TBP Balochi

بلوچستان ءِ بُنجاھی شھر شال ءَ ناشناسیں سلاہ بندیں مردماں پاکستانی پوج ءِ یک چیک پوسٹ ءِ سر ءَ اُرش کتگ-

گیشں ھالانی رِد ءَ شال ءِ دمگ بروری بائی پاس سر ءَ پاکستانی پوج ءِ یک چیک پوسٹ سر ءَ پجّار نہ بوتگیں مردماں دستی بمب ءَ چہ اُرش کتگ گوں تُرندی ءَ ترکّ اِتگ – وئیل ءَ پد پوج ءَ کش گور دمگ بستگ ءُ پٹ پول بندات کتگ-

ھمے وڑ دکی ءَ سردار میر عثمان ترین کول مائنز ھند نزیک ءَ برجاھیں پاکستانی پوج ایف سی ءِ چوکی سر ءَ سلاہ بندیں مردماں اُرش کتگ-

لیویز رِد ءَ اُرش آسر ءَ یک پوجی کارمندے بیران وھدے کہ یک ٹپی بیتگ-

لیویز رِد ءَ اے چیک پوسٹ سر ءَ ایف سی ءِ ھمراھی ءَ لیویز ھم ھست اَنت- وئیل ءَ پد دمگ ءَ پوج ءِ مزنیں کچے گیش کنگ بیتگ ءُ پٹ پول برجاہ ءَ اِنت-

نودربر اوتھل ءَ زورانسری آوار جنی ھلاپ ءَ زھرشانی ئیں نندانک برجاہ-

لسبیلہ یونیورسٹی آف ایگریکلچر، واٹر اینڈ میرین سائنسز اوتھل ءِ نودربراں وتی بیگواھیں سنگت ببان دُر بلوچ ءِ یل کنائینگ ھاتر ءَ زھرشانی ششمی روچ ءَ ھم برجاہ اِنت زھرشانی ءَ نشتگیں بیان دُر بلوچ ءِ پت ھم بھر اِنت ءُ آئی ءَ چک ءِ زوت یل کنائینگ لوٹ کتگ-

اوتھل زھرشانی ءَ نودربراں اے درگت ءَ کلاس ءُ چکاس ءِ دزکشی کتگ آیانی گوشگ اِنت کہ یونیورسٹی انتظامیہ زھرشانی ءَ اَبید آیاں زور چکاس دیگ ءَ لاچار کنگ ءَ اَنت-

زھرشانی کنوکاں گوستگیں روچاں یک سیمینارے ءَ ھم برجاہ داشتگ چریشی ءَ بلوچستان ءَ زورانسری آوار جنی ءِ جیڑہ دیم ءَ آورتگ-

زانگ بہ بیت بیان دُر بلوچ کہ اے یونیورسٹی ءَ زرعی پڑ نودربرے، چیزے روچ ءَ ساری چہ اوتھل بازار ءَ وتی دگہ سنگتانی ھمراھی ءَ پاکستانی پوج دست ءَ بیگواہ کنگ بیتگ اَت چریشی ءَ پد آئی ءِ سنگت یل کنگ بیتگ اَنت بیان دُر انگت بیگواہ ءَ اِنت-

بیان دُر ء پت ءُ سنگت نودربراں آئی ءِ زورانسری آوار جنی ءُ زندمان درگت ءَ ترس درشان کنان ءَ لوٹ کتگ کہ آئی ءَ یل بہ کن اِت یا کہ آمیدگس ءَ پیش بہ کن اِت-

آیاں گوشتگ کہ دانکہ آیانی لوٹ سرجم کنگ نہ بیت اَنت، آیانی زھرشانی نندانک ءُ دزکشی دْرچ برجاہ ءَ اِنت-

زھرشانی کنوکاں شال ءُ کراچی ءِ شھدگ ءِ سر ءَ اڑانک ایر کتگ ءُ ھر ڈولیں روانی مھتل کتگ انت-

