TBP Balochi

آرمینیانی چُکچینی

نبشتہ کار : شاھد اھمد

دی بلوچستان پوسٹ

اولی بھر

اولی جھانی جنگ ءَ پد بادشاہ اُسمان ءَ آرمینیائی مھلوک ءِ کُشت ءُ ھون کنگ، چہ ھمے کُشت ءُ ھون ءَ ابید آیاں چہ ملک ءَ زورانسری کشگ ءُ زندان ءَ بندیگ کنگ، کساس 10 یا 15 لکھ آرمینیائی مھلوک ءِ چُکچینی ءِ برجا دارگ۔

انچوش کہ چہ ایشی ءَ پیش ھم 1905 ءَ بگر داں 1920 ءَ آرمینیا ءِ بوتگیں لکھاں آذری مسلمانانی کُشت ءُ ھون ھم کنگ بوتگ ءُ لکھانی ھساب ءَ آذربائیجان ءُ دگہ جاگھاں کشّگ ءُ دراڈیھ کنگ ءَ ھم لاچار کُتگ اَنت۔

آرمینیا ءِ آذریانی کُشت ءُ ھون: انچوش زانگ بیت کہ آذری مھلوک چہ ایران ءُ آذربائیجان ءَ ابید داں بیستمی کرن ءِ بندات ءَ ھم آرمینیا ءَ آباد بوتگ اَنت۔ ھمے درگت ءَ 1813 ءَ روس ءُ ایران ءِ میان ءَ منگ نامگ گُلستان ءِ نام ءَ زانگ بیت ءُ چہ ایشی ءَ پد 1828 ءِ منگ نامگ ترکمانچی، ءُ پد ءَ روس ءُ اُسمانی ترکانی میان ءَ بوتگیں منگ نامگ ”ادر نہ“ ءِ پُشدر ءَ 125000(یک لکھ ءُ بیست ءُ پنچ ھزار) آرمینیاں چہ تُرکی ءُ ایران ءِ ھند ءُ دمگاں آرگ ءُ آذربائیجان ءَ پہ زورانسری آباد کُت اَنت۔ آسر ءَ ھمے ھند ءُ دمگ ءَ آذری نسل ءِ مھلوک انچوش کہ آرمینیا ءِ جند ءَ گوں سیادی دار اَنت۔ ءُ رند ءَ آرمینیائی نسل ءِ مھلوکانی تہ ءَ مالی جیڑہ چست بیت پد ءَ زار روس مارچ 1828 ءَ یک پرمانے ٹھین اِیت۔ ھمے درگت ءَ دو ھاسیں آذری جاگہ (یریوان ءُ نکچیوان) ءَ یک استانے ءِ بستار ءَ زانگے کن اَنت کہ پد ءَ آرمینیا ءِ پیداک کت کہ اے چہ بُن اَزل ءَ پیسر ءَ ایشی ءِ وجود اوں نہ بوتگ اَت۔

کُشت ءُ ھون: شوربندی کنگ ءَ پد، آرمینیائی نسل ءِ مردماں، چہ 1905 ءَ بگر داں 1907 ءِ میان ءَ، آذری مھلوکانی کُشت ءُ ھون بندات کُت۔ ھزارانی کچ ءَ ھاندانانی ھاندان کُشت اَنت، ءُ یکشل ءَ باکو (آذربائیجان) ءَ بگر داں آرمینیا ءَ تالان اَت۔

مارچ 1918 ءَ باکو ءَ بس سے روچ ءِ تہ ءَ 30 ھزار آذری کُشت اَنت۔ اے کُشت ءُ ھون ءِ پُشدر ءَ بالشویک روسیانی کمک ھم گون بوتگ اَت۔ روسی آشوب ءُ کبزہ ءَ آرمینیائی ءِ مھلوکاں باز پائدگ زُرت ءُ چنکیاس آذری جاگہ پہ درور ”زنجی زور“ ھم آرمینیا ءِ استان ءَ ھوار کُت۔ روس ءَ کوھنیں آذریانی جاگہ پروشگ بوت اَنت ءُ پد ءَ یک استانے آرمینیا ءِ نام ءَ جوڑ کُت۔ ھمے درگت ءَ 1948 ءَ بگر داں 1953 ءَ یک شوربندی یے ءِ بگیر ءَ آذری نسل ءِ مسلماناں چہ آیانی جند ءِ سر ڈگار ءَ درکنگ بوت اَنت کہ آئی ءَ پد آرمینیا بوگی اَت 1953 ءَ دو لکھ ءَ چہ گیش آذری مھلوک چموداں چِہ دراتکگ اِت اَنت۔ کہ انوں آذربائیجان گْوشگ بیت۔ مُرتگیں مردمانی کساس لکھ ءَ چہ گیش بوتگ اِت اَنت۔

