TBP Balochi

روکپتی بلوچستان ءِ دو جتا جتائیں جاھاں ایرانی لشکر ءَ دو آوار جتگ ءُ برتگ اَنت-

گیشیں اھوالانی رد ءَ سراوان ءِ دمگ جالق ءَ ایرابی لشکر ءَ یک تیل کشیں مردمے دزگیر کتگ ءُ پد ءَ بیگواہ کرتگ-

اھوالانی رد ءَ دزگیر کنگ بیتگیں مردم ءِ پجار اھمد مزارزئی پنام ءِ امام ء سیدی برای ءِ نام ءَ زانگ بیتگ-

اھوالانی رد ءَ اھمد یک تیل کشیں مردمے کہ آ مسیت کنڈگ جالق ءَ آوار جنگ ءُ برگ بیتگ کہ چریشی ءَ پد آئی ءِ بارو ءَ ھچ اھوال نیست اِنت-

ھمے وڑ ءَ چہ دلگان ءَ لس پوشاکی کارمنداں یک مردمے آوار کتگ –

آوار جنگ بیتگیں مردم ءِ پجار مھمد بامری ء حسین ءِ نام ءَ زانگ بیتگ کپ آ امام حسین میتگ ءَ آوار جنگ ءُ بیگواہ کنگ بیتگ-

واکداراں اے درگت ءَ اے مردمانی بیگواھی ءِ ھال نہ داتگ اَنت-

روکپتی بلوچستان ءِ دمگ راسک ءَ بیگواھیں دو ورناہ یل بیتگ ءُ وتی لوگاں سر بیتگ اَنت-

یل بیتگیں ورنایانی پجار امیر حسین درفشہ ء باران ءُ عدنان نوتکزئی ء اسلم جھمنند پیروز آباد راسک ءِ ناماں زانگ بیتگ اَنت-

ھردوک چِل ءُ شش روچ ءَ پیش ایرانی لشکر ءَ اَچ راسک ءَ آوار جتگ ءُ برتگ کہ گوستگیں روچ ءَ یل بیتگ اَنت-

شال ءِ سول نادُراھجاہ ءَ ساڑی ئیں شاہ زیب ساتکزئی ءِ لاش مھلوک ءِ تُرندیں زھرشانی ءَ پد آئی کھول ءِ دست ءَ داتگ-

نادُراھجاہ واکدار ءَ بندات ءَ سی ٹی ڈی ءِ زور ءَ لاش نداتگ اَت، بلے شھریانی مزنیں کچے ءَ نادُراھجاہ ءَ ڈن مچ بیگ ءُ تُرندیں زھرشانی ءَ پد واکدار ءَ لاش کھول ءِ دست ءَ داتگ-

زانگ بہ بیت کہ شال ءِ جھمنند شاہ زیب ساتکزئی گوستگیں روچاں کلات ءَ پاکستانی پوج ءِ بُنجل سر ءَ اُرش ءِ میان ءَ میڑ ء بیران بیتگ اَت، چریشی ءَ پد واکدار ءَ آئی ءِ لاش دستگیں کتگ –

بی ایل اے ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ شاہ زیب ساتکزئی پنّام ءِ گُرک بی ایل اے ءِ ھاسیں ٹولی فتح اسکواڈ ءِ باسکے بیتگ-

شاہ زیب ءِ گھار ءَ گوستگیں روچ ءَ رسانکدر ءَ شنگ کتگیں تامُربندیں کلوھے ءَ واکدار نیمگ ءَ چہ لاش ءِ ندیگ ءُ درانسانی رویشگ سر ءَ تران کتگ-

آئی ءَ گوشتگ کہ وھدے آ وتی برات ءِ لاش دزگرگ ھاتر ءَ سول نادُراھجاہ ءَ سر بیتگ نادُراھجاہ انتزامیہ ءَ آ سی ٹی ڈی واکدار کر ءَ روگ ءَ گْوشتگ ،اود ءَ آ دمگی آمیدگس روگ شور داتگ، بلے اشی ءَ اَبید واکدار ءَ لاش نداتگ-

