TBP Balochi

آوار جنوک زھور جمالزئی ءِ زلم ءُ زوراکی برجاہ انت، اسماء جتک ءِ پھزیری ءِ لوٹ ءَ لوٹ ءَ لھتے کلاکاں پد آئی ءِ پت کشگ بوتگ-

چہ ھزدار ءَ سیادی داروکیں بی بی اسماء جتک بلوچ ءَ ویڈیو بیانے شنگ کتگ ءُ گْوشتگ کہ آوار جنوک زھور جمالزئی انگت ءَ آئی ءَ را بیھار دیگ ءَ اِنت، وھدے کہ گْوشگ بیتگیں گل ءَ آئی ءِ پت ءُ براتانی کُشگ ءِ بیھار داتگ۔

اسماء بلوچ ءِ گْوشگ اِنت کہ اے وئیل ءَ پد ھم آوار جنوکانی ھلاپ ءَ ھچ وڑیں کارروائی کنگ نہ بوتگ ءُ آوار جنوک انگت ءَ آزاتیں رنگے ءَ تَر ءُ گرد کنگ ءَ اَنت۔

زالبول ءِ گشگ ءِ رد ءَ آوار جنوک زھور جمالزئی ءُ آئی ءِ گل ءَ بیھار داتگ کہ بوت کنت ما آئی ءَ پد ءَ آوار بہ جنیں۔ اگاں سوبائی سرکار ءُ دمگی سردار آئی ءَ انساپ مہ دنت ءُ ملزم ءِ ھلاپ ءَ سکیں کارروائی نہ کنگ نہ بیت گڑا لاچار بہ ایں زمہ واری بلوچستان ءِ سر وزیر سرفراز بگٹی ءُ بلوچستان ءِ پیسریگیں سر وزیر ءُ انوگیں صوبائی اسمبلی ءِ باسک سناء اللہ زھری ءِ سر ءَ.بیت انت-

بلے نوکیں ھالانی رد ءَ خضدار ءَ مرچی سلاہ بندیں مردماں تیرگواری کتگ ءُ آئی ءِ پت عنایت اللہ جتک کشتگ۔

یات بہ بیت کہ اے جنین خضدار ءِ نندوک اِنت ءُ 5 فروری 2024 ءَ پولیس لائن خضدار ءَ چہ ”ڈیتھ اسکواڈ“ نامیں سلاہ بندیں گلے ءَ آوار جتگ ءُ ایشی ءِ ھلاپ ءَ سرجمیں بلوچستان ءَ زھرشانی ءُ روانک کشگ بوتگ اَنت۔

اے ڈیتھ اسکواڈ بازیں سالاں چہ بلوچستان ءِ پیسریگیں سر وزیر ثنا اللہ زہری ءِ سروکی ءَ پرکار اِنت ءُ آوار جنگ ءِ مستریں ملزم زھور جمالزئی ءُ آئی ءِ برات زہری ءُ آئی ءِ کش ءُ گوراں اے ڈیتھ اسکواڈ ءِ سروکی ءَ کنگ ءَ اَنت۔

سال 2024 ءِ وئیل ءَ پد پولیس ءَ زھرشانی ءِ سوب ءَ اسماء جتک یل کنائینتگ ءُ بلوچستان سرکار ءَ ھم آوار جنوکانی ھلاپ ءَ کارروائی ءِ جار جتگ بلے آوار جنوک دزگیر کنگ نہ بوتگ اَنت۔

بلوچستان ءَ زورانسری آوار جنی ءِ بگیری ءَ برجاھیں وائس فار بلوچ مسنگ ءِ ماں شال پریس کلب ءِ دیم ءَ برجاھیں زھرشانی گدان ءَ مروچی 6316 روچ سرجم بوتگ انت ۔

وی بی ایم پی ءِ سروک نصراللہ بلوچ ءَ گوشتگ کہ گل ءِ نیمگ ءَ زورانسری آوارجنگ بوتگیں رافیعہ بی بی ، ثانیہ ءُ جوریہ ءِ کیس بیگواھیں مردمانی ھاتر ءَ اڈ دیگ بوتگیں کمیشن ءِ کارگس اسلام آباد ءَ سوبائی وزیر ضیا لانگو ءُ بلوچستان ھکومت ءِ ہوم ڈیپارٹمنٹ ءُ بلوچستان چیپٹر ءِ بیگواھیں مردمانی کمیشن ءِ ڈپٹی رجسٹرار عبدالحمید ءَ داتگ انت ۔

