TBP Balochi

ڈیرہ بگٹی ءَ ھمے سال ءِ ھشت ستمبر ءَ سلاہ بندیں مردمانی دست ءَ آوار جنگ بیتگیں فٹبالرانی توک ءَ دویں ھم یل بیتگ اَنت-

لیویز ءِ رد ءَ ھردوکیں فٹبالر یل بیتگ ءُ وتی لوگاں سر بیتگ اَنت- لیویز بنشون ءِ رد ءَ بابر ءُ شیراز ءِ کھولاں یل بوگ ءِ ھال راست کتگ-

زانگ بہ بیت شش آوار جنگ بیتگیں فٹبالرانی آوار جنگ ءِ زمہ واری بلوچ لبریشن ٹائیگر ءَ زرتگ ات ءُ گوشتگ ات کہ ھشت ستمبر ءَ ڈیرہ بگٹی ءِ دمگ سوئی ءَ دزگیر کتگیں چار مردم پٹ ءُ پول ءَ پد یل کتگ اَنت-

جارکش ءِ رد ءَ گپتگیں چار مردماں توک ءَ چوشیں ھچ منانک دز نہ کپتگ کہ آ کُشگ بہ بنت –

میران بلوچ ءَ دیمتر ءَ گوشتگ ات کہ ایشی ءَ ابید دمگ ءِ سروکاں ایشانی مانزمانی ءِ زرتگ ءُ دگہ بر ریاستی مشینری ءِ بھر نہ بنت اِنت-

بلوچ ریپبلکن گارڈز ءِ جارکش دوستین بلوچ ءَ وتی شنگ کتگیں درشان ءَ گوشتگ کہ چہ سوئی ءَ دیم پہ کراچی ءَ روکیں سِی ءُ شش انچی گیس پائپ لائن ءِ تراکینگ ءِ زمہ واری ءَ من ایں –

بی آر جی ءِ جارکش ءِ رد ءَ گوستگیں شپ ءَ سندھ ءِ دمگ خیرپور ءَ چہ سوئی ءَ دیم پہ کراچی ءَ روکیں سِی ءُ شش انچی گیس پائپ لائن بی آر جی ءِ سرمچاراں تراکناکیں شورواں گوں تباہ کتگ-

جارکش دوستین بلوچ ءَ گوشتگ کہ مئے اے دابیں اُرش بلوچستان ءِ آجوئی ءَ داں برجاہ بنت اِنت-

پنجاب ءَ بلوچ نودربرانی زورانسری بیگواھی

ٹی بی پی شونگال

بلوچستان ءَ چُشیں یک روچے ھم نہ گوز ایت کہ اود ءِ کجام چہ شھر ءُ میتگاں زورانسری بیگواھیانی ھال دیم ءَ نیاینت ءُ زورانسری بیگواھیانی تہ ءَ درستاں گیشتر ورناہ، سیاسی باسک، نودربر نشانگ کنگ بنت۔بلوچستان ءَ برجاھیں جنگ ءِ زور ءِ تہ ءَ گیشی ءَ پد بلوچ مات ءُ پِتاں وتی چُک مزنیں کچے ءَ اسلام آباد ءُ پنجاب ءِ وانگجاھاں پہ وانگ ءُ زانگ ءَ دیم داتگ اَنت دانکہ آ چہ زورانسری بیگواھیاں بہ رک اَنت بلے گوستگیں دو سالانی تہ ءَ اسلام آباد ءُ پنجاب ءَ بلوچ نودربرانی زورانسری بیگواھیانی تہ ءَ گیشی اَتکگ۔

بلوچستان ءَ مردمی اگبالانی گل ءُ رسانکدرانی نہ بوگ ءِ سوب ءَ پاکستانی واکدار چہ زورانسری بیگواھیاں انکاری اَنت ءُ پاکستان ءِ سرپانکیں مَزن وزیر ءِ گُشگ اِنت کہ تھنا پنجاہ مردم زورانسری بیگواہ اَنت بلے پنجاب ءَ بلوچ نودربراں چہ چہ آیانی شھدربرجاھانی تہ ءَ بیگواہ کنگ بئیگ ءَ اَنت کہ ایشانی منانک ھم ھست اَنت، زاناں آ انگت ھم زورانسری بیگواھیانی سنگینیں جیڑہ ءِ راستی ءَ انکاری بیت؟

