TBP Balochi

گوادر شھر ءَ ٹٹ ءَ کنگ

ٹی بی پی شونگال

چین پاکستان رھگوزی ءِ سر تاج گوشگ بیوکیں شھر گوادر ءِ شھری ترس ءُ لاچاری جاورھالانی دیمپانی ءِ آماچ اَنت- بلوچ سلاہ بندانی اُرشانی رکگ ءِ ھاتر ءَ چین ءِ سرکار ءِ گوشگ ءِ پد ءَ پاکستان ءِ واکداراں گوادر شھر ءِ کَش ءُ گوراں ٹٹ ءَ کنگ ءِ پیسلہ کتگ- سَے سال ءَ پیسر ھم ٹٹ ءَ کنگ ءِ کار بندات بیتگ بلے مھلوک ءِ ترندی ءَ پد گوادر ءَ ٹٹ ءَ کنگ ءِ کار یل دیگ بیتگ- گوستگیں روچاں پد ءَ دوبر ٹٹ ءِ کار بندات بیتگ-

گوادر شھر ءَ ٹٹ ءَ کنگ ءَ شھر ءِ جھمنند بندیگ کنگ بنت ءُ ھواریں دگہ سَے دمگ پسنی، جیونی، اورماڑہ ءُ شھر ءِ دومی جاہ سربندن، پلیری، چب کلمتی چہ بنجاہ ءَ سِد انت ءُ آیاں گوادر ءِ شھر ءَ پُترگ ءَ ترندیں پھزداری ءَ گوزگ کپ ایت-

گوادر پیسر ءَ جیڑھانی دیمپان اِنت، ھوراں ترندی ءَ سانمند بیتگ بلے بلوچستان ءِ سرکار ءَ دو ماھانی گوزگ ءَ پد ھم ھور ءِ آپانی کشگ سرجمی نہ کتگ ءُ ٹرالنگ ءِ ھلاپ ءَ دریاوردانی زھرشانی یکشل ءَ برجاہ اَنت – ترندیں پھزداری ءِ سبب ءَ گوادر شھر پیسر ءَ مشکلانی دیمپان اِنت ءُ پھزداری ءِ نام ءَ مردمانی کمشرپی ءُ ننگ ءُ ناموس ءِ پادمال کنگ ءِ ھلاپ ءَ پیسر ءَ زرمبشت برجم بیتگ اَنت-

بلوچستان ءِ لُٹ ءُ پلپھانچی شوربندیانی دارگ ءِ واستا دو دھکاں گھگیری برجاہ اِنت ءُ چین ءِ لوٹانی پھزداری ءِ واستا گوادر شھر ءَ ٹٹ ءَ کنگ بیت گڑا ایشی ءَ ھچ شک نیست کہ آئی ءِ ھلاپ ءَ بلوچ مھلوک ءِ ترندیں گھگیری ءِ راہ گچین کنگ بیت اِنت-

پچیں نمدی یے پہ وتی دیدگیں ٹاپُل ءَ

نبشتہ کار: ماہ تاپ بلوچ

دی بلوچستان پوسٹ

ٹاپُل جان من نزانیں اے رواج چہ کُجا ِبندات بوت ءَ چے پیم انت نمدی یے کہ پچیں بلے اے شوکیں چیز ئے کُجا نہ کُجا کسے نہ کسے جاگھے ءَ کوھے ءِ دیما نیٹ ورک ءَ بیت ءُ ایشی ءَ وانیت ءُ پد ءَ گوں تو دپ کپ ایت ترا ھال دنت کہ کسے ءَ پتو نمدی یے نبشتہ کتگ ھئیر زمانگ ءِ کاگدانی مھراں باریں جاگہ دات کنت یا نہ بلے دیریں جیڑ اِتگ کہ ترا گیر بیاراں، پتو زھیر بوتگ ات، بے کساس زھیر، پہ تئی رواجاں پہ تئی سستگیں چوٹ آں، پہ تئی ٹھکاں ، پہ تئی زایاں ھاھاھاھا جیڑ اتگ ات کہ دمانے ءَ گوں تو گپ بکن آں ٹھک بدیاں تئی کِرا چہ لھتیں زاہ دُژمان بواراں بلے اِمروز انت زندگی انت بلوچستان انت جنگ انت، نوں ما باریں کُجا ءُ چوں دپ کپ آں برے برے پد ءَ ترا انچیں سنگت گوں وت زاہ دیگ ءِ آسرا نہ کن ئے ءُ ما ترا زاھے ھم دات نہ کن ایں ٹاپُل جان زی من ڈگار ءِ سرا شتوں چنچو ابیتک ات زناں ترا دیریں کہ تو نیاتکگے ، دمانے ءَ من جیڑ ات کھور ءَ گپ بزانتیں من جُست کُتگ ات ” آ ڈے تو چو گریوگی ئے ٹاپووو زناں انگت واتر نیاتک ءَ ” ٹاپوو کھور اسل ءَ گریوگ ءَ ات مُلا قاسو ءِ وڑیں مردمے کھور ءِ چیرا بہ نند ایت پد ءَ پاد بئیت ءُ بِھ واتر مہ کنت بائدیں کھور بہ مُرتیں بلے اسل ءَ اے کھور زانت کہ اے منی ساھگ ءِ مھر اِنت قاسو واتر کئیت پد ءَ منی ساھگ ءَ نند ایت ٹھک دنت ءُ زمین ءِ کسھاں کار ایت بلے کھور اگاں نہ مُرتگ ات بلے واجو بائدیں بہ مُرتیں بے قاسوو ءَ آ کِشک راھبندانی گوزگ چنچو ازیت کنت اے گپ ءَ واجو زانت بلے واجو ھم چو مئے وڑ ےَ وجودیت پرستے شاعر تبئیں مردمے اے کِشکانی سر ءَ وتی رپتگیں ھمبل ءَ آں گند ایت گوں آھاں گپ کنت ھبر کنت کسہ کنت اڑے پھل کن مردم کہ دپتراں پچ کنت انچو رواں بیت گپ دور روت اسل ءَ ٹاپُل اے ساھت ءَ کہ من نبشتہ کنگ ءَ اوں شپ ءِ دوزدہ بج انت من نزانیں تو کُجایے چی کنگ ءَ ئے بلے منی دل گُش ایت کہ تو سَپر ءَ ئے پرچا کہ تو مُدامی سَپر ءَ ئے ٹاپل اسل ءَ اے ساھت ءَ من پورا ترا گندگ ءَ اوں لاگ سامان ءَ باریں ساری ءَ ایں کُروو رند ءَ پشت کپانیں تو لاگ ءِ کش ءَ گون ئے دیم پہ زربار ءِ بند ءَ رؤگ ءَ ئے ” اِناں من بے ھیالاں لاگ تو پلانی ءِ کاپر ءَ بست ءَ ءُ پلانی ءِ اِسپُست ءَ پہ لاگانی ھاترا دُزی ءَ ئے اڑے ٹاپُل جان اے ڈرون ءُ جاسوس ءُ جھازانی زمانگ ءَ ھرکس سپرے ءَ در کئیت ھرچی جلدی بیت وتی جند ءَ چہ شھر ءُ ڈگاراں کش ایت، تو کیمپ ءَ نزیک ءَ پہ لاگ آں اِس پُست دُزی کن ئے چوشیں بے متلب ایں مھر منی ٹاپُل جان ترا یادیں کہ گُڈی رندا کہ ما دپ کپت آں تو لھتیں گِلگ کُتگ ات
تو گُشگ ءَ ات ئے کہ ماہ تاپ تو مرچاں پیش ءِ مردم نہ ئے تئی دیوان وش نیاں انچو سما بیت ما ترا زور نندارینت ءَ تئی دل مئے کِرا نندگ نہ لوٹ ایت! اے گِلگ منی دل ءَ رُستگ آں-

ٹاپُل اسل کسہ ایش اِنت کہ کار باز اَنت جیڑہ باز اَنت آ زمانگ ءَ کہ من تو نشتگ آں من شعر ونت ءَ وتی آشکانی کسہ آؤرتگ انت ءُ تو وتی جنگانی کسہ، کوھانی تہ ءَ سپر ءِ کسہ ابیتکیانی کسہ وشیانی کسہ اے یازدہ دوازدہ سال چون گوستگ انت تئی کسہ ھلاس نبوتگ انت ءُ مئے جُست. بلے منی ٹاپُل جان زمہ داری مردم ءَ چہ انسانی ءِ کٹ ءَ چہ گوازینیت نوں من ھم بڈ ءُ بار اوں ءُ تو ھم بڈ ءُ بار ئے اِدا کارے برابر کن اودا کارے برابر کن برے جاگایے شپ جاہ ءُ روچ جاھیں مردم، نوں کہ ما ننداں بس مئے جون دیم پہ دیم آں مئے جند باریں کُجا گاریں-

بلے ھئیر اے رندی کہ تو دپ کپے من وت ءَ شوھاز کن آں مئے دیوان سرجم بیت تئی دراھیں کسھاں گوشداراں ٹاپووو جان اے نمدی باریں ترا کُجا سر بیت تو گوں وتی لاگ ءَ زرباری بند ءَ سپر ءَ بہ ئے نوکیں اوتاکے ءَ تئی سر کپ ایت اودا نوکیں سنگتے اتک ءَ ، آ ھر روچ نیٹورک ءَ روت وتی مات ءَ را ھال دنت کہ من میڈیسن لیبارٹریے ءَ کار ءَ اوں اِدا مارا موبائل کار مرز کنئگ نئیل انت من روچے یک برے ترا وت فون کن ایں ءُ تئی ھال ءَ گریں ھمے بچک نیٹورک ءَ چہ کئیت یکے ھالے دنت کہ مئے اوتاک ءَ میجر ٹاپُل اتک ءَ اے سنگت ترا نزانت بلے دمانے ءَ پیسر نیٹورک ءَ ھمے نمدی یے ونتگ ترا ھال دنت کہ پتو ماہ تاپ نامیں مردمے ءَ نمدی یے نبشتہ کُتگ-

