TBP Balochi

بلوچستان ءِ دو جتاجتائیں دمگ گوادر ءَ اینٹی نارکوٹکس فورس ءُ ڈیرہ بگٹی ءَ ڈیتھ اسکواڈ کارمندانی تیرگواری ءَ دو مردم زدگ بیتگ انت-

گیشیں ھالانی رِد ءَ بلوچستان ءِ تیاب دپی شھر گوادر ءِ دمگ نیو ٹاؤن ءَ برجاھیں اے این ایف ( اینٹی نارکوٹکس فورس ) ءِ کارگس سر ءَ دستی بمب ءَ چہ اُرش کنگ بیتگ، بلے اے اُرش ءَ ھچ وڑیں جانی تاوان نہ بیتگ-

اُرش گیٹ ءَ کمو تاوان رس اِتگ کانود ایر کتگیں ادارہ زوت وئیلجاہ ءَ سر بیتگ اَنت ءُ پٹ پول بندات کتگ – وھدے کہ پوج ءِ سُر پُرانی تہ ءَ گیشی گندگ اتکگ-

ھمے وڑ چہ ڈیرہ بگٹی ءَ ھال اِنت کہ سنگسیلا ءَ ھکومتی پلامرزی کنوکیں سلاہ بندیں ٹولی ءَ دمگی دھکنکارانی لوگانی سر ءَ تیرگواری کتگ-

تیرگواری آسر ءَ ارسلان ء امیر علی بگٹی ءُ نصراللہ ء مراد علی بگٹی ٹپی بیتگ اَنت، ٹپیانی سیادی بگٹی ٹک ڈومب برداری ءَ چہ گوشگ بیگ ءَ اَنت کہ آ سوئی ءَ برگ بیتگ اَنت-

وئیل ءَ پد دمگ ءَ جاڑیگ بلوچ آجوئی لوٹوکیں سلاہ بندیں مردماں سرکاری پلامرزی ٹولی کارمندانی سر ءَ اُرش کتگ- ھالانی رِد ءَ تیرگواری ءِ آسر ءَ ھکومتی پلامرزی ٹولی ءِ دو مردم ٹپی بیتگ اَنت-

اُرشانی زمہ واری انگت ھچ گل ءَ نہ زرتگ اَنت-

دشت ءِ دمگی مردمانی رِد ءَ پاکستانی پوج ءَ دشت کھڈان ءِ کبرستان ءِ دیوال بلڈوزر کتگ ءُ دور داتگ- چریشی ءِ سبب ءَ چہ کبراں سک تاوان رس اِتگ-

دمگی مردمانی رِد ءَ پوج وتی بُنجل مستر کنگ ءَ اِنت، پوج ءَ کبرستان زمین دستیگ کتگ-

وھدے کہ دمگ ءَ پوج ءِ سُر پُرانی سبب ءَ چو کرفیو وڑ ءَ اِنت-

زانگ بہ بیت کہ اشی ءَ ساری بلوچستان ءِ بازیں دمگاں پاکستانی پوج ءَ لوگ ءُ زمینانی سر ءَ دستیگ کنگ ھلاپ ءَ دمگی مردماں زھرشانی کتگ – ھمے ماہ ءَ مند ءَ دمگی زالبولاں لوگانی سر ءَ دستیگ وھدے کہ ستمبر ءَ بلیدہ ءِ دمگ چیرمین عبدالرحمان بازار ءُ زالبولاں آبادی ءِ تہ ءَ ایف سی ءِ نیمگ ءَ چہ زمینانی سر ءَ دستیگ کنگ ھلاپ ءَ زھرشانی کتگ- اے زھرشانی ءِ مول ھم آبادی ءِ تہ ءَ زمینانی سر ءَ دستیگ ءُ یک نوکیں بُنجلے جوڑ کنگ ھلاپ ءَ بیتگ-

