TBP Balochi

نوشکی ءَ استاد فرید احمد بادینی ءِ یل کنائینگ ھاتر ءَ بی وائی سی ءُ آئی ءِ کھول نیمگ ءَ چہ میر گل خان نصیر لائبریری ءَ چہ زھرشانی روانک کشگ بیتگ، روانک نواب اکبر بگٹی ءِ دگ ءَ چہ روان پریس کلب نوشکی ءَ سر بیتگ-

زھرشانی کنوکاں استاد فرید احمد بادینی ءُ دگہ بیگواھیں مردمانی یل کنائینگ ھاتر ءَ ناراہ جنگ بیتگ- روانک ءَ زالبول، چکاں ھوار ورنا ءُ سیاسی پارٹیانی باسکاں بھر زرتگ-

زھرشانی روانک ءَ چہ استاد فرید احمد ءِ جنک لبانہ بادینی، بیبرگ بلوچ، مابین بلوچ، کامریڈ امین بلوچ، نیشنل پارٹی ءِ فاروق بلوچ، بی این پی ءِ میر خورشید جمالدینی، مولانا زکریا عادل، جی ٹی اے ءِ ظاھر بلوچ، مشتاق بلوچ، ماہ پارہ بلوچ ءُ دگراں تران کتگ-

آیاں گوشتگ کہ زورانسری آوار جنی ءِ تہ ءَ گیشی دلپدردی درشان کتگ استاد فرید احمد ءَ زوت یل کنائینگ لوٹ کنان ءَ گْوشتگ چاگرد ھم بلوچستان ءَ مُھر نہ اَنت ، استاد فرید دل نادُراھی ءُ بلڈ پریشر نادُراہ ءَ اِنت آئی ءِ یک ماھے ءَ چہ زورانسری آوار جنی ءَ چہ کھول ءِ آئی زند درگت ءَ چہ تُرس ودی بیت- آیاں کڈن کتگ کہ اگاں یک ھپتگے ءِ تہ ءَ استاد فرید احمد یل کنگ نہ بیت گُڑا راجی شھدگ سر ءَ بے مدت واستا نندانک دیگ بیت-

بلوچستان ءِ دمگ پنجگور ءَ پجّار نہ بیتگیں سلاہ بندیں مردماں پاکستانی پوج ءَ را توژگ سر کنوکیں ٹرک سر ءَ اُرش کتگ ءُ مانداشتگ-

پاکستانی پوج ءِ توژگ پنجگور ءِ دمگ پروم جائین ھند سر ءَ نشانگ کنگ بیتگ اَنت-

دمگی اِھوالکار رِد ءَ سلاہ بندیں مردماں توژگ سر کنوکیں ٹرک سر ءَ پیسر ءَ اُرش کتگ ءُ پد ءَ مانداشتگ-

بلے وئیل زمہ واری انگت ھچ گل ءَ نہ زرتگ-

بلوچستان ءِ تیابدپی شھر گوادر ءَ پاکستانی پوج ءَ یک مردمے دزگیر کنگ ءَ پد گون وت برتگ –

گیشیں اھوالانی رد ءَ گوادر ءِ ھند کوچو کلانچ ءَ پاکستانء پوج ءَ ھیر مھمد ء مھمد علی دزگیر کرتگ ءُ ناشناسیں جاھے ءَ برتگ-

اے مرد پوج ءَ سَے روچ پیش دزگیر کرتگ ءُ برتگ-

دمگی مردمانی رد ءَ سَے روچ پیش لوگ ءِ سر ءَ پوج ءَ بیڑ برتگ ءُ ھیر مھمد دزگیر کتگ – چریشی ءَ پد آئی ءِ بارو ءَ ھچ سرپدی نہ رس اتگ-

بلوچستان ءَ زورانسری بیگواھیانی جیڑہ یک سنگینے جیڑھے کہ ھمک روچ وئیل رپورٹ بوگ ءَ اَنت-

بلوچستان ءِ دمگ پنجگور ءَ ناشناسیں سلاہ بندیں مردماں پاکستانی پوج ءِ پوسٹ نشانگ کتگ-