ٹاپُل جان دگہ ھئیر اِنت ما جوڑ ءُ سلامت آں اڑے راست گُش ایت تو من ءَ گُشتگ ات کہ من نوکیں اِشک ئے کنگ ءَ اوں ھردیں گیگ ءُ گور بوت ئے اے نمدی ءِ پسو دیم دات وتی نوکیں آشک ءِ کسہ اں الم بکن گوں لھتیں روچ پیسر ما دیوانے ءَ نشتگ ات اِتاں اشک ءِ سر ءَ گپ ءَ اِتاں من ھمے گُشتگ ات کہ اشک ءَ را وھد موسم عمر نیست.. زمین ءِ اشک ءَ گنوک بوتگیں مردم ءِ کِرا گُنجائش کہ وتی دل ءِ تہ ءَ انسان ءِ جاگہ دات بکنت ھئیر اے رندی کہ دپ کپاں گڑا اشک ءِ سر ءَ دیوانے کن آں تو ءُ تئی اشک ھر دو سلامت بات ئے گپ باز اَنت دگہ روچے دگہ نمدی یے نبشتہ کن آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مئے راج ءَ وانگ ءُ زانگ لوٹ اِیت

نبشتہ کار: سُدیر بلوچ

دی بلوچستان پوسٹ

انچش کہ شما سرپد اِت ما پہ چی ءَ وانگ ءَ ایں۔ لھتیں گُش اَنت من پہ وتی واست ءَ وانگ ءَ آں ، من بازیں سنگت دیستگ اَنت منی جند ءَ جُست کُتگ اَنت تو بہ وان ئے چے کَنَگ لوٹ ئے پہ وتی بزّگیں راج ءِ واست ءَ ، لھتیں سنگتاں گُشتگ ما وان اِیں ڈاکٹر جوڑ بہ اِیں ۔

مئے راج ءِ تہ ءَ وانگ ءُ زانگ سکّ کم اِنت بلے کم نہ اِنت لھتیں انچیں سنگت ھست اَنت دیمتر ءَ وانگجاھاں شُت نہ کن اَنت، چہ وتی گریبی ءُ لاچاری ءَ بلے شمئے پِت شُمارا زر دے اَنت گُش اَنت برو اِت دگہ وانگجاھاں بوان اِت ۔ چُش نہ اِنت کہ دگہ جاھاں پہ وانگ ءَ شُت اِت ءُ وتی ماتی زُبان نہ ونت ءُ وتی ماتی زُبان ءَ بے ھیال کُت چُش نہ اِنت ۔مارا مئے وتی ماتی زُبان الّم وانگی اِنت۔

من انچیں سنگت دیستگ پوسٹ ءِ سر ءَ بلوچی ءَ انچیں کمِنٹ ءُ کلوہ دے اَنت۔ مردم آیانی وانگ ءَ ھم نہ زانت بلے پہ وتی ماتی زُبان ءَ وانگ ءُ زانگ ءِ جُھد ھم نہ کن اَنت ، پہ وانگ ءَ دگہ ملکاں ءُ ڈیھاں رو اَنت زر گْوازینت کن اَنت بلے مئے وتی زُبان گوانکو ءِ تہ ءَ ھم وانگ بیت۔ وتی زُبان اِش شموشتگ دگر ءِ زُبان ءَ کلوہ کن اَنت ، اُنو ما بہ چار ایں انگریزی مئے ماتی زُبان نہ اِنت ما ایشی ءِ سر ءَ انچو کپتگ اِیں ۔ ھمے انگریزی ءِ واست ءَ ما چنچو زر گْوازینت کن ایں بلے وتی زُبان ءَ نہ وان ایں باید اِنت کہ ما پیسر ءَ گوانکوانی تہ ءَ وتی ماتی زُبان ءِ وانگ ءِ جُھد ءَ برجاہ بہ دار ایں ۔

پرچا کہ ما بلوچ ایں مئے زُبان بلوچی اِنت مئے پوشاک بلوچی اِنت۔ ھما سنگت ھست اَنت کہ یونیورسٹی ءُ کالج ءُ اسکولاں وانگ ءَ اَنت۔ گوں ھمایاں دست بندی اِنت وتی ماتی زُبان ءَ بہ وان اِت ۔ نبشتہ بہ کن اِت ۔ الّم نہ اِنت ایوک ءَ بلوچی کتاب وانگ زان اِت بس اِنت کہ من وانگ زانت لھتیں سنگت اَنچُش گُش ایت من بلوچی وانگ زانت بس اِنت چوش نہ زانت کہ بلوچی آب چِنکس اَنت تھنا وانگی نہ اِنت نبشتہ کنگ ءِ جُھد ھم بہ کن اِت ۔

انوں دامگ ءُ (انٹرنیٹ) ءِ زمانگ اِنت وتی ماتی زُبان ءِ وانگ ءُ نبشتہ کنگ ءِ جُھد ءَ بہ کن اِت گیشتر نبشتہ بہ کن اِت سے ماہ لگ ایت بلے من وت چُشیں زانتکارے نہ آں بلے من کلوھے پہ نودربراں دے آں ۔ وتی ماتی زُبان ءَ بہ وان اِت ۔اگاں ما وتی زُبان ءَ مہ وان ایں دگہ کسے نئیت مارا چُش نہ گْوش ایت کہ وتی ماتی زُبان ءَ بہ وان اِت ءُ دیمروی بہ کن اِت ۔ بلوچ راج ءُ بلوچی زبان زندگ بات ۔
سلامت بات اِت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پچیں نمدی یے پہ بیگواھیں هیات جان ءَ

نبشتہ کار: سعید احمد

دی بلوچستان پوسٹ

ھیاتو! مُردنی من تئی بیگواھی ءَ ھچ اجکہ نہ آں پرچا کہ ما هما ایردستیں زمین ءِ جھمنند اِیں کہ اِد ءَ هَمُک روچ تئی دابیں رُستگیں ءُ لائکیں ورنایاں گِر اَنت بندیگ کن اَنت کُش اَنت ءُ دؤر دئے اَنت، کسّ جُستے هم نہ کنت اِش اَنچُش کہ بلوچی زبان ءِ شائرے گوش ایت:

“مردمے نیست کہ هُدا ءَ بہ گوشیت”
“ابرم ءَ بازیں هُدایے استیں”

هیات جان ما اَنچو بے وس اِیں مئے وتی جند ءِ شھرانی تہ ءَ دو سد یا سَے سد درامدیں سُپاهیگانی بُنجل اَنت ھمے بنجلاں تئی دابیں پُلگدیں ورناہ ھزارانی کچّ ءَ بندیگ اَنت ما انچو تُرس اِیں کہ اشانی نیمگ ءَ چک هم جت نہ کن اِیں-

هیات جان مئے ڈیپارٹمنٹ ءُ مئے بیچ ءَ بندات ءَ ما دوازده نودربر اِت اِیں پد ءَ داں هشت ءَ سر بوت اِیں بلے ما هشتیں اَنچو هور ءُ هوار اِتیں کہ تھنا فیکلٹی ناں بلکیں سرجمیں یونیورسٹی ءَ مئے وتی یک جتائیں ٹولی یے اَت کہ مدام مسکرا ءُ کندگ ءَ اِت اِیں……هیات جان ترا هما لیبارٹری والا شر یات اِنت گندئے تئی گپ دائم همیشی ءِ سرا اِت اَنت-

یار هیات تو سرپدئے تئی بیگواهی ءَ پَد من ءَ کےَ ءَ جُست کُت؟ هما منظور ءَ گِندئے تو مدام کلاگ گپتگ ءُ ستائینتگ سک بژنیگ اَت یار گُشیت “یار خدا حیات کی حفاظت کرے” یار پد ءَ اے بیچارگ سرپد نہ اِنت کہ هیات تو همایانی گْور ءَ بندیگ ئے کہ اے زمینی هُدا اَنت ءُ آزمان ءِ هُدا ءَ هچ مان نیاراں-

هیاتو یار مئے اولی ءَ داں پنچمی سمسٹر ءَ تو اولڈ هاسٹل ءِ نامی ئیں مردماں چئے یکے اِت سرجمیں هاسٹل ءِ مردماں ترا پجہ آورتا بلے یکّیں تو بوتگے وتی زندگی ءَ گوں همگرنچ بوتگے وتی فون وتی کلاس ءُ هاسٹل ءُ روم ءُ وتی زندگی-

یار پد ءَ من تئی آور جنگ ءَ رند سرپد بوت آں کہ ترا ڈینگی ءَ سک نگیگ کُتگ ءُ تو سک نادراه بوتگ ئے یار سلامت مردم ایشانی گْور ءَ بیمار بنت تو وَ بیماریں مردمے اِت ئے بس همے گُوش آں آجو بات ئے گوں کُل بندیگیں براتاں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نودربرءُ فیروز بلوچ

نبشتہ کار : عامر بلوچ

دی بلوچستان پوسٹ

بلوچستان یک انچیں دمگے کہ اود ءَ انسان بازیں بنکی لوٹاں چہ زِبھر اَنت آیاں چہ یکے وانگ اِنت.ھر انسان ءِلوٹ ءُ واھگ ھمیش اِنت کہ من بہ وان آں ءُ باندا پہ وتی مات ءُ پِت ءِ واستا یک وش ءُ وشھالیں بانداتے سازِت کُت بہ کناں۔بلوچستان ءِ تہ ءَ سک باز نودربر ھَست اَنت کہ آوانگ ءَ سک باز ھُب ءُ واھگدار اَنت بلئے بد بھتی ءَ نودربر اود ءَ وَنت نہ کن اَنت-

بلوچستان ءَ وانگ ءِ آسراتی نیست اگاں لھتے وانگ جاہ ھست گڑا ھسابی اَنت اگاں وانگجاہ ھست گڑا رھدربر نیست ءُ اگاں رھدربر ھست گڑا وانگجاہ نیست ءُ لھتے انچیں دمگ ھست کہ اود ءَ مردماں وتی لوگ ءُ جاگہ پہ وانگ جاہ ءِ ھاترا داتگ اَنت اود ءَ نودربر چار پنچ تبک ءِ وانگ ءَ پد پہ گیراج ءَ کار ءَ رٶت ، لھتے گوں مستریاں سیمٹ ءُ لِچ کاری ءَ رٶت ءُ لھتے ءِ سر پہ نشہ ءَ کپ ایت.

بلوچستان ءِ تہ ءَ وانگی چاگرد نہ بوھگ ءِ سوّب بازیں نودربر وتی ھلک ءُ میتگاں یلہ کن اَنت پہ وانگ ءِ واستا اسلام آباد ءُ پنجاپ ءِ مزنیں شھرانی نیمگ ءَ رو اَنت۔ھمے درچ ءَ یک نودربرے کہ آئی ءِ نام فیروز بیت وتی لوگ ءَ چہ دور اسلام آباد ءُ پنجاپ ءَ کئیت پہ وتی پِت ءُ مات ءِ دلی واھگانی پورہ کنگ ءِ واستا کہ آئی مات ءُ پِت ءِ واھگ بوتگ کہ مئے بچ مزنیں شھدربرجاھے ءَ چے بہ وان اِیت ءُ پہ وتی ھلک ءُ میتگ ءِ واستا شریں ماسٹرے جوڑ بہ بیت۔ سکیں ھاموش تبیں بچکے اَت بِھ گپے نہ کُت۔اگاں تو گپے جت ترا پسوے دات وت بِھ گپے نہ جت. سنگت مارا چہ پیسرا اتکگ ات اسلاآباد ءَ ما لھتے روچ پد اتکگ اِت ایں پرچاکہ انگت کلاس بندات نہ اِت اَنت. من اولی رند ءَ سنگت دیستگ اَت واب ءَ چہ پاد اتکگ اَت جانے شُشتگ اَت ءُ اتک سلام ءُ دعا ءُ ھال پرسی یے کت. پد ءَ سھتے ءَ پد پجاری دیوانے بندات بوت. ھر کس ءَ وتی پجار کناں کت ءُ وھدے سنگتے باریگ اتک گڑا گُشتٸے کہ منی نام فیروز اِنت من تُربَت ءَ نشتگ اَنت ءُ اد ءَ منی ایجوکیشن ڈپارٹمنٹ ءَ داکلہ بوتگ. ھمے میان ءَ کسے ءَ چہ جُست کُت فیروز جان ماسٹرے پرچہ جوڑ بوئگ لوٹ ئے تو۔ گُڑا ھمے دمان ءَ پسّو دات کہ منی مات ءُ پِت واھگ اِنت کہ من شریں ماسٹرے جوڑ بہ باں ءُ دومی بلوچستان منی ءُ تئی دیم ءَ اِنت کہ وانگجاہ نہ بوئگ ءِ سوّب چینچو مردم وتی ھلک ءُ میتگاں یل کن اَنت پہ وانگ ءَ پنجاپ ءُ پاکستان ءِ دومی مزن شھراں رو انت اگاں کسے ءَ گُنجائش نہ کنت گُڑا وتی وانگ ءَ ھمد ءَ چے یل کنت۔ من ھمے جیڑآں ما شُما ھمد ءَ بہ وان ایں باندا پہ وتی چاگرد ءِ واستا کارآمدیں مردم جوڑ بہ بِئیں۔وتی چاگرد ءَ شریں بانداتے دات کُت بہ کن ایں۔

بندات ءَ من پھم اِتگ اَت کہ سنگت چہ مارا سینئر اِنت بلئے پجار ءَ رند من زانت کہ منی ھم مکتب اِنت پد ءَ مارا سنگت ءَ بُرت ھوٹل ءَ ناشتہ ءِ کنگ ءَ ءُ اود ءَ داں دیراں ھندی ھال ءُ اھوال بوت پد ءَ ما اتک ایں وتی کوٹی ءَ لھتے روچ ءَ پد کلاس بندات بوت اَنت.کلاس ءِ تہ ءَ ھم سنگت ھاموش اَت ءُ وانگ ءِ ھم ھُب ءُ واھگ ئے ھست ات. وانگ ءَ جوان ات کلاس کہ ھلاس بوت اَنت سنگت گوں ما ھوار ورگ ءَ اتک گوں پد ءَ تو ھر وھد ءَ لائبریری ءَ دیست ھر وھد ءَ گوں کتاباں گوں گلائیش اَت بیگاہ ءِ وھد ءَ یونیورسٹی گراؤنڈ ءَ لیب ءُ گوازی ءَ گوں ھوار اَت ۔ یک روچے کلاس ءِ تہ ءَ کہ بچکے ءَ گُشت اے نو کلاسی گُد اَنت ترا گورا اَنت گڑا سنگت ءَ ھچ نہ گشت ءُ بچکند اِت. کلاسانی تہ ءَ پہ بلوچانی گوما اے وڑیں روشت نوکیں گپ نہ بوتگ اَنت بازیں نودربراں زانتگ ھم کہ ما بلوچی پُچ ءُ پوشکاں گور ءَ کناں گُڑا اِد ءِ ماسٹر ءُ نودربر مئے گوما انچیں وڑ ءَ گپ کن اَنت۔بلے آھاں اے گپ ءُ ھبر یک دیم ءَ کُتگ اَنت وتی دل ءُ دیم گوں وانگ ءَ داتگ انت ئے۔ یک بیگاھے ءَ وھدے آ چہ وتی کوٹی ءَ چے در کئیت وتی کوٹی ءِ سنگتاں ھمے گپاں گُش ایت کہ من لائیبریری ءَ روگ ءَ آں شپ ءَ تک کایاں بلئے ھما اِنت انگت واتر نئیتکگ۔ ھما روچ ءَ بِگر داں روچے مروچی ءَ منی مجگ ءَ یک جُستے رُدوم زوران اِنت کہ فیروز ءِ وڑیں نودربرے ءِ چے گناہ ءُ میار بیت کہ مروچی دو سال سرجم اِنت بے گُناہ تھاریں کوٹیانی تہ ءَ اِستان آزاراں سگگ ءَ اِنت ۔باریں آچونیں ازیتیں زندے اے ازارجاہ ءِ تہ ءَ گوازینگ ءَ اِنت۔ آئی ءِ دگہ ھچ گناہ میار نیست اِنت گناہ میارے ھمیش اِنت کہ فیروز یک ایردستیں چاگردے ءِ تہ ءَ ودی بوت ءُ ھمے چاگرد ءِ تہ ءَ آئی ءَ وانگ ءِ واب دیست زانگ ءِ واب دیست پہ وتی چاگرد ءِ واستا شریں ماسٹرے بوئگ ءِ واب دیست ۔ ھمے گناھانی سوّب اِنت کہ مروچی دو سال پُر اِنت آ تھاریں کوٹیانی تہ ءَ وڑ وڑیں آزار سگگ ءَ اِنت۔ اے میان ءَ آئی ءِ گِس والا چونیں ازیت سگگ ءَ اَنت اے گپ ءَ ھما مردم زانت کُت کن اَنت کہ اے وئیل آئی ءِ سر ءَ چے گوزگ ءَ اِنت۔

یک زھگے ءَ مات 9 ماہ ءَ لاپ ءَ کنت چنچو بزگی کش ایت ءُ رودین ایت کہ باندا روچ منی پش پد بیت بلئے زالم ھچ نہ چار اَنت بلوچ کنت ءُ بر اَنت. آ سنگت نوکی گام جنگ ءَ اَت پیسرا زالماں وتی اَرجان جت سنگت ءِ انگت دومی سمسٹر سرجم نہ اَت بلوچستان ءِ تہ ءَ یک نودربرے در کٸیت پہ وانگ ءَ اسلام آباد ءُ پنجاب ءَ آ وڑ وڑیں جیڑھانی دیمپان بیت آ توری کلاسانی تہ ءَ استاد بہ بنت کہ یک بلوچ نودربرے ءَ چوں ڈیل کنت ءُ کجام چماں چار انت یاکہ یونیورسٹی ءِ گیٹ والا یے بہ بیت وڑے ناں وڑے ءَ بزگ کنت یاکہ یونیورسٹی ءِ تہ ءَ پنجابی نودربر بہ بنت جاھل گُش اَنت جنگلی گُش اَنت بلوچ اگاں بلوچستان ءَ بہ بیت یا پنجاب ءَ وڑے نہ وڑے ءَ اے چیزانی دیمپان بوگی اِنت ئِے اے چیز پہ بلوچ نودربراں نوکیں چیز نہ اَنت بلکیں 75 سال بیت بلوچ ءَ گون اَنت ءُ پیداک اَنت بگندئے چیزانی تب مٹ بوتگ اَنت بلئے استان ءِ مول ءُ مراد ھمیش انت کہ کُجا نہ کجا بلوچ ءَ وڑے ناں وڑے ءَ بزگ بکن آں آھاں چہ وانگ ءَ دور بہ کناں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ نودربر ءُ سرکارءِ پندل

