پولیس بنشون ءِ رد ءَ کیچ ءِ بنجاھی شھر تربت ءِ ھند میری ءَ ناشناسیں پرپٹ سواریں مردماں تیرگواری کتگ ءُ یک مردمے کشتگ، آئی ءِ پجار کامران ء مھمد عمر ءِ نام ءَ زانگ بیتگ-
لاش اژدری چار ءُ ٹپاس ءَ پد کھول ءِ ھوالگ ءَ کنگ بیتگ ءُ پولیس پٹ ءُ پول کنگ ءَ اِنت – وئیل ءِ سبب زانگ نہ بیتگ-
روکپتی بلوچستان ءِ دمگ ایرانشھر ءَ سلاہ بندیں مردمانی تیرگواری ءَ یک مردمے بیران بیتگ-
اھوالانی رد ءَ ایرانشھر ءِ ھند ابتر ءَ دو مردمانی جنگ ءُ چوپ ءَ تیرگواری بیتگ ءُ چریشی ءَ چہ یک مردمے ءَ تیر لگ اِتگ –
تیرگواری ءَ بیران بیتگیں مردم ءِ پجار یاسر زارعی ء عبدالقادر جھمنند ایرانشھر ءِ نام ءَ زانگ بیتگ-
ھمے وڑ زاھدان ءَ یک گاڑی ءِ چپ بوگ ءَ یک مردمے ستکگ ءُ بیران بیتگ – کہ اے مردم ءِ پجار زانگ نہ بیتگ-
چہ تربت جوسک ءَ بیگواہ کنگ بیتگیں ثناء اللہ ءِ کھول ءَ تربت پریس کلب ءَ پریس کانفرنس کنان ءَ گْوشتگ کہ سی ٹی ڈی کارمنداں گوستگیں شپ ءَ لوگ ءَ پُترتگ ثناء اللہ ء امداد زورانسری وتی ھمراھی ءَ برتگ کہ انگت بیگواہ ءَ اِنت- کھول گوشگ اِنت کہ ثناءباللہ گاڑی ڈرائیورے ءُ آ سیمسر ءَ کار کنت- سی ٹی ڈی ءَ پیسر ءَ گْوشتگ کہ آ جُست پُرس ءَ پد یل کنگ بیت، بلے پد ءَ انکار کتگ کہ آ آئی ءِ گور ءَ نہ اِنت-
کھول ءَ گوشتگ کہ زورانسری آوار جنی ءَ سرجمیں کھول سسّائی ءُ جزبگانی دروشم سک تکانسری ءِ نشانگ اَنت- آیاں واکدار ءَ چہ لوٹ کتگ کہ اگاں ثناء اللہ سر ءَ کجام وڑیں بھتامے ھست گُڑا آئی ءَ آمیدگس ءَ پیش بہ کن اِت ءُ سپائی ءِ موہ ءَ بدے اِنت دانکہ کھول گم ءُ رنجاں چہ بہ رک اِیت-
پریس کانفرنس ءِ میان ءَ کھول ءَ دمگی انتزامیہ ءَ دو روچ وھد داتگ گْوشتگ کہ اگاں ثناء اللہ یل کنگ نہ بیت یا کہ سرپدی دیگ نہ بیت گُڑا زھرشانی کنگ ءَ لاچار بہ ئے ایں- آیاں گْوشتگ کہ آیانی زھرشانی سی پیک یا دگہ ھاسیں جاگھے ءَ بیت کنت، آئی ءِ جار ءَ پد ءَ جن ایں- آیاں تچک کتگ گْوشتگ کہ آئی ءِ سرجمیں زمہ واری دمگی انتزامیہ ءُ دگہ واکدار سر ءَ بنت-
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ کیچ، پروم، ھیرونک پنجگور ءَ چاریگ، مڈی بروکیں گاڑیانی ءُ پوج سر ءَ بیتگیں اُرشانی زمہ واری منّ اِتگ اَنت-
