بلوچ اسٹوڈنٹس ایکشن کمیٹی ءِ بُنجاھی جارکش ءَ گْوشتگ کہ یونیورسٹی کراچی ءِ پنچ بلوچ نوددبر اظھر بلوچ ء حیات، غوث بخش بلوچ ء حیات، شھزاد بلوچ ء شاھد ،انیس بلوچ ء عظیم ءُ وسیم بلوچ ء محمد امین چیریں ادارہ ءُ رینجرز ءِ نیمگ ءَ چہ کراچی ءِ دمگ گلشن اقبال ءَ برجاہ یک لوگے ءَ چہ زورانسری بیگواہ کتگ اَنت-
آئی ءَ گْوشتگ کہ گوستگیں شپ ءَ کساس دو ءَ کارندھاں کراچی ءِ دمگ گلشن اقبال ءَ یک پلیٹے ءِ سر ءَ بیڑبرتگ – نودربراں لَٹ ءُ کُٹ ءَ پد پنچیں بلوچ نودربر گوں آیانی ساماناں ھوار زورانسری وتی ھمراھی ءَ برتگ اَنت- درکانودی آوار جنگ ءَ پد اے نودربرانی ھچ وڑیں ھال نیست-
آئی ءَ دیمتر ءَ گْوشتگ کہ اشی ءَ ساری ھم کراچی یونیورسٹی ءِ ایم فل ءِ نودربر خلیل بلوچ یونیورسٹی ءِ نزیک ءَ گپتگ اَنت- اے وڑیں دگہ یک وئیلے چہ ھب ڈگری کالچ بی ایس کمیسٹری پارگ التحصیل نودربر زبیر بلوچ ء نور محمد چہ ھب ءَ ھما وھد ءَ بیگواہ کتگ وھدے آ وتی ھلاپ ءَ فورتھ شیڈول کیس ءِ گوشدارگ ءَ پد واتر ءَ لوگ ءَ روگ ءَ بیتگ-
آئی ءَ گْوشتگ کہ اظھر بلوچ ءِ سیادی چہ گوادر ءَ اِنت ءُ ص جنرل ھسٹری ءِ نودربرے، وھدے کہ آئی ءِ برات غوث بخش بلوچ بی ایس اکنامکس ءِ نودربرے -شھزاد بلوچ، کہ گوادر ءِ جھمنندیں، ماحولیاتی علوم ءِ نودربرے – انیس بلوچ کہ آئی ءِ سیادی چہ نوشکی ءَ اِنت، بی ایس فلسفہ ءِ نودربرے، وھدے کہ وسیم بلوچ کلات ءِ جھمنند اِنت کراچی ءَ بی ایس پولیٹیکل سائنس ءِ نودربرے-
آئی ءَ گوشتگ کہ اے سرجمیں مردم کراچی یونیورسٹی ءِ نودربر اَنت، شریں وانگ ءِ ھاتر ءَ وتی بُنکی دمگاں چہ درتکگ اَنت، بلے بدبھتی ءَ چہ زورانسری آوار جنی ءِ نشانگ کنگ بنت- کراچج یونیورسٹی ءِ تہ ءَ آئی ءِ کش ءُ گوراں نودربراں نشانگ کنگ ءُ آوار جنگ یک تُرسناکیں جیڑھے – اے وڑیں گامگیج ناں تھنا بلوچ نودربر ءِ زانت ءِ گوستانک ءَ تاوان کنت بلکیں آیان سک زھنی گم ءِ تہ ءَ ھم دیمپان کن اَنت-
گُڈی ءَ آئی ءَ گوشتگ کہ ما ھمگرنچیں واکدار ءَ چہ لوٹ کن ایں کہ بلوچ نودربراں تُرسینگ ءُ آیانی گوما سنگینیں رویشگ ءَ زوت بدار اَنت، سرجمیں ھپتیں بلوچ نودربراں پہ سلامتی زوت یل بہ کن اَنت ءُ سرجمیں بلوچ نودربراں پھاز ءِ دلجمی دیگ ءِ گامگیج ءَ بزور اَنت-
ھمے وڑ چار اگست 2026 ءِ شپ ساھت سئے ءَ چہ بلیدہ ءِ ھند کور پُشت ءَ پاکستانی پوج ءِ منصور ء انور آوار جتگ ءُ بیگواہ کتگ –
زانگ بہ بیت اشی ءَ ساری ھم منصور نومبر 2023 زورانسری آوار جنی ءِ نشانگ کنگ بیتگ ءُ پد ءَ دو ماہ رند جنوری 2024 ءَ یل کنگ بیتگ-