مستونگ کلہ کاریز سور ءُ کاریزنوتھ ءَ زالبول ءُ زھگاں گیس ءُ بجلی ءِ بندش ءَ تنگ بیتگ اَنت ءُ ڈی سی چوک ءُ زالبولاں کوھالہ کراچی شھدگ ءِ سر ءَ روانی مھتل کتگ-

زھرشانی ءِ سبب ءَ شھدگ ءِ ھردوکیں نیمگاں گاڑیانی دراجیں کتار لگ اتگ اَنت چریشی ءِ سبب ءَ سدانی گاڑی ءُ مساپر پس اتگ اَنت ءُ مساپراں مشکلانی دیمپانی اِنت-

زھرشانی کنوکانی لوٹ اِنت کہ دمگ ءَ گیس ءُ بجلیانی پچ کنگ ءِ سرجمی ءَ گامگیج زیرگ بہ بیت اگاں ناں زھرشانی شھدگ ءَ برجاہ بیت اِنت چریشی ءِ زمہ واری مستونگ انتزامیہ ءِ سر ءَ بیت اِنت-

دومی نیمگ ءَ شال ءَ شھریاں گیس ءِ بندش ءِ ھلاپ ءَ زھرشانی کتگ- زھرشانی کنوک دگانی سر ءَ اتکگ ءُ انتزامیہ ءِ ھلاپ ءَ اوگام اش جتگ-

گیشیں اھوالانی رد ءَ شال ءِ جتا جتائیں ھنداں گیس ءِ بندش برجاہ اِنت ءُ چریشی ءِ سبب ءَ شھریاں مشکلانی دیمپانی اِنت-

گیس ءِ بندش ءِ ھلاپ ءَ شھریاں اسپنی دگ ءَ زھرشانی کتگ ءُ دگ بند کتگ-

زھرشانی کنوکانی گوشگ اِنت کہ گیس ءِ بندش ءِ سبب ءَ زندگی ءِ دراھیں پھنات سیاہ شپ اَنت ءُ ورگ ءِ جوڑ کنگ ءَ مزنیں جنجالانی دیمپانی اِنت-

بلوچستان ءِ تیابدپی شھر گوادر ءَ ناشناسیں مردمانی تیرگواری ءَ تربت ءِ جھمنند بیران-

اھوالانی رد ءَ نوکیں ملا بند واڑ گوادر ءَ تیرگواری ءَ تربت ءِ جھمنند مھمد جان بیران بیتگ-

اھوالانی رد ءَ نماز ءَ پد تیرگواری ناشناسیں مردماں تیرگواری کتگ مھمد جان زد بیتگ ءُ آ ھسپتال ءَ برگ بیتگ-

اھوالانی رد ءَ آ انڈس ھسپتال گوادر ءَ برگ بیتگ ءُ اود ءَ آئی ءَ وتی ساہ داتگ اَنت-

مھمد جان لیویز ملازم دُرا بلوچ ءِ گوھار زتک اِنت- تیرگواری ءِ سبب زانگ نہ بیتگ ءُ نانکہ کوشکار زانگ بیتگ اَنت-

بلوچستان ءِ دمگ شال ءَ بولان میڈیکل کالج ءُ ھاسٹلانی بندش ءِ ھلاپ ءَ مروچی دَھمی روچ ءَ نودربرانی زھرشانی برجاہ اِنت-

نودربرانی گوشگ اِنت کہ یکشلیں سارتی ءَ کالج ءُ ھاسٹل کالج انتزامیہ ءُ پولیس ءَ بند کتگ انت چریشی ءِ سبب ءَ نودربر لاچار کتگ انت کہ آ وتی شپ ءُ روچاں ھمے دگانی سر ءَ بہ گوازین اَنت-

نودربرانی گوشگ اِنت کہ کالج ءُ ھاسٹلانی پچ بوگ ءَ داں اے زھرشانی برجاہ بیت اِنت-

زانگ بہ بیت گوستگیں روچ ءَ نودربراں گوشتگ کہ آیوکیں گامگیجانی ھاتر ءَ پریس کانفرنس کنگ بیت اِنت-

