TBP Balochi

بلوچستان ءِ دمگ کیچ ءِ ھند تمپ کوھاڑ ءَ ناشناسیں سلاہ بندیں پرپٹ سواراں تیرگواری کتگ یک مردمے کُشتگ-

بیران بیتگیں مردم ءِ پجّار مصدق نام ءَ چہ بیتگ-

دمگی اِھوالکار گوشگ اِنت کہ میاربارانی سیادی سرکاری پلامرزی سلاہ بندیں ٹولی ءَ اِنت-

بلوچ راج دوستاں پارٹیانی گوشگ اِنت کہ سرجمیں بلوچستان ءَ پاکستانی پوج بلوچ راجی زرمبشت ءَ ایرموش کنگ ھاتر ءَ سلاہ بندیں ٹولی جوڑ کتگ کہ آ ڈیتھ اسکواڈ نام ءَ چہ زانگ بنت-

آیانی گوشگ اِنت کہ اے ٹولی بلوچانی کُشک ءُ بیگواہ کنگ ءَ اَبید دگہ چاگردی سلکاریاں تچکی ءَ ھمگرنچ اَنت وھدے کہ پاکستانی پوج آ بے لگام کتگ اَنت-

کاؤنٹر ٹیررزم ڈیپارٹمنٹ “ سی ٹی ڈی ” ءَ انٹلی جنس بیسڈ آپریشن ءَ دو مردمانی کُشگ ءِ ٹاہ داتگ-

سی ٹی ڈی ءِ واکدارانہ رد ءَ ھزدار ءَ گچینی جاھاں گمانی اُرش کنگ ءِ بے سوب کنگ ءَ آپریشن ءَ دو مردم کُشگ بیتگ اَنت- کُشگ بیتگیں مردمانی پجار مشکہ ءِ جھمنند بار جان ءُ سوراب ءِ جھمنند عبدالخالق ءِ ناماں زانگ بیتگ اَنت-

سی ٹی ڈی ءِ رد ءَ کُشگ بیتگیں ھردوکیں مردم گوست ءَ کلات ءِ اُرشاں ھوار بیتگ اَنت-

سی ٹی ڈی ءِ رد ءَ آپریشن ءَ تیرگواری ءَ چریشی ءَ سی ٹی ڈی ءَ پسھی کاروائی ءَ کُشگ بیتگ اَنت-

پورسز ءَ ٹاہ داتگ کہ آپریشن ءِ وھد ءَ وئیل جاہ ءَ یک SMG میگزین، ھشے کلو گرام C4 شورو، ہک مکناتینسی IED الفا فائر سسٹم، دو ریمو- کنٹرول ڈیوائسز، یک دزبمبے،یک موٹر سائیکلے ءُ دو موبائل پوج دزکپتگ اَنت-

زانگ بہ بیت بلوچستان ءَ سی ٹی ڈی ءَ کاروائی ھروھد ءَ شکی بیتگ اَنت ءُ اود ءَ بھتام اِنت کہ آ پیسر ءَ دزگیریں مردماں کشگ ءُ مکابلہ کنگ ءِ نام ءَ دیگ ءَ اِنت-

گوستگیں روچاں سی ٹی ڈی ءَ ٹاہ کہ موسیٰ خیل ءِ ھند ءَ یک مکابلے ءَ چار مردم کُشگ بیتگ اَنت کہ اود ءَ کُشگ بیتگیں مردمانی کھولاں پجار کنان ءَ اے مردم پیش ءَ دزگیریں مردم بیتگ اَنت-

گوستگیں روچاں سی ٹی ڈی ءِ دست ءَ کُشگ بیتگیں سَے مردمانی پجار مھمد نواز بزدار، غلام بزدار ءُ جعفر مری ءِ ناماں زانگ بیتگ اَنت پیش ءَ بیگواھی ءِ آماچ بیتگ اَنت-

روکپتی بلوچستان ءِ دمگ راسک ءَ ایرانی لشکر ءَ چار اُرشکارانی کُشگ ءِ ٹاپار ءُ وتی یک کارمندے ءِ اھوال دیم ءَ آورتگ اَنت-