بلوچستان لبریشن فرنٹ ءِ جارکش میجر گوھرام ءَ بلوچ رسانکدر ءَ وتی شنگ کُرتگیں درشان ءِ تہ ءَ گْوشتگ کہ 11 دسمبر ءَ سُھب ءِ دہ ءَ کیچ، ھوت آباد ءَ سرمچاراں مڈی بروکیں دو ٹرالرانی سر ءَ اُرش کُرتگ ءُ تاوان داتگ اَنت، ءُ پہ پاکستانی پوج ءَ آپ برگ ءَ بیتگیں آپ ءِ ٹینکر ھم مانداشتگ۔
جارکش ءَ گْوشتگ کہ سرمچاراں دگہ یک کاروائی ءِ ھمے روچ ءَ میر آباد ءَ مڈی بروکیں دو ٹرالرانی ٹائیر جتگ اَنت۔
جارکش ءَ گْوشتگ کہ 12 دسمبر ءَ سُھب ءِ یازدہ ءَ سرمچاراں کیچ، ھوت آباد ءَ پنجاپ ءَ رؤکیں یک ٹراکرے ءُ دُژمن ءِ شوربندیانی سر ءَ کارکنوکیں کنسٹرکشن شرکت ءِ دو ڈمپر مانداشتگ۔
جارکش ءَ گْوشتگ کہ 15 دسمبر ءِ شپ ءَ سرمچاراں انٹلیجنس ءِ ھال دیگ ءِ رد ءَ پروم ءَ دژمنیں پوج ءِ واستا سامان بروکیں یک ٹرکے داشتگ ءُ گوں ساماناں ھوار مانداشتگ۔ ڈرائیور سرپد کُتگ ءُ یل داتگ۔
جارکش ءَ گْوشتگ کہ زورگریں پاکستان زورگِپتیں بلوچستان ءَ وتی جوڑ کُرتگیں لُٹ ءُ پُلی دگاں بگر داں مڈیاں ھرچیز ءَ پہ وتی لشکری ءُ مالی نپ ءُ سیتاں کارمرز کنگ ءَ اِنت۔ پورٹ منرو، ڈی جی ھان ءَ بگر داں بلوچ تیاب ءَ بلوچستان ءِ مڈی، اشکر، گرانبھائیں سنگ، سُھر، نگرہ، پوپل ءُ دگہ بلوچ مڈیاں پہ دیم لُٹگ ءُ پنجاپ ءَ آباد کنگ ءَ اِنت۔ مئے مڈیاں زورگریں پاکستانی پوج وت ءَ مھکم کنگ ءُ مئے مردمانی سر ءَ زوراکی ءُ ورنایاں زور بیگواہ کنگ ءُ بے دردی مئے چکچینی ءَ کنگ ءَ اِنت۔ بدبھتی ءَ چہ مئے لھتیں ٹیکیدار، ٹرانسپورٹر ءُ مزنیں مردم پہ کمو نپ ءُ سیتانی واستا اے بلوچ دژمنی کار ءَ دژمن ءَ کمک کنگ ءَ اِنت کہ مارا ھچ وڑ کبول نہ اِنت ۔ آدگہ مڈیانی وڑ ءَ سیمسر ءَ کار کنوکیں ٹینکر ءُ زامیاد گاڑیانی واھند پہ ٹوکنے ءَ وڑ وڑ ءَ بلوچ جُھد ءِ بگیری ءَ کارمرد بیگ ءَ اِنت، ءُ زورگریں پاکستانی پوج چہ آیاں ٹیکس گرگ ءَ ابید بلوچ آجوئی ءِ ھلاپ ءَ کار گِرگ ءَ اِنت۔
جارکش ءَ گْوشتگ کہ ما ٹرانسپورٹراں ھوار باز رند ءَ وتی مردم کڈن کُرتگ اَنت کہ دژمن ءِ کمکار جوڑ مہ بہ اِت بلے لب ءُ ملاماں آیان ءَ چہ راجی جزبگ ءُ لیکہ ءَ زبھر کُرتگ۔ یک نیمگے بلوچ سرمچار پہ سرڈگار ءِ آجوئی ءُ پہ وتی پدریچانی وشھالی ءَ وتی سراں ندر کنگ ءَ اَنت ءُ دومی نیمگ ءَ باپاری مردم پہ زانت ءُ نازانتی راجی جُھد ءِ ھلاپ ءَ کارمرز بیگ ءَ اَنت۔
