سیب ءُ سوران ءَ ناشناساں تیرگواری کنان ءَ دو مردم کشتگ انت-
گیشیں اھوالانی رد ءَ روکپتی بلوچستان ءِ دمگ سیب ءُ سوران ءَ ناشناسیں پرپٹ سواریں مردماں تیرگواری کنان ءَ دو مردم کشتگ انت-
بیران بیتگین مردمانی پجار سینا ایوبی ء درمھمد ءُ امیر چاکری ء رسول ھردوک سیب ءُ سوران ءِ جھمنند انت-
زانگ بہ بیت سال دوھزار ءُ بیست ءُ چار ءِ شش ماھانی توک ءَ دو سد ءُ دو مردم کشگ ءُ زدگ کنگ بیتگ اَنت-
جُھد ءِ راستیں ٹیلگ
نبشتہ کار : سنگین بلوچ
دی بلوچستان پوسٹ
کریمہ یَک اَنچیں جُھدکارے اَت کِہ ھما کار مردیناں سر زاھری کُت نہ کُت انچُش کِہ سیاست بِہ بیت مُلگِر ءِ تُرس ءَ ھمے کار کریمہ یک جوانیں دابے ءَ گوں دلیری وتی جند ءِ میتگ ءِ تہ ءَ بِنا کُتگ اَت سیاسی درس دیگ، مھلوک ءَ را سرپد کنگ کِہ سیاست چی یے، پرچا سیاست الّم اِنت پہ بلوچ ءَ ءُ گھگیری کُجام داب ءَ کنگ بیت اِے درستیں سرپدی کریمہ یک سکیں لاجوابیں رنگے ءَ مارا سرپد کُت ءُ شُت۔
من کریمہ چے پد سیاستدان ندیستگ ۔ کریمہ پہ وت جنگ ءَ نہ اَت آ پہ راج ءَ جنگ ءَ اَت پہ راج ءِ پھاز ءَ پہ کومیت ءَ مُدامی اوگان جنان اَت، دگّانی سرا در اَتکگ اَت کوکار ءَ اَت۔ نُک ءُ نادوکاں ھشک اَت ءُ مدامی تو بِہ دیستیں آئرا وتی جند ءِ پِگر نیست اَت ءُ ناکہ پہ اِے ھاتِر ءَ جھد ءَ اَت کِہ کسے بزانت کِہ کریمہ راج ءِ گم دِل ءَ اِنت۔ پہ کریمہ بلوچ ءِ جنگ ءُ بلوچیت اَچ درستیں چیزاں بالا اَت من داں ھوش داراں من کریمہ پہ گھگیری ءَ دیستگ۔ پہ بلوچاں اوشتگ ءَ دیستگ منی نِزّ ءَ کریمہ یک فرد ءِ اِناہ بلکیں یک سوچ ءُ پِگرے ءِ نام اَت۔ ھما سوچ ءُ پِگر کِہ ھمُک بلوچ ءِ دِل ءُ مجگ ءِ مٹین اِنت اَنت ءُ آھانی دل ءَ بلوچ ءِ مھر ءُ دردے رودینت۔
دوھزار ءُ ھژدہ ءَ اولی رند اَت کِہ من گوں کریمہ ءَ دیوانے کُتگ اَت ءُ گوں ھمے یکیں دیوان ءَ منی مجگ ءَ پہ کریمہ یک گِستائیں کِشکے جوڑ بوتگ اَت من سما کُتگ اَت کِہ کریمہ اگاں چیز بِہ بیت آئی مٹ دوبر ودی نہ بیت بِلّے سَتَر مئے راج ءِ توک ءَ زالبول بْیا اَنت، سیاست بِہ کن اَنت، بلے کریمہ کنڈ مدامی ھالیگ بیت ھما سوچ ءُ پگر کِہ کریمہ ءَ گون اَت ءُ ھما تربیت کِہ کریمہ بوتگ اَت کِہ آئی توک ءَ وتن پرستی، ھاک ءِ مِھر، وتی راج ءِ درواری ھست اَت آ مئے توک ءَ کدی بوت نہ کنت۔
اِے گپ راستیں کِہ بلوچ ءِ زمین سنٹ نہ اِنت ھزاراں کریمہ ودی کُتگ ئے بلے انگت من جزم گوشاں کریمہ ءِ کنڈ ءِ پُر کنگ دھرے پکار اِنت باور کن من وَت نہ زاناں چیّا من اِے داب ءَ جیڑگ ءَ اِت آں، کریمہ آ ساھتاں زندگ اَت، ھست اَت، جھد ءَ اَت گڑا من چیّا اِے داب ءَ چُرت جنگ ءَ اِت آں کِہ اگاں کریمہ ءَ چیزے بِہ بیت تَہ نہ مان اِیت پہ بلوچ ءُ جُھد ءَ ھِچّ! دیوان گوں جوانیں رنگے ءَ دیم ءَ شُت، سیاست، بلوچ، بزگی، اِے درستیں جیڑھانی پِگر کریمہ ءَ ھست اَت۔ کُجام جاہ ءَ کُجام کار کُجام وھد بِہ بیت اِے کُلیں ھبرانی چُرت اَت۔تمپ ءِ میتگ، شال ءِ جلواہ، بلوچستان زیبائی ءُ جنگ ءَ آماچیں زمین کِہ آئی زھگ اَت کریمہ اِے درستانی بابت ءَ آئرا انچیں مِھرے دِل ءَ اَت کِہ ھمُک گپ ءَ چے رند، ھمُک دیوان ءَ رند تو سما کُت کِہ آ بھانہ سازگ ءَ اِنت کِہ چونی ءَ بیرگ ءَ آ وتی زمین ءِ کسھاں بیار اِیت۔
دسمبر اَت گوں سارتیں بوم ءَ وتی سرجمیں آتراپ ءِ پتاتگ اِت اَنت، سال ءِ گُڈسر اَت ھمُک بنی آدم گوں وتی درد ءُ رنجاں دسمبر ءَ ڈوبارگ ءَ اَت کسے ءَ وتی دوستدار ءِ درد دل ءَ اَت کسے ءَ ماتے ءِ روَگ ءِ گم کُشگ ءَ اَِت ءُ کسے وتی رپتگیں بیلی ءِ یاتاں زَرَگ ءَ اَت ناگتہ تئی رپتن ءِ ھال مارا انْدر ءَ چے پروش دات ءُ گیدی ءِ ھمُک ندارھانی رنگ مٹ اِت امبری ئیں دسمبر ءَ چے پد کَس ءَ آیوکیں دسمبر ءِ چُرت ءَ وتی روچانی ھساب نہ داشت پہ راجے ءَ چِد ءُ مستریں روچ نئیتکگ اَت بیرگ ءَ ھمُک رنگ بدجلواہ ھمُک بچکند زدگ ءُ ھمُک کندگ زیمیگ۔
من داں دومی دیوان ءِ ھیال ءَ کپتاں کِہ اَچ تئی مرگ ءَ ساری یک روچے بوگّی اَت داں من پچلرز اِت آں کِہ ناگتہ جھد ءِ دیوال چو اے داب ءَ پروشت کنت، بیرگ ءَ بلوچ ءِ زمانگ چونی ءَ تھار بوت کنت، اِے وَ گپے نہ بوت کِہ نوں سیاسَت ءِ ڈیل ءُ بالاد کروتگ اَنت اِے ھم باوری دانکے نئے کِہ نوں سیاسی پتر چو ناگتہ پتاھگ بہ بنت پہ من وَ تئی رپتن ھَم کدی باسمائیں پیسلھے نہ اَت من مُدام جیڑاں کہ شرّیں ءُ نگدیں مردُم ءَ بائدے مرگ ءَ را شات مہ بنت پہ وت ءَ پرچا کِہ جھان ءِ سازوک نگدیں مردُم اَنت ءُ راجانی پھازوک بانوکیں بالادانی کار اِنت بلے بدکستمی ءَ بچار مئے! اِے کُلیں ھبرانی تھا دروگ تھنا ھمیش اَت کِہ من گوں وتی ھیالاں بندگ ءَ اِت آں کِہ کریمہ مُرت نہ کنت کریمہ مرگی نہ اِنت ءُ مرگ ءَ ھم کریمہ پہ وت ءَ شات نہ بیت ءُ راستی جار جنگ ءَ اَت کہ کریمہ مُرتگ ءُ دیر اِنت ساھے چہ باتِن ءَ لگوشتگ۔
