TBP Balochi

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ سرمچاراں دکی ءَ زورگریں پاکستانی پوج ءِ یک پوسٹے اُرش ءِ نشانگ کتگ-

جارکش ءَ گوشتگ گوستگیں شپ ءَ دکی ءَ زوگریں پاکستانی پوج ءِ یک پوسٹے اُرشے نشانگ کتگ کہ ھمے وھد ءَ دشمنیں پوج ءِ پوزیشنز ءِ سر ءَ گرنیڈ لانچراں گوں بازیں گولہ آس داتگ اَنت- اُرش ءَ پاکستانی پوج ءِ چار کارندہ مرتگ انت ءُ کم چہ کم شش زدگ بیتگ انت – کشگ بیتگینانی توک ءَ دو کارندھانی پجار سپاھی ابوسپیان جھمنند بھاولپور ءُ سپاھی اھسان جھمنند رھیم یار خان ءِ ناماں زانگ بیتگ اَنت-

جارکش ءَ گوشتگ اُرش ءَ پد بی ایل اے ءِ سرمچار ھیلکاری رپکاں وتی بنجل ءَ سر بوگ ءَ سوبمند بیتگ اَنت ءُ پروش وارتگیں پوج ءَ جتا جتائیں نیمگاں کورکائی تیرگواری کتگ ءُ مارٹر گولہ آس داتگ-

جیئند بلوچ ءَ گوشتگ بی ایل اے اے اُرش ءِ زمہ واری ءَ من ایت ءُ زورگرین پوج ءِ درکپگ ءَ داں اے اُرش برجاہ بنت اِنت-

روکپتی بلوچستان ءِ دمگ میرجاوہ ءَ کل کرتگیں شوروانی تراک ءَ پد ایرانی سیمسری لشکر ءِ تیرگواری ءَ سَے مردم بیران ءُ سَے زدگ بیتگ اَنت-

اھوالانی رد ءَ میرجاوہ ءِ ھند پدگی ءَ کل کرتگیں شوروانی تراک ءَ پد لشکر ءِ تیرگواری ءَ سَے مردم بیران بیتگ اَنت ءُ سَے زدگ بیتگ اَنت-

بیران بیتگینانی توک ءَ دو مردمانی پجار امید شیروزئی ء عبدالرحیم ءُ عبدالعزیز شیروزئی ء مھمد ءِ ناماں زانگ بیتگ انت ءُ زدگ بیتگینانی توک ءَ یکے ءِ پجار ایوب شیروزئی ء عبدالغفور جھمنند جملگی ءُ قطار خنجک زاھدان ءِ ناماں زانگ بیتگ اَنت-

آ دگہ زدگ ءُ بیران بیتگین مردمانی پجار زانگ نہ بیتگ اَنت-

دمگی اھوالانی رد ءَ لشکر ءَ ھما وھد ءَ تیرگواری کتگ کہ تراک ءَ پد بوگ ءَ آئی ءَ لس مھلوک ءِ سر ءَ تیرگواری بندات کتگ –

پاکستان ءِ اُستان خیبرپختونخوا ءِ دمگ کرم ءَ لوئر کرم ءِ ھند بگن نزیک ءَ 156 ونگ ٹل اسکاؤٹس ءِ پوسٹ ءِ سر ءَ ناشناسیں مردماں مزنیں سلاہ ءُ وتکاریں سلاھاں گوں اُرش کتگ-

اُرش ءِ آسر ءَ شش ایف سی کارمند بیران کہ آیانی نائب صوبیدار خالد بنگش، حوالدار جدید اورکزئی، لانس نائک ولایت حسین طوری، لانس نائک الرحمٰن، سپاھی نظام الدین محسود ءُ سپاھی صفت اللہ آفریدی ھوار اَنت-

چیک پوسٹ ءِ سر ءَ اُرش ءَ ھپت کارمند ٹپی ھم بیتگ انت، آیانی تہ ءَ ثواب گل خٹک، نائک سعید خان خٹک، نائک عابد حسین خٹک، لانس نائک طاھر بنگش، سپاھی عامر سھیل آفریدی، سپاھی طیب الرحمٰن ءُ سپاھی توحید اللہ مروت ھوار اَنت-

