TBP Balochi

بلوچ لبریشن آرمی ءِ میڈیا ونگ ھکّل ءَ بی ایل اے مجید بریگیڈ ءِ فدائی ءِ اکس شنگ کتگ-

بی ایل اے ءِ رد ءَ چینی شھریانی کاروان بی ایل اے مجید بریگیڈ ءِ فدائی سرمچار شاہ فھد پنام ءِ آپتاب ءَ نشانگ کتگ-

بی ایل اے ءِ رد ءَ شاہ فھد ءَ شورواں پُرین گاڑی کاروان ءَ ٹکر جتگ ءُ شھیدی پہ وتی نام ءَ کتگ-

زانگ بہ بیت بی ایل اے ءِ فدائی یونٹ مجید بریگیڈ ءَ کراچی ءَ جناح ائیرپورٹ ءَ درایوکہں چینی انجنیئر ءُ زرکارانی یک گچینی کاروانے فدائی وی بی آئی ای ڈی اُرش ءِ نشانگ کتگ ءُ بازین چینی آیانی پھزداری ءَ پوجی مرتگ اَنت-

سندھ ءِ تھ ئِے کارانی وزیر ضیاء الحسن لنجار ءَ اے گپ ءِ پدرائی کتگ کہ کراچی ءِ تراک ءَ درملکی مردمانی کاروان نشانگ جوڑ کنگ بوتگ۔

کراچی بالی پٹ ءِ نزیک ءَ تراک ءِ جاہ ءَ چہ میڈیا ءَ گوں تران کنان ءَ آئی ءَ گشتگ کہ ھمے ھال ھست انت کہ تراک آئی ای ڈی انت، تراک ءِ آماچیں گاڑیانی تہ ءَ دری شھری سوار بوتگ انت۔

سندھ ءِ تھ ئِے کارانی وزیر ءَ گشتگ کہ تراک ءِ تہ ءَ جانی ءُ تاوان ءِ ھال ھست انت وھدیکہ تراک ءِ بابت ءَ گیشیں زانتکاری ءِ گرگ ءَ گیشیں سبوت یکجاہ کنگ ءَ پد چیزے گشگ بوت کنت۔

زانگ بہ بیت کراچی ءِ بالی پٹ ءِ نزیک ءَ مزنیں تراکے بوتگ کہ آئی ءِ توار شھر ءِ تہ ءَ دُور ءُ دراج ءَ گوشدارگ بوتگ ءُ تراک ءِ سبب ءَ درجناں گاڑی آس ءَ گپتگ اَنت۔

کراچی ءِ تراک ءَ چہ ھما دمان ءَ پد بلوچستان ءَ سرگرمیں آجوئی دوستیں سلاہ بندیں گل بلوچ لبریشن آرمی ءَ اے اُرش ءِ زمہ واری من اِتگ ءُ رسانکدر ءَ دیم داتگیں بیانے ءِ تہ ءَ گْوشگ بیتگ کہ بی ایل اے ءِ فدائیں یونٹ ءِ مجید برگیڈ ءَ کراچی ءِ جناح بالی پٹ ءَ چینی انجینئر ءُ سرمایہ کارانی یک مزنیں کچے ءِ کاروان ءِ فداین VBIED ءِ اُرش ءَ نشانگ جوڑ کتگ ءُ بازیں چینی ءُ آھانی سیکورٹی کارندہ کشتگ انت۔

آئی ءَ گوشت کہ بی ایل اے ءَ اے اُرش ءِ زمہ واری زرتگ ءُ ایشی ءِ بابت ءَ گیشیں اھوال زوت رسانکدر ءَ شنگ کنگ بیت۔

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ بی ایل اے ءِ فدائی بُنز مجید بریگیڈ ءَ کراچی جناح ائیرپورٹ ءَ دراؤکیں چینی انجنیئر ءُ سرمایہ کارانی یک مزنیں کاروانے یک فدائی وی بی آئی ای ڈی اُرشے ءَ نشانگ کتگ اَنت بازیں چینی یے ءُ آیانی پھازوکیں پوجی کارمند کشتگ اَنت-

