TBP Balochi

تربت شھر ءِ بنجاھی بازار ءَ کھول ءِ مردماں زھرشانی برجاہ داشتگ ءُ بیگواھیں مردمانی یل کنگ ءِ لوٹ ءَ کنگ ءَ اَنت-

گیشیں ھالانی رد ءَ بلوچستان ءِ دمگ کیچ ءِ ھند چہ بلیدہ ءَ پاکستانی لشکر ءِ دست ءَ زورانسری بیگواھی ءِ آماچیں شیر جان ءُ ارشاد بلوچ ءِ کھولاں تربت فدا احمد چوک ءَ زھرشانی نندانک داتگ ءُ نشتگ اَنت-

کھولانی نیمگ ءَ برجم دارگ ءِ وھد ءَ بیگواھیں ارشاد ءُ شیر جان ءِ زوت یلہ کنگ ءِ لوٹ کتگ۔

کھول ءِ مردمانی گْوشگ اِنت گْوستگیں شپ ءَ پاکستانی لشکر ءَ مزنیں کچے ءَ چھاپہ جتگ ءُ آزار ءُ اذیت ءَ پد اے دوئیں ورنا پہ زور گوں وت برتگ اَنت ۔

تربت ءِ کھول ءِ مردماں گْوشتگ کہ اگاں مئے زھگاں ھرچ وڑیں جرمے کتگ آ پرچہ گوں ھرچ وڑیں کانودی ادارگ ءَ نہ اَنت، آ کئی دست ءَ بیگواہ کنگ بوتگ اَنت ءُ کجام بنیاد ءَ بیگواہ کنگ بوتگ اَنت؟

تربت ءَ بیگواھیں شیر جان ءُ ارشاد ءِ کھول ءَ لوٹ کتگ کہ اگاں آھانی مردم دیم آرگ ءُ یل نہ بوت اَنت گڑا آ مزن شھدگ ءِ سر ءَ زھرشانی نندانک دیگ ءَ لاچار بنت اِنت کہ ایشی ءِ سرجمیں زمہ واری انتزامیہ ءِ سر ءَ بیت انت ، ءُ آھاں سیاسی ءُ انسانی ھکانی گلاں لوٹ کتگ کہ بیگواھیں شیر جان ءُ ارشاد بلوچ ءِ بابت ءَ وتی توار ءَ چست بہ کن انت ءُ آھانی زند ءِ رکینگ ءَ وتی کرد ءَ پیلو بہ کن اَنت-

بلوچستان ءِ دمگ چہ ڈیرہ بگٹی ءُ کیچ ءَ پاکستانی پوج ءَ دو مردم آوار جنگ ءَ پد بیگواہ-

بیگواہ کنگ بیتگیں مردمانی پجّار ارشاد ءُ خان محمد بگٹی نام ءَ چہ بیتگ اَنت-

اشانی تہ ءَ خان محمد بگٹی ءَ پاکستانی پوج ءَ گوستگیں روچاں ڈیرہ بگٹی ءِ دمگ چہ پھیلاوغ ءَ آئی ءِ جند دکان ءَ آوار جتگ ءُ بیگواہ کتگ چریشی ءَ پد آ بیگواہ ءَ اِنت-

ھمے وڑ کیچ ءِ دمگ بلیدہ پشت کور ھند سر ءَ پاکستانی پوج ءَ شپ وھد ءَ بیڑبرتگ ارشاد لَٹ کُٹ کتگ ءُ بیگواہ کتگ-

روکپتی بلوچستان ءِ بنجاھی شھر زاھدان ءَ ایرانی لشکر ءَ نیکراھی رھشونے دزگیر کتگ-

اھوالانی رد ءَ مروچی زاھدان ءَ امام جمعہ میرجاوگ حافظ عبدالقھار میربلوچزئی آوار جتگ ءُ برتگ-

اھوالانی رد ءَ عبدالقھار گوستگیں روچاں ایرانی آمیدگس ءَ تلب کتگ ءُ مروچی آ پیشی ءَ شتگ بیتگ کہ وتی ھمراھانی ھمراھی ءَ دادگاہ ءَ دمانے ءَ پد گشتگ شما بہ رو ات اے مئے مھمان انت-