آئی ءَ گْوشتگ کہ ما یکبرے پد ءَ چہ راج ءَ دزبندی کن ایں کہ آ دژمن ءِ اے پندل ءَ سرپد بہ بیت ءُ دیمتر ءَ دژمن ءِ لُٹ ءُ پُل کنگ ءِ مراگشانی بھر جوڑ مہ بنت، اگاں نہ گڑا ایشی ءِ آسر شر نہ بیت۔
جارکش میجر گْوھرام بلوچ ءَ وتی دگہ یک درشانے ءِ تہ ءَ گْوشتگ کہ کیچ ءِ دمگ ھیرونک ءَ زورگریں پاکستانی پوج بُنجل نوکیں سلاھاں چہ نشانگ کتگ وھدے کہ پنجگور ءِ دمگ گوارگو ءَ راجی میاربار تیرگواری کتگ کُشتگ-
جارکش ءَ گْوشتگ کہ شانزدہ دسمبر شپ ءِ ساھت یازدہ نیم ءَ سرمچاراں کیچ ءِ دمگ ھیرونک ءَ برجاھیں دُژمنیں پوج بُنجل نوکیں سلاہ ءُ مزنیں سلاھاں چہ نشانگ کتگ- اُرش ءَ دُژمنیں پوج ءِ یک کارمندے ءِ کُشتگ ءُ دو ٹپی کرتگ اَنت-
جارکش ءَ گْوشتگ دگہ یک اُرشے سرمچاراں سیزدہ دسمبر ءِ بیگاہ ءِ ساھت چار نیم ءَ پنجگور ءِ دمگ گوارگو ءَ زورگریں پاکستانی پوج ءِ ملٹری انٹیلجنس ( ایم آئی) ءِ چاریگ ءُ کاردار عبدالغفور تیرگواری کرتگ کُشتگ-
جارکش ءَ گْوشتگ کہ راجی میاربار جتاجتائیں جرماں سرمچارانی گور ءَ نام دپ بیتگ- اے جرم ءَ زورگریں پاکستانی پوج ءُ چیریں ادارھانی جوڑ کتگیں وتگڑیں ڈیتھ اسکواڈ ءُ ملٹری انٹیلیجنس ءَ کمکاری ءَ ھوار اِنت-
آئی ءَ گْوشتگ کہ راجی میاربار عبدالغفور جھمنند سُتکگیں کُنر گوارگو چتکان پنجگور ءَ گوارگو ءَ لشکر کشی ءُ لوگانی سر ءَ بازیں وھداں بیڑ ءَ دُژمنیں پوج ءِ گوم ءَ ھمگرنچ بیگ ءَ ھوار بلوچ ورنایانی زورانسری آوار جنی ءُ دروگیں میڑاں ورنایانی کُشگ ءَ اَبید ورنایاں چمپروشی کنگ آیاں چاگردی سلکاریاں کارمرز کنگ ءَ ھمگرنچ بیتگ-
بلوچستان لبریشن فرنٹ ءَ گوشتگ اے اُرشانی زمہ واری ءَ من ایں ءُ سرڈگار ءِ وتواجھی ءَ تاں پوج ءُ آئی ءِ چاریگانی سر ءَ اُرش ءَ برجاہ دار ایں-
بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں تمپ ءُ دکی ءَ چار جتاجتائیں کاروائیاں زورگریں پاکستانی پوج، مڈی بروکیں گاڑی ءُ ھال اِھوالی ٹاور نشانگ کتگ ءُ دُژمنیں پوج جانی ءُ مالی تاوان ءِ دیمپان کتگ اَنت-