گوستگیں نُھ روچاں یکشل ءَ نودربر بولان میڈیکل کالج ءِ بنجاھی گیٹ ءِ دپ ءَ نشتگ اَنت بلے اود ءَ آیانی گون ءَ گپ ءُ تران کنگ ءَ انتزامیہ یا پولیس انتزامیہ گندگ نہ بیت اِنت-

گوستگیں روچاں نودربراں گوشتگ ات کہ ھاسٹلانی توک ءَ وت ماں وتی جیڑھے ءِ ناموا انتزامیہ ءَ بلوچ جنک ءُ بچکیں نودربر چہ ھاسٹل ءَ کش اتگ ءُ گوشتگ داں یک مارچ ءَ ھاسٹل بند اَنت-

تو گیر پیداک ئے شھابو

نبشتہ کار: جاسم دوست

دی بلوچستان پوسٹ

یار باز رند ءَ من گْوش آں پہ ترا لھتیں دانک نبشتہ بہ کن آں بلے چے کن ئے منی پیمیں، نابودیں مردمے ءَ من کہ چُشیں بودناکیں مردمے بوتیں اِت آں من تھنا نہ نشت آں ءُ موت نیارت من شُت آں کار کُت ھما کار کہ شُما مدامی کُتگ اِت اَنت دیم ءَ جُنز اِت آں ￴شمئے جھد پد ءَ یار مئے وڑیں نابوداں یل کن اِت ءُ رو اِت۔ شُمئے چوشیں ناگتیں روگ ءِ ھال مارا میراج ھوٹل ءَ سر بوت میراج ھوٹل مئے یونورسٹی (LUAWMS) دیم ءَ اِنت ما سنگت ھمد ءَ کا اِیں پہ نان ءُ چاہ ءِ ￵ورگ ءَ یار ما کہ وتی شَپ کراڈئی پہ پکنک ءَ گوازینتگ اَت ءُ نیم روچ ھاسٹل ءَ اتک ءُ وتی ژندی کَش اِت ءُ دیم پہ شَپ ءَ اتک آں میراج ھوٹل ءَ کہ چاھے ور اِیں پد ءَ رو اِیں ھاسٹل ءَ ءُ تئی برات نبیل جان ءُ اِیدگہ سنگتانی ھمراھی ءَ چاہ کہ مئے دیم ءَ اَت تاں سنگت ءِ یا من ءَ ھال کُت کہ چُشیں ویلے بوتگ ( وندر )ءَ من گُشت گُڑاں چے بوتگ؟ سنگت ءَ پسّہ دات ءُ گُشت کہ شھاب جان ءُ دگہ لھتیں سنگت شھید بوتگ من ھچ نہ گُشت ءُ گوانکو جیب ءَ کُت۔

داں گُش ئے مئے دیوان ءِ سر ءَ گرندے کپت نشتگیں سنگت کُل ھاموش بوت اَنت سنگتاں وتی دیم ءِ چاہ نیم ءَ یل دات ءُ ما دیم پہ مگسی ھاسٹل ءَ شوت اِیں داں ھاسٹل گْوش ئے ورگ ءَ ￴اِنت ھاموشی ءَ مانشانتگ اَت دیوال سیاھ ترّان اِت اَنت مُرگاں وتی توار بند کُتگ اَت ھاسٹل ءِ ￵بچکانی کُوکاراں ھاموشی ءِ ￵سر ءَ زورتگ اَت
انچو سما بوّگ ءَ اَت کہ ھاسٹل ءِ ￵ دیم ءِ سبزیں چمن ھم زرد بوّان اِنت۔ اوتھل ءَ￴ کہ پیسر ءَ ￴سردیں گوات ءَ لھم لھم ءَ کشّ اِتگ اِے ساھت ءَ گُش ئے مردُم دمتُوس بوّان اَت نہ وشی اَت دست ھچّ ءَ رسگ ءَ نہ اَت
پد پ ھیر مہ چہ ھاسٹل ءَ در کپتاں دیم پہ پنجگور ءَ ￴چیزے وھد ءَ پد مرچی پد ءَ کہ سنگتاں گُشت رواں کمو میراج ءَ چاھے وراں ما ھو کُرت ءُ اتکاں ھمِد ءَ ￴دل ءَ گُشت کہ پہ ترا چیزے نبشتہ بکن آں من چُشیں نبشتہ کارے نیاں کہ مارا کَسے بُوان اِیت چار دانک در بہ بارت بلے ھمیش اِنت پہ تئی گیراں دگہ ھچ نہ بیت بس ننّداں نبشتہ کناں۔

