TBP Balochi

بلوچ سلاہ بندیں گلانی ھمسنتیں گلانی راجی آجوئی ءِ سنگر ( براس) ءِ جارکش بلوچ خان ءَ رسانکدراں شنگ کرتگین درشان ءَ براس ءِ سرمچاراں سرجمیں بلوچستان ءَ 42 جاھاں زورگریں پاکستانی پوج، لشکری کارجاہ، گیس پائپ لائن، مڈی بروکہں گاڑی، چیریں ادارھانی کارمند ءُ وتگڑیں ڈیتھ اسکواڈ ءِ کارمنداں 45 اُرشانانی نشانگ کتگ اَنت-

جارکش ءَ وتی درشان ءَ گوشتگ براس ءِ سرمچاراں کوسٹل ھائی وے،رخشان، ھزدار ءُ ھرنائی ءِ شھدگ شش جاہ ءَ بستگ اَنت ءُ ھمے ڈول ءَ دو کاروائیاں دشمنین پوج ءِ سلاہ دستیگ کتگ اَنت، اے اُرشاں زورگریں پاکستانی پوج ءِ میجر ھسیب ءَ ھوار 20 کارندہ کشتگ انت ءُ بازینے زدگ کتگ اَنت ءُ دشمن بازیں کساسے ءَ مالی تاوانانی دیمپانی کتگ – اے اُرش بلوچ شھیدانی روچ 13 نومبر ءِ درگت ءَ کتگ اَنت-

بلوچ خان ءَ گوشتگ بلوچ راجی آجوئی سنگر ( براس) ءِ سرمچاراں پشمبے ءِ شپ ءَ ھرنائی ءَ زیارت منگی ڈیم ءَ شھدگ بستگ ءُ گاڑی سنیپ چیکنگ کتگ اَنت ھمے وھد ےَ پاکستانی چیریں ادارھانی دو کارندہ دزگیر کتگ اَنت ءُ مرگ ءِ سزا داتگ ءُ کشتگ اَنت-

جارکش ءَ گوشتگ پشمبے ءِ سھب ءَ ھمے دمگ ءَ آیوکیں پاکستانی پوج ءِ بکتر بند گاڑی ریموٹ کنٹرول آئی ای ڈی ءِ نشانگ کتگ چریشی ءِ آسر ءَ پاکستانی پوج ءِ لورالائی اسکاؤٹس ءِ میجر ھسیب جھمنند راولپنڈی ءَ ھوار دو کارندہ مرتگ انت ءُ سَے کارندہ زدگ کتگ اَنت ءُ بکتر بند گاڑی سرجم ءَ تباہ بیتگ-

‘پشمبے ءِ شپ ءَ براس ءِ سرمچاراں اورماڑہ ءُ پسنی ءِ میان ءَ سَے جاہ؛ جعفری کور،ھواری چیک پوسٹ ءُ چائی ءِ ھند ءَ راہ بستگ ھمے وھد ءَ گاڑی سنیپ چیکنگ کتگ اَنت ’

درشان ءَ گوشگ بیتگ کہ سرمچاراں اورماڑہ ءِ نزیک ءَ بسول ءِ ھند چائی ءِ ھند ءَ پاکستانی کوسٹ گارڈز ءِ بنجاھی بنجل اُرش ءِ نشانگ کتگ، یک ادارھے ءَ گیش برجاہ داروکیں اُرش ءَ سرمچاراں راکٹ ءُ دگہ سلاھانی گون ءَ دشمن نشانگ کتگ چریشی ءَ دشمن ءِ پھریز داری ءِ سَے چوکی تباہ بیتگ اَنت – اُرش ءَ زورگریں پوج ءِ 13 کارندہ ھما جاہ ءَ مرتگ ءُ پنچ مرتگ اَنت-

آئی ءَ گوشتگ سرمچاراں مکران کوسٹل ھائی وے ءَ اورماڑہ ءُ پسنی ءِ میانی ھند ھواری ءِ ھند ءَ کوسٹل ھائی وے ءِ سر ءَ پولیس ءِ چوکی ءِ سر ءَ بیڑ برتگ ءُ کارندہ دزگیر کتگ اَنت ءُ سلاہ ءُ دگہ ساز ءُ سامان برتگ اَنت ءُ پد ءَ کارندہ کشتگ اَنت-

براس ءِ جارکش ءَ گوشتگ سرمچاراں مکران کوسٹل ھائی وے ءِ سر ءَ اورماڑہ ءِ نزیک ءَ ھواری ءِ ھند ءَ پُلپھانچی کمپنی ءِ مشینری ءُ کیمپ مانداشتگ اَنت ءُ ھمے وھد ءَ مڈی بروکیں گاڑی نشانگ کتگ اَنت-

آئی ءَ گوشتگ براس ءِ سرمچاراں ھزدار ءِ بنجاھی شھدگ ءِ سر ءَ دو اداراں ناکہ بندی کتگ ءُ سنیپ چیکنگ کتگ – سرمچاراں وڈھ ءِ ھند کراڑو ءِ نزیک ءَ زورگریں پاکستانی پوج ءُ چیریں ادارھانی جوڑ کرتگیں وتگڑیں ڈیتھ اسکواڈ ءِ نام گپتیں گچینی کارمند مھراللہ مھمد ھسنی ءِ کاروان نشانگ کتگ ءُ اُرش ءَ ڈیتھ اسکواڈ ءِ دو کارندہ مرتگ ءُ سَے کارندہ زدگ بیتگ اَنت-

