بلوچستان ءِ جتاجتائیں دمگاں سیکیورٹی ءِ ترس ءَ کرفیو جنگ بوگ ءَ انت-
دمگی انتزامیہ ءَ سوراب ءَ سیکیورٹی ءِ جاور ھال ءِ رد ءَ 6اگست 2026 ءَ شپ ءِ 6 ءَ بگر داں 8 اگست ءَ سھب ءِ 6 ءَ کرفیو ءِ جار جنگ ءِ پرمان داتگ ءُ دکان ءُ کاروباری بنجل بند کنگ بوتگ اَنت۔
دمگی انتزامیہ ءَ درستیں شھریاں کڈنی کتگ کہ آ وتی لوگاں بے زلوری ءَ در مہ کپ اَنت ءُ سیکیورٹی ایس او پیز ءِ سر ءَ امل بہ کن اَنت۔
اے جار ءَ اے گپ پدر کتگ کہ کرفیو ءِ ھلاپ ورزی کنوکیں مردم تاوانانی زمہ وار وت بنت ءُ کانون ءِ ھلاپ ورزی کنوکیں مردمانی ھلاپ ءَ کانونی کارروائی کنگ بیت۔
یات بہ بیت گوستگیں روچاں قلات ءَ ھم کرفیو جنگ بوتگ ءُ سیکیورٹی اگدہ داراں شھریاں پرمان داتگ کہ کرفیو ءِ وھد ءَ لوگاں چہ درکپوکیں مردمانی سر ءَ تیرگواری کنگ بیت۔
ایشی ءَ چہ پیسر مستونگ ءِ دمگ کھڈکوچہ ءَ ھم کرفیو ءِ جار جنگ بوتگ وھدے کہ گوستگیں بازیں ماہاں چہ زھری ءُ نوشکی ءَ کرفیو ءِ برجاہ انت۔