انوگاں مند ءَ زھرشانی ءُ ستمبر ءَ بلیدہ زھرشانی ءَ دمگی مردماں لوٹ کتگ کہ پوج ءَ چہ آبادی ءَ دیر بہ کن اِت- دمگی مردماں گْوشتگ کہ اے کم کچیں آبادی دمگاں آبادی ءَ چہ گیش پوج ءِ کچ مزنیں بُنجل ءَ ساڑی اَنت گُڑا آبادیاں چوکی جوڑ کنگ آ مئے زمینانی سر ءَ دستیگ کنگ لوٹ اَنت-

بلوچ یکجھتی کمیٹی ءِ سروک ڈاکٹر ماہ رنگ بلوچ ءِ سروکی ءَ عوامی نیشنل پارٹی ءِ صوبائی صدر قدرمن، مشر اصغر خان اچکزئی ءَ گوں گند ءُ نند کتگ-

گند ءُ نند ءَ عوامی نیشنل پارٹی ءِ صوبائی سنئیر نائب صدر ءُ سنیٹر شرمندیں نواب ارباب عمر فاروق کاسی صوبائی ایڈیشنل جنرل سیکرٹری عبدالباری کاکڑ صوبائی جارکش ولی داد میانی وھدے کہ بی وائی سی ءِ سروک ڈاکٹر ماہ رنگ بلوچ ءِ ھمراھی ءَ فرزانہ بلوچ ماما رفیق ءُ دگر اے وھد ءَ ساڑی بیتگ اَنت-

گند ءُ نند ءَ بلوچ پشتون وطن ءَ برجاھیں بے ایمنی بیگواھیں مردم، سیمسر بندی، زانشتی ادارھاں پوج ءِ دزمانجنی ءُ دستیگ کنگ ھاسکار بولان میڈیکل کالج ءِ نودربراں دیم اَتکگیں وئیل ءَ چہ کالج ءُ کالج ءِ ھاسٹل بند کنگ ءُ دگہ بلوچ پشتون راجی جیڑھانی سر ءَ گپ رپ بیتگ-

گند ءُ نند ءَ اے گپ سر ءَ تپاکی کنگ بیتگ کہ اے سرجمیں دیمپان اڑ ءُ جنجالانی سر ءُ دگہ راج دوست وتن دوستیں سیاسی توانمنداں ھوار بیگ یکجاھی ءِ تپاکی شوربندی ءُ کار کنگ جُھد کن ایں-

بلوچ وائس فار جسٹس ءِ نیمگ ءَ چہ شنگ کنگ بیتگیں درشان ءِ تہ ءَ گوشگ بیتگ کہ سوراب ءِ جھمنند سیف اللہ رودینی ءِ زورانسری بیگواھی ءَ یازدہ سال سرجم بیگ ءَ ایکس ءَ یک مھمے برجم دارگ بیت-

درشان ءِ تہ ءَ گوشگ بیتگ کہ سیف اللہ رودینی، پولیس ڈیپارٹمنٹ ءِ کانسٹیبلے بیتگ، بیست دو نومبر دوہزار سیزدہ ءَ چہ سوراب ءَ ھُزدار ڈیوٹی ءَ روگ ءَ بیتگ زورانسری آوار جنی ءِ نشانگ کنگ بیتگ – ھمے روچ ءَ پد آئی ءِ جاہ تاں انگت زانگ نہ بیتگ ءُ آئی ءِ یل کنائینگ جھد برجاہ ءَ اِنت-

درشان ءِ دیمتر ءَ گوشگ بیتگ کہ بلوچ وائس فار جسٹس سرجمیں سیاسی ءُ چاگردی باسکاں ، اِھوالکار، وکیل، نودربر ءُ زند ءِ دگہ پڑ ءَ سیادی داروکیں مردماں گوں دزبندی کتگ کہ آ مھم ءَ ھوار بہ بنت سیف اللہ رودینی ءِ پہ سلامتی یل کنائینگ ھاتر ءَ توار چست بہ کن اَنت-

