ بوتگ –

دوازدہ اگست ءِ شپ ءِ دہ ءُ نیم ءَ سرمچاراں کیچ ءِ ھند شاپُک ءَ بارگ ءِ کوہ ءِ سر ءَ برجاھیں پاکستانی پوجءِ پانگس ءِ سر ءَ راکٹ ءُ ٹوھیں وتکاریں سلاھانی گون ءَ اُرش کُتگ، اُرش ءَ زورگریں دُژمن ءِ یک کارمندے مُرتگ ءُ یکے زدگ بوتگ –

جارکش ءِ رِد ءَ بلوچ سرمچاراں آواران ءَ یکشمبے ءِ روچ ءَ سیزدہ اگست ءَ زورگری پاکستانی پوج ءِ سر ءَ چار جتائیں جاھاں اُرش کُتگ-

اولی اُرش بیگاہ ءِ ھپت ءَ آواران ءِ ھند جھاؤ ءِ نوندڑہ ءَ بدرنگ ءَ برجاھیں زورگریں پوج ءِ پانگسے گوں راکٹ ءُ وتکاریں سلاھاں نشانگ کُتگ، اُرش ءَ دو پوجی کارمند مُرتگ انت ءُ یکے سَک باز بوتگ –

دومی اُرش شپ ءِ ھشت ءَ مشکے ءِ ملیش بند ءَ برجاھیں زورگریں پوج ءِ بُنجل ءِ سر ءَ گوں راکٹ ءُ ٹوھیں سلاھاں اُرش کُتگ کہ جنگ داں دیر ءَ برجاہ بوتگ، چہ ایشی ءَ زورگریں پوج ءِ دو کارمند مُرتگ انت ءُ سَے زدگ بوتگ انت –

سیمی اُرش شپ ءِ نوہ ءَ آواران ءِ پیراندر کُچ ءَ برجاھیں زورگریں پوج ءِ بُنجل سر ءَ گوں راکٹ ءُ ٹوھیں سلاھاں اُرش کتگ کہ اے اُرش ءَ یک پوجی کارمندے مُرتگ ءُ یکے زدگ بوتگ-

چارُمی اُرش شپ ءِ دہ ءِ نزیک ءَ مالار کھن آواران ءَ برجاھیں زورگریں پاکستانی پوج ءِ بُنجل ءِ سر ءَ کنگ بوتگ، اے اُرش ءَ ھم راکٹ ءِ ٹوھیں سلاہ کارمرد کنگ بوتگ انت کہ چہ ایشی ءَ دو کارمند مُرتگ انت ءُ یکے سَک باز زدگ بوتگ –

جارکش میجر ءِ رِد ءَ یکشمبے ءِ روچ ءَ سینزدہ اگست ءَ سرمچاراں بیگاہ ءِ ھپت ءُ نیم ءَ کیچ ءِ ھند بلور کولواہ ءَ پاکستانی لشکر ءِ بنجل ءِ سر ءَ اُرش کُتگ ءُ دُژمنیں پوج ءِ یک کارمندے کُشتگ ءُ سَے زدگ کتگ انت –

جارکش ءِ رِد ءَ بلوچ سرمچاراں اے بُنجل ھما وھد ءَ نشانگ کُتگ اَنت وھدے زورگریں پاکستانی پوج وتگڑیں آجوئی ءِ روچ چاردہ اگست ءِ مراگشانی تیاریاں دزگٹ بوتگ انت –

جارکش میجر گوھرام بلوچ ءَ وتی درشان ءِ تہ ءَ گوشتگ کہ بلوچستان یک یک زورگیپتیں ڈیھے کہ پاکستان ءَ دستیگ کُتگ، پمشکا اِد ءَ دُژمن ءَ نہ وتی وتگڑیں آجوئی ءِ مراگشانی برجم دارگ ءِ ھک ھست ءُ نہ کہ موکل دیگ بیت، درامدیں پوج ءُ آئی ءِ ھندی کمکار وتی اِد ءَ وتی وتگڑیں آجوئی ءِ شاتکامیاں برجم بہ دار اَنت، چوشیں مراگش بی ایل ایف ءِ نشانگ ءَ اَنت ءُ پہ آیانی بے سوب کنگ ءَ وتی گُڈی زور ءَ جنت –