جارکش ءَ گْوشتگ بی ایل اے اے اُرش زمہ واری ءَ منّ اِیت – گیشیں ھالاں زوت رسانکدر ءَ شنگ کنت-

چہ شال ءَ سیادی داروکیں کلانیں اِھوالکار جمال ترکئی دزگیر کنگ ءَ پد مروچی بیگاہ ءَ بروری تھانہ ءَ بندیگ کنگ بیتگ-

آئی ءِ کھول رِد ءَ جمال ٹپی ئیں جاوراں بی ایم سی نادُراھجاہ سر بیتگ، پولیس ءَ الاج ءِ میان گپتگ ءُ تھانہ ءَ برتگ-

زانگ بہ بیت کہ جمال ترکئی مروچی انتزامیہ ءُ پولیس نیمگ ءَ چہ چشمہ اچوزئی ءَ یک کاروائی ءِ پیشدارگ میان ءَ لَٹ کٹانی نشانگ کتگ-

آئی ءِ اِھوالکاریں سنگتاں چہ آئی ءَ آئی ءِ یل بیگ ءِ پدری کتگ-

اِھوالکاراں وئیل ایر جتگ گوشتگ کہ کجام ھما وئیل ءِ پیشدارگ اِھوالکارانی ھک اِنت، جمال پیشدارگ میان پولیس ءَ لَٹ کُٹانی نشانگ کتگ اے کبول کنگ نہ بیت-

بلوچستان ءِ دمگ ڈیرہ بگٹی ءِ تھسیل چہ سوئی ءِ جتاجتائیں دمگاں ھال اِنت کہ پاکستانی پوج مزنیں کچے ءَ سر بیتگ-

دمگی وسیلگ رِد ءَ چہ سوئی ءَ ھمگرنچیں دمگ کہ رائیس توخ، لنجو، سغاری ءُ کشمور دگ ءَ چہ بگر موھن پٹ دگ ءَ تاں سرجمیں کچی کینال ءِ کش گور ءِ دمگاں پوج ءَ سرجمی ءَ انگر ءَ کتگ ءُ آزمان ءَ سرویلنس ڈرونزاں چہ دمگ ءَ چارگ ءَ اِنت-

وھدے کہ دمگاں جھمنندیں سرجمیں مالداراں دمگ ھالیگ کنگ ءِ پرمان دیگ بیتگ-

دومی نیمگ ءَ ھال اِنت کہ چل ءَ گیش پوجی گاڑی ٹرک اے دمگ ءَ پُترتگ اَنت وھدے کہ رائیس توخ ھند سر ءَ پوجی چوکیانی نیمگ ءَ چہ کش گور ءِ دمگاں تیرگواری ءُ تراکانی ھال اِنت-

بلوچستان لبریشن فرنٹ ءَ شنگ کتگیں درشان ءِ تہ ءَ مند ءَ پاکستانی پوج ءِ سر ءَ اُرش ءُ کوھلو ءَ ٹاور ءِ ماندارگ ءِ زمہ واری منّ اِتگ انت-

جارکش ءَ گْوشتگ کہ مئے سرمچاراں کیچ ءِ ھند مند ،چکاپ ءَ برجاھیں زورگریں پاکستانی پوج ءِ ٹوھیں بنجل ءِ پانگس ءِ سر ءَ چہ دو نیمگ ءَ گوں ٹوھیں سلاھاں نشانگ کُرتگ، اُرش داں پانزہ دمان ءَ برجاہ بیتگ۔

جارکش ءَ گوشتگ اے اُرش ءَ گل ءِ اسنائپر ٹک تیراں پیسر ءَ دژمن ءِ دو کارمند نشانگ کُرتگ ءُ کُشتگ، پد ءَ گوں نوک ءُ ٹوھیں سلاھاں نشانگ کُرتگ کہ چہ ایشی ءَ دژمن ءَ گیشتِر جانی تاوان بیتگ۔