بلوچستان لبریشن فرنٹ ءِ ￵جارکش میجر گوھرام ءَ رسانکدر ءَ شنگ کتگیں درشانے ءَ ￴گوشتگ کہ 14 نومبر ءِ شپ ءِ ساھت ￵ھپت ءُ ￶بیست ءَ ￴سرمچاراں گْوادر ءِ ￵ھند پسنی ببّر شور ءَ ￴برجاھیں کوسٹ گارڈ ءِ ￵بنجل گوں دز بمب اُرشے ءِ نشانگ کتگ۔ چریشی ءَ کوسٹ گارڈ ءَ ￴جانی ءُ ￶مالی تاوان بیتگ۔

آئی ءَ گوشتگ بلوچستان لبریشن فرنٹ اے اُرش ءِ زمہ واری ءَ من ایت ءُ سرڈگار ءِ ￵آجوئی ءَ ￴دژمن ءِ ￵سر ءَ اُرش گوں ترندی ءَ ￴برجاہ بنت اِنت۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشان ءَ گوشتگ بی ایل اے ءِ سرمچاراں کلات ءَ پاکستانی پوج ءِ بنجل اُرش ءِ نشانگ کتگ- اے اُرش ءِ زمہ واری ءَ من ایں زوت رسانکدراں سرجمیں اھوال شنگ کنگ بنت اِنت-

زانگ بہ بیت بلوچستان ءِ دمگ کلات ءَ گوستگیً شپ ءَ ناشناسیں مردماں پاکستانی پوج ءِ یک بنجلے ترندیں اُرشے ءِ نشانگ کتگ بیتگ-

واکداراں ھپت کارندھانی مرگ ءُ ھژدہ ءِ زدگ بوگ ءِ ھال راست کتگ-

واکدارانی رد ءَ کلات ءِ دمگ شاہ مردان ءَ شپ ءَ ناشناسیں مردماں جتا جتائیں نیمگان پاکستانی پوج ءِ بنجل ترندیں اُرشے ءِ نشانگ کتگ-

مرتگیں کارندھانی پجار نیک بخت زمین، گلام اسھاک، عبدالقدیر، رزوان، وقاس، علی عباس ءُ ساکب رھمان ءِ ناماں زانگ بیتگ اَنت-

اُرش ءَ ھژدہ کارندہ زدگ بیتگ اَنت ءُ آ درمانی ءَ شال سی ایم ایچ ءَ برگ بیتگ اَنت-

زانگ بہ بیت بلوچستان ءَ ھمے ماہ ءَ اُرشانی توک ءَ اچانگی گیشی گندگ ءَ آیگ ءَ اِنت ءُ ھمے ماہ ءَ چِل ءُ پنچ اُرش بیتگ اَنت-

بلوچ سلاہ بندیں گلانی ھمسنتیں گل براس ءَ یک درشانے ءَ چِل ءُ پنچ اُرشاں میجرے ءَ ھوار بیست کارندھانی کوش ءِ زمہ واری من اتگ –

بلوچستان ءِ تیابدپی شھر گوادر ءَ ھواریں دمگ جیونی پانوان ءَ گوستگیں شپ ءِ نیم ءَ کوسٹ گارڈ ءَ تیل برداریں گاڑیانی سر ءَ تیرگواری کرتگ ءُ سَے کس زدگ، گاڑی مانداشتگ-

گیشیں اھوالانی رد ءَ تیرگواری ءَ پک اپ یونین ءِ سروک سعید ءَ ھوار سَے کس زدگ بیتگ اَنت-

اھوالانی رد ءَ کوسٹ گارڈ ءِ تیرگواری ءَ گاڑی ءَ آس کپتگ ءُ گاڑی سرجم ءَ ستکگ ءُ تباہ بیتگ-

وئیل پانوان ءِ بالی پٹ ءِ نزیک ءَ پیش اتکگ-

وئیل ءِ ھلاپ ءَ ٹرانسپورٹر ءُ شھریاں زھرشانی بندات کتگ-

روکپتی بلوچستان ءِ دمگ مھرستان ءَ ایرانی لشکر ءَ دو ورنا آوار جنگ ءَ پد بیگواہ کتگ اَنت-