بیران ءُ ٹپی بیتگیں سرجمیں کارمند سی ایم ایچ ٹل ءَ سر کنگ بیتگ اَنت-

مُرتگیں مرد ءِ زندگیں سما

آزمانکار: شاھد اھمد

دی بلوچستان پوسٹ

شیرو ءَ مدام وتی کِشتگیں ھیال پہ جیڑگ ءَ گوازینت اَنت، ھَمُک سُھب ءِ ھپت ساھت ءَ میرو وھدے چار ایت شیرو ءِ چمّ وَ بند اِت اَنت بلے آگاہ اَت ءُ شپ ءَ داں دیراں آگاہ اَت، کدی دو ءُ کدی کدی سُھب ءِ چار ءُ نیم کلاک ءَ آگاہ اَت۔ مدام میرو ءَ اے چار اِت کہ اے چے سما کنگ ءَ اِنت۔

شیرو ءِ لوگ ءِ مردماں مدام ھمے سما کُتگ اَت کہ شیرو مجگی نادراھی ءِ آماچ اِنت، بلے میرو ءَ داں ھَدّے ءَ ھم ھمے سما کُت کہ واکی اِے مجگی نادراھی ءِ آماچ اِنت۔
شیرو درکسانی ءَ چہ وتواھے اَت، شیرو ءَ کسی سر ءَ اوست نیست اَت وھدے آ پہ کار ءَ ایران ءَ شُت، درگِس ءَ اود ءَ موزانی باگ ءَ کار ئِے کُت، بلے شیرو پہ کار ءَ سک زوراور اَت، بزاں سکیں کار والائیں بچکے اَت، ھر کسی دپ ءَ شیرو ءِ نام اَت وھدے شیرو درگِس ءَ کار اَت آئی واجہ ءَ شیرو سک دوست اَت، وھدے چہ ایران گَٹ ءَ یکے اتکگ اَت پہ شیرو ءِ برگ ءَ گڑا آئی ءِ واجہ ءَ شیرو نہ دات۔

دیراں پد شیرو ءَ واجہ ءِ چُک ءِ گوم ءَ اِشک بوت، آئی ءِ جِنک دوست بوت ئِے ءُ جنک ءَ ھم پہ شیرو ءَ مرگ کُرت۔ واجہ ءِ چُک ءِ نام سَدو اَت ءُ سَدو مدام پہ شیرو ءِ چارگ ءَ تلوس اِیت، آ مدام شیرو ءِ کارگس ءِ پُشتی اوتاک ءِ نیمگ ءَ نیم چمی ءَ چار اِیت۔ شیرو سَدو ءَ را مہ کن کنت، برو برو تئی پِت اگاں مارا بہ گند اِیت ھر دوئیناں کُش اِیت گڑا سَدو شیرو ءِ گپاں مہ کن نہ کَنت گڑا آ چداں چِہ روت۔

میرو شیرو ءِ مستریں برات اَت گڑا مدام شیرو ءَ میرو ءِ گوم ءَ چہ گوانکو ءَ ھال ءُ اھوال کُت شپ ءَ، شیرو وتی جاورانی بابت ءَ گپ اِش کُت اَنت گوں میرو ءَ۔

گڑا میرو شیرو ءِ سر ءَ زَھر گپت بچ ءَ تو اود ءَ پہ کار ءَ شُتگ ئے یا آشکی ءَ ھمے ساھت ءَ گوانکو بند بوت۔
دومی روچ ءَ شیرو ءِ موزانی وھد رس اتگ اَت گڑا موزاں باز دلگوشی لوٹ اِتگ اَت، شیرو سُھب ءَ بگر داں مگرب ءَ چہ کار ءَ اتک۔ شیرو ءَ کاراں ژند کُتگ اَت گڑا ٹینٹ وپتگ اَت۔انچوش گْوش اَنت کہ ”کار مردم ءَ وشیں واب گیجین اِیت، کار ءِ کنگ وَ گران اِنت بلے آئی ءِ ژندی ءِ واب سک وش اِنت“-