آئی ءَ گوشتگ کہ اے کیسانی دیگ ءِ من ءُ مول ھمے ادارھ دلگوش گور کنائینگی انت ءُ زالبولانی زوت یل ءِ کنگ ءِ لوٹ کنگ انت ۔

زانگ بہ بیت رافیعہ بی بی ، ثانیہ ءُجوریہ بلوچ کہ نیچاری ٹک ءَ سیادی دار انت آ سی جولائی ءَ نیمروچ ءِ سے ءَ چہ مستونگ ءِ لک پاس ءَ ایپ سی ءِ کارمنداں آوار جتگ ءُ بیگواہ کتگ انت ۔

آیانی کھول ءِ رد ءَ تنی وھدی آیانی درگت ءَ ھچ وڈیں ھال نیست ءُ ناکہ آیانی آوارجنی ءُ سوب گوشگ بوتگ ۔

نصراللہ بلوچ ءَ امیت داشتگ کہ بیگواھیں مردمانی کمیشن ءُ سوبائی سرکار زالبولانی یل کنگ ءَ وتی کرد ءَ پیلو کن انت ۔ آئی ءَ گوشتگ کہ اگاں اے زالبولانی سرا ھر وڈیں درکانودی الزام ءِ ھست گڈا دیم ءَ آرگ ءُ آمیدگس ءَ پیش کنگ بہ بنت ءُ آیانی کھول ءِ بے باوری ھلاس کنگ بہ بیت ۔ َ

چہ کراچی ءَ پاکستانی پوج ءِ دست ءَ بیگواہ کنگ بیتگیں دادشاہ بلوچ ءِ گْوھار فوزیہ بلوچ ءَ وتی تامربندے ءَ گوشتگ کہ منی برات ءِ زوریں بیگواھی ءَ 105روچ سرجم بیتگ۔ بلے انگت آئی ءِ بابت ءَ مارا ھچ سرپدی دیگ بوگ ءَ نہ انت۔

فوزیہ بلوچ ءَ گوشتگ کہ مارا لھتے روچ بیت کہ ما یکشل ءَ ماڑی پولیس تھانہ ءَ روگ ءَ ایں دانکہ منی برات ءِ بیگواھی ءِ ایف آئی آر نبشتگ کنگ بہ بیت۔ بلے برے یک گپے کن اَنت ءُ ایف آئی آر ءَ نبشتہ نہ کن اَنت۔ ما آمیدگس ءَ شتگ ایں مارا گوشگ بیتگ کہ پیسر ءَ ایف آئی آر نبشتہ بہ کن اِت۔ بلے مرچی یکبرے پد ءَ ما آمیدگس ءِ پرمان ءِ رد ءَ شتگ ایں بلے مارا داں یک ادارے ءَ نندگ ءَ پد ھمے گوشگ بیتگ کہ ایس ایچ او ساڑی نہ اِنت سھب ءَ بیا اِت۔

فوزیہ بلوچ ءَ گوشتگ کہ ما مدام کانود ءِ پابندی کتگ۔ اگاں ماں کانود مہ منّ اتیں گڑا یکشل ءَ پولیس ءِ گور ءَ نہ شُت این ءُ آمیدگس ءِ دروازگ نہ ٹک اِت۔ ما تھنا ھمے لوٹ ایں کہ منی براس کانود ءِ رد ءَ آمیدگسءَ پیش کنگ بہ بیت۔ بلے ریاستی ادارھانی رویشت وت بازیں جست ودی کنگ ءَ اَنت۔ منی براس مئے چمانی دیم ءَ سی ٹی ڈی ءِ کارمنداں چہ گس ءَ آوار جتگ ءُ برتگ۔ بلے داں مرچی ھم نا کہ آ آمیدگس ءَ پیش کنگ بیتگ ءُ نا کہ آئی ءِ بابت ءَ مارا سرپدی دیگ بیتگ ءُ ناکہ ایف آئی آر نبشتگ بوگ ءَ اِنت۔

فوزیہ بلوچ ءَ گوشتگ کہ اگاں منی براس دادشاہ بلوچ ءَ چونیں ھم تاوانے بیت آئی ءِ زمہ وار درسیں ادارہ ءُ ریاست بیت کہ آمیدگس ءِ پرمان ءَ ابید ایف آئی آر نبشتہ کنگ ءَ نہ آں۔