شاہ زیب بلوچ ءِ گھار ءَ اے میان ءَ شھریاں چہ برات لاش دزگرگ ءَ کمک لوٹ کتگ-

شاہ زیب بلوچ ءِ گْھار ءِ دزبندی ءَ چہ مروچی سھب ءَ شال نادُراھجاہ ءَ چہ ڈن مزنیں کچے ءَ شھری کہ آیانی تہ ءَ زالبول ءُ ورنا ھم ھوار بیتگ اَنت، زھرشانی واستا مچ بیتگ اَنت، نندانک ءُ تُرندیں زھرشانی ءَ پد واکدار ءَ آخرکار لاش کھول ءَ داتگ-

میت دزگرگ ءَ پد کھول ءُ شھریاں میت شال ءِ ڈغاری دمگ ءَ برتگ، کہ اود ءَ باند سھب شاہ زیب نماز جنازہ وانینگ بیت-

بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں ھژدہ نومبر شپ ءَ کوھلو ءِ دمگ کشک کوہ ءَ جتگیں یوپون موباھل ٹاور مانداشتگ سولر پینل ءُ جنریٹر ءَ ھوار مشینری تباہ کتگ اَنت-

جارکش ءَ گوشتگ کہ پاکستان وتی ھال اھوال نزام ءَ چہ بلوچ سرمچاراں تاں سربیگ ءُ آیانی موباھل ءَ ٹریس کنگ جھد کنگ ءَ اَنت بلے گل ءِ سرمچار ءُ انٹلیجنس ونگ ھر وھد ءَ اے شوربندیاں بے سوبی ءِ دیمپان کنگ ءَ اِنت کہ آیانی مول سرمچاراں تاوان دیگ اِنت-

آئی ءَ گوشتگ کہ مروچگیں وھد نوکیں ٹیکنالوجی ئیگ اِنت، ءُ بی ایل ایف ءِ ٹیکنیکل ٹولی نوکیں ٹیکنالوجی ءَ کارمرزی ءِ پائدگ ءُ تاوانانی درگت ءَ شر سرپدی ھست-

جارکش ءَ گوشتگ کہ بلوچستان لبریشن فرنٹ اے اُرش زمہ واری ءَ منّ اِیت بلوچستان ءِ وتواجھی ءَ تاں پاکستانی پوج ءُ پوجی شوربندیانی سر ءَ اُرش برجاہ بنت-

زورانسری بیگواہ دلجان بلوچ ءِ یل کنائینگ ھاتر ءَ آئی ءِ کھول نیمگ ءَ چہ زھرشانی ءَ گیش تُرندی آرتگ-

ڈی سی کارگس آواران دیم ءَ گوستگیں سے روچ ءَ چہ برجاھیں نندانک ءَ ریاستی زور ءَ اَبید برجاہ ءَ اِنت، وھدے کہ زھرشانی کنوکاں آواران ءَ تاں کراچی بُنجاھی شھدگ ءَ تاں پیراندر کراس ءَ ھوار سے جتاجتائیں ھندانی سر ءَ بند کتگ-

زھرشانی کنوکانی رِد ءَ ڈی سی کارگس دیم ءَ نندانک دیوکیں ریاستی پوج ءِ انگر ءَ اِنت ءُ آ ترسینگ ءُ بیھار داتگ اَنت کہ زھرشانی ءَ ھلاس کنت لاچار کنگ ءَ اَنت-

زھرشانی ءَ ھواریں کھولاں شکایت کتگ آیاں آسراتی دیگ ءَ چہ انکار کتگ، آ بید تمبو ءَ آسمان چیر ءَ نشتگ اَنت ءُ وتی لوٹانی سر ءَ اوشتاتگ اَنت-