گڑا گڈی ءَ شیرو ءَ کار نہ ساچ اِت ءُ شیرو ءَ بھانہ بندات کُتگ انچوش گْوش اَنت کہ کسے ءَ کہ کَسے دوست نہ بیت گڑا آ دگہ نیمونے الم شوھاز کنت برے گُش اِیت من نادراھ آں ءُ برے گُش چُش اِنت پلاں پلاں۔۔۔ باز منت ءُ واہ ءُ زاری ءَ شیرو نہ ٹَھ اِیت، باریں شیرو ءَ را کسے ءِ چمّاں گپتگ اَت یا اِشک ءِ گنوکی ءَ سر سر جنان بوان اَت۔ گڑا واجہ ءَ شیرو ءِ ھر گپ سر ءُ چم کُت اَنت تو ھر چیز لوٹ ئے من تیاراں گڑا شیرو بھی انگت ءَ تیار نہ اَت بزاں شیرو دگہ نیمگے ءَ پہ کار ءَ روگ ءَ لوٹگ ءَ اَت۔ اے بابت ءَ میرو سرپد نہ اِنت کہ شیرو ءَ کار یل داتگ پہ دگہ نیمگے ءَ شُتگ، بزاں کشاری یک جاگھے ایرانی بلوچستان ءِ، باریں نیمون چی اَت کہ شیرو ءَ کار یل داتگ اَت(؟)

چوناھا شیرو ءَ زانتگ اَت کہ گوستگیں کار پمن جوانتر بوتگ اَت بلے باریں آ کجام نیمون اَت کہ لاچار ئِے کُتگ اَت۔ ”شیرو ءَ چماں گپت“ اے آئی ءِ واجہ ءِ گپ اِت اَنت بلے آئی ءِ واجہ سک باز دلتپرکہ اَت پہ شیرو ءِ روگ ءَ، آ ھم جیڑگ ءَ اَت کہ کجام نیمون بیت کہ شیرو من ءَ یل بدنت؟ داں دیراں شیرو اود ءَ کشاری ءَ کار کنت بلے اود ءَ ھم نہ ٹِکّ اِیت گڑا شیرو سوڑگ کنگ بئیت لوگ ءَ واتر بکنت۔ وھدے شیرو لوگ ءَ کہ واتر کنت گڑا آئی ءِ لوگ والا آئی ءِ سر ءَ برانز گر اَنت، بیھار دے اَنت کہ تو اد ءَ اتکگ ئے پرچا ، کار یل داتگ اد ءَ تماشایے ھست۔

داں دیراں شیرو گوں میرو ءَ جنگ کنگ، لوگ ءِ ھر چیزاں پروش اِیت، ھچ نئیل اِیت، ھچ پشت نہ گیج اِیت۔ گڑا آ سما کنگ کہ من دبئی ءَ رواں پہ کار ءَ باریں آئی ءَ کَے رَد دنت کہ ساھتے نہ گوز اِیت نیمون کنت برے من اود ءَ رواں ءُ برے من دبئی ءَ رواں۔

گڈی ءَ شیرو ءِ گپ بنت ءُ کسے ایشی ویزہ ءَ کش اِیت ءُ دبئی ءَ روت۔ اود ءَ شیرو ءِ کار یک باگی کارے اَت بلے شیرو ھما مردم ءَ کہ کار ءَ بُرتگ اَت آ بلاھیں زالمے اَت بزاں 4Man اَت۔ داں دیراں شیرو ءَ اود ءَ زلیل ءُ بزگ کن اَنت ھمے زلیل ءُ بزگی ءَ آ چٹ مجگی نادراھی ءِ آماچ بیت ءُ چمداں جنگ کنت ءُ پولیس آئی ءَ واپس کنت ءُ راہ دنت۔ اے وھد ءَ شیرو واکی گنوک اِنت یا گنوک کنائینگ بوتگ اَت۔ داں روچ ءُ مروچی شیرو سَدو ءِ مِھر ءَ نیمون پہ نیمون ءَ سر ماں چَک اَت۔

بلوچستان ءِ دمگ کلات ءَ ناشناسیں مردماں گوستگیں شپ ءَ مونو موومنٹ مانداشتگ-

مونو موومنٹ چیزے سال ءَ ساری جوڑ کتگ کہ گوستگیں شپ ءَ مانداشتگ-

زانگ بہ بیت بلوچستان ءَ اے سال ءَ سیمی وئیل اِنت ایشی ءَ ساری ناشناسیں مردماں پنجگور ءَ برجاھیں شھید نواب اکبر بگٹی ءِ بُت پروشتگ وھدے کہ گوادر ءَ بلوچی زُبان ءِ نامی ئیں زبان زانت سید زھور شاہ ھاشمی ءِ بُت نشانگ کتگ –