جارکش ءَ گوشتگ اے سوبمندیں اُرش پنچ اکتوبر ءَ شمبے ءِ بیگاہ ءِ پنچ ءَ کنگ بیتگ۔

آئی ءَ گْوشتگ کہ اے اُرش دژمن ءِ پانگس ءِ یک بھرے سرجم ءَ تباہ بیتگ۔ دژمن ءَ وتی پروش ءِ چیر دیگ ءَ وتی مُرتگ ءُ ٹپی بیتگیں کارمندانی پجار ءِ چیر دیگ ءِ بے سوبیں جُھدے کنگ ءَ اِنت داں کہ وتی پوج ءَ چہ دلپروشی ءَ بہ رکین ایت۔

جارکش ءَ گوشتگ اُرش ءَ پد پروش وارتگیں دژمن ءَ کوھی دمگاں ماٹر آس داتگ ءُ سرمچارانی رندگیری کنگ ءِ جُھد کُرتگ بلے سرمچار پہ دْراھی وتی مھکمیں دواراں سر بیتگ اَنت۔

جارکش ءَ گوشتگ کہ بی ایل ایف راجی گلے ءُ بی ایل ایف ءِ ھرچ کار گوں شوربندی ءُ اِھوتی پتر ءِ پٹ ءُ پول ءَ پد کنگ بیت داں کہ گھتر ءُ مھکمیں کارانی پارست ءَ دژمن ءَ گیشاں چہ گیش تاوان بہ بیت ءُ آ گیش زھنی ءُ سَسّائی پریشانی ءِ آماچ بہ بیت ءُ اے کارشونی چیرجنگی جنگ ءِ لوٹ اِنت۔

جارکش ءَ ￴گوشتگ کہ سرمچاراں چار اکتوبر ءِ ￵شپ ءِ ￵ھشت ءُ ￶نیم ءَ ￴کوھلو ءِ ￵ھند چمالنگ ءَ ￴کھرا ءِ ￵کوہ ءَ ￴مک کرتگیں موبائل ٹاور ءِ ￵سر ءَ ￴تیرگواری کرتگ ءُ ￶مشین ءُ ￶سامان مانداشتگ تباہ کتگ اَنت۔

جارکش ءَ ￴گوشتگ کہ پاکستان وتی ھال اھوال نزام ءِ ￵دام ءَ ￴چیر دیگ ءُ ￶بلوچ سرمچارانی ٹریس کنگ ءِ ￵جھد ءَ ￴اِنت، بلے گل ءِ ￵چیریں تک اے درسیں چیزاں سرپد اِنت پمیشکا سرمچار ءُ ￶چیریں تک اے سرجمیں ٹاوراں نشان کنگ ءَ ￴پد نشانگ کنگ ءَ ￴اَنت۔

میجر گوھرام ءَ ￴گوشتگ اُرش ءِ ￵زمہ واری ءَ بی ایل ایف ءَ منّ اِتگ ءُ ￶گوشتگ کہ داں بلوچستان ءِ ￵آجوئی ءَ ￴پاکستانی پوج ءُ ￶آئی شوربندیاں نشانگ کن ایں۔

پاکستان ءِ تھ ئِے کارانی وزیر ءَ پشتون تھپز مومنٹ( پی ٹی ایم) ءِ سر ءَ بندش ءِ جار جتگ۔

یک شمبے ءِ روچ ءَ وزارت داکلہ ءِ نیمگ ءَ شنگ بوتگیں نوٹیفکیشن ءِ تہ ءَ گْوشگ بوتگ کہ ” ترندیں منانکانی پژدر ءَ پشتون تھپز مومنٹ ءِ سر ءَ بندش جنگ ءِ پیسلہ کنگ بوتگ“۔

