گوستگیں شپ ءَ موسی خیل ءِ ھند سر ءَ ناشناسیں مردماں موباھل ٹاور مانداشتگ، چریشی ءَ پد گاڑیانی روگ آیگ کنگری ءُ دگہ ھندانی سر ءَ پہ ھیالداری ءَ اوشتارینتگ اَنت-
سھب چار ءَ تاں گاڑیانی روگ آیگ داشتگ اَنت، گاڑیانی روگ آیگ لورالائی، رکھنی ءُ قلعہ سیف اللہ سر ءَ داشتگ اَنت ءُ چار بج ءَ پد دگ پچ کنگ بیتگ-
دومی نیمگ ءَ قلعہ سیف اللہ ءَ ھم ھال اِنت کہ اود ءَ ھم شیواری ءِ سبب ءَ گاڑی داشتگ اَنت-
شھید رضوان بلوچ پنّام حمل ءِ غائبانہ نماز جنازہ آئی ءِ بُنکی ھنکین ءَ وانینگ بیتگ-
گیشیں ھالانی رِد ءَ فدائی شھید رضوان بلوچ ء مولابخش ءِ غائبانہ نماز جنازہ گوستگیں روچ ءَ گوادر ءِ دمگ پانوان ءَ آئی ءِ بُنکی ھنکین دشت درابول ءَ وانینگ بیتگ- نماز جنازہ دمگی مردماں بھر زرتگ-
اِھوالکار رِد ءَ جنازہ ءِ بھر زیرگ واستا آؤکیں مردم پاکستانی پوج ءَ داشتگ ءُ روگ ءَ نہ اِشتگ اَنت-
زانگ بہ بیت کہ فدائی رضوان بلوچ دگہ فدائیانی ھمراھی ءَ بیست پنچ اگست ءَ بلوچ لبریشن آرمی ءِ آپریشن ھیروف ءِ بھر بیتگ اَنت کہ آیاں لسبیلہ ءَ پاکستانی پوج ءِ بُنجل سر ءَ اُرش کتگ-
رضوان بلوچ ءَ شورواں پُریں گاڑی ھیڈکوارٹرز ءِ دومی نیمگ ءَ ڈک داتگ پوج نشانگ کتگ-
تکنیکی کتابانی وسیلہ ءَ وانگ ءِ شرتریں راہ چے اِنت؟
نبشتہ کار: پلیویو پورلان
رجانکار: روژنا بلوچ
دی بلوچستان پوسٹ
اولی گپ ایش انت کہ من پہ لوٹوکیں نبشتانک ءَ کتاب یا دگہ رھشونی یے گچین کناں ءُ درور ءُ درونتانی رندگیری ءَ کناں۔ استثنا ءَ ابید “ھچ استثنا” ءِ سُھر ءِ رھبند ءِ رندگیری کنگ سک باز المی اِنت۔ اے شر اِنت کہ وتی رزا ءِ پیشدارگ ءَ بہ کن اِت ءُ شوربندی ءِ رندگیری ءَ مول ءُ مراد ءُ سپرنٹ ءِ توسیپ ءُ ستا ءَ کمک بہ کن اِت۔
پد ءَ، من “پنچ رھبند” ءِ رھبند ءَ کارمرز کت ءُ اے منی سپر ءِ دگہ بھراں منی تَب ءِ توسیپ ءَ کنت۔ بیا اِت رھبندانی نیمگ ءَ رو ایں:
رھبند 1: “موم ءِ سر ءَ موم بند” نبیسگ. کاپی مہ کن اِت۔ کدی کاپی مہ کن اِت۔ کدی ھم انا.