گیشیں اھوالانی رد ءَ مھرستان ءِ دمگ آشار ءَ ایرانی لشکر ءَ دو آوار جنگ ءَ پد بیگواہ کتگ اَنت-

اھوالانی رد ءَ آوار جنگ بیتگیں مردمانی پجار شاکر دامنی ء علی ءُ زاھد دامنی ء مھمد ءِ ناماں زانگ بیتگ اَنت- ھردوک آشار ءِ جھمنند اَنت-

اھوالانی رد ءَ زاھد گوں پرپٹ ءِ ھواری ءَ روگ ءَ بیتگ کہ ایروکشان ءَ لشکر ءَ دزگیر کتگ اَنت-

اھوالانی رد ءَ زاھد ءِ دزگیری ءَ پد آئی ءِ ناکوزتک لٹ ءُ کُٹ ءَ پد آوار جتگ ءُ برتگ –

بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت، ھالانی رِد ءَ پاکستانی پوج ءَ جتاجتائیں بیڑانی وھد ءَ دگہ شش مردم آوار جنگ ءَ پد بیگواہ کتگ اَنت، چریشی ءَ پد ھمے ماہ ءَ زورانسری بیگواہ کنگ بیتگیں مردمانی کچ سی سے ءَ سر بیتگ اَنت-

گیشیں ھالانی رِد ءَ مشکے ءِ دمگ چہ نوکجو ءَ یازدہ نومبر ءَ پاکستانی پوج ءَ سمیر ء فقیر ءُ مسلم ء جمعہ آوار جتگ ءُ بیگواہ کتگ اَنت – دوئیں مردمانی درگت ءَ کھول ءَ ھچ وڑیں سرپدی دیگ نہ بیتگ-

ھمے وڑ کیچ ءَ سر بیتگیں ھالانی رِد ءَ پاکستانی پوج ءَ چہ کیچ بلیدہ ءَ دو ورنا وھاب ء سخی داد ءُ سمیر ء سخی داد شکار میان ءَ آوار جتگ ءُ بیگواہ کتگ اَنت-

کھول ءَ گوشتگ کہ ورنا نزیکیں دمگ میتاپ ءَ شکار ھاتر ءَ شتگ اَنت کہ اود ءَ پوج آ دزگیر کتگ ءُ بُنجل ءَ برتگ اَنت چریشی ءَ پد یل کنگ نہ بوتگ اَنت-

بلوچستان ءِ ھمراھی ءَ پنجاب ءِ تہ بلوچ دمگ چہ ڈیرہ غازی خان ءَ ھم زورانسری آوار جنی ءِ ھال اِنت، وسیلگ رِد ءَ پاکستانی پوج ءَ اعظم جان مری ءُ نبی لال ء قصر مری آوار جنگ ءَ پد بیگواہ کتگ اَنت-

وسیلگ رِد ءَ نبی لال ءِ پت قیصر مری دوھزار دوازدہ ءَ پوج ءَ کشتگ اَت، ءُ نو آئی ءِ چک ھم بیگواہ کتگ-

ھمے وڑ کیچ ءِ دمگ چہ دشت ءَ گوستگیں روچ ءَ پاکستانی پوج نیمگ ءَ چہ آوار جنگ بیتگیں ڈاکٹر لیاقت پوج ءَ یل کتگ-

زانگ بہ بیت کہ بلوچستان ءَ زورانسری آوار جنی ءِ وئیل نومبر ماہ ءَ ھم گیشی گندگ اتکگ – جتاجتائیں دمگاں چہ تنی وھدے سی سے مردم ءِ زورانسری آوار جنی ءِ رپورٹ نکش کنگ بیتگ-

بلوچستان ءَ زورانسری آوار جنی ءِ ھالاں یکجاہ کنوکیں گل بلوچ یکجھتی کمیٹی ءُ وائس فار بلوچ مسنگ پرسنز ءِ رِد ءَ اشی ءَ ساری گوستگیں ماہ اکتوبر ءَ یکسد بیست ھپت مردم زورانسری آوار جنی وئیل نکش کنگ بیتگ اَنت، آیانی تہ ءَ لھتے آجو بیتگ بلے بازی ئِے انگت بیگواہ اِنت-

