چہ تربت ءَ زورانسری آوار جنی ءِ نشانگ بیتگیں ورنایانی کھولاں تربت پریس کلب ءَ پریس کانفرنس کنان ءَ گْوشتگ کہ مئے کھول ءِ مردم ، زمان بلوچ ، عبدالحسن ءُ الطاف دمگی کونسل کیچ ءِ چیئرمین ءَ دو روچ ءَ ساری ریاستی ادارھانی دست ءَ داتگ اَنت بلے الطاف گوستگیں شپ ءَ یل کتگ اَنت ، بلے زمان جان ءُ عبدالحسن انگت ھچ وڑیں ھال نیست ءُ نانکہ مارا آیانی درگت ءَ سرپدی دیگ بیگ ءَ اِنت آیانی سلامتی درگت ءَ سک پریشان ایں-
آیاں گوشتگ کہ ما لوٹ کن ایں مئے کھول مردماں زوت یل بہ کن اِت یا کجام جرم ءَ چہ آیاں آمیدگس ءَ پیش بہ کن اِت- مئے گوم ءَ بیؤکیں انسانی ھکانی ھلاپ ورزیانی جست ءَ بگر اَنت پرچاکہ مئے کھول یکشل ءَ زورانسری آوار جنی، تُرسینگ، بیھار ءُ دروگیں بھتامانی دیمپان اِنت آمیدگس ءُ انسانی ھکانی گلاں چہ لوٹ کن ایں کہ مئے کھول ءِ مردماں پھاز دیگ بہ بنت ءُ تُرسینگ ءُ بیھار ھلاس کنگ بہ بنت وھدے دمگی چیئرمین میر ھوتمان ءُ دگہ ایجنٹسانی گامگیجانی پٹ پول ءَ بہ کن اَنت-
آیاں گوشتگ کہ اگاں مئے لوٹ سے روچ تہ ءَ سرجم کنگ نہ بیت، گُڑا ما زھرشانی کنگ ءَ لاچار بہ ئے ایِں- ما جتاجتائیں ھندانی سر ءَ نندانک دے ایں ءُ ھاسیں دگاں بند کن ایں-
ما دزبندی کن ایں کہ انسانی ھکا ی گلاں ءُ سیاسی پارٹیاں اے جُھد ءَ مئے ھمراھداری ءَ بہ کن اَنت – آمیدگس مئے کیس ءِ گامگیج ءَ بزور اِیت ءُ انساپ دیگ ءَ دلجمی بدنت بُرزی واکدار ءَ دزمانجنی بہ کن اَنت ءُ مئے کھول ءِ مردماں گیش تاوان ءَ چہ بہ رکین اَنت- ما اُمیت کن ایں کہ شما مئے دزبندی ءَ سنجیدگی ءَ چہ زیر اِیت ءُ مئے جیڑہ ءِ گیش ءُ گیوار کنگ ءَ گامگیج زور اِت-
آیانی گوشگ اِنت کہ یکشل ءَ برجاہ دارگ اے نہ روا ایں رویشگ ءَ نپسیاتی زور، سسّائی، دمبرگ، پی ٹی ایس ڈی ءُ دگہ دروشمیں تاوان ھوار اَنت ما اشانی بازیں مدتے ءَ دیمپان کنگ ءَ ایں زورانسری آوار جنی یک جرمے، ءُ یک مردمے مدام زورانسری آوار جنی ءِ نشانگ کنگ ءِ مول ءُ مراد آئی را نپسیاتی ھساب ءَ پروشت ءُ پروش کنگ اِنت- مئے کھول ءِ بازیں مردمے زورانسری آوار جنی نشانگ کنگ بیتگ اَنت آیانی تہ ءَ لھتے یل کنگ بکتگ اَنت بلے آ جتاجتائیں جانی ءُ نپسیاتی جیڑھانی دیمپان اَنت ، وھدے کہ یکے ءَ وت ءَ کُشتگ – مئے کھول ءِ یک مردمے، چاکر مجید دو رند ءَ زورانسری آوار جنی ءِ نشانگ کنگ بیتگ، چریشی ءَ پد آ سک نپسیاتی جیڑھانی نشانگ بیتگ ءُ وت ءَ کُشتگ-
ھمے وڑ زمان بلوچ ھم دو بر ءَ زورانسری آوار جنی ءِ نشانگ کنگ بیتگ – عبدالحسن ءِ ھمراھی ءَ اے سیمی رند اِنت آ گوں زمات ءُ سیاد الطاف ھمراھی ءَ بیگواہ کتگ-
آیاں گوشتگ کہ اے رند ءَ وڑ ءُ پیم جتا بیتگ کہ ڈسٹرکٹ کونسل کیچ ءِ چیئرمین ءَ آ وتی گور ءَ لوٹائینتگ اَنت سرکاری ادارھانی دست ءَ داتگ اَنت ءُ کھول سک نپسیاتی زور ءِ نشانگ کتگ – ما وتی کھول گوم ءَ بیؤکیں نپسیاتی تُرسنیگ ھلاپ ءَ کانودی گھگیری کن ایں ءُ جرم ءَ ھوار سرجمیں مردمانی ھلاپ ءَ آمیدگس ءَ رو ایں-
آیاں گْوشتگ کہ سے روچ ءَ ساری مئے کھول ءِ سے مردم زمان ء سپاھان، الطاف ء بھرام، عبدالحسن ء رحمت دمگی چیئرمین تربت ءَ دوازدہ کلاکاں تاں داشتگ ءُ چریشی ءَ پد آ ریاستی ادارھانی دست ءَ داتگ اَنت-
ما دمگی چیئرمین نیمگ ءَ جتگیں وتگڑیں بھتاماں رد کن ایں ءُ وتی دوستناکانی یل کنائنیگ ھاتر ءَ کانودی جُھد جار ءَ جن ایں- دمگی چیئرمین تربت ءَ مئے کھول ءِ مردین زورانسری آوار جنی ءَ تچکی ءَ زمہ وار اِنت ءُ یکشل ءَ آیاں بیھار دیگ ءَ اِنت ءُ تُرسینگ ءَ اِنت-
آیاں گْوشتگ کہ مئے کھول ءِ مردمان زندمان سک تُرس ءِ تہ ءَ اَنت ما یکشل ءَ زُلم ،تُرسینگ ءُ زورانسری آوار جنی ءَ چہ دمبرتگ بلے نو ما گیش بے توار نہ بہ ئے ایں – ما انسانی ھکانی گلاں ، آمیدگس ءُ بُرزی واکداراں چہ دزبندی کن ایں کہ زمان بلوچ ءُ عبدالحسن ءِ یل کنائینگ ھاتر ءَ مئے کانودی جُھد ءِ ھمراھداری ءَ بہ کن اَنت-