ھوٹل ھما پیشی وڑ ءَ ￴ڈّن ءُ توک ءَ ￴ٹیک ٹاک رش کَش اِنت۔ ھمے تنکیں دگ ءِ ￵سر ءَ ٹرک ءُ بسانی توار اِنت ھوٹل ءِ توک ءَ نشتگیں ( LUAWMS ) ئے سنگت لھتیں نشتگ پہ نان ءِ ورگ ءَ ودار اَنت ءُ لھتیں ورگ ءَ ￴ اِنت لھتیں پہ چاہ ءَ دل مانگ اِنت کَش ءَ لھتیں سنگت ءَ وَ ھمے ڈسکیشن پچ کُتگ کہ ( نودربر مرچی برگ بوگ ءَ ￴اَنت ریاست ءِ دست ءَ ءُ بلوچ چہ ٹارچ سیلانی توک ءَ ￴ کَشگ بوگ اَنت بے بُنیاد ءَ جَنگ ءُ دور دیگ بوگ ءَ ￴ اَنت ) چوش اِنت ءُ آ اِنت پِلاں چیز چو کنگی اِنت چو کنگی نہ اِنت سنگت ٹیک ٹاک ڈسکیشن توک ءَ ￴ مُشکول اِت اَنت لھتیں سنگت سوال کنگ ءَ اِنت ءُ سنگت ءِ ￵ پسہ شوکیں رنگے ءَ دیگ بوگ ءَ ￴ اَنت۔

بلے ھمے میان ءَ تو گیر پیداک ئے پُلو گیر وَ تو ھر سَھت ءُ دمان ءَ کائے بلے مرچی تو گیش گیر پیداک ئے۔ پمیشکہ کہ کُجام وھد ءَ کُجام جاہ ءَ کہ من ءُ تو نشت دیوان کُت تاں تئی گپ ءُ ￶ ڈسکس ھمے سرھال ءِ تاں ھمے بزگی۔ گُلامی ۔ چست کنگ۔ جنگ۔ پروشگ ماندارگ۔ لٹ ءُ کُٹ پلاں چیز ریاست ءَ پہ زور مئے توک ءَ دور داتگ نی مارا چے کنگی اِنت نودربرانی زمہ واری چی اَنت۔ مُدام ھمے گپ topic کہ تو بندات کُت من تھنا ترا گوش داشت بلے یار مروچی تو اِد ءَ نہ ئے اِد ءَ بوتین ئے من گُش آں من وتی گوش گیش پچ کُت اَنت ءُ گوش داشت چیا کہ چُشیں دیوان گوں ترا سک باز کُتگ اَت بازیں چیز ءِ چہ ترا در بُرتگ من مرچی ترا گُش آں یار ھما دیوان ھما سنگت ھما سیاست ءُ ھوٹلانی دیوان ھست آں بلہ شُما رپتگ ئے اِد ءَ نہ اِت ھمُک سنگت شُمارا گیر کار اِیت ءُ گُش اِیت یار اِشاناں چو زوت روگی نہ اَت – بس شُمے جاہ وش بات پُلاں یکجاہ اَنت الم کایاں شُمئے گندگ ءَ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-

بلوچستان ءِ دمگ چہ پنجگور ءَ پاکستانی پوج ءَ چار مردم آوار جنگ ءَ پد بیگواہ کتگ اَنت-

بیگواہ کنگ بیتگیں مردمانی پجّار خلیل صدیق، عبدالشکو صالح، ارشد رفیق ءُ وسیم ء محمد ھاشم نام ءَ چہ بیتگ اَنت-