ترا 1984 ءِ کراٹا ءِ کڈ ءِ تامُر یات اِنت؟ کسہ 2010 ءِ ورژن ءَ گوں سک نزیک اِنت۔ کوبرا کائی اکیڈمی ءِ نودربراں ڈینیل سان ءَ ٹپّ جتگ۔ واجہ میاگی ڈینیل ءِ پَھریز ءَ کوبرا کائی ماسٹر ءَ گوں گپ کنگ ءِ جھد ءَ کنت۔ ڈینیل ءَ را امن آرگ ءِ واھشت مندیں واجہ میاگی ءَ کراٹا ٹورنامنٹ ءِ ھاتر ءَ کوبرا کائی ءَ را مہ کن کتگ۔ اگاں ڈینیل سان سوبمند بہ بیت گڑا دگہ کس آئی ءَ گوں گند ءُ نند مہ کنت۔ اگاں نہ آئی ءِ زندگی جھنم جوڑ بیت۔ چوناھا ڈینیل کراٹا ءَ نہ زانت ءُ مسٹر میاگی آئی ءَ را تربیت دیگ ءِ سوڑگ کنت۔
تربیت ءِ سیشنانی وھد ءَ ماسٹر میاگی ڈینیل ءَ را کراٹا ءِ ربیدگی تربیت ءِ ھاتر ءَ بازیں اجبیں کارانی سرجم کنگ ءِ پرمان ءَ دنت، چوش کہ باڑ ءَ رنگ کنگ یا گاڑی ءِ یک ٹولی یے ءَ موم کنگ۔ سکیں کلاسیکل چمشانک ءَ بچار اِت کہ ڈینیل وتی واجہ ءَ گوں ھبر کنت کہ آئی ءَ را چشیں کارے کنگ ءِ پرچا زلورت اِنت: منی گپ ایش انت کہ ترا ھرچی کہ نَکل کنگ لوٹ اِیت، ٹرانسکرپٹ کنگ لوٹ اِیت۔ بس کاپی ءُ گوست ءَ مہ کن اِت۔ ٹرانسکرپشن درور یا درونت ءِ وڑ ءَ گندگ ءَ کیت کہ تو بس مپت ءَ باڑ ءَ رنگ کنگ ءَ ئے، بلے تو نوکیں ٹول ءُ ٹیکنالوجی ءَ چہ آگاہ بوگ ءَ ئے۔ اگاں تو بس کاپی ءُ پیسٹ کن ئے گڑا تو لھتیں نھو ءِ بیان ءِ سما کنگ ءِ موہ ءَ گار کن ئے۔ آ کوم ءَ پرچا ھست؟ اوپن کلوز کوسین، نام ءِ جاہ ءِ درستیں جاہ ءُ دگہ چوشیں چیز آسانی ءَ زانگ نہ بنت کہ تو کوڈ ءَ کاپی ءُ پیسٹ کن ئے۔ یات بدار اِت: “موم ءِ سر ءَ موم بند”۔ ٹرانسکرپٹ، کاپی ءُ پیسٹ نہ اِنت۔
رھبند 2: مدام ”سئے گام“ ءَ کارمرز کن اِت کدی دگہ درور یا درونت ءِ نیمگ ءَ مہ رو اِت کہ آئی ءَ را بے ردی ءَ وش آتک بہ کن اِت۔ ھما وھد ءَ کہ تو ھم لھتیں کلاک یا روچ گوازین ئے! من گیشتر وتی نودربراں رند ءِ کسہ ءَ گُشاں:-
وھدے من کالج ءِ منوک ءِ چکاسانی وانگ ءَ اتاں گڑا باز براں من دو یا سئے سکیں گرانیں ھساب ءِ جیڑھانی گیش ءُ گیوار ءَ کلاک گوازینتگ ات۔ اے پہ لھتے مردماں ھچ وڑیں ھبرے نہ بوتگ، پرچا کہ آیانی ھیال ءَ اے یک وڑیں وھد ءِ زوال بوتگ۔ البتہ جیڑہ ءِ گیش ءُ گیوار ءِ ھما وھداں من جیڑہ ءِ گیش ءُ گیوار ءِ بازیں راہ ءُ درانی جھد ءَ سک گھتر بوتاں۔ من بازیں چیزے زانت۔ انچوش من ءَ انگت لھتیں ھل یات اَنت، 20 سال ءَ پد ھم!-
اگاں شما لھتیں درور ءِ جھد ءَ کنگ ءَ اِت گڑا کاپی مہ کن اِت، نبشتہ بہ کن اِت (کانود 1)۔ ٹرانسکرپٹ کنگ ءَ پد ، تو لھتیں گالٹک کت کن ئے کہ تر ءَ راست کنگ لوٹ اِیت۔ اے یک جوانیں موھے پہ پریشانی ءِ گیش ءُ گیوار ءُ ڈیبگنگ ءِ وسیلہ ءِ زانگ ءَ۔