پاکستانی پوج ءِ پوسٹ پنجگور ءِ دمگ گڈگی بازار ءَ واٹر سپلائی ھند سر ءَ برجاھیں پوسٹ نشانگ کتگ-

دمگی اِھوالکار رِد ءَ تیرگواری ءُ تراکانی توار اش کنگ بیتگ بلے تاوان درگت ءَ ھچ وڑیں درشان دیم ء نیتکگ-

زانگ بہ بیت اے دمگ ءَ بلوچ آجوئی لوٹوکیں سلاہ بندیں گل پُرکار اَنت بلے اُرش زمہ واری انگت ھچ ءَ نہ زرتگ-

کیتھارینابلوم ءِ گار بوتگیں شرپ

گدار(ناول)

ندکار:ھائنرش بول

رجانکار: شاھد اھمد

اولی بھر

دی بلوچستان پوسٹ

ھائنرش بول بورن ھائم مرٹن، کہ کولون ءِ نزیک ءَ کسانیں جاگھے، کہ آ اود ءَ ودی بیت۔ بندات ءَ آئی ءِ وانگ ءُ زانگ چہ کتابجاہ ءِ درگت ءَ بوت۔رند ءَ کولون شھدربرجاہ ءَ جرمن ادبیات ءُ لسانیات ونت ئِے۔ ۱۹۳۵ء ءَ آئی ءَ را پوج ءِ ڈراپٹ کنائینگ بوت۔ جنگ ءَ آ چار رند ءَ زدگ بوت، ءُ ۱۹۴۵ء ءَ جنگ ءِ زندانی کنگ بوت۔جنگ ءِ تجربہ ءُ جنگ ءَ پد جرمنی ءِ جاوراں آ سک باز سان دات ئِے گڑا ھمے سرھالانی پُشدر ءَ آئی ءِ گدار ءُ افسانھانی سرھال بوت اَنت۔

آ اتھارٹی ءِ زبردست ھلاپ اَت، پرچاکہ اتھارٹی چاگرد ءَ منّگ ءُ نامگانی کدراں دیم ءَ کار اِیت ءُ جندی ءُ مچانکی آجوئی ءَ را ھلاس کنت۔ ایشی ءِ درانگاز ءُ زھرشانی چہ ھٹلر ءِ آیگ ءِ وھد ءَ بوتگ اَت کہ چوں پورائیں جرمن راج چہ ھمے اتھارٹی ءَ گرگ ءُ دزگیر کنگ بوتگ اِت اَنت۔ چمیشکا آئی ءِ نبشتانکاں چہ ھمے جرمن ذھنیت ءِ ھلاپ ءَ نگد اَنت۔ ۱۹۷۲ء ءَ آئی ءَ ادبی ھزمت ءِ سلہ ءَ آئی ءَ نوبیل داد رس اِت۔

آئی ءِ نامداریں افسانہ جَھل ءَ داتگ اَنت:
:دراجیں مُودّ والا گوش کن
:ریل وھد ءِ سر ءَ کیت
آئی ءِ نامدارتریں گدار اَنت:
آدم: نو کجا اِنت؟

پیشگال

اے گدار ھائنرش بول ءَ ۱۹۷۰ء ءِ دھک ءَ نبشتگ۔ ھما وھد ءَ کہ جرمن ءِ چپ دستیں ورناھانی جُنز گوں مُھکمی ءَ چست اَت۔ بائڈر ھائن ھوپ گروپے چہ زرمبُشتی جھد ءُ کوشستاں چاگرد ءِ جوڑشت ءَ مَٹ ءُ بدل کنگ لوٹ اتگ اَت۔ ھمے جاورانی درگت ءَ راست دست ءِ سیادی داروکاں یک ھالتاکے ”بلڈ“ ءِ نام ءَ شِنگ کُت کہ ھکومت ءِ بگیری ءَ ھر ھما ورناھاں روس ءِ ایجنٹ ءُ ملک دژمن منّگ بندات کُت۔ ھائنرش بول ءِ اے گدار ارزان رسانکدری، پولیس چار ءُ تپاس ءُ پد ءَ پروپیگنڈے ءِ وسیلہ ءَ مردمانی کہ چپ لیکھی بوتگ آئی ءِ اکس کشی ءَ کنت۔ ءُ چہ ایشی ءَ اے جُست پیداک بیت کہ چہ ھمے جاوراں سان گپتگیں مردمانی زُلم ءِ کہ جزبات ودی بنت۔ زاناں آ راست اِنت؟ اے گدار ءَ اگاں پاکستان ءِ جاوراں گوں ھمدپ بکنیں گڑا ایشی ءَ گیش (مماثلت) گندگ بیت۔ مئے ھالتاک کہ ھکومت ءِ ھر ھلاپ داروک ءَ را ھندوستان ءِ ایجنٹ گوشگ بیت پد ءَ مئے چیریں ادارہ ھمے درگت ءَ تُرس ءُ بیم یکشل ءَ ودی کن انت، ءُ چوں مردم اے پروپیگنڈے ءَ یکین ایر کن اَنت ایشی ءِ تجرُبگ مارا مدام ھر وھد بیت۔