بلے اے وئیلانی درگت ءَ ھچ وڑیں سرپدی دز نہ کپتگ، وھدے کہ راجدوست اے وڑیں بھتام پاکستانی چیریں ادارھانی پلامرزی ٹولیاں جن اَنت-

بلوچستان ءِ دمگ چہ کیچ ءَ یک مردمے ءِ لاش دزکپتگ-

گیشیں اھوالانی رد ءَ کیچ ءِ دمگ بلیدہ ءَ مروچی سھب ءَ جنتری کور ءَ یک مردمے ءِ تیرسپتگیں لاش دزکپتگ کہ آئی ءِ پجار نوید ء حمید ءِ نام ءُ زانگ بیتگ –

نزیکیں مردمانی رد ءَ گوستگیض بیگاہ ءَ نوید وتی گاڑی ءِ ھمراھی ءَ دراتکگ شپ ءَ واتر نہ بیگگ سھب ءُ جنتری کور ءَ آئی ءِ تیرسپتگیں لاش دزکپتگ-

وئیل ءِ سبب زانگ نہ بیتگ-

ھمے وڑ شال ءِ ھند میان گنڈی ءَ کلہ زرین ءَ ناشناسیں مردمانی رکشائے ءِ سر ءَ تیرگواری کرتگ ءُ شیر احمد ء علی محمد کشتگ ءُ مھر اللہ ٹپی کتگ –

ھمے وڑ چاگی ءَ سلاہ بندانی تیرگواری ءَ سعید احمد ءُ الیاس نامین دو مردم بیران بیتگ اَنت –

ھمے وڑ دکی ءَ اشکرانی کھن ءَ ناشناسانی تیرگواری ءَ یک مردمے زدگ بیتگ-

پاکستانی آرمی چیپ جنرل عاصم منیر ءِ سروکی ءَ اسلام آباد ءَ پاکستانی پوج ءِ ھشتاد ءُ چارُمی پارمیشن کمانڈرز ءِ کانپرنسے برجم دارگ بیتگ ءُ بلوچستان ءَ برجاھیں آپریشنز ءِ چار ءُ ٹپاس کنگ بیتگ- میڈیا ءِ اھوالانی رد ءَ عاصم منیر ءَ کانپرنس ءَ کورکمانڈرز ءَ بلوچ لبریشن آرمی ءُ آئی ءِ پدائی ونگ مجید بریگیڈ ءِ ھلاپ ءَ سانداریں کاروائی کنگ ءِ ھکم داتگ-

بلوچستان ءَ پوجی آپریشن دو دھکاں گیش برجاہ اِنت، پاکستانی پوج ءِ “ انسداد انسرجنسی ” ءِ پالیسیانی درچ ءَ بلوچ چاگرد ءِ ھمک تک ءَ سیادی داروکیں مردم گچینی سیاسی باسک ءُ نودربر ھزارانی کَچ ءَ زورانسری بیگواہ کنگ ءُ کُشگ بیتگ اَنت ءُ جنگی ھالاتانی سبب ءَ سرجمیں بلوچستان ءَ لکانی مھلوک باھوٹی زند ءِ گوازینگ ءَ لاچار اَنت-

دو دھکاں سدانی پوجی آپریشن کنگ بیتگ اَنت بلے آیانی آسری درگیجگ نہ بیتگ اَنت ءُ بلوچ آجوئی ءِ واستا پرکاریں سلاہ بندیں گل مھکم بیتگ ءُ پاکستان ءُ درملکی زرکارانی پریام گچینی ڈول ءَ چین ءِ لوٹ کہ آیاں لُٹ ءُ پلی گوش اَنت، آیانی سر ءَ ھترناکیں اُرش کنگ ءَ سوبمند بیتگ اَنت – بلوچ آجوئی ءِ جنگ ءَ ھواریں سلاہ گلاں نوکتری زُرتگ کمپلکس اُرشانی دروشم ءَ بلوچستان ءَ پاکستانی پوج ءَ سرین پروشگ ءَ کنگ ءَ جنزگ ءَ اَنت-