آئی ءَ گوشتگ کہ لھتیں چاگرد دُژمن ءُ ایردستی زھن ءِ مردم پہ وتی جند ءِ نپ ءُ سیتاں زورگریں پوج ءِ گون ءَ ھوار اَنت ءُ چاردہ اگست ءِ آجوئی ءِ مراگشانی برجم دارگ ءِ جُھد ءَ کنگ ءَ اَنت۔ پاکستانی پوج ءَ مردمانی مراگشانی بھر جوڑگ ءَ گْوازی، لبزانکی مراگش ءُ دگہ جتائی پندل کارمرد کنگ بوگ ءَ اَنت – چہ راج ءَ دزبندی اِنت کہ چوشیں مراگشاں بھر مہ زور اِت، دانکہ چہ بی ایل ایف ءِ اُرشاں شُمارا جانی ءُ مالی تاوان مہ بیت انت –

جارکش ءَ گوشتگ کہ بلوچستان لبریشن فرنٹ ءُ بلوچ راجی آجوئی زْرمبشت ءَ سرجم ءَ بلوچ راج ءِ کمک گون اِنت کہ زْرمبشت ءَ توانمند کنت ءُ ھر باسمائیں بلوچ زورگریں پاکستان ءِ وتگڑیں آجوئی ءِ روچ ءَ نہ منّ ایت ءُ نہ کہ مراگشاں بھر زور ایت بلے زورگریں پاکستانی پوج بلوچستان ءِ جتائیں دمگاں مردماں پہ زور چہ گِساں کَش ایت ءُ چاردہ اگست ءِ مرگشانی بھر زورگ ءَ بارت داں آیاں وتی مراگشاں چو اسپر ءِ وڑ ءَ کارمرد بہ کنت ءُ چہ بلوچ سرمچارانی اُرشاں وت ءَ بہ پھریز ایت – مردماں چو اِسپر ءِ وڑ ءَ کارمرد کنگ پاکستانی پوج ءِ بلوچ سرمچارانی بگیری ءَ پدریں پروش ورگ اِنت – ریاست ءِ پاکستان ءِ پوج نزورینانی بگیری ءَ زور ءِ کارمرد کنگ ءَ ڈڈّ اِنت بلے جنگ ءِ پِڑ ءَ چہ وتی بٹاکانی پُژدر ءَ مدام بے سوب اِنت – اگست ءِ ماہ ءَ چہ سرمچارانی اُرشانی تُرس ءَ پاکستانی پوج وتی پھازداری ءَ گھتر کن اَنت۔ شھر ءُ کوھی دمگاں بازیں کچے ءَ اُرش کنت ءُ مُچی سزا ءِ رد ءَ لس شھریاں زور بیگواہ کنت،ایشی ءَ ابید ھمک سال ءِ وڑ ءَ اے سال ءَ ھم بلوچ سرمچاراں آئی ءِ مُھکمیں سنگرانی سر ءَ اُرش کُتگ ءُ جانی ءُ مالی تاوان داتگ انت –

گڈسر ءَ میجر ءَ گوشتگ کہ بلوچستان لبریشن فرنٹ اے اُرشانی زمہ واری ءَ منّ ایت ءُ زورگریں ریاست ءِ سیت، پوج ءُ پوج ءِ کمکارانی سر ءَ مئے اُرش داں بلوچستان ءِ آجوئی ءَ برجاہ مان انت –

گوستگیں روچ ءَ گوادر ءَ چینی انجینئرانی کاروان ءِ سر ءَ اُرش کنوکیں پدائی نوید پنام ءِ اسلم ءِ نماز جنازہ بنکی ھنکین ءَ وانگ بیتگ-

نماز جنازہ بنکی ھنکین دشت کپکپار ءِ ھند ءَ وانگ بیتگ ءُ نماز جنازہ ءَ مردماں بازیں کچے ءَ بھر زرتگ-

زانگ بہ بیت گوستگیں روچ ءَ بلوچستان ءِ تیابدپی شھر گوادر ےَ بلوچ لبریشن آرمی ءِ پدائی یونٹ مجید برگیڈ ءَ چینی انجینئرانی کاروان ءِ سر ءَ اُرش ءِ زمہ واری من اتگ ات ءُ گوشتگ ات کہ ات اُرش ءَ بی ایل اے ءِ مجید برگیڈ ءِ باسک پدائین نوید بلوچ ء خدا بخش پنام ءِ اسلم جھمنند دشت نگور تربت ءُ مقبول بلوچ ء پھلان پنام ءِ قائم بلوچ جھمنند آواران گیشکور ءَ سرجم کتگ –

رسانکدراں شنگ کتگیں درشان ءَ بی ایل اے ءِ جارکش جیئند بلوچ ءَ گوشتگ کہ گوادر ءَ چینی انجنیئرانی یک گچینی کاروانے ءِ انگیر کتگ ءُ اُرش کتگ – اے بیڑ زرپھازگ دو اداراں برجاہ بیتگ، بیڑ ءِ ھلاس بوگ ءَ پد مجید بریگیڈ ءِ پدائینانی تیرانی ھلاس بوگ ءَ گڈی تیر ءَ شھیدی ءِ منگہ زرتگ-

