TBP Balochi

جھدکاریں سنگت شھید استاد آگاہ ابد شاہ بلوچ

نبشتہ کار: سنگت اکبر داد بلوچ

دی بلوچستان پوسٹ

جاوراں چاران ءُ چاگرد ءَ وانان پُشت ءَ چاران من ءَ مرچی اُستاد سنگت آگاہ ابد شاہ بلوچ ءِ یات آتک کہ آئی ءِ کارانی سر ءَ چمشانکے بہ دیاں سنگت آبد شاہ بلوچ زندگ اِنت آئی ءِ پگر زندگ اِنت سنگت یک مھروانیں سنگتے آت پہ بلوچ راج ءَ یک چراگے آت کُجا کہ بوتیں آئی ءِ پگر بلوچ سرڈگار آت راجی ھر جنجال ءُ مُشکلے بوتیں آئی ءَ وت ءَ را ھور ھوار کُرت رودرآتک بوتیں یا روبرکت گوریچان شپ روچ جُھدے تھ ءَ آت مکھیں وتن ءِ آجوئی ءَ شے مُرید دیوانگ آت-

ھر جاہ ھور ھوار آت گوں کامریڈاں پہ آؤکیں روچانی واستا شور سلاہ آت کہ چوں وت ءَ را چہ زالمیں پاکستان ءِ گلامی ءَ برکّیناں ۔ شال بوتیں شر نوشکی کراچی مستونگ تربت آئی ءِ توار کارانی نشان گِندگ ءَ آتکاں اسولی کانونی راھبندی ھساب ءَ بلوچستان ءِ ھر ھند ءَ بلوچ راجے کُمک ءَ گوں آت شپانی پاس بوتیناں توارے پُشت ءَ سنگت شھید ابد بلوچ ءِ پسّہ ھمراھداری ھواری گوں آت۔شھید آگاہ ابد شاہ گلامی ءِ دردانی مارشتاں چہ پُر چکار آت ۔ آئی ءِ سرکل آئی ءِ دیوان ءِ سر ءُ سوجاں باسکاناں سنگ پولاد جوڑ کُرت۔ اگاں روبرکت ءَ روبرکتی کبز ءَ گیر ءَ بلوچ ءِ کُشتیں آ رودراتک ءَ بُن آت آ ایش چیزاں پوہ بوتگ بلوچ کُل یک انت۔ آگاہ ابد شاھ ءِ رنگیں سنگتانی کُربانیاں چہ بلوچ ءَ یک نام ارزشے ھست راج دپتر گواہ اِنت سنگتانی رھتگیں ھون گواہ اَنت ۔

بلوچستان ءِ کُنڈ کُنڈ ءَ کامریڈانی ھوناں چہ بلوچستان سرسبز اِنت ۔ابد شاہ بلوچے گوشتانکاں دل کش اِتگ تل کُرتگ ۔ سنگت اگاہ ابد شاہ ءِ جُھد سک باز وشیں رنگے ءَ تالاں بُوتگ چہ سنگت ءِ مھنت ءَ جُھد ءَ دژمن ءَ اُپار نہ بوت چہ پنجگور نادْرہ جاہ ءَ گوں واجہ شھید ماسٹر سپیر بلوچ ماسٹر ستار ءَ گوں چست کُرت اَنت آھانی کُنٹ مارا انچُش دات اَنت بے کانونی آھانی ساڑینتگیں جونانی بوتاں مرچی پونز ءِ زھن ءِ تھ ءَ اِنت سنگت آبد شاہ بلوچ نزریاتی سنگتانی تھ ءَ راج دپتر ءَ نبیسگ بیت۔ سنگت آبد بلوچ ءَ سابت کُرت گُلزمین تو منی ماتے من تئی بچاں ۔ آشوبی سنگت گلزمین ءَ مات گُش انت گوں سرڈگار ءَ اھد کول کن اَنت ما چوشیں کار نکناں چہ مئے کاراں بلوچ راج تاوان نُکس بور ایت ۔ ھمیش اھد ءَ گوں دیم ءَ رَواں کن اَنت۔ شھید آگاہ آبد شاھ ءِ گپ پہ دژمن ءَ گرند ءُ تیر آت انت دژمن ءَ وتی بے سوبی پیش داشت سنگت آگاہ ابد شاہ ماسٹر واجہ سپیر واجہ ستار ءِ لاش مارا تُھپہ ٹیکی دات اَنت ۔ باید مرچیگیں کامریڈ سنگت وتی نزریاتی سنگتانی تریکاہ ءَ کاراں بزوراں ۔ سنگتانی ھون پگر سوچ مرچی بلوچ راج ءَ را اسولی اتھاد اتپاک ءِ درس سبک ءَ دینت آگاہ ابد شاھ ءِ وھد ءَ سنگتانی جوانیں اتھاد اتپاکے بیتگ بی آر پی، بی این ایم، بی ایس او آزاد ءِ دروشم ءَ سنگتانی شھادت ءَ چے پد ھر کس ءَ وتی وڑ ءَ ونگ چَھر دات اَنت ۔ شگر سلامتی سنگت انگت ھست ما وتی مستریں کماشانی پگرانی کانونی ھساب ءَ کار بکنیں واجہ کماش ھیر بکش ءِ سوچانی سر ءَ شھید گلام مھمد ءِ واجہ اکبرے ، لالہ منیر ءِ ماشااللہ دگہ بازیں کہ ھست بوتگاں آ دگہ کہ ھست انت آھانی کارانی سر ءَ اوشتوک بہ باں ۔ مرچی چہ آھاں یکے آئی کار باز یات باں نمیرانیں شھید آگاہ ابد شاہ بلوچ ، بلوچستان آجو بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

وانگ چے ءَ گْوش اَنت؟

نبشتہ کار : نازیہ بلوچ

دی بلوچستان پوسٹ

یک نبشتگیں چیزے ءِ چارگ، سرپد بوگ ءُ پد ءَ آئی ءِ توارینک کنگ ءَ وانگ گْوش اَنت۔ چوناھا وانگ ءِ سے کاریچ ءُ بھر اَنت۔ البت چہ اے سےئیں کاریچاں اولی دوئیں کاریچ لازُم ءُ مستریں بھر گْوشگ بنت۔ انی ما وانگ ءِ سے بھراں دلگوش کن ایں۔

گالانی چارگ: اے بھر ءَ وانوک وتی چماں کارمرز کنت، نبشتہ ءِ گالاں چار ایت ءُ نبشتگیں گالرِد ءِ گالانی پجّارگ ءِ جُھد کنت، بزانکہ گال ءَ گِند ایت۔

سرپدی زُورگ: وانگ ءِ دومی بھر ءَ وانوک وتی اگل، بزانکہ کہ مجگ ءَ کارمرز کنت۔ اے بھر ءَ وتی چار اتگیں گالانی سرپد بوگ ءِ جُھد کنت کہ چے نبشتہ اِنت؟ بزانکہ گال ءُ سرجمیں گالرِد ءَ پھم ایت ءُ سرپدی زُور ایت۔ ماں وانگ ءِ کار ءَ اے بھر یک بلاھیں ارزشتے دار ایت پرچا کہ اگاں وانوک گالانی چارگ ءُ پجّارگ ءَ پد سربد بوگ ءُ زانگ ءِ جُھد نہ کنگ ءَ اِنت گُڑا بزان کہ وانگ ناسرجم اِنت۔ وانگ ءِ نیم بھر سرپدی زورگ ءُ زانگ ئیگ اِنت۔ اگاں ما وانگ ءِ کار ءَ سرپد نہ بوگ ءَ ایں گُڑا بزانکہ ما نہ وانگ ءَ ایں پمیشکا وانگ ءِ تہ ءَ سرپدی زورگ المی اِنت۔

توار کنگ: وانگ ءِ سیمی ءُ گُڈی بھر ءَ بنی آدم وتی دپ کارمرز کنت۔ اِے بھر ءَ وانوک وتی چار اتگ ءُ پجّار اتگیں گال ءَ توار کنت کہ دیم پہ دیم ءَ ساڑی ئیں مردم نبشتہ ءَ بہ اشکُن اَنت ءُ دِگہ مردم ھم سرپد بہ بنت۔

اے بھر وانگ ءِ لازمی بھرے نہ اِنت پرچا کہ لھتیں مردم کتاب ءُ ھالتاکاں ھاموشی ءَ وان اَنت۔ وھدیکہ ما گِند ایں کہ مئے کِر ءُ کَش ءَ کسے واب اِنت گُڑا ما کتاب ءُ دِگہ نبشتھے تھنا چار ایں ءُ وان ایں۔ ایشی ءِ مستریں درور ویش اِنت کہ گُنگ ھم بے تواری ءَ وان اَنت۔

انی ما وتی نبشتانک ءِ گُڈی بھر ءَ بلوچ نودربراں سرپدی دیگ لوٹ ایں کہ مئے راجی زُبان بلوچی ماں وانگجاھاں وانینگ نہ بیت پمیشکا بلوچ نودربر ءُ وانِندہ بلوچی وانگ ءَ نزور اَنت یا وانگ ءِ وھد ءَ سک اشتاپ کن اَنت پمیشکا ما گوں بلوچی وانوکیں نودربراں دزبندی کن ایں کہ پیسر بلوچی دَرونتاں بہ وان اِت کہ سرپدی چہ وانگ ءَ رس ایت۔