دلجان بلوچ کھول ءَ راج ءُ ٹرانسپورٹ واھننداں چہ دزبندی کتگ کہ آ آیانی گوم ءَ یکجاھی درشان بکن اَنت –

آیانی گوشگ اِنت کہ ” آواران ” ءَ چہ کراچی ءَ رؤکیں دگ سے روچ ءَ چہ جتاجتائیں ھندانی سر ءَ بند اِنت ءُ ما دمگی انتزامیہ ءُ پوج ءِ بیھاراں اَبید پشت ءَ نہ کنز ایں-

بلوچ یکجھتی کمیٹی ءَ اے جاورھالانی سر ءَ درشان شنگ کنان ءَ گوشتگ کہ دلجان بلوچ ءِ کھول تُرسینگ ءُ زھرشانی مچی سزا دیگ کابل ایر جنی اِنت- آواران ءِ مھلوک ءَ جُھد ءَ چہ زُلم ءِ مکابلہ کنگی اِنت-

زھرشانی کنوکانی گْوشگ اِنت کہ آ دلجان بلوچ ءِ یل کنائینگ اَبید وتی زھرشانی ھلاس نہ کن ایں ءُ ھچ وڑیں بیھار ءُ تسلیاں نہ منّ ایں- آیانی گوشگ اِنت کہ آیانی بُنکی ھک اِنت ءُ آ اشی ءِ پچگر ھاتر ءَ اوشتگ ایں-

تربت ءِ دمگ ملک آباد ءَ چار شمبے ءِ شپ ءَ جامعہ اشاعت التوحید ءِ مدرسہ ءِ نزیک ءَ بمب تراکے بوتگ کہ ایشی ءِ آسر ءَ مدرسہ ءِ سئے نودربر ٹپیگ بوتگ اَنت۔

تراک ءَ چہ پد دمگ ءَ تیرگواری ءِ توار ھم بوتگ۔ ٹپیگ نزیکیں نادراھجاہ ءَ سر کنگ بوتگ اَنت۔

اے وئیل ءَ پد دمگ ءَ ترس ءُ بیم ءِ شنگ ءُ تالان بیتگ ءُ لشکر وئیل جاہ ءَ ست بیتگ پٹ ءُ پول بنداتے کتگ۔

تراک ءِ سبب ءُ زمہ وارانی بابت ءَ انگت ءَ ھچ وڑیں ھال ءُ اھوال نیست۔

بلوچستان ءِ دمگ نوشکی ءَ مروچی دومی روچ ءَ ھم لشکر کشی ھم برجاہ-

گیشیں ھالانی رِد ءَ نوشکی ءَ دومی روچ ءَ ھم لشکر کشی برجاہ ءَ اِنت ھمے میان ءَ منجرو، گوربرات ءَ ھوار چہ لجے ءَ ھمگرنچیں دمگاں ساڑی ئیں پوجی کارمنداں لوگ مانداشتگ اَنت ءُ مارٹر ھم آس داتگ-

زانگ بہ بیت کہ گوستگیں روچ ءَ بندات بیتگیں لشکر کشی ءَ پیادگ پوجی کارمنداں ھوار تیرگواریں ھیلی کاپٹر ھم بھر زیرگ ءَ اَنت- گوستگیں روچ ءَ بازیں ھندانی سر ءَ ھیلی کاپٹراں چہ کمانڈوز ھم ایر گپتگ-

بلے لشکر کشی ءَ انگت ھچ وڑیں جانی ءُ دزگیری ھال سر نہ بیتگ-

شاہ زیب بلوچ بلوچ ءِ میت ءِ دیگ ءِ لوٹ، کھول ءُ دمگی مردماں شال ءَ زھرشانی برجاہ داشتگ-

شاہ زیب بلوچ میت ءِ نہ دیگ ءِ ھلاپ ءَ کھول ءُ دمگی مردم شال ءَ سول نادُراھجاہ ءَ مردگجاہ ءِ دیم ءَ زھرشانی ءَ نشتگ اَنت-