وزارت داکلہ ءِ نیمگ ءَ چہ شنگ بوتگیں نوٹیفکیشن ءَ گشگ بوتگ کہ ‘پی ٹی ایم راجی ھلاپیں بیانیہ ءُ برانزکاری شنگ کنگ ءَ ھوار اِنت’۔

وزارت داکلہ ءَ سرکاری ءَ پی ٹی ایم ءِ سر ءَ بندش ءِ نوٹیفکیشن شنگ کتگ ایشی ءَ پد ایشی ءِ سر ءَ امل کنگ بیت اِنت-

بلے پی ٹی ایم ءِ گشگ انت کہ آئی ءِ کور کمیٹی ءِ دیوان برجاہ انت ایشی ءَ پد اے جیڑھ ءِ سر ءَ سرجمی ءَ بیان شنگ کنگ بیت انت۔

دو روچ پیسر 4 اکتوبر ءَ پشاور ہائی کورٹ ءَ خیبر ضلع ءَ پی ٹی ایم ءِ نیمگ ءَ چہ برجم بیوکیں ‘راجی جرگہ’ ءِ بابت ءَ گشتگ ات کہ ‘جرگا بہ بیت ءُ پد ءَ ما چاریں کہ آ چے کن انت’۔

”راجی جرگہ” ءِ ھلاپ ءَ دائر کتگیں درخواست جمعہ ءِ روچ ءَ دو باسکی بینچ ءَ گوشدارگ بوتگ کہ ایشی ءِ تہ ءَ پشاور ہائی کورٹ ءِ جسٹس سید ارشد علی ءُ جسٹس وقار احمد ھوار انت۔

ضلع خیبر ءِ نندوکیں ھاتر اللہ ءَ پی ٹی ایم ءِ ‘ راجی جرگہ’ ءِ ھلاپ ءَ پشاور ہائی کورٹ ءَ درھواست داتگ ءُ جرگہ ءِ بند کنگ ءِ لوٹ کتگ۔

درخواست گزار ءِ لوٹ ایش انت کہ پاکستان ءِ جوڑ بوگ ءَ پد ملک ءَ آمید گس ھست انت ءُ ھوار بوتگیں دمگانی تہ ءَ ھم آمید گس جوڑ کنگ بوتگ انت۔

پی ٹی ایم نسل پرستی ءِ دیمروئی ءَ چہ خیبر ضلع ءَ ‘پشتون راجی آمیدگس’ ءِ نام ءَ یک لس آمیدگسے جوڑ کنگ لوٹ ایت کہ ایشی ءِ ھاتر ءَ داوت نامہ ھم شنگ کنگ بوتگ اَنت۔”

درھواست گزار ءِ لوٹ ایش انت کہ ‘چیا کہ جرگہ ءُ پنچایت ءِ پیسلہ گیر انسانی سزا ءِ سر ءَ بندوک انت، آمید گس پی ٹی ایم ءِ 11 اکتوبر ءِ جرگہ ءَ را مھتل بہ کنت۔’

ایشی ءَ چہ پیسر یکم اکتوبر ءَ پی ٹی ایم ءَ گشتگ کہ سئے شمبے ءِ شپ ءَ پشاور پولیس ءَ ضلع خیبر ءِ دمگ جمرود ءَ ‘پشتون راجی جرگہ’ ءِ دیوان جاہ ءِ سر ءَ اُرش کتگ وھدے کہ پد ءَ پولیس ءُ پی ٹی ایم ءِ کارندہ آنی نیام ءَ درگیری بوتگ۔

پی ٹی ایم ءِ سروک منظور پشتین ءَ وتی جاری بیان ءَ گوشتگ کہ پشاور پولیس ءِ ارش ءِ وھد ءَ ھم تیر گواری کنگ بوتگ کہ ایشی ءِ تہ ءَ بازیں کارمند ٹپیگ بوتگ اَنت وھدے کہ تمبع ھم ماندارگ بوتگ اَنت۔

