TBP Balochi

چہ مستونگ ءَ پاکستانی پوج دست ءَ زورانسری بیگواہ دو مردم آجو بیتگ اَنت-

گیشیں ھالانی رِد ءَ آجو بیتگیں مردمانی تہ ءَ یکے ءِ پجّار مستونگ ءِ جھمنند حافظ محمد اسحاق نام ءَ چہ بیتگ-

اے مرد ھپدہ اکتوبر دوھزار بیست سے ءَ پاکستانی پوج ءَ آوار جتگ-

بیگواہ کنگ بیتگیں مردم سرکاری کاردار ءُ معلم القرآنے کہ اشی ءَ ساری ھم زورانسری آوار جنی ءِ نشانگ کنگ بیتگ-

وھدے کہ دگہ یک بیگواھے فھیم ء کمال خان ھم یک سالے ءَ ساری پاکستانی پوج ءَ بیگواہ کتگ آ ھم آجو بیتگ ءُ وتی لوگ ءَ سر بیتگ-

ھیبر پکتونواہ ءِ ھند ھیبر ءَ یازدہ اکتوبر ءَ پشتون راج ءِ برجم بیوکیں جرگہ ءَ ھواریں داں انگت ءَ دو سد ءَ گیش مردم دزگیر کنگ بیتگ اَنت-

پشتون تھپز ءِ مومنٹ ءِ سروک منزور پشتین ءَ شاگردی ترامجاہ ایکس ءَ ٹویٹ کنان ءَ گوشتگ گوستگیں سَے روچاں پشتون جرگہ ءِ دو سد ءَ گیش باسک دزگیر کنگ بیتگ اَنت-

آئی ءَ گوشتگ جرگہ ءَ ھواریں مردمانی سر ءَ پاکستانی لشکر ءِ لٹ ءُ کٹ، دزگیری، آنسو گیس، جرگہ ءِ تمبوانی ماندارگ ءُ پشتون دودانء لگتمال کنگ ءَ پاکستانی میڈیا گندگ نہ بیت اِنت-

آئی ءَ گوشتگ ریاست ءَ ھمک پھناتاں پشتون دوری، نپرت، جھل دابی ءُ دشمنی ءِ کلوہ داتگ- بس ھما پشتوناں دلگوش ءُ لھتے زَر دیگ انت کہ پشتونانی لگتمالی ءَ آیانی ھمراھداری ءَ آیانی کیمپین ءِ بھر اَنت-

آئی ءَ گوشتگ اے گیر انسانی رویش مئے گون ءَ داں چُنت روچ ءَ برجاہ بیت اِنت-

زانگ بہ بیت پشتون جرگہ یازدہ اکتوبر ءَ بیگی اِنت کہ اود ءَ پشتون راج ءِ یکجاھی ءُ وتی سر ءَ بیوکیں زوراکی، ھکانی ھاتر ءَ جد ءُ جھد ءِ مسام بیگ ءَ انت-

روکپتی بلوچستان ءَ ھواریں دمگ استان خراسان ءِ ھند زابل ءَ مھلوک ءَ تیلانی کم کنگ ءُ کارتانی چار ءِ بندش ءِ ھلاپ ءَ زھرشانی کتگ-

زھرشانی زابل تیل جاہ ءِ دیم ءَ کنگ بیتگ کہ اود ءَ گاڑیانی واھنداں بازیں کچے ءَ ھوار بیتگ ءُ زھرشانی اش کتگ-

آیاں گوشتگ مئے تیل کارت کم کنگ ءُ شش سد لیتر کنگ بیتگ کہ اے تیل مارا ھچ نہ بنت اِنت ءُ اے داب ءَ مارا یکدم تاوانانی اِنت –

آیاں گوشتگ تیل ءِ واکدار بایاد اے چیزانی سر ءَ گامگیج بہ زیر اَنت ءُ مارا تیل بہ دے اَنت-

آیاں گوشتگ سیستان ءَ دگہ واپار نیست ابید کشت ءُ کشاری ءَ آپ نیست اِنت گڑا اے تیل چون پُج اَنت-