بلوچستان ءَ سانداریں پوجی آپریشناں زورانسری ءَ درکانود ءَ کُوشانی وئیل گیش بنت اِنت ءُ ریاستی زوراکی ءِ ھلاپ ءَ برجاھیں گوستگیں گھگیری ءَ ھم ترندی کیت اِنت- دو دھکانی گوزگ ءَ پد ھم پاکستان ءِ مزنیں تاکتوریں مردم سرپد بوگ ءَ نہ اَنت کہ پوجی آپریشناں بلوچ جنگ ءِ آجوئی ءِ پروش دیگ ناممکن اِنت، چوشکہ اے آپریشناں گیشتر سانمند لس مھلوک بیت اِنت کہ آیانی دلاں گیش نپرت ءُ ریاست ءِ بگیر داریں زھرگ گیش برانز گپت اِنت ءُ آ گیش آجوئی لوٹانی نیمگ ءَ دیم ءَ ترین اَنت- ھمے واستا ھمک پاکستانی مزنیں آپریشناں پد جنگ اوشتگ ءَ ابید گیش ترندتر بیت اِنت-

بلوچستان ءِ دمگ کیچ دشت شولیگ ءَ پوج ءَ بیڑ برتگ ءُ چار مردم آوار جتگ انت ءُ لوگانی دروازگ پروشتگ ءُ مھلوک لٹ ءُ کٹ کتگ اَنت-

گیشیں اھوالانی رد ءَ گوستگیں شپ ءِ ساھت یک بج ءَ پوج ءَ دشت ءِ دمگ شولیگ ءَ بیڑ برتگ ءُ چار مردم حاجی حاصل، عبدالسلام ء حاجی حاصل، یاسر ء عبداللہ، سالم ء قادر بخش لٹ ءُ کٹ کنگ ءَ پد آوار جتگ انت-

اھوالانی رد ءَ پوج ءَ بیڑ بران ءَ بازار ءِ لوگانی دروازگ پروشتگ انت ءُ اود ءَ مردم لٹ ءُ کُٹ کتگ اَنت-

دمگی مردمانی رد ءَ پوج ءَ بلوچ ودود لگتمال کنان ءَ شپ ءِ نسپ ءَ مھلوک ءِ لوگانی توک ءَ دور کتگ ءُ اود ءَ زوراکی کتگ ءُ مردم جتگ انت ءُ زالبول ءُ زھگ کمشرپ کتگ اَنت-

بلوچستان ءِ دمگ پنجگور ءِ ھند پروم ءِ جھمننداں وتی بیگواھیں مردمانی زوت یل کنائینگ ءِ لوٹ کتگ ءُ ایف سی ءِ بُنجل ءِ دیم ءَ نندانک دیگ ءِ جار جتگ- دمگی مردمانی گوشگ اِنت کہ اگاں آیانی مردم یل کنگ نہ بیت اَنت گُڑا آ تُرندیں زھرشانی کنگ ءَ لاچار بنت اِنت-

پروم ءِ جھمننداں یک درشانے ءِ تہ ءَ گْوشتگ کہ گوستگیں شپ ءَ پاکستانی پوج ءَ دمگ انگر ءَ کتگ اَنت لوگانی سر ءَ بیڑبرتگ، لوگانی تہ ءَ پُرشت ءُ پروش کتگ، گرانبھائیں سامان دُزتگ ءُ برتگ اَنت ءُ مردم لَٹ کُٹانی نشانگ کتگ اَنت-

دمگی مردمانی رِد ءَ پوج ءَ چار ورنا آوار جتگ ءُ وتی ھمراھی ءَ برتگ اَنت کہ آیانی پجّار خلیل صدیق، عبدالشکور صالح، ارشد رفیق ءُ وسیم ء محمد ھاشم نام ءَ چہ بیتگ اَنت بلے دزگیری ءَ پد اے مردم بیگواہ اَنت ءُ ایشانی درگت ءَ ھچ وڑیں ھال دیگ بیگ ءَ نہ اِنت-

پاکستانی پوج ءِ دست ءَ آوار جنگ ءَ پد بیگواہ کنگ بیتگیں وریانی کھول ءُ دمگ ءِ مردماں پوج ءُ انتزامیہ وھد داتگ ءُ گْوشتگ اگاں مروچی شپ ءَ تاں مئے دوستناک یل کنگ نہ بیت اَنت گُڑا باندا سُھب ءِ نُھ ءَ ریش پیش ایف سی بُنجل ءَ انگیر ءَ کن ایں ءُ نندانک دے ایں-

آیاں گْوشتگ کہ مئے نندانک ھما وھد ءَ داں برجاہ بیت دانکہ بیگواھیں مردم یل کنگ نہ بنت اگاں نندانک ءِ میان ءَ کجام وڑیں تاوان بیت گُڑا ایشی ءِ سرجمیں زمہ وار پوج ءُ دمگی انتزامیہ ءِ سر ءَ بیت انت-