اگاں ما وتی راجی زُبان ءِ شریں نبشتہ کار، جُھدکار ءُ سرمچار بوگ لوٹ ایں گُڑا باید اِنت ما چہ دُرستاں پیسر بلوچی دَرونتاں سرجمی ءَ بوان ایں، بلوچی رنگ گال(یں ءُ ئیں)، تپورگال(ءِ ءُ ءَ) ءُ کُمکّارگالاں دلگوش بہ کن ایں، چہ دَرونتانی وانگ ءَ پد نامداریں بلوچ نبشتہ کارانی زبان دوستی ءُ راجدوستی نبشتانک وانان کن ایں کہ سرپدی چہ وانگ ءَ رس ایت۔ ھچبر اشتاپ مہ کن ایں بلکیں نبیسّگ ءَ پد مُدام وتی نبشتگیناں دوبر وت ھم بوان ایں ءُ چمشانک بدے ایں کہ مئے نبشتگیں گالرِدانی توک ءَ ردی مہ بیت، پرچا کہ دُنیا ءِ تہ ءَ ھر زُبان ءِ اُستاد، نودربر ءُ نبشتہ کار وتی نبشتگیں چیزاں دو بر وت وان اَنت ءُ وتی بے ھیالی رَدیاں راست کن اَنت۔

چہ ایشی ءَ ھوار نبشتہ کاراں اِے (، ۔؟:!“/:”;) لبزانکی چیدگ، ٹک ءُ نشان ماں راستیں جاھاں کارمرز کنگی اَنت کہ اِے لبزانکی چیدگ دُنیا ءِ ھر زُبان ءَ کارمرز بنت۔ اگاں ما اے لبزانکی چیدگاں سرپد نہ ایں گُڑا باید اِنت ما ایشاں بزان ایں۔ چوناھا ما اے لبزانکی چیدگاں چہ ھر وڑیں زبانے ءِ کتاب، ھالتاک ءُ نبشتانکاں ھم ھیل کُت کن ایں پرچا کہ توری دُنیا ءِ ھر وڑیں زبانے بہ بیت نبشتھی دْروشم دُرستینانی یک اَنت۔ چہ ایشی ءَ ابید ما گْوں شما دزبندی کن ایں کہ پہ بلوچی وانگ ءُ زانگ ءَ ھچبر بد مہ مار اِت، مُدام چہ بلوچ نبشتہ کاراں دبرگ ءِ جُھد بہ کن اِت، بلوچی درونتاں وانان ءَ وت ءَ راجی زبان ءِ نبشتہ کار جوڑ بہ کن اِت، بلوچی وت بہ وان اِت ءُ راج ءَ ھم بہ وانین اِت۔

بلوچ راج شالا زبان دوست، راجدوست ءُ یکمُشت بہ بات۔ پہ راجی زُبان ءِ دیمروی ءَ بلوچ راج ءِ وانِندہ، اُستاد ءُ نودربر وت ماں وت تپاک، ھمگام ءُ ھمکوپگ بہ بنت۔

دلگوش: ما راجی زبان ءِ جُھد ءَ اے مار اتگ کہ یک انچیں نبشتانکے تیار بہ کن ایں آ زِند ءِ ھر پِڑ ءَ بلوچ واِنندہ ءُ نودربراں پائدگ بہ دنت پمیشکا گوں شما دزبندی اِنت کہ مئے اِے نبشتانک ءَ دیم ءَ ھم روان بہ کن اِت کہ چہ ایشی ءِ وانگ ءَ راج ءَ ھم پائدگ بہ رس ایت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچی دربرگ ءِ جُھد

نبشتہ کار: آئیشہ بلوچ

دی بلوچستان پوسٹ

مئے راج ءِ بلاھیں واِنندھاں ھوار لس مھلوک تھنا اِے رَدیں ھیال ءِ سر ءَ وتی راجی زبان ءِ وانگ ءُ دربرگ ءِ جُھد ءَ نہ کن اَنت کہ من ءَ بلوچی ماں وانگجاہ ءَ وانیتگ نہ بوتگ یا من بلوچی وانگ ءُ راست نبیسّگ ءَ نزور آں۔ بچار کہ اگاں بلوچی ماں وانگجاھاں وانینگ نہ بوتگ یا وانینگ نہ بوگ ءَ اِنت گُڑا ایشی ءِ اِے متلب وَ نہ اِنت کہ ما وتی راجی زبان ءَ مہ وان ایں ءُ دربرگ ءِ جُھد ئِے مہ کن ایں بلکیں ھمے بہ جیڑ ایں کہ راج ءَ ماں وانگجاھاں پرچا بلوچی وانینگ نہ بوگ ءَ اِنت؟ پہ راج ءَ زبان ءِ ارزشت چے اِنت؟ زاناں مرچیگیں دور ءَ موبائل ءِ آسراتی زبان ءَ چے پائدگ دنت؟ گِند ئے ما دْراہ چہ وتی موبائلاں وتی راجی زبان ءَ وانان ءَ دربرگ ءَ ایں پمیشکا مرچی ھر بلوچ ءِ زمہ واری اِنت کہ وتی موبائل ءَ پہ راجی زبان ءِ واست ءَ کارمرز بہ کنت۔

ما وتی راج ءِ وانِندھیں بْرات ءُ گْوھاراں سرپدی دیگ لوٹ ایں کہ چہ دُرستاں پیسر دلپْروش مہ بَہ اِت کہ من پرچا بلوچی راست نبیسگ ءَ سُست آں۔ باید اِنت ما راج ءِ سرمچارانی وڑ ءَ وتی دل ڈڈ ءُ اے توکل کن ایں کہ من بلوچی دَرونت(سبق) ءُ راجدوستی نبشتانکاں وانان ءَ وتی راجی زبان ءِ راست نبیسی ءَ ھیل کن آں، بِل اِت کہ ھپتگے یا توری ماھے بہ لگ ایت۔ مارا دژمن ءَ اے باوری دیگ لوٹ ایت کہ تو بلوچی ءَ ماں وانگجاھاں وانینگ ءَ نیل ئے کہ بلوچ ءِ تہ ءَ زبان دوستی ءُ راج دوستی مہ بیت بلے ایش انت ما وتی راجی زبان وت وانان ءَ دربرتگ، ما ترا پْروش داتگ، ھزارانی کچ ءَ بلوچی زبان ءِ سرمچار ءُ نبشتہ کار ھست اَنت کہ آ انی آشوبی ءُ راجدوستی نبشتانکاں نبیسّان ءَ تئی ھلاپ ءَ راج ءِ تہ ءَ نپرت ودی کنگ ءَ اَنت۔

گِند ئے مارا وتی دزھُورکی ءِ وھد ءَ بلوچی دَرونت ءُ زُبان دوستی نبشتانک وانان ءَ وتی راجی زُبان دربرگ لوٹ ایت۔ شما وتی ماتی ءُ راجی زُبان ءَ وت ونت کن اِت، سرپد ھم بَہ اِت، اگاں تو بلوچی ونت کن ئے گُڑا اِے ھم پہ ما گنج اِنت۔ گِند ئے شمارا کَس نہ گْوش ایت کہ شما بلوچی ءِ دْراھیں دَرونتاں ماں یک روچے ءِ تہ ءَ بوان اِت یا شُما رَد نبشتہ بکن اِت۔ بلوچی مئے وتی جِند ءِ زُبان اِنت، وتی جِند ءِ زُبان پہ راجاں گِران ءُ مُشُکل وَ نہ بیت پمیشکا ما گوں شما دزبندی کن ایں پہ بلوچی وانگ ءُ دربرگ ءَ ھچبر اشتاپ مہ کن اِت، تھنا ھر روچ بلوچی ءِ یک درونت ءُ یک زُبان دوستی نبشتانکے بوان اِت پد ءَ شما وت یک ھپتگے ءِ تہ ءَ بلوچی راست نبیسّگ ءَ ھیل کن اِت۔

راج ءَ دلبڈی دے ایں کہ دلپروش مہ بَہ اِت، مُدام ءُ یکشل ءَ شوشل میڈیا ءَ وتی جِند ءِ زُبان ءَ پوسٹ بکن اِت، گوں وتی سنگت، دزگْوھار، سْیاد ءُ وارساں بلوچی ءَ کلوہ بکن اِت۔ بِل اِت رَد بہ بنت، دیم ءَ درونتاں وانان ءُ وھد ءِ ھمراھی ءَ شما وت بلوچی راست نبیسّگ ءَ زبر بَہ اِت۔ بزانکہ راجی زُبان ءِ دربرگ ءَ اشتاپ نہ لوٹ ایت بلکیں پہ لھتیں روچ ءَ وانگ ءُ دربرگ لوٹ ایت، زُبان دوستی ءُ راجدوستی ءِ مارشتاں لوٹ ایت۔ گُڑا باید اِنت ما پیسر بلوچی دَرونت، زُبان دوستی ءُ راجدوستی نبشتانکاں وانان کن ایں کہ گوں وانگ ءَ سرپدی رس ایت۔ یک گپے گْوش آں کہ بلوچی گوں انگریزی آباں نبیسّگ ءَ مارا ھچ پائدگ نہ رس ایت بلکیں بلوچی گوں انگریزی آباں نبیسّگ وھد ءِ زوالی اِنت پمیشکا ما گوں شما دزبندی کن ایں کہ بلوچی ءَ گوں انگریزی آباں نبشتہ مہ کن اِت بلکیں مُدام وتی راجی زُبان ءَ گوں بلوچی آباں نبشتہ بِہ کن اِت کہ شُمئے وتی زُبان ءَ آب ھست اَنت۔ اگاں ما بلوچی ءَ گوں بلوچی آباں نبشتہ کن ایں گُڑا ما کم کم ءَ بلوچی نبشتہ ھم ھیل کن ایں۔

