بلوچستان ءِ دمگ قلعہ عبداللہ ءَ ناشناسیں مردماں لیویز ءِ گاڑی بمبے ءِ نشانگ کتگ-
گیشیں اھوالانی رد ءَ قلعہ عبداللہ ءَ نادرا آفس ءِ دیم ءَ لیویز پورس ءِ پٹ ءُ پولی آفسر ءِ گاڑی بمبے ءِ نشانگ کنگ بیتگ-
پٹ ءُ پولی آفسر ھما وھد ءَ نشانگ کنگ بیتگ کہ آ چہ کارگس ءَ دراتکگ لوگ ءِ نیمگ ءَ روگ ءَ بیتگ – پٹ ءُ پولی آفسر ءَ ھوار دو کارندہ سوار بیتگ اَنت-
ڈی پی او شاھد جمیل بازئی ءَ گوشتگ تراک نادرا کارگس ءِ نزیک ءَ اوشتوکیں سائیکل ءَ پِٹ بیتگ- تراک ءَ لیویز آفسر ءُ گن مین کمے زدگ بیتگ اَنت-
بلوچستان ءِ دمگ ھرنائی ءَ پاکستانی پوج ءِ آپریشن برجاہ-
ھرنائی ءِ جتا جتائیں جاہ گھڑیجی، پیر سینٹ، سپین تنگی، کوریاک، ڈل پشت ءُ آئی ءَ ھواریں دمگاں آپریشن برجاہ اِنت –
آپریشن ءَ پاکستانی پوج ءِ زمینی ءُ برزی لشکر بھر زیرگ ءَ اِنت-
دمگی مردمانی رد ءَ ھیلی کاپٹرانی سر ءَ پورسز کارندھاں سر کنگ ءَ ھوار شیلنگ کنگ ءَ اِنت-
واکداراں اے درگت ءَ ھچ اھوال دیم ءَ نیاؤرتگ اَنت-
زانگ بہ بیت پاکستانی واکداراں بلوچستان ءَ پوجی آپریشن ءِ جار پرینتگ بیتگ بلگ داں انگت ءَ لشکری بنشوناں اے درگت ءَ ھچ اھوال سر نہ کتگ اَنت-
چہ گوستگیں ماہ ءَ بلوچستان ءِ جتا جتائیں جاہ کلات، نوشکی ءُ کیچ ءِ ھواریں دمگ آپریشنانی زد ءَ اَنت اے وھداں لوگانی ماندارگاں ھوار بازیں مردم پوج ءِ دست ءَ بیگواہ بوگ ءِ ھال ھم سر بیتگ اَنت-
بھ ودی نا بوکیں چُکے ءِ نام ءَ یک نمدی یے
نبشتہ کار: اورینا پلیکسی
رجانکار: ساجد بلوچ
سیمی بھر
دی بلوچستان پوسٹ
من ترا ڈاکٹر ءِ کِرّ ءَ بُرتگ۔ اے اِنکَدَر پکّا نہ ات من چہ ڈاکٹر ءَ لھتیں سَلاہ لوٹ ات۔ آئی ءَ سر سْرّینت ءُ من ءَ پسہ دات کہ من بے سبر آں۔ آئی ءَ انگہ تک گُشت کُت نہ کنت۔ ءُ من دو ھپتگ ءِ تہ ءَ دو بر کا آں ءُ ھمے پَٹّگ ءَ ساجو باں کہ تو منی گُمان ءِ برورد ئے۔ من آئی ءَ یک اھَمکے ءِ کارست ءَ پیش دارگ ءَ واتر باں۔ ایشی ءِ دْراھیں سائنس منی کُنٹیں مجگ ءِ لائک نہ اَنت، چون یک مردے یک زالے ءَ،کہ آ یک چُکے ءِ اُمیت ءَ کنگ ءَ اِنت، پوہ بیت؟ اے گیمّار (پریگننٹ) بوت کُت نہ کنت۔ زاناں آ یک سیتے یا لیمیٹیشنے؟
زِکّین اِنت منی واستا یک سیتے گِندگ ءَ کیت, یک ھاسیں ھَکّے چوناھا۔ مرچی منی ھاتر ءَ یک لیمیٹیشنے گِندگ ءَ کیت، یک دزتنگی یے چوناھا۔ تئی جان ءِ تہ ءَ یک دگہ جانے ءِ مان بوگ ءِ بابت ءَ کمو پُرشان اِنت، وت ءَ سرپد بہ کن کہ یکے ءِ بدل ءَ دو بہ بئے۔ ساھتانی تہ ءَ ترا چہ باج برگ ءِ مارِشت ءَ سان ھم کنت، ءُ چہ اے باج برگ ءِ ھمراھی ءِ آسودگ ءَ ترا ھچ چیز ھم تکانسر نہ کنت: ناں جسدی درد ءَ تو اوپار کن ئے، ناں کار کہ تو کُربانی دے ئے، ءُ نیکہ آجوئی کہ تو یلہ ئے کن ئے۔