روکپتی بلوچستان ءِ دمگ سرباز ءَ پٹرول ءِ یک دکانے ءَ آس کپتگ ءُ چریشی ءَ دکان ستکگ –

گیشیں اھوالانی رد ءَ سرباز ءَ پٹرول ءِ یک دکانے ءَ ناگتی آس کپتگ ءُ چریشی ءَ دکان ستکگ ءُ ایشی ءِ ھواری ءَ یک گاڑی یے ھم ستکگ –

آس ءِ کپگ ءَ پد آس کشیں گاڑی اتکگ ءُ آس توسینگ بیتگ – اھوالانی رد ءَ آس ءِ کپگ ءَ دگہ جانی تاوان نہ بیتگ اَنت بلے مالی تاوانانی دیمپانی بیتگ-

زانگ بہ بیت گوست ءَ ھم روکپتی بلوچستان ءِ دمگ سراوان ءُ دشتیاری ءَ ھم ھمے داب ءَ تیلانی دکاناں آس کپتگ بیتگ انت کہ آیانی سبب زانگ نہ بیتگ انت-

بلوچستان ءِ تیابدپی شھر ءُ سی پیک ءِ بنجل گوادر ءَ گوستگیں روچ ءَ چینی انجینئرانی سر ءَ بلوچ سلاہ بندیں گل بی ایل اے ءِ فدائی اُرش ءَ پد سرجمیں شھر ءَ پٹ ءُ پولی بیڑ برجاہ اَنت-

چینی انجینئرانی کاروان ءِ سر ءَ بلوچ لبریشن آرمی ءِ مجید برگیڈ ءِ دو اُرشکاراں نشانگ کتگ – اے ترندیں اُرش داں دو اداراں برجاہ بیتگ-

دمگی مردمانی گوشگ اِنت اُرش ءَ پد گوادر شھر ءِ سیکورٹی ترند کنگ بیتگ ءُ روگ ءُ آیگی راہ ءُ دراں ترندیں پٹ ءُ پول کنگ بیتگ-

دمگی مردمانی گوشگ اِنت چینی انجینئرانی سر ءَ بیتگیں اُرش ءِ ھند ءُ دراھیں جاہ پکیر کالونی، نیاآباد، جی ڈی کالونی ءَ پاکستانی پوج ءَ لوگ لوگ ءَ دور کنان ءَ پٹ ءُ ھنڈ کتگ اَنت-

دمگی مردمانی گوشگ اِنت لوگ ءُ میتگانی پٹ ءُ پول ءِ وھد ءَ پوج ءَ چک ءُ جنین ھم لٹ ءُ کُٹ کتگ بیتگ اَنت-

مردمانی گوشگ اِنت داں انگت ءَ پوج ءَ بازیں مردمے دزگیر کتگ ءُ گون وت برتگ انت کہ تنی وھدی آیانی پجار نہ بیتگ اَنت-

بلوچستان ءِ دمگ ھزدار ءُ شال ءَ پاکستانی پوج ءَ دو ورنا آوار جنگ ءَ پد ناشناسیں جاھاں برتگ اَنت-

بیگواہ بیتگیں مردمانی پجار کامران ء سومرو خان ءُ کمبر بلوچ ء مھمد کریم ءِ ناماں زانگ بیتگ اَنت-

دمگی مردمانی گوشگ اِنت کامران ءِ سیادی ھزدار ءِ ھند مولہ ءَ اِنت کہ آ گوستگیں شپ ء ساھت یک ءَ چہ لوگ ءَ باذگیر ھزدار ءَ سلاہ بندیں مردماں آوار جتگ ءُ گون وت برتگ-

کھول ءِ رد ءَ آئی ءِ بارو ءَ داں انگت ءَ مارا ھچ گوشگ نہ بیتگ کہ آ کجا اِنت – آیاں گوشتگ ما مزنیں واک ءُ ادارھاں گوں دزبندی کن این آ کامران ءِ یل کنگ ءَ سرجمی بہ کن اَنت-

بیگواہ کنگ بیتگیں کمبر ءِ سیادی چہ کیچ ءِ ھند کولواہ ءَ اِنت ءُ آ ایف ایس سی ءِ نودربرے کہ گوستگیں شپ ءِ ساھت یک ءَ شارجہ ھوٹل شال ءَ پوج ءَ آوار جنگ ءَ پد بیگواہ کرتگ-