گیشیں اھوالانی رد ءَ راسک ءِ ھند پیروز آباد ءَ ناشناسیں سلاہ بندیں مردماں ایرانی لشکر سپاہ ءِ سر ءَ اُرش کتگ بیتگ کہ چریشی ءَ پد ایرانی لشکر ءَ وتی یک کارمندے ءِ مرگ ءِ ھال پدر کتگ ءُ ایشانی ھواری ءَ چار اُرشکارانی کُشگ ءِ ٹاہ ھم داتگ-

لس اھوالانی رد ءَ اے اھوال راست نہ بیتگ بلے ایرانی لشکر ءِ نیمگ ءَ اُرشکارانی کوش ءِ اھوال دیم ءَ آرگ بیتگ اَنت-

تنی وھدی اے اُرش ءِ زمہ واری ھچ گل ءَ نہ زرتگ-

زانگ بہ بیت گوستگیں روچاں روکپتی بلوچستان ءَ ایرانی لشکر ءِ سر ءَ دو ٹوھیں اُرش بیتگ ات اَنت آیانی زمہ واری نیکراھی گل جیش العدل ءَ من اتگ ات اَنت-

دومی نیمگ ءَ جیش العدل ءَ یک درشانے ءَ گوشتگ ات کہ روکپتی ءُ رودراتکی بلوچستان ءِ سیمسری ھنداں پاکستان ءُ ایران ءِ ھواریں کاروائی ءَ گل ءِ باسکانی بیرانی ءِ ھال راست کتگ ات اَنت-

نبشتانک: سمُل ءِ ￵کسّہ

نبشتہ کار: ایس این مھروان

دومی بھر

دی بلوچستان پوسٹ

زندگی ءِ سپر باز دراجیں کجام وڑ ءَ کسّہ نبشتہ بہ کن اَں بلے انگت دل ءَ ￴ اُوماں سرجم نہ بنت ۔￴ گپ ایش اِنت انچو تو باز مھر کن ئے انچُش باز جُست دلے توک ءَ ￴جوڑ بیت انچو داستان جوڑ بیت دنیا باریں چی جیڑ ایت بلے من وتی کسّہ ءَ نبشتہ کن اَں پہ سُمل ءَ ￴چیاکہ من ءَ گوں سُمل ءَ ￴مھر اِنت۔

سمُل من زاناں تو گریشگ ءِ توک ءَ ￴گوں دزگُھار آں گوں وش ءُ شادان ئے منی دوا اِنت ھر وھد ءَ وش ءُ سلامت بات ئے۔

وھدے نیمروچ ءَ ￴تو چہ وانگ جاہ ءَ واتر بہ ئے￷ پد ءَ گوں دزگُھاراں گوں دیوان بہ ئے۔ وھدئے بلوچی گانا گوشدارے ￵تو گوں وتی دزگُھاراں من زاناں تو منی یات ￴ءَ ￴گپ ئے۔

من زاناں گریشگ ءِ وشیں موسم منی یاتاں دنت، وھدئے￷ کم کمیں سرد بیت موسم تو گوں ھمراھاں وانگ جاہ ءَ ￴واتر بہ ئے￷ پد ءَ وتی کاراں گوں بندیگ بہ ئے￷ ۔ من زاناں بیگاھے وھد بیت تو گوں دوستیں دزگُھاراں درکائے پہ سیل ءَ وھدئے￷ روچ زرد بیت وشیں ندارگے دنت روچ برکت بوھگ ءِ وھد ءَ زرد بیت مُرگانی توار بیت پد ءَ ھر شپانگ گوں بُزگل ءَ ، بزگر گوں وتی ساماناں پہ لوگ ءِ ￴ نیمگ ءَ واتر بنت ۔ بلے تو گوں دزگُھار اں گریشگ ءِ وشیں موسم ءَ ￴ندارگ بیت۔ مھروان من ھر وھد ءَ وش اُں ھنچو تی یات کیت زاناں تو وشے مدام وش بات ئے۔

سمُل بوت کن تو ھنچو سرپدے من وتی زندگی ءِ سپر بندات کتگ بلے ھمئے سپر ءِ آسر توئے (منزل) تو ئے منی باندات تو ئے سمُل تئی مھرانی ھستی اِنت۔ من وت زندگی ءِ ￵درد جنجال ءُ پریشانی بے ھال کُتگ اَں تو من ءَ ھنچو شادان کتگ ھچ پکر ءُ ھیال نیست منی دلجمی بہ زان تو منی ءِ ئے سمُل نہ زانی کسمت ءَ چئے بیت بلےمن ترا وتی کُتگ ۔