مُدام بلوچی وانینگ ءِ جُھد بکن اِت کہ وانینگ ءَ مارا وتی ونتگیں درونت تاجگ بنت ءُ چریشی ءَ راج ءِ تہ ءَ بلوچی وانگ ءُ نبیسّگ ھم البار بیت۔ اُمیت اِنت کہ اے وڑ ءَ شما ھر یکے وتی راج ءِ نودربر ءُ وانِندھاں ھم سرپدی دے اِت کہ مارا بلوچی پیسبوک ءُ وٹس ایپی وانگجاھاں ھوار بیگی اِنت، وتی دزھُورکی ءِ وھد ءَ وتی راجی زُبان وانگ ءُ نبشتہ کنگی اِنت ءُ راج ھم وانینگی اِنت۔

سلامت بات اِت، شالا راجی زُبان ءِ جُھدکار ءُ ھزمتکار بِہ بات اِت، بلوچ راج شالا یکمُشت ءُ ھمدست بات، بلوچ ءُ بلوچی شالا دیمروی بکنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نمدی یے پہ بلوچی زبان ءِ نبشتہ کار ءُ شائراں

نبشتہ کار: نور بلوچ

دی بلوچستان پوسٹ

دروت ءُ درھبات اِت۔ اُمیت کناں، کہ شما درست جوڑ ءُ وش اِت ءُ وش ءُ سلامت بات اِت۔ زانت نہ کناں، کہ باریں منی اے کلو شمارا سر بیت، یا نہ بیت، بلے من پہ زبان ءِ واستا پہ شما چار گپ ءُ گال رھادگ کناں، اے گشاں کہ وتی ماتی زبان ءِ دیمروی ءِ واستا جھد بہ کن اِت، وتی زبان ءَ بہ وان اِت۔

من بلوچی زبان ءِ بازیں شائر ءُ نبشتہ کارانی شَیر ءُ نبشتانک ونتگ انت ھمے دیستگ کہ آیانی سیاھگ راست ءُ تچک نہ اِنت، گیش من ھمے دیستگ آیانی شَیر ءُ نبشتانک گوں دری زبان ءِ آباں نبشتہ اَنت۔ پرچا؟ اے بابت ءَ من وَ ھچ گشت نہ کناں، بلے من ھمے شائر نبشتہ کار ءُ ادیباں گشگ لوٹاں، کہ شمئے سیاھگ پرچا تچک ءُ راست نہ اِنت؟ زاناں شمارا وتی شھدیں زبان ءِ آب دست نہ دے اَنت، یا کہ شمارا دوست نہ بنت؟

اگاں شمارا دوست نہ بنت، شما اوں یک راھے در بہ گیج اِت، بہ گش اِت، کہ راہ ایش اِنت، ما اوں ھمے راہ ءِ پٹ ءُ پول کنوک ایں، ما اوں ھمے راہ ءَ کا ایں، اگاں راھے پٹ ءُ پول کُت نہ کن اِت، گڑا سید شاہ ھاشمی ءَ وتی تیوگیں زند پہ وتی راجی زبان ءِ پٹ ءُ پول ءَ ندر کُت ءُ مارا یک راھے گیشینت ءُ دات باید ما نوں ھمے راہ ءَ بہ گر ایں، مارا دگہ چشیں راہ وَ نیست ءُ نیکہ پٹ ءُ پول اِت کن ایں، ءُ پد ءَ باندا مارا وتی پدریچاں اوں پسہ دیگی اِنت، آیاں اوں گشگی اِنت، کہ راہ ایش اِنت، ھمے راہ ءَ برو اِت، کہ ساپ ءُ پلگار اِنت، یا ناں؟ اے گش ایں، کہ ما نہ زان ایں، اے راہ ءَ کنٹگ پِر اِنت، اے راہ ھراب اِنت؟ انا ما پد ءَ آیانی دیم ءَ ھچ گشت کُت نہ کن ایں، پرچا کہ اے راہ مارا راست ءُ تچک کنگ ءُ دیگ بوتگ ساپ ءُ پلگار اِنت، ما وتی پدریچاں اے سلاہ ءَ دات نہ کن ایں، کہ ما نہ زان ایں، بلکیں ھمے گش ایں، ساپ ءُ پلگاریں راہ ءَ برو اِت، گھتری ءِ نیمگ ءَ جھد بہ کن اِت۔

چوناھا وَ ھر کس سرپد اِنت، کہ مئے راجی زبان ماں سرکاری وانگجاھاں وانینگ نہ بیت، ایشی ءِ سوب اے وَ نہ اِنت، کہ ما مہ وان ایں، گڑا ما وتی زبان ءَ مہ وان ایں؟ توری بِلّے سرکاری وانگجاھاں وانینگ مہ بیت، بلے مارا وت جھد کنگ لوٹ ایت، کہ ما وتی راجی زبان ءَ بہ وان این ءُ ھیل بہ گر این ءُ وتی پدریچاں اوں ھمے راہ ءَ بہ بر ایں۔

البت پہ بلوچ راج ءِ واستا ماں وٹس ایپی لبزانکی دیوان جوڑ کنگ بوتگ داں بلوچ راج چیردست مہ بیت، وتی زبان ءَ بہ وان ایت ءُ ھیل بہ گیپت، بلے ھچ پہ ھچ ما وتی زبان ءِ شائر ءُ ادیباں گند آں، کہ گیش گوں دری زبان ءِ لبز ءُ آباں شَیر ءُ نبشتانک نبشتہ کن اَنت، اے وڑ ءَ زبان کجا دیمروی کنت، بھ نہ کنت، مارا وتی زبان ءِ واستا لبز ھست یا آب ھست ءُ گیش اِتگ اَنت، وتی زگریں لبز ءُ آباں بہ زور این ءُ نبشتہ بہ کن ایں، جوان اِنت، پہ دریانی زورگ نبشتہ کنگ دیمروی نہ کن ایں۔

باید چوش مہ بیت، چوش مہ کن اِت، ھر چیز کہ نبشتہ کن اِت، گڑا گوں وتی شھدیں زبان ءِ زگریں گال ءُ آباں گوں نبشتہ بہ کن اِت، وتی زبان ءَ زاھر بہ کن اِت، وتی زبان ءَ دیم ءَ بہ بر اِت۔

گوں شما ھمے دزبندی اِنت، کہ وتی ماتی زبان ءَ در بہ بر اِت، تچک ءَ بیا اِت، راست ءَ بہ زان اِت، باندا مارا ءُ شمارا ءُ مئے پدریچاں دگہ درآمدے گشت مہ کنت، کہ شمئے راہ تچک نہ اِنت، شما وتی راہ شموشتگ شما گار اِت۔

بلوچ راج ءُ بلوچی زبان زندگ بات۔
سلامت بات اِت، شمئے کستر: نور بلوچ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

مشکے ءَ ریاستی زوراکی

ٹی بی پی شونگال

بلوچستان ءِ دمگ آواران ءِ ھند مشکے چہ دو دھکاں برجاھیں انسرجنسی ءِ آماچیں جاھاں سانمندیں جاھاں چہ یکے- مشکے ءَ بازیں سالاں انٹرنیٹ سروس بند اِنت چریشی ءِ سبب ءَ مشکے بلوچستان ءِ دگہ جاھاں چہ سستگ – میڈیا ءُ انسانی ھکانی ادارھانی رھوتی ءِ نہ رسگ ءِ بروبری ءَ زورانسری آوار جنی ءُ ریاستی زوراکی دنیا ءَ سر نہ بنت اِنت-

گوستگیں ھپتگ ءَ مشکے ءَ پاکستانی پوج ءَ مردمانی ترسینگ ءُ بدگپی ءِ ھلاپ ءَ زالبول دگانی سر ءَ سر کپتگ ءُ زھرشانی کنگ ءَ لاچار بیتگ انت دانکہ وتی کھولانی سر ءَ بیتگیں زُلماں دنیا ءِ دیم ءَ آشنا بہ کن ایں-

زھرشانی ءِ زالبول ءِ رد ءَ پاکستانی پوج دمگ ءَ زورانسری مردیناں آوار جنگ اِنت، آیاں جسمانی درد ءُ اندوہ کنگ ءِ نشانگ کنگ اِنت، بازیں وھداں چہ دمگ ءَ مردیناں پوج بنجلاں لوٹارینگ اِنت اود ءَ آ لٹ ءُ کُٹ ءُ بیگواھی ءَ اوپار کنگ ءَ اَنت – زالبول ءِ گوشگ اِنت پوج زورانسری آوار جتگیں مردماں بلوچ آجوئی لوٹوکیں مردمانی گون ءَ جنگ ءِ وھد ءَ انسانی اسپر ءِ ڈول ءَ کارمرد کنگ اِنت ءُ زھرشانی ءِ پُرایمنی ءَ ابید، زالبول ءِ گوشگ اِنت کہ آیانی گپانی گوشدارگ ءَ ابید پاکستانی پوج ءِ گوشگ ءِ سر ءَ دمگی چَریک (ڈیتھ اسکواڈز) ءِ نیمگ ءَ بیھار رسگ ءَ اَنت-

