نیو کاھان
نبشتہ کار: ابرم بلوچ
دی بلوچستان پوسٹ
افیسر ءِ ھُکم اَت منگی اَت، بلے سپائی دروازگ ءِ کُبل ءُ کڑی ءَ دست جنگ ءَ ترسگ اَت کہ اے دار ءِ کوھنین دروازگ اے گیابان ءُ ریگستان ءِ تہ ءَ ھمینکس سڑاِتگ ات دست بہ جتین بُر اِت ئِے ھاکے جوڑ بوت۔
کپیسک ءِ رپتار ءَ وتی دست ءَ دراج کنان سپائی کُنڈہ ءَ دست سک کرت ایندگہ سپائی تیار اوشتاتگ اَت انت چوشکہ بمب تراکے بیت ءُ تہ ءَ ھمے سڑتگیں اویلی کہ سدانی سال کوھنین ھنکینے گِندگ بوگ اَت ھمیشی تہ ءَ شہ اُرش بیت، بلے دست ءِ لنککانی سک بوگ ءَ گوں کڑی سِست ءُ کپت۔ کُبل ساھتے گڑی ءِ سوچِن ءِ پیم چول وران بے توار ھاکانی تہ ءَ کپت ءُ تار تار بوت۔ تُرس ءُ بیم ءَ کپیسکائی کنان سپائی اویلی ءَ کرار گام جنان ریکانی تہ ءَ بُڈین پادان یکیں کوٹی ءِ تہ ءَ پترگ ءِ جھد کنگ ءَ بوت اَنت کہ ریکانی تہ ءَ انچو بُڈ اِت بگوش ڈوزر ءُ ٹیلھانی تہ ءَ ھاک ڈوھگ ءُ اویلی ءَ مان کنگ بوتگ۔
کوٹی ءِ دروازگ یلہ اَت ءُ دروازگ ءِ پترگ ءَ افیسر دومی گام ءَ سپائی ءَ داشت ءُ پادانی دیم ءَ اشارہ کرت سپائی ھُرت چار اِت ھائن ءِ چُنڈے بزان لشی یا کارچ ءِ پرشتگیں چُنڈے بوتگ۔ افیسر پرمان دات جرم ءِ اولی (سبوت) نشانی ءِ بُت بہ کش اِت ءُ پلاسٹک ءِ لوت ءَ مان کن اِت۔ وت دیم ءَ گام کرت دیگدان ءِ تہ ءَ زنگی ئیں ٹین ءِ (کیتلی) کلی یے کپتگ اَت دپ ءُ چیرے زانگ نہ بوت ہر نیمگ ءَ کڑک اَت افیسر پد ءَ اشارہ کرت دومی سبوت سک مزنین پیشکدمی یے بچار بمب جوڑ کنگ ءَ بلکن ھمیشی ءِ تہ ءَ کیمیکل تیار اِش کرتگ۔
سبوت دست ءَ گران افیسر ترندیں گاماں پدی گاڑی ءَ سوار بوت بس کار بوت۔ سپائی یکبرے پد ءَ چکے چار اِت ءُ دل ءَ کرت اویلی ءِ دروازگ ءَ بند بہ کنت بلے اِد ءَ کس چے بُرت کنت باریں دگہ سد سال کس پد ءَ کیت اگاں ناں؟ گاڑی سیدھا چیریں ادارھانی بندیگ جاہ ءِ راہ ءَ شھر ءَ روانگ بوت ءُ دومی روچ ءَ مزمل یکبرے پد ءَ پرشتگیں ھڈ ءُ ٹپی ئیں جون ءَ افیسر ءِ دیم ءَ پیش کنگ بوت۔ افیسر پلاسٹک ءِ کلی ءُ ھائین ءِ ٹُکر برز گوات ءَ چنڈینت ءُ جُست کُرت۔ بگوش بہ من تو پیش ءِ سال ءِ دومی ماہ ءِ شمبے ءِ روچ ءَ ٹرین ءِ تہ ءَ دھماکہ ءِ پلان ھمے جاہ ءَ کرتگ کہ تئی گِس کاہان ءَ بوتگ ۔ اے ھما کلی اِنت کہ تو کیمیکل ءُ باروت تیار کرتگ ءُ اے کارچ ءَ گوں تو چنکس مردم کُشتگ؟ وتی کرتگیں درستیں ناشرکاریان بہ من ناں کہ تو مِر ئے بلے چداں زندگ نہ روئے۔
مزمل ءِ دنتان یک دومی ءَ ڈوک ورگ اَت اَنت، بے وسی ءَ یک یک ءَ سپاھانی دیم ءَ چاران ءَ اَرس ریچان بوت۔ باریں کسے افیسر ءَ بگوش اِت اے کیتلی وَ گِندگ ءَ انچوش کوھن انت ایشی ءِ زند چہ منی زند ءَ زیات بوت کنت۔ بس مزمل یکبرے پدا ھما گپ دپ ءَ در کرت واجہ من ھچ چُشیں کار نہ کرتگ۔ افیسر ءِ اشارہ ءَ گوں سپائی مزمل ءَ جولان ءَ گپت اَنت ءُ چپی درنج اِت اَنت، لٹ ءُ چیتراں گوں مزمل ھوش ءُ ساراں کپان ھیالے ءَ کپت کاہان ءِ نام ءَ پجار اِت آ چونین گِسے بوتگ کہ افیسر ءَ منی ھلاپ ءَ سبوت پول اتگ؟ آ منی پت ءِ بوتن جاہ اِنت اگاں منی پیروک ءِ بوت کنت بلے من کہ ودی بوتگ آں ءُ گدانانی تہ ءَ وتی جند ءِ زمین ءَ درامدانی وڑا یکیں گدان، گِس و من ءَ ھچ نہ بوتگ۔
افیسر ءِ کوکار ءِ توار آئی ءِ مروکیں، ژندیں روح ءِ سرا کپت۔ بگُش تو اُرش ءِ پلان کاہان ءَ وتی گِس ءَ کرتگ؟ مزمل ءِ لِلک ءِ توار ایوک بس آئی ءَ وت اِش کُت کرت، اناں واجہ من کاہان نہ دیستگ منی ردوم نیو کاہان ءَ ماجر کیمپ ءَ بوتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