کورے ءِ نیام ءَ برپ بستگیں جونے دیستگ ءُ ناگتہ مردُماں منّ اِتگ کِہ کریمہ بوتگ ما ھما موسُمی راج ءُ راج ءِ اوبادگ کِہ ما ھم باور کُت کہ ھو مَرگ راہ ءِ ھک اِنت ءُ ھو کریمہ ھم مُرتگ۔ دژمن اِے داب ءَ لگوری کنت کہ آئرا اَچ جنین ءِ ھستانک تُرس بئیت گڑا تَہ بزان کِہ کریمہ چونیں ارشی ٹُکرے بوتگ! مُلگِر ءَ مُدامی اَچ آ مردُم بیم کئیت کِہ آ وت ءَ چے گیش راج ءِ سوڑگ ءِ ھبر ءَ کنت کریمہ مرگ اِے ھبر ءِ پدری ءَ کنت کِہ آ راج ءِ یک راستیں ٹیلکگے بوتگ لُمہ ءَ چہ پد گُڑا نا شال ءِ آبشاراں کدی آئی ٹھکانی توار اَت ءُ ناکہ تمپ ءِ دمکاں سیاسی درسگاہ آباد بوت اَنت کریمہ کِہ رپت تَہ زمانگے رپت گوں آئی جُنزگ ءَ ءُ ما بَس تھنا لھتیں جون پشت کپتگیں کہ وت ءَ راج ءِ دروار لیکیں۔ سیاست ءِ نام ءَ ھزاراں سلکاری کن ئے ءُ نام ءَ دئے کِہ ما سیاست کنگ ءَ اِیں، ما دیوان اڈ دیگ ءَ اِیں ۔
بلے لُمہ گوں تو ھُنر کُت نہ کناں ءُ ترا ھال دیگ لوٹاں ھما کشک کِہ تو راست کُت ءُ شُت ئے آئی توک ھزاراں چپ ءُ چوٹی اَتکگ ھزاراں ھُنر ءُ ھیلہ ما کنگ ءَ اِنت بلوچ ءِ نام ءِ پُشتہ جاھے پہ وتن دوستیں ءُ جاھے ما روتگ بُریں تئی ھک ءُ ھلاریں کشک ءِ میان ءَ بازیں نوکیں کارِست ودی بوتگ کِہ تھنا پہ وھد ءُ موسم گِندگ ءَ کا اَنت ءُ من کِہ اِشاں گِنداں تَہ جیڑاں اِے ساھتاں تو اِد ءَ بوتین اِت ئِے تو الّم ءَ راہ گیشین اَنت ءُ مارا سوڑگ ءِ نیمگ ءَ بُرتگ اَت ءُ مئے گُلامی ءَ را زُبانے داتگ اَت کِہ دپ وت جار بِہ جتین ئے کہ من نیزور بوگ ءَ آں ـ کریمہ پھل کن کِہ منی اِے نبشتہ تئی بالاد ءِ ستاہ ءَ کمے ھَم کنگ ءَ نہ اِنت ۔
“تو پہ سرانی گُڈگ ءَ زند ءِ ھیالاں” “کُش ئے پہ سندگ ءَ داشت کن ئے پُلاں چہ بو تالانی ءَ “
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-
روکپتی بلوچستان ءِ بنجاھی شھر زاھدان ءَ مکی مسیت ءَ دو ٹک ھسن زئی ءُ شھنوازی رلرنجیانی ھلاس کنگ ءِ وھد ءَ مولانا عبدالحمید اسماعیل زئی ءَ آوار جنگ ءَ پد ورنا ءِ کوش ایر جتگ-
اھل سنت روکپتی بلوچستان ءِ سروک مولانا عبدالحمید ءَ گوشتگ اے ناشناسیں مردماں ورنا ھکمت نورزئی آوار جتگ ءُ پد ءَ آئی ءِ لٹ ءُ کُٹیں لاش چگل داتگ اے سک دردناک اِنت-
آئی ءَ گوشتگ اے وئیل ءَ ھمینکس ایر بہ جن ئے انگت کم اِنت کہ آ لٹ ءُ کٹ ءَ پد کشگ بیتگ-
آئی ءَ گوشتگ من سرجمیں سیستان و بلوچستان ءِ مھلوک ءَ گوں دزبندی کن آں اے وڑیں وئیلانی دارگ ءَ گامگیج چِست بہ کنت ءُ دارگ بہ بنت-
ھمکت نورزئی کے انت؟
بیست ءُ یک سالی ئیں ھمکت نورزئی نعمت اللہ ءِ زھگ اِنت آ زاھدان ءِ جھمنند اِنت آ سِی ءُ ھپت روچ پیش ناشناسیں مردماں آوار جتگ ءُ برتگ کہ آئی ءِ کھول ءَ کلوھی دروشم ءَ آئی ءِ لٹ ءُ کٹی تامر بند جوڑ کتگ ءُ بازیں ھسابے ءَ زَر ءِ ملام کتگ کہ زَر بہ دے ات رند ءَ شُمے زھگ یل کنگ بیت اِنت-
بلے آئی ءِ سرجم نہ بیتگ اَنت ءُ دو شمبے ءِ روچ ءَ پولیس ءَ آئی ءِ لاش ماں زاھدان ءَ دزکپتگ ءُ چار ءُ ٹپاس ءَ پد لاش کھول ءِ ھوالگ ءَ کنگ بیتگ-
تامر بند ءَ گندگ بیت اِنت کہ آئی ءِ چم ءُ دست بستگ اَنت ءُ آ لٹ ءُ کُٹانی نشانگ کنگ بیتگ-
بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بی ایل اے ءِ سرمچاراں تربت ءُ کلات ءَ دو جتاجتائیں اُرشاں زورگریں پاکستانی پوج ءُ چیریں ادارھانی دو چاریگ ءُ کاردار کشتگ اَنت-
جارکش ءَ گْوشتگ کہ بی ایل اے ءِ سرمچاراں مروچی ساھت یک نزیک ءَ تربت ءِ دمگ میری ءَ زورگریں پاکستانی پوج ءِ کاردار کامران ء عمر جھمنند میری تیرگواری کتگ کُشتگ ءُ آئی ءِ سلاہ ھم دستیگ کتگ اَنت-
جارکش ءَ گْوشتگ کہ چاریگ کامران زورگریں پوج ءِ چیردستی ءَ گوستگیں بازیں وھد ءَ چہ کار کنگ ءَ بیتگ ءُ دُژمنیں پوج ءِ چیردستی ءَ سلاہ بندیں ٹولی جوڑ کتگ ءُ آئی ءِ سروکی ءَ کنگ ءَ بیتگ- اے سلاہ بندیں ٹولی میری ءِ کش گور ءِ دمگاں لوگانی سر ءَ بیڑ، دودمانی لگتمالی، ورنایانی زورانسری آوار جنی ءَ زورگریں پوج ءِ ھمراھی ءَ تچکی ءُ ھوار بیتگ-
جارکش ءَ گْوشتگ کہ اے سلاہ بندیں ٹولی دمگ ءُ پوجی زوراکی ءُ راھانی بندگ دُژمنیں پوج ءِ کمکاری ءَ کنگ ءَ بیتگ وھدے کہ اشی ءِ لب زورگریں پوج نیمگ ءَ چہ منشیات فروشی، دُزی ءُ زرگرگ ءَ بے لگام کتگ-
آئی ءَ گْوشتگ کہ بی ایل اے ءِ انٹیلی جنس ونگ زراب ءَ، چاریگ کامران ءِ ٹولی ءَ ھمگرنچیں دگہ سرجمیں مردمانی نشان ءُ سرپدی دزکپتگ، آیاں زوت کامران ءِ وڑ ءَ گُڈی آسر ءَ سر کنگ بیت-
جارکش ءَ گْوشتگ کہ بلوچ لبریشن آرمی ءِ سرمچاراں سی نومبر دوھزار بیست چار ءَ کلات شھر ءِ سبزی منڈی ءَ یک کاروائی ءَ پاکستانی پوج ءِ چیریں ادارھانی ملٹری انٹیلی جنس ءِ کاردار ءُ چاریگ ھدایت اللہ پنّام ءِ جڑی بوٹی تیرگواری کتگ کُشتگ-
جارکش ءَ گْوشتگ کہ ھدایت اللہ زورگریں پوج ءِ ایم آئی ءِ واستا بازیں وھدے ءَ چہ چاریگری ءُ کمکاری ءِ کار ءَ کنگ ءَ بیتگ وھدے کہ کلات ءَ بی ایل اے ءِ یک اُرشے ءَ کشگ بیتگیں محمود آفریدی ءِ نیٹورک ءَ چہ ھمگرنچ بیتگ ءُ وتگڑیں ڈیتھ اسکواڈ ءَ ھمگرنچ بیتگ-