چریشی ءَ پد آئی ءِ درگت ءَ دگہ اھوال دیم ءَ نیتکگ اَنت ءُ ایرانی لشکر ءَ آ ناشناسیں جاھے ءَ برتگ-

ایران ءُ پاکستانی لشکر ءِ یکجائی بالی اُرش ءَ جیش العدل ءِ 12 باسک کہ آھانی تہ ءَ دو کماندار ھوار اَنت بیران بوتگ اَنت۔

رسانکدر ءَ ھال رس اِتگ کہ گوستگیں شپ ءَ بلوچستان ءِ رودراتکی ءُ روکپتی سیمسر ءِ دمگ ءَ بالی اُرش ءَ کم چہ کم دوازدھیں مردم بیران ءُ چار مردم ٹپیگ بوتگ اَنت۔

اے اُرشانی بابت ءَ ایرانی رسانکدر ءِ ھالانی رد ءَ پاکستان ءُ ایران ءَ یک سلاھبندیں گلے ءِ مردم یکجاھی ءَ نشانگ جوڑ کتگ اَنت۔

ایرانی واکداراں ٹاپار جتگ کہ اے اُرش ءَ دو گاڑی سرجم ءَ تباہ بوتگ اَنت وھدے کہ 12 مردم بیران بوتگ اَنت۔

دومی نیمگ ءَ ایران ءِ چیر دستی ءَ روکپتی بلوچستان ءَ سرگرمیں مذھبی گل جیش العدل ءَ مرچی یک بیانے شنگ کتگ ءُ گْوشتگ کہ گوستگیں شپ ءِ نزیک ءَ ھشت بج ءَ پاکستانی ءُ ایرانی لشکر ءَ بلوچستان ءِ برجاھیں جھاد ءَ سراوان شجر ءِ سیمسر ءِ دمگ ءَ بامردانی سر ءَ یکجائی ءَ مزنیں بالی اُرش کنگ بوتگ کہ ایشی ءِ آسر ءَ 12 مجاہد شھید ءُ 4 ٹپیگ بوتگ اَنت۔

آئی ءَ گوشت کہ اے بالی ارش ءَ گل ءِ دو اگدہ دار ءُ کمانڈر مولانا حافظ ابراہیم سبکزئی پنام ءِ حافظ حسن ءُ فقیر محمد زائی پنام ءِ امیر عمر شھید بوتگ انت۔

گل ءَ گشتگ کہ من ایران ءِ سرکار ءِ ھلاپ ءَ وتی جھاد ءَ برجاہ داریں ءُ وتی سنگتانی شھادت ءِ بیراں گریں.۔

اُرشانی بابت ءَ ایرانی رسانکدر ءِ تہ ءَ ایرانی سرکاری تکاں اے اُرشانی پدرائی کتگ بلے چہ پاکستانی واکدارانی نیمگ ءَ ھچ وڑیں سرکاری بیان دیم ءَ نہ اتکگ۔

بلوچستان ءَ یکرندے پد ءَ کاؤنٹر ٹیررازم ڈیپارنمنٹ ( سی ٹی ڈی ) ءَ دروگیں میڑ ءِ نام ءِ سر ءَ پیسر ءَ چہ بیگواھیں مردم کُشتگ اَنت-

گیشیں ھالانی رِد ءَ گوستگیں روچاں سی ٹی ڈی ءَ ٹاہ داتگ کہ موسیٰ خیل ھند سر ءَ یک میڑے ءَ چار مردم جنگ بیتگ اَنت-

سی ٹی ڈی دست ءَ جنگ بیتگیں سے مردمانی پجّار محمد نواز بزدار ، غلام بزدار ءُ جعفر مری ناماں چہ بیتگ اَنت کہ پیسر ءَ چہ زورانسری بیگواہ کنگ بیتگ اَنت-

دروگیں میڑاں کُشگ بیتگیں مردمانی تہ ءَ محمد نواز بزدار کہ راڑہ شم ءِ دمگ برگ پشت جھمنند اِنت کہ دہ ستمبر چہ لورالائی ءَ زورانسری بیگواہ کنگ بیتگ-