نبشتہ کار: دیدار بلوچ

دی بلوچستان پوسٹ

ھر زندگیں انسانے ءِ دل ءَ لھتیں واب، واھگ ءُ واھشت بَنت۔ نیست چوشیں مردمے کِہ آئی ءِ دل چَہ اے چیزاں پاک ءُ پلگار اِنت۔ ھمے رنگ ءَ بلوچ نودربر ھم انسان اَنت گُڑا آھانی دل ءَ ھم الم لھتیں واب ءُ واھگ بیت۔ یک بلوچ نودربرے وتئ دل ءِ واھشت ءُ واباں چار ایت ءُ پد ءَ چمّے وتئ زمین ءَ جنت کِہ آ چَہ ھر آسراتی ءَ زِھبار اِنت، اود ءَ جنگ اِنت، کُشت ءُ کوش اِنت، گِرگ ءُبرگ اِنت، وانگجاہ پوجی کیمپ اَنت، اگاں یک ءُ دو وانگجاہ اَست گُڑا اود ءَ نودربر ءُ اُستاد ءَ چَہ گیش ترا پوجی گندگ ءَ کئیت۔ اشی ءِ درستاں چَہ مستریں درور مۓ کرّ ءَ بلوچستان شاہ دربرجاہ اِنت۔

بلوچستان شاہ دربرجاہ ءِ ھر کُنڈ ءَ یک پوجی چوکی یے۔ اود ءَ نو سد ءَ چَہ بُرز پوجی نندارینگ بوتگ۔ نوں اے رنگیں جاورانی تہ ءَ وانگ وَ دوریں ھبرے بلکیں ساہ ءِ زورگ ھم باز مشکل اِنت۔ ھمے ھاتر ءَ، بلوچ نودربر وتئ واباں کوار ءَ کن اَنت ءُ دیم پَہ پنجاب ءُ اسلام آباد ءِ شاہ دربرجاھاں کدم جَن اَنت۔ بِندات ءَ وَ چوش بیت کِہ پنجاب بلوچ نودربراں وشّ اَتک کَنت، آھاں اسکالرشِپ دنت ءُ پَہ نندگ ءَ آسٹل ءُ کوٹی۔ پنجاب پرچی ءَ چو دزپچ ءُ مِھرباں بیت؟ اشی ءِ پُشت ءَ سرکار ءِ مَزنیں پندلے است بیت۔ آ پندل بلوچ نودربراں پنجاب ءُ اسلاام آباد ءِ کانچ ءِ میتگ ءُ ماڈیانی تہ ءَ بےسُد ءُ بے سَما کنگ بیت۔ سرکار ءِ گُمان ھمیش بوتگ کِہ وھدے بلوچ نودربر اے شوک شوکیں روڑ ءُ ماڑیاں گِند آں گُڑا آ چَہ وتئ بَزگریں راج ءَ پراموش بَنت ءُ پَہ وتی جِند ءَ واب گِند اَنت۔ بلے زاناں سرکار چَہ اے ھبر ءَ نزانتکار بوتگ کِہ بلوچ چو اَرزانی ءَ رد نَہ کپ ایت۔ آئی ءَ زُلم ءُ زوراکیانی ساھگ ءَ شیر مِتکگ۔

چوشکہ بلوچ نودربر ءَ گیشتر ھرچ دور ءُ زمانگ ءَ وتئ زُلم ءِ آماچیں راج ءِ درد کوپگ ءَ بوتگ گُڑا اے رندی ھم ھمے پیم بیت۔ بلوچ نودربر ماں پنجاب ءُ اسلام آباد ءَ یکجاہ ءُ یکمُشت بنت، گپ کنت اَنت، وان اَنت، سرپد بنت۔ ءُ اے چیز سرکار ءَ وش نَہ بیت۔ پرچی ءَ کِہ سرکار ءَ چَہ بلوچ نودربراں دگہ امیت داشتگ اَت کِہ آ ماں ھاکاں ھوار بوت اَت۔ نوں مَرچی باندات ما گندگ ءَ ایں کِہ سرکار ءَ وتئ پندل مَٹ کُتگ اَنت۔ آ جُھد ھمے کنگ ءَ انت کِہ بلوچ نودربراں چَہ زانت ءُ زانگ ءَ دور بِدار ایت۔ ھمے سبب انت کِہ مرچی پَہ بلوچ ءَ پنجاب ءُ اسلام آباد ءِ شاہ دربرجاہ وانگجاہ ءَ چَہ گیش ازیتگاہ جوڑ بوتگ اَنت۔ ھر روچ گِرگ ءُ برگ، نودربراں کوانک کنگ ءُ آھاں بیھار دیگ، آھاں رنگ رنگ ءَ ازیت دیگ ءُ دگہ باز، اے درستیں عملانی پُشت ءَ بس ءُ بس ھمے یکّیں پندل اِنت کِہ بلوچ ءَ چَہ وانگ ءُ زانگ ءَ دور دارگ۔

اے درائیں جاوران ما دیم ءَ بکن اِیں ءُ بچار ایں گُڑا مارا ھمے چیز گندگ ءَ کئیت کِہ مرچی بلوچ نودربر چَہ سرکار ءِ درائیں پندلاں آژنا ءُ سرپد انت ءُ گوں مُھکمی ءَ اے رنگیں جاورانی دیم ءَ اوشتاتگ۔ مُھکمی ءِ درور ءُ کِسّہ باز اَنت۔حفیظ بلوچ کِہ قائد اعظم شاہ دربرجاہ ءِ یک ایم پِل (M.Phil) فزکس ءِ یک نودربرے، آ وھدے چَہ وتئ میتگ ھُزدار ءَ یک وانگجاھے ءَ نودربرانی دیم ءَ گِرّان کنگ ءُ برگ بیت گُڑا سرکار گوں وتئ اے عمل ھمے پیش دارگ ءِ جُھد ءَ کنت کِہ اگاں کسے گوں کتاب ءَ مِھر کَنت گُڑا آئی ءِ ھال ایش بیت۔ بلے پد ءَ دومی روچ ءَ ما گِندگ ایں کِہ ھما نودر کہ آھانی چمّانی دیم ءَ حفیظ برگ بیت ءُ آھاں ھمے کُلوہ دیگ بیت کِہ اگاں شُما کسے ءَ حفیظ بوئگ ءِ واب دیستگ گُڑا شمئے ھال ھمے پیم بیت، بلے ھما نودربر حفیظ ءِ اکساں دست ءَ کن اَنت ءُ کُوکار کن اَنت ءُ گوش اَنت کِہ مۓ اُستاد ءَ بیار۔ ھمے رنگ ءَ اسلام آباد ءِ نودربر ھم بےتوار نَہ بَنت۔ ھروچ بگند کِہ ریلی یے، ھرتالے، پریس کانپرنسے۔ ءُ آ داں 27 روچ ءَ پریس کلب ءِ دیم ءَ نند اَنت ءُ وتئ سنگت حفیظ بلوچ ءِ یل کنگ ءِ لوٹ ءَ کن اَنت۔ بازیں جُھد ءُ کوششت ءُ توار ءَ پد، سرکار حفیظ بلوچ ءَ دیم ءَ کار ایت بلے آئی ءِ سر ءَ وتگڑیں بُھتام جنت ءُ آئی ءَ زندانی کَنت۔

کِسّہ چَہ حفیظ ءَ ھلاس نَہ بیت۔ چَہ آئی ءَ پد بیبگر امداد چَہ پنجاب شاہ دربرجاہ ءِ ھاسٹل ءَ گَرگ ءُ برگ بیت بلے بلوچ نودربر انچو کِہ پیسر ءَ ھاموش نَہ بوتگ اِت اَنت، اے رند ءَ ھم بےتوار نَہ بوت اَنت۔ ھر نیمگ ءَ کوکار ءُ زھرشانی بیت، ءُ سرکار لاچار بیت کِہ بیبگر ءَ یل ءَ بدنت۔ چَہ بیبگری ءَ پَد فیروز بلوچ چَہ راولپنڈی ءَ گار کنگ بیت کِہ روچ ءِ مروچی ءَ داں گار ءُ بیگواہ اِنت بلے بلوچ نودربر انگت ھاموش نَہ اَنت۔ ھر روچ ھرتالے، ٹویٹر کیمپینے، توارے، جاکے۔

انچو گِندگ بوئگ ءَ اِنت کِہ سرکار چَہ بلوچ نودربراں سک باز تنگ اَتکگ۔ آ ھر پندل ءِ کِہ ساز ایت بےسوب انت۔ یک نیمگ ءِ تمرد ءُ زوراوریں سرکار ءُ دومی نیمگ ءَ ناتُرسوکیں بلوچ نودربر اَنت۔

اے کِسّہ ھمے پیم ءَ روان اِنت۔ سرکار گرگ ءُ برگ ءَ اِنت ءُ بلوچ نودربراں بگند کِہ چو کوہ ءَ سرکار ءِ دیم ءَ مِکّ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گارءُ بیگواھیں پیروز بلوچ ءِ نام ءَ

نبشتہ کار: سنگت بلوچ

دی بلوچستان پوسٹ

اِمبری ھم تو واتر نہ کُت ، پیروز جان تئی تَھاریں کوٹیاں بند بیگ من ءَ درد نہ بیت ۔ زُوراں سَری گار ءُ بندیگ کنگ ھمک بلوچ ءِ واستا ریاست ءَ اَلّمی کُتگ ، ریاست بلوچ کنت ءُ بارت ، لاشاں جَنگل ءُ گَیاباناں دُور دنت ، اے زلم ءُ زوراکی گلامی ءَ گوں ھم گْرنچ انت ، ھما وھد ءَ اے بزگی ءُ لاچاری ، چم داری ھلاس نہ بیت دانکہ بلوچ وت وتی زمین ءِ وت واجہ مہ بیت ۔