جارکش ءَ گْوشتگ کہ چاریگ ھدایت اللہ کلات شھر ءَ چاریگری ءُ زورگریں پوج واستا لوگ ءَ کارزورگ ءَ ھوار لوگانی سر ءَ بیڑ ءُ زورانسری آوار جنی ءَ دُژمن واستا کمکاری ءَ ھمگرنچ بیتگ- بلوچ چکچینی ءِ کار ءَ ھمگرنچی ءَ ھدایت اللہ پنّام جُڑی بوٹی بی ایل اے ءِ سرمچاراں کشتگ ءُ گُڈی آسر ءَ سر کتگ-
جارکش ءَ گْوشتگ کہ بلوچ لبریشن آرمی اے دوئیں اُرشانی زمہ واری ءَ منّ اِیت-
بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءَ گوشتگ ھژدہ دسمبر ءَ چار شمبے ءِ بیگاہ ءِ چار ءَ ھمزھی تمپ ءَ پاکستانی پوج ءِ چوکی نوکین ءُ مزنیں سلاھانی گون ءَ اُرش کتگ کہ چریشی ءِ آسر ءَ دشمن ءَ جانی ءُ مالی تاوانانی دیمپانی کنگ کپتگ-
آئی ءَ گوشتگ زورگریں پوج گنوکیاں گپتگ ءُ وتی چیریں ادارھانی ھمراھی ءَ لس مھلوک ءِ سر ءَ اُرش کنت ءُ آیاں زورانسری بیگواھیانی آماچ کنت اِنت – لس آبادی ءِ سر ءَ بیڑ بارت ءُ مھلوک ءِ آبادیں جاھاں سوچ اِیت – ڈیھ ءِ تچکیں پُسک آئی ءِ بنجل ءُ چوکیانی سر ءَ اُرش کن اَنت گڑا آئی ءِ گور ءَ بس تچگ ءَ ابید دگہ راہ پش نہ کپ ایت-
جارکش ءَ گوشتگ بی ایل ایف اے اُرش ءِ زمہ واری ءَ من ایت ءُ آجو بلوچستان ءِ رھبندانی تک ءَ زورگریں پوج نشانگ کنگ بیت اِنت-
کیچ ءِ بُنجاھی شھر چہ تربت آپسر ءَ دہ دسمبر ءِ شپ ءَ پاکستانی پوج دست ءَ زورانسری بیگواہ کنگ بیتگیں سئیں براتانی تہ ءَ دو حامد منظور ءُ احسان منظور گوستگیں شپ ءَ یل کنگ بیتگ ءُ وتی لوگ ءَ سر بیتگ اَنت وھدے کہ سیمی برات افضل منظور انگت بیگواہ ءَ اِنت-
زانگ بہ بیت کہ سئیں برات یکیں وھد ءَ شپ ءَ لوگ سر ءَ بیڑبرتگ ءُ بیگواہ کتگ-
کھول ءَ کمشنر مکران ڈویژن، ڈپٹی کمشنر کیچ ءُ انسانی ھکانی گلاں چہ افضل منظور ءِ یل کنائینگ ھاتر ءَ کمک دزبندی کتگ-
بلوچستان ءِ تیابدپی شھر گوادر ءَ یک مردمے چیرین ادارھانی دست ءَ آوار جنگ ءَ پد بیگواہ کنگ بیتگ-
گیشیں اھوالانی رد ءَ گوادر ءَ سیمسری ھند دو بیست ءُ پنجاہ ءَ مروچی بیگاہ ءِ ساھت سَے بج ءَ پاکستانی چیریں ادارھاں دشت ءِ جھننندیں مردمے آوار جنگ ءَ پد بیگواہ کتگ –
آوار جنگ بیتگیں مردم ءِ پجار ندیم ء پشمبے جھمنند بلنگور کلیرو ءِ نام ءَ زانگ بیتگ –
اھوالانی رد ءَ ساھت سَے چیریں ادارھانی کارندھاں ندیم جاوید ٹرانسپورٹ ءِ نزیک ءَ آوار جتگ ءُ برتگ-
راجی جیڑہ ءُ ھک ءِ ھاکمی
نبشتہ کار: ڈاکٹر عنایت اللہ بلوچ
رجانک: اَرپ وپا بلوچ
دی بلوچستان پوسٹ
بیستُمی کرن ءَ اپریکا ءُ ایشیا ءِ توک ءَ بازیں ھستانی راج state Nations دنیا ءِ ُمل بت (نقشہ ) ءَ زاھر بنت سیاست ءُ راجدپتر ءِ تہ ءَ اَ مگربی زانگ ءُ گشگ نہ بنت چیاکہ اے ملک ءُ راجانی رودوم گلامی ءِ چاگرد ءَ بیتگ ۔
اشانی تہ ءَ راجدوستی (نیشنلزم) یک مھکمیں اوستے جنوب مشرقی ایشیا ءِ مل بت (نقشہ) ءِ سر ءَپاکستان ءُ ایران ءِ وڑیں مُلک ھم ھست اَنت پد ءَ اے مُلکانی توک ءَ جتا جتائیں رنگ ءُ نسل ، نیکراھی راجی ءُ ،دود ءُ ربیدگی پرک ءُ پیر اڑ ءُ جنجال ھست اَنت دومی اے راج گیشتر چہ -راجدوستی ءَ ماسگ اَنت ءُ ھک ءِ ھاکمی ءِ لوٹ ءَ کن اَنت
اے ھستانی راجانی state Nationsاَکبت چی بیت؟گندگ ھمے کیت اے ھستانانی راجی زند ءُدودمان ءِ رکھگءِراہ ءُ درگوں نیشنلزمءُ راجدوستی ءَ ھوں بندوک اِنت بُندر ءَ اگاں چارگ بہ بیت نیشنلزم راجدوستی، یک کوم ءُ راجے ءِ ھما مھلوک کہ اشی ءِ اِلم ءُ اَگھی ءَ سرپد اِنت ھمے جَد ءُ جھد ءِ نام اِنتجان اسئورٹ مِل راجیءِ پجّار ءَ اے وڑ ءَ کنت “بنی نوع انسان ءِ ھما ٹولی اِنت کہ آ ھواریں نپ ءُ سیتانی ھاتر ءَ یکجاہ بہ بنت ، کوم ءِ گشگ بنت، پد ءَ اے انچیں یکجاھی یےکہ دومیگانی تہ ءَ گندگ نَیت، ھماکہ یک ملکے ءِ ھاکمی ءِ تہ ءَ وتی رزا ءَ نندگ لوٹ اَنت ءُ وتی ھاکمی ءِ لوٹ ءَ کن اَنت۔
مارا اے گپ زانگی اِنت کہ پاکستان، ایران ءُ اپگانستان ءِ سیمسربندی زورگیریں ءُ لٹ پل کنوکیں ملکاں کتگ ، پدا اِشانی زمینی نزیکی ،راجدپتری نزیکی ،دود ءُ ربیدگی نزیکی چارگ نہ بیتگ اَنت۔
پد ءَ اے ملکانی سیمسر انچش اَنت کہ اود ءَ جتا جتاھیں کوم ءُ نسل اَباد اَنت ھمے سوب اِنت کہ اے ملک گوں اے جتاھیں ٹکاں بھر ءُ بانگ زانگ بنت،بلوچستان ءِ سیمسر ابید ءِ بلوچ راج ءِ رزا ءَ نوزدمی کرن ءَ بھر ءُ بانگ کنگ بیتگ اَنت بلوچ راج ءَ اشی ءِ بگیری ءَ نہ تھنا کوکار کتگ بلکیں سلاہ بندیں جھد ھم کتگ۔
1930ءَ بلوچ راج دوستاں اے بھر ءُ بانگ ءِ بگیری ءَ وتی نہ وشّی درشان کتگ ءُ زھرشانی کتگ ،1947 ءَ بلوچستان اَجو بیت اَئی ءِ اَجوئی ءَ دنیا ھم منّ ایت پد ءَ درستیں بلوچ ھند ءُ دمگاں یکجاہ کنگ ءَ وتی مکسد سرپد بیت، پدا 1948 پاکستان بلوچ راج ءِ وتواجھی ءُ ملکی شرپ ءَ نہ کنت ءُ الھاق ءِ نیمون ءَ بلوچستان ءَ گوں وت ھوار کنگ ءِ گپ ءَ جَنت پد ءَ وتساچیں برتانوی بلوچستان ءُ بلوچستان ءِ ٹکی میر ءُ سرداری ھند ءُ دمگانی جیڑہ برتانوی داشتگیں زرھریدیں ٹکی کونسل ءِ نام ءَ گیش ءُ گیوار کنگ بنت.