پنجاب ءَ بلوچ نودربرانی زورانسری بیگواھی ءُ نسلی پروفائلنگ ءِ سر ءَ “پاکستان ہیومن رائٹس کمیشن ءَ لاھور ءِ شھدربرجاھانی تہ ءَ پاکستانی کانود برجاہ داروکیں ادارگانی بلوچ ءُ پشتون نودربراں ترسینگ ءُ دو نودربرانی زورانسری بیگواھیانی پد ءَ جھلانکیں تُرس ءُ بیمے درشان کنان ءَ گشتگ کہ بلوچستان ءُ پختونخوا ءِ نودربر ھاسیں پئیم ءَ پنجاب ءَ نہ رکیتگ اَنت۔ نودربرانی نسلی پروفائلنگ ءِ آماچ کنگ ءِ اے دود ھلاس کنگ بہ بیت۔ درستیں نودربراں یکیں پئیم ءَ ترسینگ ءُ زورانسری بیگواھی ءِ آماچ بئیگ ءِ ترس ءَ ابید وتی وانگ ءِ برجاہ دارگ ءِ پرمان بہ بیت۔”

پنجاب شھدربرجاہ لاھور ءِ نودربر فرید بلوچ چہ شھدربرجاہ ءِ کمپان ءَ زورانسری بیگواہ کنگ ءِ سر ءَ ترندیں لس پدگرد ءَ پد آ پولیس ءِ دست ءَ دیگ بیتگ ءُ آئی ءِ سر ءَ منشیات ءِ دروگیں کیس لڈگ بیتگ ءُ آئی ءِ دزگیری پدر کنگ بیتگ بلے ایرڈ شھدربرجاہ راولپنڈی ءِ نودربر فیروز بلوچ ءِ زورانسری بیگواھی ءَ یک سالے گوزگ ءُ اسلام آباد مزن آمید گِس ءِ پرمان ءَ پد ھم آ دیم ءَ آرگ نہ بیتگ۔

چہ تربت ءَ چار نودربر بیگواہ اَنت ءُ بلوچستان شھدربرجاہ ءِ دو سالاں چہ بیگواھیں سھیل ءُ فصیح بلوچ ءِ دیم ءَ نیارگ ءِ بگیری ءَ شال ءَ زھرشانی کنگ بئیگ ءَ اِنت۔ بلوچستان ءَ نودربر گیر پھازگی ءِ آماچ اَنت ءُ پاکستان ءِ واکدار زورانسریانی ھلاس کنگ ءَ ابید اے سنگین ءِ جیڑہ ءِ منگ ءَ چہ انکاری اَنت۔ اے جاورانی تہ ءَ جھانی مردمی اگبالانی گلانی زمہ واری گیشتر ود ایت کہ بلوچستان ءِ سنگینیں جیڑہ ءَ گیوار کنگ ءَ پہ وتی کِرد ءَ پیلو بہ کن اَنت۔

اسرائیل ءِ سروزیر بنیامین نیتن یاھو ءَ گوشتگ غزہ ءَ زمینی لشکر ءِ دیم دیگ ءَ پد حماس ءِ ھلاپ ءَ جنگ گامے ءَ کنز اتگ –

ھال سر کنوکیں ادارہ ایسوسی ایٹڈ پریس ءِ رد ءَ شمبے ءِ روچ ءَ پریس کانفرنس کنان ءَ نیتن یاھو ءَ گوشتگ اے ڈیھ ءِ رکینگ ءِ جنگ اِنت ءُ غزہ ءِ گرگ ءَ پیسر اُرشانی توک ءَ ترندی کیت اِنت-