بلوچستان ءَ اے وڑیں روچ کم گوز ایت کہ زورانسری آوار جنی ءُ ریاستی زوراکیانی ھلاپ ءَ زھرشانی مہ بیت اِنت بلے بلوچستان ءِ لھتے ھنچیں دمگ ھست اَنت کہ اود ءَ انٹرنیٹ ءُ میڈیا ءِ نہ رسگ ءِ سبب ءَ ریاستی زوراکی دنیا ءِ دیم ءَ آشنا نہ بنت ءُ پش کپ اَنت- انسانی ھکانی ادارھاں لوٹ ایت کہ آ بلوچستان ءِ دوریں ھنداں وتی دزرس ءَ بہ کن اَنت ءُ اے دابیں وئیلانی دارگ ءَ توار چِست کت بہ کن اَنت-

پاکستان ءُ ایران ءِ بیپاریءِمنگ نامہ

نبشتہ کار: یلان بلوچ

دی بلوچستان پوسٹ

بی بی سی ءِ رپورٹ ءِ رد ءَ ایران ءِ سَرمَستر (صدر) پاکستان ءَ یک انچیں وھدے ءَ دورہ کنت کہ ایران ءُ اسرائیل ءِ یکے دومی ءِ اُرشانی پد ءَ جارو نگیگ بنت ءُ دومی نیمگ ءَ ھمئے سال ءِ جنوری ءِ ماہ ءَ ایران ءَ رودرتکی بلوچستان ءَ پنجگور ءِ دمگ سبز کوہ ءِ سرا بمب ءُ توپ جنت ءُ ھمئے داوہ ءَ کنت کہ اے اُرش ناشرکارانی (جیش العدل) سر ءَ کتگ، بلے رسانکدر ءَ دو گونڈو ئے اکساں ابید ھچ گندگ نہ بوتگ ءُ ھمئے وت گڑیں شوربندیانی پد ءَ پاکستان ھم روکپتی بلوچستان ءِ سمسری ھند ءَ اُرش کنت ءُ ھما ایران دابیں داوہ کنت، اِد ءَ اوں بگیر چُک ءُ بے میاریں بلوچ جنگ بنت ءُ اے دوئیں اِستان وتی بیانانی تہ ءَ ناشرکارانی جنگ ءِ داوہ ءَ کن اَنت۔ اد ءَ چہ یک ھبرے تچک بہ بیت کہ اے دوئیں اِستان ھمک وھداں بلوچ ءِ کُشت ءُ ھون ءَ بگل ماں بگل بوتگ اَنت، ھپتاد ءُ سئے ءِ دَھک مئے گور ءَ یک تچکیں درور یے۔
 
اے یکیں بیان ءِ تہ ءَ سے بیانیہ ءِ سرا گپ بوت کنت۔ ۱۔ یکے اسرائیل ءُ ایران ءِ جڑپ اِنت ۲۔ ایران ءُ پاکستان ءِ میان ءَ اُرشانی جیڑہ اِنت ۳۔ ایران ءُ پاکستان ءِ بیپاری ءِ منگ نامہ وھدے کہ ۱ اپریل ءَ اسرائیل دَمشک ءَ ایرانی سپارت ھانہ ءِ سرا اُرش کنت اے اُرش ءَ IRGC ءِ دو مزنیں اگدہُ داریں اَپسرانی ھواری ءَ ۱۱ مردوم بیران بیت۔ بلے اسرائیل تچکی ءَ اے اُرش نہ من اِیت ءُ ایرانی ءُ ڈنّی تجزیہ نگار ھمے داوہ ءَ کن اَنت کہ اے اُرش اسرائیل ءَ کتگ۔ ۱۳ اپریل ءَ ایران اسرائیل ءِ اُرش ءِ پدا کساس گوں ۳۰۰، ڈرون ءُ میزائیلاں اُرش کنت، بلے اسرائیل اے داوہ ءَ کنت کہ آئی ءَ ایران ءِ اُرش بے سوب کتگ دومی نیمگ ءَ ایران ءِ مھلوک شاتکامی کن اَنت ءُ ایرانی سُپریم کمانڈ گُش اِیت کہ اے تھنا اسرائیل ءِ اُرش ءِ پدا یک بیھارے بوتگ کہ آئی ءَ دمشک ءِ تہ ءَ مئے سپارت ھانہ ءِ سر ءَ اُرش کتگ اگاں اسرائیل پاد نہ داشت اَنت گڑا ما گوں ترندی ءَ وتی اُرشاں گیش کن ایں ءُ اے اسرائیل ءِ واستا وشیں پالے نہ بیت، اے اُرش یک کسانیں اُرشے نہ بوتگ اگاں پیش ءَ ایران وتی پروکسی کارمرز کتگ اَنت اے رندی ایران تچکی ءَ اسرائیل ءِ ریڈ زون ءِ تہ ءَ اُرش کنت۔انوں جھان ءِ تہ ءَ اے دابیں اُرش کنگ بزان کہ سرجم ءَ اوپار کنگ اِنت ءُ ھما اِستان اے دابیں اُرش ءِ ھمت کنت کہ آ پہ جنگ ءَ ساڑی بہ بیت ایران اسٹرٹیجیکلی جنگ ءِ ھوالہ ءَ ما گُشت کن ایں تیار اِنت، بلے اسرائیل ءِ نیمگ ءَ بیدے بیان ءَ دیگ ءَ چوشیں سُر ءُ پُر گندگ نہ بوتگ۔ ایران ءُ پاکستان ءِ بیپاری ءِ منگ نامگ ایران ءُ پاکستان  ءِ میان ءَ یک ِدیریگیں گیس پائپ لائن منگ نامہ یے  بیت کہ ۲۰۱۳ ءَ پی پی پی ءُ مسلم لیگ ن ءِ ھکومت ءِ گُڈسری وھداں پاکستان ءِ سَرمَستر آسپ اَلی زرداری ایران ءِ دورہ ءَ روت گیس پائپ لائن ءِ منگ نامہ ءِ بندات ءَ کنت۔ بلے اے منگ نامہ تھنا منگ نامہ یے بیت ءُ پاکستان امریکہ ءِ بندشانی تُرس ءَ کار بندات نہ کنت ءُ اے اوشت ءِ اَماچ بیت ۔

پاکستان مسلم لیگ ن ءُ تحریک انصاف ءِ ھکومت اے منگ نامہ ءِ سر ءَ چوشیں پیسلہ یے زورگ ءِ نیمگ ءَ ھچ ڈولیں گامگیج  نہ زور اَنت۔ وھدے کہ پی ڈی ایم ءِ ھکومت کیت گڑا پاکستان ءِ مزن وزیر جنوری ۲۰۲۳ ءَ یک کمیٹی ءِ اڈ دنت پد ءَ نگران مزن وزیر اے منگ نامہ ءِ سرا کار ءِ بندات کنگ ءِ منزوری ءَ دنت۔ نوں یک برے پد ءَ ایران ھمے منگ نامہ ءِ سوب ءَ پاکستان ءَ کیت کہ اے معادہ یا منگ نامہ ءِ سر ءَ کار بندات بہ بیت۔ بلے پہ پاکستان ءَ اے منگ نامہ ءِ سر ءَ کارکنگ انچو بندات ارزان نہ اَنت پرچہ کہ امریکہ اِد ءَ ڈالچار کنگ نہ بیت کہ امریکہ ءِ مھکمہ ھارجہ ءِ جھگیر میتھیو میلر اے گپ ءَ تچک کنت کہ ما ھر وھد ءَ دَرستاں ھمے شور ءُ سلاہ ءَ دیں کہ ایران ءِ گوما بیپار کنگ ءَ ھیالداری گوماں گام چست بہ کن اِت کہ چو مہ بیت کہ  ایران ءِ سر ءِ جتگیں امریکی بندشانیا زد ءَ شما ھم بیا اِت ءُ وتی تراں ءِ گُڈسر گُش اِیت کہ ما ایران ءُ پاکستان ءِ اے پائپ لائن ءَ کار ءِ بندات کنگ ءِ ھک ءَ نہ اِنت۔
 