24اپریل 1915، آرمینیانی چُکچینی ءِ بنداتی روچ زانگ بیت کہ ھما روچ ءَ اُسمانی لشکراں (کستنتینہ) ءَ 250 آرمینیائی ادیب ءُ رھشونانی دزگیر کُتگ اَنت۔ آرمینیانی ءُ مگربی رسانکدرانی بُھتام اِنت کہ چہ ایشی ءَ رَند آرمینیانی مھلوکاناں گوں زورانسری چہ لوگاں درکنگ ءُ دور ءُ دراجیں پنداں گوں شام ءِ سرکگیں ریکاں یل داتگ اَنت ءُ بازیں کساسے ءَ تُن ءُ شُد ءِ آماچ بوتگ ءُ مُرتگ اَنت۔ ءُ آرمینیائی زالبولاناں جنسی زور ءُ زورانسری ءِ نشانگ کُتگ اَنت۔
آرمینیائی کُشت ءُ ھون مرگِ انبوہ (Holocaust) چہ پد درستاں گیش زانگ آیانی چُکچینی ءَ بیت۔

روان اِنت۔

اھوالانی رد ءَ تمپ ءِ دمگ سرینکن تگران آباد ءَ زبیدہ جلال روڈ ءَ ایل پی جی ءِ دو ٹرالریں گاڑی ناشناسیں مردماں تیرگواری کتگ ءُ تاوان داتگ اَنت-

زانگ بہ بیت ایشی ءَ پیش ھم مڈی بروک ءُ گیس بروکیں گاڑی نشانگ کنگ بیتگ اَنت-

گوست ءَ مڈی بروکیں گاڑیانی سر ءَ بیتگیں اُرش بلوچستان ءِ آجوئی لوٹوکیں سلاہ بندیں گلاں من اتگ انت مروچی بیتگیں اُرش ءِ زمہ واری تنی وھدی کس ءَ پہ وت نہ زرتگ-

روکپتی بلوچستان ءِ بنجاھی شھر زاھدان ءِ بندیگجاہ ءَ یک مردمے پاھو دیگ بیتگ –

اھوالانی رد ءَ گوستگیں روچ ءَ یک بندیگیں مردمے ماں زاھدان ءِ زندان ءَ پاھو دیگ بیتگ-

پاھو دیگ بیتگیں مردم ءِ پجار سلطان جھانتیغ ء گلام رضا جھمنند سنجرانی ھیرمند ءِ نام ءَ زانگ بیتگ-

اھوالانی رد ءَ سلطتان ایرانی سال سیزدہ سد ءُ نود ءُ ھشت ءَ گوں ھمراھے برات ءُ زامات ناصر جھانتیغ ءُ ھسین زری ءِ ھرسئیں کس کوش ءِ بھتام ءَ زابل ءَ دزگیر بیتگ اَنت کہ آیانی سر ءَ پاھو ءِ ھکم اتکگ-

سلطان پشمبے ءِ روچ ءَ جتائیں کوٹی ءَ برگ بیتگ ءُ شمبے ءِ سھب ءَ آ پاھو دیگ بیتگ-

زانگ بہ بیت گوستگیں ھپتگ ءَ یک کُردے ءَ ھوار دَہ مردم پاھو دیگ بیتگ اَنت- کہ اود ءَ روکپتی بلوچستان ءَ مھلوک ءِ پاھو دیگانی درچ یکشل ءَ برجاہ اَنت-

تربت آپسر بلوچی بازار ءِ جھمنندیں کُشگ بیتگیں ساجد اکبر ءِ مات ءَ تربت پریس کلب ءَ پریس کانفرنس کنان ءَ گْوشتگ کہ من ءَ انساپ دیگ بہ بیت اِنت-

