چہ بلوچستان ءِ دمگ بیلہ کراس ءَ ھمے سال ءِ 9 جولائی ءَ زورانسری ءَ بیگواہ کنگ بیتگیں کماش ھیبتان ء ء مالق مری جھمنند بیلہ ءِ لاش حب سکران غریب آباد ءِ نزیک ءَ سڑک ءِ کش ءَ دزکپتگ، لاش ءِ سر ءَ لٹ ءُ کٹ ءُ تیرانی ٹپانی نشان پِر انت-
زانگ بہ بیت کہ بلوچستان ءَ پہ زور بیگواھیں مردمانی درکانودی کوشانی دزچ یکشل ءَ برجاہ انت-
دالبندین ءِ دمگ چھتر ءَ پاکستانی پوج ءِ گاڑیانی سر ءَ سلاہ بنداں اُرش ءُ ھاران ءَ البت ءُ پتکن ءِ میان ءَ بُنجاھی شھدگ سر ءَ سلاہ بندیں مردمانی ناکہ بندی ءِ وئیل دیم ءَ اتکگ-
گیشیں ھالانی رِد ءَ چاگی ءِ دمگ چھتر ءَ ناشناسیں سلاہ بندیں مردماں پاکستانی پوج ءِ گاڑیانی سر ءَ اُرش کتگ-
دمگی اِھوالکار ءِ رِد ءَ اُرشکاراں وتکاریں سلاھاں چہ تیرگواری کتگ، اِھوالکار ءِ گوشگ اِنت کہ اُرش ءَ پد تیرگواری ءِ رد برجاہ بیتگ، بلے جانی ءُ مالی تاوان ءِ درگت ءَ سرکاری نیمگ ءَ ھچ وڑیں ھال دیم نیتکگ-
دومی نیمگ ءَ ھاران ءَ البت ءُ پتکن ءِ میان ءَ بُنجاھی شھدگ سر ءَ سلاہ بندیں مردماں ناکہ بندی کتگ- اِھوالکار ءِ رِد ءَ سلاہ بندیں مردماں شھدگ سر ءَ گاڑیانی روگ ءُ آیگ پہ اداروکی داشتگ ءُ بازیں گاڑی یے پٹ ءُ پول کتگ-
دمگی اِھوالکار ءِ گوشگ اِنت کہ ناکہ بندی داں دیراں برجاہ بیتگ- چریشی ءِ میان ءَ شھدگ سر ءَ گاڑیانی لین لگ اِیتگ-
تنی وھدے اے وئیلانی زمہ واری ھچ گل ءَ نہ زرتگ اَنت-
بلوچستان ءِ بنجاھی شھر چہ شال ءَ یک ورنایے زورانسری ءَ بیگواہ کنگ ءِ وئیل دیم ءَ اتکگ ۔
شال ءِ نندوکیں صدام حسین ء ء بلال احمد ءَ یک شمبے ءِ روچ ءَ ساھت ءِ 12بج ءِ نزیک ءَ پاکستانی انٹیلی جنس کارندھاں شال شاپنگ مال ءِ نزیک ءَ دزگیر کتگ ءُ ناشناسیں جاھے ءَ برتگ ءُ ایشی ءَ پد آئی ءِ بارو ءَ ھچ اھوال دیم ءَ نیتکگ انت-
کھول ءِ گشگ ءِ رد ءَ صدام حسین پیشہ ءِ رد ءَ دکاندارے ءُ ھمے وھد ءَ لس پوشاکیں مردماں آ دزگیر کتگ ءُ برتگ۔ وئیل ءَ چہ پد آئی ءِ بابت ءَ ھچ وڑیں ھال ءُ اھوال دیگ نہ بوتگ۔
کھول ءِ گْوشگ اِنت کہ اگاں صدام حسین ءِ سر ءَ ھرچ وڑیں کیس ءُ بھتامے ھست گڑا آ کانود ءِ رد ءَ آمیدگس ءَ پیش کنگ بہ بیت اگاں نہ آ زوت یل کنگ بہ بیت ءُ آئی ءِ کھول ءِ دست ءَ دیگ بہ بیت۔