‘زورگریں پاکستانی پوج ءِ دیم ءَ سرینڈر بیتگیں مھر اللہ مھمد ھسنی ، بلوچ راج ءِ سر ءَ زُلم، مشکے ءُ کش ءُ گوراں پوجی آپریشنان تچکی ءَ ھوار بوگ ءَ ھوار ھوار جھدکارانی شھیدی ءَ دزمانجنی بیتگ – راجدروھی ءِ بوگ ءَ مھر اللہ مھمد ھسنی براس ءَ ماٹو بیتگ-

جارکش ءَ گوشتگ براس ءِ سرمچاراں تربت ءِ ھند گنہ ءَ پاکستانی پوج ءِ پوسٹ اُرش ءِ نشانگ کتگ، سرمچاراں دشمن پوج ءِ سر ءَ گرنیڈ لانچر بازیں کساسے ءَ آسر داتگ سوبمندی ءَ وتی نشانگ ءَ سر بیتگ اَنت-

‘تربت ءَ آپسر ءِ ھند ءَ پاکستانی پوج ءِ ٹریننگ سینٹر براس ءِ سرمچاراں اُرش ءِ نشانگ کتگ، اُرش ءَ دشمنیں پوج ءِ بنجل گرنیڈ لانچر آس داتگ اَنت’-

‘تربت ءِ ھند آپسر ءَ ابدروک پوسٹ ءِ سر ءَ سرمچاراں گرنیڈ لانچر بازیں کساسے ءَ آس داتگ اَنت کہ سوبمندی ءَ وتی نشانگ ءَ سر بیتگ اَنت’-

‘تربت ءِ ھند ناسر آباد ءَ زوگریں پاکستانی پوج ءِ بنجل پشمبے ءِ شپ ءَ سرمچاراں راکٹ ءُ دگہ سلاھانی گون ءَ نشانگ کتگ دشمنیں پوج مالی ءُ جانی تاوانانی دیمپانی بیتگ’-

‘کیچ ءِ ھند زامران ءَ کنڈ کاپران ءِ ھند ءَ دشمنیں پوج ءِ چوکی وتکاریں سلاھانی گون ءَ نشانگ کتگ – چریشی ءَ دشمنیں پوج ءَ جانی تاوانانی دیمپانی کنگ کپتگ’-

جارکش ءَ گوشتگ سرمچاراں دوازدہ نومبر ءِ شپ ءَ کرکی تجابان ءِ ھند ءَ دشمنیں پاکستانی پوج ءِ چوکی مزنیں ءُ وتکاریں سلاھانی نشانگ کتگ اُرش ءَ دشمن ءِ دو کارندہ زدگ بیتگ اَنت-

براس ءِ سرمچاراں بلیدہ ءِ ھند زوندان ءِ ھند ءَ دشمنیں پوج ءِ یک پوسٹے راکٹ ءُ دگہ سلاھانی گون ءَ نشانگ کتگ چریشی ءِ آسر ءَ دشمنیں پوج ءِ یک کارندھے جاہ ءَ مرتگ ءُ سَے زدگ بیتگ اَنت-

آئی ءَ گوشتگ سرمچاراں زامران ءِ ھند سابونی ءَ زورگریں پوج ءِ کارمند ھما وھد ءَ وتکاریں سلاھانی نشانگ کتگ انت کہ آ پند ءَ گشت ءُ بیتگ، اُرش ءَ دشمن ءِ یک کارمندے مرتگ ءُ دو زدگ بیتگ اَنت-

جارکش ءَ گوشتگ ھوشاپ ءِ ھند ءَ سرمچاراں پاکستانی پوج ءِ بنجاھی بنجل نشانگ کتگ، سرمچاراں راکٹ ءُ گرنیڈ لانچر بازیں آس داتگ اَنت چریشی ءِ آسر ءَ دشمنیں پوج ءِ چار کارندہ زدگ بیتگ اَنت ءُ آئی ءَ گیش جانی ءُ مالی تاوانانی دیمپانی کنگ کپتگ اَنت-

آئی ءَ گوشتگ تمپ ءِ ھند آسیا آباد ءِ ھند ءَ سرمچاراں پاکستانی پوج ءِ بنجل اُرش ءِ نشانگ کتگ چریشی ءَ دشمنیں پوج ءَ تاوانانی دیمپانی کنگ کپتگ-

‘یک دگہ اُرشے سرمچاراں سیزدہ نومبر ءِ بیگاہ ءِ ساھت چار ءَ آواران ءِ ھند بزداد گندہ کور ءَ ھستیں دشمن ءِ پوج ءِ بنجل ءِ سر ءَ مارٹر گولاھاں گوں نشانگ کتگ – مارٹر گولہ بنجل ءِ تہ ءَ کپتگ اَنت ءُ چریشی ءِ آسر ءَ دشمن ءَ بازیں کساسے ءَ جانی ءُ مالی تاوانانی دیمپانی کنگ کپتگ’-