وھدے کہ اولی رَند ءَ من ترا دیست منی دل ءِ ￵ھشکیں ڈگار پد ءَ اُمیدے سبز بواں اِنت، پرچاکہ منی ھر یک گم ءُ جیڑھے ءِ وشی گوں تئی مھراں بندوک اَت، من مدام ھمے جیڑ اِتگ کہ بے تو من ءَ دگہ راہ ءُ دَر نیست ، نہ دگہ چوشیں مردمے ھست کہ من ءَ تی وڑ ءَ مھر بہ دنت ءُ نہ کسے امیت ھست ھر چی ھست اِنت توئے بے شک اللہ مزن اِنت بلے شر انت تو ئے منی ساہ-

منی وابانی بانور سمُل، اللہ شاھد اِنت کہ منی دل ءِ تہ ءَ پہ تو دگہ ھرابے نیست ، نہ من اے جیڑاں تو من ءَ چہ جتا بہ بہ ئے من دل ءَ بس ھمئے جیڑاں تو منی ئے من بس ترا وتی بانور کنگ لوٹ آں منی یکیں لوٹ ءُ واھگ تو ئے ۔۔منی واھگانی دشتار من ترا کلوہ داتگ ھنچیں گپ گشتگ تو باز تو جزبات بوتگ ئے منی ناز ءُ نکرہ منی چماں کُتگ آں ، سمُل من دنیا ءِ ھر وڑیں ازت دوست اِنت بلے تئی جتائی ءَ چہ باز ترس کیت ھست یک شانتلے چوں وش وش ءَ توار کنت تئی ودار ءَ نشتگ اَں این جان دیوانگ اَں پہ سمُل ءَ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-

ڈاکٹر ماہ رنگ بلوچ ءُ بلوچ یکجھتی کمیٹی ءِ بنجاھی باسک مستونگ ءَ سر بوتگ انت ءُ مستونگ ءِ بمب تراک ءَ بیران بیتگیں زھگانی کھولانی گون ءَ دلپدردی ءِ درشانی کنگ ءَ انت۔

اے درچ ءَ سر ءَ ڈاکٹر ماہ رنگ ءَ گران بھائیں جانانی بیرانی ءِ سر ءَ دلپدرد ءُ رنج ءُ گم ءِ درشانی کتگ۔

آئی ءَ اے درچ ءَ گوشتگ کہ مستونگ ءِ الس ءَ وتی بھادری ءَ سرپدی ءِ سزا دیگ بوگ ءَ اِنت۔

آئی ءَ گوشتگ کہ دژمن پُل ءُ گلاب دابیں بے میاریں زھگاں چہ ھم ترس ایت۔

آئی ءَ گوشتگ کہ بلوچ یکجھتی کمیٹی کھولانی گمانی تہ ءَ برابری ءَ ھوار انت۔

ڈاکٹر ماہ رنگ ءَ دیمتر ءَ گْوشت کہ مستونگ بمب تراک بلوچ نسل کشی ءِ درچ اِنت کہ ایشی ءِ تہ ءَ دژمن کور بوتگ ءُ بے میاریں زھگاں ھم رھم کنگ ءَ نہ اِنت۔

آئی ءَ گوشتگ کہ مستونگ بلوچستان ءِ سیاسی ءُ گھگیری ءِ چیدگ اِنت۔ مستونگ ءِ جاور پہ زانت ھراب تر کنگ بیگ ءَ انت دانکہ مردم پہ وتی ھکاں پاد اتک مہ کن انت ءُ اسکول ءِ نودربراں نشانگ جوڑ کنگ ءِ مول ءُ مراد ھمیش انت کہ بلوچ ءَ چہ وانگ ءُ زانگ ءَ دیر بہ کن انت ءُ گوں آھاں بوؤکیں ناانساپیاں بے ھال بہ کن انت۔