آئی ءَ گْوشتگ کہ آئی ءِ چُک چہ ایران ءَ ذاکر عبدالرؤف ءِ نیمگ ءَ آرگ ءُ ریاستی ادارھانی دست ءَ دیگ بیتگ- پد ءَ ذاکر راؤف ءَ گوشتگ کہ ساجد اکبر ءَ ریاست پاکستان ءَ ھوار بیتگ –

ساجد اکبر ءِ مات ءَ بھتام جتگ آئی ءِ چُک کیچ ءِ دمگی ناظم ھوتمان ءِ گوشگ ءِ پد ءَ کُشگ ءُ آئی ءِ لاش ایران ءِ سیمسری نزیک پیرکور ءَ دور دیگ بیتگ-

آئی ءَ گْوشتگ کہ چک ھشت ماہ ءَ تاں بندیگ کتگ ءُ پد ءَ کُشتگ، اے ناں تھنا زُلمے بلکیں انسانی ھکانی تُرندیں ھلاپ ورزی یے-

پریس کانفرنس ءَ آئی ءَ گْوشتگ کہ ما پاکستان ءِ جھمنندیں، بلے مئے واستا زمین تنک کنگ بیگ ءَ اِنت- مارا تُرسینگ ءَ اَنت ءُ مئے گون ءَ زُلم زیادتی بیگ ءَ اِنت- اگاں ریاست ءَ ھمگرنچ بیؤکانی گون ءَ اے وڑیں رویشگ بیت گُڑا مردم چتو ستک کن اَنت؟

آئی ءَ ریاست ءُ ھمگرنچیں ادارھاں چہ دزبندی کتگ کہ آئی ءِ چُک ءِ کوش ءَ سرجمی ءَ پٹ ءُ پول بہ کن اَنت ءُ آئی ءَ انساپ بدے اَنت- ساجد اکبر ءِ مات ءَ لوٹ کتگ آئی ءِ چُک ءِ کُشکاراں جُست بگر اَنت ءُ دیمتر ءَ اے وڑیں وئیلانی گر ءُ دارانی ھاتر ءَ جوانیں گامگیج بزیر اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ بیست دسمبر سُھب ءَ ھاران ءِ دمگ سرخاران ءَ ھرو ھند سر ءَ زورگریں پاکستانی پوج ءُ سرمچارانی میان ءَ یک میڑے بیتگ دُژمنیں پوج ءِ یک میجرے ءَ ھوار نُھ کارمند کشتگ ءُ بازین ئِے ٹپی کتگ اَنت-

جارکش ءَ گْوشتگ کہ پاکستانی پوج ءِ کاروان دہ گاڑیاں چہ ھمگرنچ بیتگ کہ شپ ءِ گُڈی پاس ءَ دمگ ءَ لشکر کشی ءِ نیت ءَ پُترتگ ءُ سرمچارانی انگر ءِ کنگ جُھد کتگ بلے بی ایل ایف انٹلیجنس ونگ ھالانی سر ءَ پیسر ءَ چہ ساڑی بیتگ اَنت-

جارکش ءَ گْوشتگ کہ وھدے پوج کارمنداں سرمچارانی انگر کنگ جُھد کتگ گُڑا یک تُرندیں میڑے بندات بیتگ ھمے میان ءَ چل پنچ ملٹ ءَ گیش بیتگ، اے میڑ ءَ پوج ءِ یک میجرے ءَ ھوار نُھ کارمند مرتگ ءُ بازین ئِے ٹپی بیتگ اَنت-

آئی ءَ گْوشتگ کہ سوبمندیں اُرش ءَ پد سرمچار پہ سلامتی انگر پروشتگ ءُ مُھریں ھندانی نیمگ ءَ شتگ اَنت-

جارکش ءَ گْوشتگ کہ میڑ ءَ پد پاکستانی پوج ءِ بالگرد ھم اُرشجاہ ءَ سر بیتگ اَنت وتی مرتگیں ءُ ٹپی زرتگ ءُ دیم پہ شال ءَ شتگ-