بلوچستان لبریشن فرنٹ ءَ گوشتگ آدینگ ءِ روچ ءَ 11 اگست 2023 ءَ دو سرمچار ءَ گوں دژمن ءَ بھادری ءَ مڑان پہ سرڈگار ءَ ندْر بیتگ اَنت۔گْوستگیں لھتے روچ اِنت کہ پاکستانی لشکر ماں کیچ ءَ زامران ءُ دشت ءَ لشکرکشی کنگ ءَ اِنت۔ 11 اگست ءِ روچ ءَ ھم مزنبند ءُ آئی ءِ کش ءُ گْوراں دژمنیں لشکر مزنیں کچے ءَ ساڑی بیتگ ءُ آیاں جنگی بالیگانی کمک ھم گون بیتگ انت۔

جارکش ءَ گوشتگ یازدہ اگست ءِ ادار یازدہ ءَ سرمچارانی رمبے پہ دژمن ءِ سر ءُ پرانی چارگ ءَ تر ءُ تاب ءَ بیتگ انت کہ ھیر آباد ءِ نزیک ءَ کارگاھی ءَ گوں دژمن لشکر ءِ پیادگیں کارمنداں دوچار کپتگ اَنت ءُ آیانی میڑ بندات بیتگ۔ دژمن ءِ کچ چہ سرمچاراں گیش بیتگ ءُ آیاں مزنیں سلاہ گون بیتگ انت بلے پد ءَ ھم سرمچاراں آیانی دیم گوں تمردی ءَ داشتگ ۔اے میان ءَ پاکستانی لشکر ءَ جنگی بالیگانی کمک ھم گون بیتگ۔سرمچاراں مھریں جاھاں سنگر گیپتگ ءُ داں سئے اَداراں دژمن ءِ پیادگیں لشکر ءِ دیم داشتگ ، اے میان ءَ ھچ سرمچار ءَ تاوان نہ بیتگ ءُ دژمن ءِ کم ءَ کم دو سپاھیگ کشگ بیتگ انت۔ پیادگیں لشکر ءِ بے سوبی ءَ پد دژمن ءَ جنگی بالیگانی کمک ءَ پہ وت دگہ سپاھیگ لوٹائینتگ ءُ کمانڈو ایر گیپتگ انت۔

جارکش ءَ گوشتگ کارگاھی ءِ اے میڑ ءَ شھید لیفٹینینٹ کامران ءُ شھید سیکنڈ لیفٹینینٹ جاپر ءَ پہ وتی ھمبلانی دیمپانی ءَ دیم ءِ سنگر داشتگ اَنت ءُ دژمنیں لشکر تاوان بار کرتگ۔اے میان ءَ ارش کنان ءَ شھیدیں سرمچاراں دژمن ءِ انگر پروشتگ ءُ وتی ھمراھانی پہ دْراھی در کنگ ءَ سوبمند بیتگ اَنت ءُ وتی گرانبھائیں جان اش نْدر کرتگ اَنت۔

بی ایل ایف ءِ جارکش میجرگوھرام بلوچ ءَ گوشتگ کارگاھی ءِ میڑ ءَ شھید بیتگیں سرمچاراں ستک شانی ندْر کنت ءُ اے مسام کنت کہ شھیدانی لوٹ ءُ واھگانی پد ءَ داں آجوئی ءَ جنگ برجاہ بیت۔شھیدانی ھون ءِ بیر آجوئیں بلوچستان اِنت۔ داں بلوچستان ءِ آجوئی ءَ بی ایل ایف ءِ بیڑ برجاہ بہ اَنت۔

جارکش ءَ گوشتگ شھید لیفٹینینٹ کامران پنام نودی ء شھید گلام مستپا جھمنند کونشکلات تمپ ءِ سیادی گوں بلوچ راجی زْرمبشت ءَ بندوکیں گِسے ءَ بیتگ، آیاں پہ بلوچستان ءِ آجوئی ءَ گرانبھائیں دیمونی داتگ۔ آئی ءِ کھول شھیدانی کھول اِنت۔ 25 مئی 2013 ءَ پاکستانی لشکر ءَ کونشکلات ءَ میتگ ءِ سر ءَ اُرش کرتگ اَت، گس مانداشت اَنت ءُ شھید کامران ءِ پِت گُلام مستپا شھید کرت۔