مزنیں گاڑیانی واھنداں گشتگ کہ اے تیل ءَ سِی ٹنکر اوگانستان ءَ برگ ءُ بھا کنگ ءَ اَنت اے نپ جھمنندین مردماں رسگ ءَ نہ اِنت ادے مھلوک مرگ انت باید اولی ھک ھمے مردمانی بہ بیت اِنت-

آیاں گوشتگ ءُ لوٹ کتگ کہ مئے کارت پچ کنگ ءُ مارا مئے ھساب ءَ تیل دیگ بہ بیت اِنت-

آواران ءَ دلجان بلوچ ءِ یل کنائینگ ھاتر ءَ ڈپٹی کمشنر ءِ کارگس دیم ءَ نندانک برجاہ ءَ اِنت، پاکستانی پوج ءَ زھرشانی کنوکیں بیھار داتگ اَنت-

گیشیں ھالانی رِد ءَ چہ آواران ءَ زورانسری آوار جنی ءِ نشانگ بیتگیں دلجان بلوچ ءِ یل نہ کنگ ءِ ھلاپ ءَ آئی ءِ کھول ءَ دمگ مردمانی ھمراھی ءَ ڈپٹی کمشنر آواران ءِ کارگس دیم ءَ نندانگ داتگ-

آواران ڈپٹی کمشنر ءِ کارگس دیم ءَ نندانک دومی روچ ءَ ھم برجاہ بیتگ مزنیں کچے ءَ زالبول ءُ زھگانی ھمراھی ءَ ھوار بیتگ اَنت-

زھرشانی کنوکاں ڈپٹی کمشنر ءِ کارگس دیم ءَ نندانک دیان ءَ ھمے سال ءِ دوازدہ جون ءَ آواران ءِ دمگ تیرتیج ءَ پاکستانی پوج دست ءَ بیگواہ بیگ ءَ پد زورانسری آوار جنی نشانگ بیتگیں دلجان بلوچ ء اللہ بخش پہ سلامتی یل کنائینگ لوٹ کنگ ءَ اَنت-

ھمے وھد ءَ دمگ مردمانی ھمراہ دگہ بیگواھیِ مردمانی کھول ھم زھرشانی نندانک ءَ ھوار بیتگ اَنت ءُ آواران ءَ ھوار چہ بلوچستان ءَ زورانسری بیگواھیں مردمانی یہ کنائینگ لوٹ کنگ ءَ اَنت-

آواران نندانک ءَ ھوار زھرشانی کنوکانی رِد ءَ پاکستانی پوج ءۃ دمگی انتزامیہ نیمگ ءَ چہ آیانی پُر ایمن نندانک ءَ نشتگیں مردم بیھار داتگ اَنت کہ آ وتی زھرشانی نندانک ءَ ھلاس بہ کن اَنت بلے دلجان بلوچ کھول ءُ آ دگہ مردماں دلجان بلوچ ءِ یل کنگ ءَ دروشم ءَ نندانک ءِ برجاہ دارگ جار جتگ-

بلوچستان لبریشن پرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ کیچ ءِ دمگ تجابان ءَ برجاھیں زورگریں پوج ءِ بُنجل سر ءَ راکٹ آس داتگ کہ بُنجل ءِ تہ ءَ کپتگ، چریشی ءَ چہ دُژمن ءَ مزنیں کچے ءَ مالی تاوان چست کنگ کپتگ-

جارکش ءَ گوشتگ اے کاروائی چار ءُ پنچ اکتوبر ءِ میانی شپ دوازدہ نزیک ءَ کتگ – اُرش ءَ پد تُرس آماچیں پوج ءَ شھری آبادی سر ءَ سر ءُ دیم مارٹر آس داتگ چریشی ءِ آسر ءَ یک جنکوے ءِ ٹپی بیتگ-

جارکش ءَ گْوشتگ ریاست پاکستان مدامی وڑ ءَ سرمچارانی اُرش ءَ پد بیگیری کاروائیاں لَس شھریاں نشانگ کتگ دانکہ بلوچ راج ءَ را سرمچارانی پلامرزی ءَ داشت بہ کنت- بلے راستی اش اِنت کہ بلوچ سرمچاراں توانمندی بلوچ راج ءِ پلامرزی اِنت ءُ راج ءِ کمک ءَ چہ بلوچستان ءِ آجوئیں ریاست ءِ واب ءَ راست کن اَنت-