زاناں تو مردینے بئے یا جنینے؟ من یک جنینے بوگ لوٹاں۔ یک روچے من تئی واستا سرگْوست کنگ لوٹاں کہ انوں من کنگ ءَ آن ئے۔ من بلکل وتی مات ءِ لیکہ ءِ ھمراھداری ءَ نہ کناں، کہ آ جیڑ ایت یک جنینے ءِ گیمّار (پریگننٹ) بوگ بے بھتی اِنت۔ منی مات، وھدے کہ دلرنج بیت، گْرانیں ساھے کش ایت۔ اوہ، من تھنا بس مردینے ودی بوتین آں۔ من زان آں مئے دگنیا مردینانی واستہ مردینانی وسیلہ ءَ جوڑ کنگ بیت، آیانی زورشاھی سکّ ءَ کوھن اِنت۔ آیانی زوراکی زبان ءِ سر ءَ ھم مستری کنت۔ مردین ءِ بزانت دوئیں مردین ءُ جنین اِنت، ھلانکہ جنین یک جُتاھیں زاتے; آدمزات(مین کائینڈ) ءِ بزانت لس مردم اِنت; یکےگُش ایت مردُمکُشی(اومیسائیڈ) یک مردینے ءِ کُشگ اِنت یا یک جنینے ءِ کُشگ۔
ساکا (لیجنڈ) ءِ ھساب ءَ مردیناں وتی دگنیا وت ساچگ اتگ ءُ مانا کُتگ, اولی انسان یک مردینے آدم گُشگ بیت۔ ھئوا رند ءَ اتکگ۔ ھئوا ءِ کار ات کہ آئی ءَ وشّی ءُ گم بہ دنت۔ پینٹینگ ءِ تہ ءَ چرچ سمبائینگ بیت، ھُدا یک پیریں مردے گوں وتی دراجیں رِشّاں، بلے بھ یک زالے گوں وتی اسپیتیں موداں زانگ نہ بوتگ۔ ءُ دْراھیں بامرد مردین اَنت: پُرومتیس، کہ آئی ءَ آس پد جتگ، ءَ بگر داں آئی کارِس ءَ کہ آئی ءَ جُھد کُت کہ بال بہ کناں۔ بنیات ءَ آیاں ایسّا ھُدا ءِ چُک ءُ پاکیں ارواہ لیک ات, بوت کنت آئی ءِ ودی کنوکیں زال یک انکیوبیٹرے یا تیمّاردارے (نرسے)۔ ءُ پد ءَ ھم، یا بس ایشی ءِ سوب ءَ، جنین بوگ دلکش اِنت۔ اے ھمے ایڈوینچر اِنت کہ ھمّت دنت، ھمے گامبیل اِنت کہ بھ بے زاری نہ کنت۔ وتی دزگٹّی ءِ ھاتر ءَ تئی کرّ ءَ کنگ ءِ ھاتر ءَ باز چیز بیت اگاں تو یک جنینے ودی بہ بئے۔
بندات ءَ ترا اے یک داب ءَ دارگ ءِ واستہ جُھد کنگ لوت ایت کہ اگاں ھُدا ھست اِنت گڑا آ اسپیت مُدیں پیریں زالے ھم بوت کُت کنت یا شوکیں جِنکے ھم۔ پد ءَ ترا اے پوہ کنگ ءِ ھاتر ءَ ھمے جُھد کنگ لوٹ ایت کہ ھما روچ ءَ ودی بوکیں ھئوا ءَ سُروپے سرچِِت گُناھے نہ ات: آ روچ ءَ چے بوت یک جوانیں سوابے ات، ناپرمانی گُشگ بوت۔گڈی ءَ ترا اے پیش دارگ ءِ واستہ جھد کنگ لوٹ ایت کہ تئی دلکشیں ءُ شوکیں اَندام ءِ تہ ءَ یک اگلمندے گریوگ ءَ اِنت کہ آ گوشدارگ بہ بیت۔ یک ماتے ءِ بوگ باپارے نہ اِنت۔ اے چوناھا پرزے ھم نہ اِنت۔ اے دْراھینانی میان ءَ بس یک ھَکے۔