زانگ بہ بیت کہ گوستگیں شپ ءَ پاکستانی پوج ءَ مزنیں کچے ءَ پروم ءَ لشکر کشی بندات کتگ لوگ لوگ ءَ پٹ ءُ پول بیڑ برتگ وھدے کہ ھمے میان ءَ پاکستانی پوج ءِ نیمگ ءَ چہ دمگی مردم ھم لَٹ ءَ کُٹانی نشانگ کتگ اَنت-

دمگی اِھوالکار ءِ رِد ءَ بیگواہ کنگ بیتگیں سرجمیں مردم پوریاگر ءُ تیل باپاری ءَ چہ ھمگرنچ زمیاد گاڑیانی ڈرائیور اَنت دمگی مردماں لوٹ کتگ کہ آیانی دوستناکاں زوت دیم ءَ بیار اِنت ءُ آیاں یل بہ کن اِت-

جنگی ھُنر

نبشتہ کار: سُن زو

رجانک: کوھسار قندیل

ششمی ءُ گڈّی بھر

دی بلوچستان پوسٹ

چیریں کارانی ارزِشت

سُن زو گُش ایت کہ ھزارانی لشکر تیار کنگ،آھانی سر ءَ ھرچ ءُ درچ کنگ،کُل بے پائدہ اَنت وھدی کہ ترا دشمن ءِ توک ءَ اے سرپدی گوں مہ باں۔سوبمندیں لشکر ھما اِنت کہ آرا دشمن ءِ توک ءِ ھالاں سرپدی بہ بیت۔اے ھال ترا چہ آسان ءَ یا کہ چہ تک انداز ءَ رس ات کُت نہ کنت بلکیں ایشی ءِ ھاتر ءَ مردم درکار اِنت کہ دشمن ءِ توک ءَ بہ بیت ءُ جاسوسی بہ کنت۔ جاسوس پنچ ڈولانی بنت ءُ سک ھترناک بنت۔