من ءَ مدام اے لالچ ءِ مارشت بیت کہ بس ویب ءَ چہ کوڈ کاپی بہ کناں ءُ دیمتر ءِ درونت ءَ بہ رواں. وھدے کہ اے گپ بیت گڑا یات بہ دار اِت کہ شما لھتیں پیداوار ءِ جیڑھ ءَ گیش ءُ گیوار نہ کن اِت۔ تو وانگ ءَ ئے ءُ اے کار ءَ وھد لوٹ اِیت۔
ابید ایشی ءَ چہ وت ءَ چیزے ءِ گیش ءُ گیوار کنگ ءَ پد سوبمندی ءِ تام ءَ چہ شرتریں ھچ نیست۔
“سئے گام” ءِ بارو ءَ چے گش ئے؟. اے منی ھائی اسکول ءِ استاد ءِ جیڑہ ءِ گیش ءُ گیوار ءِ رھبند اِنت:
ھما وھد ءَ کہ شما یک سکیں گرانیں جیڑھے ءِ آماچ بہ بَہ ئے گڑا ھما گامگیجاں بہ زیر اِت:
اولی گام: گریوگ۔
دومی گام: وتی ارساں ھشک کن اِت۔ گام 3: جیڑہ ءِ گیش ءُ گیوار ءَ بکن اِت رھبند 3: د ستی کتاب ءَ بوان اِت ھر نوکیں کلاس / کمانڈ / دزمھار / دگہ ءِ واست API / مواداں پچ کن اِت۔ بیان ءَ سرپد بہ بہ ئے کہ نبشتہ کار ءَ اے درور یا ھل ءِ تہ ءَ پرچا کارمرز کتگ۔
تو گشت کن ئے کہ اے گپ پدّر اِنت بلے چوش نہ اِنت۔ ما اے بابت ءَ باز جیڑگ ءَ ابید پیش کنگ بوتگیں ھل ءَ منّگ ءِ جھد ءَ کنیں۔ نبشتہ کار ءِ ھل ءَ چہ ابید نوکیں امکاناتاں چیک ءُ آزمائش کن اِت۔
ھر کیمت ءَ “اسٹیک اوور فلو ءِ سر ءَ مبنی پروگرام” ءَ چہ بچ اِت۔ من آئی پون پروگرامنگ ءِ ھاتر ءَ آبجیکٹیو سی ءُ کوکو پریم ورک ءِ وانگ ءَ اتاں گڑا من ھمے رھبند ءِ سر ءَ اَمل نہ کتگ ات۔ من بس اسٹیک اوور پلو ءَ چہ ھل کاپی کناں ءُ جیڑہ ءَ گیش ءُ گیوار کناں۔ اے جیڑہ ءِ گیش ءُ گیوار ءَ شریں وڑے ءَ کار کت بلے منی زانت ءُ زانشت ءِ سر ءَ چہ دیم ءَ مانیت۔
رھبند 4: وتی وانگ ءَ ھچ وڑیں ھُشک ءَ مہ کن اِت نبشتہ کار ءَ پیش نہ داشتگیں دگہ امکانات ءِ جھد ءَ بکن اِت۔
من کائدو 3 ءِ سر ءَ اَمل کناں گڑا باز براں من نبشتہ کار ءِ نیمگ ءَ پیش کتگیں جیڑہ ءَ چہ ابید جیڑہ ءِ گیش ءُ گیوار ءِ دگہ راہ ءُ درے گنداں۔ شرتریں کارے کہ تو پہ وتی زانت ءَ کت کن ئے آ ایش اِنت کہ تو آئی ءَ را پچ ءُ آزمائش بہ کن ئے۔
پد ءَ، تو پیداوار ءِ تہ ءَ یک مزنیں توسیپے، جیڑھے ءَ گیش ءُ گیوار نہ کن ئے، بلکیں وانگ ءَ ئے۔ وانگ ءِ اَمل ءَ چہ وش ءُ وشھال بہ بہ ئے۔ رھبند 5:“اگاں تو نہ دیستگ گڑا چوش نہ بوتگ”-
ڈیبگر ءَ ھما وڑ ءَ کارمرز کن اِت کہ شما کت کن اِت۔ اگاں شما ڈیبگ ٹول ءِ وسیلہ ءَ درستیں گامگیجاں سرجم کتگ گڑا ایوک ءَ جیڑہ ءَ سرجم لیک اِت۔