اِستان ءِ ھر وھد ءَ کوشِست بِیتگ کہ بلوچ ءُ بلوچستان ءَ سرجم ءَ اِیردست بکنت ، لَس مَھلوک ءَ نپسیاتی وتی گلام جوڑ بکنت ، آھانی ھرچ بودِشت ءَ ، زبان ءَ ، دود ءُ ربیدگ ءُ بلوچ ءِ راج دَپتر ءَ سرجمی ءَ یَک کالُونی ءِ وڑ ءَ ردوم بِدنت ، پَرے ھاتِرا ریاست ءَ وتی جتا جُتائیں شُور بَندی ءُ مشینریاں کارمرز کنگ انت کہ ھندی مردماں ھاموش بہ کنت ءُ وت ءَ پاک ءُ سلّھیں ءُ ھمدردیں استانے پیش بہ داریت ۔

وَھدے ما بلوچ سرزمین ءِ سر ءَ نِشتگیں لَس مَھلوک ءَ چاریں گڑا مارا بلوچستان ءِ ھِچ چوشیں ھَند ءُ دَمگ ءِ مردم ءِ گِندگ ءَ نئیت کہ چہ اِستان ءِ زُلم ءُ زُوراکیاں رَکّ اِتگ ، ھِچ بلوچ چہ اِستان ءِ دست ءَ نہ رکّیتگ، مزّن داں کسان ، زال ءُ زالبول ، تِپلیں گْونڈل ، پیر ءُ آجزیں کماش ، دُراہ اِستان ءِ زلم ءُ زوراکیانی آماچ بوتگ اَنت ۔ بلوچستان ءَ چُوشیں میتگ ءُ لوگے پَشت نہ کپتگ کہ اُود ءَ یک گُھارے ءِ برات ، مَاتے ءِ تاسُپیں بَچ ، زالانی لوگ واجہ ، پِیریں کماشے ءِ اسا زوراں سَری گار ءُ بیگواہ نہ اِنت ۔ ھَرچ پِڑ ءُ تبکّ ءَ پِگر ءُ سَسا ءَ سیادی داروکیں مردم آوار جَنگ بیتگ اَنت ءُ بِیگواہ اَنت بس بلوچ ءِ نام ءِ سر ءَ ، آ پوریاگر، نودربر، گریب ءُ بَزگر ، سیاسی رھشون ، ماسٹر ءُ ڈاکٹر ، زُبان زانت ءُ ادیب کس پَشت نہ کپتگ-

بلئے لَھتیں وَھد اِنت کہ اِستان ءِ چم نودربراں سک اِنت ، گیش ءَ چہ گیش نودربر اِستان ءِ گار ءُ بیگواھی ءِ شُوربندیانی آماچ اَنت ، اِستان وتی سَرجمیں زوراں نودربرانی سر ءَ جنگ اِنت ءُ آھاں وانگ ءَ چہ دور دارگ بوگ ءَ انت، ھما نودربر کہ گوں کتاب ءُ کَلم آں مِھر ءُ دوستی کناں ، نوکیں پِگر ءُ لِیکہ واھُند بنت ، بَژن بیت کتاب ءُ کلم وارسی ، زانت ءُ زانگ پہ بلوچ ءَ زِندان ءِ شُبھین ءَ دنت ، وت زانتی ، وتی زمین ءَ زانگ آئی ءِ سر ءَ بُوکیں زُلم ءِ مارگ بَدل ءَ پاکستان بلوچ نُودربراں زندانی کنت ، سال ءُ ماھاں تَھاریں کُوٹیاں چوں دژمن ءَ لَٹ ءُ کُٹ کنگ بنت ، میار بس ہمیش اِنت کہ گوں کتاب ءُ کلم آں سنگتی کن انت، آ نودربر کجام ھم پِڑ ءِ نودربر ءِ بہ بیت ، چونیں نودربرے بہ بیت، نیوٹرل نودربرے بہ بیت شر یا سیاسی نودربرے بیت شر پاکستان ءِ نِزا (نگاہاں) درست یک انت ، پَرچہ کہ بلوچ انت ، ریاست اے نچاری کُجام نظریہ منوگِر انت ، بس بلوچ کنت ءُ بارت-

بلوچستان ءَ وانگی آسراتی نہ بیگ ءِ سَوَب ءَ بلوچ نودربر لاچار بَنت کہ پہ گیشیں وانگ ءُ زانگ ءِ ھاترا دیم پہ اسلام آباد ءُ پنجاب ءَ رو اَنت ، بازیں جیڑہ ءُ جنجال ءَ پد، تنگ دستی، گریبی ءُ بے زَری جاورالاں اَبید وھدے آ پنجاب ءُ اسلام آباد ءَ سر بنت ، پہ واری ءُ بزگی سر بوتگیں بلوچ نودربر گوں اِدے وانگی ادارہ آں انچو ٹریٹ کنگ بنت کہ آ ھما وش آتکی روچ ءَ آئی ءَ سما کپیت واکی یار ایردستی یک اِلتے پرچا گوں دومی یا سیمی نودربر ءَ اے دابءَ ٹریٹ بوگ ءَ نہ انت، وش آتکی روچ ءَ چہ آ سر پد بیت کہ منی ءُ پنجابی نودربرے ءِ نیام ءَ تپاوت چی انت، ھما روچ ءَ چہ جُستانی یک گرنچے بوجیت مجگ ءِ تہ ءَ جتاجتائیں پسو ءِ رسگ ءَ پد توجیل اے درکیت کہ مستریں سوب ایردستی اِنت، پنجاب ءُ اسلام آباد ءِ وانگی ادارھانی تہ ءَ بلوچ نودربراں یک جتائیں ڈیپینشنے (پجارے) دیگ بوتگ کہ بلوچ جنگلیاں، جٹاں، نابزانتاں، دود ءُ ربیدگ ءِ سر ءَ ایر جَنگ بنت ءُ جتا جتائیں پروپائیلنگ ءُ ھراسمنٹ دیمپان بنت۔

مئے بُن گپ گار ءُ بیگواھیں سنگت پیروز بلوچ ءِ سر ءَ اَت ، رستریں اِستان ءَ چہ مارا پُلیت ءُ جِتا کُت نوں دو سال سرجم انت اِستان ءِ آزار جاہ آں بس بلوچ بوگ ءِ درد ءُ ازیتاں اوپار کنگ ءَ اِنت ، آ یک بلوچ نودربرے اَت ، چہ تُربت ءَ اتکگ اَت پہ وانگ ءُ زانگ ءِ ھاتِرا پنجاب ءِ شَھر راولپنڈی ءَ، بلوچستان ءِ وانگ جاہ ریاست ءَ وتی فوجی کیمپ جُوڈ کُتگ اَنت ، اُوداں نُودربَراں مِنٹلی ٹارچر کنگ ، وانگ جاہ نیستی ءِ ھساب اِنت ، سنگت ءَ جیڈ اِت پہ جُوانیں وانگ ءِ ھاتِرا پنجاب ءِ شَھر راولپنڈی ءَ اتکگ ءَ ، وَھدے سنگت ادا اتک ، پہ بلوچ نودربراں اے شَھر ھم چہ بلوچستان ءَ گَنتر اَت ، ھما پروفائلنگ ، سنگت آں ھَراس کنگ ، مدام سَنگتاں نشان کنگ کُجا رواں چی کناں ، کئی گون ءَ دیوان کناں ، مِنٹلی ءُ کلاساں ھراس کنگ بیت آں ءُ بئیگ اَنت ۔ استان ءِ ھَر روچیگیں زُلم ءُ زوراکی مُدامی وڑ ءَ اَتاں ، آ شُوربندی ءُ پَندلانی بس تب مَٹ اَتاں ، بلئے مول ءُ مراد مَنشا یَکّین اَت ، بلوچستان ءِ تَھا تچک ءَ ریاست وتئی مشینری ءَ کارمز کنت ءُ مردمانی سر ءَ لُٹ ءُ پُل کنت ، نُودربَراں بِیھار دیگ ، گار ءُ بیگواھ کنگ یک عام کاریچ ءِ وڈ جُنزان اَت ، بَلے اِداں آئی ءِ زوراکی ءِ تب مَٹ اَت ، اِداں آ دگہ اِدارھانی (گَلانی) کُمک ءَ بلوچ نُودربَراں ٹارچر کن اَنت پہ درور وانگی اِدارھانی کُمک ءَ بلوچ نُودربَرانی آوارجَنی بہ بیت شَر یہ زِھنی ٹارچر ءُ ھراسمنٹ بہ بیت شَر ، پَنجاپ ءِ وانگی ادارہ ھم استان ءِ ھَستیں کاسگ چٹ انت۔

زوراں سَری آوارجتگیں سنگت پیروز بلوچ سک ھَاموشیں ءُ بِےھبریں سَنگتے اَت ، آ مدام وتی کوٹی ءَ کپتگ اَت کہ کپتگ اَت باز کم دَرا بوت ، بَلے ھردیں کہ تو دیستگ اَت گّڑا بِچکندئے ما لُنٹانی سر ءَ تالان اَت ، مرچی آئی ءَ دو سال سرجم اِنت کہ مئے نیام ءَ نہ انت بَلے آئہ ءِ ھمے لُنٹانی سرے بِچکند ھر سَھت ءُ دمان بِے کساس گِیر کایَنت ،انگت باز وانگی اَت ترا سنگت ، بَلے مُدامی بلوچ نُودربَرانی وانگ نہ سرجم بنت ۔۔۔! اِے دُراھیں جِیڑھانی سَوَب استان اِنت ، گُلامی انت ، یَکے دَگّ ءِ وئیلے ءَ نمیران بیت ، یَکے بِے زَری ءُ تَنگدستی ءِ سَوَب ءَ وانگ ءِ سپر ءَ دیم ءَ بُرت نہ کنت( بلوچ گَنجانی واجھ اِنت بَلے اَنگت بَزّگ انت ) ، دگہ نیمگے گار ءُ بیگواہ کنگ بیگ ءَ انت ءُ یکے بلوچستان ءِ اَستیں جاورانی سَوَب ءَ زِھنی ٹارچر بَنت ، لاچار بَنت پہ وتکُشی ءَ ۔