تاک: یک

اے دراں ما ھر چی کہ درشان کنیں ایشی ءِ بنیاد کمو گیش کسان کسانیں راستیاں گوں بندوک اِنت بلے سَے (ماخذ) انچین اَنت کہ آیاں ما ایشاں اَلّمی پَھم آن اِیں۔ ھمے واست ءَ مئے واھگ اِنت کہ ما چہ بُندر ءَ ایشی ءِ بارو ءَ درشان کن آن اِش تاکہ دیم ءَ جُزگ ءَ آیاں میان ءِ آرگ ءِ واست ءَ مارا زلورت مہ بیت آ سے ماخذ اَنت-

پولیس چار ءُ تپاس ءِ نبشتگیں شاھدی، ھیوبرٹ بلورنا(اٹارنی)، ءُ پٹیرھاش، ریپبلک پراسیکیوٹر ءُ بلورنا ءِ دربرجاہ ءُ شھدربرجاہ ءِ ھمبل)۔ چُشیں گپ ءِ ھچ ھاس زلورت نہ اِنت کہ پٹیرھاش ءَ سک ءَ ھاموشی ءُ چیریں اندازگے ءَ چہ دوستی ءِ چارگ کُت کہ پولیس ریکارڈ ءَ لھتے گیشیں کُتگ اَت۔ پرچا کہ ھاش وتی سنگت ءِ پریشانی ءُ ذھنی (پراگندگی) ءِ سبب ءَ (متفکر) اَت ءُ ھر وڑ ءَ آئی ءِ کُمک کنگ لوٹگ ءَ اَت۔ دومی نیمگ ءَ بلورنا انگت ءَ پَھمگ ءَ نہ اَت کہ چوناھا اے درست چوں ءُ پرچا بوت اَنت؟ بلے آئی ءَ اے ھم گْوشتگ اَت کہ ” وھدے کہ من اے جیڑہ ءَ دلگوش کن آں گڑا من ءَ ایشی ءِ تہ ءَ چُشیں ھِچ گڈ ءُ مُنج گندگ ءَ نئیت اِنت ءُ پَھم اِت کناں کہ اے درست پرچا بوت اَنت“؟ مارا ھمے وڑ گندگ ءَ کَیت کہ کیتھارینا بلوم ءِ جیڑہ گڈ ءُ مُنج ءِ تہ ءَ بیت اِنت، پرچاکہ ایشی ءِ (ملزم) ءُ آئی ءِ وکیل ءِ پوزیشن تَچک نہ اِنت۔ ھمے واست ءَ اگاں ھاش جیڑہ ءِ ھمگرنچ کنگ ءَ لھتے ردی کنت گڑا آ کابل اِنت کہ ایشی ءَ یل دنت۔

ھمے درگت ءَ (ثانوی ماخذوں) ءِ سیادی اِنت گڑا آیاں اد ءَ درشان کنگ ءَ چُشیں ھاسیں زلورت ءِ مارگ ھم نہ بیت۔ آیانی چہ جیڑہ ءِ کہ سیادی بیت ءُ ”آسر“ ءُ گڈ ءُ مُنج بیت اِنت آ گڈی ءَ وت در ءَ بیت اِنت۔