درشان ءَ گیش گوشگ بیتگ سرمچاراں یازدہ نومبر ءِ شپ ءَ مشکے، گجر ءِ ھند ءَ زورگریں پاکستانی پوج ءِ بنجل دو نیمگاں ترندیں اُرش کتگ – سرمچارانی بازیں کچے ءَ بنجل ءِ سر ءَ نوکیں سلاھانی گون ءَ اُرش کتگ، اے اُرش بیست ءُ پنچ منٹ ءَ برجاہ بیتگ، اُرش ءَ کم چہ کم دشمن ءِ سَے کارندہ مرتگ انت ءُ بازینے زدگ بیتگ اَنت-

سرمچاراں یازدہ نومبر ءَ مشکے، جیبری ءَ دشمنیں پاکستانی پوج ءِ چوکی سر ءَ وتکاریں سلاھاں گون اُرش کتگ دشمن ءَ را جانی ءُ مالی تاوان داتگ، دوازدہ نومبر ءِ شپ ءَ. رخشان، سوراپ ءَ سی پیک روٹ ءِ سر ءَ سَے کلاکاں داں ناکہ بندی کتگ اود ءَ لیویز کارندھانی سلاہ ءُ دگہ ساز ءُ سامان دستیگ کتگ اَنت’-

آئی ءَ گوشتگ براس ءِ سرمچاراں چارشمبے ءِ روچ ءَ پنجگور ءِ شھر ءَ پاکستانی پوج ءِ بنجاھی بنجل ءِ پھریزی چوکی نشانگ کتگ اَنت، سرمچاراں دشمن ءِ سر ءَ گرنیڈ لانچر بازیں کساسے ءَ آس داتگ انت کہ چریشی ءِ آسر ءَ کم چہ کم سَے کارندہ زدگ بیتگ اَنت-

سرمچاراں سَے شمبے ءِ روچ ءَ پنجگور ءِ ھند پروم ءَ کلہ کور ءِ ھند ءَ دشمن پوج ءِ چیر کرتگیں جاسوسی کیمرہ ءُ آئی ءَ ھواریں آلات یک کاروائی ءَ تباہ کتگ انت-

سرمچاراں کیچ ءِ ھند ھیرونک ءِ ھند ءَ زورگریں پاکستانی پوج ءِ چوکی ءِ سر ءَ وتکاریں سلاھانی گون ءَ اُرش کتگ دشمن ءِ سر ءَ جانی ءُ مالی تاوان داتگ-

بلوچ ھان ءَ گوشتگ براس ءِ سرمچاراں کولواہ، ڈنڈار پاکستانی پوج ءِ بنجاھی بنجل یک اُرشے ءِ نشانگ کتگ- چِل منٹ ءَ داں برجاہ بیتگیں اُرش ءَ راکٹ ءُ دگہ سلاہ کارمرد کتگ انت ءُ چریشی ءِ آسر ءَ دشمن ءِ دو کارندہ جاہ پہ جاہ ءَ مرتگ اَنت ءُ کم چہ کم سَے کارندہ زدگ بیتگ اَنت ءُ ھمے وھد ءَ سرمچاراں سرویلنس ڈرون ھم تباہ کتگ ءُ دور داتگ اَنت-

سرمچاراں جھاؤ ءِ ھند دراج کور ءِ ھند ءَ زورگرین پاکستانی پوج ءِ بنجل اُرش ءِ نشانگ کتگ ءُ چریشی ءَ دشمن ءَ تاوانانی دیمپانی کنگ کپتگ-

سرمچاراں گڈگی ءَ واٹر سپلائی ءُ بالگتر چمگ ءِ ھند ءَ دشمن پوج اُرش ءِ نشانگ کتگ اَنت-

درشان ءَ گوشگ بیتگ براس ءِ سرمچاراں دوازدہ نومبر ءِ شپ ءِ ساھت ھشت بج ءَ مستونگ ءِ ھند کھڈکوچہ ٹل ءَ پاکستانی پوج ءِ کارندہ اُرش ءِ نشانگ کتگ اَنت، اُرش بیست منٹاں برجاہ بیتگ، اُرش ءَ دشمن ءِ سَے کارندہ مرتگ اَنت – اُرش ءَ پد دشمن ءَ آبادی ءِ سر ءَ تیرگواری کتگ ءُ مارٹر ھم آس داتگ اَنت-

سرمچاراں یازدہ نومبر ءَ بیگاہ ءِ شش بج ءَ مستونگ ءِ شھدگ ءِ سر ءَ کیڈٹ کالج کراس ءِ ھند ءَ زورگرین پاکستانی پوج ءِ چیک پوسٹ ءِ سر ءَ مزنیں ءُ وتکاریں سلاھانی گون ءَ نشانگ کتگ ءُ دشمن جانی ءُ مالی تاوان داتگ-

سرمچاراں دوازدہ نومبر ءِ بیگاہ ءِ شش بج ءَ ھاران شھر ءَ ریڈزون ءِ ھند ءَ ایم آئی ءُ آئی ایس آئی ءِ کارگسانی سر ءَ گرنیڈ لانچر ءَ بازیں گولہ آس داتگ انت، اُرش ءَ دشمن ءَ جانی ءُ مالی تاوانانی دیمپانیانی دیمپانی کنگ کپتگ-

براس ءِ سرمچاراں گنداوگ ءَ زورگرین پاکستانی پوج ءِ شاکداریں لشکر پولیس یک اُرشے ءِ نشانگ کتگ-

سرمچاراں چارشمبے ءِ شپ ءَ دکی ءَ چمالنگ دگ ءَ بند ءُ ساچی کمپنی ءِ سر ءَ جالار ءِ ھند ءَ اُرش کتگ دشمن ءِ مشینری سوتکگ ءُ تباہ کتگ اَنت-

