TBP Balochi

روکپتی بلوچستان ءِ دمگ چھبار ءَ ایرانی لشکر ءَ یک زالبولے آوار جتگ ءُ یازد روچ ءِ بندیگی ءَ پد آ زمانت ءِ سر ءَ یل داتگ ءُ پد ءَ دوبر آئی ءِ سر ءَ ماں زاھدان ءَ انکلاب نوری زاھدان ءَ یک سالے ءِ سزا بستگ –

سزا بندگ بیتگیں زالبول ءِ پجار الھام ء مھمد جھمنند ایرانشھر ءِ نام ءَ زانگ بیتگ-

الھام شانزدہ ستمبر دوھزار ءُ بیست ءُ دو چھبار ءَ پانزدہ سالی ئیں ماھو ءِ گون ءَ بوھوکیں زوراکیانی ھلاپ ءَ زھرشانی پژدر ءَ گرگ بیتگ –

آئی ءِ سر ءَ ایرانی آمیدگس ءَ بھتام جتگ کہ آئی ءَ ڈیھ ءِ ھلاپ ءَ انسٹاگرام ءُ شھر ءَ زھرشانی ءُ مھلوک ڈیھ ءِ ھلاپ ءَ برانز داتگ-

الھام ایرانی سال سِی ءُ یل مرداد چاردہ سد ءُ دو ءَ چھبار ءَ گرگ بیتگ ءُ دو روچ ءَ چھبار ءِ بندیگی ءَ پد آ زاھدان ءَ برگ بیتگ ءُ اود ءَ دَہ روچ ءِ بندیگی ءَ پد آ زمانت ءِ سر ءَ یل کنگ بیتگ بلے پد ءَ آمیدگس ءَ آئی ءِ سر ءَ بھتام جتگ ءُ گوشتگ کہ آئی ءَ ڈیھ ءِ ھلاپ ءَ انستاگرام ءَ گپ جتگ-

الھام یک انگریزی ءِ استادے ءُ آئی ءِ سر ءَ سزا بندگ ءَ دگہ استاداں زھر ءِ لیکہ درشان کتگ-

سرکاری کمیٹی ءِ سدکی ءَ پد زھرشانی ھلاس کتگ بلے یک ماھے ءِ گوزگ ءَ پد ھم واکدارانی نیمگ ءَ ھچ گامگیج زیرگ نہ بیتگ اگاں یک ھپتگے ءِ توک ءَ زھیر اھمد یل کنگ نہ بیت گڑا ما ترندیں زھرشانی کن ایں-

زورانسری آوار جنی ءِ آماچین زھیر اھمد ءِ کھول ءِ رد ءَ شال ءَ اھوالکاراں گپ کنان ءَ گوشتگ کہ ھمک روچ اے پریس کلب ءَ زورانسری ءِ آماچیں مردم کاینت ءُ شمئے وسلیگ ءَ وتی درد ءُ گماں دنیا ءَ سر کنگ ءِ جھد ءَ کن اَنت کہ بوت کنت سالاں چہ زورانسری ءِ آماچیں مھلوک واتر لوگاں واتر بہ کن اَنت ما ھم ھما سانمندیں مردماں چہ یکے-

آیاں گوشتگ زھیر اھمد ء ڈاکٹر ھاجی عبداللہ یک سرکاری ملازمے ءُ گوستگیں پانزدہ سالاں چہ پاکستان پوسٹ آفس ءَ بستار ءِ کلرک ڈیوٹی دیگ ءَ اِنت- آ پانزدہ جون پشمبتے ءِ روچ ءَ ساھت دو ءَ وتی کارگس جی پی او شال ءَ زرگون دگ ءَ وتی لوگ ءَ سر بوگ ءَ پیش روچ ء رھمانی بیگواہ کنگ بیتگ-

زھیر اھمد ءِ کھول ءَ گوشتگ زھیر اھمد سرکاری ملازمے ءُ آئی ءَ ھچ سیاسی بیک گراؤنڈ نیست انت ءُ بس ھاندانی ءُ ھونی ریشتگانی وجھ ءَ زھیر اھمد ءَ ھوار دگہ سیاد ءُ وارس ترسینگ بوگ ءَ اَنت ءُ شپانی نیم ءَ لوگانی سر ءَ بیڑ برگ بیتگ اَنت-

اھوالکاراں گوں گپ کنان ءَ کھول ءَ گوشتگ زھیر اھمد پاکستانی پورسز سی ٹی ڈی ءُ چیریں ادارھانی کارمنداں شال ءَ بیگواہ کتگ ءُ ما اے درگت ءَ پریس کانفرس ھم کتگ ءُ یل کنگ ءِ دزبندی کتگ ءُ یل نہ کنگ ءِ دروشم ءَ ما لاچار بیتگ ءُ زھرشانی کتگ –