آئی ءِ مستریں برات شھید ارپان پنام امداد ھم بی ایل ایف ءِ سرمچارے بیتگ کہ 28 ستمبر 2020 ءَ مزنبند ءَ گوں دژمن ءَ دیم پہ دیمی میڑے ءَ گوں وتی ھمراھیں سرمچار نورھان پنام بْرمش ءَ شھید بیتگ اَت ، ھمے جنگ ءَ دژمن ءَ ھم مزنیں کچے ءَ تاوان بیتگ اَت۔اے میڑ ءَ چہ دژمن ءِ چریکاں ملانٹ ءِ جھمنندیں منیر ھم کشگ بیتگ اَت۔شھید ارپان ءِ شھید بیگ ءَ پد گل ءَ آئی ءِ زمہ واری لیفٹینینٹ کامران ءَ داتگ اَنت۔

جارکش ءَ گوشتگ شھید لیفٹینینٹ کامران وتی ورنایے ءَ پہ آجوئی ءِ جھد ءَ ھدوک بیتگ۔ 2013 ءَ آ بی ایل ایف ءِ بھر جوڑ بیتگ۔ گوں وتی کسانیں سند ءُ سالاں آئی ءَ بازیں جنگاں بھر زرتگ ءُ دُژمن ءِ بگیری ءَ سوبمند بیتگ۔شھیدی ءِ وھد ءَ آ لیفٹینینٹ ءِ اگدہ ءِ سر ءَ بیتگ۔آئی ءَ دڑامب ، سیاھجی، مزن بند ، شیراز ، کلبر ، زامران ، بلیدہ ءُ بالگتر ءَ دُژمن ءِ بگیری ءَ بی ایل ایف ءِ اُرشاں بھر زرتگ۔

بی ایل ایف ءِ جارکش ءَ گوشتگ 18 فروری 2020 ءَ بلوچ آجوئیں دوستیں گلانی سنت براس (بلوچ راجی آجوئی سنگر ) ءِ بیڑے ءَ شھید کامران ٹپی بیتگ اَت،درمان ءُ دارگ ءَ پد آ دوبر آجوئی ءِ جنگ ءِ پڑ ءَ پرکار بوتگ ءُ گوں گشاد ءُ سوگھی وتی کردے پیلو کرتگ۔دو رند ءَ دژمن ءَ آ ءُ آئی ءِ کھول ءِ آدگہ مردمانی گس مانداشت اَنت ءُ آ چہ جھد ءَ دزکش بیگ ءِ سر ءَ زور دات بلے آ ءُ آئی ءِ کھول ءَ اے درسیں زوراکی پہ بچکندے اوپار کرتگ انت ءُ چہ آجوئی ءِ جھد ءَ پدکنز نہ بوت اَنت۔کامران دلسیاھی کشوک،توانمند ءُ گیدریں ھمبلے بیتگ۔

جارکش ءَ گوشتگ شھید کامران وتی جند ءِ میتگ کونشکلات ءَ گلزمین ءِ میار کنگ بیتگ۔آئی ءِ جنازہ ءِ نماز ءَ مردماں مزنیں کچے ءَ بھر زرتگ۔ آئی ءِ مانش ءِ سر ءَ آجوئیں بلوچستان ءِ بیرک مِک کنگ ءُ پہ آئی ءَ ستک درشان کنگ بیتگ۔

میجر گوھرام بلوچ ءَ گوشتگ شھید سیکنڈ لیفٹینینٹ جاپر پنام سنا ء مھمد رھیم جھمنند دشت ھسادیگ ، چہ 2014 ءَ گوں بی ایل ایف ءَ بندوک بیتگ ءُ داں دو سال ءَ گوادر ءَ شھری نیٹورک ءِ بھر بیتگ۔ آئی ءَ شھری نیٹورک ءِ تہ ءَ گل ءِ من ءُ مولانی سر ءَ کار کرتگ ۔ آ گل ءِ شور ءِ رد ءَ 2016 ءَ اوتاک ءَ اتکگ ءُ دژمن ءِ بگیری ءَ دیم پہ دیمی جنگانی بھر بیتگ۔آئی ءِ کھول ءِ دگہ مردماں ھم پہ بلوچ راجی آجوئی زْرمبشت ءَ دیمونی داتگ ءُ شھید بیتگ اَنت۔چہ آیاں شھید ایسا پنام ناکو شیرا 03 مئی 2018 ءَ شھید کنگ بیتگ، شھید سمیر پنام سوگات ء شھید ایسا 07 جولائی 2017 ءُ شھید سنا پنام سوگات 2016 ءَ شھید کنگ بیتگ انت۔

شھید جاپر ءَ دشت، مند، زامران ، بلیدہ ، گوادر ءُ آدگہ جاھاں بی ایل ایف ءِ بیڑاں بھر زرتگ ءُ پہ دژمن ءِ تاوان ءَ وتی کِرد پیلو کرتگ۔