منظور پشتین ءِ بیان ءَ گشگ بوتگ کہ جرگا ءِ جارچیناں پد ءَ تمبو ایر کتگ انت کہ رند ءَ پولیس ءَ گمانی گولہ باری کتگ ءُ تیرگواری کتگ کہ ایشی ءِ ویڈیو سوشل میڈیا ءَ ہم شنگ بوتگ انت۔

پی ٹی ایم ءَ سرجمیں صوبہ ءَ برجاھیں ناامنی ءِ ھلاپ ءَ 11اکتوبر ءَ ضلع خیبر ءَ ‘پشتون قومی جرگہ/آمیدگس’ ءِ نام ءَ جرگہ ءِ برجم دارگ ءِ شوربندی جوڑ کتگ ات۔

اے جرگہ ءِ واستا چہ خیبرپختونخوا ءُ بلوچستان ءَ درستیں سیاسی پارٹیانی رہشون، قوم پرست ءُ جتاجتائیں دگہ رہشون لوٹائینگ بوتگ انت۔

جرگا ءَ سئے روچ ءَ برجاہ دارگ بوگ ءِ کہ ایشی ءِ ھاتر ءَ یک سرجمی ءَ شیڈول ءِ ھم جار جنگ بوتگ کہ ایشی ءِ تہ ءَ سئے روچ ءَ جرگا ءِ باسک جتا جتائیں دیوان کن اَنت ءُ دمگ ءِ جیڑھانی سر ءَ گپ ءُ تران کن اَنت۔

خیبر ءِ ریگی لاما ءِ دمگ ءَ جرگہ ءِ واستا تمبو جنگ بیتگ انت-

منظور پشتین ءَ چہ ارش ءَ پد شنگ بوتگیں بیانے ءَ گْوشتگ کہ ”دنیا ءِ سرجمیں زوراک مئے جرگہ ءَ ناکام کُت نہ کن اَنت ءُ ما جرگہ ءِ برجم دارگ ءَ برجاہ داریں“۔

آئی ءَ گْوشتگ اَت کہ سرجمیں کارمند سامان ءُ بستر ءِ ھمراھی ءَ جرگا ءِ میدان ءَ سر بہ بنت ءُ پولیس ءِ نیمگ ءَ چہ ارش ءِ سک مذمت کتگ۔ پولیس ءَ لھتے نادراہیں کارمند ھم دزگیر کتگ اَنت۔

منظور پشتین ءِ گشگ ءِ رد ءَ: ‘ما پشتون ءِ دمگ ءِ ناامنی ءِ کنٹرول کنگ ءِ ھاترا جرگہ ءَ کنگ ءَ ایں بلے اے شرم ءِ گپے کہ ما گریوگ ءَ ایں کہ راج ءُ پولیس یک اَنت بلے پولیس ءَ جرگہ ءِ جارچینانی سر ءَ ھما وھد ءَ ارش کتگ کہ آ واب بوتگ اَنت۔ ‘

بلوچستان ءِ دمگ نوشکی ءِ نزیک ءَ ڈیورنڈ لائن ءِ سر ءَ پاکستانی لشکر ءُ اوگان لشکر ءِ نیام ءَ مزنیں جنگ ءُ مڑ، یکے دومی ءِ پوزیشن ءِ سر ءَ راکٹ ءُ دگہ آٹومیٹک سلاھاں گوں اُرش کتگ بیتگ۔

دمگی ھالانی رد ءَ اے جنگ ءُ جِدال ءِ تہ ءَ پاکستانی لشکر ءِ دو کارندہ ءِ بیرانی ءِ ھال ھست ءُ دمگ ءَ تیرگواری ءُ تراک ءِ توار انگت ءَ برجاہ اِنت۔

دومی نیمگ ءَ پاکستانی اُرد ءِ بنشون ءَ اے ھال ءِ توک ءَ اوگان اُرد ءِ کارندھانی بیران بوھگ ءِ ٹاپار جتگ-