اے راستی ءَ دومئیگ ءِ پوہ کنگ ءِ واستا یک کوشستے۔ بوت کنت کہ تو سوبین مہ بئے بلے ترا دلپروش بوگی نہ اِنت۔ پروش دیگ ءَ چہ جنگ کنگ باز شرتر اِنت۔ چہ رسگ ءَ سپر کنگ سک باز زیباتر اِنت۔ یک رندے کہ تو باج بُرتگ یا رَستگ ئے، گڑا تو یک مزنیں ھورکی یے مار ئے۔ ھمے ھورکی ءِ پروش دیگ ءِ ھاتر ءَ ترا دو بر سپر کنگ لوٹ ایت، نوکیں مکسد جوڑ کنگ لوٹ ایت۔ ھو، من ءَ اُمیت اِنت کہ تو یک جنینے ئے۔ ءُ من ھمے اُمیت کناں کہ تو بھ نہ گُش ئے چے منی مات گُش ایت۔ من اے بھ نہ گُشتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت –
کیچ ءِ دمگ بلیدہ ءَ گلبانک اسکول ءِ بنجاھی گیٹ ناشناسیں مردماں تیرگواری ءِ نشانگ کتگ-
تیرگواری ءِ آسر ءَ بنجاھی گیٹ ءَ تاوان رس اتگ ءُ ٹنگ بیتگ-
گلبانک اسکول ءِ شنگ کتگیں درشان ءَ گوشتگ گوستگیں بیگاہ ءَ ناشناسیں مردماں اسکول ءِ گیٹ ءِ سر ءَ تیرگواری کتگ ءُ تاوان داتگ-
آئی ءَ گوشتگ زوت اے وئیلانی ھلاپ ءَ دمگی سروک ءُ علم دوستیں مردماں گپ ءُ باوست کن ایں آیوکیں بنگپ ءَ ایر کن ایں-
زانگ بہ بیت گوست ءَ بلیدہ ءَ ھم اسکول ماندارگ بیتگ اَنت کہ اود ءَ لس سرکاری پلامرزی ءَ ھستیں ٹولی لس نام ءَ ڈیتھ اسکواڈ ءِ نام ءَ زانگ بیتگ کہ آئی ءِ سر ءَ بھتام لڈگ بیتگ-
ھمے وڑ بلوچستان ءِ دمگ پنجگور ءَ ھم اے دابیں وئیل چہ سرکاری ٹولی ڈیتھ اسکواڈ ءِ نیمگ ءَ پیش اتکگ بیتگ اَنت-
روکپتی بلوچستان ءَ ایرانی لشکر ءَ سَے مردم دزگیر کتگ ءُ برتگ اَنت اود ءَ یکے ءَ را سرکاری رسانکدر ءَ ناشرکاری ءِ دروشم ءَ پیش کتگ –
اھوالانی رد ءَ روکپتی بلوچستان ءِ دمگ چھبار ءَ ایرانی چیریں ادارہ اطلاعات ءَ سَے مردم دزگیر کتگ ءُ برتگ اَنت-
آوار جنگ بیتگیں مردمانی پجار مھران گونجتی ءُ آئی ءِ برات مھر داد گونجتی ء انور ءُ زاھد پرکی ھ علی اکبر ءِ ناماں زانگ بیتگ اَنت کہ اے مردم گوستگیں ماہ ءَ دزگیر کنگ بیتگ انت ءُ انی ایشانی توک ءَ مھران پنام ء داود ءِ نام ءَ سرکاری رسانکدر ءَ پیش کنگ بیتگ-
سرکاری رسانکدر ءَ شنگ بیتگین اھوال ءَ مھران ءَ وتی جرم ءِ سر ءَ گوشتگ کہ شمس آباد ءَ ایرانی لشکر ءِ سر ءَ یک ٹولی ءَ اُرش ءَ ھوار بیتگ اِنت کہ اود ءَ دو دزگیر کتگ ءُ چار کشتگ انت-
لس اھوالانی رد ءَ اے گپ ءِ توک ءَ راستی زانگ نہ بیتگ- سرکاری رسانکدر ءَ پیش کنگ ءِ وئیل ءَ لس مردم زورانسری گوشگ ءَ اَنت-
چہ ڈیرہ بگٹی ءَ سر بیتگیں ھالانی رِد ءَ گوستگیں روچ ءَ پاکستانی پوج ءُ چیریں ادارھانی کارمنداں سیاہ آف ءَ پٹوخ ءِ میتگ ءَ بازیں لوگانی سر ءَ بیڑبرتگ-