کلاسانی وھد ءَ منی اولی پسو “تو ڈیبگ کتگ؟”۔ نہ کہ من کمک کنگ نہ لوٹاں، بلے من آیاں دیم ءَ برگ لوٹاں پمیشکا ڈیبگنگ ٹولز ءَ کارمرز کن اِت۔ کار کت۔ کلاس ءِ وھد ءَ لھتیں وھد ءَ پد ، آ ڈیبگ ءِ کارمرز کنگ ءَ چہ وت ءَ گیش ءُ گیوار کنگ ءِ بازیں آزمائشی کوشست ءَ پد منی کمک ءَ لوٹ اَنت۔
تربیت کلاس (یا وت وانگ) ءِ وھد ءَ چیز زوروک یا منیجر ءِ دیم ءَ یک گوچنیں جاورھالے ءَ “مگسی ءِ سر ءَ” نہ ، ڈیبگ ٹول ءِ کارمرز کنگ ءِ رھبند ءَ زانگ ءِ جوانیں وھد اِنت۔
وھدے کہ اے گپ بیت، تو وتی مجگ ءَ تربیت دی ئے کہ “مگسی ءِ سر ءَ” وانگ ءُ دروگی مارشت ءَ گوں آدت بہ بیت کہ تو ھما چیز ءَ زانگ ءِ ھُنر ئے کہ تو ھما وھد ءَ لوٹ ئے۔ ترا گیشتر گھتریں زانت ءِ شوھاز ءَ ھچ وڑیں رپک ءُ ھُنر نیست۔ پرچا کہ اے سک کم ABAP پروگرامر انت کہ آیاں “/h” ءُ “F ءِ کمانڈز” ءَ چہ ابید ڈیبگر ٹول ءِ تہ ءَ زانت ءُ سرپدی ھست انت۔
آسر : من ءَ یکیں اِنت کہ منی وڑ ءُ ڈول ءِ کارمرز کنگ ءَ لھتیں تکنیکی کتاب ءِ آسر کنگ ءَ پد تو سک شریں سما کن ئے، تو لنکڈ ان ءَ گریجویشن ءِ چیز ءِ رد ءَ ایشی ءَ ایر کنگ ءِ ارزشت ءَ لیک ئے! تو مار اِت کن ئے کہ تو بس یک سکیں گرانیں مولے سرجم کن ئے۔ اے سک گران گندگ ءَ کیت بلے ما درست “ھچ درد، نہ پائدگ” ءِ نامداریں ھوالہ ءَ زانیں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-
اھوالکارانی سر ءَ بندش
ٹی بی پی شونگال
بلوچستان ءِ بنجاھی شھر شال ءِ پریس کلب ءَ انتزامیہ ءِ اجازت ءَ ابید سیمینارز ءُ کانپرنسز برجم دارگ ءَ بندش ءِ ھکم دیگ بیتگ – شال ءِ ڈپٹی کمشنر ءِ نیمگ ءَ یک ارزبندگے ءَ گوشگ بیتگ کہ اے گامگیج “امن ءُ امان ءِ انیگیں جاورھالانی پژدر ” ءَ چِست کنگ بیتگ – بلے ریاستی ادارھانی نیمگ ءَ پیش ءَ ھم پریس کلب درشانداب داتگ کہ آ پریس کلب ءِ نزیک ءُ گوراں لھتے پاٹیانی گپاں مہ کن اَنت ءُ پریس کلب ءِ دیم ءَ زھرشانی دارگ بہ بنت-
بلوچستان ءَ اھوالکاری اداراں ترندیں بندشانی دیمپانی اِنت، گوستگیں ماہ ءَ روتاک انتکاب ءُ آزادی ءِ ھالتاک بند کنگ بیتگ اَنت، آیاں بلوچانی جیڑہ ءِ سر ءَ اھوال دیگ ءَ ترندیں بیھارانی دیمپانی اِنت- بلوچستان ءِ گھگیری سیاست ءَ را کور کنگ ءِ پژدر ءَ اھوالکار اسمان کاکڑ ءِ ترسینگ ءِ ھاتر ءَ آئی ءِ لوگ ءِ سر ءَ پولیس ءَ بیڑ برتگ ءُ بارکھان ءَ سیکورٹی ءِ بے سوبی ءِ سر ءَ جست کنوکیں اھوالکار بیگواہ کنگ بیتگ- بلوچ گھگیری ءِ تاکتانی کوریج دیگ ءَ بازیں اھوالکار بیگواہ کنگ ءُ کُشگ بیتگ اَنت ءُ اھوالکاری ادارہ ریاستی زوراکی ءِ سبب ءَ ترندین مشکلانی دیمپان اَنت، چریشی ءَ آجوئی ءِ لیکہ بیگواہ بیتگ اَنت-