ھب ءِ نندوکیں بیگواھیں برات یک ماھے ءَ پد ھم یل کنگ نہ بوتگ اَنت۔

بلوچستان ءِ واپاری شھر ھب ءَ گوستگیں ماہ ءَ زورانسری بیگواہ کنگ بیتگیں جنید ھمید ءَ یک ماھے سرجم بیتگ ءُ آئی ءِ برات یاسر ھمید ءَ یک ماھے سرجم بوگی اِنت – ھردوک انگت ءَ یل نہ بیتگ اَنت ءُ کھول ءَ پریس کانفرنس کتگ ءُ ورنایانی یل کنگ ءِ لوٹ کتگ-

لسبیلہ پریس کلب کلب ءَ اھوالکاراں گپ کنگ ءِ وھد ءَ عبدالحمید ءِ جنکین چُک ءَ گوشتگ 8 اکتوبر 2024 ءَ شپ ءِ دہ بج ءِ نزیک ءَ منی مستریں برات جنید حمید ء عبدالحمید ءِ سر ءَ درجنے ءَ گیش کارمنداں بیڑ برتگ۔ ھب بھوانی شاہ پمپ ءِ نزیک ءَ سئے گاڑی سلاہ بندیں مردماں توپک ءِ زور ءَ آوار جتگ ءُ برتگ –

آئی ءَ گوشت کہ منی 28 سالی ئیں برات جنید ء عبدالحمید ھمے واپاری شھر جب ءَ اوٹسوکا پاکستان لمیٹڈ نامیں کمپنی یے ءَ کار ءَ اِنت ءُ دمگ ءِ مردم ھم گواھی دے اَنت کہ منی برات ھچبر سیاسی ءُ دگہ نیکراھی سرگرمیاں ھوار نہ بیتگ-

زانگ بہ بیت جنید حمید ءِ برات یاسر حمید 11 اکتوبر 2024 ءِ شپ ءَ کلات ءَ ھما وھد ءَ زورانسری بیگواہ کنگ بوتگ وھدے کہ آ یک سیادے ءِ لوگ ءَ نشتگ بوتگ۔ یاسر حمید چِد ءُ پیش ھم بیگواھی ءِ آماچ کنگ بیتگ-

پریس کانفرنس ءِ تہ ءَ کھول ءَ گْوشتگ مئے لوٹ ءُ دزبندی ھمیش اِنت کہ سرکار ءُ سرکار ءِ سیکورٹی ادارگ جنید ءُ یاسر ءَ یل بہ کن اَنت ءُ ھمے وھد ءَ ما بنجاھی ءُ درملکی انسانی ھکانی ادارگاں گوں دزبندی کن ایں کہ اے گپ ءِ نوٹس ءَ بہ زور اَنت۔

بلوچ لبریشن آرمی ءِ جارکش ءَ جیئند بلوچ ءَ وتی شنگ کتگیں درشان ءِ توک ءَ گوشتگ بی ایل اے ءِ سرمچاراں نوشکی ءُ مستونگ ءِ جتا جتائیں کاروائیاں پاکستانی پوج ءِ چار چاریگ کُشتگ اَنت-

جارکش ءَ گوشتگ بی ایل اے ءِ سرمچاراں گوستگیں روچ ءِ مگرب ءِ وھد ءَ نوشکی ءَ اسٹیشن ءِ ھند ءَ زورگریں پاکستانی پوج ءُ چیریں ادارھانی نیمگ ءَ جوڑ کرتگیں وتگڑیں ڈیتھ اسکواڈ ءِ دو کارندہ اسرار مھمد حسنی ءُ یاسر جمالدینی ءِ سر ءَ اُرش کتگ –

جارکش ءَ گوشتگ اسرار ء مھمد جان حسنی جھمنند کلی جمالدینی نوشکی بازیں وھدے ءَ پوج ءِ چیردستی ءَ کار ءَ بیتگ- ھردوکیں کارندہ نوشکی ءَ بلوچ ورنایانی نشانگ کنگ ءَ تچکی ءَ ھوار بیتگ اَنت ایشانی ھوار لوگانی چھاپہ، ورنایانی زورانسری بیگواہ کنگ ءَ زورگریں پوج ءِ رھشونی ءَ بیتگ-