کھول ءِ گوشگ اِنت کہ آ چنت روچ اِنت کہ وتی دوستانک ءِ میت ءِ وداریگ اَنت، بلے پاکستانی واکدار تنی وھدے میت دیگ ءَ ساڑی نہ اَنت-

زھرشانی کنوکاں واکدار ءِ رویشگ درانسانی کنان ءَ گوشتگ کہ وتی دوستانک ءِ میت کل ءُ کسارت کنگ آیانی بُنکی ھک اِنت- آیاں لوٹ کتگ کہ میت زوت آیانی دست ءَ دیگ بہ بیت-

زانگ بہ بیت کہ بلوچستان ءَ گیشتر وھداں آجوئی لوٹوکانی میتاں دزگرگ ءِ درگت ءَ جیڑہ دیم ءَ کاینت- چریشی ءِ سر ءَ انسانی ھکانی باسک دلپدردی درشان کن اَنت-

جنگ ءِ ￵شِکم ءَ ￴چہ ودی بوتگیں جَنگول(سرمچار) سپر ھان

نبشتہ کار: ثنا سانی

رجانکار: یسما بلوچ

دی بلوچستان پوسٹ

شھید سپر ھان بلوچ ءِ کِسّہ ءَ ھمے سرڈگار ءِ سینَگ ءَ رُستگ اَت کہ آئی ءِ رَگانی تہ ءَ آجوئی ءِ ھُبّ ءُ واھگ ءُ آجوئی ءِ مئوج مدام مان اَت۔ بلوچستان ءِ ھما سرڈگار کہ آئی ءِ راجدپتر ءَ ھر سنگ ءُ ￶ھر کوہ ءِ ￵دلبند ءِ تہ ءَ یاگیانی ءُ دیمھونیانی کِسّہ اَندر ءَ مان اَنت، ھمے سرزمین ھم سپر ھان ءِ وڑیں ورناھانی دِلیری ءُ بَھادُری ءِ گواہ اِنت۔ سپر ھان ءِ جُھد وتی بلوچ سرڈگار ءِ نام ءَ آئی ءِ واب ءُ واھشتانی کِسّہ انت۔ آئی ءَ وتی زند گوں یک مول ءُ مرادے ءَ بندوک کتگ اَت ءُ داں گڈی ساہ ءَ ھمے مکسد ءِ راہ ءَ روگ ءِ کول اِش کُرتگ اَت۔

سپر ھان ءِ وڑیں ورنا مرچی ھر ھما دل ءِ ￵تہ ءَ زندگ اَنت کہ آ وتی ھَاک ءَ گوں بے کِساس مھر کن اَنت، آجوئی ءِ ￵ھاتر ءَ وتی ساہ ءَ ￴چہ سر گوز اِنت ءُ وت ءَ کُربان کنگ ءِ ھمت ئِے داشتگ اَت۔ آ یک انجینئرے اَت، وانندھے ￵اَت، بلے آئی ءَ جنگولیں دلے گون اَت ئِے۔ آئی ءِ گور ءَ زانت ءُ زانشت ءِ چراگ ھست اَت بلے آئی ءِ دل آجوئی ءِ آس ءِ تہ ءَ سُچگ ءَ اَت۔ آئی ءِ کارانی سوب ءَ وتی ھمکارانی تہ ءَ یک سنگینیں مردمے ءِ بستار ءَ زانگ بوتگ اَت بلے سرڈگار ءِ آجوئی ءِ شوھازگ ءَ آئی ءِ چماں رُژنائی ءِ توار ءَ جزمے آرگ ءَ اَت۔