بلوچستان ءِ دمگ کیچ ءَ پاکستانی پوج ءِ لشکر کشی برجاہ اَنت-

گیشیں اھوالانی رد ءَ کیچ ءِ ھند دشت ءِ کوھی دمگ سیاھجی ءُ کش ءُ گوری ھنداں لشکر کشی برجاہ اِنت ءُ ھمے وڑ جتا جتائیں جاھاں پوجی کارمند ھیلی کاپٹرانی گون ءَ ایرگیجگ بیتگ اَنت-

دمگی اھوالانی رد ءَ دمگ ءَ پوج ءِ کارمندانی روگ ءُ آیگ ءِ ھواری ءَ ھیلی کاپٹرانی بال ھم برجاہ اَنت-

داں انگت ءَ اے وھد ءَ دزگیری یا جانی تاوانانی اھوال دیم ءَ نیتکگ اَنت-

یکجاھی ءَ سیکیورٹی

ٹی بی پی شونگال

پاکستان ءِ راجمانی پتر ءِ قائمہ کمیٹی برائے منسوبہ بندی ءِ نیاد ءَ چینی شھریانی پھزدارگ ءِ ھاتر ءَ گچینی گامگیج ءُ رپورٹس پیش کنگ بیتگ اَنت ءُ نیاد ءَ چین ءُ پاکستان ءِ یکجاھیں سیکیورٹی کمپنی ءِ دیم ءَ آرگ ءِ سر ءَ سَوڑگ بیتگ-

چین پاکستان گزرانکی ءِ پریام ءِ سر ءَ دو ھزار ءُ ھپت سد چینی شھری کار کنگ ءَ اَنت، ایشانی پھریزگ ءِ ھاتر ءَ پاکستانی پوج ءِ گچینی سیکیورٹی ڈویژن ءُ اسپیشل سیکیورٹی یونٹس دارگ بیتگ اَنت- چین پاکستان گزرانکی ءُ چین ءِ دگہ پریاماں ھواریں انجینئرز ءُ زرکارانی سر ءَ چار سالانی میان ءَ بلوچ لبریشن آرمی ءُ دگہ سلاہ گلانی نیمگاں چاردہ اُرشاں بیست چینی شھری مرتگ ءُ سِی ءُ چار زدگ بیتگ اَنت-

چین ءِ انجینئرز ءُ زرکارانی سر ءَ ھترناکیں اُرشانی دارگ ءِ ھاتر ءَ پاکستانی آرمی سالانی کساس ءَ ھزاراں انٹیلیجنس بیسڈ آپریشنز کنگ ءَ اِنت، بس ایوک ءَ سال دوھزار ءُ بیست ءُ چار ءِ یازدہ ماھانی توک ءَ ھپت ھزار ءُ نُھ سد ءُ ھشتاد ءُ چار انٹیلیجنس بیسڈ آپریشنز کنگ بیتگ اَنت، ایشانی توک ءَ دو سد ءُ شش مردم کشگ بیتگ انت ءُ یک ھزار ءُ سَے سد ءُ دوازدہ مردم زورانسری بیگواہ کنگ بیتگ اَنت-

بلوچستان ءَ چین پاکستان ءِ گزرانکی ءُ سیندک منسوبہ ءِ سر ءَ ترندیں ایراد گری بوگ ءَ اِنت کہ اے لُٹ ءُ پُلی منسوبھے – اے منسوبھاں بلوچ مال ءُ مڈیانی لُٹ ماری ءِ نام دیگ بوگ ءَ اَنت، چریشی ءِ سبب ءَ چین ءِ ھلاپ ءَ بلوچستان ءَ سیاسی دروشم ءَ ترندیں لیکہ درشان بوگ ءَ اَنت، ءُ بلوچستان ءِ آجوئی ءِ جد ءُ جھد ءَ ھواریں سلاہ بندیں گل چین ءِ منسوبہ ءُ زرکارانی سر ءَ ھترناکیں اُرش کنگ ءَ اَنت-