دومی نیمگ ءَ پاکستان ءَ اے ھم ترس اِنت کہ اگاں من اے منگ نامہ ءِ سر ءَ کار مہ کن آں اشی ءِ چپ ءَ برو آں گڑا ایران میان اُستمانی ادارہ ءُ آمِید گس ءَ منی سر ءَ کیس کت کنت کہ اُد ءَ اسلام آباد ءَ 18 ارب امریکی ڈالر ءِ جرمَلام دیگ لوٹ اِیت۔ اے منگ نامہ ءِ سر ءَ کار کنگ ءَ ساری پاکستان ءَ واشنگٹن المی رزامند کنگی اِنت۔ اگاں پاکستان ءَ اے منگ نامہ ءِ سر ءَ کار بندات کت گڑا امریکہ بوت کنت کہ پاکستان ءِ سر ءَ بندش بہ جنت ءُ پاکستان ءِ جاور چو سلطنت عثمانیہ ءِ داب ءَ اَنت کہ اولی جھانی جنگ ءَ سلطنت عثمانیہ برطاینہ ءُ جرمنی ءِ میان پس اِیت پاکستان ھم انوں امریکہ،ایران ءُ چین ءِ میان ءَ پس اِتگ۔ بلے اد ءَ دیگ ءَ یک تاکتے پاکستان ءِ واست ءَ ھست اِنت آ بلوچ اِنت کہ پاکستان ءُ ایران ءِ واست ءَ مزنیں سردردے۔ منگ نامہ ءِ پُشدر چو اے داب ءَ انت کہ وھدے پی پی پی ءِ ھکومتی بیت گڑا ایران ءِ گوم ءَ اے منگ نامہ بیت، ءُ ھمے یکیں سال ءِ تہ ءَ ایران رودرتکی بلوچستان ءَ ماں کولاھو ءَ مُلا اُمر ءِ لوگ ءِ سر ءَ ڈورن اُرشے ھم کنت کہ آ گوں جیش العدل بندوک بیت۔ اے اُرش چہ ملا عمر رک اِیت بلے یک ءُ  دو گونڈو نمیران بنت بُندپتر شاھد اِنت کہ اگاں پاکستان ءُ ایران ءِ منگ نامہ بوتگ گڑا آ بیپاری ءُ ھنچائیں منّگ نامہ نہ بوتگ اَنت بلے بلوچ ءِ چکچینی ءِ بوتگ اَنت شاہ ءِ زمانگ بہ بیت یا ابراھیم ءِ
ایران ءُ پاکستان ءِ میان ءِ جڑپ اے سرھال ءِ سر ءَ گپ کنگ ءَ ساری پاکستان ءُ ایران ءِ دونیمگی سیادی ءِ پُشدر ءَ زانگی اِنت کہ گوست ءَ آیانی بلوچ ءِ پروش دیگ ءَ واست ءَ گامگیج چے بوتگ اَنت۔ ھپتاد ءِ دھک ءَ وھدے کہ بلوچ ءِ جُنز جنرل شیروف مری چیر دستی ءَ جنزگ ءَ بیت گڑا ایران وتی زمینی نَپ ءُ ستانی ھاتر ءَ پاکستانی ریاست ءَ گوں تچکی ءَ بلوچ ءِ جُنز ءَ بے سوب کنگ ءِ ھاتر ءَ پاکستان ءَ بازیں مالی ءُ لشکری کُمک کنت سِلیگ ئریسن ماں وتی کتاب In Afghanistan’s shadow Baloch nationalism and soviet temptations ءِ تہ ءَ نبشتہ کنت وھدے ھپتاد ءِ دھک ءِ جنز جنزگ ءَ بیت گڑا ایران ءِ شاہ  بھٹو ءَ ھکّل کنت کہ اےجُنز ترا الم پروش دیگی اِنت ءُ پاکستان ءَ لاچار کنت کہ آ زمینی ءُ آزمانی اُرش بہ کنت۔  بھٹو وتی گُلگدار ءِ تہ ءَ ھریسن ءَ گُش اِیت، کہ شاہ اے کار ءِ کنگ ءِ  ھاتر ءَ تھنا زور نہ کُتگ بلکیں، کساس شاہ ءَ گوں بیھار تبیں روشت ءَ گُشتگ ءُ بازیں زر ءُ مالے کول ءِ ھم کتگ۔ شاہ ءِ ھیال اے بوتگ کہ اگاں پاکستانی اِستان ءَ بلوچ ءِ لوٹ منّت اَنت گڑا تھنا پاکستان ءِ واستا جیڑہ نہ بیت بلکیں ایرانی بلوچ ھم سانمند بنت۔ اے جڑپ دُگنیا ءِ واست ءَ ایران ءُ پاکستان ءِ میان ءَ اڑ ءِ بوت کنت، بلے بلوچ اے جڑپ بلوچ چُکچینی یے سرپد بیت پرچا کہ دوئیں نیمگاں بلوچ ءِ ھون ریچگ ءَ اَنت۔ اگاں ما گوست ءَ بچاریں گڑا ایران ءَ وتی نَپانی ھاتر ءَ پاکستان ءِ پُشت ءَ بلوچ ءِ جنز ءِ پروش دیگ ءِ جھد ءَ کنت۔ گڑا مرچی ھم ایران بلوچ ءِ جنز ءَ ھلاس کنگ ءِ واستا رنگ رنگیں پندل سازگ ءَ اِنت۔ بلوچ ءَ سرپد بوئگی اِنت کہ ایران بلوچ ءَ کدی اوں ھلاس کت نہ کنت۔ کول ءِ وسعت اللہ ھان ئیگ ءَ ایران ءُ پاکستان ءِ منگ نامہ چہ ما تھنا وتی دل ءَ وش کت کن ایں۔ پرچا کہ گوست ءَ ھم باز اَنچائیں منگ نامہ بوتگ انت بلے پاکستانی  زانتکارانی ھیال ھمے  بوتگ کہ پاکستان امریکہ گوں نہ سُر اِیت پرچہ پاکستان ءِ مھار امریکہ ءِ دست ءَ اِنت مردم۔ پاکستان ھما ھر اِنت اگاں لگت بہ جنت گڑا بے شام بیت؛ بلے بلوچ زانتکار اے اِشی دیگ ءَ چمے ءَ چار اَنت۔ منگ نامہ بیت یا نہ بیت بلے بلوچ ءِ جنز ءَ ھلاس کنگ ءِ واستا منگ نامہ بس ھنچائیں ھبر اَنت اسل ایشانی اسل مول ءُ مراد بلوچ ءِ راجی آجوئی جُنز ءَ پروش دیگ اِنت۔ انچو کہ ھپتاد ءِ دھک ءَ ایران ءِ شاہ گُش اِیت کہ پاکستان ءِ جاورانی ھرابی پہ مئے نَپ ءُ سیتاں باز تاوان بار اَنت، ھمے داب ءَ مرچی ھم ایران ءِ کِرا بلوچ ءِ جنگ ایران ءِ نَپاں تاوان دنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

من پرچا کتاب واناں؟

نبشتہ کار: حمّل سادک

دی بلوچستان پوسٹ

وانگ ءِ تہ ءَ زندگی ءِ دُرائیں کِشک نکش اَنت، وانگ انسان ءَ جھان ءِ کُلیں چیزانی بابت ءَ سرپدی دنت ، علم دریایےِ اِے دریا ءِ تہ ءَ اوژناگ کنگ المی انت، بلے منی وانگ ءِ مول ءُ مُراد ایش نہ انت کہ من کتاب واناں دانشوارے باں ھرچ جُست ءِ پسّہ منی کرا بیت انت یاکہ مردم من ءَ بگنداں منی ستاہ ءَ بکناں ، منی کتابانی وانگ ءِ پُشدر دگرے ، من اے واستا ھم نہ واناں کہ من نبشتہ کارے باں ، من پمشکا واناں من کسھانی تہ ءَ ایر کپگ ءُ گار بوھگ وش بیت ، من ھمے کہ کتاب ءَ واناں منی نِزّا من کسہ ءِ کارستانی ھمرائی ءَ گون اَنت ، بلے من ءَ دگہ نادرائی یے ھست من سیاسی کتاب نہ واناں ، من ءَ گوں سیاست ءُ سیاسی چِست ءُ ایراں ھچ وڑیں کار نیست ، ھردیں کہ من سیاسی کتاب بُواناں من سک بُور باں ۔

من سرگوست واناں گیدی کسہ گدار آزمانک شاعری ھم واناں بلے کم منی زندگی ءِ دست گٹی در پہ دری وھد ءِ نہ رسگ ءُ برے برے وھد رس ایت ھمے رس اتگیں وھد ءِ زوال کنگ اِے جیڑہ ءُ جنجال ھست اَنت ، بلے من کتابےِ بگنداں الّم وانان ئے من ءَ لبزانکی کتاب ھجبر بُور نہ کنت ، مدام وانگ ءِ وھد ءَ من کتابانی نمبیں بانزلانی چیر ءَ واب اَنت ۔ من ءَ وانگ ءِ تام سک وش بیت کتاب بہ بیت ارواہ پُر تاھیر بیت ، رسول ھمزہ توف ءِ کتاب داگستان وانوک ءَ چون گوں وت بارت وانوک ھم ھمزہ ءِ ھمرائی ءَ داگستان ءِ دمکاں اسپ ءَ سوار انت یاکہ اسپ ءِ لگامی دست ءَ انت کمو میتگ ءَ گستا وتی اسپ ءَ سوار بیت ءُ جنزیت، برپیں داگستان ءِ سارتیں موسم ءَ مھسوس کنت ۔ ھمے وڑ ءَ خلیل جبران ءِ گدار ”زرد پتے” بہ بیت تو کارستانی ھواری ءَ گون ءِ شپ اِنت موسم سارت انت ھما بَلک گوں وتی جنین زھگ ءَ آس ءِ سرا نشتگ، یاکہ پادری بہ بیت شیتان ءِ ٹپی ایں بالاد ءَ گندیت ءُ شیتان درمان ءُ دارو کنت۔ بلوچیں شیردل غیب اُپ کہ تئی درشانداب ءُ ندارگ کشی ءِ ، گُڈی نمدی بہ بیت 43 منٹ یاکہ کوٹی نمبر 52 بلوچستان جاورانی دُرائیں تک ءُ پھناتاں سپر کناں اِنت برے ھمبل ءِ ھمراہ انت ءُ برے چنگیز ءِ وشنو مندر ءَ ، وانگ پُر تاھیریں کیفیت انسان ءَ کُمار کنت زندگ بوھگ ءِ سکین ءَ دنت ۔