بی ایل ایف ءَ گوشتگ شھید سیکنڈ لیپٹینینٹ بھادریں جنگولے ءِ پجیگ ءَ تکنیکی کاراں ھم سوگہ بیتگ ۔ آئی ءَ بازیں جنگاں پہ گل ءِ رسانکی کاراں تامرگرگ ءِ زمہ واری ھم پیلو کرتگ انت۔

شھید سنا گوادر ءَ ’شمبے اسمائیل میتگ‘ ءَ گلزمین ءِ میار کنگ بیتگ۔آئی ءِ جنازہ ءِ نماز ءَ مردماں مزنیں کچے ءَ بھر زرتگ ءُ گوں راجی منگہ ءُ مڑاھاں گلزمین ءَ ایر داتگ ۔

تائیوان ءِ نائب سروک امریکہ ءِ تر ءُ تاب ءِ وھد ءَ گوشتگ کہ اگاں تائیوان مھکم اِنت گڑا مھکم اِنت ءُ زوراک ءُ زوردستانی پنجگاں چہ تائیوان پشت نہ کنز ایت-

ھال سرکنوکیں ادارہ روئٹرز ءِ رد ءَ بیجنگ ءَ تائیوان ءِ نائب سدر ولیم لائی ءَ امریکہ ءِ تر ءُ تاب ایر جتگ-

ولیم لائی ایوکیں گچینکاری ءَ سروک جوڑ بوگ ءِ ھاتر ءَ یک مھکمیں مردمے ءُ اے ھد ءَ امریکہ ءِ تر ءُ تاب ءَ اِنت-

آئی ءَ پیراگوئے ءِ تر ءُ تاب ءَ پیش امریکہ ءَ جَل اتگ پیراگوئے ھما سیزدھیں ڈیھاں یکیں ڈیھ اِنت چریشی ءَ چین ءِ بیھاراں ابید ھم تائیوان ءِ گون ءَ اوشتوک بیتگ-

تائیوان ءُ امریکہ ءِ اے تر ءُ تاب ءَ نیزور دابی گوشتگ بلے چین ءَ اے تر ءُ تاب ایر جتگ ءُ سروک ولیم لائی آجو دوستی ءِ جیڑہ ءِ ودی کنگ ءِ بھتام جتگ-

تائیوان ءِ مھتری ماڑی ءِ درشان ءِ رد ءَ نائب سدر ءَ گوشتگ اگاں تائیوان مھکم اِنت گڑا دنیا مھکم اِنت ءُ اگاں تائیوان ءِ زمین ءَ ایمنی اِنت گڑا دنیا ءِ زمین ءَ ھم ایمنی اِنت-

آئی ءَ گوشتگ ما راستیں راہ ءَ اِنت ءُ زوراک ءِ گیش کپتگیں ترس ءَ چہ ترس ءِ آماچ نہ اِنت ءُ نانکہ پشتکنزی کن ایں – تائیوان جمھوری راہ ءَ بندوکی ءِ جنزگ ءَ مارا بھادر ءُ مھکم بوگی اِنت-

چین ولیم لائی ءِ دوستی ءَ جوانیں نگاھاں نہ چار ایت ءُ آئی ءَ وت تائیوان ءِ آجوئی ءِ واستا یک جوانیں گامگیج کارے گوشتگ –

ولیم لائی ءَ نیویارک ءَ اے گپ پدر کرتگ کہ تائیوان ءِ سروک ءِ پالیسانی رد ءَ برابری ءِ بنیات ءَ آ چین ءَ گپ ءُ تران کنگ ءَ تیار اِنت ایمنی ءِ اُمیت ءِ واھگ ءَ دار ایت-

آئی ءَ گوشتگ کہ آ تائیوان ءِ وت واجھی ءِ پھریزگ ءِ گپ ءَ جنت ءُ بس شھری وتی آیوکیں باندات ءِ لیکہ ءَ ایر کت بہ کن اَنت بلے تائیوان چین ءِ گوشتگیں گپانی باپند نہ اِنت-