آئی ءَ گوشتگ کہ راج ءِ دیم ءَ دو ھنچیں وھد کاینت کہ کنگ یا مِرگ – ما ھم اے دابیں چکاساں گوستگ اِنت ءُ من ءَ گمان اِنت اے ھلاس بیت اِنت ءُ ما ھم پاتہ بہ ایں ءُ ھم کن این ءُ ما ھم پاتہ بہ ایں-

گوستگیں بمب گواری ءَ غزہ ءِ شھریاں جنگ باز ترسناک گوشتگ ءُ چریشی ءَ چہ ھالرسانی ھم بند بیتگ اَنے ءُ اود ءَ پس اتگیں بیست ءُ سَے لک مردماں گوں جھان ءِ دگہ مردماں رھوت ھلاس بیتگ –

نیتن یاھو ءَ گوشتگ درسیں آوار جتگیں مردماں واتر آرگ ءَ پرکار اِنت ءُ اے مشن ءِ سرجم بوگ ءَ زمینی کاروائی کمکار بیت کُت کنت اِنت-

آئی ءَ گوشتگ جیڑہ ءِ سرجم ءَ گچین بوگ ءُ دراھیں جھدانی بارو ءَ دگہ گپاں دیم ءَ آورت نہ کنت اِنت-

اے جنگ ءِ دومی گام اِنت ءُ ایشی ءِ مکسد تچک اظنت حماس ءِ لشکری ءُ سرکاری زوراں ھلاس کنگ اِنت ءُ سرجمیں آوار جتگیناں واتر آرگ اِنت-

اسرائیل ءِ لشکر ءِ نیمگ ءَ شنگ کتگیں تامر ءَ گندگ بیت اِنت غزہ ءِ سیمسر ءَ ٹینک پترگ ءَ گندگ بنت اِنت –

زانگ بہ بیت پوج ءَ حماس ءِ سرنگ ءُ گارانی سر ءَ برزی اُرش کنگ ءِ ٹاہ ھم داتگ ءُ اسرائیل ءِ واستا ات جنگ زمین ءِ چیر ءَ نشانگ کنگ باز گچینی اِنت ءُ ایشی ءِ نشانگ کنگ ءَ حماس ءِ ھلاسی ءَ جیڑگ اِنت-

پریس کانفرس ءَ نیتن یاھو ءَ جنگ ءِ بارو ءُ دگہ گپ دیم ءَ نیاورتگ اَنت ءُ بلے آئی ءَ وتی تران یھودی راجدپتر ءُ لشکری جیڑہ ءِ درور دیان ءَ ٹک ءُ نشانیں بنگپ زانگ بیت اِنت کہ اسرائیل ءِ لشکر آیوکیں دشمن لشکر ءِ ھلاپ ءَ سوبمندی ءِ واک ءَ دار ایت-

دومی نیمگ ءَ غزہ ءِ وزارت سھت ءِ رد ءَ شمبے ءِ روچ ءَ فلسطین ءَ بیران بیتگیں مردمانی کچ ھپت ھزار ءُ ھپت سد ءَ گیش گوشگ بیتگ اَنت ءُ کہ ایشانی توک ءَ گیشتری بھر زھگ ءُ زالبولانی ئیگ اِنت-

بلوچستان ءَ وت کُشی کنگ ءِ درچ برجاہ انت – گوستگیں روچ ءَ بلوچستان ءِ تیاب دپی دمگ پسنی ءَ چہ ھال آیگ انت کہ کہ یک پانزدہ سالی جنکے ءَ وتی سر ءَ ٹیل پِر ریتکگ ءُ وتکشی کُتگ –

دمگی ھالتاکانی رِد ءَ آس لگگ ءَ جنکو سرجمی ءَ سُتکگ کہ آئی ءِ کھول ءِ ھما دمان ءَ نادراھجاہ ءَ سر کتگ –

بلے سرجمی ءَ سُچگ ءِ سوب ءَ آئی ءَ رک اِت نہ کتگ ءُ بیران بوتگ – بلے تنی وھدی آئی ءِ وتکشی کنگ ءِ سوب زانگ نہ بوتگ کہ کجام سوب ءَ وتکشی کُتگ ئے –