ھردوکیں کارندھاں لس مھلوک ءَ را بلیک میل کنگ ءَ ھم ھوار بیتگ اَنت- آ زورگریں پوج ءِ نیمگ ءَ بھتہ واری ءُ ڈکیٹی ءَ روچ ءِ رھمان کنگ ءَ بیتگ اَنت- ھردوکیں کارندھانی سر ءَ زراب ءَ بازیں وھدے ءَ نگاہ ایر کتگ اَنت کہ اود ءَ اے مردم زورگریں پوج ءِ بنجل ءَ روگ ءِ آیگ ءِ ھواری ءَ نوشکی ءُ کلات ءَ وتگڑین ڈیتھ اسکواڈ ءِ گور ءَ گند ءُ نند ءَ گندگ بیتگ اَنت-

جارکش ءَ گوشتگ ات مردم بی ایل اے ءِ ھِٹ لسٹ ءَ ھم ھوار بیتگ اَنت- چریشی ءَ گوستگیں روچ ءَ سرمچاراں سرجم کنان ءَ گڈی تک ءَ سر کتگ اَنت ءُ ھمے تک ءَ ھواریں دگہ مردماں ھوار نوشکی ءُ کش ءُ گوری ھنداں زورگریں پوج ءُ چیریں ادارھانی واستا کار کنوکیں مردمانی سر ءَ مئے نگاہ ایر اَنت- ءُ وتی بلوچ دشمنی ءِ یل نہ کنگ ءَ آیانی انجام ھم چو یاسر جمالدینی ءُ اسرار محمد ھسنی ءَ بیت اِنت-

جیئند بلوچ ءَ گوشتگ بلوچ لبریشن آرمی ءِ سرمچاراں یک دگہ کاروائی یے بیست ءُ پنچ اکتوبر ءَ مستونگ ءِ ھند اسپلنجی ءَ چھاپہ جنان ءَ زورگریں پوج ءِ دو کارندہ محب علی ءُ امام علی دزگیر کتگ اَنت-

جارکش ءَ گوشتگ محب علی ءُ امام علی ء خوشحال جھمنند اسپلنجی ءَ دزگیری ءِ وھد ءَ من اتگ کہ زورگریں پوج ءِ چیریں ادارہ ونگ ملٹری انٹیلی جنس ( ایم آئی) ءَ بیتگ اَنت- اسپلنجی، مستونگ ، دشت ءُ شال ءَ زورگریں پاکستانی پوج ءِ واستا چاریگری ءِ کار ءَ بیتگ –

محب علی ءَ من اتگ جتا جتائیں وھداں شال ءَ کلی بنگلزئی ءَ گیاس ء فتح، سریاب ءِ ھند زاکر نامیں ورنایء ایم آئی ءِ دست ءَ بیگواھینتگ شال ءَ شال کینٹ ءَ ھمے وڑ عامر کرد نامیں ورنایے اکس پیش دارگ بیتگ ءُ چاریگری ءِ ٹاسک دیگ بیتگ ، چریشی ءَ آ شال ءَ بیگواہ کتگ ءُ مستونگ ءِ شھر ءَ کسان سالیں ٹک ٹاکریں ورنا ءِ چاریگری ءِ کتگ ءُ پاکستان ءِ دست ءَ بیگواہ کنائینتگ-

محب علی ءَ گیش من اتگ آئی ءَ اسپلنجی ءَ سکندر ءُ نورا نامیں مردمے ءِ آ ایم آئی ءِ کارندھاں مسیت ءَ بیگواھی کنائینتگ-

آئی ءَ گوشتگ دشمن ءِ گچینی ءِ کارمند محب علی ءَ گیش من اتگ دو ماہ پیش پاکستانی پوج ءَ بنجل ءَ لوٹائینتگ ، اود ءَ ٹریکنگ چپ سرمچارانی بنجل ءَ سر کنگ ءَ ٹاسک، بلے پد ءَ ٹریکنگ چپ دیگ نہ بیتگ –

جارکش ءَ گوشتگ چاریگ امام علی پنام ءِ شمی ءَ جست ءُ پرسانی وھد ءَ من اتگ کہ آ دشمنیں پوج ءِ بنجل ءَ شتگ ءُ چریشی ءَ پد آ دشمنیں پوج ءِ چیردستی ءَ وتی برات ءِ ھمراھی ءَ چاریگری ءِ کار ءَ بیتگ-

امام علی ءَ گیش من اتگ کہ دشمن ءِ پوج ءَ آئی ءَ را سرمچارانی سُر ءُ پرانی سر ءَ نگاہ ایر کنگ ءِ کار داتگ، چریشی ءِ واستا آ سلاہ بند بیتگ ءُ شھدگ ءُ ڈیم ءِ ھند ءَ گشتے کتگ-