غلام بزدار بیست ستمبر ءَ راڑہ شم ءِ دمگ چہ پٹرول پمپ ءَ زورانسری بیگواہ کنگ بیتگ وھدے کہ جعفر مری ءَ چہ راڑہ شم ءَ یک دکانے ءَ توژگ زیرگ ءَ دو اکتوبر ءَ زورانسری بیگواہ کنگ بیتگ-

زانگ بہ بیت بلوچستان ءَ اے اولی وئیل نہ اِنت کہ سی ٹی ڈی ءَ زورانسری بیگواھیں مردماں دروگیں میڑاں کُشتگ اَنت-

سی ٹی ڈی ءَ دروگیں میڑانی سر ءَ بلوچ راج ءَ بازیں رنداں وتی زھرشانی ھم نکش کنائینتگ اَنت وھدے کہ پاکستان ءِ راجی ءُ صوبائی اسمبلیاں دروگیں میڑانی سر ءَ جُست چست کنگ کپتگ-

گوستگیں سال ءَ تربت ءَ بیگواہ کنگ بیتگیں ورنا دروگیں میڑاں سی ٹی ڈی ءِ دست ءَ کُشگ ءَ پد مزنیں کچے ءَ زھرشانی کنگ بیتگ- اے وئیل ھلاپ ءَ ڈاکٹر ماہ رنگ بلوچ ءِ سروکی ءَ چہ شال ءَ تاں اسلام آباد ءَ لانگ مارچ کنگ بیتگ-

پاکستانی پوج ءَ یک ورنایے آوار جنگ ءَ پد ناشناسیں جاھے ءَ برتگ –

گیشیں ھالانی رِد ءَ گوستگیں روچ ءَ پنچ نومبر ءَ پاکستانی پوج ءَ بلوچستان ءِ دمگ کیچ ءِ ھند چہ بلیدہ ءَ یک مردمے آئی ءِ لوگ ءَ چہ آوار جنگ ءَ پد ناشناسیں ھندے ءَ برتگ چریشی ءَ پد آ بیگواہ ءَ اِنت-

پاکستان پوج ءِ دست ءَ زورانسری آوار جنگ بیتگیں ورنا ءِ پجّار شیر جان ء درویش جھمنند کیچ نام ءَ چہ بیتگ-

اے ورنا گوستگیں روچ ءَ زورانسری آوار جنی ءِ نشانگ کنگ بیتگ، کھول ءَ ورنا ءِ زوت یل کنگ لوٹ کتگ-

کیچ ءِ تھسیل مند مھیر ءَ پاکستانی پوج نیمگ ءَ چہ لوگانی دستیگ کنگ ھلاپ ءَ زھرشانی ءَ مروچی شش روچ سرجم بیتگ-

مروچی وسیم سفر ءُ دگہ اتکگ زھرشانی کنوکاں گوں یکجاھی درشان کتگ-

ھمے درگت ءَ آیاں گوشتگ کہ اے زھرشانی شش روچاں چہ برجاہ ءَ اِنت- اے نندانک مند مھیر ءَ پاکستانی پوج نیمگ ءَ چہ مردمانی لوگانی سر ءَ دستیگ کنگ ھلاپ ءَ برجاہ ءَ اِنت-

آیاں گوشتگ کہ اے مردم پنچ سالاں چہ درانڈیھ اَنت، آ جتاجتائیں وھداں تھنا وھد دیگ بیتگ اَنت آیانی لوگاں ھالیگ بہ کن اِت بلے آیاں نہ کتگ – یک نومبر ءَ چہ زھرشانی دیگ ءَ لاچار بیتگ اِنت-

وسیم ءَ گوشتگ کہ پیرزالیں زالبول ءُ کسانیں چک زھرشانی ءَ نشتگ اَنت بلے ھکومت نیمگ ءَ چہ آیانی لوٹ سرجم کنگ بیگ ءَ ھچ وڑیں گامگیج زیرگ بیگ ءَ نہ اِنت-