بلوچستان ءَ دو دھکانی وھد ءَ چِل ءُ دو اھوالکار کشگ بیتگ اَنت، پریس کلبانی بندشی بیتگ ءُ روتاک ءُ ھالتاک زورانسری بند کنگ بیتگ اَنت- میان اُستمانی اھوالکارانی رسد بلوچستان ءَ بندش بیتگ ءُ بازیں بلوچ اھوالکار بلوچستان ءِ چیرتریں جیڑھانی سر ءَ نبشتگ کنگ ءِ پژدر ءَ درانڈیھ بوگ ءَ لاچار بیتگ اَنت ءُ بلوچستان ءَ جاڑیگیں اھوالکاراں پوج ءُ چیریں ادارھانی ترسانی دیمپانی اِنت-
رپورٹرز ود آؤٹ بارڈرز ءَ شنگ بیتگیں ورلڈ پریس فریڈم انڈیکس ءَ پاکستان ءَ دو درجہ داری بیتگ ءُ 180 ڈیھاں چہ پاکستان 152 ءَ اتکگ – پریس فریڈم ایڈیکس ءَ گوشتگ پاکستان اھوالکارانی واستا دنیا ءِ توک ءَ بیمناکیں ڈیھاں چہ یکے – دوھزار ءُ بیست ءُ چار ءِ بنداتی شش ماھانی توک ءَ پاکستان ءَ ھشت اھوالکار کُشگ بیتگ اَنت ءُ اے بیرانیاں مزنیں سیاستدان ءُ ریاستی مزنیں اداری ھوار اَنت-
انپارمیشن ٹیکنالوجی ءِ وھد ءَ پریس کلباں یا میڈیا ھاؤسزاں زھرشانی لیکھانی شنگ کنگ ءَ ریاستی منگ نامہ ءِ ھکم ءَ چست بیتگیں توارانی گٹگیر ناممکن اِنت – ریاستی ادارھاں اے گیر سنچ داریں پیسلہ ءَ واتر زورگ لازمی اِنت ءُ شال پریس کلب ءُ بلوچستان ءِ روتاکانی لیکھی آجوئی آئینی ھک ءِ رد ءَ ھلک دیگ بہ بنت اِنت-
روکپتی بلوچستان ءِ دمگ ھاش ءَ ایرانی لس پوشاکی کارندھانی تیرگواری ءَ ٹپیگی ءِ جاوراں گرگ بیتگیں ورنایے آجو بیتگ-
گیشین اھوالانی رد ءَ سَے ھپتگ ءَ پیش ایرانی لشکر ءَ ھاش ءِ دمگ کلچات ءَ یک گاڑی یے سر ءَ تیرگواری کتگ کہ اود ءَ یک مردمے زدگ بیتگ ءُ پد آ لس پوشاکی لشکر ءَ گون وت برتگ-
گرگ ءُ یل بیتگیں مردم ءِ پجار بھزاد شاھوزئی ءِ نام ءَ زانگ بیتگ ءُ آ ھاش ءِ جھمنند اِنت-
اھوالانی رد ءَ بھزاد ءِ کھول ءَ یک میلیارد تومن داتگ ءُ چریشی ءَ پد زمانت ءِ سر ءَ یل کنگ بیتگ-
اھولانی رد ءَ بھزاد ءِ گاڑی ءِ سر ءَ ایرانی چیریں ادارھاں بے رھبندی ءَ تیرگواری کتگ ءُ چریشی ءَ بازین کساسے ءَ بھزاد ٹپیگ بیتگ ءُ بھزاد ٹپی ءِ جاوراں ھسپتال ءَ برگ بیتگ ءُ پد ءَ آ ھاش ءِ زندان ءَ برگ بیتگ-
گوستگیں روچ ءَ آ چہ زندان ءَ یک میلیارد بزانکہ یک اربے تومن ءِ دیگ ءَ پد زمانت ءِ سر ءَ یل بیتگ-
شال ءَ ناشناسیں مردماں تیرگواری کتگ پولیس کارمند ءَ کُشتگ-
گیشیں ھالانی رِد ءَ شال ءِ دمگ ارباب غلام علی دگ کلی دیبہ اللہ داد اسٹریٹ ءَ سلاہ بندیں مردماں تیرگواری کتگ انڈسٹریل تھانہ ءِ پٹ پول ونگ ءَ ساڑی ئیں سب انسپکٹر امان اللہ کشتگ ءُ تتکگ اَنت-
بنداتی ھالانی رِد ءَ ناشناسیں سلاہ بندیں مردماں بستگ ءُ سب انسپکٹر امان اللہ ءِ ودار ءَ نشتگ اَنت انچش امان اللہ وتی گاڑی ءِ ھمراھی ءَ اللہ داد اسٹریٹ ءِ نزیک ءَ سر بیتگ گُڑا سلاہ بندیں مردماں تیرگواری کتگ چریشی ءَ چہ سب انسپکٹر امان اللہ جاہ پہ جاھی مرتگ-
وئیل ءَ پد سلاہ بندیں مردم پرپٹ ءَ سوار بیتگ ءُ تچگ ءَ سوبمند بیتگ اَنت ، پولیس ءِ سیریس کرائم ونگ ھما دمان ءَ سر بیتگ وھدے کہ لاش سول نادُراھجاہ شال ءَ برتگ اَنت، اے درگت ءَ گیش پٹ پول کنگ بیگ ءَ اِنت-
ھمے وڑ بلوچستان ءِ دمگ پنجگور ءِ ھند چہ بالگتر ءَ یک ناشناسیں مردمے ءِ لاش دزکپتگ لیویز فورس پجّار کنگ ھاتر ءَ ٹیچنگ نادُراھجاہ ءَ برتگ-
نوشکی ءَ مل ھند سر ءَ سلاہ بندیں مردماں مڈی بروکیں ٹرکانی سر ءَ اُرش کتگ، یک ٹرکے مانداشتگ-
گیشیں ھالانی رِد ءَ نوشکی ءِ دمگ سرمل کلی گورگیج جدید نزیک ءَ بُنجاھی شھدگ سر ءَ ناشناسیں سلاہ بندیں مردماں سنگ مرمر بروکیں ٹرکانی سر ءَ تیرگواری کتگ ءُ یک ٹرکے مانداشتگ وھدے کہ دومی ٹرک ٹائر تیرگواری ءَ چہ تراکینتگ اَنت-
وئیل ءَ پد لیویز فورس وئیلجاہ ءَ شتگ، سلاہ بندیں مردم وئیل ءَ پد تتکگ اَنت، وئیل ءَ انگت ھچ وڑیں جانی تاوان ھال سر نہ بیتگ-
شال ءَ بلوچ یکجھتی کمیٹی ءُ دگہ پارٹیانی باسک ءُ راھشون پون کتگ اَنت کاؤنٹر ٹیررزم ءِ کارگس ءَ لوٹائینتگ اَنت-
بلوچ یکجھتی کمیٹی شال ءِ راھشون بیبگر بلوچ ءَ چاگردی رسانکدر ایکس ءَ نبشتہ کتگ گْوشتگ کہ کاؤنٹر ٹیررزم ڈپارنمنٹ بلوچ یکجھتی کمیٹی ءِ باسکاں ھوار دگہ بازیں گلانی باسک پون کتگ ءُ بیھار دیگ ءَ اِنت ءُ پجّار کارڈ دگہ کاگدانی ھمراھی ءَ سی ٹی ڈی کارگس پیش بیگ پرمان داتگ اَنت-
بیبگر بلوچ ءَ دیمتر ءَ گْوشتگ کہ مردماں پون کنگ کارگس لوٹگ ءِ مول مراد آیاں تُرسینگ اِنت چریشی ءَ ما سک ایر جن ایں، اگاں کسے ھم زورانسری بیگواہ کنگ بیت اشی ءِ زمہ واری سی ٹی ڈی ءُ ھکومت بلوچستان سر ءَ بیت-
زانگ بہ بیت کہ گوستگیں روچ ءَ بلوچستان اسمبلی ءَ بلوچ یکجھتی کمیٹی ءِ ھلاپ ءَ پیپلزپارٹی ءِ صوبائی وزیر علی مدد جتک ءَ کرار دار پیش کتگ گْوشتگ بی وائی سی بلوچستان ءَ سلاہ بندیں گلانی پشتی کنگ اِنت-
انچش بلوچ یکجھتی کمیٹی ءَ ھوار بلوچستان ءِ جتاجتائیں سیاسی ءُ چاگردی راھشوناں ھوار سے ھزار نزیک ءَ شھریانی نام پیسر ءَ چہ ھکومت ءُ چارمی شیڈول مان کتگ اَنت-