جارکش ءَ گوشتگ بلوچستان لبریشن فرنٹ اے اُرش زمہ واری ءَ منّ اِیت ءُ پوج ءِ دراھگ ءَ تاں اُرشاں برجاہ دار اِیت-

بلوچ لبریشن آرمی ءِ جارکش جیئند بلوچ ءَ کلات ءَ پاکستانی پوج ءِ سر ءَ بیتگین اُرش ءِ زمہ واری منان ءَ گوشتگ مروچی کلات ءَ پاکستانی پوج ءِ کاروان ءَ ھواریں گاڑی ءِ آئی ای ڈی ءِ نشانگ کنگ ءِ ھواری ءَ سربستگ ءُ ارش کتگ، اُرش ءَ دشمن ءِ نُھ کارندہ کشتگ ءُ پنچ زدگ کتگ اَنت-

جارکش ءَ گوشتگ کلات ءِ ھند دشت مھمود ءَ بی ایل اے ءِ سرمچاراں زورگرین پاکستانی پوج ءِ کاروان ءَ ھواریں پک اپ گاڑی ریموٹ کنٹرولڈ آئی ای ڈی ءِ اُرش ءِ نشانگ کتگ – چریشی ءِ آسر ءَ گاڑی ءِ دراھیں سواریں پنچ کارندہ جاہ پہ جاہ ءَ مرتگ انت ءُ سر بستگ ءُ سرمچاراں کاروان ءَ ھواریں دگہ گاڑی مزنیں سلاھانی گون ءَ نشانگ کتگ انت چریشی ءِ آسر ءَ دگہ چار کارندہ مرتگ ءُ کم چہ کم پنچ زدگ بیتگ اَنت-

جارکش ءَ گوشتگ بلوچ لبریشن آرمی ءِ سرمچاران دگہ کاروائی یے بیست ءُ ھشت ستمبر ءَ گوادر ءِ ھند پسنی ءَ اینٹی نارکوٹکس ءِ کارندھانی دزبمبے ھما وھد ءَ چگل داتگ کہ آ وتی بنجل ءِ نزیک ءَ مُچ بیتگ اَنت ءُ تراک ءَ کارندھانی جانی ءُ مالی تاوانانی دیمپانی کنگ کپتگ-

جیئند بلوچ ءَ گوشتگ اے اُرشانی زمہ واریاں بلوچ لبریشن آرمی من ایت ءُ دشمن ءِ سر ءَ اُرشانی درچانی برجاہ دارگ ءِ سِتک ءَ کنت اِنت-

سلاہ بندیں مردماں کلات نزیک ءَ پاکستانی پوج ءِ یک کاروانے اُرش نشانگ کتگ، واکدار رِد ءَ سے کارمند بیران ءُ چار ءِ ٹپی بیتگ اَنت-

بلوچستان ءِ دمگ چہ کلات ءَ ھال اِنت کہ سلاہ بندیں مردماں پاکستانی پوج ءِ یک کاروانے تُرندیں اُرش ءِ نشانگ کتگ کہ اود ءَ بمب تراک ءَ پد تُرندیں تیرگواری ءِ توار ھم اش کنگ بیتگ-

چہ کلات ءَ دزکپتگیں ھالانی رِد ءَ کلات ءِ دمگ کلی دشت محمود ءَ پاکستانی پوج ءِ کاروان ءَ ھواریں گاڑیانی سر ءَ بمب تراک ءَ پد سلاہ بندیں مردماں اُرش کتگ ءُ دانکہ دیراں تیرگواری ءِ درچ برجاہ بوتگ-

پولیس ءَ اُرش راست کتگ گوشتگ کہ اُرش ءَ سے کارمند بیران ءُ چار ٹپی بیتگ اَنت- اُرش ءَ ٹپی ءُ لاش نادُراھجاہ برگ بیتگ اَنت وھدے کہ پاکستانی پوج ءَ دمگ انگر ءَ کتگ-