فیروز بلوچ ءِ ھم وانگ ءِ سپر داں دیراں نہ مان اِیت ، آ یک روچ ءِ چہ وتئی کوٹی ءَ در کیت دیم پہ شَھدربرجاہ ءِ کتاب جاہ ءَ (لائبریری ءَ) اُوداں سَر بیگ ءَ پِیسر ۱۱سوچکان ۲۰۲۲ ءَ آوار جنگ بیت ، داں روچ ءِ مروچی گار ءُ بیگواہ انت۔ ھَر مات ءُ پِتانی وڑ ءَ فیروز بلوچ ءِ مات ءُ پت ءَ ھم ھمے جِیڑ اِت کہ مئے بَچ وانیت مزن ءُ لائک بِیت باندا مئے پِیری ءِ آسا جوڑ بِیت ءُ مارا گُوں وتی قُوم ءَ آوار بَڈا بَندیت ، بَلے تَھنا یَک مات ءُ پِتے ءِ ھُورکیں واب بیت اَنت کہ گلامی ءَ وتی اَرجاں جَت اَنت ، آھاں بِھ نہ جِیڑ اتگ اَت کہ ما وتی بچ ءَ تُربَت ءَ چہ ھزاراں میل دُور دِیم دے ایں ءُ رَستریں ءُ بِے رَھمیں اِستان چہ ھموداں مئے چَمانی چراگ ءَ آوار جنت ءُ زِندانی کنت ، بلوچستان ءَ گار ءُ بیگواھی ، جَنگ ءُ کُشگّ مُدامی جیڑہ انت ، بَلے ما وتی بچ ءَ را پنجاب ءَ دیم دات کہ اُوداں بِگندے بلوچستان ءِ جاور ھال آں چہ رکیت بَلے چوش نہ اَت ۔ پیروز جان تئی مات اِیوک ءُ تَنھا نہ اِنت باریں دگہ چنچو ماتانی تاسُپیں بَچ ھمے زُلم ءُ زُوراکیانی دیمپان اَنت ، تَھاریں کُوٹیاں بند اَنت ، مات نِشتگ ءُ راھ چاریگ اَنت ۔۔۔! من زاناں تو گیشتر درد ءُ ازیت سگگ ءَ ئے بَلے تئی مات ءِ ھَر سَھت ءُ دمان کرنانی وڑ ءَ اِنت روچ پہ روچ درد گیش بوان اَنت ودار آسر بوگ ءِ نام ءَ نہ زانت ، تئی مات مدام دروازگ ءِ دپ ءَ نِندوک اِنت ءُ چم ءِ راھاں اَنت کہ بِگندے اِمبری ائید ءَ بیائے تو ءُ تَرا اَمبازاں بِزیراں ۔۔۔! نُو واتَر بکن ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بےتواریں فیروز بلوچ

نبشتہ کار: نودربر بلوچ

دی بلوچستان پوسٹ

دو سال پیش لھتے کندگانی دیوان اَت بَلے تھنا کندگ اِتاں ابید ءِ بچکندگ ءُ کندگاں بس ھاموشی یے اَت برے برے مردُم ءَ انچُش گُمان بیت کہ بگندے ھمے کندگانی تہ ءَ گپ ءُ تران مان اَت ءُ ما آ وھد ءَ نہ پھم اِت کہ کسے مارا کندگانی دروشُم ءَ گُشگ اَت کہ سنگتاں دل چایے لوٹگ ءَ اِنت بیا رواں چایے وراں، نوکی پھمگ ءَ آں من، بَلے نوں تو کہ اد ءَ نہ ئے، چے کن آں پھم آں، اے ھاموشیں سنگت کسان اَت 17 سال ءِ اُمر اَت ئے، نوکی ھمیشیں بروتے سبز اِتگ اِتاں۔ اے کسان سال پیروز بلوچ اَت کہ اِستان ءِ ھونیں پنجگاں چے نہ رک اِت ءُ گار ءُ بے گواہ کنگ بوت۔

پیروز بلوچ ایرڈ مزن شھدربرجاہ راولپنڈی ءِ دومی سمسٹر ءِ نودربرے اَت کہ جنگ ءَ گپتگیں بلوچستان ءَ چے درآتکگ اَت، اُود ءَ اے استان ءَ ھزارانی ھساب ءَ بلوچ گار ءُ بے گواہ کُتگ اِت اَنت ءُ ھزارانی ھساب ءَ بلوچ کُشتگ اِت اَنت ءُ آیانی جون ژانگول کُتگ اِت اَنت ءُ کوہ ءُ گیاباناں چگل داتگ اِت اَنت ءُ انگت اِستان ءِ نیمگ ءَ چے گار ءُ بے گواہ کنگ ءُ کُشگ ءُ چگل دیگ برجاہ اَت بلکیں گیشتر بوتگ ءُ بوئگ ءَ اَت۔

پمیشکا پیروز بلوچ پہ وانگ ءُ زانگ ءِ ھاتر ءَ پنجاب ءَ کئیت ءُ ایرڈ اگریکلچر یونیورسٹی راولپنڈی ءَ چے وتی گیشیں وانگ ءَ بندات کنت کہ بلکیں اِد ءَ انسان دوستیں مردُم ھست، انسانی جانانی ارزشت ءُ بستار ھست بَلے چوش نہ بوت پرچاکہ ھما کُشندھانی لوگ ءُ جاگہ ءُ شھر ھمد ءَ اِت اَنت۔ پہ بلوچ ءَ وھدیکہ بلوچستان ءِ زمین تنگ کنگ بوت گُڑا کُشندھانی زمین ءَ بلوچ چون وت ءَ رکّینت کُت کنت؟ اِستان ءِ نز ءَ اے انسان پیروز نہ اَت بلکیں یک بلوچے اَت پمیشکا 11 مئی 2022 ءَ زورانسری گار ءُ بیگواہ اش کُت۔ یک راجے ءِ باندات ءُ زمینے ءِ پھازوک نودربر اَنت ءُ اے اِستان نہ لوٹ اِیت کہ یک بلوچ نودربرے بوان اِیت ءُ وتی راج ءُ زمین ءِ پھازگ ءَ بہ زانت پمیشکا آئی ءِ اولی نشانگ نودربر اِنت۔

پیروز۔۔۔ اَچ تو پیش بہ گندئے ما آ داب ءَ گھگیری ءِ ارزشت ءُ بستار نہ زانتگ اَنت ءُ انچیں ھاموشی یے کہ ترا گون بوتگ ھمے ھاموشی ءَ مئے تہ ءَ اوں جاگہ کُتگ بوتگ بَلے نو ما ترا گُشگ لوٹ ایں کہ تئی سنگت آ پیشی سنگت نہ اَنت پرچا کہ اَچ ترا پد تئی بازیں سنگتے سرپد بوتگ کہ اگاں کسے بلوچے آ گار ءُ بے گواہ کنگ بیت ءُ تھنا بلوچستان ءَ ناں بلکیں پاکستان ءِ ھر جاہ ءُ دمگاں پہ بلوچ ءَ زندگی مرگ ئے، ءُ ترا اے ھم ھال دیگ لوٹ آں کہ تئی یک دگہ ھم تبکے اھمدھان اوں مارا چے سِندگ ءُ گار ءُ بے گواہ کنگ بوتگ ءُ انگت بے گواہ اِنت بلکیں اھمدھان تھنا اِنّاں تئی وانگ جاہ ءِ دگہ سنگتے امتیاز بلوچ ھم گار کنگ بوت بَلے پد ءَ یلہ دیگ بوت پمیشکا آ ھاموشی کہ ترا گون اَت آ تئی سنگتاں یک انچیں توارے ءَ مٹ کُت کہ دانکہ اے اِستان ءِ ھونیں پنجگ اِستان ءِ جند ءِ گُٹ ءَ لوپ نہ بنت اے توار چوں گرند ءَ اِستان ءَ لرزینیت ءُ آس ءُ بیر شان اِیت۔

بلئے سنگت ودار سک گران اِنت، ودارانی چاگرد ءِ تہ ءَ زندگی کنگ مرگ ئے، تئی سنگت ھر وھد ءَ تئی ودار ءَ نشتگ اَنت، تئی سنگتاں چے گیش تئی جنت، تئی ھستی ءِ مھروان، تئی مکّھیں مات ھمُک سھت ءُ دمان تئی ودار ءَ اِنت کہ تو واتر کائے ترا بگلہ کن آں ءُ شر گریواں دانکہ ودارانی ارواہ دم توس بہ بیت ءُ پد ءَ ھِچ بر ترا اَچ وت ءَ دور روگ ءَ نئیل آں بَلے بس یک برے واتر بہ کن۔

من نزاناں اے آزار جاھاں باریں چینچوں بلوچانی ھون وارتگ ءُ باریں دگہ چینچوں بلوچ ءِ ھونانی نوشگ پشت کپتگ ، باریں اے آزار جاھانی تہ ءَ تو چون ئے، چوش من زان آں تئی دست سانکلاں گوں بستگ اَنت ءُ تئی آزارانی ٹپ ءُ نشان تئی بلوچے ءِ گوائی ءَ دیگ ءَ اَنت۔