سپر ھان ءَ گوں وتی جَزم ءُ بَھادُری ءَ ناں ایوک ءَ جنگ ءِ میان ءَ دژمن ءَ را ٹاہ داتگ بلکیں گل ءِ زندگ بوگ ءِ ءُ مُھکمی ءِ ھاتر ءَ ھرچ مھکمیں گامگیجے چست کُرتگ اَت۔ آئی ءِ ھیال نوکیں لیکھانی سر ءَ اَت، آئی ءَ مُدام گوں پھریزی ءَ نوکیں شور بندی ٹھینتگ اَت ءُ آئی ءِ راھبندانی تہ ءَ پھتوی ھَستگ اَت۔ آئی ءَ نہ ایوک ءَ نوکیں لیکھانی سر ءَ گل ءِ جوڑ کنگ ءِ تہ ءَ وتی کرد پیلو کتگ اَت بلکیں آئی ءَ ھمّت کتگ اَت کہ آ وتی جُھد ءِ توار ءَ ھر محاذ ءَ دُگنیا ءَ سر بہ کنت۔ آئی ءَ زانتگ اَت کہ جنگ نوں ایوک ءَ تیرگواری ءَ گوں بندوک نہ اِنت بلکیں مرچیگیں دور ءَ رسانکدر ءُ کُلوھ ءِ سر کنگ ھم ھاسیں محاذ اَنت۔ ھمے واست ءَ آئی ءَ ھر موہ ءَ نوکیں ٹیکنالوجی ءُ سلاہ بندی ءِ وانگ ءُ وانینگ ءَ اولیت داتگ۔ آئی ءَ گُشتگ“ اے کوھنیں کسہ اَنت، مارا نوکیں محاذ زورگ لوٹ اَنت ءُ نوکیں راہ زورگ لوٹ اَنت“۔

سپر ھان ءِ زند ءِ ھر ساھت پہ ورناھاں یک کُلوھے، یک درونتے ءُ جُنزے۔ آئی ءَ وتار ءَ ھچبر یک فردے ءِ بستار ءَ نہ چار اِتگ اَت بلکیں وت ءَ وتی راجی جُنز ءِ بھرے لیک اِتگ اَت۔ آئی ءِ نزیک ءَ ￴آئی ءِ ￵ زند آئی ءَ را ھچ ارزشتے نہ بوتگ، اگاں ھاسیت ھَست اَت بس ھما جُنز اَت، ھما مکسد کہ آئی ءَ وتی ورنائی ءِ ھر ساھت ءَ پہ آئی ءَ ندر کتگ اَت۔ آئی ءَ وتی جُھد یک جنگولے ءِ بستار ءَ ناں بلکیں دانشوریں رھشونے ءِ بستار ءَ دیم ءَ بُرت ءُ وتی ھیال ءُ رھبنداں گوں وتی سنگتاں یک نوکیں راہ ءِ سر ءَ آرتگ اَت ئِے۔

چار نومبر دو ھزار ￶بیست ءُ ￶چار ءَ بلوچستان ءِ لس مھلوک، ورنا گوں وتی زاتی زند ءَ دزگٹّ اِت اَنت ، وھدیکہ نوشکی ءِ جنگی سنگر ءَ شھید سپر ھان بلوچ وتی نُگرھیں ساہ ءِ سود ءَ جتگ اَت دژمن ءَ ￴را یک کلوھے دیگ ءَ اَت کہ بلوچ ءِ سرڈگار کدی گلام، گار ءُ بیگواہ نہ بیت ءُ ناں کہ اِد ءِ نندوکیں مردمانی اَرواھاں ￴کسے گوں سانکلاں بَست کُرت کنت۔ نوشکی ءِ زمین سر ءَ ￴ھما روچ ءَ یک انچیں جنگے بوت کہ آؤکیں پدریچ ءِ واست ءَ ￴یک درورے جوڑ بوت۔ سپر ھان ءِ تیر سُپتگیں بالاد ءَ ھون رچگ ءَ اَت، آئی ءِ ساہ لرزگ ءَ اَت، بلے آئی ءِ جزم ءُ دلیری ءِ تہ ءَ ھچ کمی پیداک نہ اَت۔ آ داں گُڈّی ساھت ءَ دُژمن ءِ دیم ءَ چو مُھکمیں دیوالے ءَ اوشتاتگ اَت، داں آئی ءِ سنگت سلامت بہ بنت ءُ دُژمن ءَ را دیم ءِ آیگ ءَ ￴چہ داشت بہ کنت۔