پاکستانی دانشور ءُ ھکومتی جھگیر اَل انڈیا مسلم لیگ ءِ ھما مجلس ءِ درور ءَ دینت کہ 1940 ءَ لاھور ءَ برجاہ ءَ دارگ بیتگ اَئی ءِ تہ ءَ برسگیر ءِ جتاھیں مسلمان ملکانی اڈ کنگ ءُ دیم ءَ ارگ ءِ یک اھد ءُ پیمان ءِ بندگ بیت بلے اد ءَ اے گپ یات دارگی اِنت کہ ھمے وھد ءَ مسلم لیگ کرارداد پاکستان یا کرار داد ءِ لاھور 1940 ءَ سوبین کنگی بیتگ پد ءَ ھمے زمانگ ءَ مسلم لیگ ءِ پاگواجہ مھمد الی جِنا ھان اَپ کلات ءِ کانودی مشیر جھگیر بیتگ ءُ بلوچستان ءِ اَجوئی ءِ ھاتر ءَ کانودی جّنگ ءَ بیتگ اے گپ ھم زانگی اِنت کہ راجدپتری پتر ءَ بلوچستان ءِ ھچ جھگیر ھوار نہ بیتگ اے درستان ابید 1947 ءَ بلوچستان اَجو بیتگ اَئی ءِ اَجوئی باکستان ءَ ھم مَنّ اِتگ پدا 1948 ءَ برتانوی پندلانی ھمبراھی ءَ پاکستان بلوچ راج ءِ رزا ءَ ابید کلات ءَ گوں الھاق ءِ نیمون ءَ بلوچستان ءِ اَجوئی ءَ پّل ایت ایران ءُ پاکستان ءِ بلوچستان ءَ پہ زور ھوار کنَگ ھک ءِ ھاکمی ءِ جیڑہ ءَ پاد کنت۔ اے ھک چی یے؟
اے گالبندءِ زگریںءُ یک پجّارے کنگ گران اِنت بلے ما کمے ایشی ءِ سر ءَ چمشانکے دئے ایں ۔
،،ھک ءِ ھاکمی ،، ءِ بزانت ھرچ راج ءَ اے ھک ھست اِنت یا اے ھک دیگ بہ بیت کہ اَئی ءِ ھاکم ءُ ھکومت کئے بہ بنت کئے مہ بنت۔ اے ھستں وھدءِ راجدوستیءِ بن روتگ زانگ بیت ۔ دومی گلامیں راجانی گلامی ءِ سانکلانی سندگ ءِ مانزمان ھم زانگ بیت۔ ,,کوبن،، ھک ءِ ھاکمی ءِ شُبین ءَ چش مانا کنت ءُ گش ایت کہ ھرچ راج ءَ یک جتاھیں ملکے ءُ اَئی ءِ سر ءَ کئے ھاکمی کنت اے ھک دیگ بہ بیت ۔
سلاسی نبشتہ کنت کہ،، ھک ءِ ھاکمی ءِ لیکہ ھما راجانی مرزی ءُ واھشتانی رد ءَ بہ بیت کہ اَیانی سرا کسے ھاکمی کنگ اِنت ۔ایمرسن نبشتہ کنت کہ،، نوزدھمی کرن ءَ ھمے گپ آشکار بیتگ کہ انسان یک راجی ھیوانے اَ بس ھمائی ءِ ھاکمی ءَ کبول کنت کہ اَئی ءِ وتی راج بہ بیت ۔
ھک ءِ ھاکمیءِ گالبند ءِ بازیں بزانت ءُ پشدر بیت کن اَنت یورپ ءِ توک ءَ ایشی ءِ واستہ راجی وتواجھی ءِ مانا زیرگ بیت ءُ شہرانی تھا ایشی ءِ بزانت نوک آبادی ایں وتواجھی زانگ بیت .