زانگ بہ بیت سرجمیں بلوچستان ءَ ھمک روچ وتکشی کنگ ءِ ھال آیگ ءَ انت –

ھمے سال ءِ ستمبر ءُ اکتوبر ءِ ماہ ءَ چاردہ وتکشی ءِ ھال اتکگ انت

چدوپیسر دی بلوچستان پوسٹ پتر ءَ گوادر، خضدار، آواران، حب چوکی ءُ سبی، مستونگ ءُ دالبندین ءَ ھم وتکشی کنگ ءَ ھال سر بوتگ انت –

ماں بھارت ءَ برجاھیں آئی سی سی کرکٹ ورلڈ کپ ءِ بیست ءُ ھپتمی ءُ بیست ھشتمی گوازی نیدر لینڈ ءُ بنگلہ دیش، آسٹریلیا ءُ نیوز لینڈ ءِ میان ءَ کنگ بوتگ انت کہ نیدر لینڈ ءَ بنگلہ دیش ءِ دیم ءَ ھشتاد ءُ ھپت ءُ آسٹریلیا ءَ نیوز لینڈ ءِ دیم ءَ پنچ رناں گوں وتی گوازی کٹ اِتگ انت –

ایچ پی سی اے کرکٹ پٹ ءَ آسٹریلیا ءُ نیوز لینڈ ءِ میان ءَ بوتگیں گوازی ءَ نیوزلینڈ ءَ ٹاس کٹ اِتگ ءُ اولسر ءَ بالنگ کنگ ءِ شور کتگ – آسٹریلیا ءَ اولسر ءَ بیٹنگ کنان ءَ نیوز لینڈ ءِ دیم ءَ چِل ءُ نُھمی اوور ءِ دومی بال ءَ سَے سد ءُ ھشتاد ءُ ھشت رن جوڑ کُتگ ءُ دراہ آؤٹ بوتگ انت – پہ ٹارگٹ ءِ پروشگ ءِ ھاتر ءَ نیوزلینڈ ءِ لیبی سوبمند نہ بوتگ انت – نیوز لینڈ ءَ پنجاہ اوورانی تہ ءَ نُھ وکٹانی تاوان ءَ بس سَے سد ءُ ھشتاد ءُ سَے رن جوڑ کتگ انت ءُ گوازی برگ ءَ بے سوب بوتگ –

گوستگیں روچ ءَ بوتگیں دومی گوازی نیدر لینڈ ءُ بنگلہ دیش ءِ میان ءَ بوتگ کہ نیدر لینڈ ءَ ٹاس کٹ اِتگ ءُ اولسر بیٹنگ کتگ – نیدرلینڈ ءِ نیمگ ءَ پنجاہ اوورانی تہ ءَ دوسد ءُ بیست ءُ نُھ رنانی ٹارگٹ ایر کنگ بوتگ کہ بنگلہ دیش ءَ ٹارگٹ پروشت نہ کتگ – بنگلہ دیش ءِ لیبی چُل ءُ دومی اوور ءَ دراہ آؤٹ بوتگ انت ءُ آیاں بس یکسد ءُ چل ءُ دو رن جوڑ کتگ بوتگ – ھمے وڈ نیدر لینڈ ءَ چہ بنگلہ دیش ءِ دیم ءَ اے گوازی گوں ھشتاد ھپت رناں کٹ اِتگ –

بلوچستان ءِ جتاجتائیں دمگ ھاران ، کلات ءُ سندھ ءَ ناشناسںیں سلاہ بندیں مردماں گیس پائپ لائن ، پولیس ءُ گیس شوھاز کنوکانی نندانکجاھانی سر ءَ اُرش کتگ-

بلوچستان ءِ دمگ ھاران ءَ پولیس ءِ گشتی ٹولی ءِ سر ءَ اُرش کتگ ءُ تتکگ اَنت-

گیشیں ھالانی رِد ءَ مگرب ءِ وھد ءَ ھاران شھر ءَ جنگل دگ سر ءَ پرپٹ ءَ سوار گشت کنوکیں پولیس کارندھانی سر ءَ سلاہ بندیں مردماں تیرگواری کتگ ءُ چریشی ءِ آسر ءَ ھولدار سعید احمد سک ٹپی بیتگ-