ٹپی ءُ ناتوان بوگ ءَ ابید ھم سپر ھان ءَ ￴سر جھلی نہ منّ اِت۔ انگت آئی ءِ چمانی تہ ءَ جزم ءِ رژنائی ھَست اَت، آئی ءِ دل یاگی ءِ ￵آس ءَ ￴چہ انگت سُچگ ءَ اَت۔ آ زمین ءِ ￵سر ءَ کپت، بلے آئی ءِ سلاہ چہ دست ءَ نہ کپت۔ آئی ءَ دژمن ءَ داں گُڈّی ساھ ءَ باور کنائینت کہ بلوچ مر اِیت بلے آئی ءِ دیم ءَ وتی سر ءَ جھل نہ کنت۔ شھید  سپر ھان ءِ شھیدی بلوچستان ءِ ورنایانی تہ ءَ یک نوکیں اَرواھے ءِ مان ءَ کنت، وھَدے کہ ورنا سپر ھان ءِ کِرد ءَ زان اَنت، آئی ءِ کِرد ءَ چہ یک نوکیں جُنزے ودی بیت۔ آئی ءِ زند ءُ جُھد آیاں اے درس ءَ دنت کہ آزات ءُ وتواجہ بوگ آیانی بھت اِنت ءُ ایشی ءِ ھاتر ءَ جنگ کنگ آیانی سر ءَ پرز انت۔ آئی ءِ (شخصیت) نوں ایوک ءَ نامے نہ اِنت بلکیں یک جنبشے، یک پگرے ءُ یک درورے ءِ دروشم ءَ اِنت۔

آئی ءِ نمیرانی ورنائی گیر کار اِیت کہ گُلامی ءُ زُوراکی ءِ بگیر ءَ توار چست کنگ ایوک ءَ ھَک نَہ اِنت بلکیں اے یک پَرزے ھم۔ بلوچ ورنا سپر ھان ءَ وتی جُنز ءِ راھشونے ءِ بستار ءَ بہ گند اَنت ءُ آئی ءِ راہ ءِ ￵روگ ءِ کول ءُ کرار ءَ ھم بہ کن اَنت۔

سپرھان ءِ زند ءِ جتا جتائیں پھنات پہ بلوچ ورناھاں یک راہھے ءِ چارگ انت۔ آئی ءِ کسہ اے وانین ایت کہ آجوئی ءِ واب ءِ سرجم کنگ ءَ نہ ایوک ءَ گندگ لوٹ اِیت بلکیں وتی زند ءَ ھمے واب ءِ ھاتر ءَ ندر کنگ ھم لوٹ اِیت۔ آئی ءِ واب، آئی ءِ ھیال ءُ آئی ءِ کُربانی پہ ھماھاں یک سَبَکے کہ ھرچ مکسد ءُ ￶مول ءُ مراد ءِ سرجم کنگ ءِ ھاتر ءَ جزم ءُ آجوئی ءِ لوٹ اِنت۔ آئی ءَ وتی زند ءَ را مشن ءِ تہ ءَ بدل کت ءُ وتی راج ءَ را اے کلوہ دات کہ اگاں آیانی دل ءَ آجوئی ءِ واھگ ھَست اِنت گڑا آ پہ ایشی ءَ ھر ممکنیں کُربانی دیگ ءَ ساڑی بہ بنت۔