دمگی مردماں گْوشتگ کہ پوج ءِ دست ءَ زورانسری آوار جنی ءِ نشانگ کنگ بوتگیں مردمانی سیادی چہ کرمانزی شاخ ءَ گوشگ بیگ ءَ اِنت ءُ آیانی پجّار جواھو ء بری بگٹی، جونا ء نوکاف بگٹی ناماں چہ بیتگ اَنت-
ھمے وڑ گوستگیں شپ ءَ چہ سوئی ءِ گرانی میتگ ءَ پوج ءَ بیڑبرتگ سکندر ء عجب خان بگٹی زورانسری بیگواہ کتگ-
دمگی مردماں گوشتگ کہ سر وزیر بلوچستان سرفراز بگٹی سوئی ءَ تر تاب ءَ پد زورانسری آوار جنی ءِ گیش کنگ بیتگ- ءُ سرکاری پلامرزی کنوکاں ٹولیاں گیش سلاہ دیگ بیتگ-
بلوچستان لبریشن فرنٹ ءِ جارکش ءَ شنگ کتگیں درشان ءِ تہ ءَ گْوشتگ کہ مئے سرمچاراں شال ءَ سی ٹی ڈی ءِ کارمند ءُ آواران ءَ زورگریں پاکستانی پوج دو جتاجتائیں اُرشانی نشانگ کتگ اَنت-
جارکش ءَ گْوشتگ کہ مئے سرمچاراں دو دسمبر ءَ روچ ءِ سے نیم ءَ شال ءِ دمگ قمبرانی دگ سر ءَ اوشتوکیں سی ٹی ڈی کارمندانی سر ءَ دستی بمب اُرشے کتگ، اُرش ءَ یک کارمندے ٹپی بیتگ-
جارکش ءَ گْوشتگ کہ یک دگہ اُرشے سرمچاراں گوستگیں روچ ءَ آواران ءِ دمگ جھاؤ ڈولیجی ءَ برجاھیں زورگریں پاکستانی پوج ءِ چوکی سر ءَ پیسر ءَ اسنائپر ءُ چہ نشانگ کتگ یک کارمندے کشگ ءَ پد چوکی نوکیں ءُ مزنیں سلاھاں چہ نشانگ کتگ – چریشی ءَ چہ دُژمنیں پوج ءَ گیش جانی ءُ مالی تاوان چست کنگ کپتگ-
جارکش ءَ گوشتگ کہ بلوچستان لبریشن فرنٹ ءَ اے دوئیں اُرشانی زمہ واری منّ اِتگ ءُ بلوچستان ءِ وتواجھی ءَ پوج سر ءَ اُرش برجاہ بنت-
بلوچستان ءَ ریاستی زوراکی ءُ بیگواھیں مردمانی واستا توار چِست کنوکیں باسک ڈاکٹر ماہ رنگ بلوچ ءَ 2024 ءَ بی بی سی ءِ 100 زالبولانی لڑ ءَ ھوار کتگ – چریشی ءَ سرجمیں دنیا ءَ گچینی ءُ سانمندیں زالبول منگ بنت اِنت-
ھمے وھد ءَ ڈاکٹر ماہ رنگ بلوچ ءَ وتی ھیالانی درشان کنان ءَ گوشتگ من ءَ بی بی سی ءِ 100 زالبولانی لڑ ءَ ھوار کنگ سکیں وشی یے ءُ دادے سرپد بوگ ءَ آں – اے بس ایوک ءَ منی اناں بلوچ زالبول، بیگواھیں مردمانی کھول ءُ بلوچ ھکانی باسکانی یکجاھی جد ءُ جھد ءِ پجار اِنت-
آئی ءَ گوشتگ بلوچ راج ترندیں زوراکیاں ابید انساپ ءُ انسانی ھکانی واستا جد ءُ جھد اش برجاہ داشتگ – اے منانک زیرستیں تکانی واستا اُمیت ءِ چراگ اِنت ءُ اے گپ پدر بیتگ کہ زُلم ءُ زوراکیانی ھلاپ ءَ گھگیری تمردی اِنت-
ماہ رنگ بلوچ ءَ اے داد بیگواھیں مردمانی مات ءُ بلوچ راج ءِ نام ءَ سوگات کتگ، کپ زورانسری بیگواھی، بے کانود ءَ کوش ءُ دگہ زُلمانی دیمپانیاں کنگ ءَ بے تواری ءَ ابید جد ءُ جھد ءَ دیم ءَ برگ ءَ اَنت-
آئی ءِ رد ءَ اے ماتانی ھوسلگمندی ءُ گھگیری انسانی ھکانی برجاھیں سپر ءِ واستا پھری اِنت-
