بلوچستان نیشنل پارٹی ( بی این پی) ءِ سروک ءُ بلوچستان ءِ پیسریگیں سر وزیر سردار اختر مینگل ءَ گشتگ کراچی ءَ آئی ءِ گس ءِ نزیک ءَ کارندھانی واستا باڑو ءَ زرتگیں اپارٹمنٹ ءِ سر ءَ گوستگیں شپ ءَ انٹیلی جنس ادارگاں چھاپہ جتگ۔
سردار اختر مینگل ءِ رد ءَ چھاپہ ءِ وھد ءَ اپارٹمنٹ ءَ ھستیں درستیں مردمانی موبائل پچگرگ ءُ آ لٹ ءُ کٹ کنگ بوتگ انت۔ آئی ءِ گشگ اِنت کہ رند ءَ لھتے مردم یلہ کنگ بوتگ اَنت بلے چہ لٹاں کس نہ بچ اتگ۔
اختر مینگل ءِ گشگ ءِ رد ءَ آئی ءِ منیجر ءُ یک سیکورٹی گارڈے انگت بیگواہ انت ءُ پد ءَ آرگ نہ بوتگ انت۔
آئی ءَ گوشتگ کہ اے ایوک ءَ سیکورٹی جیڑی نہ اِنت بلکیں نسلی پروفائلنگ ءِ بنیاد ءَ رہائش جھمنندی جاھاں نشانگ جوڑ کنگ، وتی مرزی ءِ رد ءَ بندیگ کنگ، زاتی موبائلانی پچگرگ ءُ جسمانی لٹ شاپ کنگ ءِ وڑیں گامگیج انسانی ھکانی سر ءَ مزنیں جیڑھے دیم ءَ آرگ ءَ اَنت۔
سردار اختر مینگل ءَ لوٹ کتگ کہ دوئیں بیگواھیں مردمانی بابت ءَ زوت سرپدی دیگ بہ بیت ءُ آ پہ سلامتی ءَ آرگ بہ بنت۔ آئی ءَ گوشتگ کہ اگاں کسے ءِ سر ءَ ھرچ وڑیں الزامے ھست گڑا پلگاری ءُ کانودی امل ءِ درچ ءَ کار کنگ بہ بیت وھدیکہ دزگیریں مردماناں سرجمیں کانودی ھک ءُ ھکّی کارروائی ءِ درچ ءَ ھوار کانونی نمائندگی پجارینگ بہ بیت۔
آئی ءَ اے ھم لوٹ کتگ کہ سندھ سرکار ءُ پاکستان پیپلز پارٹی سندھ ءَ بلوچستان ءِ مھلوک ءَ بے ترسی ءُ پسھی ءَ وت ءَ نادلگوش مہ کنت-
اختر مینگل ءِ گشگ ءِ رد ءَ اے 13 مردمانی تہ ءَ حاجی رجب ءُ احمد انگت ءَ یلو کنگ نہ بوتگ اَنت ءُ آ دگہ رند ءَ یلو کنگ بوتگ اَنت۔
انوگ ءَ تاں اے وئیل ءِ بابت ءَ سندھ ءِ سرکار، پولیس یا ھمگرنچیں ادارھاں سرکاری بیان شنگ نہ کتگ۔