براس ءِ سرمچاراں کوھلو ببر ءَ زورگریں پاکستانی پوج ءَ یک پوسٹے ءِ سر ءَ اُرش کتگ چریشی ءَ دشمنین پوج ءِ سَے کارندہ زدگ بیتگ اَنت-

آئی ءَ گوشتگ چارشمبے ءِ روچ ءَ براس ءِ سرمچاراں بارکھان ءِ ھند تومنی، بگاؤ ءَ زورگرین پاکستانی پوج ءِ گچینی کارمند ءُ وزیر عبدالرھمان کھیتران ءِ زاتی جیل ءِ واستا کامرد بیتگیں ریسٹ ھاؤس ءِ سر ءَ پھریزوکیں وتگڑین ڈیتھ اسکواڈ ءِ کارندہ نشانگ کتگ اَنت ءُ چریشی ءَ چار کارندہ زدگ بیتگ اَنت-

سرمچاراں ھمے وھد ءَ یک رھوتی ٹاورے تباہ کتگ ءُ نجی جیل ءِ کارندھانی دمبو مانداشتگ اَنت-

جارکش ءَ گوشتگ براس ءِ سرمچاراں پشمبے ءِ شپ ءَ گوادر ءَ جی ٹی گیٹ ءِ سر ءَ ھستیں پاکستانی پوج ءِ نیوی کارمنداں دستی بمبے ءِ گون ءَ نشانگ کتگ چریشی ءَ چپ سَے کارندہ زدگ بیتگ اَنت-

سرمچاراں شمبے ءِ شپ ءَ پسنی ءَ کوسٹ گارڈ ءِ بنجل ءِ گیٹ ءَ جاڑیگیں کارمندانی سر ءَ دزبمبے چگل چریشی ءَ سَے کارندہ زدگ بیتگ اَنت-

جارکش ءَ گوشتگ سرمچاراں بولان، پیرگیب کراس ءَ پاکستانی پوج ءِ چوکی ءِ سر ءَ مزنیں ءُ وتکاریں سلاھانی گون ءَ نشانگ کتگ اُرش ءَ دشمنین پوج ءِ یک کارندھے مرتگ ءُ دو زدگ بیتگ اَنت-

یک دگہ اُرشے سرمچاراں دوازدہ نومبر ءِ شپ ءِ ساھت نُھ ءَ بولان ءِ ھند کھجوری ءَ دشمن ءِ چیر کرتگیں چاریگری ءِ کیمرہ ءُ دگہ ساز ءُ سامان نشانگ کتگ اَنت-

براس ءِ سرمچاراں سھبت پور ءِ ھند گورناڑی ءَ رھمت پھل ءِ ھند ءَ پولیس ءِ چوکی اُرش ءِ نشانگ کتگ-

سرمچاراں روجھان ءِ ھند بستی نواز ءِ نزیک ءَ 36 انچ گیس پائپ لائن تراکناکیں شورواں گوں تباہ کتگ-

بلوچ خان ءَ درشان ءِ گڈسری ءَ گوشتگ کہ براس بلوچستان ءِ آجوئی ءُ بلوچ راج ءِ پھریزگ ءَ وتی ساھانی ندر کنوکاں سیزدہ نومبر ءِ روچ ءَ داد دنت ءُ اے کول ءُ مسام ءَ کنت شھیدانی ھون ءِ مٹ یک آجوئیں ءُ وشھالیں بلوچستان ءِ رھبندے ءِ دروشم ءَ گرگ بیت اِنت، براس بلوچ راج ءِ پلامرزی ءَ گوں اے جنگ ءَ وتی گڈسری ءَ سر کنت ءُ بلوچ شھیدانی ارماناں سرجم کنت اِنت-

ٹرک ٹرانسپورٹ یونین میختر ءِ ھند ءَ دگ بندیں ھڑتال کنگ ءَ انت۔ ٹرانسپورٹ ءِ رھشوناں لورالائی ڈی جی خان شھدگ ءِ سر ءَ اڑانک ایر کتگ ءُ شھدگ روانی ءِ ھاتر ءَ سرجم ءَ بند کتگ-

دگ بند ھڑتال ءِ سبب ءَ لورالائی ءَ چہ پنجاب ڈی جی خان ءَ ھمگرنچیں شھدگ مھتل بیتگ ءُ چریشی ءَ مساپر برین کوچ ءُ مال برداریں گاڑیانی دراجیں لین لگ اتگ اَنت-

یونین ءِ نیمگ ءَ ھڑتال ءِ سبب ءَ گوستگیں سئے روچاں اشکرانی لوڈنگ ھم بند کنگ بوتگ۔ اشکرانی لوڈنگ ءِ بند بوھگ ءِ سبب ءَ چمالنگ ءَ ھوار دکی ھرنائی ءُ شاھرگ ءَ چہ مرچی سیمی روچ ءَ پنجاب ءِ واستا اشکرانی لوڈنگ نہ بوتگ ۔

دکی، ھرنائی، چمالنگ ءُ شاھرگ ءَ چہ پنجاب ءُ جتا جتائیں دمگاں روچے 15 ہزار ٹن ءَ چہ گیش اشکرانی سپلائی کنگ بوتگ۔