اے مردم گوستگیں شپ ءَ پاکستانی پوج ءَ پنجگور ءِ تھسیل پروم ءَ آوار جتگ اَنت چریشی ءَ پد آ بیگواہ اَنت-

دمگی اِھوالکار رِد ءَ بیگواہ کنگ بیتگیں سرجمیں مردم پوریاگر ءُ تیل باپاری ءَ ھمگرنچ زمیاد ڈرائیور اَنت-

بلوچ لبریشن آرمی ( بی ایل اے) ءَ گوستگیں ماہ 12 اُرش کتگ اَنت، اے اُرشاں 45 مردم مرتگ اَنت-

بی ایل اے ءِ اُرشانی کچ ءُ ترندی ءِ گیشی ٹولی ءِ آپریشنل گچینی گام ءُ پُرزوریانی یک گچینی دیم ءَ روگ ءِ جنزگ ءِ پدراھی ءَ کن اَنت- اے گیش بیتگیں ھترناکیں اُرشانی دیمپانی ءَ پاکستان ءِ نیمگ ءَ وتی کارپدانی سر ءَ دلگوش دیگ ءِ درکاری ءِ انت-

اے پٹ ءُ پولی اسلام اباد ءِ تھنک ٹینک پاک انسٹی ٹیوٹ فار پیس اسٹڈیز ( پِپس) ءَ وتی ماہ گشتی سیکیورٹی ریقیو آف پاکستان ءَ کتگ-

بلوچستان ءَ 19 وئیل پیش اتکگ انت چریشی ءِ آسر ءَ 55 مردم مرتگ ءُ 130 زدگ بیتگ اَنت-

ایشانی توک ءَ گیش مرگ ( کساس 91 درسد) سَے مزنیں اُرشانی سبب ءَ پیش اتکگ اَنت چریشانی توک ءَ شال ءَ ریل اسٹیشن، مستونگ ءَ پولیس وین ءُ کلات ءَ سیکیورٹی چیک پوسٹے ءِ اُرشے ھوار اَنت – چریشاں سیکیورٹی کارمنداں ھوار مساپر نشانگ بیتگ اَنت-

زانگ بہ بیت شش نومبر ءِ سھب ءَ بلوچستان ءِ بنجاھی شھر شال ءَ ریل اسٹیشن ءَ بیتگیں یک فدائی اُرشے ءَ انفنٹری اسکولے ءَ کورس کنگ ءَ پد واتر بیتگیں پاکستانی پوج ءِ نان کمیشنڈ آپسر نشانگ کنگ بیتگ اَنت – ھمے ڈول ءَ شانزدہ نومبر ءَ کلات ءَ پاکستانی پوج ءِ چوکی ءِ سر ءَ بیتگیں اُرش ءَ کم چہ کم دَہ کارندہ کشگ بیتگ اَنت ءُ اے دویں اُرشانی زمہ واری بلوچ لبریشن آرمی ءَ من اتگ اَنت-

بلوچستان ءِ تیابدپی شھر گوادر ءَ اھوال اَنت کہ شپ ءَ پاکستانی پوج ءَ نودربر زاھد مصطفے آوار جتگ ءُ بیگواہ کتگ –

اے نودر گوادر یونیورسٹی ءِ ڈیٹا سائنس ءِ نودربر اِنت کہ گوستگیں شپ ءَ پنج گاڑیانی ھواری ءَ لس پوشاکی ءُ سلاہ بندین پاکستانی پوج ءِ کارندھاں گوادر ءِ چہ جند ءِ لوگ ءَ آوار جتگ ءُ بیگواہ کتگ-

کھول ءِ رد ءَ ھمے وھد ءَ پورسز ءِ کارندھاں لوگ ءِ مردم لٹ ءُ کٹ کتگ اَنت- گھگیری ءِ پژدر ءَ لوگ ءِ مردم توپک ءِ بٹ ءَ جتگ ءُ تیرگواری اش ھم کتگ-