بلوچ یکجھتی کمیٹی ءَ وتی درشان ءَ گْوشتگ کہ انسانی ھکانی میانی استمانی ادارہ اے مزنیں جرم ءِ ھلاپ ءَ زوت گامگیج بزور اَنت- گل گوشگ اِنت کہ بلوچستان ءَ انسانی ھکانی ھلاپ ورزی بیگ ءَ اِنت، ءُ بلوچ راج ریاستی زوراکی ءُ چکچینی ءِ دیمپان اِنت- گل ءَ دیمتر ءَ گوشتگ کہ بلوچستان ءَ چُشیں کھول یا لوگ نیست اِنت اے ریاستی زوراکی ءَ اسرمند نہ اِنت-

کھول ءَ تربت تاں شال شھدگ سر ءَ اڑان ودی کتگ دگ بند کتگ-

بلوچستان ءِ دمگ چہ کیچ ءَ دزکپتگیں ھالانی رِد ءَ کیچ، تربت ءِ دمگ ھوشاپ ءَ زورانسری آوار جنی ءِ نشانگ کنگ بیتگیں باھوٹ ء رھیم ءُ طاھر ء کھور یل نہ کنگ ءِ ھلاپ ءَ کھول نندانک برجاہ-

نندانک ءِ میان ءَ بیگواھیں مردمانی کھول ءُ دمگ مردماں تربت ءِ نزیک شال تربت شھدگ سر ءَ نندانک داتگ ءُ شھدگ گاڑیانی واستا سرجمی ءَ بند کتگ-

گاڑیانی روگ آیگ ءِ بندی سبب ءَ دوئیں نیمگاں گاڑیانی دراجیں لین لگ اِتگ ءُ بازیں گاڑی پس اِتگ اَنت-

تربت زھرشانی کنوکانی رِد ءَ یازدہ ءُ دوازدہ نومبر ھوشاپ ءَ پاکستانی لشکر ءَ بیڑبرتگ درزنے مردم آوار جتگ ءُ ناشناسیں جاھے ءَ برتگ اَنت، آیانی تہ ءَ باھوٹ ءُ طاھر ھم ھوار اَنت کہ پد ءَ دیم ءَ آرگ نہ بوتگ اَنت-

زھرشانی کنوکانی لوٹ اِنت کہ اگاں ورنایانی سر ءَ بھتام ھست گُڑا آیاں زوت آمیدگس ءَ پیش بہ کن اِت، اگاں ناں آ تربت ءَ چہ شال، کراچی ءُ سی پیک رؤکیں سرجمیں راھاں بند کن ایں-

آیاں گوشتگ کہ انتزامیہ ءَ چہ دزبندی کن ایں کہ آ بیگواھیں ورنایانی یل کنائیگ ءَ وتی کرد ءَ پیلو بہ کنت، اگاں ناں زھرشانی ءَ گیش تُرند بیت ءُ آئی ءِ سرجمیں زمہ واری انتزامیہ سر ءَ بیت-

زانگ بہ بیت کہ گوستگیں ھپتگ ءَ بلوچستان ءِ دمگ کیچ ءِ ھند ھوشاپ ءَ پاکستانی لشکر ءِ بُنجل سر ءَ بیتگیں اُرش ءَ پد چہ کیچ ءَ یازدہ مردم زورانسری آوار جتگ اَنت، آیانی تہ ءَ یک ڈاکٹر لیاقت جست پرس ءَ پد مروچی یل کنگ بیتگ-

دمگی وسیلگ رِد ءَ، پوج مردماں بُنجل ءَ لوٹائین اِیت ءُ زورانسری آوار جنی ءَ پد آیاں بُنجل ءَ بارت اُرشانی درگت ءَ جست پرس کنگ ءَ اِنت، آیانی تہ ءَ تنی وھدے دہ مردم بیگواہ ءَ اِنت-