ٹرانسپورٹ یونین ءِ نیمگ ءَ ٹرکانی سوچگ ءِ ھلاپ ءَ زھرشانی کنگ بوھگ ءَ اِنت۔ ٹرک ٹرانسپورٹ یونین ءِ دمگی سروک رضا محمد ناصر ءَ میڈیا ءَ گوں تران کنان ءَ گشتگ کہ چمالنگ، ھرنائی ءُ دکی ءَ سلاہ بندیں مردماں روچ ءِ رھمانی ءَ ٹرک سُتکگ ءُ چہ اودا درکپتگ انت، ایشی ءِ سبب ءَ ٹرک ءِ واھنداں کروڑاں کلدار تاوان رس اتگ ، بلے انگت سرکار ءِ نیمگ ءَ تاوان دیگ نہ بوھگ ءَ اَنت، زھرشانی برجاہ بیت داں تاوان ءِ واھنداں دیگ نہ بنت اِنت۔

آھانی گشگ انت کہ اشکرانی بندش بے مھتل برجاہ بیت۔ اگاں لوٹ منگ نہ بوت انت گڑا 16 نومبر ءَ چہ سرجمیں بلوچستان ءَ لوڈنگ بند کنگ بیت۔ یونین ءِ دزبندی ءِ سر ءَ مرچی N70 ءُ N50 میختر ءُ ڑوب ءَ دگ بندیں ھرتال انت۔

بلوچ اسٹوڈنٹس ایکشن کمیٹی ءَ وتی شنگ کتگیں درشان ءَ گوشتگ شال پولیس ءِ گنڈا گردی ءُ جنکیں نودربرانی ترسینگ ءِ درچ یکشل ءَ برجاہ اَنت-

آئی ءَ گوشتگ بی ایم سی گرلز ھاسٹل ءِ دیم ءَ پولیس ءِ کارندہ اتکگ اَنت ءُ نودربریں جنکاں ترسینگ ءَ اَنت ءُ آیاں زورانسری ھاسٹل ءَ درکنگ ءِ جھد ءَ اَنت-

آئی ءَ گوشتگ ھاسٹل ءِ آپ بند کنگ بیتگ ءُ بی ایم سی پولیس ءَ الگار کتگ- ایشی ءَ پیش ناشناسیں نمبراں پون کنگ ءُ بیھار دیگ ءَ اَنت ءُ گوشگ ءَ اَنت ھاسٹل ءَ ھالیگ بہ کن ات اگاں ناں زمہ وار وت بہ بہ اِت-

آئی ءَ گوشتگ اگاں جنکین نودربراں ھوار کسے ءَ چیزے بیت گڑا آئی ءِ زمہ واری دمگی انتزامیہ، بی ایم سی ءِ انتزامیہ، ڈسٹرکٹ پولیس ءُ سرکار ءِ واکدار اَنت-

دومی نیمگ ءَ گوستگیں روچاں پولیس ءِ نیمگ ءَ ھاسٹل ءِ سر ءَ بیڑ برگ ءُ دزگیر بیتگیں نودربر یل کنگ بیتگ اَنت-

آئی ءَ گوشتگ مئے بنداتی لوٹ نودربرانی یل کنگ ءُ پد ءَ کالج ھاسٹلانی بھالی بیتگ کہ آ پولیس ءِ دستیگی ءَ اَنت-

رھشونیں بھرام

نبشتہ کار :ڈاکٹر جلال بلوچ

رجانک :مھروز ھمّل

دی بلوچستان پوسٹ

رھشون ھما بیت کہ آئی ءِ گور ءَ وژنے بہ بیت، ھما کہ آئی گور ءَ مول مرادے بہ بیت ءُ ھما مول مرادانی گرگ ءِ ھاتر ءَ جھد بہ کنت، رھشون ھما بیت کہ مردمانی جزبگ ءُ دیمروی ءِ سوب جوڑ بہ بیت، رھشون ھما بیت کہ آئی ءَ وتی مولانی گرگ ءَ پہ سرجمی ءَ باور بہ بیت ءُ رھشون ھما بیت کہ آئی ءِ بودشت ءِ سر ءَ آئی ءِ سنگت سرجمی ءَ ستک ءُ باور بہ کن اَنت –

ما گْوشت کنیں ھما مردم راستیگیں رھشون بیت کہ یکجاھیں لوٹ گزرانی گرگ ءِ ھاتر ءَ وتی ٹولی ءَ گوں ھوار بیت ءُ کار کنت، ءُ آ اے گپ ءَ شری ءَ زانت ءُ سرپد بیت کہ چہ آئی ءِ کاراں دراھیں مردماں یا ٹولی ءَ نپ رس اِیت کہ آئی ءِ جھد ءَ گوں ھوار اِنت –

اے درستیں بودشتاں اگاں ما یکیں بندیک ءَ بہ کمائیں گڑا اے ڈولداریں ھار ءَ ما بھرام گْوشت کن ایں – آئی ءِ ھمے بودشتانی سوب ءَ آئی ءِ گَل بلوچستان لبریشن پرنٹ بزاں بی ایل ایپ ءَ آ میجر ءِ وڑیں اگدھے ءِ دیگ ءَ ھوار ھوار آ دمگی کونسل باسک ھم گچین کتگ بوتگ –