آئی ءَ گْوشتگ کہ بی ایل اے ءِ سرمچاراں گوستگیں شپ ءَ تمپ، میرآباد ءَ زورگریں پاکستانی پوج ءِ یک پوسٹے اُرش نشانگ کتگ، سرمچاراں نوکیں سلاھاں چہ دُژمنیں پوج سر ءَ اُرش کتگ ءُ اے میان ءَ راکٹ ءُ گرنیڈ لانچر ءَ چہ دُژمنیں پوج ءِ سنگرجاھاں بازیں گولھے آس داتگ- اُرش ءَ زورگریں پوج ءِ کم چہ کم دو کارمند جاہ پہ جاھی مرتگ ءُ چار ٹپی بیتگ اَنت-
جارکش ءَ گْوشتگ کہ بلوچ لبریشن آرمی ءِ سرمچاراں گوستگیں روچ ءَ دکی ءَ رباط ھند سر ءَ بلوچ راجی مڈیانی لُٹ پُل ءَ ھمگرنچیں ٹرک نشانگ کتگ اَنت- سرمچاراں ٹرک ءِ ٹائرانی سر ءَ تیرگواری کتگ ءُ تباہ کتگ اَنت-
جارکش ءَ گْوشتگ کہ ھمے وڑ سرمچاراں گوستگیں شپ ءَ دکی ءِ دمگ رباط ءَ یک ھال اھوالی ٹاور ءِ مشینری مانداشتگ ءُ تباہ کتگ اَنت وھدے کہ پانزدہ دسمبر یکمشبے ءَ بی ایل اے سرمچاراں دکی ءِ دمگ پوڑی ءَ یک ھال اِھوالی ٹاورے نشانگ کتگ ءُ تباہ کتگ-
جارکش ءَ گْوشتگ کہ بلوچ لبریشن آرمی اے چاریں اُرشانی زمہ داریاں منّ اِیت-
شال ءَ سلاہ بندین مردمانی تیرگواری ءَ ڈپٹی کمشنر شال ءِ ڈرائیور زدگ بیتگ –
پولیس ءِ رد ءَ شال ءِ ھند شریپ آباد ءَ ناشناسیں مردمانی تیرگواری ءَ ڈپٹی کمشنر شال ءِ ڈرائیور شبیر اھمد زدگ بیتگ-
زدگ بیتگیں ڈرائیور شال ءَ ھسپتال ءَ برگ بیتگ ءُ پولیس وئیلجاہ ءَ سر بیتگ ءُ جرمکارانی پٹ ءُ پولے بندات کتگ-
کودکی، بی ایس او، ءُ بانک کریمہ
نبشتہ کار: سدو بلوچ
دی بلوچستان پوسٹ
من کسان اِتاں شر یات نہ انت بلے بگندئے اسکول ءَ دومی یا سیمی تبک ءَ وانگ ءَ اتاں۔ ھمے وھد ات کہ راجی جنز مئے ھند ءُ دمگاں وتی گاماں ھر روچ تیز تر کنان اَت، ھر روچ شور ودان ات۔ جھد اَت، آپریشن اَت، مھلوک اَت، زوراور اَت۔ یک ھالے اتک کہ فوج ءَ اینچو مردم برتگ، پد ءَ ھالے اتک کہ زھرشانی انت، ھالے اتک کہ فوج ءَ اینچو مردم ءِ جون پلاں ویرانگ ءَ دَور داتگ، پد ءَ ھالے اتک کہ ھرتال انت۔ آ زمانگ ءَ مئے دمگاں انٹرنیٹ ءُ سوشل میڈیا یے نیست اَت کہ کلوھے دو منٹ ءَ سرجمیں بلوچاں سر بہ بیت، نہ شھمیں راہ ءُ دگے ھست اَت۔ بلے ھمک ھال پہ وھد مھلوک ءَ سر بیت انت۔ چوش نہ اَت کہ یک ھالے روچے پشت بہ کپ اِیت یا ڈلگچار کنگ بہ بیت۔ ھمک کوچگ، کوہ ءُ گیابانانی ھال، شھر ءُ میتگانی ھال مھلوک ءَ سر بیگ ءَ اَت۔ اے ھالاں لس مھلوک ءَ سر کنوک بی ایس او اَت۔ اے نام (بی ایس او آزاد) ھرچ دیوال ءِ سر ءَ، ھرچ پمپلیٹ ءِ تہ ءَ نبشتہ ات۔ آ وھد ءَ ما بیدے اے بی ایس او ءَ دگہ بی ایس او نہ زانت۔