آئی ءَ گوشتگ چاریگ ءَ من اتگ کہ آئی ءَ حاجی غنی، حاجی راوت ءُ میدا ءِ لوگانی سر ءَ چھاپہ جنگ ءُ چادر ءُ چار دیواریانی پامال کنگ ءَ پاکستانی پوج ءِ سرشونی کتگ ءُ ھمے وڑ مستونگ ءِ شھر ءَ بابو نامیں مردمے ءِ گوشگ ءَ زورگریں پوج ءِ بنجل ءَ شتگ بیتگ- کہ اود ءَ آئی ءَ کاریز سور ءَ یک لوگے ءِ بیڑ برگ ءِ واستا پوج ءِ ھمراہ بیتگ- کہ اود ءَ پوج ءَ سَے مردم گپتگ اَنت ءُ چارُمی مردم رک اتگ-

آئی ءَ گوشتگ امام علی ءَ من اتگ کہ آ شال ءَ کلی بنگلزئی ءَ یک ورنایے،دشت ءَ دو مردمانی زورانسری بیگواہ کنگ ءَ تچک ءَ ھوار بیتگ – آئی ءَ من اتگ گوستگیں ماہ ءَ اسپلنجی ءِ نزیک ءَ دکان ءَ دُزی ءِ گرز ءَ روگ ءَ بیتگ کہ اود ءَ بلوچ لبریشن آرمی ءِ سرمچارانی دیم ءَ کپتگ کہ اود ءَ تچگ ءَ سرمچاراں آئی ءِ سر ءَ تیرگواری کتگ ءُ بلے آ بچ اتگ- ءُ دومی روچ ءَ آئی ءَ پوج ھال داتگ ءُ پد ءَ آپریشن کنائینتگ ءُ آیانی رھشونی کتگ-

بی ایل اے ءَ گوشتگ اے چاریگ محب علی ءُ امام ءِ سر ءَ راجدروھی ءِ سر ءَ بوگ ءَ بلوچ راجی آمیدگس ءَ مرگ ءِ سزا داتگ انت ءُ چریشی ءِ سر ءَ سرمچاراں اے کار آسر کتگ ءُ کشتگ اَنت-

جارکش ءَ گوشتگ بلوچ لبریشن آرمی ھردوکیں کاروائیانی زمہ واری ءَ من ایت ءُ زوگریں پاکستانی پوج ءُ آئی ءِ شریدارانی سر ءَ مئے اُرش ترندی ءَ گوں برجاہ بنت اِنت-

سلمان بلوچ ءِ یل نہ کنگ ءُ زورانسری آوار جنی ءِ ھلاپ ءَ زھرشانی نکش کنائینتگ-

چہ ھُزدار ءَ ھالانی رِد ءَ دو سال ءَ ساری بلوچستان ءِ بُنجاھی شھر چہ شال ءَ پاکستانی پوج ءِ دست ءَ زورانسری آوار جنی ءِ نشانگ کنگ بیتگیں سلمان بلوچ ءِ کجول ءِ نیمگ ءَ چہ مروچی شھر ءَ زھرشانی برجم داشتگ ءُ روانک کش اِتگ-

اے درگت ءَ مردین ءُ زالبول زھگاں شھید پروفیسر رزاق چوک ءَ چہ آزادی چوک ءَ تاں یک روانکے کش اِتگ ءُ زورانسری آوار جنی ءِ ھلاپ ءَ ناراہ جتگ-

ھُزدار ءُ زھرشانی ءِ میان ءَ یکرندے پد ءَ پولیس ءِ مزنیں کچے ءَ مردمانی نزیک ءَ اوشتارینتگ اَنت وھدے کہ شھر ءَ موباھل ءُ دامگ سورسز ھم بند کتگ اَنت پد ءَ زھرشانی ءَ پد پچ کتگ اَنت-

ھمے میان ءَ روانک ءَ زورانسری بیگواھیں سلمان بلوچ ءِ کھول ءِ ھمراھی ءَ زورانسری بیگواھیں آصف ءُ رشید بلوچ ءِ گْھار سائرہ بلوچ بیگواھیں چنگیز بلوچ، ذاکر بلوچ ءُ طیب بلوچ کھول ءَ ھوار بلوچ یکجھتی کمیٹی ءِ باسک ھم ھوار بیتگ اَنت-