شھید بھرام ءِ ھمے بودشتانی درگت ءَ وھدیکہ آئی ءِ سنگتے ءِ گوم ءَ ھال اھوال بوت گڑا آئی ءِ گوشگ اِنت کہ ” بھرام ءِ تہ ءَ رھشونی کنگ ءِ سرجمیں بودشت بوتگ اَنت ما آ ھر وھد ءَ ھر کجا کہ دیستگ آئی ءَ وتی مول ءُ مرادانی گرگ ءِ ھاتر ءَ سرجمی ءَ باور بوتگ – گرانتریں دور ءُ نگیگیں جاورانی تہ ءَ ھم آئی ءَ وتی مولانی گرگ ءِ امیت بوتگ – اشی ءَ ابید ھما کارے ءِ کہ زمہ داری آئی ءَ دیگ بوتگ بزاں جنگ جاہ ءَ سنگتانی رھشونی کنگ ءِ گڑا ھر سنگر ءِ تہ ءَ آئی ءَ جوانیں وڑے ءَ وتی کرد پیلو کتگ اَنت – چوشکہ اے کار ءِ تہ ءَ رسک زورگی اِنت ءُ من ھمے پھم آں کہ جنگ جاہ ءَ رسک نہ زوروک کاراں دیم ءَ بُرت نہ کن اَنت – بھرام ءَ رسک زرتگ – کدی کدی ما آئی ءِ اے کار گنوکی یے گوشتگ، بلے سوبمندی ءِ ٹُل ءَ سر بوگ گُش ئے بھرام ءِ نسیب ءَ نبشتہ بوتگ ھمے ھاتر ءَ آ ھر پڑ ءَ وژنام بوتگ – یک دگہ گپے کہ بھرام ءِ سوبمندی یے بوتگ کہ بھرام ءَ مدام گوں وتی سنگتاں شور ءُ سلاہ کتگ، آئی ءَ ھچبر چوش نہ کتگ کہ منان ءُ من الم منی گپ زورگ بہ بیت ءُ منی گپ حرپ ءِ کُل اِنت – آئی ءِ ھمے رویشت ءِ سوب ءَ درستیں سنگتاں آئی ءِ سر ءَ بیسہ بوتگ –

بھرام ءِ یک دگہ سنگتے ءِ گوما کہ ھال ءُ اھوال بوتگ ءُ آئی ءِ پُرارزشتیں بودشتانی درگت ءَ جست گپت گڑا آئی ءِ گوشگ اَت کہ منی ھیالاں رھشون ھما بیت کہ اَرش ءَ سر بوگ ءَ ابید ھم آئی ءِ پاد زمین ءَ بہ بنت، ءُ بھرام ھم ھمے داب ءَ بوتگ ـ آئی ءَ سک باز زوتاں دیمروی ءِ منزل گپتگ بلے آئی ءَ ھچبر مارا اے جیڑگ نہ پرماتگ کہ آ آیانی سروک اِنت یا چہ آیاں مستر اِنت – سوبمندی ءِ گرگ ءُ سنگتانی باور کنائینگ ءَ اے وڑیں رویشت ءِ بوگ المی اِنت – یک دگہ گپے کہ آئی ءَ چہ درستاں جتا کنت کہ آ وتی آسابانی گر ءُ دار ءِ ھنُر ءَ آشنا بوتگ، پرچا کہ ما آ جنگ جاہ ءُ نگیگیں جاورانی تہ ءَ دیستگ کہ اود ءَ آئی ءَ زانشتی ءُ جوانیں وڑے ءَ پیسلہ کتگ بوتگ – بازیں وھداں ھمے دیوانانی تہ ءَ آئی ءَ جاھل ءُ ترندیں گپانی دیمپانی ھم کتگ بلے اے ھما مرد بوتگ دیم ءِ مردم ءِ گپ من اِتگ اَنت ءُ مردمانی دلجم کنگ ءَ منّانک داتگ –

برز ءَ نبشتہ اِنت اے گواھی ءَ بس اِنت کہ آ راستی ءَ یک رھشونے بوتگ – یک ھنچیں رھشونے کہ آئی ءِ ھر گام ءَ وتی ھر کار ءَ مردمانی دل گوں وت کتگ، آئی ءَ سوبمندیانی سرکنگ ءَ ابید ھم وت ءَ وتی راج ءِ ھزمتکار پھم اِتگ –

اے مردمانی ابرم اِنت کہ ھر یک مردمے مزنیں اگدھے ءَ جاھے سر بوگ لوٹ اِیت ءُ مردم پہ اشی ءَ کوشست ھم کن اَنت بلے سوبمندی ھما مردمانی نسیب ءَ بیت کہ آیانی تہ ءَ ھزمتکارے ءِ بودشت ھم مان بہ بیت گڑا آ مردمانی دلانی تہ ءَ راج کت کنت –

بھرام ءِ تہ ءَ اے شری بوتگ کہ اگاں آ سنگتانی دیوان ءَ بوتگ گڑا وت ءَ آیانی ھزمتکار پھم اِتگ ئِے اگاں راج ءِ تہ ءَ بوتگ گڑا آیاں اے نہ مار اِتگ کہ بھرام اچ ما جتا اِنت ءُ بھرام ءِ اے ھم شری یے بوتگ کہ آئی ءَ ھچبر وت ءَ چہ دومیگ ءَ برزتر نہ لیک اِتگ آ آجزی ءُ اوپار داری ءِ پیکر ءِ منوک بوتگ-