بلوچستان ءِ راجدپتر ءَ شھید سپرھان ءِ کِسّہ یک مسالے ءِ دروشم ءَ مدام یات کنگ بیت۔ اے کسہ ایوک ءَ یک (فردے) ءِ کسہ نہ اِنت بلکیں یک انچیں راجے ءِ اکس اِنت کہ پہ وتی سرڈگار، وتی ننگ ءُ وتی ھکانی واست ءَ ￴وتی سر ءِ نَدر کنگ ءَ ھم ھچ چَک ءُ پَد نہ بنت۔ سپرھان ءِ نام ھما کُربانی ءِ نشان اِنت کہ بلوچ راج ءَ وتی ھکانی ھاتر ءَ داتگ۔ آئی ءِ نمیرانی چو یک درپشناکیں چراگے ءَ اِنت کہ پہ بلوچ ورناھاں مدام یک رھشونے ءِ کرد ءَ پیلو کَنت۔

مروچی بلوچ ورنا کہ وتی پت ءُ پیرُکانی کُربانیاں یات کن اَنت گڑا آ سپرھان ءِ کسہ ءَ وتی راہ ءَ شوھاز کَن اَنت۔ اے کِسّہ ایشانی دل ءَ گوں جزم ءُ دلیری ءَ پُر کَنت، ایشاں باور کَنت کہ آ یک مزنیں راجے ءِ بَھر اَنت کہ آئی ءَ مدام زلم ءُ زوراکی ءِ بگیر ءَ وتی توار چست کتگ۔ سپرھان ءِ کِسّہ دیمتر ءَ آیاں دلجم کَنت کہ آ تھنا نَہ اَنت، آیانی پادانی چیر ءَ آیانی پت ءُ پیرُکانی کُربانیانی مھکمیں زمین اِنت ءُ آیانی سراں بلوچ ماتانی نیک دوائیانی ساھگ گون اِنت۔

سپرھان ءِ جُھد ءِ کسہ ھما مردُمانی واست ءَ ھم یک کلوھے کہ آیاں وتی زمین ءِ ھاتر ءَ دیمھونی دیگ ءِ ھمّت ھَست اِنت۔ سپرھان ءِ زند، آئی ءِ جزم ءُ آئی ءِ نمیرانی ھما مردُمانی واست ءَ ￴یک راھے ءِ چراگ اِنت کہ آ وتی ھَک ءِ ءُ وتی آجوئی ءِ ھاتر ءَ جُھد کنگ اَنت۔ آئی ءِ دیمھونی ءَ اے گپ راست کُت کہ یک بنی آدمے مُرت کُت کنت بلے آئی ءِ ھیال، آئی ءِ واب ءُ آئی ءِ جُھد ءُ کوشست ابدمان زندگ بنت۔ سپرھان مدام بلوچ راج ءِ دلانی تہ ءَ زندگ بیت، آئی ءِ دیمھونی مُدام آیانی واست ءَ یک پاکیں پَرزے ھِساب ءَ ￴زانگ بیت، ءُ آئی ءِ کِسّہ بلوچ راجدپتر ءِ ھما تاکانی تہ ءَ مان بیت کہ ھچبر بے ھیال کنگ نہ بیت۔

شھید سپرھان بلوچ ءِ یات انگت ھما کوھانی توار ءِ ￵تہ ءَ گوشدارگ بیت، ھما زمین ءِ وشبو ءِ تہ ءَ مارگ بیت، ءُ بلوچ ورناھانی چماں رُژنائی جوڑ بیت۔ آ یک وابے اَت کہ گواچن جوڑ بوت، آ یک وھدے اَت کہ اَبدمان بوت، ءُ آ یک چراگے اَت کہ آئی ءِ رُژنائی ھچبر کَم نَہ بیت۔ آئی ءِ اے کُربانی ءَ بلوچ راج ءِ دیم ءَ نوکیں راہ ، نوکیں اُمیت ءُ نوکیں جزم ءِ شون ءَ دنت۔ شھید سپرھان بلوچ ءِ کِسّہ بلوچستان ءِ ورناھاں مُدام باور کنائین اِیت کہ آیانی تہ ءَ ھم ھمے جزم ءُ دلیری ھَست اِنت کہ آیانی پت ءُ ￶پیرُکاں چہ یک مزلومیں راجے ءَ، ￴آجوئیں راجے ءَ بدل کتگ اَنت۔