برے برے مردُم گوں وت ءَ جیڑیت ءُ جُست ءُ پُرس کنت کہ اگاں بلوچ ءَ وانگ ءِ ھک نیست، بلوچ ءَ بلوچ ءِ زمین ءِ سر ءَ نندگ ءِ ھک نیست ءُ بلوچ ءَ زندگ بوگ ءِ ھم ھک نیست گُڑا بلوچ بہ کنت چے؟ بَلے پد ءَ ھما دمان ءَ ھیال کئیت کہ مئے راج ایردستیں راجے گُڑا گوں وت ءَ گلہ ءُ زاری مہ کن بلوچے بہ بو ءُ پہ وتی پھازگ ءِ ھاتر ءَ ھر ھما گمانی ھمراہ بہ بو کہ بلوچ ءِ گم اِنت۔

پیروز جان تو پہ وتی باندات ءِ آسودگی ءِ ھاتر ءَ در کپتگ اِت ئے تئی جند گار ءُ بیگواہ کنگ بوت تئی ھمراھی ءَ تئی لوگ ءِ مردُمانی وش ءُ وشھالی اوں بیگواہ کنگ بوتاں پرچا کہ تو بلوچے ئے گُڑا تو اِستان ءِ دست ءَ گار ءُ بیگواہ کنگ بہ ئے ،آزارجاھاں بندیگ کنگ بہ ئے-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

جنگانی زمانگ

نبشتہ کار: ن س سید

دی بلوچستان پوسٹ

وهد ءُ پاس ءِ مٹ ءُ بدل ءَ بازیں چیزاں وتی رنگ ءُ داب مٹ کتگ ءُ بدل بوان اَنت اگاں ما وتی کِر ءُ کش ءْ باراز ، هلک ءُ مردُم ھمک چیز ءَ بچاراں گڑا مارا چیزے نہ چیزے دِگہ ڈول ءَ رنگ shape ءُ دابے ءَ گندگ ءَ کیت چہ پیسر ءَ جُتائیں رنگے ءَ انچوش کہ ما گندیں ھمک زمانگ ءُ دور ءَ بنی آدم ءَ پہ وتی آسراتی ءِ ھاتر ءَ نوک نوکیں کار ءُ کردگار کتگ ءُ کنان ءُ پیداک انت ۔ ھمے ڈول جنگ ھم وتی باریگ ءَ مٹ کنان انت آئی ءِ داب ءُ رنگ مٹ بوان انت۔

دنیا ءَ لکّانی کساس ءَ جنگ بوتگ ءُ بے ھساب مردم مرتگ ءُ ٹپی بوتگ بلے ھمک باریگ ءَ ھمک دور ءُ زمانگ ءَ جنگاں وتی رنگ وتی زمانگے بوتگ ۔کدی زهم ءُ اسپر کدی تیر ءُ توپک برے بالی گوْراب ءُ ٹینک دگہ سیمی ءُ چارمی جنگی اسلا ءُ سلا کار مرز بوتگ ءُ بوان انت ۔

دنیا ءِ اندر ءَ اگاں روچ ء مروچی ءَ بہ چاریں گّڑا مارا پنچ دور ءُ زمانگ یا وَ پنچ (5) نسل(generation )ءِ جنگ دیم ءَ کیت کہ آیاں ماں امریکہ ءِ جنگ زانت ءُ جنگی پولکار ولیم ھس لینڈ(William s . Lind) چو بیان کنت اولی زمانگ(جنریشن: اولی جنگ ءِ زمانگ ءَ 1648 بِگر داں 1860 ءَ اولی جنگ دور گوشگ بیت ۔ اے زمانگ ءِ جنگ ءَ مردُم ءَ وتی دژمن جاہ آورتگ ءُ یک بلائیں میدان ءُ پٹے ءَ یکے دومی ءَ دیم پہ دیم بوتگ ءُ جنگ کتگ ۔اے زمانگ ءِ جنگانی تہ ءَ مستریں تور ءُ بھم مردمانی بازی (لشکر) ءِ مزان بوهگ ءِ بوتگ کہ ھمینکس کہ ترا لشکر گون بوتگ ھمینکدر تئی دژمن ءَ تُرسے بوتگ۔

اے ھما زمانگ گوشگ بیت کہ اے اهد ءِ تہ ءَ چرچ ءَ جنگی مَستری ءُ واجی پچ گِرگ بیت ءُ ملکانی کماش ءُ سروک وتی دستاں کتگ۔ اے دور ءُ زمانگ ءَ جنگانی rule قانون ءُ اے دگہ جنگی جیڑہ پہ تچک ءُ سیدا کنگ بوتگ انت کہ آیانی تہ ءَ سَپ بندی دژمن گوں داں کجام ھالت ءَ جنگ کنگی انت باز ھمے ڈول ءِ رسم ءُرواج کہ جنگانی بھر انت۔ ھمے اھد ءِ تہ ءَ یونیفارم ءُ پوجی درجہ بندی بہ بناء بیت اے جنگانی تہ ءَ ماں پیگمبرانی اھدے جنگ ءُ ۔نیپولین جنگ ہم اولی جنریشن ءِ جنگ زمانگ (جنریشن) یے درور گوشگ بنت ۔

دومی زمانگ :دومی جنریشن ءِ جنگ 1990 ءِ وھد ءُ دور ءِ ھلاسی ءَ چہ بندات بوتگ انت کہ اے جنگانی تہ ءَ یکے دومی ءَ وتی دژمن زانتگ ءُ یک دابے ءَ اولی زمانگ ءِ جنگانی وڑ ءُ ڈول جنگ بیتگ انت بلے اے زمانگ چہ لشکر ءِ ترس ءَ گیش توپک ءُ اے دگہ آسراتی ءِ بیم بوتگ ۔اے ھمے دور گوشگ بیت کہ نوک ریڈیو radio ءُ دگہ ھمے وڑیں باز ٹکنالوجی ماں جنگانی میدان ءَ کارمرز کنگ بوتگ انت ۔چہ نوکیں ٹیکنالوجی ءِ کارمز ءَ نوںالم نہ بوتگ کہ گوں دژمن ءَ سک باز نزدیک ءُ دیم پہ دیم ءَ جنگ دارگ بہ بیت نوں تیر ءُ توپکاں چش کت کہ تو وتی دژمن ءَ چہ کمو گستا بوت ءُ جنگ دات کت اے جنریشن ءِ جنگ تہ ءَ اولی جھانی جنگ کہ 1914 بگر داں 1918 ءَ بیت ھوار انت ۔ امریکہ ءِ لس مهلوک ءِ جنگ( سیول وار )کہ 1861 تاں 1865 بیت اولی زمانگ جنگ گوشگ بیت۔

سیمی زمانگ : اے ھما جنگ ءِ زمانگ انت کہ اے زمانگ ءَ دنیا ءَ دُرساں چہ گیش ھون رتکگ بزاں ءِ دومی جھانی جنگ ءِ زمانگ کہ اے جنگانی تہ ءَ دژمن ءُ دوست کمے باز زانگ بوتگ انت بلے کجام کئی دوست انت ءُ پرچا اے دور ءُ زمانگ ءَ کمو مشکل زنگ بوتگ انت کہ ھمک نیمگ ءَ ھمک ملک ءُ وتن وتی پھازگ ءَ پہ وتا راہ شوھاز ات ۔ اے زمانگ ءِ جنگانی تہ ءَ ٹکنالوجی ءِ گیش کارمز کن بزاں بالی گراب ءُ ٹینک ءُ دگہ ھمے دابیں جنگی سلاهاں ءَ جنگ باز تیز کت انت کہ گوں بیت کہ ھمے زمانگ ءِ جنگ جرمنی (6 ) شش روچ ءِ تہ ءَ ماں بازیں ملکاں وتی کبزا ءَ کنت کہ آیانی تہ ءَ فرانس ءُ دگہ ھمے ڈولیں مزن نامیں ملک ھوار بنت۔اے زمانگ ءِ جنگاں نیوکلیئر جنگ بہ گش انت پرچا کہ ھمے زمانگ ء جنگ بزاں دومی جھانی جنگ(ww2) ءَ اولی برا اے ڈولیں سلا نیوکلیئر سلاه امریکہ جاپان ءِ سر ءَ کارمرز کنت ۔اے زمانگ ءِ جنگانی تہ ءَ پاکستان ءُ انڈیا ، ایران ءُ عراق ءِ جنگ ہم ھوار انت.