زانگ بہ بیت کہ اے دمگ ءَ بلوچ آجوئی لوٹوکیں سلاہ بندیں گل جاڑیگ اَنت، اود ءَ جتاجتائیں وھداں پاکستانی پوج اُرشانی نشانگ کتگ اَنت، بلے اے اُرش زمہ واری انگت ھچ گل ءَ نہ زرتگ-

پلستین ءِ سلاہ بندین گل حماس ءَ گوریچانی لبنان ءَ یک میار داریں بنجلے ءِ سر ءَ اسرائیل ءِ اُرش ءَ کمانڈر ءِ بیرانی ءِ ھال راست کتگ-

ھال سرکنوکیں ادارہ اے ایف پی ءِ رد ءَ ھماس ءَ یک درشانے ءَ کمانڈر سعید عطاء اللہ علی ءِ بداوی بنجل ءَ جاریگیں لوگ ءَ اسرائیل ءِ اُرش ءَ آئی ءِ لوگبانک ءُ دو جنک کُشگ بیتگ اَنت-

گزہ ءِ جنگ ءِ بندات ءَ اسرائیل ءَ اولی رند ءَ بداوی بنجل نشانگ کتگ-

زانگ بہ بیت لبنان ءَ پلستین ءِ بازیں میاردار بنجل ءَ ھست اَنت کہ اود ءَ بازیں کساسے ءَ پلستین ءِ مھلوک جھمنند اَنت-

زانگ بہ بیت میان رودراتک ءَ چست جنگ ءَ جاورھال ناگیگی ءِ دیمپان اَنت ءُ گوستگیں روچاں اسرائیل ءِ سر ءَ ایران ءِ اُرشاں پد گیشتر جاور ناگیگی ءِ دیمپان اَنت-

اسرائیل ءِ ایران ءِ سر ءَ وتی بیر ءِ گرگ ءَ دوبر آئی ءِ سر ءَ اُرش کنگ ءَ سوڑگ اِنت ءُ دومی نیمگ ءَ میان اُستمانی تکاں ایران ءُ اسرائیل ءِ میان چست بیوکیں جنگ ءَ تاوانانی نگاھاں چارگ ءَ اَنت-

پاکستان تھریک انساپ (پی ٹی آئی) ءَ درشان دیان ءَ گوشتگ سروزیر ھیبرپکتونواہ علی امین گنڈاپور کے پی ھاؤس ءَ دزگیر کنگ بیتگ بلے داں انگت ءَ سرکاری تکاں ھال راست نہ بیتگ-

تھریک انساپ ءَ آدینگ ءِ روچ ءَ ڈی چوک اسلام آباد ءَ زھرشانی مُچی کنگ ءِ جار جتگ بیتگ کہ دومی روچ ءَ علی امین گنڈاپور اسلام آباد ءَ سر بیتگ-

علی امین کے پی ھاؤس ءِ سربوگ ءَ پد رینجرز ءُ ایف سی ءِ بازیں کارمند تہ ءَ پترتگ اَنت ءُ چریشی ءَ پد علی امین ءِ برات فیصل امین ءَ ھال داتگ کہ علی امین دزگیر کنگ بیتگ-

آمیدگس ءَ گیرکانونی سلاہ ءُ شراب ءِ بھتام ءِ کیس ءَ علی امین گنڈاپور ءِ ناکابل زمانت وارنٹ دزگیری ءِ جار جتگ-

آمیدگس ءَ گوشتگ بازیں رنداں آمیدگسی پرمان ءَ ابید علی امین گنڈاپور آمیدگس ءَ پیش نہ بیتگ- ءُ آ دزگیر کنگ ءُ آیوکیں پیشی ءَ پیش کنگ بہ بیت اِنت-

پاکستان ءِ اُستان پنجاپ ءِ جاورھالانی گر ءُ دار کنگ ءَ اُستانی سرکار ءَ پوج ءِ کمک لوٹ اتگ-

شمبے ءِ روچ ءَ پنجاپ سرکار ءَ اے درگت ءَ یک نوٹیفکیشنے شنگ کنان ءَ گوشتگ آئین آرٹیکل 245 ءِ تکا پوج استان ءَ لوٹارینگ بیتگ-