سول نادُراھجاہ ءَ ڈاکٹرانی کمی ءُ دگہ آسراتیانی نہ بوگ ءِ سوب ءَ ٹپی ئیں پولیس کارندہ دوا درمان کنگ ءِ ھاتر ءَ ایف سی نادُراھجاہ ءَ برگ بیتگ وھدے کہ وئیل ءِ ھال سر بوگ ءَ پولیس ءُ دگہ کانود برجم داروکیں ادارھاں دمگ انگر ءَ کتگ ءُ ناشناسیں میاربارانی شوھازگ بندات کتگ-

وئیل سبب تنی وھدے زانگ نہ بیتگ-

اِھوالکارانی رِد ءَ سلاہ بندیں مردماں تیرگواری ءَ چہ پولیس کارندہ ءِ سر ءَ تیر لگّ اِتگ وھدے کہ ٹپی پولیس کارندھاں نزیکیں سیاداں سول نادُراھجاہ ھاران ءَ ڈاکٹر ءُ دگہ آسراتی ء کمی ءِ بگیری ءَ زھرشانی کتگ-

ھمے وڑ کلات ءَ سلاہ بندیں مردماں گیس شوھاز کنوکیں شرکت ءِ کارندھانی سر ءَ اُرش کتگ-

گیشیں ھالانی رِد ءَ بلوچستان ءِ دمگ کلات ءِ تھسیل منگچر ءَ تیل ءُ گیس شوھاز کنوکیں شرکت ءِ دری کارندہ اُرش ءِ نشانگ کتگ اَنت-

دمگی اِھوالکارانی رِد ءَ سلاہ بندیں مردماں نندگجاھی کمرھانی سر ءَ تیرگواری ءُ دستی بمب چگل داتگ ءُ گوں تُرندی ءَ ترکّ اِتگ اَنت-

اُرش ءَ پد پاکستانی پوج ءَ دمگ ءَ سر بیتگ اَنت بلے تنی وھدے ھچ وڑیں جانی تاوانانی ھال سر نہ بیتگ اَنت-

دومی نیمگ ءَ سندھ ءِ دمگ خیرپور ءَ گیس پائپ لائن گوں تراکناکیں شورواں تباہ کتگ-

گیشیں ھالانی رِد ءَ سندھ ءِ دمگ خیرپور ءِ دمگ ھالانی ءَ ناشناسیں مردماں بلوچستان ءِ دمگ سوئی ءَ چہ سندھ ءَ رؤکیں گیس پائپ لائن تراکناکیں شورو پٹ کتگ ءُ تراکینتگ-

تراک ءَ پد گیس پُجّارینگ مھتل بیتگ-

زانگ بہ بیت اشی ءَ ساری گیس پائپ لائن ءُ گیس شوھاز کنوکیں ءُ پولیس کارندھانی سر ءَ بیتگیں اُرشانی زمہ واری گیشتر بلوچ آجوئی لوٹوکیں سلاہ بندیں گلاں منّ اِتگ اَنت بلے اے اُرشانی زمہ واری انگت ھچ گل ءَ نہ زرتگ اَنت-

امریکہ ءِ پولیس ءِ رِد ءَ گوستگیں روچاں بیست دو مردمانی کوش ءَ ھواریں کُشندہ ءِ جون دست کپتگ –

امریکہ ءِ استان میئن ءَ بیست ءُ دو مردمانی کُشندہ ءِ جون دو روچاں پد دست کپتگ – درملکی ھالتاکیں ادارہ ءِ رد ءَ دو روچ ساری میئن ءَ تیرگواری ءَ بیست ءُ دو مردم بیران بوتگ انت –

امریکی واکدارانی رِد ءَ جون ءِ چارگ ءَ پد ھمے لگ ایت کہ کتکار ءَ وتی سر ءَ وت تیر ءِ جتگ ءُ وتکشی کُتگ، کتکاریں رابرٹ کارڈ گوست ءَ پوجی ءِ بوتگ کہ آ چہ کار ءَ در کنگ بوتگ –