پمیشکہ لینٹ نبشتہ کنت کہ وتواجھی ءِ گال اشکنگ ءَ سک ارزان اِنت بلے سک پیچ ءُ تاب ءُ گران اِنت ۔ھینزکھن نبشتہ کنت کہ اے اَگھی ھما مرد ءِ دماگی چست ءُ ایر ءِ برورد اِنت کہ آئی ءِ تہ ءَ وتی ملک ءَ گوں مھر بہ بیت ءُ وتی راجی ملک ءِ ھاتر ءَ تھنا پکرمند بہ بیت ۔دومی نیمگ ءَ ایدگہ راجاں وت ءَ جتا لیکگ ءِ ھیال ءُ زانت ھم وتواجھی ءِ لوٹ ءَ ودی کنت ۔
کارڈیوشن ءِ نزیک ءَ ھما راج وتی میان ءَ نزیکی ءُ تِپاکی ودی کت مہ کن اَنت آ راجی وشھالی آرت نہ کن اَنت ،اَ یک راجی ملکے ءِ پچگرگ ءِ ھاترا ھما راج ءِ نزیکی ءُ ھال ءُ اھوال ءَ سک بستار دنت۔
ھک ءِ ھاکمی ءِ دست گرگ ءِ ھاترا ترا بازیں پند بُرگ لوٹ اَنتمگرب ءِ توک ءَ وتواجھی ءِ راجدپتر وتی راجی ھاکمیءِ پچگرگ زانگ بیت ۔ایشی ءَ ھژدُھمی کرن ءَ امریکی ءُ پرانسیسی اَشوب ءَ چہ رُدوم زرتگ یاکہ اَئی ءِ تہ ءَ چہ ودی بیتگ وھدیکہ برابری ءُ آزادی ءِ لوٹ چست بیت نوزدھمی کرن ءَ وتواجھی مارکس ءُ اینگلز ءِ نبشتانکاں شَری ءَ گندگ بنت۔ رندتر ءَ بزاں بیستمی کرن ءَ لینن ایشی ءَ جوانتر آشکار کنت بنگیج ءَ اولی جھانی جنگ ءِ ھلاسی ءَ پد سرکماش سدر ولسن ءُ ایدگہ راھشوناں جھانی تک ءَ وتواجھی ءُ ھک ءِ ھاکمی ءِ گالبند کارمرد کت اَنت، بلے اگاں چارگ بہ بیت جنگ ءَ چہ رند ایشی ءِ کارمردی یورپی سیمسربندی ءِ وھد ءَ گیش کنگ بیتگ اَنت۔ پدا دومی جھانی جَنَگ ءَ رند اے گالبند کارمرد کنگ بیتگ اَنت مارکس ازم لینن ازم کمیونزم یک گیر تبکاتی چاگرد ءُ راھبند ءِ نام اِنت پمیشکہ آ نیشنلزم ءَ پوریاگر ءِ ھک جَنی سرپد بیت ۔
ھمے واستامارکس ءُ اینگلز ءَ 1915 ءِ زمانگ ءَ راجی وتواجھی ءِ نیمگ ءَ دلگوش گور نہ کتگ اَت۔
مارکس وتی اُمر ءِ گڈّی سیمسراں کہ بیت آ آھرلینڈ ءِ راجی جیڑہ ءِ نیمگ ءَ وتی دلگوش ءَ گور کنت اَ روس ءِ دیم ءَ پولینڈی راج ءِ وتواجھی ءِ منوگر بیت ۔ آھرلینڈ ءِ جیڑہ ءِ سر ءَ چمشانک دیان ءَ آ وتواجھی ءِ درگت ءَ تران کنت۔ اول مارکس برتانوی ھکومت ءِ بھرے بیت بلے آ ھمے اُگدہ ءَ گوں اَھرلینڈ ءِ وتواجھی ءِ گپ ءَ جنت پدا رندتر ءَ آ ھمے مار ایت کہ انگریز پورپاگرانی اَجوئی ءِ ھاتر ءَ پولینڈ ءِ اَجوئی اَلمی اِنت ۔ مارکس ءُ اینگلز ءَ اے گپ تچک ءَ جَتَگ کہ یک راجے دومی راج ءِ سرا زلم ءُ زوراکی کنت اَ ھجبر دیمروئی کت نہ کنت ۔ آیاں برتانوی زوریں ائرلینڈ ءِ سر ءَ یکجاھی ءِ مزاھمت ھم کتگ ایاں گوں پوریاگر انگریزاں ھم ھمے ارز ءُ لوٹ کتگ کہ آ ائرلینڈ ءِ اَزادی ءِ جنز ءَ را کمک بہ کن اَنت ۔
1853 ءَ اینگلز ءَ سلطنت عثمانیہ ءِ بلکان راجانی راجی جیڑھانی درگت ءَ اَئی ءَ سرپدی ءُ سما بیت رندتر ءَ آ سلطنت عثمانیہءِ بھر ءُ بانگ ءِ ھک ءَ گپ جنت دانکہ بلکان ءِ بزگیں راج وتی وتواجھی ءَ گپت بہ کن اَنت۔ راجی وتواجھی ءِ درگت ءَ لینن مارکسی لیکہ ءِ سک منّوگر بیت اشی ءَ گیش مھکم کنت لینن روسی اَشوب بالشویک ءَ چہ باز پیسر 1903 ءَ اے جیڑہ ءِ نیمگ ءَ دلگوش گور کنت ءُ دراھیں راجاں وتواجھی ءِ پیگام ءَ دنت۔ سویڈن ءَ چہ ناروے ءِ جتائی ءِ درگت ءَ نبشتہ کنت۔
کہ، ناروے ءُ سویڈن ءِ میان ءَ زمینی نزیکی، مالی ءُ دود ءُ ربیدگی نزیکی ھمے پیم جھل اَنت کہ ھمے پیم روس ءُ سلاوز ءِ راجانی اَنت بلے پد ءَ ھم ناروے ءُ سویڈن ءِ میان ءَ اے نزیکی وتی رزا چہ نہ بیتگ بلکیں نپولین ءِ جنگانی زمانگ ءَ ناروے راج ءِ سر ءَ زورگیپتی بیتگ ابید ءِ اَیانی رزا ءَ اَ گوں سویڈن ءَ ھوارکتگ اَنت اے زوراکی ءِ واستہ سویڈن ءَ پوج کشی ھم کتگ اشی ءَ ابید کہ ناروے مزنیں کچے وت واک ھم بیتگ ھمے پیم کہ اَئی ءِ وتی پارلیمنٹ ھم بیتگ، اے زورگیپتی ءِ سوب ءَ بازیں سالے ءَ ناروے ءُ سویڈن ءِ میان ءَ جیڑہ سرکشّ اَنت پد ءَ ناروے راج چہ سویڈن ءِ گلامی ءَ درکپگ ءِ ھاتر ءَ گوں ترندی ءَ جد ءُ جھدءَ بندات کنت۔ جھد آسر سوبین بیت 1905 ءَ ناروے راج گچینکاری کنگ ءَ سوبین بیت دولک ءَ چہ برز مھلوک سویڈن ءَ گوں ھوار نہ بیگ ءِ ھاترا ووٹ دنت ھمے پیم ناروے چہ سویڈن ءَ وتی اَجوئی ءَ گپت۔ سویڈن ءُ ناروے ءِ اے جیڑہ ءَ گوں جوانی ءَ سرپد بیگ ءَ پد لینن مارکیسٹ ءُ اَشوبیاں گوں تران کنان ءَ گش ایت کہ یک انچیں ترندیں روانکے ءِ دروشم ءَ دنیا ءِ راج سرپد کنگ بہ بنت یاکہ ھمے جنز ءِ بھر،سمائی رنگ ءُ دروشم ءَ کنگ بنت۔ پدا اے کلانی میان ءَ یک ھال ءُ اھوالی رپتے ھم بہ بیت 1905 ءَ ھرچی کہ سویڈن ءُ ناروے میانجی بیتگ اَت یاکہ روس ءِ بالشویک گل پارٹی ءِ ھک ءِ ھاکمیت ءِ لوٹ بہ بیت اِے کل یک اَنت ۔ دومی نیمگ ءَسویڈن ءَ چہ ناروے اَجوئی ءِ جنز ءِ سرا تراَن کنان ءَگش ایت پد ءَ آ سویڈن ءِ مارکسٹاں ءُ سوشلسٹاں ھمے کلو ءَ دنت کہ اگاں شما زورگریں سویڈن ءِ دیم ءَ پہ ناروئے ءِ ھک ءِ ھاکمی ءِ ھاترا ترندیں جد ءُ جھد نہ کن ئے من ھمے سرپد باں اے گوں شمئے راجدوستی یا گوں ھک ءُ انساپ ءِ جنز ءَ تچگ ءُ لگوری ءَ پدر کنت۔