آئی ءَ گوشتگ کہ ما بے توار نہ ایں ما پہ وتی براس ءِ آجوئی ءَ کانود ءِ رد ءَ جھد ءَ برجاہ داریں۔ مارا دگانی سر ءَ درکپگ ءَ لاچار مہ کن اَنت۔ راھبند ءُ کانود ءِ پاسداری کنگ بہ بیت۔ مردمانی زوریں بیگواھی ھلاس کنگ بہ بیت۔

پاکستان ءِ راجی سوت ءِ واستا پرچا نہ اوشتاتگے؟ نودربر دوبر بھر زورگ ءَ پت ءُ ماتانی سوگندگری ءِ لوٹ-

شال ءَ نیشنل یونیورسٹی آف سائنس اینڈ ٹیکنالوجی ءِ کیمپس ءَ پاکستانی سوت ءِ وھد ءَ نہ اوشتگ ءُ سوت نہ جنئگ ءِ سبب ءَ 35 ءَ چہ گیش نودربر چہ یونیورسٹی ءَ درکنگ بوتگ اَنت۔

شال ءَ نندوکیں وکیل ءُ انسانی ھکانی باسک عمران بلوچ ءَ سوشل میڈیا ءَ وتی یک پوسٹے ءِ تہ ءَ گْوشتگ کہ نیشنل یونیورسٹی آف سائنس اینڈ ٹیکنالوجی ءِ شال کیمپس ءَ پاکستانی سوت ءِ مراگش ءِ وھد ءَ 35 ءَ چہ گیش نودربراں پاکستانی سوت ءِ مراگش ءَ نہ اوشتاتگ انت ، ایشی ءَ پد آ چہ یونیورسٹی ءَ درکنگ بوتگ اَنت۔

وکیل ءِ گشگ ءِ رد ءَ سانمندیں نودربراں بلوچ ءُ در بلوچ دوئیں ھوار اَنت وھدے کہ نودربرانی یونیورسٹی ءَ واتر بوھگ ءِ ھاترا چہ آھانی مات ءُ پتاں ھاسیں حلف نامہ لوٹگ بوتگ۔

آھانی گشگ انت کہ یونیورسٹی انتزامیہ ءَ پت ءُ ماتاں ءَ کڈن کتگ کہ آ نودربراں دوبر داکلہ ءِ ھاترا ھلف نامہ جما بہ کن انت۔

بلے اے درگت ءَ نیشنل یونیورسٹی آف سائنس اینڈ ٹیکنالوجی ءِ انتزامیہ ءِ نیمگ ءَ سرکاری لیکہ دیم ءَ نیتکگ انت۔

بلوچستان ءِ بنجاھی شھر شال ءُ گوادر ءَ دو مردم یل کنگ بیتگ انت-

بلوچ اسٹوڈنٹس آرگنائزیشن ءِ چیئرمین جیئند بلوچ کہ سیمی رند ءَ پاکستانی لشکر ءَ چَہ شال ءَ زورانسری بیگواہ کتگ ات ۔

بلوچ اسٹوڈنٹس آرگنائزیشن ءِ جارکش ءِ رد ءُ 24 ءُ 25جولائی ءِ میانجی ئیں شپ ءَ شال ءِ اسپینی روڈ ءِ دمگ ءَ چہ وتی گس ءَ جیئند بلوچ آوار جنگ بیتگ۔

بی ایس او ءِ گشگ اِنت کہ ایشی ءَ پد نہ گل ءَ ءُ نہ آئی ءِ کھول ءَ دہ روچ ءَ آئی ءِ بابت ءَ ھچ وڑیں سرپدی دیگ بوتگ کہ اے وھد ءَ آ بیگواہ بوتگ۔

زانگ بہ بیت کہ جیئند بلوچ پیسر ءَ ھم دو رند ءَ زورانسری بیگواھی ءِ آماچ بیتگ۔ اولی رند ءَ پاکستانی لشکر ءَ آئی ءِ پت کیوم بلوچ ءُ برات حسنین بلوچ گوں زورانسری بیگواہ کتگ، البت وئیل جاہ ءَ آیگ ءَ پد جیئند بلوچ ءُ آئی ءِ پت یل کنگ بیتگ ات انت۔