ما کسان اتیں بلے مارا اے نارہ پہ دل یات ات انت،
بلوچستان پر قبضہ نامنظور
آزاد بلوچستان زندہ باد
نہ ایران نہ پاکستان،
بلوچستان بلوچستان
ما عہد ءُ قسم پیمان کنیں،
آزات بلوچستان ءَ کنیں
لیب لیب ءَ، راہ ءُ رواجی، برے برے وتسرا پہ بے انانی ھمے نارہ چہ مئے دپ ءَ دراتک انت۔ اے نارہ مارا دوست ات انت۔ برے ھمے نارہ ما وتی کاپیانی تہ ءَ نبشتہ کت انت، برے کہ سیالیچکے یا اسکول ءِ سراتکگیں چاکے مئے دست ءَ کپت ما ھمے نارہ ءُ نام ھما دیوالانی سر ءَ نبشتہ کت انت کہ ھالیگ ات نت۔ من ءَ باز براں انگت سما بیت کہ پہ آشوب ءَ ما گونڈو چہ پیریناں گیشتر ھدوناک بیتگیں بِلّے کہ ما نزانتگ ات آشوب چے یے۔ یا تو بگش کہ مئے دل ءَ آشوب ءِ وتی جتائیں مانایے بیتگ۔ ما جیڑ اتگ اسکول ءَ نوکیں ڈیسک کیت، مئے کر ءَ اسپتال ءُ روڈ جوڑ بیت، میتگ ءِ لوگ پکا بنت، آسراتی بیت ءُ پرے واست ءَ ما ھمینچو گیشتر کہ مردم یکجاہ کنیں، ھمینچو گیشتر کہ زھرشانی کنیں، گشتانک دئیں ھمینچو ذوت تر آشوب کیت۔
بلے ھیر! من گپ ءَ اتاں کہ آ زمانگ ءَ دیوال شھر ءِ کاسد بیتگ اَت۔ ھمے دیوالاں مارا برے برے اے ھال ھم دات کہ پلاں جاہ ءَ بی ایس او جلسہ کنت۔ اے ھال کہ شھر ءِ گوشاں کپت گڑا تیوگیں بازار سر گپت۔ سنگل ڈور ءُ ڈبل ڈور گاڑیانی سر ءَ بی ایس او ءِ سھریں بیرک مِک ات انت۔ جنین ءُ مردین، پیرین ءُ کسانیں ھرچ کس ءَ کہ جاگہ کت آ نشت۔ ما کہ کسان اتیں مئے دل ءَ مدام جت کہ بلکیں مارا نہ بر انت گوں، گڑا ما پیسرا لُنٹ لونجان کت انت ءُ ھمے کہ روگ ءِ وھد اتک وتی دپ پچ لگوشت کہ بِلّے مارا بر انت گوں۔
بی ایس او ءِ ھمراھی ءَ دگہ نامے کہ ھمے جلسہ ءُ جلوسانی تہ ءَ نامدار ات آ ”بانک کریمہ” اَت کہ برے گشتانک دیگ ءَ اَت، برے نارہ جنگ ءَ اَت، برے مردماں یکجاہ کنگ ءَ اَت۔ ءُ ما۔ ما گیشتر پہ ھمائی ءِ گندگ ءَ، ھمائی ءِ گوشدارگ ءَ ھدوناک اتیں۔ نی ھمے کہ جلسہ ءِ یا ریلی ءِ ھال بیتگ ات ما وتی لونس یک روچے پیسر ایر دیان کت انت۔ نی ڈیسک، ھسپتال، روڑ ءُ وشھالی ءِ واب ءَ ھوار مئے دل ءَ دگہ وابے ءَ ھم جاگہ کتگ ات: ما کریمہ ءِ چارگ ءُ گوشدارگ ءَ رویں۔
من ءَ انگت شر یات انت کہ یک روچے من مسیت ءَ جُز ءِ وانگ ءَ پد لوگ ءَ واتر بیتگ اتاں، شھید صالح اتکگ ات مئے لوگ ءَ، ءُ آئی ءَ مارا ھال دات کہ باندا تمپ ءَ بی ایس او ءِ جلسہ انت۔ من مات ءِ گشان ءِ لمب داشت ءُ مات مجبور کت کہ من الم کایاں گوں۔ دومی روچ ءَ جنین، چک، بچک، پیرین ھرچ کس وتار ءَ جاگہ دیان ات۔ گاڑی پُر بیتگ ات انت ءُ من ھم گاڈی ءِ تہ ءَ نشتگ اتاں۔ گاڑی ءِ سر ءَ بی ایس او ءِ سُھریں بیرک مک ات ءُ ما نارہ جنان اتیں “ماتانی سریگ اِنت ،بی ایس او” ۔۔۔”ایک سرخ سمندر، بی ایس او” داں تمپ ءَ سر بیت ایں۔
تمپ ءَ ھرچ دیوال ءِ سر ءَ ڈاکٹر اللہ نذر ءُ شھید اکبر خان بگٹی ءِ نام نبشتہ ات، ءُ مردم۔۔۔ مردم ھمینچو باز ات کہ لٹ ءَ بجن لٹ زمین ءَ نہ کپ اِیت۔ اے ھزارانی تہ ءَ ات انت۔ من بھہ اینچو مردم مُچّی ءَ نہ دیستگ ات۔ گوں جلسہ ءِ بندات بیگ ءَ منی جان ءَ لرزگے زرت۔ مردمانی بازی ءَ یک تُرسے منی جان ءَ پاد اتکگ ات ءُ وھدے کہ بانک گپ ءِ جنگ ءَ اتک تہ مردمانی نارہ اجب گیشتر بیان بیت انت۔اے اولی رند ات کہ من بانک دیم پہ دیم دیستگ ات۔ بانک گپ ءَ ات ءُ مھلوک گوشداران ات، وھدے کہ بانک ءَ کَلھے بس کت مھلوک ءَ نارہ جت۔من بانک ءَ چارگ ءَ اتاں ءُ جیڑگ ءَ اتاں گندئے من ھم انچو زبر بیتیناں، انچو گشتانک بداتیں ءُ مھلوک ءَ منارا ھم انچو دلجمیءَ گوش بداشتیں ۔
اسل ءَ اے منی کودکی واھگ ات۔ آ زمانگ ءَ من نہ زانتگ ات کہ اے تھنا اسٹیج ءِ سری گپ نہ انت، گشتانک ءُ نارہ نہ انت، بانک عمل کنگ ءَ اِنت، پند بُرّگ ءَ اِنت، بیوانکیں راج ءِ توار جوڑ بیتگ ءُ راج ءَ را گشگءَ انت کہ دیم ءَ مناں، شما گوں بہ ات۔ مارا تھنا ھور بیگی انت، مئے ھوری ءُ تپاکی مئے منزل ءَ نزیک تر کنت۔ مارا چہ گُلامی ءِ نہ وشیں جاوراں رکّین اِیت۔