دمگی اھوالکار عین قادر ءَ گوشتگ گوستگیں لھتے ھپتگانی توک ءَ ریاستی ادارھانی نیمگ ءَ گوادر ءُ آئی ءِ کش ءُ گوری ھنداِ گیر ائینی گامگیج ءُ شھریانی بنکی ھک لگتمال بوگ ءَ اَنت ءُ زورانسری بیگواھیانی وئیل ترندی ءَ گیش بوگ ءَ اَنت-

آئی ءَ لوٹ کتگ کہ زورانسری بیگواھیانی انسانیت سوزمانی کاروائی بند کنگ بہ بنت ءُ زاھد مصطفٰے ءَ ھوار دراھیں بیگواھیں مردم یل کنگ بہ بنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک درشانے ءَ گوشتگ مئے سرمچاراں پنجگور، نوشکی ءُ تربت ءَ سَے جتا جتائیں اُرشاں زورگریں پاکستانی پوج ءُ آئی ءِ گچینی کارمند نشانگ کتگ اَنت- اُرشاں سَے کارندھاں ھوار یک چاریگے کشتگ ءُ یک گاڑی ءَ تاوان داتگ –

جارکش ءَ گوشتگ بی ایل اے ءِ سرمچاراں مروچی بیگاہ ءِ وھد ءَ پنجگور ءِ دمگ پروم جائین ءَ زورگریں پاکستانی پوج ءِ کاروان ءَ ھواریں یک گاڑی یے ھما وھد ءَ ریموٹ کنٹرول آئی ای ڈی ءِ نشانگ کتگ کہ آ دمگ ءَ سُر ءُ پراں بیتگ اَنت – تراک ءِ زد ءَ اتکگیں گاڑی ءَ تاوان رس اتگ ءُ دشمن ءِ دو کارندہ جاہ پہ جاہ ءُ مرتگ انت ءُ کم چہ کم سَے زدگ بیتگ اَنت-

آئی ءَ گوشتگ یک دگہ کاروائی یے بلوچ لبریشن آرمی ءِ سرمچاراں گوستگیں شپ ءَ نوشکی گلنگور ءِ ھند ءَ ھستیں زورگریں پاکستانی پوج ءِ پوسٹ ءَ جاڑیگیں کارندہ نشانگ کتگ- سرمچاراں اُرش ءَ نوکیں سلاہ کارمرد کنان ءَ دشمن ءِ یک کارندھے کشتگ ءُ کم چہ کم سَے زدگ کتگ اَنت-

آئی ءَ گوشتگ بی ایل اے ءِ سرمچاراں تربت ءِ دمگ نودز ءَ سلاہ بندین اُرش ءَ زورگریں پاکستانی پوج ءُ چیریں ادارھانی کارمند گوھرام ء الاھی بکش کشتگ – دشمن ءِ گچینی کارمند گوھرام زورگریں پوج ءِ چیردستی ءَ نودز، کلبر، شورما ءُ کش ءُ گوری دمگاں بلوچ مھلوک ءِ سر ءَ زوراکیاں پوج ءِ رھشونی ءَ کنگ ءَ بیتگ ءُ دمگ ءِ مردماں بلیک میل کنگ ءُ پوج ءِ گوشگ ءَ مھلوک ءِ تنگ کنگ ءَ ھم دزمانجن بیتگ ءُ نشہ واپاری ءُ چاگردی سلکاریاں ھم ھوار بیتگ-

آئی ءَ گوشتگ ھمے سال ءِ اکتوبر ءَ چاریگ امان اللہ ءِ مَرگ ءَ پد گوھرام نودز ءُ کش ءُ گوری دمگاں دشمنیں لشکر ءَ پرکار کتگ – اے نیٹورک ءَ ھواریں دگہ مردم ھم بلوچ لبریشن آرمی ءِ نشانگ ءَ اَنت ءُ زوت آ ھم امان اللہ ءُ گوھرام ءِ ڈول ءَ آسری ءَ سر کنگ بنت اِنت-

درشان ءِ گڈسر ءَ گوشگ بیتگ کہ بلوچ لبریشن آرمی اے سئیں اُرشانی زمہ واریاں من ایت –