جیئند بلوچ ءِ کستریں برات حسنین بلوچ ءِ زوراکیں بیگواھی ءَ پد آئی ءِ دزگیری جتاجتائیں کیسانی تہ ءَ پدر بوتگ ءُ گوستگیں ھشت سالاں آ کراچی ءَ بندیگ اِنت۔

بی ایس او ءِ جارکش ءَ گیش گْوشتگ: شال زون ءِ آرگنائزر یونس بلوچ کہ 25 جولائی ءَ چہ شال ءَ دزگیر کنگ بیتگ انگت ءَ دیم ءَ آرگ نہ بیتگ، جارکش ءَ آئی ءِ زوت یلہ کنگ ءِ لوٹ کرتگ۔

ھمے وڑ ءَ چہ گوادر ءَ گوستگیں ماہ ءَ آوار جنگ بیتگیں عارف ء یاسین جھمنند دشت شولیگ گوستگیں دو روچ ءَ پیش یل کنگ بیتگ ءُ وتی لوگ ءَ سر بیتگ-

بلوچستان ءِ دمگ دالبندین ءَ تجارتی راہ ءِ سر ءَ یک مزنیں پُلے تراکے ءَ گوں تباہ کنگ بوتگ ءُ سلاہ بندیں اُرش ءَ فورسز ءُ تجارتی گاڑی نشانگ جوڑ کنگ بوتگ اَنت۔

مرچی سھب ءِ وھد ءَ ناشناسیں مردماں شال ءُ تپتان ءِ تجارتی راہ ءِ سر ءَ یک مزنیں پُلے ءِ سر ءَ دالبندین ءِ جوجکی ءَ یک مچ ءِ ھند ءَ تراکناکیں شورواں گوں تباہ کتگ ا۔ چہ ایشی ءَ ابید ھمے جاہ ءَ سلاہ بندیں اُرش ءَ تجارتی گاڑیانی کاروان ءُ آیانی سیکورٹی نشانگ جوڑ کنگ بوتگ انت۔

بنشون ءِ رد ءَ اے اُرش ءَ لشکر ءَ تاوان رس اتگ ءُ تجارتی گاڑی ھم تاوان بوتگ اَنت بلے واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

گوستگیں بیست ءُ چارکلاکانی تہ ءَ دالبندین ءَ 5 اُرشانی تہ ءَ پاکستانی لشکر ءُ تجارتی گاڑی نشانگ جوڑ کنگ بیتگ اَنت ۔ اے اُرشانی تہ ءَ فورسز ءِ گاڑی ءَ ھوار تجارتی گاڑی تباہ بوتگ اَنت ءُ واکداراں اے گپ ءِ پدرائی کتگ کہ پولیس ءِ کارندہ ءَ ھوار سئے کارندہ ٹپیگ بوتگ اَنت۔

اُرشانی وھد ءَ سلاھبنداں دو ڈرائیور ءُ یک مزنیں گاڑی یے برتگ ۔

انگت ءَ اے اُرشانی زمہ واری کس ءَ نہ زرتگ، بلے بلوچ لبریشن آرمی ءَ جار جتگ کہ آ دگہ ھاسیں شاھدگانی سر ءَ کنٹرول داشتگ، ایشانی تہ ءَ شال ءُ تپتان ءِ راہ ھم ھوار اَنت، وھدے کہ ”زرکاری بندش“ ءِ چیر دستی ءَ نزیک ءَ دو سد گاڑی نشانگ جوڑ کنگ بوتگ اَنت۔

بلوچستان ءِ دمگ چاگی ءَ شال ءُ تپتان ءِ بیپاری راہ ءِ سر ءَ واپاری گاڑی ءُ آھانی سیکیورٹی کارندھاں دگہ سَے اُرشانی دیمپانی کنگ بوتگ انت۔ اُرشانی تہ ءَ یک گاڑی یے سوچگ بوتگ ءُ دومی گاڑی اُرش کنوکاں برتگ ءُ دو ڈرائیور ھم سلاہ بندیں مردماں دزگیر کتگ انت۔

مروچی سھب ءَ دالبندین یک مچ ءِ دمگ ءَ سلاہ بندیں مردماں کاروباری گاڑیانی کاروان ءُ آئی ءِ سیکورٹی کارندہ نشانگ جوڑ کتگ اَنت۔ اے اُرش ءَ لشکر ءِ دو گاڑی سک باز تاوان بوتگ اَنت ءُ کارندہ بیران ءُ ٹپیگ بوتگ اَنت۔

