TBP Balochi

بلوچستان ءِ دمگ پنجگور ءَ ناشناسیں مردماں پاکستانی پوج بمب اُرش ءِ نشانگ کنگ بیتگ

پوج پنجگور ءِ تھسیل پروم ھند سر ءَ نشانگ کنگ بیتگ-

دمگی اِھواالکار رِد ءَ پروم ءِ دمگ جائین ءَ پوج گاڑی ھما وھد نشانگ کتگ وھدے آ چہ اود ءَ گوزگ ءَ بیتگ-

اُرش نشانگ اتکگیں پوجی گاڑی تاوان دیمپان بیتگ وھدے کہ گاڑی ءَ سوار کارمند بیران ءُ ٹپی بیگ ھال اِنت-

اے درگت ءَ واکدار ءَ ھچ وڑیں درشان دیم ءَ نیتکگ- نانکہ اُرش زمہ واری گلاں منّ اِتگ-

بلوچستان ءَ پاکستانی پوج ءِ سر ءَ مروچی بیتگیں اے دومی اُرش اِنت اشی ءَ ساری ناشناسیں مردماں نوشکی ءَ پاکستانی پوج چوکی سر ءَ اُرش کتگ اَت-

بلوچستان ءِ تیاب دپی شھر چہ گوادر ءُ پسنی ءَ پاکستانی پوج ءَ دو مردم آوار جنگ ءَ پد بیگواہ کتگ اَنت-

بیگواہ کنگ بیتگیں مردمانی پجّار منور ء قرار ءُ ذکریا ء اللہ بخش نام ءَ چہ بیتگ اَنت-

بیگواہ کنگ بیتگیں مردمانی تہ ءَ منور دوشگیں شپ ءَ پاکستانی پوج ءَ پسنی ءِ دمگ چہ ببر شور ءَ بیڑبرتگ ءُ آوار جتگ ءُ بیگواہ کتگ-

ذکریا گوستگیں روچاں بیگاہ وھد ءَ گوادر ءِ دمگ چہ گٹی ڈھور ءَ آوار جتگ چریشی ءَ پد دوئینانی درگت ءَ ھچ وڑیں ھال دز نہ کپتگ کجا اَنت چی ھال تہ ءَ اَنت-

دومی نیمگ ءَ ھُزدار نال ءِ دمگ کوڑاسک پوجی بُنجل ءَ چہ ھمے سال دہ اکتوبر ءَ بیگواہ کنگ بیتگیں مسلم ء اختر نامیں چہ بسیمہ ءَ آجو بیتگ-

وھدے کہ سے جنوری دوھزار بیست چار ءَ چہ عیسیٰ نگری بروری دگ شال ءَ زورانسری بیگواہ کنگ بیتگیں امام جان ء صوالی جھمنند ھوشاپ، کہ بی ایم سی نادُراھجاہ ءَ نرسنگ میل آفیسرے، آجو بیتگ لوگ ءَ سر بیتگ-

بلوچستان ءِ دمگ تربت ءَ ناشناسیں مردماں تیرگواری کتگ یک مردمے کشتگ-

کشگ بیتگیں مردم ءِ پجّار گوھرام ء الھی بخش نام ءَ چہ بیتگ-

تیرگواری ءِ وئیل تربت ءِ دمگ نودز ھند سر ءَ بیتگ- بلے وئیل سوب انگت زانگ نہ بیتگ-

بیست ءُ ھشت نومبر ءِ شپ یَ نوشکی ءَ بی ایل اے ءَ پٹ ءُ پول ءِ وھد ءَ دزگیر بیتگیں بند ءُ ساچی کمپنی ءِ شش کارندہ یل کنگ بیتگ اَنت-

لیویز ءِ بنشون ءَ یل کنگ بیتگیں مردمانی ھال راست کنان ءَ گوشتگ شش مزدور نوشکی ءِ ھند زرین جنگل ءَ یل بیتگ اَنت-

زانگ بہ بیت بلوچ لبریشن آرمی ءِ سرمچاراں 28 نومبر ءَ نوشکی ءَ سَے جتا جتائیں بیڑاں بنجاھی شھدگ بستگ ءُ سنیپ چیکنگ ،لیویز پورس ءِ سلاہ ءُ بند ءُ ساچی کمپنی ءِ کارندہ دزگیر کتگ اَنت-