اے گدار ھما کلوہ ءِ بھر اِنت کہ بلوچستان ءِ ورناھاں یات دنت کہ آجوئی ءِ راہ ءِ اَڑ ءُ ￶جنجال بئیت، گوں وتی جزم ءُ بَھادُری ءَ چہ پْروش دات کَن اِت۔ بلوچستان ءِ سرڈگار ءَ نندوکیں ھمُک ورنا ءَ وت ءَ سپرھان ءِ کِسّہ ءِ تہ ءَ ھوار بہ کنت۔ اے کِسّہ آیاں اے درس ءَ دنت کہ آ وتی واباں راست کُت کَن اَنت، آ وتی ھکانی ھاتر ءَ جنگ کُت کَن اَنت، ءُ آ وتی زمین ءِ واست ءَ ￴ھرچ وڑیں کُربانی دیگ ءَ چَک ءُ پَد نہ بنت۔

بلوچستان ءِ راجدپتر ءَ شھید سپرھان ءِ نام دائم یک درورے ءِ دروشم ءَ یات کنگ بیت۔ اے کَسّہ پہ ھمایاں یک کُلوھے ￵کہ آجوئی ءِ ھاتر ءَ اوشتاتگ اَنت، زلم ءُ زوراکی ءِ بگیر ءَ وتی توار ءَ چست کن اَنت ءُ پہ وتی ھکاں وتی جان ءِ کُربان کنگ ءَ ساڑی اَنت، شھید سپرھان بلوچ ءِ ھون، آئی ءِ جزم ءُ آئی ءِ مھر مدام بلوچ راج ءِ دلانی تہ ءَ زندگ بنت۔ آ یک وابے ءِ (تعبیر) اَت ، آ یک دورے ءِ نشانی اِنت ءُ آ یک انچیں چراگے اَت کہ بلوچستان ءِ راجدپتر ءَ مدام رُژناہ بیت۔

چین ءَ اوگان ھکومت چیریں ادارہ ءَ یک سپارتی کلوھے ءَ اے لوٹ کتگ کہ آ اوگانستان ءَ جھمنندیں بلوچ باھوٹیانی ھلاپ ءَ کاروائی بہ کنت-

بلوچ اِھوالکار کیّا بلوچ رِد ءَ یک سرپدیں مردمے ءَ چہ اے پدر بیتگ کہ بیجنگ ءَ انوگاں سپارتی دیوان ءِ میان ءَ کابل سر ءَ زور داتگ کہ آ اوگانستان ءَ جھمنندیں بلوچ باھوٹیاں در بکنت-

آئی ءَ گوشتگ کہ پاکستان رسانکدر ءِ بنداتی ھالانی تہ ءَ گوشگ بیتگ کہ چین ءِ اوگانستان ءَ ھاسیں نمائندگ ءَ گوں پاکستان واکدار ءَ چہ گند ءُ نند کتگ-

زانگ بہ بیت کہ بلوچستان ءَ پوجی زوراکیانی سبب ءَ مزنیں کچے ءَ بلوچ اے وھد ءَ تھی بلوچستان ءَ اَبید اوگانستان ءُ ایران ءَ باھوٹی زند گوازینگ ءَ اَنت-

زانگ بہ بیت کہ ایران ءُ اوگانستان ءَ اشی ءَ ساری بلوچ باھوٹی نشانگ کتگ ءُ کُشتگ اَنت ھم – بلوچ راجدوستاں بھتام جتگ کہ اے وڑیں وئیلانی پُشدر پاکستانی چیریں ادارھانی دست مان اِنت کہ مچی سزا دیگ ءَ بلوچ باھوٹیاں ایران ءُ اوگانستان ءَ ھم نشانگ کنگ اَنت-

اوگان ھکومت ءِ اے گند ءُ نند ءُ بلوچ باھوٹیاں در پہ در کنگ ھال ءِ منّگ یا نہ منّگ دیم ءَ نیتکگ-