گوستگیں روچ ءَ ھزدار ءِ دمگ ساسول گورو ءَ پاکستانی لشکر ءِ نیمگ ءَ ڈرون اُرش ءَ یک کسان سالیں زھگے بیران بوتگ۔
بیران بوتگیں زھگ ءِ پجار محمد ایمن ء یار محمد ءِ نام ءَ بوتگ۔
دمگی مردمانی زھگ دمگی ھوٹل ءَ بوتگ ھمے وھد ءَ یک ڈرون اُرشے بوتگ ایشی ءِ آسر ءَ آ بیران بوتگ-
بی ایل اے شھر ءِ سر ءَ کنٹرول کنگ ءُ اُرش کنگ لوٹ ایت، پولیس ءَ شھریان ءَ پھریزی ءِ کڈنی کتگ-
شال بلوچستان پولیس ءِ بنجاھی کارگس ءَ تھریٹ الرٹ شنگ کتگ ءُ اے جیڑہ ءِ درشانی کتگ کہ شال شھر ءَ مزنیں، مھکمیں اُرشے ءِ نشانگ کت کن انت-
پولیس ءِ نیمگ ءَ چہ شنگ بوتگیں کڈنی ءِ رد ءَ بی ایل اے ءَ جتا جتائیں گلانی تہ ءَ یک کلوھے شنگ کتگ کہ 7اگست ءَ شال ءَ مھکمین اُرشانی نشانگ اِنت۔
پولیس ءِ رد ءَ گْوشگ بوتگیں کلوہ ءَ اے گپ ءِ نشانی داتگ کہ وت کُش اُرش کنوکاں ھوار 4000 بی ایل اے سرمچار اے کارروائیانی تہ ءَ بھر زور اَنت ءُ اے گل شھر ءَ وتی کنٹرول ءَ کنگ ءِ جھد ءَ کنت-
بی ایل اے ءَ ھمے وھد ءَ شھریاں چہ ھم لوٹ کتگ کہ آ وتی لوگاں چہ در مہ کپ اَنت۔
اے سرپدء نامہ ءَ پولیس ءِ درستیں سیادی داروکیں کارندھاں کڈنی کتگ کہ آ وتی دمگانی تہ ءَ سیکورٹی ءُُ ایمنی ءِ گامگیجاں گیش بہ کن اَنت، لس سُر ءُ پرانی سر ءَ نگرانی ءَ بہ کن اَنت ءُ ھرچ وڑیں ناشریں وئیل ءِ دیم ءَ دارگ ءِ ھاترا پیسر ءَ بندوبست بہ کن اَنت۔
دیمترا بلوچستان پولیس ءِ بنجاھی کارگس ءَ سیادی داروکیں ایس ایس پی ءُ ایس پیاں کڈنی کتگ کہ اے درگت ءَ کتگیں گامگیجانی رپورٹ ءَ سئے روچ ءِ تہ ءَ کارگس ءَ روان بہ دے انت دانکہ پولیس انسپکٹر جنرل بلوچستان ءِ چار ءُ تپاس ءَ پیش کنگ بہ بیت۔
اے نمدی بلوچستان پولیس ءِ مزنیں اگدہ دار، چیف سیکرٹری بلوچستان، نیکٹا، ایف سی، رینجرز ءُ اے دگہ ھمگرنچیں ادارہانی سر ءَ ھم پہ سرپدی ءُ المی گامگیج ءَ دیم دیگ بوتگ انت۔
بلوچستان ءِ دمگ چہ مستونگ ءُ کراچی ءَ سئے مردمانی زورانسری بیگواھی ءِ وئیل دیم ءَ اتکگ انت-
گیشیں ھالانی رد ءَ 24 سالی ئیں رحمت اللہ ء سائب خان کہ مستونگ ءِ نندوک انت ءُ پیشہ ءِ رد ءَ مزدورے ءُ 18 سالی ئیں سلطان ء سراج کہ نودربرے چہ پڑنگ آباد ءَ فرنٹیئر کور (ایف سی) ءِ کارندھاں یک اگست دوھزار ءُ بیست ءُ شش ءَ آوار جنگ ءَ پد بیگواہ کتگ۔ کھول ءِ گشگ ءِ رد ءَ دوئیں مردمانی دزگیر کنگ ءَ پد آھانی بابت ءَ ھچ وڑیں ھال ءُ اھوال دیگ نہ بوتگ۔