بھرام ءِ یک دگہ بودشتے کہ من دیستگ آ ایش بوتگ کہ آئی ءَ مدام لوٹ اِتگ کہ راج ءُ سنگتاں گوں نزیکی بہ کنت – جنگ زند ءِ ھر تک ءُ پھناتاں سیادی داروکاں سانمند کنت کہ آئی ءِ سان مردمانی زند ءِ سر ءَ کپ اَنت اے ساناں ما ماژگی سان ھم گْوشت کن ایں ـ بھرام ءَ اے گپ شری ءَ زانتگ کہ اے جاوراں ھر کسی زند ءِ ترام درگان درگان کتگ اَنت، راج ءُ سنگتاں گوں نزیکی کنگ المی اِنت ھمے ھاتر ءَ آئی ءِ جھد مدامی ھمے بوتگ کہ رھوت کاری ءِ جوانیں ترام اڈ بہ دنت تانکہ راج ءِ گوں زرمبشت ءَ ھما پلامرزی کہ ھست اَنت ءُ سنگتانی ھمراھداری آ ھلاس مہ بیت اِنت –

برز ءِ نبشتہ کتگیں دانکانی ٹپاسگ ءَ پد ما گْوشت کن ایں کہ آ رھشونی ءِ بودشتانی واھند بوتگ- آ یک لس مردمے بوتگ ءُ لس مردمے ءِ وڑ ءَ آئی ءَ ھزمت کتگ اے وڑیں مردمانی گندگ ءَ کدی کدی ھنچوش گمان بیت کہ آ چہ ابرم ءَ سرپد بنت کہ آیوکیں وھد ءِ لوٹ چی اِنت ءُ آیانی سرجم کنگ ءَ چی کنگ لوٹ اِیت –

آئی ءِ ھر کار ءُ رویشت جدائیں رنگے ءَ بوتگ اَنت کہ ھمے سوب بوتگ مردماں ھمائی ءِ نیمگ ءَ دلگوش کتگ –

اے وڑیں مردم ءِ لیکھاں گوں سپر کن اَنت ءُ ھما لیکھانی ھاتر ءَ تاں گڈی ساہ ءَ جھد کنان بنت، اے وڑیں مردمانی تہ ءَ اے بودشت بیت کہ آ واھشتانی گلام نہ بنت بلکیں وتی مولانی ھاتر ءَ وتی واھشتاں کُش اَنت ءُ کل کن اَنت – ھمے ھاتر ءَ آ وتی کار ءُ کردانی سوب ءَ مزنیں اگدھانی سر ءَ سر بنت –

مردمانی دل ءِ تہ ءَ راج کنگ ءِ ھاتر ءَ آجوئی لوٹوکیں رھشوناں مولانی گرگ ءَ پہ ایمانداری ءُ کار ءَ وت کنگ ءُ پیش دارگ المی اِنت – اگاں اے ھردوکانی تہ ءَ اگاں یکے کنگ نہ بوت گڑا دومی ءِ تہ ءَ وت کنڈم بیت – ءُ مئے “بھرام” ایمانداری ءُ کار کنگ ءِ تہ وتی مَٹ وت اَت – آئی روگ ءَ پد آئی ءِ کمی الّم مارگ بیت بلے من ءَ سرجمی ءَ ستک ءُ باور اِنت کہ آئی ءَ روگ ءَ پیش وتی مَٹ الم پیداک کتگ ءُ دومی بھرام نوں آ کاروان ءَ دیم پہ منزل ءَ برگ ءَ اِنت –

بلوچستان ءِ باپاری شھر ھب چوکی ءَ گوستگیں شپ ءَ پاکستانی پوج ءَ بیڑبرتگ پنجگور ءِ جھمنند آوار جتگ ءُ بیگواہ کتگ-

بیگواہ کنگ بیتگیں مردم ءِ پجّار نوروز ء مھمد اسلام جھمنند سندے سر پنجگور نام ءَ چہ بیتگ-

اے مرد پاکستانی لشکر ءَ اشی ءَ ساری ھم دو رند ءَ زورانسری آوار جنی ءِ نشانگ کتگ اے سیمی رند اِنت آوار جتگ –

زانگ بہ بیت بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت-

شال پولیس نیمگ ءَ چہ بلوچ پشتون نودربرانی سر ءَ لٹ کُٹ ءُ دزگیریاں ھوار بی ایم سی ھاسٹل بے سبب ءَ بند کنگ ھلاپ ءَ شال پریس کلب دیم ءَ بلوچستان ءِ نودربریں گلانی نیمگ ءَ چہ یکجاھی زھرشانی کنگ بیتگ-

نودربریں گلاں بلوچ اسٹوڈنٹس ایکشن کمیٹی، پشتون اسٹوڈنٹس فیڈریشن، بلوچ اسٹوڈنٹس آرگنائزیشن. بی ایس او پجّار، پشتونخواہ اسٹوڈنٹس آرگنائزیشن ھوار اَنت-

پریس کلب دیم ءَ کنگ بیتگ زھرشانی ءَ نودربراں ھوار دگہ پڑ ءَ چہ سیادی داروکیں مردمانی مزنیں کچے ءَ بھر زرتگ-