بی ایل اے ءِ جارکش ءَ رسانکدراں گوشتگ بی ایل اے ءِ سرمچاراں زرین جنگل ءِ ھند ءَ شھدگ ءِ سر ءَ زورگریں پاکستان ءِ لیویز لشکر ءِ یک دستیگ کتگ ءُ جاڑیگیں کارندہ دزگیر کتگ اَنت- سرمچاراں لیویز پورس ءِ سلاہ ءُ دگہ پوجی ساز ءُ سامان برتگ انت ءُ کارندہ بلوچ بوگ ءِ سر ءَ سلامتی ءَ یل کتگ اَنت-

آئی ءَ گوشتگ ات کہ ھمے وھد ءَ سرمچارانی جتا جتائیں ٹولیاں شھدگ داں یک ادارے ءَ گیش گاڑیانی سنیپ چیکنگ کتگ ءُ سرمچارانی سیمی ٹولی ءَ یک لُٹ ءُ پولی کمپنی ءِ پروجیکٹ ءَ کار کنوکیں پنچ کارندہ دزگیر کتگ ءُ کمپنی ءِ مشینری مانداشتگ اَنت-

میان اُستمان ءَ انسانی ھکانی روچ 10 دسمبر

نبشتہ کار: شاھد اھمد

دی بلوچستان پوسٹ

انسانی ھکّانی، میان اُستمان ءَ دہ دسمبر 2024 ءَ برجم دارگ بیت انچوشکہ گوستگیں ھر سال ءَ دہ دسمبر ءَ دارگ بوتگ۔ بندات ءَ ما کمو میان اُستمانی انسانی ھکانی بابت ءَ کمو وتی ھیالاں درشان کنیں کہ ھستیں دنیا ءَ زُلم ءُ زوراکی ءِ سبب ءَ انسانی وتی بُنی لوٹاں چہ ابید آیانی جان سلامتی ءِ ھترہ گیشاں چہ گیش ودی بوان اَنت۔ زند ءِ ھر بنکی لوٹانی پد ءَ آ چہ زلم ءُ زوراکیاں چہ زبھر کنگ بوگ ءَ اَنت۔
بیا اِت کمو چاریں کہ میان اُستمان ءَ پہ انسانی ھکانی بابت ءَ ءُ آئی ءِ راجدپتر ءَ کمے چمشانک دے اِیں۔

دسمبر 1948 ءَ میان اُستمان ءِ جنرل اسمبلی ءَ انسانی ھکّانی جھانی جارچین – UDHR ءِ منّگ نامگ دات ءُ جار جت کہ اے درستیں انسانانی ھک ءُ آجوئیانی مستریں بیان اِنت کہ ایشی ءِ تہ ءَ 30 نبشتانک ءِ سر ءَ بندوک اِنت ءُ ایشی ءِ تہ ءَ یک مزنیں رِد ءُ بندے ءِ بنیاتی انسانی لیکہ ءِ سر ءَ چمشانک دیگ بوتگ۔ ھک ءُ آزاتی کہ دراھیں مرد ءُ جنین، ھر جاگہ ​​ءَ دنیا، ھکدار اَنت، بے ھچ پرک ءُ درک ءَ۔ ھر سال 10 دسمبر ءَ سرجمیں دنیا ءَ انسانی ھکانی روچ ءِ رد ءَ برجم دارگ بیت۔ اے سال ءِ انسانی ھکانی روچ ءِ چمشانک ءِ سر ءَ درستیں مردمانی ھکانی سر ءَ اِنت- زالبول، ورنا، اقلیت، بدلی ءِ توانائی ءِ واھندیں مردم، بومی مردم، گریب ءِ سر ءَ نشتگیں مردم وتی توار ءَ را راج ءِ دیم ءَ شنگ کنگ ءُ سیاسی پیسلہ سازی ءِ تہ ءَ ھوار کنگ ءِ سر ءَ اِنت۔ زندگی راجمانی تہ ءَ بھر زورگ ءِ ھک ءِ پیلو کنگ راجمستری چاگرد ءِ کارکردگی ءُ انسانی ھکانی رکّینگ ءِ جْوانیں رھبند ءِ ھاتر ءَ بنیاتی ءُ ھژدری اِنت۔ پیسلہ سازی ءِ اَمل ءَ ھوار کنگ دوئیں چیزانی رسگ ءِ ھاتر ءَ یک المی ئیں پیش شرتے ۔