بلوچ نیشنل مومنٹ ءِ سروک ڈاکٹر نسیم بلوچ ءَ گوشتگ بلوچ راج گوں ھما راجاں ھوار اِنت کہ آیاں بھ زوراکی ءِ دیم ءَ سر جھل نہ کرتگ ءُ ایردستی نہ من اتگ ، مروچی ھم درانڈیھ بہ بیت یا گلزمین بلوچ راج ھرچ وڑیں سکی سگگ ءَ اِنت ءُ وتی آجوئی ءِ جھد ءَ دیم ءَ برگ ءَ اِنت۔اے گپ 11 اگست ، سوگند سرسبزی روچ ءِ درگت ءَ بی این ایم مشکے ھنکین ءِ چیردستی ءَ برجاہ دارگ بیتگیں مچی ءَ تْران کنان بی این ایم ءِ ھنکینی راھشوناں درشانتگ اَنت۔

گوں مراگِش ءَ تْران کنان استاد مھران ءَ گْوشتگ کہ بلوچستان چہ بِندات ءَ آجو ءُ وت واجھیں ڈیھے بوتگ پہ بلوچستانءِ پھریزگ ءَ بلوچ ءِ پیر ءُ کماشاں وتی ھون ریتکگ ءُ بلوچستان پھز اتگ۔اے گپ راستے کہ دری زوراکانی زوراکیانی آماچ بوتگ بلے بلوچستان ءُ بلوچ راج ءَ بھ دری راجانی ایردستی نہ من اتگ ءُ پہ وتی راجی آجوئیءِ پھریزگ ءِ مدام جاڑیگ بوتگ۔

آئیءَ گوشتگ وھدے انگریزاں بلوچستانءِ بادشاہ میر مھراب ھانءَ ھمے گْوشتگ کہ تو منی پرمان ءِ پابند ءُ منی کوتلی بہ بہ ئے بلے مھراب ھان انگریزانی ایردست بیگ ءَ ساڑی نہ بوت پمیشکا انگریزاں گوں وتی لشکر ءَ بلوچستانءِ سر ءَ ارس کرت ءُ 1839 ءَ بلوچستان زور گیپت۔ ھمے ایردستی ءِ بگیری ءَ بلوچاں ڈیھ پھزی ءِ راہ گچینت ءُ انگریز ءِ بگیری ءَ چیرکی جنگ بنا کرت ءُ انگریز ماں بلوچ گلزمین ءَ پہ ایمنی ءَ نندگ ءَ نہ اشت اَنت ، ھمے ارشانی پد ءَ پہ انگریزاں باز جیڑہ ودی بوت۔

دیمترا آئی ءَ گْوشتگ وھدے دومی جھانی جنگ ءَ پد انگریز چہ ھرچ نیمگ ءَ ایردستیں راجاں ماں بست گڑا آ چہ اے دمگ ءَ در کپگ ءَ لاچار بوت ، چہ انگریز ءَ در کپگ ءَ 11 اگست 1947 ءَ بلوچستان ءِ آجوئی سرسبز اِت ءُ بلوچ یک رندے پد ءَ وتی گلزمین ءِ وتواجہ جوڑ بوت اَنت۔آجوئی ءِ رسگ ءَ پد آیاں نوکیں دودانی پد ءَ گچینکاری کرت۔ بلوچستان گوں جھان ءِ کوپگے ءَ دیم ءَ جزگ ءَ ساڑی اَت ، آئی ءِ دو پارلیمان اَت اَنت ، جھگیرانی پارلیمان (زیریں پارلیمان ) ءُ گچینی پارلیمان ( بالائیں پارلیمان)۔بلے انگریزاں اے دمگ ءَ پہ وتی سیتانی پانک ءَ پانگے پکار اَت پمیشکا آیاں ھندوستان دو جاہ ءَ ونڈ کرت ءُ پاکستان ءِ نام ءَ ڈیھے جوڑ کرت۔وتی جھانی سیتانی دیمپانی ءَ پہ انگریزاں بلوچستان ءِ آجوئی مزنیں اڑاندے اَت ، آیاں چیراندری پاکستان ءِ کمک کرت ءُ بلوچستان پاکستان ءِ ایردست کنائینت۔

استاد مھرا ن ءَ گْوشتگ کہ یازدہ اگستءِ دارگ ءِ مول ھمیش اِنت کہ ما وتی پہ آجوئی ءِ گرگ ءَ کرتگیں مسام ءَ یات بہ کن ایں، سوگند ءَ بہ سبز این ءُ پاکستان ءُ دری ٹیکاں ھمے کلوہ ءَ بہ شکسا ایں کہ بلوچستان ءَ وھدے چہ انگریز وڑیں زوراکی ءَ وتی ڈیھ ءِ آجوئی پچ گیپتگ گڑا پاکستان ءِ بنیاد ءُ منک اینچو مگیم نہ اَنت کہ بلوچستان ءِ سر ءَ وتی سردستی ءَ برجاہ داشت بہ کنت ، الم آ زوراکی کنت ، کشت ءُ کشار کنت انچوش کہ داں انیگ ءَ آئی ءَ ھمینچو بلوچ کشتگ کہ انگریزاں وتی سد سال ءِ سردستی ءِ میان نہ کشتگ ، گار ءُ گمسار نہ کرتگ۔ پرچا کہ زوراک مدام ھمے وش منی ءَ بیت کہ آ گوں زوراکی ءَ راجانی وتواجھی ایرموش کرت کن اَنت بلے مردم ءِ گْوستانک چوشیں زوراکیانی سوبمندی ءِ گواھی نہ دنت۔