زانگ بہ بیت کہ اوگان ءُ پاکستانی لشکر ءِ نیام ءَ ھمک روچ سیمسری جنگ ءُ جیڑھ بوگ ءَ اَنت کہ اود ءَ دوئیں ملک یکے دومی ءِ سر ءَ سیمسر ءِ ھلاپ ورزی ءِ بھتام جنگ بوتگ اَنت۔

مرچی بوتگیں سیمسر ءِ ٹکر ءِ بابت ءَ دوئیں ملکانی واکداراں انگت ءَ سرجمیں ھال ءُ اھوال نہ داتگ انت-

روکپتی بلوچستان ءِ دمگ میرجاوگ ءِ جھمنندیں مردمے ماں سلول زندان ءَ ایرانی آمیدگس ءِ ھکم ءَ پاھو دیگ ءِ ھکم دیگ بیتگ-

اھوالانی رد ءَ پاھو دیگ بیتگیں مردم ءِ پجار ھبیب اللہ مھمود زئی ء رھمت اللہ ءِ نام ءَ زانگ بیتگ کہ آ میر جاوگ ءِ جھمنند گوشگ بوگ ءَ اِنت-

اھوالانی رد ءَ ھبیب اللہ سَے سال پیش ماں نشہ واپاری ءِ بھتام ءَ گرگ بیتگ ءُ پد ءَ ایرانی آمیدگس ءَ آئی ءِ سر ءَ پاھو ءِ ھکم داتگ بیتگ-

اھوالانی رد ءَ ھبیب اللہ ءِ کھول ءَ گوستگیں آدینگ ءَ آئی ءِ گڈی گندوک کرتگ بیتگ ءُ چریشی ءَ پد آ پاھو ءِ جتائیں کوٹی ءَ برگ بیتگ ءُ مروچی آ پاھو دیگ بیتگ-

بلوچستان ءِ دمگ پنجگور ءَ زورانسری بیگواہ کنگ ، بدامنی ءُ نوکریانی بند کنگ ءِ ھلاپ ءَ بی این پی (عوامی) ءِ گوانک ءِ سر ءَ مرچی سرجمی ءَ دربندین ھرتال انت-

پنجگور ءَ برجاھیں ھرتال ءِ سبب ءَ دراھیں کسان ءُ مزنیں کارو ءَ باری بنجل سرجم ءَ بند انت۔

زانگ بہ بیت گوستگیں ھپتگ ءَ پنجگور ءَ دو برات چہ جند ءِ لوگ ءَ پاکستانی لشکر ءَ دزگیر کتگ ءُ بیگواہ کتگ اَنت، وھدے کہ اے زوراکیں بیگواہ کنگ ءَ پد سی پیک روڈ ءِ سر ءَ کھول ءِ مردماں سرجمی ءَ بند کتگ بوتگ ءُ مچی ھم کنگ بوتگ-

پد ءَ زھرشانی ءِ مھلوک ءُ واکدارانی نیام ءَ گپ ءُ تران ءَ پد مھتل کنگ بوتگ ات، واکداراں گپ ءُ تران ءِ وھد ءَ گشتگ ات کہ دوئیں براتانی جان سلامتی 24 کلاک ءِ تہ ءَ دل یکیمی کنگ بیت انت بلے تاں انوگ ءَ دوئیں براتانی یل دیگ راستی نہ بیتگ-

دومی نیمگ ءَ یک ھپتگے ءِ تہ ءَ پنجگور ءَ سئے مردم کُشگ بوتگ اَنت ایشی ءَ ابید پنجگور ءِ گیشتریں مردماں سیمسر ءَ گوں سیادی داروکیں کار ھست اَنت۔ اے دراہیں وئیلانی ھلاپ ءَ مرچی پنجگور ءَ دربندیں ھرتال انت۔