مارچ 1919ءَ لینن کمیونسٹ راھشون بخارن ءِ سرا ترندیں نگد کنت چیاکہ اَ راجانی ھک ءِ ھاکمی ءِ بگیر بیت۔ لینن ءَ گوں پارٹی ءَ اے گپ تچک کتگ کہ راج ءُ ھک ءِ ھاکمی ءِ جنز اگاں دارگ بہ بیت گڑا دنیا ءِ تہ ءَ بے اوستی ءُ بے ستکی ودی بیت،دومی زورگریں راجانی تہ ءَ شاھونزم ودی بیت فن لینڈ ءِ جیڑہ ءِ درور ءَ دیان ءَ آ گش ایت۔ فن لینڈ ءِ راج ءَ جرمنی ءِ زوراکی ءِ سمر وارتگ ، دانکہ ما ھک ءِ ھاکمی ءِ جنز آشکار کتگ اودا ھم سان کپتگ اَ گش ایت مئے ھک ءِ ھاکمی جنز ءِ برابر اِنت باید اِنت ھرچ راج ءَ ھک ءِ ھاکمی بہ رس ایت۔ دیمترا اَ گش ایت ما ھجبر اِے گوشت نہ کن ایں کہ راجاں ھک ءِ ھاکمی مہ رس ایت نومبر 1919 ءَ لینن چہ کمیونسٹ گلانی نیمگ ءَ برجاہ داشتگیں مراگشے ءَ تران کنت ءُ گش ایت آ نیشنلزم ءِ درگت ءُ کمیونیسٹ مھلوک ءَ دیم پہ دیم کنت کہ اَ چہ مشرق ءِ جھمنندیں لگتمالیں راج ءَ گوں سرجمی ءَ گون بہ بنت۔
5جون 1920 ءَ لینن کمیونیسٹ میان اوستمانی مراگش ءَ راجی لگتمالی ءِ سرا کمیونیسٹ ءِ منوگر ٹولی ءَ اے سما ءَ دنت کہ شما پہ ھما راجاں کہ چہ کرناں لگتمال اَنت سمائی رنگ ءَ پہ ھمایاں دیم ءَ بیا اِت ۔وتی زند ءِ گڈسری وھداں لینن ءَ ھک ءِ ھاکمی ءِ سرا باز نبشتہ کتگ آ نبشتہ کنت کہ مزنین ءُ کسانیں راجے ءِ راج دوستی ءِ تہ ءَ تپاوت اَلم کنگ بیت ما کہ یک مزنیں راجے ءَ زلم ءُ زوراکی ءِ باز کسّہ نبشتہ کناں دومی ما ابید ءِ پکر ءُ سما کنگ ءَ زوراکی ءُ کم شرپی ءَ راجانی کناں من ءَ ھما ویل گیر کاینت کہ چتو دراَمدیں روسیاں گوں بیتگ اَنت کہ چتو پولینڈ ءِ مھلوکاں زلم کنگ بیتگ۔ دراسل ءَ اگاں چارگ بہ بیت مزنیں راج گوں زلم ءُ زوراکی ءَ مزن نام کپتگ اَنت دومی آ کہ میان استمانی راج اَنت اَ بس نام واستہ مہ بنت بلکیں مزنیں راجانی زمّہ واری بیت آ اِے نا برابری ءَ ھلاس بِہ کن اَنت چیا کہ اے ھمایانی اَرتگیں کارپد انت۔ ھما مھلوک ءِ اے گپ ءَ سرپد نہ بیت من ھمے سرپد باں آ چہ راجی مارشت ءَ نابلد اِنت بزاں اَئی ءَ وتی لیکہ ءِ رد ءَ چم بستگ اَنت ۔
لینن ءَ فن لینڈ ءِ ھک ءِ ھاکمی مَنّ اِتگ اشی ءَ ابید ناروے ھک ءِ ھاکمی ءِ جنز ءِ درگت ءَ سویڈن ءِ سوشلیسٹانی ساڈا کتگ اَئی ءَ ترک،ارب ءُ ایرانیانی بھر ءُ بانگ ایرجَتَگ ءُ کمیونیسٹ مھلوک ءَ ھمے پیگام داتگ کہ اَ راجانی ھک ءِ ھاکمیت ءَ کمک بِہ کن اَنت۔ سوویت سپارت کار ھم اَئی ءَ اے درگت ءَ اَگاہ کُتگ اَنت کہ اَ گلام ءُ لگتمالیں راجانی کمک ءَ بِہ کن اَنت پہ درور اپگانستان ءِ واستہ اولی روسی جھگیر وائی زیڈ کہ نامینگ ءُ دارگ بیت 1919 ءَ وھدیکہ لینن اَئی ءِ نامزدگی ءِ کاگدانی سرا دست رند جنت اے ھم نبشتہ کنت کہ وائی زیڈ وستی ایشیا سوویت سوشلیسٹ رپبلک ءِ ھاسیں جھگیر کنگ بیتگ اودا اپگانستان ،ھندوستان ءُ بلوچستان کہ وتی اَجوئی ءِ جنگ ءَ کنگ ءَ اَنت گوں اے راجاں اَئی ءَ سپارت کاری ءِ سرجم ءَ آجوئی دیگ بیت۔ ستمبر 1920 ءَ مشرق ءِ راج سرھال ءَ یک مزنیں مراگشے باکو دارگ بیت،اشی ءِ مول ءُ مراد تیوگیں راجانی ھک ءِ ھاکمی ءِ پُلامرزی کنگ بیت ءُ اَلمی اَشوب ءِ ھاترا توار چست کنگ بہ بیت اے مراگش ءِ تہ ءَ دوھزار ءُ پنجاہ ٹولی بھر زیر ایت اِشی ءِ تہ ءَ کردستان،بلوچستان، اپگانستان،ایران، پلستین ،برتانوی ھندوستان ءِ مھلوک ھم ھوار بنت،پدا ھمے اھد کنگ بیت کہ مشرقی راجانی کمک کنگ بِہ بیت اَ چہ لگتمالی ءُ گلامی ءَ درکنگ بِہ بنت اَیانی اَزادی ءِ ھاترا جد ءُ جھد کنگ بہ بیت۔ 1913 ءَ لینن اسٹالن ءَ ھمے سلا دنت کہ اَ ھک ءِ ھاکمی ءِ سرا ھال ءَ یک نبشتانکے نبشتہ بِہ کنت لینن ءِ گشگ ءِ پدا اسٹالن مارکسزم ءُ ھک ءِ ھاکمی ءِ سرھال ءَ نامداریں نبشتانکے ساچ ایت اے نبشتانک لینن ءُ اَئی ءِ پارٹی بالشویک ءِ لیکہ ءَ گوں ھمدپ بیتگ اسٹالن راجانی پجارکنان ءَ نبشتہ کنت کہ راج بندر ءَ یکیں زبان ءُ یکیں زمین ءِ یکیں تب ءُ میلانی رد ءَ زانگ بیت پدا اَ گش ایت ھک ءِ ھاکمیءِ بزانت ایش اِنت کہ یک راجے ءَ اے ھک دیگ بہ بیت اَ وتی تب ءَ زند گوازینت بِہ کنت دومی راجاں گوں ھور بیت یا نہ بیت اَئی ءِ رزا اِنت یا سرجم ءَ اَزادی لوٹ ایت اے ھک ھم اَئی ءَ دیگ بہ بیت،،
