شوھاز ءُ نگد ءُ چکاس ءِ مانا
نبشتہ کار: شاھد اھمد
ھَشتمی بھر
دی بلوچستان پوسٹ
۱: جیڑہ ءِ بیان :کاکہ ءِ تہ ءَ جیڑہ ءِ بیان، اندازگ ءُ چہ آیاں دراتکگیں آسر ھوار انت۔ زرتگیں Hypothesis ءِ سیادی ءَ چہ مراد انت کہ دو یا گیش بدلی ءِ نیام ءَ گندگ بیت۔ اے پڑ ءَ مزنیں آئپوتیسس جوڑ کنگ ءُ بازیں کسانیں آئپوتیس جوڑ کنگ ءِ ھاتر ءَ ھکّی یے گندگ ءَ کیت۔ اے رھبند ءَ جیڑہ ءِ دروشم ءُ ھمے رنگ ءَ ھما راسبند کہ پٹ ءُ پول ءِ پُشت ءَ اِنت ، گوں ھاسیں رنگے ءَ پدر کنت۔ اے ھئےوم ایشی ءِ سر ءَ بندوک اِنت۔
۲: لبزانک ءِ چار ءُ تپاس : یک پٹ ءُ پولی رھبندے ءِ تہ ءَ پٹ ءُ پول ءِ چیر دستی ءَ ھواریں لبزانک ءِ چار ءُ تپاس پیش کنگ بیت۔ پیسریگیں پٹ ءُ پول ءُ زانتکاریں نبشتانکانی یک کسانیں چمشانکے ءَ چہ اے گپ ءِ سبوت رس ایت کہ گوستگیں وھداں چے چے پٹ ءُ پول کنگ بوتگ، پٹ ءُ پولکار اے گپ ءَ زانت ءُ ھما تک ءُ پھناتاں ھم سرپد اِنت کہ کجام تک ءُ پھناتانی سر ءَ پٹ ءُ پولی کار کنگ بہ بیت۔
چونکہ زگریں شوھاز گوست ءِ اِلم ءِ سر ءَ بندوک انت، اے گامگیج اڑ ءُ جنجال ءَ چہ رکین ایت ءُ زوری پٹ ءُ پول ءِ ھاتر ءَ کارآمدیں Hypothesi ءُ کارآمدیں راستی پیش کنت۔ لبزانک ءِ چار ءُ تپاس ءِ وھد ءَ پٹ ءُ پولکار ءَ لھتیں ھاسیں گپانی سر ءَ ھیال ءُ لیکہ کنگی اِنت کہ آ ایش اَنت:
یک: رپورٹ کتگیں جیڑہ کہ انوگیں چار ءُ تپاس کُتگیں جیڑہ ءَ گوں سیادی دار اَنت کہ پیسر ءَ پٹ ءُ پول کنگ بوتگ اَنت۔ دو: اے وڑیں رپورٹانی تہ ءَ پٹ ءُ پول ءِ یک رھبندے ھوار اِنت کہ ایشی ءِ تہ ءَ کارمرز بوتگیں رھبند ءُ زانتکاری ءِ جم کنگ ءِ وسیلہ ھوار اَنت۔ سے: آبادی ءِ جتائیں کِسم ءِ وانگ بوتگ۔ چار: بدلی کہ وانگ ءِ سر ءَ سان مند بوت کنت۔ پنچ: ھما ردی یا رد ءُ بند کہ دیم ءَ اتکگ اَنت۔ شش: دیمتر ءِ پٹ ءُ پول ءِ ھاترا منّارینگ۔
لبزانک ءِ چار ءُ تپاسی ءِ سر ءَ یک انچیں گْونڈگری یے ءِ سر ءَ آسر کنگ بہ بیت کہ آ چہ رستگیں چیزانی ھمگرنچیں دمگاں ءُ ھمے رنگ ءَ ھما دمگاں ھم پیش بہ کنت کہ آیانی سر ءَ ھچ وڑیں تپاکی نیست۔ ھما نبشتانک کہ ھمگرنچیں پٹ ءُ پولانی سر ءَ گْونڈگری کن اَنت آیانی چار ءُ تپاس کنگ بہ بیت۔ اے کار ءَ چہ وھد ءُ جُھد ءِ رکّینگ ءَ کمک رس اِیت۔
۳: جیڑہ ءِ ارزشت: پٹ ءُ پولکار ءَ اے گپ ءِ سر ءَ چمشانک دیگی اِنت کہ اے جیڑہ ءِ گیش ءُ گیوار ءِ سبب ءَ نزریہ(Theory) ءُ اَمل (Practice) ءِ سر ءَ چے پیمیں سان کپ اِیت۔ پَھریزگ ءَ گوں بیان کتگیں سانمندی یا بوتگیں اِلمی ایپلی کیشنز ءِ جیڑہ ءِ ارزشت ءِ درشان کنگ ءَ کمک کن انت۔ پٹ ءُ پولی جھد ءُ کوشست پہ بے بُنیں جیڑھانی سر ءَ ھلاس کنگ مہ بنت۔ مدام سنگینیں جیڑھاں چست بہ کنت ءُ ایشانی گیش ءُ گیوار ءِ جھد ءَ بہ کنت۔ اے کار ءَ سکیں مجگی جھد ءِ لوٹ اِنت۔ ایشی ءَ ابید مالی ھرچ ءُ درچ ھم بیت ایشی ءِ ھاتر ءَ مجگی، جسمانی ءُ مالی کُربانی ھم لوٹ اِیت کہ پٹ ءُ پول ءِ آسر کارآمد ءُ سودمند بہ بنت آ انسانی زند ءِ جیڑھانی گیش ءُ گیوار ءَ سودمند سابت بہ بنت۔
۴: گمانانی بیان :ڈائیگرام ءَ ھما (Assumptions)ھم نبشتہ کنگ بہ بنت کہ آیانی سر ءَ پٹ ءُ پولی گمانی بندوک اَنت۔
روان اِنت۔۔۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت
