TBP Balochi

بلوچستان ءِ دمگ کیچ ءِ ھند تمپ میر آباد ءَ مروچی شپ ءَ بازیں کچے ءَ سلاہ بندیں مردماں پاکستانی پوج ءِ یک بنجلے ءِ سر ءَ اُرش کتگ-

دمگی مردمانی رد ءَ ترندیں تیرگواری ءُ بازیں تراکانی توار اشکنگ بیتگ اَنت-

اُرش ءَ پاکستانی پوج ءَ جانی ءُ مالی تاوانانی چست کنگ ءِ ھال اِنت-

زانگ بہ بیت کیچ ءِ دمگ ءَ پاکستانی پوج ءِ سر ءَ بوتگیں مروچی سئیمی اُرش اِنت کہ ایشی ءَ پیش سھب ءَ کیچ ءِ ھند دشت جت بازار ءَ پاکستانی پوج ءِ کارندہ بمب تراکے ءِ نشانگ کنگ بیتگ اَنت کہ اود ءَ پرپٹاں سواریں پاکستانی پوج ءِ دو کارندہ تراک ءِ زد ءَ اتکگ ءُ مرتگ اَنت-

وئیل ءَ پد پوج ءَ دمگ انگیر کتگ ءُ پٹ ءُ پول بندات کتگ- اے اُرش ءِ زمہ واری بی ایل اے ءَ من اتگ ات-

گیش کیچ ءِ ھند زامران بارکور ءَ ھم پاکستانی پوج ءِ یک بنجلے ناشناسیں سلاہ بندیں مردماں نوکیں سلاہ ءُ تراکانی شورواں گوں نشانگ کتگ-

اُرش ءَ پوج ءَ جانی تاوانانی ھال اِنت بلے واکداراں انگت ءَ جانی ءُ مالی تاوانانی اھوال دیم ءَ نیاؤرتگ اَنت-

زانگ بہ بیت اے دمگ ءَ بلوچ سلاہ بندیں گل پرکار اَنت وھد وھد ءِ سر ءَ پوج ءَ نشانگ کنگ ءَ اَنت مروچی بیتگیں اے اُرشانی زمہ واری کس ءَ پہ وت نہ زرتگ اَنت-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل اے ءِ سرمچاراں دشت ءُ پنجگور ءَ زورگریں پاکستانی پوج دو جتاجتائیں اُرشاں نشانگ کتگ دو کارمند کشتگ اَنت-

جارکش جیئند بلوچ ءِ درشان رِد ءَ بی ایل اے ءِ سرمچاراں مروچی سے ءِ وھد ءَ کیچ ءِ دمگ دشت، جت بازار ءَ زورگریں پاکستانی پوج ءِ پرپٹ ءَ سواریں کارمند یک ریموٹ کنٹرول آئی ای ڈی اُرش ءَ نشانگ کتگ اَنت، تراک نشانگ ءَ آیگ ءَ چہ دوئیں کارمند جاہ پہ جاھی مرتگ اَنت ءُ آیانی پرپٹ تباہ بیتگ-

جارکش ءَ گوشتگ بلوچ لبریشن آرمی ءِ سرمچاراں گوستگیں شپ ءَ پنجگور ءِ دمگ گڈگی بازار ءَ واٹر سپلائی ھند سر ءَ برجاھیں زورگریں پاکستانی پوج ءِ پوسٹ ءِ پھازوکی چوکی اُرش نشانگ کتگ اَنت، سرمچاراں دُژمنیں پوج سر ءَ وتکاریں سلاھاں چہ اُرش کتگ ءُ گرنیڈ لانچراں چہ بازیں گولھے آس داتگ، چریشی ءِ آسر ءَ کم چہ کم سے کارمند ٹپی بیتگ اَنت-

جارکش ءَ دیمتر ءَ گْوشتگ بلوچ لبریشن آرمی اے دوئیں اُرشانی زمہ واری ءَ منّ اِیت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ پنجگور ءَ پوج ءِ بُنجل ءُ زامران ءَ پوج سر ءَ سنائپر اُرش زمہ واری منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ سرمچاراں پانزدہ دسمبر ءِ روچ سے ءَ زامران ءِ دمگ زامری ھَرِ کور ءَ برجاھیں زورگریں پاکستانی پوج ءِ چوکی نشانگ کتگ-

جارکش ءَ گْوشتگ کہ اُرش ءَ بی ایل ایف ءِ اسنائپر ٹیکٹیکل اس ٹیم ءَ پیسر ءَ چہ نشانگ کتگ یک کارمندے کشگ ءَ پد سرمچاراں چوکی سر ءَ مزنیں سلاھاں چہ اُرش کتگ دُژمن ءَ را گیش جانی ءُ مالی تاوان دیمپان کتگ-

بلوچستان لبریشن فرنٹ ءَ دگہ درشانے ءِ تہ ءَ گْوشتگ کہ مئے سرمچاراں پانزدہ دسمبر ءِ بیگاہ شش ءُ سی ملٹ ءَ پنجگور ءَ برجاھیں زورگریں پاکستانی پوج بُنجل سر ءَ گرینیڈ لانچر ءِ بازیں گولھے آس داتگ کہ ٹک ءَ لگتگ اَنت چریشی ءِ آسر ءَ زورگریں پاکستانی پوج ءَ جانی ءُ مالی تاوان چست کنگ کپتگ-

جارکش ءَ گْوشتگ کہ بی ایل ایف انٹیلنجس ٹولی ءِ ھالانی سر ءَ اسپیشل آپریشن اسکواڈ ءَ اے دمگ سر ءَ ھما وھد ءَ اُرش کتگ وھدے آ وتی بُنجل تہ ءَ سبز کوہ آپریشن ءَ شھید بیتگیں بلوچ پُسگانی شھیدی ءِ سر ءَ شاتکامی کنگ ءَ بیتگ اَنت چریشی ءَ پوجی آپیسراں ھوار آئی ایس آئی ءُ ایم آئی ءِ کارمنداں اَبید دمگی ڈیتھ اسکواڈ ءُ چاریگ ھم گون بیتگ اَنت، گرینیڈ لانچر شریں ٹک سر ءَ ترکّگ ءَ چہ زورگر ءَ جانی ءُ مالی تاوان چست کنگ کپتگ-

آئی ءَ گوشتگ کہ اے بُنجل آئی ایس آئی ءُ ایم آئی ءِ ھواریں کارگس ھم ھست اَنت-

جارکش ءَ گْوشتگ کہ اُرش ءَ پد زورگریں پوج ءَ تُرندیں تیرگواری کتگ ءُ مھلوک دلسیاہ کتگ چریشی ءَ پدر بیت کہ اُرش ءَ پوج ءَ سک تاوان دیمپان کنگ کپتگ-

جارکش ءَ گوشتگ کہ بی ایل ایف نوکیں جنگی رپکاں چہ جتاجتائیں ٹولیانی دروشم ءَ زورگریں پوج ءَ نشانگ کنگ ءَ اِنت چریشی ءِ سبب ءَ چہ زورگریں پوج ءَ سک سسّائی زور ءُ دلسیاھی ءِ نشانگ اِنت ءُ سوبمندیں اُرشاں پد زورگریں پوج لس مھلوک ءَ نشانگ کنگ ءُ آیگ ءَ اِنت-

جارکش ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت ءُ زورگریں پوج ءِ دراھگ ءَ تاں زورگریں پوج ءُ پوجی شوربندیانی ءُ چاریگاں نشانگ کنت-

بلوچستان ءِ دمگ کیچ ءِ ھند دشت ءَ ناشناسیں مردماں پاکستانی پوج یک بمب اُرشے ءِ نشانگ کتگ-

ٹی بی پی ءَ سر بیتگیں اھوالانی رد ءَ دشت ءِ ھند جت بازار ءَ پاکستانی پوج ءِ پرپٹ سواریں کارندہ بمب ءِ نشانگ کنگ بیتگ اَنت-

دمگی مردمانی رد ءَ مروچی ناشناسیں مردماں پاکستانی پوج ءِ راہ ءِ سر ءَ بارودی سرنگ کل کتگ انت چریشی ءِ زد ءَ اتکگیں کارندھاں جانی تاوانانی دیمپانی کنگ کپتگ-

واکداراں اے درگت ءَ انگت ءَ دگہ تاوانانی ھال نہ کتگ اَنت-

سبزکوہ ءِ شھیدانی ارواہ ءَ

ازگر سکی

دی بلوچستان پوسٹ

برے ساھجی برے کلبر برے کاھان ءُ سبزکوھاں
جُڑے ھونانی ھار ءَ اِنت گیابیں ڈن ءُ ماتکوھاں

مرادے شانتلاں دوشی جتگ زھیرونک پہ ڈیھءَ
کُتگ الھان آجوئی کپوت آں گوانک کوکوھاں

بلوچستان کربان اَنت تئی بچیگ تئی نام ءَ
تئی بچءُ جنک ندریں سمائی زانتءُ جنگجوھاں

نہ بکشاں زاکر ءُ دلجان مجید اے مادریں ھاکءَ
بگوار بمباں پہ سبزکوھاں بہ جن دُمبال سیاہ کوھاں

بلین آں رُژن ھر دیم ءَ چراگیں کوہ سبز کوہ ءِ
بچار ھونانی ھارءَمئے کہ آتارانت گون وشبوھاں

زمین پہ ندری آں ورنا ھمے مرگ ءَ مڑاھے گون
ھزار مات ءَ وتی بچیگ کتگ کربان گون لیلوھاں

زمین ءِ مادن ایں راہ ءَ گچین اِنت کشک سباھانی
مِراں ازگر بہ آں زندگ اے مرگ ءِ لِزّت ءَ پُوھاں

بلوچستان ءِ دمگ زامران ءَ ناشناسیں مردماں پاکستانی پوج ءِ بنجل نشانگ کتگ-

پوج ءِ بنجل زامران ءِ ھند زامری ھرکور ءِ ھند ءَ نشانگ کنگ بیتگ-

دمگی مردمانی رد ءَ اُرش ءِ وھد ءَ ترندیں تیرگواری ءُ تراکانی توار اشکنگ بیتگ-

اھوالانی رد ءَ اُرش ءَ پوج ءَ جانی تاوانانی دیمپانی کنگ کپتگ – واکدارانی نیمگ ءَ داں انگت ءَ اے درگت ءَ اھوال دیم ءَ نیتکگ اَنت-

زانگ بہ بیت اے دمگ ءَ بلوچ آجوئی لوٹوکیں سلاہ بندیں گل پرکار اَنت بلے داں انگت ءَ اے اُرش ءِ زمہ واری ھچ گل ءَ پہ وت نہ زرتگ-

روکپتی بلوچستان ءِ تیابدپی شھر چھبار ءَ ناشناسیں مردماں تیرگواری کرتگ ءُ یک مردمے کُشتگ-

اھوالانی رد ءَ چھبار ءَ ناشناسیں مردماں تیرگواری کتگ ءُ اھسان جدگال ء قاسم جھمنند دشتیاری ءُ کمب چھبار کشتگ-

اھوالانی رد ءَ ناشناسیں مردماں اھسان ءِ راہ بستگ ءُ آئی ءِ پرپٹ ءُ موبائل ءِ برگ ءِ جھد کتگ گڑا ھمے وھد ءَ آئی ءَ گھگیری کتگ ءُ چریشی ءَ آیاں تیرگواری کتگ ءُ اھسان کشتگ ءُ سامان برتگ اَنت-

اھسان بنکی ءَ دشتیاری ءِ نندوک بیتگ کہ انی چھبار ءَ کمب ءَ نندوک بیتگ –

روکپتی بلوچستان ءَ ھمک روچ چوشیں وئیل پیش آیگ ءَ اَنت کہ اود ءَ مردماں روچ ء رھمان تیرانی نشانگ کنگ ءُ کشگ ءَ اَنت-

ماں بلوچستان ءَ مردمی اگبالانی جاور ءِ سر ءَ بلوچ راجی زْرمبشت ( بی این ایم ) ءَ مردمی اگبالانی روچ ءِ دم ءُ درگت ءَ داں ھپتگے ءَ برجاہ بیتگیں سرگرمیانی دْرچ ءَ ماں نیدرلینڈز ءَ ھم مراگشانی پارست ءَ میان استمان ءِ دیم ءَ بلوچستان ءِ جاور پدر کرتگ۔

دی ھیگ شھر ءَ روانک ، ڈچ پارلیمنٹ ءِ دیم ءَ زھرشانی ءُ سداں پنتاک شنگ کنگ بیتگ۔ چہ بی این ایم ءِ نیمگ ءَ ڈچ پارلیمان ءَ بلوچستان ءِ جاورانی سر ءَ پٹیشنے دیگ بیتگ ءُ ڈیھ ءِ دیمپانی وزیر بریکل مینز ءِ نام ءَ سرکار ءَ نمدی نبیسگ ءُ لوٹ کنگ بیتگ کہ نیدرلینڈز سرکار ءُ پارلیمان ءِ باسک بلوچستان ءِ جاورانی سر ءَ تچکیں دیدانکے بہ دار اَنت ءُ پاکستان ءِ کارپداں سھرائیں رنگے ءَ ایر بہ جن اَنت ءُ پاکستان ءِ گرءُ دار ءِ میان ستمانی گامگیجانی پلہ مرزی کنگ بہ بیت۔

’’ پاکستان ءِ جی پی ایس پلس باپاری بستار پچ گرگ ءَ ڈچ سرکار وتی کرد ءَ پیلو بہ کنت ءُ ایشی ءَ گوں پاکستان ءِ مردمی اگبالانی کرد ءِ گھتری گچینی گوں بلوچستان ءِ جاوراں ڈک بہ بادین ایت۔

بی این ایم نیدر لینڈز تک ءِ کماش مھیم ابدل رھیم ءَ نمدی ءِ تہ ءَ گْوشتگ پاکستانی سرکار ءِ ’ کشگ ءُ چگل ‘ دیگ ءِ شوندات ءِ پد ءَ بلوچ راج بے باوری ءُ ترس ءِ جاوران اِنت۔ ھزاراں زور بیگواھیں کھول نہ زان اَنت کہ آیانی کس ءُ مردم کج ءَ ءُ چون اَنت۔زوراکی ءِ اے جاور ءَ بومی ئیں مردم سکیں نیزگاریں زندے گوازینگ ءَ اَنت۔

آئی ءَ گْوشتگ ھالینڈ مردمی اگبالانی پلہ مرزی کنگ ءِ پھرکرزیں دودے ءِ واھند اِنت۔ ما چہ ڈچ سرکار ءَ دزبندی کن ایں کہ مزدانک ءُ مڑاہ ءِ جھد ءَ بلوچ راج ءِ کردانک ( اخلاق ) ءُ سیاسی پلہ مرزی بہ کنت۔

ڈچ پارلیمان ءِ دیم ءَ زھرشانی ءِ میان ءَ بی این ایم نیدرلینڈز ءِ کمک کماش وھید ، باست ، زھرہ ، ڈاکٹر لتیپ ، واھد ، ابدلرھمان ، کدیر ساگر ، کیا ءُ جواھر ءَ گپ جنان ءَ گْوشتگ مردمی اگبالانی روچ مارا یات دنت کہ ما پہ بلوچ ءِ آجوئی ، اگبال ءُ پجار ءِ پھریزگ ءَ توار چست بہ کن ایں۔ پاکستانی لشکر ماں بلوچستان ءَ گْوستگیں لھتے دھک اِنت کہ بلوچ راج ءَ آزار ءِ آماچ کنگ ءَ اِنت، ھزاراں بلوچ زور بیگواہ اِنت ءُ ھزارانی ژانگولیں کنٹ دست کپتگ۔

بلوچستان ءَ زانشتی ادارھاں ملٹرائیزیشن ءُ درکانودی بندی ءِ ھلاپ ءَ زھرشانی ئیں نندانک برجاہ گوستگیں نوزدہ روچاں چہ بولان میڈیکل کالج ءَ برجاہ ءَ اِنت-

زھرشانی ئیں بُنجل ءَ مروچی بلوچ یکجھتی کمیٹی ءِ بُنجاھی آرگنائزر ڈاکٹر ماہ رنگ بلوچ ءُ بُنجاھی کمیٹی ءِ باسک بیبگر بلوچ ءَ بھر زرتگ ءُ نودربرانی گوم ءَ یکجاھی درشان کتگ-

زھرشانی ءَ نودربراں گْوشتگ کہ بولان میڈیکل کالج ءَ گوستگیں یک ماھے ءَ چہ گیش درکانودی ھساب ءَ بند کتگ- اشی ءَ اَبید بلوچستان شھدربرجاہ ءِ ھاسٹلز ھم بند کتگ اَنت ءُ نودربر ساماناں ھوار در کتگ اَنت- یک پندل سازی رد ءَ بلوچستان ءَ زانشتی ادارہ بند کتگ ءُ ریاستی ملٹرائیزیشن ءِ پالیسی ایر کنگ بیگ ءَ اِنت چریشی ءَ آؤکیں وھداں بلوچ نودربرانی تُرسینگ، زورانسری آوار جنی وئیلانی گیشی ءِ گمان اِنت-

نودربراں گوشتگ کہ تاں انو کالج انتزامیہ ءُ ھکومت بلوچستان ءِ نیمگ ءَ چہ نودربرانی لوٹاں سرجم ءَ ڈال چارگ کنگ بیگ ءَ اِنت ءُ نودربراں جتاجتائیں دروشماں تُرسینگ ءَ اَنت-

آیانی گوشگ اِنت کہ دانکہ بولان میڈیکل کالج ءُ ھاسٹلاں پچ نہ کن اَنت، تاں ھما وھد ءَ زھرشانی ئیں بُنجل برجاہ بیت- ما سرجمیں پڑ مردماں چہ دزبندی کن ایں کہ آ اے زھرشانی ءَ نودربرانی ھمراھداری ءَ بہ کن اَنت ءُ ھرچ پلیٹ فارم ءَ آیانی واستا ءَ توار چست بہ کن اِت-

نوشکی ءَ استاد فرید احمد بادینی ءِ یل کنائینگ ھاتر ءَ بی وائی سی ءُ آئی ءِ کھول نیمگ ءَ چہ میر گل خان نصیر لائبریری ءَ چہ زھرشانی روانک کشگ بیتگ، روانک نواب اکبر بگٹی ءِ دگ ءَ چہ روان پریس کلب نوشکی ءَ سر بیتگ-

زھرشانی کنوکاں استاد فرید احمد بادینی ءُ دگہ بیگواھیں مردمانی یل کنائینگ ھاتر ءَ ناراہ جنگ بیتگ- روانک ءَ زالبول، چکاں ھوار ورنا ءُ سیاسی پارٹیانی باسکاں بھر زرتگ-

زھرشانی روانک ءَ چہ استاد فرید احمد ءِ جنک لبانہ بادینی، بیبرگ بلوچ، مابین بلوچ، کامریڈ امین بلوچ، نیشنل پارٹی ءِ فاروق بلوچ، بی این پی ءِ میر خورشید جمالدینی، مولانا زکریا عادل، جی ٹی اے ءِ ظاھر بلوچ، مشتاق بلوچ، ماہ پارہ بلوچ ءُ دگراں تران کتگ-

آیاں گوشتگ کہ زورانسری آوار جنی ءِ تہ ءَ گیشی دلپدردی درشان کتگ استاد فرید احمد ءَ زوت یل کنائینگ لوٹ کنان ءَ گْوشتگ چاگرد ھم بلوچستان ءَ مُھر نہ اَنت ، استاد فرید دل نادُراھی ءُ بلڈ پریشر نادُراہ ءَ اِنت آئی ءِ یک ماھے ءَ چہ زورانسری آوار جنی ءَ چہ کھول ءِ آئی زند درگت ءَ چہ تُرس ودی بیت- آیاں کڈن کتگ کہ اگاں یک ھپتگے ءِ تہ ءَ استاد فرید احمد یل کنگ نہ بیت گُڑا راجی شھدگ سر ءَ بے مدت واستا نندانک دیگ بیت-