من کہ کتاب ءِ وانگ ءَ بندات کناں منی دل گُش ایت ھرچ ونتگیں تاک ءَ دِران کن ءُ ماندار ، اے نادرائی ءَ من سک تکانسر کُتگ ، بلے کتاب سک دوست بنت منی چمّاں کتاباں چہ زیبا تریں ھچ چیز نیست۔ اِے زندگی کتابانی زِر ءَ چول جنان انت ، باریں دومی جھانےِ ھست یا اناں ، اگاں ھست گُڑا کتاب الّم بیت، اے وانگ ءِ ھوشام اگاں اِے زند ءَ نہ پُرشت ، دومی جھان ءَ اّلم پروشان ئے۔ وانگ ءِ زیبائیں ندارگاں مردم ھر کجا سئیل کُت کنت ، گیدی کسھاں وانان ئے تو گوست ءِ دُرائیں جیڑھانی بابت ءَ سرپد بہ ئے کہ یک زمانگی ءَ پیسر بنی آدم ءَ چون زندگی کُتگ ، یاکہ دری لبزانکاں وان ئے ھم ھمے سرپد بہ ئے کہ آوانی تب چون انت آوانی زند ءَ آشنا بہ ئے کہ چے پیمیں سوچ داراں چونیں زندگی کنگایاں، وانگ پُر تاھیر اِنت وانگ وتی جُتائیں تامےِ ۔ تھنائی ءِ پُر مھریں ھمراہ ھمے کتاب انت ، کسھاں ساز ءُ زیمل اِنت ، چندن ساچ راست گُش ایت زند کہ بیت لبزانک بیت ، لبزانک زندگی انت ءُ زندگی لبزانک انت ۔ من مروچی چندن ساچ ءِ یک کسانیں نبشتانکےِ ونت جیک لنڈن ءِ بابت ءَ اَت ، گُڈی ءَ چندن گُش ایت کہ نبشتہ بکن نبشتہ کنگ ءَ مہ تُرس ۔ چوناھا تُرس انسان ءَ ھراب کنت ، ماتم ایک عورت کا، ھمے کتاب ءِ تہ ءَ نبشتہ کار بس ھزابی ءُ بزگی ءِ کسھاں کاریں کہ ھمے جنین ءِ گوم ءَ چونیں ازیت کنگ بیت، کجام ٹارچر اِنت زندان ءَ آرا دئیگ نہ بیت ،نبشہ کار ھما وھد ءِ زالم ءُ زوراک ءِ زُلماں چے نگد کنگ ءَ اِنت وانوک زانت نبشتہ کار ءِ تہ ءَ ھچ وڑیں تُرس نیست نبشتہ کار تھنا ایردستیں راج ءَ توار ءَ چے پیم دیم ءَ برگ ءَ اِنت ، ریاست ھرابیں کاراں انتھائی نگیگیں جاوراں لبز لبز نبشتہ کنگ انت، وانگ انسان ءَ کُلّیں چیزاں آشنا کنت ، ابرم ءِ ندارگ بہ بنت یاکہ زُلم ءُ زوراکی، موسمانی وشیں بوہ، کُلاں ترا آشنا کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ملنگ تبیں ورنا شھاب رھیم

نبشتہ کار: دلجان مراد پرومی

دی بلوچستان پوسٹ

دگنیا ءِ تہ ءَ ھر کس کہ کیت وتی زند ءِ چاریں روچاں گوازین ایت آئی ءِ سپر آسر بیت دیم پہ دگہ منزلے ءَ رھادگ بیت بلے لھتیں انچیں انسان ھست کہ وتی زند ءِ چاریں روچاں گوازین انت رو انت آ بے ھیال کنگ نہ بنت آیانی یاد ھمک سھت ءُ دمان کیت آ پہ مدامی نمیران بنت چہ آ مردماں یکے شھاب ات کہ آ مدام پہ دگر ءَ زندگ ات آئی ءُ منی سیادی ھما سیادی انت کہ دگنیا آ سیادی ءَ مدام برجاہ دارگ ءِجھد ءَ کنت آ سیادی استاد ءُ نودربرے سیادی انت کہ اے سیادی باز وھد ءَ چہ سرجمیں رگ ءُ رشتیاں دیمتر بیت منی ءُ شھاب جان ءِ سیادی ھمی بوتگ آ منی استاد بوتگ من آئی ءِ نودربر من ءَ یاد انت کہ منی امر کساس نہ دہ سال ات کہ من شھاب جان دیستگ ات کہ جپتے ربڈ ءِ گورا ات کوچگ ءَ یلہ ات شکار کنگ ءَ ات پد ءَ جاور سک نگیگ بوت انت بازیں مردماں چہ وشکوشیں پروم ءَ لڈ ءُ بار کت دیم پہ شھر پنجگور ءَ شت انت شھاب ءِ کھول چہ ھمایاں یکے ات کہ لڈ ات ات شھر ءَ آباد بوت انت گڑا من شھاب جان داں سک دیر ءَ نہ دیست باز بر ءَ پہ نادراھی سر پنجگور ءَ کپت گڑا شھاب جان دیست کہ نوں مزن بوتگ ات نوک بروت ات وانگجاہ ءَ وانگ ءَ ات ءُ آ ھم باز بر ءَ پروم آتک انت ھمے وڑ ءَ وھد وتی ترندیں گاماں روگ ءَ ات ما پروم وانگجاہ ءَ وانگ ءَ ات ایں کہ مئے وانگجاہ زورگراں وتی بنجل جوڑ کت درستیں سنگت یک یک ءَ سداں بوت انت لھتیں وانگ ءَ شت لھتیں ھمود ءَ پشت کپت ما شت ایں کیچ ءَ وانگ ءَ شش سال کیچ ءَ ونت وانگ آسر کت پد ءَ شت ایں کراچی ءَ وانگ ءَ کراچی ءَ وانگ ءَ موکل بوت انت من واتر پہ پنجگور بلوچستان درکپت آں گڑا من پنجگور ءَ شھاب جان ءَ گوں دچار کپت آں گڑا من ءَ جستے کت کہ کجا وانگ ءَ ئے من پسہ دات کہ کراچی ءَ گڑا گشتۓ من ھم کراچی ءَ وانگ ءَ آں بلے من سرپد نہ بوتگ آں کہ تو اود ءَ ئے دگہ من ترا الم وتی گس ءَ برتگ ات موکلانی روچ ءَ پد ءَ گشتے واتر کہ روے گڑا من ءَ ھال دے الم تئی کرا کایاں من کہ واتر اتک اں گڑا من آ ھال دات کہ من اتکگ آں گڑا گشتۓ کہ باندا الم تئی رند ءَ کایاں باندا آ آتک ما شت ایں لوگ ءَ گڑا آئی ءَ من باز سر ءُ سوج کت آئی من ءَ بازیں کتاب دات پہ وانگ ءَ گڑا من ھر وھد ءَ آئی ءِ کر ءَ شت آں گند ءُ نند بوت ھرچیکہ من آ کتابانی تہ ءَ پوہ نہ بوت آں گڑا من آرا جست کت انت آئی مدام گوں بچکندگاں منی جستانی پسہ دات انت من ھم آرا بازیں کتاب سوگات کت،آئی ءَ وتی گیشتریں وھد گوں کتابے وانگ ءَ گوازینت آئی مدام وتی کش ءُ کرے مردم کتاب ءِ وانگے سکین دات انت-

آئی ءِ مھر گوں کتاباں سک مھکم ات آئی مدام گشت کہ کتاب وانوک وتارا درست کنت گڑا وتی ھکاں زانت وتی راج ءَ درست کنت گڑا وتی راج ءِ بزگیاں ماریت تو ھم وتی راجے بزگیاں سرپد ات ئے ترا درستانی گم بر ات تو پہ درستاں مھروان ات ئے ترا درستاں براس گشت تئی روھ پہ ھر کس ءَ پچ ات تئی روگ ءَ درست گمیگ بوت انت بلے پیسلہ کہ چہ برز ءَ بیت گڑا مردم ھچ کت نہ کنت بیدے سبر ءُ اوپار دگہ ھچی کار ءَ نئیت مئے دوا انت کہ کہ تو گوں ایدگہ سنگتاں ھوار بھشت ءَ بات ات تئی پیمیں جوانانی روگ پہ راج ءَ مزنیں تاوان ئے –

ھون ءِ ترمپ چو ھور ءِ وڑ ءَ رچ ایت
ارس ءِ ترمپ چو کور ءِ وڑ ءَ تچ ایت

ھر کس کہ تئی اکس ءَ گندیت چو کانچ ءِ وڑ ءَ پرش ایت سنگت تئی مھر سلامت انت بس من ءَ گلامی ءِ آس سوچ ایت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بساک بلوچ نودربرانی اُوستانی چراگ