بلوچ لبریشن آرمی ءَ گوستگیں ھپتگ ءَ وتی اُرشانی سرجمیں ویڈیو شنگ کتگ ۔
بلوچ لبریشن آرمی ءَ گوستگیں ھپتگ ءَ بیتگیں آپریشن ھیروپ ءِ گیشن اھوالانی دیم ءَ آرگ ءَ ھژدہ منٹ ءِ تامر آفیشل چینل ھکل ءَ شنگ کتگ کہ ایشی ءِ تہ ءَ بیلہ ءَ ھوار بلوچستان ءِ جتاجتائیں دمگاں فدائین اُرشکارانی کسانیں کلوہ ھوار اَنت۔
اے 18 منٹ ءِ ویڈیو ءِ تہ ءَ گرافکس ءِ دروشم ءَ بلوچستان ءِ جتاجتائیں دمگاں اُرشانی جاگہ وسیلہ ءَ زانگ بوتگ اَنت ءُ بیلہ ءَ پاکستانی لشکر ءِ کیمپ ءِ سر ءَ اُرش ءَ ھواریں فدائینانی ھیلکاری ھم اے ویڈیو ءِ بھر اَنت۔
بیست ءُ پنچ ءُ بیست ءُ شش اگست ءِ میانی شپ ءَ سرجمیں بلوچستان ءَ بلوچ لبریشن آرمی ءَ آپریشن ھیروپ ءِ درچ ءَ کاروائیانی وھد ءَ بنجاھی شھدگاں سیزدہ ھنداں ناکہ بندی کنگ ءَ ھوار پولیس ءُ لیویز کارگس دستیگ کتگ اَنت ءُ پاکستانی پوج اُرشانی نشانگ کتگ بیتگ-
بلوچ لبریشن آرمی ءِ رد ءَ آپریشن ھیروپ بلوش سرڈگار ءِ دوبر دستیگ کنگ ءِ بنداتی بھرانک اِنت-
آپریشن ھیروپ ءِ درچ ءَ بنجاھی اُرش بلوچستان ءِ دمگ لسبیلہ ءِ ھند بیلہ ءَ پاکستانی پوج ءِ یک بنجاھی بنجلے ءِ ھیڈکوارٹر ءَ بلوچ لبریشن آرمی ءِ مجید بریگیڈ ءِ ھپت فدائیناں نشانگ کتگ ءُ بیست اداراں برجاہ بوھوکیں بیلہ ایف سی ھیڈکوارٹر ءَ جنگ ءُ چوپ برجاہ بیتگ اَنت-
بی ایل اے ءِ نیمگ ءَ شنگ کنگ بیتگیں اے تامر بند ءَ بیلہ ءِ کش ءُ گوراں جاڑیگیں بلوچ فدائین وتی کیمراھاں چہ پاکستانی پوج ءِ گون ءَ جنگ کنگ ءَ تامر گرگ ءَ گندگ بنت اِنت ءُ اے ھمے وھد ءَ وتی کھول ءُ سنگت ءُ بلوچ راج ءَ کلوہ دیگ ءَ اَنت-
بیلہ بنجل ءَ جنگ ءِ وھد ءَ مات ءَ کلوہ دیگ ءَ بلوچ لبریشن آرمی ءِ فدائی پزل گل زھری ءَ گوشتگ“ اے کاروان اسلم بلوچ ءِ ئیگ انت کہ آئی ءَ اَچ ما پیش وتی ورنائیں بچ ءِ دیمھونی داتگ ءُ شما ھم مھکم بہ بیت اَنت ءُ اے جنگ ءِ پلامرزی ءَ برجاہ بہ دار اِت ”-
پزل گل زھری ءَ ھمے وھد ءَ ریاست ءَ کلوہ دیان ءَ گوشتگ “ مارا کوھانی توک ءَ شوھاز ءِ درکاری نہ اِنت نی تو ودار بہ کن ما وت کائیں ءُ تئی مھکمین بنجلاں نشانگ کن ایں”-
تامر ءَ یک دگہ فدائین موند بلوچ ءَ مزن ھور ءُ پارس ءَ جاڑیگیں بلوچاں چہ اے راجی جنگ ءَ ھوار بوگ ءُ پاکستان ءِ زُلمانی ھلاپ ءَ راجی جنگ ءِ بھر بوگ ءِ دزبندی کتگ-
بیلہ بنجل ءَ ھوارین بلوچستان ءِ دمگ ھزدار زھری ءَ سیادی داروکہں فدائین جنید زھری ءَ ءَ وتی پت ءُ مات ءَ کلوہ دیان ءَ گوشتگ “ منی کربانی ءَ پد شما پریشان مہ بیت بلکیں منی شھیدی ءِ سر ءَ پھر ءُ شان بہ کن ات پرچاکہ ما وتی راجی وامداری ھلاس کتگ-