مگربی دنیا ءَ اسٹالن لیکہ ،مارکسزم ءُ لینن ءِ لیکہ ءَ گوں شُبین دیگ بیت اسٹالن کمیونیسٹ پارٹی اَپ انڈیا اسٹالن نواز ءَ اسرائیل ءُ پاکستان اے ملکانی ترپداری کتگ اَت چیاکہ اے ملکانی بن ھشت نیکراھی ءِ سرا بیتگ اَت اسٹالن عزری ترکانی ءُ کردانی جد ءُ جھد ءِ ھک ءَ بیتگ ایرانی زلم اَئی ءَ ایرجَتگ چیاکہ اَئی ءِ پشت پنائی ءَ برتانوی زورگیر اَ وھد ءَ کنگ ءَ اَت رندتر ءَ برتانوی زورگیر ءِ کمک ءِ سوب ءَ 1948 ءَ بلوچستان ءَ پاکستانی زوراکی ءِ کمک ءَ کن اَنت اشی ءِ آسر ءَ بلوچ راجی جنز ءَ را تاوان رس ایت ۔ اَ زمانگ ءَ اسٹالن ءِ روسی ھکومت ءَ ابید ایندگہ سوشلسٹ ملک ءُ مھلوکاں ھک ءِ ھاکمی ءِ درگت ءَ بے تواری اَت، سوشلسٹ یوگوسلاویہ ھم کروشیا ھک ءِ اَجوئی دیگ ءَ پدکنز بیت، ماھو ءِ چین ھم وتی راھبند ءِ تہ ءَمنگو لیا،ترکستان ءُ تبت ءَ ھک ءِ ھاکمی ندنت دگہ لھتے مارکسٹ ملک ھم ھک ءِ ھاکمیت ءِ دیگ ءَ رزامند نہ بنت ڈہوس ءِ گشگ ءِ ردا وتواکی یک نیکراھی جوزگے ءِ پیم ءَ اِنت کہ زیت ھلاس بیت۔ پہ درور سن 1972 ءَ سوشلسٹ عراقی بلوچستان ءِ ھک ءِ ھاکمی ءِ کمک ءِ جار ءَ جَن اَنت پنچ سال ءَ رند وھدیکہ عراق ءُ اہران ءِ جیڑہ ھلاس بنت ءُ ایران عراق ءِ کردانی کمک کنگ ءَ بند کنت پدا ھمے پیم عراق ھم پاکستانی ءُ ایرانی بلوچانی کمک ءَ بند کنت ،پدا بلوچ راھشون دگہ ملکاں پناہ ءِ زیرگ ءَ مجبور بنت اگاں راجانی ھک ءِ ھاکمی ءِ رد ءَ کارل، مارکس ،اینگز ءُ لینن ءِ شعوری درس راست اَنت گڑا اے پنجاپی پوریاگر ءُ پاکستانی روشنا پکریں مھلوک ءُ ایرانی دیمروی پسندیں راھشونانی زمّہ واری بیت کہ اَ بلوچانی ھک ءِ ھاکمی ءِ کُمک بِہ کن اَنت ۔
چندے سوشلسٹ بلوچانی اے ھک ءَ چیردیگ ءِ نیمون ءَ اشی ءَ دگہ نام دینت۔ لینن ءَ گوشتگ اَت کہ زور گیپت ایں راج ءِ سوشلسٹ اگاں لگتمال ءُ گلامیں راج ءِ کمک ءَ نکنت من ھمے سرپداں اَ ھچے نہ اِنت بس شاونسٹے 1862ءَ لاّرڈ ایکٹن ءَ راجی پجارءِ سرھال ءَ یک نبشتانکے نبشتہ کتگ اَت اَ گش ایت ،،نوکیں نیشنلزم ءِ بنگیج ھژدمی کرن ءَ پولینڈ ءِ بھر ءُ بانگی ءِ زمانگ بیتگ اَت بن اسل ءَ پولینڈ ءِ بھر ءُ بانگ ءَ راجی پجار ءِ لیکہ رودینتگ اَت بلے رندتر ءَ ایکٹن ءِ راجی پجارءِ لیکہ ءِ پلامرزی ءَ یورپ ءِ اَزاد ھیال کن اَنت پدا اے راجی پجار ءِ لیکہ گونڈ گرگ بیت چشکہ یورپ ءِ چندے ملکانی تہ ءَ پولینڈ فن لینڈ ءَ داں دارگ بیت، اپریکہ ءُ ایشیا ءِ ھرچ راج ءُ کومے بنت اَ اے لکیر ءَ چہ ڈن کنگ بنت اے گپ بے ھال کنگی نہ اِنت کہ یورپ ءِ سوشلسٹ ھم نوزدھمی کرن ءَ نیکراھی ءُ راجی پجار ءِ ھرجان بنت۔سرمایہ دار بلاک ءِ توک ءَ امریکی سرکماش وڑروولسن اَ اولی راھشون بیت کہ جھانی تک ءَ ھک ءِ ھاکمی ءِ گپ ءَ جنت۔ فروری 1918 ءَ سرکماش ولسن کانگریس ءِ نام ءَ یک پیگامے دنت اَ گش آیت باید اِنت راجی جوزگانی کدر کنگ بِہ بیت نی راجانی وتی تب ءِ سرا ھکومت کنگ بہ بیت۔ رندتر ءَ اَ نیشنز چارٹر ءِ توک ءَ ھم ھک ءِ ھاکمی ءِ گپ ءَ مان کنت پدا برتانوی نہ وشّی ءِ سرا اے در کنگ بیت۔ میان اوستمانی انسانی ھکانی گل اکوام متحدہ ءُ مزنیں جھانی کانود زانت راجانی ھک ءِ ھاکمی ءِ منوگر اَنت وھدیکہ 1971 ءَ مشرقی پاکستان بزاں بنگلادیش ءِ سرا پاکستانی زلم ءُ زوراکی وھد ءَ اکوام متحدہ ءِ گیشتریں باسک پاکستان کڈن کن اَنت اَ اے جیڑہ ءَ گیش ءُ گیوار بہ کنت۔ اکوام متحدہ ءِ باسکانی بلوچانی ھک ءِ ھاکمی ءِ درگت ءَ چی ھیالات اَنت اشی سرا گپ کنگ مشکل اِنت ،ھاں البتہ مشرقی پاکستان ءُ بلوچستان ءِ جیڑہ راجدپتری رنگ ءَ جتا اَنت . 1بلوچستان برسگیر ھند ءِ ھجبر بھرے نہ بیتگ،دومی بلوچستان وتواجھیں ملکے بیتگ سلطنت اومان،ترکی،ایران، ءُ اپگانستان ءَ بلوچستان ءِ ھاکمی منّ اِتگ۔ 2/برتانوی ھکومت ءَ 1873 ءُ 1858“ ءَ ھم بلوچستان یک اَجوھیں ملکے کبول کتگ ءُ منّ اِتگ پدا 1947 ءَ پاکستان ءَ ھم بلوچستان ءِ واتواجھی منّ اِتگ قرارداد پاکستان اَل انڈیا مسلم لیگ ءَ 1940 ھندو ءُ مسلمانانی جتا کنگ ءِ واستہ اڈ داتگ بلوچستان اشی ءِ ھم بھرے نہ بیتگ۔ مسلمان بنگلایانی وڈا بلوچستان ءَ پاکستان ءِ ھچ جنزءِ تہ ءَ ھم بھر نہ زرتگ۔ اَزاد بلوچستان ءِ سرا الھاق ءِ نیمون ءُ بلوچستان ءِ گلام دارگ ءِ پشدر ءَ برتانوی ساز ءُ پندل بیتگ اَنت . میان استمانی جھانی اَمن ءُ ایمنی داں ھما روچ ءَ اتک نہ کنت دانکہ راجانی ھک ءِ ھاکمی مَنّگ مہ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-
کیتھارینابلوم ءِ گاریں اِزت
گدار(ناول)
ندکار :ھائنرش بول
رجانکار: شاھد اھمد
دومی بھر
دی بلوچستان پوسٹ
اگاں اے رپورٹ ءِ بارو ءَ مردم اے مار اَنت کہ اے سُست اِنت ءُ ابید چَت ءِ اوتاک , یک مسکرائیں گپے ,کیتھارینا بلوم ءِ شُتگیں شرپ، ایشی ءَ چہ پَد آئی ءَ نبشتانک ءُ رپورٹ ھم نبشتگ۔ بول ” ند“ ءِ ھم کارمستر ھم بوتگ ءُ بلے آ گڈی وھد ءَ ھم ھک انسان ءِ واست ءَ جَد ءُ جُھد کنگ ءَ اَت۔