آیاں گوشتگ زھیر اھمد ءِ یل کنگ ءِ ھاتر ءَ ما شال ءَ چاردہ روچ ءَ زھرشانی نندانک ءَ ھوار روانک کش اتگ ءُ ھمے وھد ےَ پولیس ءِ نیمگ ءَ تاکت کارمرد کنگ بیتگ ءُ بیست ءِ کچ ءَ زھرشانی کنوک گپتگ انت ءُ ایشانی توک ءَ پنچ زالبول ھم ھوار بیتگ اَنت پد ءَ چاردہ جولائی ءَ ریڈزون ءَ سرکار ءِ گون ءَ گپ ءُ تران بیتگ زھرشانی کنوکانی یل کنگ، سی ٹی ڈی ءِ سر ءَ ایف آئی آر نبشتگ کنگ ءُ پانزدہ روچ ءِ توک ءَ زھیر اھمد ءِ یل کنگ ءِ سر ءَ تپاکی بیتگ –

اے سرکاری کمیٹی ءِ سدکی ءِ سر ءَ ما پانزدہ روچ ءَ داں زھرشانی ھلاس کتگ بلے یک ماھے ءِ گوزگ ءَ پد واکدارانی نیمگ ءَ ھچ گامگیج زیرگ نہ بیتگ ءُ اے وھد ءَ بس سرکاری کمیٹی اے دیم آ دیم کنگ اِنت-

آیاں گوشتگ ما اے پریس کانفرنس ءِ زور ءَ سرکار ءَ تچک ءَ گوش ایں اگاں زھیر اھمد یک ھپتگے ءِ توک ءَ یل نہ بیت گڑا ترندیں زھرشانی کن ایں-

گڈسر ءَ آیان گوشتگ ما بلوچستان ءِ سیاسی ءُ چاگردی گلاں ھوار میان استمانی انسانی ھکانی گلاں گوں دزبندی کب ایں آ زھیر اھمد ءِ یل کنگ ءَ وتی کرد ءَ پیلو بہ کن اَنت-

بلوچستان ءِ دمگ ڈیرہ بگٹی ءِ جھمنندیں بندہ خان نظر علی بگٹی چہ شال ءَ بیگواہ کتگ-

کھول رِد ءَ آ چہ سیٹلائٹ ٹاون ءَ پانزدہ اگست ءَ آوار جنگ ءَ پد بیگواہ کتگ- بندہ خان بگٹی سیٹلائٹ ٹاون ءَ برجاھیں بگٹی ھاؤس ءِ پُشت نیمگ ءَ مسیت ءَ نماز وانگ ءَ پد درتکگ کہ آ پاکستانی پوج ءِ کارمنداں آوار جتگ ءُ بیگواہ کتگ-

زانگ بہ بیت کہ بلوچستان ءَ زورازنسری بیگواھی تُرسناکیں وڑے گیشی اتکگ-

بلوچ سیاسی ءُ چاگردی مردمانی نیمگ ءَ زورانسری آوار جنی ءِ وئیل یک مچی سزا کنگ بیتگ- آئی ءِ رِد ءَ بیگواھیں مردم ءِ ھمراھی ءَ آئی ءِ سرجمیں کھول ازیت دیگ بیگ ءَ اِنت-

جتاجتائیں وھداں میان اُستمانی ءُ دمگی انسانی ھکانی گلانی نیمگ ءَ چہ بلوچستان ءَ زورانسری بیگواھی دلپدری درشان کنگ بیتگ بلے اے وڑیں وئیل ھمکروچ ءِ ھساب ءَ نکش بیگ ءَ اَنت-

گوستگیں ھوراں چہ تاوان بوتگیں راہ انگت ءَ شر نہ بوتگ اَنت، بندیں راہ ءِ سر ءَ 14 کلاک ءَ درد ءُ دور ءِ کشّگ ءَ پد لاپ پُری زالبولے بیران بوتگ۔

بلوچستان ءِ دمگ آواران ءِ ھند جھاؤ ءِ دمگ دمب اللہ بکش چنال گوٹھ ءَ گوں سیادی داروکیں لاپ پُری زالبول ءِ زگ ءِ پیداک کنگ ءِ ھاتر ءَ کراچی ءَ دیم دیگ بوگ ءَ ات کہ اود ءَ بازیں ٹکریں راہ بند بوگ ءُ گیر آیگ ءِ سبب ءَ آ وھد ءِ سر ءَ نادراھجاہ ءَ سر نہ بوتگ ات۔

زالبول ءِ کھول ءِ گشگ ءِ رد ءَ آیاں لاپ پُری ئیں زال زمباد ءِ گاڑی ءَ گوں برت ءُ دیم پہ کراچی ءَ رھادگ بوت آں من چاردہ کلاک ءَ گام کپت آں ءُ سکیں درد ءِ سوب ءَ وتی جان ندر کت۔