اے منسوبھاں سیکیورٹی ءِ سر ءَ بازیں کچے ءَ زر ھرچ بوگ ءَ اِنت، چریشی ءَ منسوبہ ءِ ھرچداری گیش بوتگ چشکہ چین ءِ کمیونیسٹ سرکار ءِ واستا پریشانی یے گپے جوڑ بیتگ ءُ دومی نیمگ ءَ چین ءِ شھریانی سر ءَ کوشکاریں اُرش یکشل ءَ بوگ ءَ اَنت – چین ءُ پاکستان ءِ ھواریں سیکیورٹی منسوبہ ءِ پوڑی داری ءِ گیش بوگ آیانی سر ءَ کوشکاریں اُرشانی گیش بوگ ءِ سبب بنت اِنت پرچاکہ لُٹ ءُ پلی کرار داتگیں منسوبہ ءِ بند نہ کنگ ءَ بلوچ سلاہ بندیں گلانی چین ءِ لوٹانی سر ءَ آیوکیں وھداں ترندیں اُرشانی گمان جاڑیگ بیت اِنت-

روکپتی بلوچستان ءِ بنجاھی شھر زاھدان ءُ یزد ءَ دَہ بندیگیں مردماں پاھو دیگ ءِ ھکم دیگ بیتگ انت کہ ایشانی توک ءَ ھشت بلوچ ءُ دو کرد زالبول ھوار اَنت-

بندیگیں بلوچ نشہ باپاری ءِ پژدر ءَ پاھو دیگ بوگ ءَ اَنت ءُ کرد زالبول کوشے ءِ بھتام ءَ پاھو دیگ بوگ ءِ ھکم دیگ بوتگ انت کہ اے مردم پہ پاھو ءَ جتائیں کوٹیاں برگ بیتگ اَنت-

روکپتی بلوچستان ءَ گوستگیں ھپتگ ءَ دو مردم نشہ باپاری ءِ پژدر ءَ پاھو دیگ بیتگ اَنت کہ آیانی سیادی اَچ زابل ءَ بلوچ ھنداں بیتگ اَنت-

پاھو دیگ ءَ برگ بیتگیں مردمانی پجار چہ زاھدان زندان ءَ بیست ءُ سالی ئیں ایلیا تردست ء جھانگیر جھمنند زاھدان، یعقوط براھوئی ء ناظر جھمنند سفید آباد نیمروز ءِ ناماں زانگ بیتگ اَنت-

ایلیا پنچ سال پیش ءُ یعقوب یک سالے ءَ پیش نشہ باپاری ءِ بھتام ءَ زاھدان ءَ گرگ بیتگ اَنت-

ھمے وڑ چہ یزد ءَ سَے کسانی پجار عبدالباسط توتازئی ء نواب جھمنند نسرت آباد زاھدان، عبدالناصر توتازئی ء امیر ھمزہ جھمنند چاہ رھمان نسرت اباد زاھدان ءُ نعمت اللہ توتازئی ء گلام جھمنند زاھدان ءِ ناماں زانگ بیتگ اَنت ءُ دگہ سَے کسانی پجار زانگ نہ بیتگ اَنت-

زانگ بہ بیت گوستگیں ھپتگ ءَ دو کس ھم نشہ باپاری ءِ بھتام ءَ پاھو دیگ بیتگ اَنت کہ ایران ءَ بندوکیں سیستان و بلوچستان ءَ بازیں کچے ءَ مردم پاھو دیگ بوگ ءَ اَنت کہ آیانی سر ءَ گیشتریں بھتام نشہ باپاری ءِ لڈگ بوگ ءَ اِنت-

وائس فار بلوچ مسنگ پرسنز ءِ چئیرمین نصراللہ بلوچ ءَ گْوشتگ کہ زورانسری بیگواہ سھیل احمد ءُ جمال خان مری بیگواھی اِھوال کھول ءَ وی بی ایم گور ءَ سر کتگ اَنت-

سھیل احمد ءُ جمال خان مری ءِ کھول وائس فار بلوچ مسنگ پرسنز ءِ زھرشانی ئیں بُنجل ءَ اَتکگ ءُ گل ءَ سر کتگ اَنت گْوشتگ کہ سھیل احمد ء عبداللہ چہ بھمن تربت ءَ ھمے سال دہ اکتوبر ءُ جمال خان مری ء میرا خان چہ کراچی اسٹاپ ھزار گنجی شال ءَ ھمے ماہ یازدہ ءَ پوج آوار جتگ ءُ بیگواہ کتگ اَنت-