۱: ھَندی جاسوس ۲: جِند ئے توک ءِ جاسوس ۳: مٹ بُوتگیں جاسوس ۴: پارگ بُوتگیں جاسوس۵: رکیتگیں جاسوس وھدیکہ اے جاسوس کار کن اَنت گڑا سر زاھر ءَ ایشان کَس دیست کُت نہ کنت۔۱: ھَندی جاسوس ھما اَنت کہ یک علاقھے ءَ لَس مھلوک ءَ گوں وت ءَ ھوار کن انت۔ دشمن ءِ لَس مھلوک ءَ گوں مھر ءُ دوستی ءَ پیش کائے ءُ آھاں گوں وت ءَ ھوار کن ئے، ءُ دشمن ءِ سر ءَ جاسوسی کنگ ءِ ھاتر ءَ کارمرز کن ئے۔ ۲:دشمن ءِ سرکاری مردم ءَ ھم تو جاسوسی ءِ ھاتر ءَ کارمرز کُت کن ئے،ھما مردم کہ آ چہ روزگار ءَ کَشگ بُوتگ اَنت،ءُ مجرم کہ سزا دیگ بُوتگ اَنت۔آنچیں زالبول کہ آھاناں زَر ءُ مال ءِ لالچ بُوتگ۔ھما مردم کہ آھان ءَ آئی ءِ ھک نہ رس اتگ ءُ آھان ءَ آھانی لائیکی ءِ کد ءَ روزگار دیگ نہ بُوتگ ۔ھما سپاھیگ کہ چہ وتی لشکر ءَ دل پُروش اَنت۔ لالچی اَنت مردم کہ ھر وھد دست ءُ پاد جَن اَنت۔ اے پیمیں مردم تئی کار ءَ آتک کُت کنت۔اے مردماں چہ تو چیریں وڑے ءَ گوں وت ءَ ھوار کُت کن انت ءُ ایشاں چی جوان جوانیں سرپدی دشمن ءِ کش ایت کُت کن انت ۔دشمن ءِ جند ءِ لشکر ءِ توک ءَ تو بھر ءُ تھر ءِ نوبت پیداک کُت کن ئے ۔بلئے زلّوری اِنت تو چہ اے وڑیں مردماں وت ءَ باز پھریز۔ ۳: مٹ بوتگین جاسوس ھما اِنت کہ آ یک وھدے دشمن ءِ جاسوس ھم بُوتگ۔بازیں لالچ ءُ وادھاں چہ دشمن ءَ چی جُدا کُت ءُ گوں وت ءَ ھوار کُتگ۔ دوبر جاسوسی یے کُتگ جند ءِ مردمانی ھالے کشگ ءِ ھاتر ءَ دیم داتگ ۴:دشمن ءَ دوکہ ءِ توک ءَ کنگ ءِ ھاتر ءَ زلوری اِنت کہ تو وتی جاسوس ءَ دشمن ءِ نیمگ ءَ رھادگ بہ کن،آرا چی کار گیر ءُ دشمن ءَ سرپد کن۔بلئے آرا باور بہ دے کہ گپ وت سرا درکپتگ۔پد ءَ وھدیکہ آ جاسوس ءَ دشمن دستگیر بہ کنت گڑا آ دشمن ءَ دروگین ھال بہ دنت،ءُ مئے کار چی ھالاں چی جُدا بہ بنت۔دشمن ھمئے جاسوس ءِ گپاں باور بہ کنت ۔ ایشی ءِ ھاتر ءَ جاسوس ءِ ساہ ھم بُروت مسلہ نہ اِنت۔ ۵: گڈّی پش کپتگین جاسوس کہ دشمن ءِ لوگ ءِ ھال ءَ ترا سر کن اَنت، لس اے مردم اَنت کہ آھاناں دشمن ءِ لشکر ھوار بُوگی اِنت۔اسلہ پش کپتگیں جاسوس شکل ءَ چی اھمک گندگ بنت بلئے چوناھا باز چالاک بنت۔ آ ھرابیں ھالاتانی توک ءَ بنت بلئے مھکم بہ بنت۔چالاک ءُ زانت کار بہ بنت۔بھادُر ءُ نڈر بہ بنت ھر وڑیں شر ءُ گندگیں کار ءِ کنگ ءَ ساڑی بہ بنت ۔تُن ءُ گُژن سگ اِت کُت بہ کن اَنت۔ جاسوسی مردماں چی باز پھریز بہ کن پرچا کہ تو زانت کت نہ کن ئے کہ آھانی کُجام گپ راست ءُ کُجام گُپ دروگ اِنت۔آھانی چالاکی ءَ جوانین وڑے سرپد بو۔ یک جاسوسی کہ یک ھاسیں ءُ چیریں ھبری ءَ وھد ءَ چی پیسر کسّے ءَ ھال بہ دنت گڑا الّم بہ کُش ئے ءُ ھما مردم کہ پیسر ءَ ھال ءِ داتگ آرا ھم بہ کُش۔ زلوری اِنت درُستاں چہ پیش یک جنگی کمانی ءِ چپ ءُ چاگرد ءِ کُل ھال ءَ سرپد بوگی ءَ اَنت ،آئی سپاھیگانی نام ،آرا کمک کنوکانی نام۔اے کُل ھالاں ترا جاسوس ءِ دات کُت کنت دشمن ءِ جاسوسی کہ تئی سر ءَ جاسوسی ءَ کیت ،گڑا آرا ھر وڑیں لالچ بہ دے ءُ گوں وت ءَ ھوار بہ کن ءُ دشمن ءِ سر ءَ جاسوسی ءَ دیم بہ دے۔یات بہ کن یک مٹ بُوتگیں جاسوسے ترا لس مھلوک ءُ توک ءِ ھالاں دات کُت کنت۔مٹ بُوتگیں جاسوس تئی باز کار ءَ آتک کُت کنت۔

گڈّی ءَ سُن زو گُش ایت یک دانا ءُ آکلیں جنگی کمان ھما اِنت کہ آ وتی جاسوس ءَ جونیں وڑے ءَ کار گِپت کُت بہ کنت۔اسلہ جاسوس جنگ ءِ اھم تریں بھر اِنت ۔پرچا کہ سپاھیگانی جُنزگ ءُ دیم ءَ روگ کُل گوں جوانیں سرپدی ءُ ھال ءَ بندوک اَنت ۔ بس یک گپے دیگ ءَ دشمن ءِ بابت ءَ جوانیں سرپدی ابید جنگ بہ کن ئے گڑا باز تاوان ورے۔