نبشتہ کار: تلکار بلوچ

دی بلوچستان پوسٹ

کجام ھم راجے ءِ باندات گوں ھما راج ءِ نودربراں بندوک انت۔ پرچا کہ اے ھمے نودربر انت کہ باندا وتی ڈیھ ءِ ادارھاں رکین انت۔ یک ملکے ءِ مھکمی چہ آئی ءِ ادارھانی مھکمی ءَ کساس کنَگ بیت۔ James A. Robinson ءُ Daron Acemoglu وتی کتاب Why Nations Fail ءِ تہ ءَ نبشتہ کنت کہ راجانی بے سوبی ءِ سبب ھما راج ءِ ادارھانی بے سوبی ءَ گوں بندوک انت۔ گڑا چوش گؤشت بیت کہ بلوچ راج ءُ بلوچستان ءِ بدھالیں جاورانی سبب ایشی ادارھانی نزوری انت۔ جوانیں ءُ سوبمندیں ادارھانی لوٹ وانندگ ءُ سرپدیں مردم بنت۔ بلے دومی نیمگ ءَ ما گندیں بلوچستان ءَ بلوچ نودربر ھزار جیڑھانی آماچ کنگ بوتگ انت۔ بلوچستان ءِ گیشتر دمگاں وانگجاہ ءِ نہ بوھگ ءِ سوب ءَ بلوچ ءِ چک چہ وانگ ءِ وڑیں زیبائیں سوگاتے ءَ زبھر انت۔ بازیں دمگاں وانگجاہ وَ ھست بلے آھانی تہ ءَ استاد ءُ بُنکی آسراتی گؤاہ نہ کنت۔ ھمے رنگ ءَ کالج ءُ مزنشاھدرجاھانی نہ بوھگ یا ایشانی تہ ءَ بازیں faculty آھانی نہ بوھگ, استاد ءُ آسراتی ءِ کمی ءَ چہ بلوچ نودربرانی وانگ باز اسرمند انت۔ پرچا کہ بلوچ راج یک نیزگاریں راجے ءُ مالی ھساب ءَ باز نزور انت۔ پمیشکا لس مھلوک وتی چکاں دومی شھراں پہ وانگ ءِ ھاترا روان دات نہ کنت۔ چریشی ءَ آوانی چک لاچار انت کہ وتی وانگ ءِ روچاں کار ءُ روزگار ءَ بہ گؤازین انت۔ بلئے دومی نیمگ ءَ ما گندیں بلوچ راج ستر کہ یک ایر دستیں راجے بلئے آئی ءِ وانندہ گوں جوانیں رنگے ءَ وانگ ءَ انت ءُ ھمے جھد کنگ ءَ انت کہ بلوچستان ءِ نگیگیں جاور جوان بہ بنت ءُ بلوچ راج ءِ جیڑہ کمتر بہ بنت۔ بلے بد بھتی ءَ بلوچستان ءِ ادارہ کرپشن ءِ ھرجان کنگ بوتگ انت۔ لائک ءُ وانندگیں ورنا چہ اے ادارھاں دور دارگ بوتگ ءُ بوھگ ءَ انت۔ پمیشکا بلوچ راج چہ ازل ءَ ہزار جیڑھانی آماچ انت ءُ پیداک انت۔

بلوچ راج ءُ بلوچ نودربرانی جیڑھانی گیش ءُ گیوار کنگ ءِ ھاترا بلوچ نودربرانی سیاسی پند ءِ کسہ سک کؤھن انت۔ اے کسہ سال 1967ءِ زمانگ ءِ کسہ انت وھدے BSO بزانکہ بلوچ نودربر گل اڑ دیگ بوت۔ اے سیاسی پند ءِ تہ ءَ بلوچ نودربر بندیگ کنگ بوتگ انت۔ جنگ بوتگ انت۔ بیگواہ کنگ بوتگ انت۔ بلے بلوچ نودربر چہ وتی وانگ ءِ لوٹ ءَ ھچبر چک ءُ پد نہ بوتگ انت۔ پہ بلوچ نودربرانی سیاسی توان ءِ ھتم یا نزور کنگ ءَ پاکستان ءَ ھوار وتا بلوچ سیاسی گل گؤشوکاں مزن مزنیں پندل ساز اتگ۔ ایشاں بلوچ نودربر بھر ءُ بانگ کرت انت ءُ کنگ ءَ انت۔ دانکہ آ نزور بہ بنت ءُ وتی جھد ءَ چہ یکر بہ بنت۔ بلئے بلوچ نودربر روچ پہ روچ گیشتر توانتر بوتگ ءُ پیداک انت۔ ءُ پہ ایشاں درد ء سر جوڑ انت۔ پاکستان ءَ وھدے مار ات کہ ایشاناں ھر وڑ ءَ دارگی انت۔ گڑا ایشی ءَ بی۔ایس۔او (آزاد) ءِ سر ءَ بندش جت۔ گل ءِ بازیں سنگتے شھید کرت۔ ایشی ءِ سر کماش زاھد بلوچ، ءُ مزن زھرگیں زاکر مجید، اسد بلوچ، شبیر بلوچ ءُ دگہ سدانی کچ ءَ باسک بیگواہ کرت انت۔ دومی پش کپتگیں BSO سیاسی ٹولیانی Pocket organizations جوڑ کرت انت۔ تانکہ آ اشانی چیر دستی ءَ پاکستان ءِ گلامی ءَ بہ کن انت ءُ چہ وتی بنکی لوٹاں یکر بہ بنت۔ بلئے ھمے سالاں بلوچ نودربرانی یک نوکیں گلے وتی سر ءَ چست کنت ءُ پہ بلوچ راج ءُ نودربرانی جیڑھانی گیش ءُ گیوار ءَ پاکستان ءُ نام گپتیں بلوچ سیاسی گلانی دیم پہ دیم ءَ اوشت ایت۔ اے گل بلوچ ایکشن کمیٹی بزانکہ بساک ءِ نام ءَ زانگ بیت اِنت۔

وھدے بی۔ایس۔او (آزاد) ءِ سر ءَ بندش جنگ بیت۔ گڑا بلوچ نودربر چوں گاریں پساں بے ھنکین بنت۔ پرچا کہ دومی BSO وَ پیسر ءَ چہ بلوچ سیاسی پارٹیانی ٹولی بنت ءُ ھست انت۔ آ بلوچ نودربرانی جیڑہ ءُ جنجالی ھاترا ناں بلکیں پہ سیاسی پارٹیاں سیاست کن انت ءُ ھماھانی کاراں دیما برگ ءَ گلائش بنت ءُ ھست انت۔ گڑا اد ءَ اے المی بیت کہ بلوچ راج ءِ جیڑھاں ھوار نودربرانی جیڑھانی گیشینگ ءِ ھاترا یک زمہ واریں نودربر گلے ءِ بوھگ ھژدری بیت انت۔ پمیشکا نمیرانیں کمبر چاکر سال 2009 ءَ ماں بیوٹمز یونیورسٹی شال ءَ بلوچ اسٹوڈنس ایکشن کمیٹی (بساک) ءِ بنھشت ءَ ایر کنت۔ رندتر ءَ بساک ءِ اولی بُنجاھی کونسل سیشن 2018 ءَ شال ءَ برجم دارگ بیت۔ایشی ءِ اولی کونسل سیشن ءَ ڈاکٹر نواب بلوچ چئیرمین ءُ سلمان بلوچ جنرل سیکٹری گچین کنگ بنت۔ ھمے رنگ ءَ BSAC ءِ دومی بنجاھی کونسل سیشن سال 2021 ءَ ماں کراچی ءَ برجم دارگ بیت۔ ایشی ءِ 2021 ءِ کونسل سیشن ءِ تہ ءَ ڈاکٹر صبیحہ بلوچ چئیرپرسن ءُ آصف جنرل سیکٹری نامینگ بنت۔ بساک ءِ پہ بلوچ نودربرانی ھاترا کاراں بلوچ نودر کہ گند انت۔ گڑا ھر بلوچ نودربر بساک ءِ ممبرشپ ءِ زورگ ءَ ھدوناک بیت ایں۔ ھمے رنگ ءَ بساک کسانیں مدتے ءَ بلوچستان ءِ تہ ءَ بلوچ نودربرانی مستریں گل جوڑ بیت۔بساک ءِ سیمی کونسل سیشن سال 2023 ءَ شال ءَ برجم دارگ بیت کہ ایشی ءِ چئیرمین شبیر بلوچ ءُ ازر بلوچ جنرل سیکٹری گچین کنَگ بنت اِنت ۔

دگنیا ءِ گؤستانک ءُ راجدپتر شائد اَنت کہ ھر گلے ءَ گوں دلپھکی ءَ وتی کار دیما برتگ انت۔ آ چوں جنگل ءِ آس ءَ ھر نیمگ ءَ تالان بوتگ انت۔ پمیشکا چیزے سالانی تہ ءَ بلوچستان ءَ ھوار سندھ ءُ پنجاب ءِ کنڈ کنڈ ءَ بساک ءِ بُنزہ (زون) جوڑ بنت (دلگوش! ستر کہ بساک ءَ مالی کمک چہ ھچ نیمگ ءَ نہ بیت۔ ابید چہ ایشی ءَ باسکانی جند ءِ کمک ءَ)۔ بساک بلوچ نودربرانی لوٹاں پیلو کنان ءَ داں انوں بلوچستان ءِ شھر شال، تُربَت، پنجگور، خضدار، لورالائی، نال، نصیرآباد، حب، اُوتھل ءُ خاران ءَ وتی زمہ واریاں پیلو کنان ءَ بلوچ راج ءُ بلوچ نودربرانی دلانی تہ ءَ چوں چراگ ءَ روک انت۔ ھمے رنگ ءَ بساک بلوچ نودربرانی ھیالداری ءَ داران ءَ سندھ ءِ تہ ءَ کراچی ءُ حیدرآباد ءُ ملیر ءَ ھم وتی بُنزہ جوڑ کنت۔ اشاں ابید، بساک چہ پنجاب ءِ بلوچ نودبراں شمشکار نہ بوھان ءَ ڈی جی خان ءُ تونسہ شریف ءَ ھم وتی بنزہ اڑ دنت ءُ آھاں ھر وڑیں کمک کنت۔ زانگ بہ بیت کہ پاکستان ءِ دومی صوبھاں بلوچ نودربر گیشتر جنجالانی آماچ کنگ بنت۔ بساک پمشکا آھاں ایوک ءَ یل دیگ ءَ تیار نہ انت۔ یک دگہ دلگوش کرزیں گپے ایش انت کہ بلوچستان ءَ ھوار سندھ ءُ پنجاب ءِ دومی شھراں بساک ءِ سر نہ بوھگ ءِ سوب لھتیں جاھاں بلوچ نودربرانی نہ بوھگ یا کمی ءُ ھما دمگانی تہ ءَ بلوچ نودربرانی جند ءِ بے سدی انت۔ بلے پد ءَ ھم بساک ءِ جھد ھمیش انت کہ ھر جاہ ءَ یک بلوچ نودربرے ھست آ وتی بُنزہے اڑ بہ دنت ءُ بلوچ نودرانی جیڑھاں بہ گیشین ایت۔