نوں ما ایشی ءِ درشان ءَ کنیں کہ بلے پرچا جُمہ ءِ سُھب ءَ بلکیں انّا بائز مینے بلکیں کیتھارینا ءِ رویہ ھم نرم اَت، اگرچہ اے گُشگ ھم شَر نہ اِنت کہ آ بلکل سُست بوتگ اَت۔ یا آئی ءِ تاکت گھگیری نزور بوتگ اَت۔ ایشی ءِ واست ءَ سُھب ءِ بندات سک وش اَت، ھمساھگ ءَ ایکسپریس ھالتاک ءِ کاپی مس وولٹرس ھائم ءِ دیم ءِ دروازگ ءَ چہ اپارٹمنٹ ءَ تیلانک دات، آئی ءَ را ونت ئِے، دوئیں جنیناں تَھنا زِد، برانز، کینگ بوتگ اِت اَنت بلکیں آ تُرس اِت اَنت ھم۔ بلے آیانی درستیناں پَد بلورنا چہ گوانکو ءَ ھَبر ءَ آیانی جزبگانی سَرد کنگ ءِ کُمک ھم زُرت۔ انوں آیاں سر سری ھالتاک ءَ را چار اِت اوں، ءُ چہ گوانکو بلورنا ءَ ھبر ھم ھلاس کتگ اَت کہ جنین پولیس اَپسر (پلینزر) اَتک۔ آئی ءَ کیتھارینا ءِ ھمراھی ءَ مس وولٹرس ھائم ءَ چہ ھم گُشت کہ آئی ءَ پٹ ءُ پول ءِ واست ءَ پولیس اسٹیشن ءَ آیگی اِنت۔ (پلینزر) ءِ مِھر ءُ وشھالیں کرد ءِ سبب ءَ چہ دوئیناں دلتپرکہ، چہ ایکسپریس ءِ سبب بوت، آ کم بوت۔
کیتھارینا ءَ وت ءَ سنبھال ءِ شپ ءَ ھما جیڑہ ءِ سر ءَ پگر کنگ بندات کُت کہ وھدے لڈوگ ءَ آئی ءِ را ”اود ءَ“ چہ گوانک کُتگ اَت۔
آئی ءِ گال ءُ گُپتار چِنکا وش گُٹّے اَت۔ ھمے سبب اَت کہ آئی ءَ آئی ءِ وتی پریشانی ءِ بارو ءَ ھچ نہ گُشت۔ آ نہ لوٹ اِتگ اَت کہ آ کمو دمانے ءِ واست ءَ ھم ھمے بہ جیڑ اِیت کہ اے سجھیں ناروائی چہ آئی ءِ سبب ءَ اَنت ناں کہ آئی ءَ مھر ءِ درشان کُت، ھمے بابت ءَ آئی ءَ ھما وھد ءَ ھم مہ کن کُتگ اَت کہ وھدے آ ھما شپ موٹل ءَ ھمراھی ءَ روگ ءَ اِت اَنت۔ چہ ایشی ءَ مَٹّی ءِ گنجائش ھست گڑا چُش پَھمگ ءَ ھچ جیڑھے نہ اِنت۔ وھدے ما ھمے گْوش اِیں کہ رپورٹ ءِ بنیاد لَس (ماخذوں) ءِ سر ءَ اِنت، بلے ھمراھی ءَ ھم مَنّ اِیں کہ اے لَھم لَھم اِنت گڑا چہ ایشی ءَ رپورٹ ءِ راستی ءَ لبز کَیت۔ ھمے واست ءَ اے گُشگ الّمی اِنت کہ رپورٹ ءَ اد ءُ اود ءِ واست ءَ سجّھیں جاوراں یکجاہ کنگ اِنت، بلکل ھمے وڑ اِنت کہ کسانیں گونڈویے آپے ءِ لَمب ءَ لیب کنگ اِنت آئی ءِ آپ ءِ نلانی وسیلہ ءَ چنکیاس شاھگان بیت وھدے ھمے نَل ءِ دیم ءَ یک نیمگے ءَ بکن ئے گڑا آپ یک جاگھے ءَ جم بنت۔ ھمے رپورٹ ءِ مکسد ھم ھمے وڑ اِنت کہ درستیں مالوماتاں چہ اد ءُ اود یکجاہ کنگ، رِد ءُ بند دیگ ءِ ھمراھی ءَ بیان کنگ اِنت۔ ھمے واست ءَ اگاں مرد ءَ کُجا ھم نشانے بہ گند اِیت گڑا ما آئی ءَ دزبندی کنیں کہ آ دزمانجنیاں چار ءُ تپاس کنگ کہ مارا درستیں جاوراں یکجاہ ھور کنگ ءِ موہ رستگ۔ اے ھم کساسے ءَ راست اِنت کہ بازیں وھداں اے درستیں کڑیاں یکجاہ ھور کنگ ھم پریشانی بوتگ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-
وانگ ءُ زانگ
نبشتہ کار: گْوس بکش بھار
دی بلوچستان پوسٹ
وانگ یک بلاھیً چیزّے ھنچو لس ءَ را ھبر بہ بیت وانگ چے ئے؟ وانگ مردم ءِ زندگی ءَ بدل کنت ءُ مردم ءَ بازیں چیزانی بارو ءَ سرپدی دنت انت۔ اگاں ما وتی وانگ ءَ بہ چارین مئے کرّا وانگ ءِ کمی باز ھست اِنت، مئے کرّا نودربر دگہ جاگھاں وانگ ءِ واستا رو اَنت پرچا کہ مئے کرّا وانگ ءِ نزوری ھست انت۔ مئے میتَگ ءَ بازیں نودربراں وتی مات ءُ پِت اش یل کُتگ اَنت دگہ جاگَھان وانگ ءِ واستا شُتَگ اَنت، ھنچیں بازیں نودربر ھست آ وتی واستا نہ جیڑ آں آ وانگ ءِ سر ءَ جُھد نہ کن اَنت۔
بازیں نودربر وتی جُھد ءَ برجمدارگ ءَ اَنت، وتی وانگ ءِ سر ءَ جُھد کنگ ءَ اَنت آ زان اَنت مئے کرّا وانگ نیست آ مجبوری ءَ زان انت آ وتی وانگ ءِ سر ءَ جُھد کن اَنت۔
بازیں نودربرے وتی زبان، میتَگ، راج ءِ بارھ ءَ نہ جیڑ اَں ما وت چون انت مئے کرّا چی ءَ وانگ نیست اِنت، ھر وھدا ھمے وتی دلے توک ءَ بہ دار اِت من وتی مکسد ءِ واستا اَتکگ آں من ءَ منی مکسد الّم آسر کنگی اِنت۔ ھمے بہ زان من وانگ ءَ اَتکگ آں من ءَ وانگی اِنت دیم ءَ روگی اِنت من ءَ کامیاب بوھگ الّمی اِنت۔
ما وتی نودربرانی گَپّان بہ آں آ چنچو لاچار اَنت ءُ کُجا اَنت، دگہ جاگَھان وانگ ءَ اَنت چیاکہ وانگ ءَ پہ وانگجاہ لوٹ اِیت بلے مئے کرّا ھاس مئے میتَگ ءِ توکا کمی اِنت وانگ ءِ ۔ من وتی جندے گَپ ءَ بہ کن آں منی جند دگہ جاگہ وانگ ءَ اِنت پرچاکہ میتَگ ءِ توک ءَ وانگجاہ نیست اِنت پمیشکا من وتی مات ءُ پِت یل کُتگ اَنت پہ وانگ ءِ واستا پہ وتی مکسد ءِ آسر کنگ ءَ من دگہ جاگھاں ۔
وانگ سرپدی دنت دنیا ءِ بارو ءَ نودربر الّم بہ زان اَنت وانگ یک چراگے روشن ءَ دنت اِنت۔ بازیں نودربرے در ملک ءَ اَنت بلے آ وتی وھدا زوال کنگ ءَ اَنت چیا کہ سرپدی نیست وتی آھوکیں وھدئے واستا ھال سوج بہ بیت۔ وتی وانگ ءَ الّم برجمدار اِت وتی راج ءُ زبان دیم ءَ بہ بر اِت ءُ وتی شھدیں زبان ءَ بہ وان اِت دیم ءَ بہ برگے جُھد ءَ برجم بدار اِت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت-