جارکش ءَ گْوشتگ کہ بی ایل ایف راجی پوجے کہ آئی ءِ سوبمندی گوں بلوچ راج ءَ بندوک اِنت ءُ آئی ءَ راجی پلامرزی ءِ سوب ءَ چہ بی ایل ایف بلوچستان ءِ ھرچ شھر ءُ میتگاں تاں مھکم ءُ پُرکار اِنت-

آئی ءَ گْوشتگ کہ نوکیں جنگی رپکاں، نوکیں گل ءِ دروشم ءَ بی ایل ایف نوکیں لوٹاں بندوک کتگ کہ چریشی ءِ سبب ءَ چہ بلوچستان ءِ ھرچ کُنڈ ءَ پوج ءَ تُرندیں اُرشانی دیمپانی اِنت ءُ اے اُرشانی سبب ءَ چہ پاکستانی پوج بلوچستان ءَ سک نپسیاتی زور ءِ دیمپان اِنت کہ اشی ءَ پدر کنت کہ زوت یا دیر پاکستانی پوج اے سرڈگار ءَ چہ دراھگ ءَ لاچار بیت-

آئی ءَ گْوشتگ کہ بلوچستان لبریشن فرنٹ اے اُرش زمہ واری ءَ منّ اِیت ءُ آجو بلوچستان ءِ وتواجھی ءَ تاں زورگریں پوج ءَ نشانگ کنت-

بلوچ وومن فورم ءِ چیردستی ءَ بانک کریمہ بلوچ ءِ چارُمی سال روچ ءِ درگت ءَ یک نیاد پتری مُچی ءِ ٹاھینگ بیتگ چریشی ءَ زالبولیں باسکاں ھوار جتا جتائیں پھناتانی مھلوک ءَ بازیں کچے ءَ بھر زرتگ-

تران کنوکاں کریمہ بلوچ ءِ زندمان، آئی ءِ زانشت، جد ءُ جھد ءُ دیمونی ءِ سر ءَ چمشانک داتگ ءُ ستاشانی کتگ-

تران کنوکاں گوشت بانک کریمہ بی ایس او آزاد ءِ اولی زالبولیں سروک جوڑ بیتگ – آئی ءَ وتی جد ءُ جھد ءِ سبب ءَ بلوچ زالبول توار جتگ ءُ انسانی ھکانی واستا کار کتگ-

نیاد ءَ گوشگ بیتگ بانک کریمہ ءِ جد ءُ جھد با ایوک ءَ بلوچستان بلکیں دنیا ءِ ھر ھما زیردستیں راجانی واستا یک راھشونی ءِ جوڑ بیتگ-

زانگ بہ بیت بانک کریمہ بلوچ سال 2016 ءَ کینیڈا ءَ شتگ کہ اود ءَ درانڈھی ءِ وھد ءَ آئی ءَ انسانی ھکانی واستا پرکار بیتگ – 2020 ءَ اچانگی آئی ءِ نمیرانی ءِ اھوال ءَ انسانی ھکانی پتراں یک ٹوھیں باوستے ءَ سرکش اتگ-

نیاد ءِ گڈسر ءَ مھلوک ءَ شھید کریمہ بلوچ ءِ جد ءُ جھد ءَ دیم ءَ برگ ءِ ھاتر ءَ کول داری کتگ-

گَریبی ءُ ￶بزّگی

نبشتہ کار: زاھد رزا

دی بلوچستان پوسٹ

اَنچُش کہ شما سرپد اِت کہ گریبی چے یے؟گریب چوں وتی زندگی ءَ ￴گَوازینگ ءَ ￴اَنت، مارا پہ ھرچونیں چیزے ءِ واستا زروری بیت، ھنچو زر ءِ زرورت بیت ۔ من ءَ الّم اے چیز ءِ ￵واستا ھُب ءُ واھگ بیت اِنت گُڑا ما بچاریں کہ گریبیں مردمے ءِ دل ھچ نہ گُش ایت کہ ما اے دنیا ءِ تھا ھرچیز بزوراں۔ ھمے وھدا ھرچ مردمے ءَ را گاڑی ءُ پَرپٹ دگہ چیزاں سوار اَنت۔ ھمے ھساب ءَ ھرچ مردم دل لوٹ ایت من ءَ ھم زر بہ بیت من ھم چیز بُزوراں ۔آ ھم لوٹ اَنت من وتی سرجمیں زندگی ءَ پہ وشّی بہ گوازیں آں مرچاں ھر زھگ گْوش ایت منی پِت منی واستا ھر چیز بہ گپت ءُ بیاریت۔ من ءَ دگہ ملک ءُ جاگھاں دیم بہ دنت پہ وانگ ءَ سیل ءُ سودا ۔ چیا کہ اے وھد ءِ ھرچونیں مردم گوں زر ءَ مھر کنت ءُ ￶زر ءَ ￴ دوست داریت اِنت۔ اگاں تئی گوں زر بیت گُڑا ترا ھر مردم ازّت دنت گوں تو سیادی ءُ ￶وارسی کنت اِنت چیا کہ تئی کرّا زر ھست اِنت۔