بساک سرپد بیت کہ ھچ راج ءَ بے زالبول ءِ کرد ءَ دیمروھی نہ کرتگ۔ پمیشکا بساک چہ بلوچ ءِ گؤستانک ءَ پراموش نہ بوان ءَ بلوچ شیرزالیں نودربراں وتی کاروان ءَ ھوار گیجان ءَ دیم ءَ جنزان انت۔ بساک شر سرپد انت کہ بلوچ گؤستانک ءِ تہ ءَ مھناز، ھانی، بانڑی، چاگلی، مائی بیبو، گل بی بی ءُ سیمک ءِ کرد چے بوتگ۔پمیشکا بساک ھچ وڑ ءَ بلوچ جنکیں وانندھاں چہ وت ءَ گستا نہ کنت ءُ وتی مونوگرام ءِ تہ ءَ کتاب ءَ یک نیمگے بچکیں نودربرے ءِ دست ءَ دنت ءُ دومی نیمگ ءَ جنکیں نودربرے ءَ ھمے کتاب دز گپتگ۔ انچوش کہ دومی نیمگ ءَ ڈاکٹر ماھرنگ، ڈاکٹر صبیحہ بلوچ، سمّی دین، سیما بلوچ ءُ ڈاکٹر شلی ءَ ھوار دگہ بازیں بلوچ شیرزال وتی راجی زمہ واریاں زانان ءَ بلوچ ءِ توار جوڑ بوتگ انت مرچی۔ گڑا بساک نہ لوٹ ایت کہ باندا ڈاکٹر ماھرنگ، سمّی دین ءُ دومی ودی مہ بنت انت۔ پمشکا بساک بلوچ شیرزالیں جنکیں نودربراں گوں وت ھمگام کنت ءُ دیم پہ منزل ءَ جنزان ءَ گندگ بیت۔

بساک یک سرجمیں نودربر گلے۔ پمیشکا بساک مار ایت کہ لبزانک پہ وانندہ ءُ لس مھلوک ءَ چنچوکیں مزنیں کردے پیلو کنت۔ پمیشکا بساک اے پڑ ءَ ھورک نہ کنان ءَ وتی لبزانکی تاکے شنگ کنت۔ اے تاک”نوشت”ءِ نام ءَ زانگ بیت۔ داں انوں نوشت ءِ 5 تاک چاپ ءُ شنگ بُوتگ۔ ایشی ءَ ابید، بساک چہ بلوچ راج ءِ زھگاں ھم پراموش نہ بوھان ءَ پہ بلوچ ءِ چکاں”گام” ءِ نام ءَ یک تاکے شنگ کنگ ءَ گندگ بیت۔ داں انوں “گام” ءِ 2 تاک چاپ ءُ شنگ بُوتگ۔

بساک لبزانک ءَ ابید، زبان ءِ ارزشت ءَ زانان ءَ ماتی زُبانانی میان اُستمانی روچ ءَ داران ءَ صباء لبزانکی فیسٹیول ءِ نام ءَ بلوچستان ءُ پنجاب ءِ جتا جتائیں شھراں مراگش دار ایت۔ اے دیوانانی تہ ءَ ماتی زبان ءِ ارزشت ءِ سر ءَ بلوچ کواس، زبانزانت ءُ شائر توار پر جنگ بنت کہ آ اے درگت ءَ وتی ھیالاں درشان کن انت۔ اے درگت ءَ بساک21 فروری 2024 ءَ ماتی زُبانانی میان اُستمانی روچ ءَ یک کتابُکے “ماتی زُبان” ءِ نام ءَ چاپ ءُ شنگ کنت۔ چرے گپاں اے گپ تچک بوت کہ بساک چہ دومی بلوچ وانندہ گلاں چٹیں جتائیں گلے کہ آ وت ءَ بلوچ نودربرانی درد وار وَ گؤش اَنت بلے مارا اے درگت ءَ ھچ کنگ ءَ گندگ ءَ نیا انت۔ گڑا چوش گؤشگ بیت کہ بساک پہ بلوچ نودر، بلوچ راج، زبان، ءُ بلوچ گلزمین ءِ ھمک چیز ءِ شیداھیں یک وانندہ گلے۔

پہ راجانی دیمروئی ءَ وانگ ءِ ارزشت ءَ بساک ءَ گیشتر دگہ کئے زانت کنت؟ پمشکا بساک وانگ ءِ دود ءَ بلوچ گلزمین ءِ ھمک ھند ءُ دمگاں چوں بؤر ءَ تاچینگ ءَ مارا گندگ ءَ کئیت اِنت۔ بساک ءَ ھمے زوت ءَ کتاب میڑہ ءِ نام ءَ بلوچستان ءِ ھمک دگ ءِ سر ءَ، وانگجاھانی تہ ءَ کتابانی امبارے جت ءُ بلوچ نودربراں ھوار لس بلوچ ءَ را لاچار کرت کہ آ وانگ ءِ نیمگ ءَ وتی دلگوش ءَ گؤر بہ کنت۔ اے کتابانی تہ ءَ راجدپتر، سائنس فکشن، لبزانک، شاھزانتی، تب زانتی ءُ دگہ بازیں پڑاں گوں بندوکیں کتاب گندگ بوت انت۔ بساک ءِ چرے جپاکشی ءَ چہ سما کپ ایت کہ بساک لوٹ ایت بلوچ مھلوک وانگ ءَ گوں نزیک بہ بیت۔ پرچا کہ بساک سرپد بیت بلوچ ءِ جیڑھانی گیش ءُ گیوار کتابانی تہ ءَ انت۔ زانشت ءِ تہ ءَ انت۔ سرپدی ءِ تہ ءَ انت۔ چریشی ءَ چہ بے رھشونیں بلوچ راج ءَ پہ بگندئے باندا یک رھشونے ودی بہ بیت ءُ بلوچ راج ءِ رھشونی ءَ کنان ءَ ایشی ءَ وتی گڈی منزل ءَ بہ بارت ءُ سر بہ کنت۔ پمیشکا بساک بلوچستان ءَ یک وانگی آشوبے ءِ آرگ ءَ دلمانگ انت۔

اَنچوش کہ ما شما کل چہ بلوچ راجدپتر ءُ گؤستانک ءِ تاکاں سرپد انت کہ پاکستان ءُ بلوچ سیاسی گلاں بلوچ راج ءَ ھوار نودربرانی سر ءَ چنچو ناشری کرتگ ءُ پیداک انت۔ سدانی کساس ءَ بلوچ نودربر شھید کنگ بوتگ انت۔ بیگواہ کنگ بوتگ انت۔ تھاریں کوٹیاں بندیگ کنگ بوتگ انت۔ اے درچ داں زیک ءُ مرچیگ ءَ ھم برجاہ انت۔ پمشکا بساک ءِ سنگت ءُ گؤستگیں سینٹرل کمیٹی ءِ ممبر وھاب بلوچ ءُ گوستگیں کمک کماش فیروز بلوچ بے میار ءَ بیگواہ کنگ بنت۔ بلے وش بھتی ءَ رندتر ءَ آ چہ پاکستان ءِ تھاریں بندیگی کوٹیاں آجو بنت۔ بلئے بساک ءِ دگہ بازیں باسکے داں مرچی ھم ھمے تھاریں کوٹیانی تہ ءَ نشتگ ءُ وتی آجوئی ءِ واب ءَ گندگ ءَ انت۔ ایشی ءَ ابید ھم، بساک ءِ کاروان دیم پہ منزل ءَ جنزان انت۔ بساک! تو دائم ءَ ھست بات ئے ءُ تئی کاروان انچوش دیم پہ منزل ءَ جنزان بات ءُ تو زوت وتی گڈی منزل ءَ سر بات ئے۔ شالا انچوش بات! بساک! پہ تو ارشاد پرواز ءِ شئیرے ءِ اے بنداں ندر کنان ءَ اے نبشتانک ءَ آپسرے ءَ سر کنان ءَ چہ تو موکل لوٹاں-

“درست وتن پہ دیوانگ، درست بے وساں اَنچو، درست یک ھساب ءَ انت،
ھر بلوچ وانندہ یا کہ سرمچار، جنگجو، درست یک ھساب ءَ انت۔”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