پد ءَ لوگ ءِ مردماں جنین ءِ لاش پد ءَ جھاؤ ءَ آرگ بوتگ۔

اے بژن ءِ وئیل بلوچستان ءِ دو رند ءَ گچین بوتگیں سر وزیر کدوس بزنجو ءِ دمگ ءَ بوتگ۔ دمگی مردماں بند ءُ بست ءُ دمگی واکدارانی سر ءَ الان کتگ کہ آ ھرابیں راہ ءُ درانی جوڑ کنگ ءُ دوا ءُ درمان ءِ آسراتی ءِ دیم ءَ آرگ ءَ ناکام انت۔

یات بہ بیت کہ بلوچستان ءَ ناگیگیں مات ءِ بیرانی ءِ کیس باز گندگ بنت کہ اود ءَ مردم دمگی دمگاں دوا ءُ درمان ءِ نہ بوگ ءِ سوب ءَ شھراں رو اَنت۔

نوکیں رپوٹ ءِ رِد ءَ دمگ ءَ جسمانی آسراتی نہ بیگ ءِ سوب ءَ گوستگیں یک ءُ نیم سال ءِ تہ ءَ بلوچستان ءِ دمگانی تہ ءَ 23 جنین زھگ ءِ زھگ بوگ ءِ وھد ءَ بیران بوتگ اَنت۔

ایشی ءَ ابید بلوچستان ءِ دمگ ڈیرہ بگٹی ءُ کوہ سلیمان ءَ کارآمدیں دگ ءِ نہ بوگ ءِ سوب ءَ آسراتی ءِ نہ بوگ ءِ سوب ءَ زھگ ءِ پیداک کنگ ءِ وھد ءَ بازیں جنین ءُ چُک وتی جان ءَ گار کن اَنت

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں بیان ءِ تہ ءَ گْوشتگ کہ گوستگیں شپ ءَ چہ سوئی ءَ داں اوچ پاور پلانٹ ءَ روکیں 24 انچ ءِ گیس پائپ لائن ءِ تراکینگ ءِ زمہ واری ءَ من ایں –

بی آر جی ءِ جارکش ءَ گْوشتگ کہ گوستگیں شپ ءَ بلوچستان ءِ دمگ نسیر آباد ءِ دمگ ربی ءَ اوچ پاور پلانٹ ءَ روگ ءَ 24 انچ ءِ گیس ءِ پائپ لائن بی آر جی ءِ کارندھاں گوں تراکناکیں چیزاں تراک کتگ۔

جارکش دوستین بلوچ ءَ گْوشتگ کہ تراک ءَ پد اوچ پاور پلانٹ ءِ گیس سرجمی ءَ بند کنگ بوتگ ۔

روکپتی بلوچستان ءِ دمگ ھاش ءَ ایرانی لشکر ءَ دکانانی سر ءَ بیڑ برتگ ءُ دو مردم آوار جتگ ءُ گون وت برتگ اَنت-

آوار جنگ بیتگیں مردمانی پجار مولوی مھمد امین مراد زئی ء مولوی عبدالرحیم ءُ طارق مراد زئی ء عبدالرھمان جھننند اسماعیل آباد ھاش ءِ ناماں زانگ بیتگ اَنت-

اھوالانی رد ءَ ھردوک مروچی ھما وھد ءَ آوار جنگ بیتگ اَنت کہ ایرانی لشکر ءَ دکانانی سر ءَ بیڑ برتگ ءُ اود ءَ اے دویں دزگیر کتگ ءُ برتگ اَنت-

اھوالانی توک ءَ گوشگ بیتگ کہ ایشانی گرگ ءَ پد لوگاں برگ بیتگ ءُ اود ءَ آیانی زالبولانی موبائل یکجاہ کنگ ءُ چِک کنگ بیتگ اَنت-

ایرانی لشکر ءَ بھتام جتگ کہ اے مردم مئے سر ءَ اُرشکاری ءَ اُرشکارانی کمک اش کتگ ءُ آیانی کھولاں زھرشانیاں بھر زرتگ-

مولوی مھمد امین خلفای راشدین جامع مسیت ءِ اسماعیل آباد ھاش ءِ سروک انت ءُ اود ءَ زھگاں وانین ایت-

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کتگیں شنگ کتگیں درشان ءِ تہ ءَ گْوشتگ کہ سرمچاراں سے شمبے ءِ روچ بیست اگست ءَ کلات ءِ دمگ گزگ ءِ ھند جھکری ءَ تیل ءُ گیس شوھاز کنوکیں شرکت سر ءَ راکٹ ءُ وتکاریں سلاھاں چہ اُرش کتگ چریشی ءِ آسر ءَ اے پُلپانچیں شرکت ءِ کارمنداں سک باز جانی ءُ مالی تاوان چست کنگ کپتگ-