اے وھدئے مردم مردماں دوست نہ دار اَنت بلکیں زر ءَ دوست دار اَنت۔ ھمے وڑ گریب ءَ کس وتی سیاد نہ کنت ءُ ￶ازّت نہ دنت ئے￷ چیاکہ آئی ءِ ￵کرّا زر نیست اِنت۔ مارا ھمے چارگ ءُ جیڑگ لوٹ ایت ما امیر ءُ گریب مہ چاریں ما دراھیں انسان انت۔ ھر انسان ءِ ￵ازت کنگ لوٹ ایت، گریب ءِ گپ ءَ کس گوش نہ دار ایت آئی ءِ مدد ءُ کمُک ءَ کس نہ کنت، آ ھمے جیڑگ ءَ لگ اَنت کہ اے زندمان ءِ تھا مئے وڑیں گریبیں مردم نیست اِنت مارا اے دنیا ءَ ھچ ازّت نیست اِنت ۔ گُڑا آ دگہ مردم وتی زندگ بوھگ ءَ لاچار بنت ءُ ￶وت کشی کن انت ۔

ھر مردم یک وڑ نہ بیت، گریب بوھگ یک میارے نہ انت باھد انت گریب ءِ کمُک ءَ بہ کن اِت- بازیں مردم ھست اَنت آ گریب اَنت بلے انگت آ وت ءَ ￴ مزن سمج اَنت کہ ما گریب نہ اِنت ما امیر اِنت بلکیں آھانی کرّا اِنچو زر نیست کہ وتی واستا چیزے بہ گر اَنت ءُ ￶وتی لاپ ءَ ￴بور اَنت۔ گریب بوھگ اِیبے نہ اِنت، بازیں مردمے گس ءَ ￴ناں ورگ ءَ ￴زر نیست آ باز لاچار اَنت ءُ ￶وتی زندگی ءَ ￴بے زار اَنت ھمے واستا آھاں ءَ ￴زندگی دوست نہ بیت بازیں مردم ءَ ￴وتی زندگی ھلاس کُتگ پرچاکہ آھاں ھنچو جیڑ اَت ءَ ￴کہ مارا زندگی نیست ءُ ￶زندگ بوھگ ءَ ￴پاھدگ نیست پمیشکا وتی زندگی ءَ ھلاس کن اَنت۔

مارا ھر وھد ءَ مھکم بوگ لوٹ ایت آھانی کمُک کنگ لوٹ ایت۔ وتی ھر وھدا جُھد ءَ برجم بدار اِت اے زندگی ءِ ￵توک ءَ ￴ھرکسی ￴ازّت ءُ ￶اھترام ءَ ￴بہ کن اِت، امیر بوت یاں کہ گریب بوت دویں انسان ￴ﷲ ءَ ￴جُوڑ کُتگ اَنت۔ اِے زندگی چار روچیگ اِنت ھرچ وڑ ءَ گوازینت کُرت کن ئے￷، ھمت کنگ لوٹ ایت اے زند باندا ھتم بیت ءُ ￶روت، اِدا کَس کَس ءَ ￴پادار نہ بیت۔ گِرانیں وھد ھم روت اِنت مردم ءَ سبر کنگ لوٹ ایت، من گوں سنگتاں دست بندی کن آں ھر وڑیں مردم ءَ ￴ازّت ءَ ￴بہ دے ات ءُ ￶ھما مردم ءَ ￴بگْوش دگہ مردمانی ازّت ءَ ￴بہ کن اِت۔ سلامت بات اِت شال ءَ ￴دْرا بلوچ بات ئے-