آئی ءَ تھنا ھبر نہ کُت، زوراکی ھم سگّ اِت، کار ھم کُت۔ لوگانی چاپہ، گرانیں راھانی دراجیں پند، ایف آئی آر، وڑ وڑیں پابندی، یکشلیں سرویلینس۔ بلے اے زوراکیاں آ نزور نہ کُت۔ اگاں بہ دیستیں، آ مُدام شھر پہ شھر، کوچگ پہ کوچگ تنظیم کاری کنگءَ اَت، پہ وتی ایردستیں مھلوکءَ اوشتاتگ اَت، دگانی سرا، کیمپسانی تہ ءَ، سیمینار ھالاں گشتانک دیگءَ اَت۔ مردماں پاد کنگ ءَ اَت۔
بانک کار ءَ مدام دیما اَت۔ چہ درستاں بودناک تِر، چہ درستاں توانا تِر اَت۔ آ راجءِ توان ءُ ھاٹیگ جوڑ بیتگ اَت چو کندیلے ءِ وڑ ءَ کہ مُدام تھاری ءَ بے ھاٹیگ کنت۔ گوں وتی شھیدی ءَ آئی ءَ کودکانی چم پچ کت انت، کودک سرپد کت انت کہ عمل چی یے؟ ءُ عمل ءُ واھگ ءِ میان ءَ تپاوت چی اِنت۔
مرچی آ اِد ءَ نہ اِنت، بلے اے آئی ءِ جھد ءِ برورد اِنت کہ مروچی بلوچستانءَ پہ جنین ءَ سیاست گران نہ اِنت، جنین بے توار نہ اِنت، آ اندیم نہ اِنت۔ من جیڑاں اگاں بانک مہ بیتیں، مرچی بگندئے مئے جھد ءِ رَنگ اے نہ بیتگ اَت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-
بلوچستان ءِ دمگ کلات ءَ زورانسری بیگواھیانی ھلاپ ءَ کھول ءَ روانک کش اتگ ءُ کراچی شھدگ بند کتگ-
گیشیں اھوالانی رد ءَ کلات ءِ دمگ منگچر ءَ بیگواہ کنگ بیتگیں مھمود بلوچ ءِ بیگواھی ءِ ھلاپ ءَ کھول ءَ زھرشانی روانک کش اتگ، ھمے وھد ءَ زالبول ءُ زھگ بازیں کچے ءَ ھوار بیتگ اَنت- آیاں زورانسری بیگواھیانی ھلاپ ءَ اوگام جتگ-
روانک ءَ پد کھول ءَ زھرشانی کنان ءَ کراچی شال شھدگ بند کتگ ءُ نندانک-
کھول ءِ رد ءَ مھمود ھژدہ جون دوھزار ءُ بیست ءُ چار ءَ پاکستانی پوج ءَ دزگیر کتگ ءُ پد ءَ بیگواہ کتگ چریشی ءَ پد آئی ءِ ھچ اھوال نیست اِنت-
کھول ءِ رد ءَ مھمود دانکہ یل کنگ نہ بیت اِنت زھرشانی نندانک برجاہ بیت اِنت-
یک سالے ءُ شش ماہ ءَ پیش گرگ بیتگیں یک مردمے یل کنگ بیتگ-
روکپتی بلوچستان ءِ دمگ ھاش ءَ یک سالے ءُ شش ماہ ءَ پیش کوش ءِ بھتام ءَ گرگ بیتگیں یک مردمے یل کنگ بیتگ-
یل بیتگیں مردم ءِ پجار عبدالجبار رھمت زادہ ء قلی جھمنند ھاش ءِ نام ءَ زانگ بیتگ-
اھوالانی رد ءَ عبدالجبار یک سالے ءُ شش ماہ ءَ پیش ھاش ءِ ھند اسماعیل آباد ءَ عنایت ء رضا نامیں مردمے ءِ کوش ءِ بھتام ءَ گرگ بیتگ ءُ پد ءَ آئی ءِ سر ءَ پاھو ءِ ھکم ھم اتکگ بیتگ –