دیمتر ءَ آئی ءَ گوشتگ راجی پھریزگ ءَ امل ءُ جنگ ءِ درکاری انت ءُ چریشی ءَ پد یک سرجمین آجوئی ءِ اتک کنت اِنت-
بیلہ بنجل ءَ پاکستانی پوج ءِ ھیڈکوارٹر ءِ دروازگ ءَ ٹکر جنوکیں زالبولیں فدائین ماھل پنام ءِ زلان کرد ھم اے تامر بند ءِ بھر اِنت – کہ اود ءَ وتی کلوہ ءَ بلوچ راج ءُ گیشتر زالبولاں اے راجی جنگ ءَ ھوار بوگ ءُ وتی براتانی گون ءَ ھمکوپگی ءَ گوشگ اِنت-
ھمے وھد ءَ آ گوش ایت “ اے راہ ما کہ گچین کتگ اے راہ بلوچ لبریشن آرمی ءِ بنکی رھشون جنرل اسلم بلوچ ءُ کراچی ءُ تربت ءخ فدائین اُرشاں ھواریں شاری ءُ سمیعہ بلوچ ءِ گچین کتگیں راہ اِنت”-
بلوچ لبریشن آرمی ءِ آفیشل چینل ھکل ءَ شنگ بیتگیں اے تامر ءَ بیلہ بنجل ءِ دومی دروازگ ءَ گوں گاڑی ءَ ٹکر جنوکیں فدائیناں بنجل ءَ روگ ءَ راہ پچ کنوکیں فدائی رضوان بلوچ وتی کلوہ ءَ گوش ایت“ مارا وتی سرڈگار ءُ مات ءُ گوھارانی شرپ دوست انت ءُ ایشی ءِ پھریزگ ءَ توپک شست کنگ لازمی انت-”
ھژدہ منٹ ءَ اے تامر ءَ بلوچستان ءِ جتا جتائیں جاھاں ناکہ بندی ءِ وھد ءَ پاکستانء پوج ءِ سر ءَ اُرش ءُ سلاھانی دستیگ کنگ ءِ وھد ھوار اَنت-
زانگ بہ بیت بلوچ لبریشن آرمی ءَ آپریشن ھیروپ ءِ درچ ءَ بلوچستان ءِ جتا جتائیں جاھاں جنگ ءُ پوج ءِ سر ءَ اُرشاں یک سد ءُ سی پاکستانی پوج ءُ چیریں ادارھانی کوش ءِ زمہ واری من اتگ اَنت-
بلوچ لبریشن آرمی ءَ وتی درشان ءَ گوشتگ آپریشن ھیروپ بلوچ سرڈگار ءَ دوبر پچگرگ ءُ بلوچانی دست ءَ دیگ ءِ بنداتی بھر انت ءُ گل ءَ گوشتگ آیوکیں اُرش گیش ترند بیت اِنت-
روکپتی بلوچستان ءِ جتا جتائیں جاھاں پیش اتکگیں وئیلاں دو مردم بیران بیتگ اَنت-
گیشین اھوالانی رد ءَ روکپتی بلوچستان ءِ ھاش ءَ ناشناسیں مردماں یک مردمے کشتگ –
وئیل ھاش ءِ ھند مھمد آباد ءَ ناشناسیں مردماں تیرگواری کتگ ءُ یک ورنایے کشتگ-
کشگ بیتگیں مردم ءِ پجار علی کورانی سنجرانی ء پیربکش جھمنند بکش دامن ایرانشھر ءِ نام ءَ زانگ بیتگ-
اھوالانی رد ءَ مھمد آباد ءَ امام ھمینی جاہ ءَ ناشناساں علی گپتگ ءُ پد ءَ تیرگواری کتگ ءُ کشتگ- وئیل ءِ بارو ءَ دگہ گیشیں اھوال زانگ نہ بیتگ اَنت-
دگہ یک وئیلے بنجاھی شھر زاھدان ءَ پیش اتکگ کہ اود ءَ ناشناسیں مردماں یک مردمے کارچ جتگ ءُ کشتگ-
کشگ بیتگیں مردم ءِ پجار ھدابکش رخشانی ء ھبیب جھممند زاھدان ءِ نام ءَ زانگ بیتگ-