میان اُستمان ءِ ھَکّانی گل ءِ کسانیں راجدپترے

انسانی ھکانی روچ ھما روچ اِنت کہ 1948 ءَ میان اُستمان ءِ جنرل اسمبلی ءَ انسانی ھکانی جھانی جارچین منّگ نامگ کتگ۔ انسانی ھکانی روچ ءِ رسمی بندات چہ 1950 ءَ بوتگ، چہ اسمبلی ءَ 423(V) ءِ کانود ءِ منّگ نامگ ءَ پد کہ ایشی ءِ تہ ءَ درستیں ریاست ءُ دلگوش داروکیں گلاں لوٹُکّی دیگ بوتگ کہ آ ھر سال ءِ 10 دسمبر ءَ انسانی ھکانی روچ ءِ رد ءَ بہ زور اَنت۔ اے روچ ءِ نامداری چہ اے گپ ءَ پدر کنگ بیت کہ 1952 ءَ UN میان اُستمان ءِ پوسٹل پَھریزگار ءِ نیمگ ءَ چہ شنگ بوتگیں انسانی ھکّانی روچ ءِ یادگاری ٹکٹ ءَ چہ 200 ھزار ءِ نزیک ءَ پیشگی آرڈر رستگ۔

وھدے کہ جنرل اسمبلی ءَ اے جارچین ءِ منّگ نامگ دات کہ 48 اِستان آئی ءِ ھک ءَ اِت اَنت ءُ 8 استاناں اے جارچین ءِ منوگری کت گڑا اے جارچین ءِ جار جنگ بوت کہ اے جارچین ءِ سر ءَ “تمامیں راج ءُ درستیں راجانی ھاتر ءَ سوبمندی ءِ یک مُچّانکی کدرے” ءِ جار جنگ بوت کہ ایشی ءِ نیمگ ءَ مردم ءُ چاگرد “دیمروی ءِ گامگیجاں چہ جھد بہ کن اَنت، راجی ءُ میان استمانی ، پہ وتی جھانی ءُ جْوانیں پجّار ءُ رھبند ءِ رکّینگ ءَ”۔ اے گامگیج ءِ وکالت ءُ نقاد دوئیں یک پیم ءَ “کانونی ساز ءَ چہ گیش جارچین ، پابند کنگ ءَ چہ گیشتر شور ءُ سلاہ کنوک” ءِ رد ءَ رس اتگ اَت۔

اگرچہ اے جارچین گوں وتی سیاسی، مال ءُ مڈی، چاگردی ءُ دودمانی ھکّانی مزنیں رِد ءُ بند ءَ یک پابندیں سندے نہ اِنت بلے ایشی ءَ چہ 60 ءَ گیش انسانی ھکانی وسیلہ ءِ الھام داتگ کہ آ یکجاہ انسانی ھکانی یک میان استمانی کدرے جوڑ کن اَنت۔ مرچی میان اُستمان ءِ درستیں باسکیں ملکانی لھتے رزامندی ءِ بنیادی انسانی ھکانی سر ءَ کہ اے جارچین ءِ تہ ءَ داتگ اَنت ، ایشی ءَ گیشتر مھکم کنت ءُ مئے روچ مرزی زند ءِ تہ ءَ انسانی ھکّانی سیادی داری ءِ سر ءَ زور دنت.

انسانی ھکانی ھائی کمشنر ، میان اُستمان ءِ ھکانی مستریں کارندہ ءِ بستار ءَ ءُ آئی ءِ کارگس انسانی ھکانی روچ ءِ سالانہ برجم دارگ ءِ جھد ءِ ھمگرنچ کنگ ءَ مزنیں کردے پیلو کنت:

”مرچی دنیا ءِ تہ ءَ انسانی ھکانی گران تریں چیلنج ءِ بستار ءَ زوراور اِنت۔ نااُمیتی ءُ کَشّگ ءِ ھلاپ ءَ جنگ ھیرات ءِ کارے نہ اِنت ءُ اے گپ ءِ سر ءَ ھچ ھساب نیست کہ یک ملکے چنچو زردار اِنت۔ چہ پکر ءَ را انسانی ھکانی زمہ واری ءِ رد ءَ دیم ءَ آرگ ءَ دنیا ءَ مئے زند ءِ تہ ءَ اے آپت ءِ ھلاس کنگ ءِ شرتریں موہ رس ایت. جنجال ءِ ھلاس کنگ یک ھدپے کہ رسگ ءَ اِنت“۔