جارکش ءَ گْوشتگ کہ گوستگیں روچ ءَ سھب ءَ کساس ھشت ءَ مئے سرمچاراں دگہ یک اُرشے ءَ اے پُلپانچیں شرکت ءِ کاردارانی گاڑی چیرکتگیں بمب اُرشے ءَ نشانگ کتگ چریشی ءِ آسر ءَ گاڑی سرجم ءَ تباہ بیتگ ءُ اشی ءَ سوار پنچیں کارمند ھما دمان ءَ مرتگ اَنت-

مزار بلوچ ءَ دیمتر ءَ گْوشتگ کہ اے شرکت چینی انجیئنرانی ساڑی بیگ ءَ چہ اُرش کتگ زورگریں ریاست ءِ دستاں زورگپتگیں بلوچستان ءَ برجاھیں کدرتی مڈیانی لُٹ پُل ءَ ھواریں نوآبادیاتی مشینری ءُ ھرچ اے مردم ءَ کڈن کن ایں کہ آ اے پُلپانچیں نزام ءِ بھر مہ بنت اگاں ناں آ مئے نشانگ ءَ بنت-

بلیدہ ءَ ناشناسیں مردماں بند ساچی شرکت سر ءَ اُرش کتگ اود ءَ اوشتوکیں گاڑی ءُ سامان مانداشتگ اَنت-

گیشیں ھالانی رِد ءَ سھب ءِ نُھ نزیک ءَ سلاہ بندیں مردماں بلوچستان ءِ دمگ کیچ ءِ ھند سوراپی ءَ یک بند ساچی شرکت سائٹ سر ءَ اُرش کتگ اود ءَ اوشتوکیں سرجمیں گاڑی ءُ دگہ سامان مانداشتگ ءُ تباہ کتگ اَنت-

وئیل ءَ پد پولیس ءُ پوج ءِ کارمند وئیلجاہ ءَ سر بیتگ اَنت اُرشکار وئیل ءَ پد تتکگ اَنت-

زانگ بہ بیت کہ بلیدہ ءُ کش گور ءِ دمگاں اشی ءَ ساری ھم بند ساچی پروجیکٹس ءُ آیانی سر ءَ کارکنوکیں شرکتانی سر ءَ اُرش کتگ کہ آیانی زمہ واری بلوچ آجوئی لوٹوکیں سلاہ بندیں گلاں منّ اِتگ اَنت، بلے مروچی بیتگیں اُرش زمہ واری انگت ھچ گل ءَ نہ زرتگ-

بلوچستان ءِ دمگ مستونگ ءُ بولان ءَ پاکستان پوج ءِ ھیلی کاپٹرانی بُرز بالی ءُ بازیں جاھاں شیلنگ ءِ ھال اِنت-

ھالانی رِد ءَ مستونگ ءِ دمگ مرو ریشی ءُ کش گوراں کم چہ کم ھپت ھیلی کاپٹر گندگ بیتگ اَنت کہ آیانی روگ آیگ برجاہ ءَ اِنت-

زانگ بہ بیت گوستگیں روچاں مستونگ ءَ پاکستانی پوج ءَ بی ایل اے ءِ باسکانی جنگ ءِ ٹاہ داتگ بیتگ بلے تنی وھدی بی ایل اے ءِ نیمگ ءَ اے درگت ءَ ھچ اھوال دیم ءَ نیتکگ اَنت-

گوستگیں شپ ءَ روکپتی بلوچستان ءِ دمگ گِھ( نیکشھر) ءَ زمین چَنڈ بیتگ ءُ چریشی ءِ آسر ءَ لوگاں تاوان رس اتگ –

گوستگیں شپ ءِ ساھت کساس یازدہ ءُ نیم ءَ زمین چَنڈ بیتگ ءُ چریشی ءَ نیکشھر ءَ ھواریں دمگاں زمین سُریتگ –

زمین چَنڈ پیما اسکیل ءِ رد ءَ زمین چَنڈ ءِ ترندی کساس چار ٹِک اشاریہ پنچ ریکارڈ کنگ بیتگ-

زمین چَنڈ اسکیل ءِ رد ءَ زمین چَنڈ نیکشھر ءَ بیتگ کہ اود ءَ آ زمین ءِ چیر ءَ دَہ کلو میٹر ءِ جھلانکی ءَ بیتگ-

زمین چنڈ ءَ مھلوک ءِ لوگ ترک اتگ اَنت ءُ آیاں تاوان باری بیتگ بلے دگہ جانی تاوانانی اھوال سر نہ بیتگ اَنت-