نندانک ءَ نشتگیں مردماں گوشتگ کہ باند سھب دہ ءَ نندانکجاہ ءَ چہ پریس کانفرنس ءَ چہ وتی دیم گامگیج ءَ ایر کن ایں، آیاں مند راج ءَ چہ دزبندی کتگ نندانک ءَ جوانیں وڑے ءَ بھر زورگ دزبندی کتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں پنچ نومبر ءَ سے شمبے ءِ شپ ھشت ءُ ھپدہ ملٹ ءَ تربت سیٹلائٹ ٹاؤن ءَ ڈیتھ اسکواڈ ءِ سروکیں کامند غفور تیرگواری کتگ کُشتگ – وھدے کہ اے اُرش ءَ صدیق ء رفیق جھمنند ڈنک ءُ غفور ءِ بچ حسن غفور ھم ٹپی بیتگ اَنت-

جارکش ءَ گوشتگ کہ سرمچاراں شوربندی رِد ءَ ودار کتگ پرچاکہ اے ھند ءَ چُک لیب ءَ دلگوش بیتگ اَنت – سی ملٹ ودار ءَ پد وھدے چُک چہ اود ءَ شتگ اَنت گُڑا اُرش کتگ چریشی ءِ نشانگ ءَ ایگ ءَ چہ ڈیتھ اسکواڈ ءِ سروکیں کارمند غفور جاہ پہ جاھی مرتگ وھدے کہ آئی ءِ چُک حسن غفور ءُ صدیق ء رفیق ٹپی بیتگ اَنت-

جارکش ءَ گوشتگ کہ راجی میاربار غفور ناں تھنا درچاگردی پُرکاریاں ھمگرنچ بیتگ بلکیں ریاست پاکستان ءِ جوڑ کتگیں ڈیتھ اسکواڈ ءِ سروک ھم بیتگ کہ بازیں مردمانی زورانسری بیگواہ ءُ شھیدی ءَ ھمگرنچ بیتگ وھدے کہ حسن غفور پولیس کاردار ءُ ڈیتھ اسکواڈ ءِ سروکیں کارمندے وھدے کہ صدیق ء رفیق پی پی پی دمگی چئیرمین ءُ منشیات فروش ھوتمان ءِ ھاسیں کارمندے-

جارکش ءَ گوشتگ کہ راجی میاربار غفور ءَ یک اگست دوہزار شانزدہ سیگھک کولواہ ءَ لشکر کشی ءُ بی ایل ایف ءِ کماندار شاھد ندیم ء حاجی لال بخش ءِ ھال پوج ءَ داتگ، اے لشکر کشی ءَ کماندار شاھد ندیم شھید بیتگ، اے وھد ءَ بلوچستان ءِ بُتیں سروزیر ثناء اللہ زھری ءَ ھم درشان داتگ کہ شاھد ندیم ما شھید کنائینتگ- اے لشکر کشی ءِ میان ءَ زورگریں پوج ءَ بازیں مردمے زورانسری بیگواہ کتگ اَت-

جارکش ءَ گوشتگ کہ اے میاربار بازیں ورنایانی زورانسری آوار جنی کھول ءِ چمپروشی کتگ کہ آ پوج واستا چاریگری ءِ کار ءَ بہ کن اَنت، زورانسری آوار جنگ بیتگیں بچّانی پت لاچار کتگ اَنت آ سرمچارانی ھالاں پوج بدے اَنت-

جارکش ءَ گوشتگ کہ راجی میاربار ءَ بازیں مردمے ءِ لگور کنائینتگ ءُ پوج واستا کار کتگ، گل ءَ راجی میاربار دوھزار چاردہ دزگیر کتگ ءُ کڈن کتگ یل داتگ بلے آ وتی کار یل نداتگ اَنت-

جارکش ءَ گوشتگ کہ ٹپی ئیں صدیق ء رفیق غفور ءِ سیاد ءُ ھوتمان ءِ برازتک اصغر ءِ ھمراھی ءَ درچاگردی پُرکاریاں ھمگرنچ بیتگ – وھدے کہ غفور ءِ چک حسن غفور پولیس ءِ کاردار ءُ ڈیتھ اسکواڈ ءِ سروکیں کارمندے بیتگ-