آئی ءَ گوشتگ کہ بلوچ راج جھان ءَ گوں ھما راجاں ھوار اِنت کہ آ راجاں بھ کسی ایردستی نہ من اتگ جھان ءِ مزنیں زوراکاں گوں ھوار ھما راج کہ اسلام ءِ نام ءِ سر ءَ سھرائی ءَ وت ءَ بلوچ ءِ دوست پیش کنت بلے چیراندری منگلی ریچیں سیاہ مار ءِ پیم ءَ بلوچ ءَ وت ءَڈنگ ئِے جتگ۔بلوچ ھچ ناسرپد نہ اِنت بلوچ جْوانے ءَ سرپد اِنت کہ من ءَ پہ وتی راجی سیت ءُ پہ وتی آیوکیں پدریچ ءِ آجوئی ءُ پہ آئی ءِ پانک ءَ چی کنگی اِنت۔

بی این ایم ءِ گْوستگیں سی سی باسک ڈاکٹر شئے ءَ تران کرتگ ءُ گْوشتگ مروچی مئے اے مچی ءَ ھما مردم ساڑی اَنت کہ آیانی گسانی تہ ءَ یک یک شھیدے ھست اِنت ، ھما شھید کہ آیاں پہ وتی راج ءِ باندات ءَ جیڑ اتگ ءُ وتی ساہ نْدر کرتگ اَنت۔ آیانی لیکہ ءُ سسا سک بلند ءُ برزاد بیتگ اَ نت پمیشکا ما آیانی رندگیری کن ایں۔

دیمتر آئیءَ گْوشتگ یازدہ اگست ھما روچ اِنت کہ بلوچ ءَ را سد سال ءَ رند چہ انگریز ءَ آجوئی رس اتگ ۔زوراک ءُ گیشواھی کنوکیں راجاں مدام دگہ راجانی پل ءُ پانچ بیڑ برتگ انچوش پہ بلوچ ءَ ھم مدام آیانی نپت ءُ بیراں گْورتگ بلے بلوچ ءَ سر داتگ ، وتی منگہ ءُ ماتیں گلزمین نہ داتگ۔انچوش کہ ما گپ اش کرتگ کہ الی مھمد مینگل ءِ ، نورا مینگل یا کہ ھمل جیھند ءُ بلوچ ھان ءِ ، اے ھما مردم بوتگ اَنت کہ ایشاں گوں زورگراں جنگ کرتگ۔انگریز سد سال ءَ بلوچستان ءِ سر ءَ سردست اَنت بلے گڈ ءَ بلوچاں آ چہ وتی سرڈگار ءَ در کرت اَنت ءُ آجوئی گیپت پمیشکا اے روچ ءِ پہ بلوچاں مزنیں ارزشتے ھست۔

آئی ءَ درائینت ، اے مزنیں گپے کہ مئے مردم ھمینکس کہ در پہ در بیتگ اَنت ، بلے آیاں وتی مول ءُ لیکہ یلہ نہ کرتگ ، گوں وتی سسا ءُ شھیدانی جھد ءَ بندوک اَنت۔ واری ءُ بزگی سگگ ءَ اَنت بلے چہ وتی مول ءَ پشت ءَ نہ شتگ اَنت۔ اے پہ ما بلائیں گپے کہ مروچی ما وتی کار یلہ کرتگ ءُ اد ءَ مچ بیتگ ایں کہ چار گپ گوش دار ایں۔ اے بلوچ راج ءِ آیوکیں پدریچ اِنت۔ درست اے گپ ءَ بہ زان اَنت کہ بلوچ ءَ مروچی وتی جنگ ھما ھنداں آؤرتگ کہ نی منزل چماں اندر اِنت ، اوست پزور اِنت۔ بوت کنت کہ آجوئی ءِ جنگانی تہ ءَ پند سک دراج بہ اَنت ، پنجاہ سال ، سد سال گْوز ایت بلے اے دْرچ کہ روگ ءَ اِنت وتی منزل ءَ الم سربیت۔