کیچ ءِ دمگ دشت ءَ پاکستانی لشکر ءِ نیمگ ءَ شھریانی زاتی ءُ واپاری گاڑی دستیگ کتگ انت کہ چریشی ءِ سبب ءَ شھریانی نیمگ ءَ زھر ء درشان-
بلوچستان ءِ دمگ کیچ ءِ چہ دشت ءَ رس اتگیں ھالانی رد ءَ گوستگیں دو روچاں پاکستانی لشکر ءَ شھریانی زاتی ءُ کاروباری گاڑیاں دستیگ کنگ ءَ انت۔
دمگی مردمانی رد ءَ فورسز ءَ تاں انوگ ءَ 30 ءَ چہ گیش گاڑی چہ شھریاں دست ءَ پچ گپتگ اَنت ءُ فورسز ءِ کارندہاں گاڑی ءِ واھنداں دلجمی داتگ کہ 14اگست ءَ پد گاڑی پد ءَ واتر کنگ بنت۔
بلے پاکستانی لشکر ءَ انگت اے گپ پدر نہ کتگ کہ شھریانی گاڑی کجام مول ءُُ مراد ءِ واستا گرگ بوھگ ءَ انت، شھریاں اے جیڑہ ءِ درشانی کتگ کہ اے گاڑی 14اگست ءِ درگت ءَ برجم داشتگیں پروگرامانی تہ ءَ کارمرد کنگ بوت کن انت۔
زانگ بہ بیت کہ سرجمیں بلوچستان ءَ اُرش ءِ ترس ءَ چہ ٹرانسپورٹر وتی گاڑی ءِ پھجارینگ ءَ دزکش بوتگ اَنت، البت اے رندی دشت ءَ پاکستانی لشکر ءِ شھریانی زاتی ءُ کاروباری گاڑی دست گرگ ءِ ھال دیم ءَ اتکگ۔