اھوالانی رد ءَ آ زیکیں روچ ءَ زندان ءَ زمانت ءِ سر ءَ یل کنگ بیتگ-
کھولاں گوشتگ کہ اگاں مئے دوستناک دیم ءَ آرگ نہ بیت اَنت گُڑا ما لاچار بہ ئے ایں نندانک دے ایں-
بلوچستان ءِ دمگ کیچ ءِ شھر چہ تربت آپسر ءَ سیادی داروکیں زورانسری آوار جنی ءِ نشانگ بیتگیں شش مردمانی کھولاں مروچی تربت پریس کلب ءَ پریس کانفرنس کنان ءَ گْوشتگ کہ وتی دوستناکانی اِھوال رسانکدر درشان کتگ ءُ آیانی یل کنگ ءِ لوٹ کتگ-
تربت پریس کلب ءَ اِھوالکاراں چہ تران کنان ءَ تربت آپسر ءَ سیادی داروکیں یک کھولے ءِ رِد ءَ دہ دسمبر ءَ پاکستانی پوج ءَ آیانی سے برات احسان منظور ، اتفاق افضل منظور ءُ حامد منظور آوار جتگ ءُ ناشناسیں جاھے ءَ برتگ اَنت چریشی ءَ پد منی سئیں برات بیگواہ اَنت-
پریس کانفرنس ءَ ساڑی ئیں یک زالبولے ءِ رِد ءَ آئی ءِ لوگ ءَ چہ سے مردم زورانسری آوار جنی ءِ نشانگ کنگ بیتگ اَنت آیانی تہ ءَ شمس الدین چار سال ءَ ساری چہ تربت ءَ پاکستانی پوج ءَ زورانسری آوار جنی ءِ نشانگ کتگ-
زالبول رِد ءَ ھمے ماہ ءَ آئی ءِ کھول ءِ دگہ دو مردم آیانی تہ ءَ شھاب ھژدہ روچ ءَ ساری پاکستانی پوج ءَ آئی ءِ لوگ ءَ چہ آوار جتگ ءُ بیگواہ کتگ وھدے کہ عبدالوھاب نامیں دگہ یک کھول ءِ یکین اِنت گوستگیں پنچ روچ ءَ چہ بیگواہ ءَ اِنت-
اے کھولانی گوشگ اِنت کہ دوستناکانی زورانسری آوار جنی ءَ چہ سرجمیں کھول سک دلسیاھی دیمپان اِنت-
پریس کانفرنس میان ءَ کھول ءَ گوشتگ کہ مئے دوستناکانی سر ءَ کجام وڑیں بھتامے ھست آیاں چُشیں گناھے کتگ یا کہ کجام وڑیں میارباری یے دست ءَ بیتگ اِنت گُڑا آیاں آمیدگس ءَ پیش بہ کن اِت سپائی ءِ موہ بدے اِنت دانکہ گمجتیں کھولاں درد ءُ رنجاں چہ بہ رکین اِت-
کھول ءَ دیمتر ءَ گْوشتگ کہ ما اے پریس کانفرنس ءَ چہ کیچ ءِ دمگی انتزامیہ ءُ واکدار ءَ کلوہ دیگ لوٹ ایں کہ اگاں آؤکیں دو روچ ءَ مئے دوستناک دیم ءَ آرگ نہ بیت اَنت یا کہ مارا آیانی درگت ءَ سرپدی ندات گُڑا لاچار بہ ئے ایں ما نندانک دے ایں-
آیاں گْوشتگ کہ مئے نندانک سی پیک ءَ ھوار دگہ ھاسیں جاھے ءَ ھم بیت کنت چریشی ءِ ما جار جن ایں آئی ءِ سرجمیں زمہ واری دمگی انتزامیہ ءُ واکدار سر ءَ بیت-