آئی ءَ بی بی سی ءِ منت گہتگ ءُ گوشتگ کہ آئی ءَ مئے توار گیش برز کتگ ءُ مئے جد ءُ جھد من اتگ-
زانگ بہ بیت ڈاکٹر ماہ رنگ بلوچ، بلوچ یکجھتی کمیٹی ءِ چیردستی ءَ بلوچ ھک ءُ زورانسری بیگواھینانی ھلاپ ءَ توار چست کنگ ءَ انت کہ آئی ءِ سروکی ءَ بازیں زھرشانی ءُ لانگ مارچ کنگ بیتگ انت کہ چریشی ءَ چہ میان اُستمان ءَ جیڑہ گیش پدر بیتگ اَنت-
ایشی ءَ ھمے سال ءَ میان اُستمانی میگزیب ٹائمز ءِ نیمگ ءَ آ سد نوکتریں رھشونانی ڈول ءَ منگ بیتگ کہ پد ءَ آ نیویارک ٹائمز میگزین ءِ مراگش ءِ بھر زیرگ ءَ کراچی بالی پٹ ءَ پاکستان ءِ واکداراں داشتگ بیتگ-
ماہ رنگ بلوچ بلوچستان ءَ بیگواھیں مردمانی کھولانی واستا یک برز تریں توارے زانگ بیت اِنت ءُ چرے پرکاریانی پژدر ءَ آ سرکار ءَ درملک ءَ سپر کنگ ءَ بندش جتگ-
ماہ رنگ بلوچ ءَ گوشتگ آ اے بندشاں نا امیت نہ اِنت آ زانت کہ ریاست ءِ نیمگ ءَ اے وڑیں بندش آئی ءِ جد ءُ جھد ءُ سانمندی ءَ منگی اِنت – ماہ رنگ بلوچ ءَ اے کَول ءِ درشان کتگ کہ آ دراھیں مشکلانی دیمپانیاں کنت ءُ جد ءُ جھد ءَ برجاہ دار ایت-
اوتھل ءِ یونیورسٹی ءِ نودربرانی زورانسری آوار جنی ءِ ھلاپ ءَ گوستگیں روچ ءَ یونیورسٹی ءِ بُنجاھی دروازگ دیم ءَ نندانک داتگ کہ مروچی ھم برجاہ ءَ اِنت-
نودربرانی گوشگ اِنت کہ اے نندانک بیان بلوچ ءِ یل کنائینگ ھاتر ءَ کنگ بیگ ءَ اِنت، کہ چیزے روچ ءَ ساری چہ اوتھل بازار ءَ دگہ نودربرانی ھمراھی ءَ بیگواہ کنگ بیتگ اَنت، نندانک ءَ نودربرانی ھمراھی ءَ بیان بلوچ ءِ کھول ءُ نودربرانی مزنیں کچے ءَ ھوار اِنت-
اے درگت ءَ نودربراں اوتھل یونیورسٹی ءِ دیم ءَ برجاھیں نندانک ھند سر ءَ سمینار ءِ برجم داشتگ بیگواھیں نودربر ءِ یل کنائینگ لوٹ کتگ-
بلوچستان ءِ بنجاھی شھر شال ءَ نودربرانی زھرشانی نندانک یکشل ءَ برجاہ اِنت-
گیشیں اھوالانی رد ءَ بولان میڈیکل کالج ءِ ھاسٹلانی بندش ءِ ھلاپ ءَ مروچی ھپتمی روچ ءَ نودربرانی زھرشانی برجاہ اِنت-
زھرشانی نندانک بلوچ اسٹوڈنٹس ایکشن کمیٹی ءِ نیمگ ءَ دیگ بیتگ کہ اود ءَ گوستگیں روچاں بولان میڈیکل کالج ءِ سر ءَ پولیس ءِ بیڑ ءَ نودربرانی دزگیری ءُ پد ءَ ھاسٹلانی بندش ءِ ھلاپ ءَ کنگ بیتگ-
نودربرانی گوشگ اِنت کہ دانکہ مئے نودربرانی سر ءَ بیتگیں زوراکی ءُ ھاسٹلانی پچ بوگ المی نہ بیت اِنت مئے زھرشانی بنجل ھمے وڑ ءَ برجاہ مان ایت –
زھرشانی بنجل ءَ گوستگیں روچ ءَ یک روانکے ھم کشگ بوتگ ءُ اود ءَ نودربراں بازیں کچے ءَ بھر زرتگ ءُ ھاسٹل انتزامیہ ءُ دمگ ءِ انتزامیہ ءِ ھلاپ ءَ اوگام جتگ-