زانت ءِ گواڑگ 

نبشتہ کار : عباس حسن

دی بلوچستان پوسٹ

ھر ھَند ءَ کہ ڈُکّال ءُ تاھاپی یے سر کش ایت یا کہ ھُشکسالی ءُ ویرندانے زمین ءَ مانپوشان کنت گڑا اے جاوراں بِلّ کہ سُرند ءُ پَرند، درچک ءُ دار، کلکت ءُ مھلوکاں بگر سرجمیں ھند ءِ ابرم دْرگون دْرگان بوان ءَ ھَزاراں ساھدار ارواہ ء زمین ءَ چہ گستا بوان بنت ءُ سداں کلکت سَرسَریں ھلاھوشی ءِ سبب ءَ سر پہ گنوکی کشّ اَنت، ھونڈانی شگال، ناھار سر چگل بوان بنت پرچا کہ ڈکالی ءُ تاھاپی گوں وت ھزاراں نادراھی ءُ بیماریانی پیداک بوگ ءِ سبب بنت۔ اگاں سالے ءَ داں ھور ءِ تْرمپے زمین ءِ دلبند ءَ مہ کپ ایت گڑا نہ تھنا درچک ءُ دار سُتک ءُ سوچ بنت بلکیں دنیا ءِ سرجمیں جلواھَناکی زمین ءَ چہ بال کنان ءَ پسّند بیت۔ بلے ھمے ویرندانی، ڈکّالی ءُ ھُشکسالی ءِ میان ءَ چہ ابرم ءَ ھستیں یک انچیں اڑ ءُ جنجالے موجود اِنت۔ گڑا اے وشھالی ءِ اڑ اِنت، بھارگہ ءُ آبادانی ءِ اڑ اِنت پمیشکہ کائنات بیدے اڑ ءُ جنجال ءَ ناسرجم ءُ نیمبندگ اِنت۔

ھمے ھُشکسالی ءُ ڈُکّالی ءِ میان ءَ تْرمپے کپ ایت کہ ڈُکال ءِ سینگ ءَ چاک چاک کنت ءُ دگہ نیمگے تاھاپی ءِ میان ءَ گواڑگ ء‍ تُرک ایت گڑا تاھاپی ءِ پولنگ ءَ شودان ءَ آئی ءِ دلبند ءَ براہ دار کنت۔ گواڈگ پد ءَ ھما پُل اِنت کہ بے آپ ءَ زندگ مان ایت ءُ بے آپی ءِ میان ءَ سْرپ اِیت۔ ڈَڈ ءُ کلّریں، کوہ ءُ تلاریں، سیاہ ڈل ءُ گاڈوکیں سنگانی میان ءَ وّردویں گواڈگ انچیں پُلے کہ انسان ءِ اندر ءَ امیت ءُ اوست ءِ ڈیوا ءَ رژنا کنت۔ ھمے گواڈگ ءِ بے وھدیں، نا اُمیتیں ءُ ڈکالیں موسمے ءَ تُرکگ ءَ چہ بھار ءِ کوش زمین ءَ وتی امبازاں گر اَنت۔ پرند، چرند، کلکت، سرھدار، درچک ءُ داراں بگر داں بنیادم ءِ دل ءَ امیت ءِ جلشکے پیداک بیت۔ یک ھب ءُ واھگے ودی بیت۔ نوکیں جوزگے سھرا بیت۔ اے جوزگ، امیت، ھب ءُ واھگ، اوست ءُ سکین زندگ بوگ ءِ دلبڈی ءَ گام پہ گام ودی کنان بنت۔ پد ءَ انچیں ڈکال جتیں موسمے ءَ کہ کس ءَ سما ھم نہ کرتگ کہ ڈڈّ ءُ کلریں، تاھاپ ءُ ویرندانیں ڈاک ءُ کوھانی دلبند ءَ گواڑگ ءِ چُک جنت۔ گواڈگے وتی چمّاں پچ کنت ءُ گیمرتگیں چم ءُ دلاں رژنا کنت۔