انسانی ھکانی جھانی جارچین ءِ شستمی سالروچ 10 دسمبر 2008 ءَ بوتگ ءُ میان اُستمان ءِ سیکرٹری جنرل ءَ یک سالے ءِ کمپین ءِ بندات کتگ کہ اے سالروچ ءِ دیم ءَ اتکگ۔ پرچا کہ یو ڈی ایچ آر ءِ رجانک کتگیں دستاویز ءِ رد ءَ دنیا ءِ ریکارڈ اِنت (بائبل ءَ ابید)، دنیا ءِ سرجمیں گلاں سال ءَ ھر جاہ ءَ مردماں وتی ھکانی بابت ءَ زانگ ءِ کمک کنگ ءِ سر ءَ دلگوش دیگ ءِ ھاتر ءَ کارمرز کتگ۔ دسمبر 2001 ءَ سدر جارج بش ءَ سدارتی جار جت کہ انسانی ھکانی ھپتگ 9 دسمبر ءَ بندات بیت۔ آئی ءَ 10 دسمبر 2008 ءَ ھم ھمے جار جتگ۔

اے میان اُستمانی انسانی ھکانی رِد ءَ بلوچ راج یک زوراوریں اِستانے ءِ دیم ءَ یکشل ءَ چہ وتی بُنکی لوٹ ءُ آزاتی ءَ زِبھر اِنت، ءُ بلوچ راج ءَ لوٹ اِیت کہ ھر کجا کہ آئی ءِ سر ءَ نا انساپی یے یا زُلم ءُ زوراکی بوگ ءَ اِنت گڑا آ چہ میان اُستمان ءِ انسانی ھکانی رد ءَ وت ءَ آگاہ بکن اَنت، ءُ باید اِنت ھر بلوچے ءِ پرز اِنت کہ آ وتی بُنکی لوٹانی پد ءَ وتی توار ءَ بُرز بکنت داں کہ میان اُستمانی نیمگ ءَ بلوچ راج ءِ توار گوشدارگ بہ بیت۔

نوشکی ءَ مڈی بروکیں گاڑیانی سر ءَ اُرش، لیویز پورس وئیل جاہ ءَ سر بوتگ۔

بلوچستان ءِ دمگ نوشکی ءَ گوستگیں شپ ءِ یک بج ءِ نزیک ءَ ناشناسیں سلاہ بنداں مڈی بروکیں گاڑیانی سر ءَ اُرش کتگ ۔

دمگی مردمانی رد ءَ سلاہ بندیں مردماں دو گاڑیانی ٹائر بَشٹ کتگ ءُ ناشناسیں نیمگاں شُتگ اَنت۔

لیویز پورس مرچی سھب ءَ وئیل جاہ ءَ سر بوتگ۔ اے وئیل ءِ تہ ءَ جانی تاوانانی ھال نیست اِنت-

انگت ءَ اے اُرش ءِ زمہ واری کس ءَ نہ زرتگ بلے گوستگیں وھداں نوشکی ءَ ھوار سرجمیں بلوچستان ءَ مڈی بروکیں گاڑی ءُ کمپنی بلوچ آجوئی لوٹوکیں سلاہ بندیں مردمانی اُرش ءِ آماچ بوتگ اَنت۔

روکپتی بلوچستان ءِ بنجاھی شھر زاھدان ءَ ناشناسیں مردمانی تیرگواری ءَ یک وکیلیں زالبولے بیران بیتگ-

اھوالانی رد ءَ تیرگواری ءِ وئیل بزرگمھر زاھدان ءَ پیش اتکگ کہ اود ءَ ناشناساں تیرگواری کنان ءَ 37 سالی ئیں سمیعہ حسین ملازئی ء ولی مھمد جھمنند سراوان بیران بیتگ-

اھوالانی رد ءَ سَے شَمبے ءِ بیگاہ ءَ ناشناسیں مردماں تیرگواری کتگ ءُ سمیعہ زدگ کتگ کہ آ امام علی ھسپتال زاھدان ءَ برگ بیتگ ءُ دوشی آئی ءَ وتی ٹپ نہ سگ اتگ ءُ بیران بیتگ-