اے کاروان دگہ سئے اُرشاں نشانگ جوڑ کنگ بوتگ کہ ایشی ءِ آسر ءَ بازیں گاڑیاں تاوان رس اتگ، وھدے کہ اے اُرشانی تہ ءَ سندک پروجیکٹ ءِ کاروان ھم نشانگ جوڑ کنگ بوتگ اَنت۔

بنشون ءِ رد ءَ سلاہ بندیں مردماں دالبندین نوکچاہ ءَ شاھدگ ءِ سر ءَ کنٹرول ءُ سنیپ چیکنگ برجاہ داشتگ ءُ یک مزنیں گاڑی یے ءَ را سوچگ بوتگ ءُ دومی گاڑی ءِ ٹائر بریسٹ کنگ بیتگ اَنت۔ دومی نیمگ ءَ چار سر ءَ گاڑی ءُ آھانی سیکورٹی نشانگ جوڑ کنگ بوتگ کہ ایشی ءِ آسر ءَ ڈی ایس پی ءَ ھوار دو پولیس کارندہ ٹپیگ بوتگ اَنت۔

دیمتر ءَ چھتر ءَ سلاھبنداں سیندک پروجیکٹ ءِ گاڑی ءُ واپاری گاڑیانی دو کاروان ءِ سر ءَ اُرش ھم کتگ ۔ بازیں گاڑی ءَ را تاوان رس اتگ ءُ یک گاڑی یے سلاہ بندیں مردماں دستیگ کتگ انت۔

ھالانی رد ءَ سلاہبنداں اُرشانی وھد ءَ دو ڈرائیور ھم دزگیر کتگ ءُ گوں وت برتگ انت۔

انگت ءَ اے اُرشانی زمہ واری کس ءَ نہ زُرتگ، بلے بلوچ لبریشن آرمی ءَ شال ءُ تپتان روٹ ءَ ھوار دگہ گچینی شھدگانی سر ءَ کنٹرول کنگ ءِ جار جتگ، وھدے کہ ”زرکاری بندش“ ءِ چیر دستی ءَ دو سد ءِ نزیک ءَ گاڑی نشانگ جوڑ کنگ بوتگ اَنت۔

چاگی ءَ دمگی واکداراں ھستیں وھد ءَ جاورانی نگیگی ءِ پژدر ءَ دمگی مردم ھکم داتگ انت کہ ھر وھد ءَ پجار کارڈ ءَ بہ زور انت ۔

دالبندین ءِ اسسٹنٹ کمشنر ءِ نیمگ ءَ شنگ بوتگیں ھکم نامہ ءَ ھمے گوشگ بوتگ کہ سپر ءِ وھد ءَ دمگی مردم پجار کارڈ ءَ بہ زور انت وھدیکہ چک ھم بی پارم بہ زور انت تاکہ زرورت ءِ وھد ءَ ھما ادارھانی دیم ءَ پیش بہ دار انت ۔

دمگی واکدار ءَگوشتگ کہ درسیں ٹرانسپورٹر، ھوٹل ، مھمانجل ، سرکاری ءُ بے سرکاری ریسٹ ھاوس ءِ واھند ، کرائی گس ، دکانی دیوکیں مردم چہ ھر مردم ءَ پجار کارڈ یا پاسپورٹ ءَ بہ گر انت ۔

ھکم نامہ ءَ گوشگ بوتگ کہ بید پجار کارڈ ءَ ھچ کس جاہ دیگ مہ بیت اشی ءِ بگیرداری کنوکاں ترندیں کانودی سزا دیگ بیت ۔

دمگی واکدار ءَ دمگی مردم ھکم داتگ انت کہ آ مئے گوم ءَ ھمراہ داری بہ کن انت ءُ اشی ءِ سرا امل بہ کن انت ۔

چاگی ءَ اے ھکم نامہ ھنچیں وھدے ءَ دیگ بوتگ کہ اے دمگ بلوچ آجوئی لوٹوکانی نیمگ ءَ دگ بندی ، پاکستانی پوج ءِ سرا ارش ، مادن بروکیں گاڑیانی سرا ارشانی تہ ءَ گیشی اتکگ ۔

بلوچستان ءِ جتاجتائیں دمگاں پاکستانی پوج ، مڈی بروکیں گاڑیانی سر ءَ اُرش وھدے کہ پولیس چیک پوسٹ ءِ سر ءَ اُرش ءَ پد سب انسپکٹر دزگیر کنگ بیتگ-