زھرشانی ءَ بی این پی ءِ غلام نبی مری، اے این پی ءِ راھشون خان اچکزئی، نیشنل پارٹی ءِ ڈاکٹر اسحاق بلوچ ءُ بی وائی سی ءِ زمہ وار گلزادی بلوچ ھوار بیتگ-

ترانکاراں تران کنان ءَ گْوشتگ کہ شال پولیس نیمگ ءَ چہ نودربرانی سر ءَ کنگ بیتگیں لَٹ کُٹ درکانودی دزگیری ءِ ایر جن ایں ءُ آیانی یل کنائینگ لوٹ ءَ کن ایں کالج ءِ پچ کنگ ءُ وئیل زمہ وارانی ھلاپ ءَ گامگیج کنگ لوٹ کتگ-

آئی ءَ گْوشتگ کہ دزگیریں نودربراں زوت یل بہ کن اِت بی ایم سی ءِ ھاسٹلاں پچ کن اِت، اشی ءِ ھمراھی ءَ وئیل زمہ وارانی ھلاپ ءَ گامگیج بزور اِت-

بلوچستان ءِ دمگ ھُزدار ءِ تھسیل وڈھ ءِ ھند کراڑو جانی کنڈگ سر ءَ ناشناسیں سلاہ بندیں مردماں چہ مشکے ءَ سیادی داروکیں مھر اللہ محمد حسنی ءِ کاروان سر ءَ اُرش کتگ چریشی ءَ مھر اللہ ءُ آئی ءِ دگہ ھمراہ بیران بیتگ اَنت-

مھراللہ محمد حسنی سرکاری پلامرزی سلاہ بندیں ٹولی ءِ ھاسیں باسکے ءِ دروشم ءَ زانگ بیتگ چریشی ءِ سوب ءَ بلوچ آجوئی لوٹوکیں سلاہ بندانی گور ءَ نام دپ بیتگ اُرش زمہ واری ھچ کس ءَ نہ زرتگ-

بلوچستان ءِ تیاب دپی شھر چہ گوادر ءُ ھاران ءَ پاکستانی پوج ءَ سے مردم آوار جتگ ءُ بیگواہ کتگ اَنت-

بیگواہ کنگ بیتگیں مردمانی پجّار نصرت اللہ ء سردار لیاقت ، منیر ء عصاء ءُ محمد حسن ء منشی عبداللہ نام ءَ چہ بیتگ اَنت-

اشانی تہ ءَ نصرت ءُ محمد حسن چہ ھاران کلان ءُ منیر چہ گوادر ءَ آوار جتگ ءُ بیگواہ کتگ اَنت-

بلوچستان ءِ دمگ پنجگور ءُ مچ ءَ پاکستانی پوج لشکر کشی ءَ دلگوش اِنت- ھال اھوالی آسراتی بند-

پنجگور ءِ تھسیل پروم ءِ کوھی درچ ءَ لشکر کشی برجاہ ءَ اِنت-

دمگی وسیلگ رِد ءَ پاکستانی پوج ءَ پنجگور ءِ ء تھسیل پروم ءِ کوھی درچ ءَ پترتگ-

چمّگندانی گوشگ اِنت کہ مروچی سھب ءَ چہ پاکستانی پوج بلیدہ ءِ دمگ باکاڈ ءُ پروم مرو ءُ دگہ ھنداں چہ پروم ءِ کوھی درچ ءَ پترتگ-

ھمے وڑ بولان ءِ دمگ مچ ءَ ھم لشکر کشی برجاہ اِنت-

دمگی وسیلگ ءَ ٹی بی پی ءَ گوشتگ کہ مچ ءِ دمگ پیرغیب کش گوراں مزنیں کچے ءَ لشکر کشی برجاہ ءَ اِنت وھدے کہ دمگ ءَ ھال اھوالی آسراتی بند کنگ بیتگ-

لشکر کشیانی درگت ءَ چہ واکدار ءَ انگت ھچ وڑیں درشان دیم ءَ نیاورتگ-

روکپتی بلوچستان ءِ دمگ سرباز جلال آباد ءَ ناشناسیں سلاہ بند ءُ ایرانی لشکر ءِ میان ءَ جنگ ءُ چوپ بیتگ کہ چریشی ءَ ایرانی لشکر ءَ جانی تاوانانی دیمپانی کنگ کپتگ-

دومی نیمگ ءَ جیش العدل ءَ اُرش ءِ زمہ واری کسانے درشانے ءَ گوشتگ کہ اے اُرش ءَ ایرانی لشکر ءِ پانزدہ نپر کشتگ ءُ زدگ کتگ اَنت-

آئی ءَ گوشتگ اُرش ءِ وھد ءَ دو ڈرون ھم جتگ ءُ دور داتگ اَنت-

آئی ءَ گوشتگ جلال آباد ءَ یک میتگے ءَ ایرانی سپاہ لشکر ءِ میان ءَ ڈکر وری بیتگ ءُ چریشی ءَ چہ جنگ ءُ چوپ بندات بیتگ کہ اود ءَ بازیں وھدے ءَ جنگ برجاہ بیتگ-

دومی ایران ءِ سرکاری رسانکدر ءَ دو کارندھانی کوش ءُ سَے کارندھانی دزگیری ءِ ھال راست کتگ-

زانگ بہ بیت روکپتی بلوچستان ءَ اے ھمے زوتاں ایرانی لشکر ءِ سر ءَ جیش العدل ءِ اُرش گیشی ءَ گندگ اتکگ اَنت-