بلوچستان ءِ دمگ چاگی ءَ ناشناسیں سلاہ بنداں مال برداریں بسے اوشتارینتگ ءُ دستیگ کتگ وھدے کہ یک جتائیں وئیلے ءَ تیرگواری ءَ چہ گاڑی تاوان بوتگ اَنت۔ چہ ایشی ءَ ابید بولان ءَ پولیس ءِ چیک پوسٹ ءِ سر ءَ اُرش ءَ یک کارندھے بیران بوتگ۔
پولیس ءِ کارندھانی رد ءَ پنچ شمبے ءُ آدینگ ءِ میانجی ئیں شپ ءَ چہ شال ءَ دالبندین ءَ برنج ءُ امب ءَ لوڑیں بس راہ ءَ ناشناسیں سلاہ بندیں مردماں اوشتارینتگ۔ واکدارانی گشگ انت کہ ارش کنوکاں بس ءُ آئی ءِ کار کنوک گوں وت ءَ ناشناسیں جاھاں برتگ انت۔
دومی نیمگ ءَ چھتر ءِ دمگ ءَ بازار ءَ اوشتاتگیں مال برداریں بوزر گاڑیانی سر ءَ سلاھبنداں تیر گواری کتگ ءُ گاڑیانی ٹائر تباہ کتگ اَنت ۔
دومی نیمگ ءَ بولان ءَ گوستگیں شپ ءِ دیر ءَ ناشناسیں سلاہ بندیں مردماں بالاناری مزن شھدگ ءِ سر ءَ دوسا کراس چیک پوسٹ ءِ سر ءَ اُرش کتگ ءُ پوسٹ دستیگ کتگ ءُ سلاہ دست گپتگ اَنت۔
پولیس ءِ بنشون ءِ رد ءَ اے اُرش ءَ یک پولیس کارمندے ءِ نام حافظ عبدالرشید بیران بوتگ۔
انگت ءَ اے سئیں وئیلانی زمہ واری کس ءَ نہ زرتگ انت۔