میجر گْوھرام ءَ گْوشتگ کہ بی ایل ایف سرجمیں ڈیتھ اسکواڈ کارمنداں ھوار حسن غفور ءُ صدیق رفیق ءَ کڈن کنت آ وتی کاراں دزکش بہ بنت بلوچ چاگرد ءَ در چاگردی پُرکاریاں ءُ چاریگی ھچ وڑ منّگ نہ بیت-

جارکش ءَ گوشتگ بلوچستان لبریشن فرنٹ اے اُرشانی زمہ واری ءَ منّ اِیت ءُ آجو بلوچستان ءَ تاں ریاستی پوج ءُ آئی ءِ کارمند نشانگ کنگ ءِ اِھد کنت-

ناشناسیں مردماں وی بی ایم پی ءِ سروکی ءَ برجاھیں شُدکُشیں ھڑتال گدان مانداشتگ-

گیشیں ھالانی رِد ءَ شپ وھد ءَ بلوچستان ءِ بُنجاھی شھر شال ءَ ناشناسیں مردماں شال پریس کلب دیم ءَ برجاھیں وائس فار بلوچ مسنگ پرسنز ءِ چیردستی ءَ برجاھیں دراجکشیں شُدکشیں ھڑتالی گدان مانداشتگ چریشی ءِ سبب ءَ گدان ءِ تمبو سُتکگ ءُ پُر بیتگ-

بیگواھیں مردمانی یل کنائینگ ھاتر ءَ گوستگیں پانزدہ سالاں چہ شال ءَ زھرشانی گدان برجم اِنت-

اے گدان ءِ سروکی کنوک ءُ وائس فار بلوچ مسنگ پرسنز ءِ وائس چیئرمین ماما قدیر بلوچ ءَ گْوشتگ کہ شپ وھد ءَ پولیس ءِ سروکی ءَ آئی ءِ زھرشانی ئیں گدان ناشناسیں مردماں مانداشتگ چریشی ءَ سرجمیں گدان سُتکگ ءُ پُر بیتگ-

آئی ءَ گْوشتگ کہ اے اولی رند نہ اِنت کہ ریاستی ادارھانی نیمگ ءَ چہ ماندارگ بیتگ وھدے کہ اشی ءَ ساری سے رند ءَ مئے زھرشانی ئیں گدان ماندارگ بیتگ بیگواھیں مردمانی اکس دِرگ بیتگ اَنت، سرپر نہ بیت ریاست مئے پُرایمنیں زھرشانی چہ چی ءَ چو تُرس آماچ اِنت-

ماما قدیر بلوچ ءَ گْوشتگ کہ ریاستی ادارہ اشی ءَ ساری مئے شھیدانی مانشانی شنک دور داتگ اَنت ءُ وتی کینگ درشان کتگ اِت ءُ گدان مانداشتگ وتی کینگ ءَ درشان کنگ ءَ اَنت، بلے مئے پُرایمنیں زھرشانی گدان ءَ ھمینچو روچ ءَ مان بدار اَنت ما زھرشانی ءَ برجاہ دار ایں-

بلوچستان ءِ دمگ چہ نوشکی ءَ تیرگواری ءَ دو مردم بیران ءُ یکے ٹپی بوتگ-

بیران بیتگیں مردمانی پجّار یاسر جمالدینی ء میر ناصر جمالدینی جھمنند نوشکی کلی جمالدینی ءُ اسرار محمد حسنی جھمنند بدلکاریز نوشکی نام ءَ چہ بیتگ اَنت-

تیرگواری ءِ وئیل اسٹیشن ھند سر ءَ بیتگ پولیس رِد ءَ سلاہ بندیں مردماں پشین ھوٹل سر ءَ تیرگواری کتگ اے مردم کُشتگ ءُ دو ٹپی کتگ اَنت-

تنی وھدے وئیل سوب زانگ نہ بیتگ، وھدے کہ وئیل درگت ءَ پولیس پٹ پول کنگ ءَ اِنت