دومی نیمگ ءَ آواران ءِ گجر ءِ دمگ مشکے ءِ نندوکیں 27 سالی ئیں خلیل احمد ء جان محمد ءُ ایم فل ءِ نودربرے چار اگست دوھزار ءُ بیست ءُ شش ءَ کساس شش بج ءَ کراچی یونیورسٹی ءَ رینجرز ءُ ملٹعی انٹیلیجنس ( ایم آئی) ءَ آوار جنگ ءَ پد بیگواہ کتگ –
تمپ دازین ءِ جھمندیں بیران بوتگیں زریپ بلوچ ء عمر ءِ کھول ءَ تربت پریس کلب ءَ پریس کانفرنس کتگ ءُ گْوشتگ کہ زریپ بلوچ 27 دسمبر 2024 ءَ کُشگ بوتگ ءُ آئی ءِ لاش دور دیگ بوتگ، وھدے کہ 22 مئی 2026 ءَ ھم آئی ءِ لوگ پروشت ءُ پروش کنگ بیتگ ءُ سھر ءُ زر ءُ دگہ ساز ءُ سامان دُزگ بوتگ انت-
کھول ءِ گشگ ءِ رد ءَ نہ ایوک ءَ آھانی لوگاں بلکیں آئی ءِ دگہ گھار ءُ سیادانی لوگاں ھم تاوان دیگ بوتگ انت۔
آھاں گشتگ کہ پیسر ءَ زریپ بلوچ ءِ ہاتر ءَ اتکگ انت، نوں کئے ءِ ہاتر ءَ پیداک انت، وہدے کہ آہانی لوگ ءَ نوں مردین نیست۔
آیاں گیش کرتگ کہ 21 جولائی ءَ پد ءَ آھانی لوگانی سر ءَ چھاپہ جنگ بوتگ ءُ ارزشت داریں چیز دز کپتگ ءُ برتگ اَنت۔
پریس کانفرنس ءَ گوں تران کنان ءَ ھاندان ءِ یک جنینے ءَ گوشتگ کہ آئی ءَ را مدام دھمکی دیگ بوھگ ءَ اِنت۔ آ یک جنینے ءُ اللہ ءِ آسر ءَ زندگ انت۔ آئی ءِ گْوشگ ءِ رد ءَ آئی ءِ ناکو ءُ دگہ سیاد ءُ وارس ھم ٹارچر کنگ بوتگ اَنت ءُ سامان گاڑیانی تہ ءَ بار کنگ ءُ برگ بوتگ اَنت۔
آئی ءَ گْوشتگ کہ لوگاں چہ زرّ ءُ دگہ ارزشتی ئیں چیز ھم برگ بوتگ اَنت۔ اگاں کسے ءَ گوں آئی ءَ ھرچ وڑیں زاتی جیڑھے ھست گڑا آ آئی ءَ بہ گْوش اِیت، پرچا کہ آئی ءِ گْوشگ ءِ رد ءَ آئی ءِ لوگ ءَ ھچ وڑیں سلاہ ءُ ناجائزیں چیزے نیست۔
کھول ءَ لوٹ کتگ کہ آھاں انساپ دیگ بہ بیت، آھانی سر ءَ بوتگیں وئیلانی پٹ ءُ پول ءُ تچکیں رنگے ءَ شوھازگ بہ بیت ءُ انساپ دیگ بہ بیت-
بلوچستان ءِ بنجاےی شھر شال ءَ سیکورٹی ءِ ترسی جیڑھانی سبب ءَ بند کنگ بوتگ۔
ھالانی رد ءَ شال ءِ ریڈ زون ھر نیمگ ءَ چہ سرجمی ءَ سیل کنگ بوتگ ۔ انتزامیہ ءِ رد ءَ زرغون روڈ، انسکمب روڈ ءُ جعفر خان جمالی روڈ پہ ھر وڑیں ٹریپک ءِ روانی ءِ واستا بند کنگ بوتگ اَنت ءُ ریڈ زون ءِ نیمگ ءَ روگ ءِ راھانی سر ءَ ھم فوج ءُ دگہ فورسز ءِ ھست بوھگ گیش کنگ بوتگ انت۔