سھیل احمد ءُ جمال خان مری ءِ کھول ءَ گل ءَ چہ شکایت ھم کتگ کہ آیاں آیانی دوستناکانی درگت ءَ سرپدی دیگ ءَ نہ اَنت چریشی ءِ سبب ءَ چہ آ سسّائی گم ءُ دردانی آماچاں-

نصراللہ بلوچ ءَ گْوشتگ کہ کھول ءِ دلجمی دیگ بیتگ کہ سھیل احمد ءُ جمال خان مری ءِ کیس ھکومت، بیگواھیں مردمانی درگت ءَ چہ جوڑ کنگ بیتگیں کمیشن ءُ اکوام متھدہ ءِ تر گردیں ٹولی کہ زورانسری آوار جنی ءَ دیگ بیت ءُ آیانی پہ سلامتی یل کنائینگ ھاتر ءَ ھرچ وڑیں توار چست کنگ بیت-

نصراللہ بلوچ ءَ ھکومت ءَ چہ لوٹ کتگ کہ سھیل احمد ءُ جمال خان مری سر ءَ بھتام ھست گُڑا آیاں دیم ءَ بیار اَنت آمیدگس ءَ پیش بہ کن اَنت ڈیھی کانود رِد ءَ پلگاری ءِ موہ دیگ بہ بیت اگاں ناں گُڑا آیاں یل بہ کن اِت ءُ کھول ءَ گم ءُ رنجاں چہ در بہ کن اِت-

پاکستانی پوج ءِ دست ءَ دگہ یک مردمے چہ بلوچستان ءَ زورانسری آوار جنی ءِ نشانگ کنگ بیتگ-

گیشیں ھالانی رِد ءَ ھمے سال ءِ ھشت اکتوبر ءَ چہ مچ ءَ پاکستانی پوج ءِ دست ءَ دزگیری ءَ پد زورانسری آوار جنی ءِ نشانگ کنگ بیتگیں بابل جان لھڑی گوستگیں روچ ءَ یل کنگ بیتگ-

آئی ءِ یل بیگ گپ آئی ءِ نزیکیں سنگتاں کتگ-

دومی نیمگ ءَ بلوچستان ءِ دمگ کیچ ءِ ھند دشت ءَ شپ ءِ وھد ءَ پاکستانی پوج ءَ یک لوگے ءِ سر ءَ بیڑبرتگ لوگ ءَ ساڑی ئیں مردم لَٹ ءُ کُٹ کتگ اَنت ءُ لوگ تاوان داتگ اَنت-

ھمے میان ءَ پاکستانی پوج ءَ دمگی بینجو ماسٹر عصا گزیر لوگ ءِ سر ءَ بیڑبرتگ آئی ءِ چُک طیب ء عصا آوار جتگ ءُ ناشناسیں جاھے ءَ برتگ-

زانگ بہ بیت بلوچستان ءَ زورانسری آوار جنی ءِ وئیل یک دراجیں مدتے ءَ برجاہ ءَ اَنت کہ اود ءَ ھمکروچ پاکستانی پوج ءِ دست ءَ زورانسری آوار جنی ءِ ھال دیم کاینت، گوستگیں روچ ءَ بلوچستان ءِ جتاجتائیں دمگاں چہ شش مردم زورانسری آوار جنی ھال دزکپتگ-

بلوچستان ءَ زورانسری آوار جنی ءِ درگت ءَ کار کنوکیں گل ءِ بھتام اِنت کہ پاکستانی پوج ءَ اے وڑیں پندل ءَ چہ بلوچستان ءَ برجاھیں ھکانی زرمبشت ءِ ایرومش کنگ ھاتر ءَ سیاسی ءُ در سیاسی مردم ھاسکار سیاسی راھشونانی سیاداں زورانسری آوار جنی ءِ نشانگ کنت-

اے گلاں میان استمانی ادارہ ءُ انسانی ھکانی گلاں چہ دزبندی کتگ کہ آ بلوچستان ءَ برجاھیں اے وڑیں وئیلانی گر ءُ دار ھاتر ءَ گامگیج بزور اِیت-