اِھوالکار ءِ رِد ءَ چاگی ءَ تفتان ءِ سیمسر ءَ چہ آؤکیں مال کشیں گاڑیانی کاروان سر ءَ یک مچ ءِ نزیک ءَ ناشناسیں اُرشکاراں تیرگواری کتگ، چریشی ءِ بازیں گاڑیاں تاوان رس اِتگ – سلاہ بندیں مردماں پوج ءِ گاڑیانی سر ءَ راکٹ ءُ دگہ سلاھاں چہ اُرش کتگ چریشی ءِ آسر ءَ پوج ءِ کارندھاں مزنیں کچے ءَ جانی تاوان چست کنگ ءِ ھال اِنت-

ھمے وڑ لسبیلہ ءَ ناشناسیں سلاہ بندیں مردماں نمی پولیس چیک پوسٹ ءِ سر ءَ اُرش کتگ اود ءَ ساڑی کارندہ دزگیر کتگ اَنت-

اِھوالکار ءِ رِد ءَ اُرشکاراں چیک پوسٹ ءَ چہ سرکاری سلاہ ءُ موٹر سائیکل وتی ھمراھی ءَ برتگ اَنت، وھدے کہ چیک پوسٹ ءِ مستر، سب انسپکٹر گلاب ھم وتی ھمراھی ءَ برتگ وھدے کہ آ دگہ پولیس کارندہ یل داتگ اَنت-

اھوالکار ءِ رد ءَ گوستگیں روچ ءَ ھزدار ءِ دمگ لاکریان ءَ سلاہ بندیں مردماں پاکستانی پوج ءِ پنچ گاڑیانی کاروانے ءِ سر ءَ تُرندیں اُرشے کتگ۔
اُرش ءِ آسر ءَ مزنیں کچے ءَ جانی تاوان ءِ گمان اِنت-

ھالانی رِد ءَ مروچی ھپت ءُ نیم ءَ سوراب ءَ بائی پاس ھند ءِ سر ءَ پاکستانی پوج ءِ کاروان ءِ سر ءَ سلاہ بنداں تُرندیں اُرشے کتگ-

اِھوالکار ءِ رِد ءَ کاروان ءَ ھوار سئے پوجی گاڑی اُرش ءِ نشانگ ءَ اَتکگ اَنت چریشی ءِ آسر ءَ بازیں کارندھے بیران ءُ ٹپی بوتگ اَنت-

ھمے وڑ سوراب ءِ ھند گدر ءَ سی پیک دگ ءَ نیمروچ ءَ پاکستانی پوج ءِ دو گاڑیانی کاروان ءِ سر ءَ سلاہ بنداں اُرش کتگ اُرش ءِ آسر ءَ یک گاڑی ءَباز تاوان رس اِتگ ءُ گاڑی ءَ سواریں کارندہ بیران ءُ ٹپی بیتگ اَنت-

تنی وھدے سرجمیں وئیلانی زمہ واری ھچ گل ءَ نہ زرتگ اَنت-

ندر پہ کامریڈ شھناز ءِ نام ءَ

شائر: سمیر لال

دی بلوچستان پوسٹ

آجوئی ءِ چموکیں شھناز مئے
آجوئی ءِ وشیں سھب ءِ بلوکیں شھناز مئے

جنگانی ملپداں رودان انت شھناز مئے
پہ لجوزیں دژمن ءِ تیر شان انت شھناز مئے
راج دپتر جنگانی کمان انت شھناز مئے
چو ھَور ءُ ھار ءَ شلوکیں انت شھناز مئے

بولان ءُ ساجی مھکمیں ھسار انت شھناز مئے
آجوئی ءِ وشیں ساز ءُ زیمراں توار انت شھناز مئے
تمپ ءِ ملپداں رُستکیں بھار انت شھناز مئے
پہ وشیں منزل ءَ گوں توکل ءَ روکیں شھناز مئے

بلوچستان گُلیں بیرک ءِ ھر چہ رنگیں شھناز مئے
گوں راج ءِ دژمن ءُ بدواہ جنگیں شھناز مئے
کاھان ءُ بارکان ءُ بولان ءِ ترنگیں شھناز مئے
ما ءُ پند بورگ ءِ پہ توکل ،دژمن ءِ کشوکیں شھناز مئے