زانگ بہ بیت کہ بلوچستان ءِ گیشتریں شھراں سلاھبندیں اُرشانی رد ءَ سیکورٹی ءِ سکیں بندوبست کنگ بیتگ اَنت، وھدیکہ نوشکی ءُ قلات ءَ ھم کرفیو ءِ وڑیں جاور ھال اَنت ءُ راہ ءُ درانی سر ءَ گار بُرگ بیتگ انت ، ایشی ءِ سوب ءَ مھلوک سکیں مشکلانی آماچ اِنت۔
زانگ بہ بیت کہ ھمے سال ءِ جنوری ءَ بلوچ لبریشن آرمی ءِ آپریشن ”ھیروپ دوم“ ءِ وھد ءَ بلوچستان ءِ دوازدھیں دمگاں یکیں وھد ءَ اُرش کنگ بوتگ کہ ایشی ءِ تہ ءَ سلاہ بندیں مردم شال ءِ ریڈ زون ءَ سر بوھگ ءَ سوبین بوتگ اَنت۔ ایشی ءَ پد سرکار ءَ دگہ گامگیج چست کتگ اَنت کہ ایشی ءِ تہ ءَ ریڈ زون ءِ کش ءُ گور ءَ چار دیوالیں بندش ھوار اِنت بلے ایشی ءِ باوجود مرچی گیشتر ترندیں سیکورٹی ءِ بندوبست کنگ بوھگ ءَ اِنت۔
مولانا خلیل اللہ شھاب ءَ وتی نوکتریں درشان ءِ تہ ءَ گوشتگ کہ بلوچ چہ بْن اسل ءَ مسلمان ءِ بوتگ انت ءُ آ ترا چہ ( پاکستان ) ءَ شرتریں مسلمان انت ۔ ھما دینداری ءِ درگت ءَ کہ شما ءُ شمے رسانکدر درشان کن انت آ دین ءِ درشان کنگ ناں بلکیں دین ءِ بے ھرمتی ایں ۔
آئی ءَ دیمتر ءَ گوشتگ کہ اے بلوچ ورنا مئے چک انت ۔ اشانی مات ءُ پت ، کھول ءُ پدریچ ءَ ما شری ءَ زان ایں گڑا اشاں انڈیا یا اسرائیل ءِ ایجنٹ گوشگ ءَ تئی درشان وتی گڈی ساہ ءَ کشگ ءَ انت ۔
آئی ءَ گوشتگ کہ بلوچ مروچی وتی پادانی سر ءَ اشتاتگ ، گوستگیں ھشتاد سالاں آئی ءَ تئی دستاں ازیت سگ اتگ ، تئی کتگیں زلم ءُ زوراکیاں بلوچ مروچی لاچار بوتگ کہ جنگ بہ کنت ۔ ھمے ھاتر ءَ بلوچ ءِ دین ءُ مسلمانیت ءُ مشکوک کنگ وتگڑیں ءُ دروگیں درشان ءِ تانکہ مردم وتن دوست مہ بنت ۔
مولانا ءَ گوشتگ کہ مروچی بلوچستان ءَ سے سد ءَ گیش مانشانی مانش بے وارس گوشگ بوتگ ۔ اے چوں بے وارس انت ؟ چد ءُ مستریں زوراکی ھست کہ جنک وتی دشتار ءِ ودار ءَ انت ، پیرزال ءُ چماں کوریں مات وتی زھگ ءِ ودار ءَ انت ، آیا ھمیشانی دوستیگیں مردم ھمے مانشاں کل کنگ نہ بوتگ انت ۔
” کسے ءِ یک ووٹ ءِ دزی بیت گڑا آ پروش ایت ءُ ماندار ایت بلے کسے ءِ ورنائیں بچ بیگواہ انت ءُ آ ھچ مہ گش ایت ءُ بہ نند ایت ۔ ھنچیں مردم ھم ھست کہ بیست سالیں زورانسری آوار جنگ ءُ بیگواہ کنگ بوتگ انت ۔ اشاں ابید ھم ما ھچ مہ گش ایں “