زانگ بہ بیت چار شمبے ءِ شپ ءَ امریکہ ءِ استان مین ءِ شھر لیوسٹن ءَ تیرگواری ءَ وئیل ءَ کم چہ کم بیست ءُ دو مردم بیران ءُ بازین ءِ زدگ بوتگ انت – چریشی ءَ پد پولیس ءِ رِد ءَ آیاں سلاہ بند ءِ شوھاز بندات کتگ کہ آئی ءِ پجار چِل سالی رابرٹ کارڈ ءِ نام ءَ زانگ بوتگ –

گوستگیں شپ ءَ امریکہ ءِ پولیس ءَ پریس کانفرنس کنان ءَ گوں اھوالکاراں تران کنان ءَ گوشتگ کہ بیست ءُ دو مردمانی کوش ءَ ھواریں رابرٹ کارڈ ءِ جون یک گِسے ءِ تہ ءَ دست کپتگ ءُ ھمے گمان کنگ بیت کہ آئی ءَ وتکشی کتگ ـ پولیس اے درگت ءَ گیشیں پٹ ءُ پول کنگ ءَ انت –

نوشکی ءِ شھر ءَ بس ءِ اڈہ ءَ ناشناسیں مردماں تیرگواری کنان ءَ یک مردمے کُشتگ-

گیشیں اھوالانی رد ءَ نوشکی ءَ بس ءِ اڈہ ءَ ناشناسیں مردمانی تیرگواری ءَ بشیر احمد ساسولی نامیں مردمے بیران بیتگ-

دمگی انتزامیہ ءَ لاش چست کتگ ءُ ھسپتال ءَ رسینتگ ءُ گیشیں پٹ ءُ پول کنگ ءَ اِنت-

زانگ بہ بیت بلوچستان ءَ یکشل ءَ اے دابیں وئیل پیش کاینت ءُ آ جتا جتائیں رنگ ءُ دروشماں کُشگ بنت اِنت مروچی بیتگیں وئیل ءِ درگت ءَ دگہ اھوال سر نہ بیتگ اَنت-

سر بیتگیں ھالانی رد ءَ روکپتی بلوچستان ءِ جتا جتائیں جاھاں تیرگواری ءُ دگ ءِ وئیلاں سَے مردم بیران بیتگ اَنت ءُ یک گاڑی ءَ آس کپتگ ءُ ستکگ-

روکپتی بلوچستان ءِ بنجاھی شھر زاھدان ءِ ھند نصرت آباد ءَ دگ ءِ وئیلے ءَ گاڑی یے کپتگ ءُ گاڑی ستکگ ءُ گاڑی ءَ سواریں دو مردم بیران بیتگ اَنت-

اھوالانی رد ءَ گاڑی ءَ تیل مان بیتگ ءُ گاڑی چَپ بیتگ ءُ چریشی ءَ دو مردم بیران بیتگ اَنت، بیران بیتگیں مردمانی پجار زانگ نہ بیتگ اَنت-

ھمے وڑ ءَ ایرانشھر ءَ تیل ءِ یک ڈپوے ءَ آس کپتگ ءُ اود ءَ جاڑیگیں تیل کشیں گاڑی یے ستکگ بلے دگہ جانی تاوان نہ بیتگ اَنت-

ھمے وڑ ءَ سراوان ءَ ناشناسیں مردماں تیرگواری کتگ ءُ یک ورنایے کُشتگ-

کُشگ بیتگیں ورنا ءِ پجار زاھد ارباب پور ء مراد بخش جھمنند کلپورگان سراوان ءِ نام ءَ زانگ بیتگ-

وئیل پشمبے ءِ روچ ءَ پیش اتکگ کہ ناشناساں تیرگواری کتگ ءُ ورنا زدگ کتگ ءُ ھسپتال ءَ آئی ءَ مروچی وتی ساہ داتگ اَنتٹ