اھوالانی رد ءَ سمیعہ ءِ سر ءَ ھما وھد ءَ تیرگواری کنگ بیتگ کہ آ وتی گِس ءَ درکپتگ ءُ گاڑی ءَ گوں روگ ءَ بیتگ کہ ناشناساں تیرانی آماچ کتگ کہ چریشی ءَ چہ آ سک ٹپیگ بیتگ-

سمیعہ بنکی ءَ سراوان ءِ جھمنند اِنت کہ بلے انی آ زاھدان ءَ جھمنند بیتگ ءُ یک وکیلے ءِ بستار ءَ زانگ بیتگ-

سمیعہ ءِ کوش ءِ درگت ءَ دگہ گیشیں اھوال دیم ءَ نیتکگ اَنت نانکہ آئی ءِ کوشکارانی بارو ءَ دگہ گپ زانگ بیتگ اَنت-

بلوچستان لبریشن فرنٹ ءِ سروک ڈاکٹر اللہ نزر بلوچ ءَ جماعت اسلامی ءُ ھک دے تھریک ءِ کرد ءِ سر ءَ ایر جتگ گوشتگ بلوچ راج اشاں چہ دیر بیگ ءِ شور داتگ اَنت-

آئی ءَ اے درشان چاگردی رسانکدر پلیٹ فارم بلیو آسکائی سر ءَ وتی آفیشل اکاؤنٹ ءَ چہ شنگ کتگ-

وتی درشان ءِ تہ ءَ ڈاکٹر اللہ نزر ءَ جست چست کتگ گْوشتگ کہ مروچی اے جاوراں ھک دے تھریک کجا اِنت؟ آئی ءَ گْوشتگ کہ بلوچانی ھمدرد بیگ نام ءَ چہ وتی مول ءُ مراد سرجم کتگ اَنت بلے بنگلہ دیش ءَ اے گوست ءِ کرد درستانی دیم ءَ اَنت-

آئی ءَ گْوشتگ کہ جماعت اسلامی ءُ مولانا ھدایت الرحمان ءِ ھک دے تھریک وڑیں دگہ مزھبی گلانی کرد سر ءَ ایرجنی جتگ ءُ گْوشتگ اے گل بلوچ راج ءِ جیڑہ ءِ گشینگ جاہ ءَ وتی چیریں مول ءُ مرادانی ھاتر ءَ کار کنگ ءَ اَنت-

آئی ءَ دیمتر ءَ گْوشتگ کہ ما وتی راج ءَ را چہ دزبندی کن آں کہ جماعت اسلامی ءُ دگہ مزھبی ناشرکاریں گلاں چہ دیر بہ بنت-

زانگ بہ بیت کہ ھک دے تھریک بلوچستان ءِ تیاب دپی شھر گوادر ءَ چست بیتگیں یک زُرمبشتے ءِ نام بیتگ ءُ آئی ءِ سروک جماعت اسلامی ءِ امیر مولانا ھدایت الرحمان کنگ ءَ بیتگ-

اے زرمبشت ءِ سبب ءَ چہ مولانا ھدایت الرحمن ءِ بلوچستان ءِ تہ ءَ نام رستگ ھمے ھاتر ءَ آ گوستگیں گچینکاری ءَ گوادر ءِ ایم پی اے گچین بیتگ-

بلوچ پارٹیانی گْوشگ اِنت کہ مولانا ءَ ھما کول راج ءَ چہ کتگ ءُ چریشی ءِ سبب ءَ آئی ءَ نام رستگ بلے مولانا راجی اوستانی ھلاپ ءَ درتکگ ءُ آ دگہ پارلیمانی راھشونانی نکش کدم ءَ شتگ راجی اوستانی سر ءَ آپ پریتکگ-

بلوچ وائس فار جسٹس ءِ نیمگ ءَ چہ شنگ کتگیں درشان ءِ تہ ءَ گْوشتگ کہ دہ دسمبر، انسانی ھکانی میان استمانی روچ ءَ یک مھمے برجم دار ایں، آئی ءِ مول بلوچ راج ءِ گوم ءَ بیتگیں تُرندیں انسانی ھکانی ھلاپ ورزیاں میانی استمانی نیمگ ءَ دیم آرگ اِنت-

درشان ءِ تہ ءَ گوشگ بیتگ کہ بلوچ راج ءِ دراجیں مدتے ءَ چہ زورانسری آوار جنی نشانگ ءُ آ جھل ءَ داتگیں زوراکی ءِ دیمپان اَنت:

زورانسری آوار جنی ءُ بے مدت ءَ آزارجاھاں بند، دروگیں میڑاں درکانودی کُشگ، زانت ءُ روزگار ءِ بُنکی ھکاں زبھر، سیمسری باپاری ءُ دگہ روزگارانی مڈیانی سر ءَ پاپندی-

درشان ءِ رِد ءَ بلوچ راج ءِ زندمان، وتی لیکہ درشان، ءُ مچی وڑیں بُنکی انسانی ھکاں چہ ھم زبھر کنگ بیگ ءَ اِنت-

بلوچ وائس فار جسٹس ءِ سرجمیں انسانی ھکانی باسک، نودربر، وکیل، اھوالکار ءُ چاگردی سرجمیں مردماں چہ دزبندی کتگ کہ آ بلوچ راج ءِ پلامرزی ءَ توار چست بہ کن اَنت ءُ انساپ، پسھی، ءُ انسانی شرپ ھاتر ءَ برجاھیں جُھد بھر بہ بنت-

درشان ءِ تہ ءَ گوشگ بیتگ کہ ما درست یکجاہ بہ ایں ایردستیں بلوچ راج ءِ گماں ءُ آیانی جُھد ءَ جھان ءَ تاں سرکنگی اِنت میان استمانی مردم اے زوراکی ءِ گامیج ءَ بزور اِیت ءُ انساپ کرد ءَ دلجمی بدے اَنت-

لومز یونیورسٹی اوتھل ءِ نودربرانی زھرشانی نندانک پنچمی روچ ءَ برجاہ انت ءُ نودربر بیان دُر بلوچ ءِ سلامتی ءَ یل کنگ ءِ لوٹ ءَ کنگ ءَ انت۔

اوتھل لومز یونیورسٹی ءِ ایگریکلچر ءِ تک ءِ نودربر بیان دُر بلوچ ءِ زورانسری بیگواہ کنگ ءِ ھلاپ ءَ نودربرانی زھرشانی پنچمی روچ ءَ برجاہ اِنت، زھرشانی کنوکاں یونیورسٹی ءِ دیم ءَ زھرشانی نندانک ءُ مرچی زھرشانی ءِ مُچے ءِ جم برجم دارگ بوتگ۔

نودربرانی ھمراھی ءَ بیگواھیں نودربر بیان دُر بلوچ ءِ کھول ءَ ھم اے مچی ءَ بھر زرتگ کہ آھاں وتی زھگ ءِ زوت سلامتی ءَ یل کنگ ءِ لوٹ کتگ۔

دومی نیمگ ءَ چہ شال ءَ چاگردی باسک گلزادی بلوچ ءُ بیگواھیں راشد حسین ءِ براتزتک مھزیب بلوچ ءَ ھم زھرشانی نندانک بھر زرتگ ءُ زھرشانی کنوکاں گوں یکجھتی درشان کتگ۔

اے تک ءَ نودربراں یونیورسٹی ءِ کش ءُ گور ءَ روانک کش اتگ ءُ سیمینارے برجم داشتگ۔

زھرشانی کنوکیں مردمانی گْوشگ اِنت کہ بیان دُر بلوچ ءِ بیگواھی ءِ بگیری ءَ نودربراں کلاس ءُ چکاساں دزکشی کتگ- بلے لھتے نودربر یونیورسٹی انتظامیہ ءِ نیمگ ءَ زوانسری مڈٹرم چکاس دیگ ءَ لاچار کنگ ءَ اَنت-

زانگ بہ بیت کہ اوتھل یونیورسٹی ءِ نودربر بیان دَر بلوچ چیزے روچ پیسر چہ اوتھل بازار ءَ چہ وتی ھمراھانی ھمراھی ءَ دزگیر کنگ بوتگ، رند ءَ آئی ءِ ہمراہ یلو کنگ بوتگ انت، بلے بیان دَر بلوچ انگت بیگواہ انت۔

زھرشانی کنوکاں بژنیگ درشان کنان ءَ لوٹ کتگ کہ آ زوت یلہ کنگ بہ بیت یا آمیدگس ءَ پیش کنگ بہ بیت اگاں ناں نودربر وتی زھرشانی ءَ برجاہ دار اَنت۔