خلیل اللہ شھاب ءَ گوشتگ کہ مروچی بلوچ ورنایانی تہ زانت اتکگ ، آ ترا ھچ تکاں نہ من ایت ۔ تئی ءُ تئی استان ءَ نہ من ایت ۔ تئی پروجکٹس ءُ بلوچستان ءِ نام ءِ سر ءَ دیگ بوتگیں پیکجاں نہ زور ایت ءُ اے زوراکیانی دیم ءَ ترا پروش دنت ۔
بلوچ یکجھتی کمیٹی (بی وائی سی) ءَ چہ پنجگور ءَ سیادی داروکیں دو زورانسری بیگواھیں مردم، سلمان بنگلزئی ءُ عطااللہ بلوچ، درکانودی کوش ءَ ایر جنان ءَ گْوشتگ کہ دوئیں وئیلاں بلوچستان ءَ زورانسری، لٹ ءُ کُٹ درکانودی کوش ءِ برجاھیں دْرچ ءَ پیشدار اِیت-
بی وائی سی ءِ رِد ءَ پنجگور ءِ دمگ خداآبادان ءِ جھمنندیں سی ءُ سئے سالی ئیں دکاندار سلمان بنگلزئی ء عبدالنبی بنگلزئی ءَ عیدالفطر 2026 ءِ چیزے روچ ءَ پد زورانسری بیگواہ کتگ- گل ءِ گوشگ اِنت کہ آ باز ماہ ءَ تاں درکانودی آوار جنی ءُ آزارجاھاں ِبیتگ، چریشی ءَ پد سی ءُ یک جولائی 2026 ءَ پنجگور ءِ دمگ ءَ آئی ءِ تیرسُپتگیں لاش دزکپتگ-
درشان ءِ تہ ءَ گوشگ بیتگ کہ سلمان بنگلزئی وتی کھول ءِ لاپ دیوک ءُ مھنتی دکاندارے بیتگ، آ کھول ءَ چہ اناگاہ ءَ سستگ- کھول ءِ باز وھد ءَ تاں آئی ءِ واتری ءِ راھچار بیتگ اَنت، بلے آئی ءَ وتی دوستانک ءِ لاش چست کنگ کپتگ-
ھمے وڑ بی وائی سی ءَ گْوشتگ کہ ھُزدار ءِ جھمنندیں سی ءُ پنچ سالی ئیں عطاءاللہ بلوچ ء فقیر جان بلوچ بیست ءُ چار مارچ 2026 ءَ چہ پنجگور ءَ آئی ایس آئی، سی ٹی ڈی ءُ ایم آئی ءِ کارندھاں آوار جتگ ءُ زورانسری بیگواہ کتگ- گل ءِ رِد ءَ آ کساس سے ماہ ءَ تاں درکانودی آوار جنی ءُ لَٹ ءُ کُٹانی نشانگ بیتگ، چریشی ءَ پد بیست ءُ یک جون 2026 ءَ پنجگور ءَ آ درکانودی کُشتگ-
بی وائی سی ءِ گْوشگ اِنت کہ عطاءاللہ بلوچ ءَ کھول ءَ سے ماہ ءَ تاں اُمیت ءُ تُرس ءِ میان ءَ زند گوازینتگ، وھدے کہ یکشل ءَ درکانودی جاوراں وت یک گمے جوڑ بیتگ-
گل ءَ گْوشتگ کہ سلمان بنگلزئی ءُ عطاءَاللہ بلوچ ءِ وئیل انسانی ھکانی اے سنگینیں ھلاپ ورزیانی منانک اِنت کہ دْراجیں مدتے ءَ چہ دمگی ءُ میان اُستمانی ھساب ءَ دلپدردی درشان کتگ-
بی وائی سی ءَ اکوام متھدہ، میان اُستمانی انسانی ھکانی گل ءُ میان اُستمانی مردماں چہ لوٹ کتگ کہ آ بلوچستان ءَ زورانسری آوار جنی ءُ درکانودی کوش ءِ وئیلاں گامگیج بزور اَنت زمہ واراں جُست بگر اَنت اے وئیلانی ھلاس کنگ ءِ ھاتر ءَ جوانیں گامگیجے بزور اَنت-