چارومی زمانگ: اے زمانگ ءَ جنگ وتی رنگ ءَ چٹ بدل کنت ءُ یک نوکیں دابے مان پوش ایت ۔اے زمانگ ءَ لٹ وروکیں ملک نہ زانت کہ منی اسل دژمن کے انت چہ کجا من ءَ جنگ ءَ انت ۔ اے جنگانی تہ ءَ دژمن ملک ءِ سر ءَ وتی پوج ءُ سلا ءِ کارمرز کنگ نہ بنت بزاں ھما ملک ءُ جاگھانی نندوکیں مردم ءُ پارٹی کارمرز بنت اے جنگانی تہ ءَ چوں آسان ءَ جنگ دیوک زانگ دنت کہ کجام جنگی سلا بندے ءُ کجام سلٌایں مردمے ۔ اے جنگانی تہ ءَ آزادی لوٹوکیں گل گوریلا جنگجو ءُ ھمے دابیں مردم دومی ءُ سمی ملک کارمز کنت ءُ وتی دژمن ءَ پرش دنت ہمے زمانگ انت کہ پدائی بزاں جند ندری ءُ ھمے دابیں نوکیں سلا کارمرز کنگ بنت۔ اے زمانگ ءِ جنگانی تہ ءَ اگاں پہ درور بہ چارے گڑا افغانستان ، سِیریا ، عراق ، ایران ءُ بلوچستان ءِ جنگ ءُ ڈولیں جنگ ھوار انت ۔

پنچمی زمانگ : اے زمانگ نوکتریں ءُ هستیں وهد ءِ جنگ گشگ بنت اے زمانگ ءِ جنگانی نام ءُ توار اولی برا 2003 ءَ روبٹ اسٹیل ہیر کتگ بلے جنگی زانتکار والیم ءِ گوشگ اِنت کہ اے ہم جنگ ءِ چارومی زمانگ ءِ بھر انت ۔ اے زمانگ ءِ جنگاں ھمک مهلوک ھوار انت ھمک مردم یک بھرے اے زمانگ ءِ جنگ ءَ ھاموشیں جنگ ہم گوش انت کہ کس پہ کس ءَ سھی نہ بیت ءُ دژمن تاوان بار کنگ بیت ۔اے زمانگ ءِ جنگ بس ایوک ءَ گوں ٹیکنالوجی ءَ بندوکیں گوں نوکیں دور ءِ انٹلیجنس ءَ بندوکیں اے جنگ ءِ تہ ءَ دو مزنیں کار کہ 1 گلتیں ھال سر کنگ misinformation

2 ہمیں ھالانی پروپگنڈا کنگ اے زمانگ ءْ جنگانی تہ ءَ یک دومی ءِ ملک ءَ سکیورٹی ءِ اداراھانی چیریں ھال ءَ کش ءُ شنگ کنگ ءُ ہمے دابیں جیڑهاں چہ بلیک میل کنگ ۔ اے زمانگ ءِ جنگانی تہ ءَ انچش گیش انت کہ کرونا وائرس هم ھوار انت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گار ءُ بیگواھیں سنگت فیروز

نبشتہ کار: ھفیظ بلوچ

دی بلوچستان پوسٹ

مرچی من یک انچیں مھروان ءُ بے تواریں مردم ءِ واستا نبشتہ کنگ ءَ آں کہ آ مئے میان ءَ ساڑی نہ اِنت بلے آئی ءِ گوشتگیں  لبز یک یک ءَ یاد پیداک اَنت۔ فیروز کئے اِنت ؟ کجا اِنت ؟ چے واستا زندانی کنگ بوتگ ؟ لھتیں سوال اَنت سک دیریں منی مِجگ ءِ تھ ءَ ھست انت ءُ ھر وھد ءَ منی جبین ءَ لَرزین اَنت-

فیروز بلوچ ایرڈ شھدربرجاہ ءِ یک نودربرے ات دومی سیمسٹر ءَ وانگ ءَ اَت ءُ تربت ءِ جھمِنند اِنت ۔ 11مئی 2022ءَ فیروز بلوچ وتی دوارگِس ءَ چہ در کپ ایت دیم پہ لائبریری ءَ رھادگ بیت ۔ شھدربرجاہ ءِ نزدیک ءَ چہ آ آوار جنگ بیت کہ روچے مرچی کسے گواھے نہ کنت، کوٹی ءَ چہ درکپگ ءَ پیش آئی ءَ سنگت ھال دنت کہ من شَپ ءَ واتر کَن آں، اے شَپ ءَ رند دگہ ھپسد ءُ سی شپ گْوستگ بلے فیروز ءَ پد ءَ پہ دوارگِس ءَ واتر نہ کُتگ ۔ نو اے ھبر ءَ دو سال سرجم اِنت، ھئو دو سال! دو سال پہ کَھریں وَداراں دراجیں اُمبرے۔مردم گِلّھے اوں کُت نہ کَنت چیاکہ تو پہ وشی نہ رپتگ ئے بگندیں بدواھاں ترا کید ءُ زندانی کُتگ۔

یک ماتے دو روچ ءَ وتی ورنائیں بَچ ءَ چہ دور بہ بیت تاں آپ ءُ نان ءَ کَپ اِیت آ مات ءِ بچ کہ دو سالیں گار انت، کسے نہ زانت کہ کجا انت گُڑا آ ماتءِ دلءَ چے گْوز اِیت؟ تھاریں کوٹیانی تہ تئی دست ءُ پاد گوں سانکلاں بستگ اَنت ءُ ترا وڑ وڑیں سزا دئیگ ءَ انت، آہ فیروز!! تئی وڑیں وشگُپتاریں بنی آدم لائک ءِ زندان ءَ نہ اَنت ۔

تئی مات ءُ پت ءَ پہ تئی پد جنگ ءَ کُبلیں جگر آپ کُتگ اَنت۔ برے اے آمید گِس ءُ برے آ میر ءُ نوابانی دست ءُ پادانی کپگ ءَ دم برتگ اِش۔بلے تو بلوچے ئے پہ تو انساپ نیست۔ھمک پت ءِ واھشت بیت کہ منی بِچ ڈن ءَ روت وان اِیت ءُ مزن بیت منی ھم کوپگ بیت منی باندات ءُ پیری ءِ  ھسا جوڑ بیت اے ملک ءَ باند کئے ءَ دیستگ ترا تئی دژمن ءَ  مزن بوئگ ءَ پیسر آوار جت ءُ بیگواہ کُت ایردستی ءِ ٹیکی ھَمیش اَنت فیروز! مرچی تو بوتگ ئے ءُ باندا من۔

فیروز یار تو کجا ئے بسّیں نو بیا!! تئی سنگت، تئی کھول ءِ مردم پہ تو واداریگ اَنت تئی کماش ءُ پیریں مات ءِ ارمانے دِل ءَ انت، کائیگِر ءُ گُرانڈ اِش داشتگ کہ تو کائے آ گَل ءَ بال بنت ءُ شاتکامی کَن اَنت۔ ھو یار اے تھاریں کوٹیانی تہ ءَ تو ایوک نہ بہ ئے ھزارانی کساس ءَ بلوچ ورنا کسان ءُ پیر پاکستان ءِ زلم ءِ آماچ انت ۔من نزاناں تو کجایے چے کنگ ءَ ئے بلے اے گپ ءَ زان آں کہ تو لگّور نہ ئے تو چو بولان ءِ کوہ ءَ مِک ئے۔فیروز جان تئی روگ ءَ پد یک چیزے سما کت کہ تو ایوک نہ ئے تئی وڑ ءَ ھزارنی کساس ءَ  پاکستان ءِ لشکر مردم آوار جِتگ گوں وت برتگ اَنت ۔ ھزارانی ھساب ءَ کُنٹ دست کپتگ اَنت۔ یک گپّے ترا گوشگ لوٹ آں ھزارانی ھساب بلوچ ورنایانی جست کنگ ءُ جونانی دؤر دئیگ ءَ پد ھم بلوچ قوم نزور تر کنگ نہ بوتگ۔ مرچی تئی قوم ترا چے ھوار ھما کہ زندان ءَ بند اَنت یا شھید کنگ بوتگ اَنت گیشتر یاد کنگ بوئگ ءَ اِنت مرچی تئی قوم وتی بندیگانی ھاتر ءَ روانک کشگ ءَ اِنت پاکستان ءَ ابید دری ملکاں ھم روانک کشگ بوئگ ءَ اَنت ۔بلے اے ریاست ءَ نزور کرت نہ کُت انت۔

تئی آوار جنگ ءَ پد کلّیں نودربرانی تہ ءَ وڑ وڑیں سوال ءُ ڈسکیشن بندات بوتگ انت بازیں سنگتاں وتی ھسابیں تھیوری دیم ءَ آرت ءُ ھمئے جیڈاِت اِش تو چیزے کتگ آوار جنگ بوتگے ساھتے پد من ھمئے جیڑ اِت کہ چو ریاست ءَ ھزارانی ھساب بلوچ ورنایاں اش چِست کُتگ گُڑا درائیں مردم چیزے نہ چیزے کتگ من وتی اندر ءَ جیڑ اِت، ءُ ھمے پسہ رس اِت کہ اناں یار تو ھچ نہ کُرتگ، توبس یک بلوچے بوتگے تئی نام ءِ دیم ءَ بلوچ نبشتہ بوتگ بس تئی گناھ ءُ میار ھمئے بوتگے۔ یک ایردستیں زمین ءِ دلبند مردمانی چِست کنگ کُشگ ءُ دور دئیگ ٹارچر سیلانی تہ ءَ بند کنگ ءُ بلوچ ورنایانی کُنٹاں کوہ ءُ گیاباناں  دور دئیگ نوکیں ھبرے نہ انت۔ اے دراھیں زلم ءُ زوراکی یک گلامیں چاگردے ءِ بھر اَنت۔ کبزہ گیر وتی کبزہ ءِ مھکم کنگ ءِ ھاترا وتی سرجمیں تاکت ءَ کارمز کنت یک ترسے تالان کنت ۔ بلوچ قوم ءِ بچانی آوار جنگ ریاست ءِ واستا یک کسانیں گپے چوناھا ریاست بلوچ ءِ ورنایاں انسان نہ لیک اِیت چو گوگ ءُ پس ءِ پیماں چگل ءُ دور دئنت۔ اے پہ بلوچ ءَ نوکیں کارست ءِ نہ اِنت۔ مرچی مئے کسان ءُ مزن ریاست ءِ زلم ءِ آماچ اَنت سالانی سال کِس گواھائی ءَ نہ دے انت کہ شمئے مردم کئے برتگ اَنت ءُ کئی کِرا ءَ اَنت۔ بس ھمئے پیم بیت یار دوا اِنت کہ زوت آجو بات ئے ارواہ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