زھرشانی چہ ءَ تران کنان ءَ زورانسری بیگواہ سلمان بلوچ ءِ مات ءَ گْوشتگ کہ منی چک سلمان دو سال ءَ ساری چہ ھزار گنجی ءَ زورانسری آوار جنی ءِ نشانگ کنگ بیتگ دو سالاں چہ چُک ءِ یل کنائینگ ھاتر ءَ زھرشانی ءُ آمیدگساں روگ آیگ ءَ اَبید سلمان بلوچ یل کنگ نہ بیتگ ءُ نانکہ مارا تنی وھدے گوشگ بیتگ آ پرچا ءُ کجام میار ءَ بیگواہ کتگ-

بیگواھیں سلمان بلوچ ءِ مات ءَ ھکومت ءُ انسانی ھکانی ادارھاں چہ لوٹ کتگ کہ آئی ءِ چُک دیم آرگ ءُ یل کنائینگ ءَ کرد ءَ پیلو بہ کن اَنت-

دومی نیمگ ءَ بیگواھیں سلمان بلوچ ءِ زورانسری آوار جنی ءِ دو سال سرجم بیگ ءَ سر ءَ کھول نیمگ ءَ چہ چاگردی رسانکدر ایکس ءَ کمپین ءِ جار جتگ، کھول ءَ بلوچ سیاسی ءُ انسانی ھکانی باسکاں چہ اے کیمپین ءَ بھر بیگ ءُ توار چست کنگ دزبندی کتگ-

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت دگہ یک مردمے بیگواہ-

بلوچستان ءِ تیاب دپی شھر چہ گوادر ءَ ھالانی رِد ءَ پاکستانی پوج ءَ یک مردمے آوار جنگ ءَ پد ناشناسیں جاھے ءَ برتگ چریشی ءَ پد آ دیم ءَ آرگ نہ بیتگ-

پاکستانی پوج دست ءَ زورانسری آوار جنی ءِ نشانگ کنگ بیتگیں ورنا ءِ پجّار نعمان ء اسحاق ءِ نام چہ ءَ بیتگ کہ گوادر ءِ جھمنند اِنت-

بلوچستان ءَ زورانسری آوار جنی وئیل یکرندے پد ءَ تُرندی ءَ گندگ آیگ ءَ اِنت کہ اود ءَ گوستگیں ماہ ءَ سد نزیک ءَ مردم بلوچستان ءِ جتاجتائیں دمگاں چہ زورانسری آوار جنی نشانگ کنگ بیتگ اَنت وھدے کہ ھمے ماہ تنی وھدے ھژدہ مردم زورانسری آوار جنی ءِ ھال اِنت آیانی تہ ءَ دہ مردم پد ءَ یل کنگ بیتگ اَنت-

بلوچستان ءِ سیاسی گلاں زورانسری آوار جنی ءِ گیشی ءِ سر ءَ تُرس درشان اِتگ میان استمانی ھکانی ادارھاں چہ دزبندی کتگ کہ آ اے وئیلانی ھلاپ ءَ چہ پاکستان ءَ جُست بگر اَنت ءُ بیگواھیں مردمانی یک کنائینگ کرد ءَ پیلو بہ کن اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں گوستگیں شپ ءَ زورگریں پاکستانی پوج ءِ بُنجل ءِ پھازوکی سنگر دستی بمب اُرش ءَ نشانگ کتگ-

جارکش ءَ گْوشتگ کہ شش نومبر ءِ شپ ءَ ھشت ءَ سرمچاراں ھُزدار ءِ دمگ زرینہ کٹھان ءَ برجاھیں ایف سی بُنجل پھازوکی سنگر دستی بمب ءَ چہ نشانگ کتگ، بمب سنگر ءِ تہ ءَ کپتگ چریشی ءَ چہ پوج تاوان ءِ دیمپانی کنگ کپتگ-

جارکش ءَ گوشتگ کہ بی ایل ایف اے اُرش زمہ واری ءَ منّ اِیت ءُ بلوچستان آجوئی ءَ تاں زورگریں پاکستانی پوج ءُ پوجی شوربندیانی سر ءَ اُرش برجاہ بنت-