گلامی ءُ ایردستی ءِ درور ھمے ڈکال ءُ ویرندانی ءِ درور ءَ اِنت۔ ایردستی نادراھی ءُ ناجوڑیانی اَمبارے۔ سلگت ءُ شومکیں نادراھی یے۔ ایردست ءِ ھمک ھیال ءِ اندر ءَ کوٹے مان بیت، گلامیں راج وتی جند ءِ مردمانی بدی ءِ واھگ دار بیت۔ گلام ھژم گپت، باھند کنت؛ الگاش ءُ کوکار کنت، جنگ ءُ چوپ ءَ ھم مھتل نہ بیت بلے نہ تھنا مھلوک ءِ گُٹ ءِ ھونان بیت بلکیں اے ھیال ءَ چہ شموشکار اِنت کہ اے نادراھی ءُ بیماریانی توم کَے ءَ چنڈ اتگ؟ اے ناجوڑی کَے ءَ آئی ءِ سَر ءَ مُشتگ اَنت؟ پرچا آئی ءَ اے پیمیں بدواھگی ءِ دیمپان ئِے کرتگ؟ پرچا آ وتی مھلوک، وتی جند ءِ مردمانی گٹ ءِ ھونان اِنت؟ اگاں چار ءُ تپاس کنگ بہ بیت گڑا کوھن ءُ کدیم ءَ ھم آئی ءِ پت ءُ پیرکاں زندگی کرتگ باریں انچوش بوتگ اَنت کہ ھستیں وھد ءَ ھمے جاورانی دیمپان اَنت؟ چاگرد انچو موچ ءُ لنگ بوتگ کہ انوں انچوش اِنت؟ اے موچ ءُ لنگی ءِ ھُنڈال ایردستی ءِ بدنمائیں سورت ءِ دلبند ءَ کل اِنت۔ اے بدسورتیں بُت ھما وھد ءَ ریزگ ریزگ بوت کت کنت وھدے کہ امیت ءِ چراگ ءِ رژنا بہ بیت۔ اے بدنمائیں بُت ھما دمان ءَ ٹکر ٹکر بیت وھدے کہ ایردست ھما اڑ ءِ سنچ ءُ سما ءَ وتی اندر ءَ ودی کت بہ کنت۔  اے بدجلواھناکیں بُت ھما سھت ءَ پرش ایت وھدے کہ “The first should be the last and the last man should be the first”۔ بزانکہ ھما زورگیر کہ آئی ءَ تئی زمین ایردست کرتگ ءُ ترا باگچین ءُ بدکاریں جانورے ءِ بستارے داتگ۔ ءُ آئی ءَ مدام ترا گڈی مردم گچین کرتگ ءُ دومی تو ھما اولی مردم بہ بو کہ آئی ءَ وتی سرڈگار ءَ نہ تھنا بہ گلین بلکیں آئی ءَ وتی تَشدد ءِ وسیلہ ءَ انسانے ءِ کالب ءَ رجینگ ءِ جُھد ءَ بہ کن۔ پرچا کہ بد دودمان تو نہ ئے  نیکہ بدکاریں انسان تو ئے بلکیں بد دودمان ھما اِنت کہ گوں تو بدکرداری کنگ ءَ چک ءُ پد نہ بیت۔ رستریں مھلوک ھما زورگیر ءِ جند اِنت کہ آئی ءَ ترا آکوٹ ءِ سر ءَ لُلک ءُ سُرندھے لیک اتگ۔ پمیشکا آ مدام لوٹ ایت کہ ترا لگتمال کنان ءَ بہ روت انت۔ ترا بہ شِرین ایت۔ تئی زبان ءَ چہ تو پچ بہ گِپت۔ تئی دود ءُ ربیدگ ءَ پدلپاشان کنان ءَ بہ روت اِنت۔  ءُ تئی زمین ءِ مادن ءُ مڈیاں لٹ ءُ پُل کنان بہ کنت۔ بلے اے کلیں چیز ھما وھد ءَ ولگوج بنت وھدے ایردست زورگیر ءِ مکن کرتگیں شھراں دور کنان ءَ آئی ءِ ھلاپ ءَ وتی گھگیریں جد ءُ جھد ءَ بندات کنت۔ گھگیری ءِ میان ءَ باسمائیں رھشون وتی مھلوک ءِ سرپد کنگ ءُ آیاں راجی سنچ ءُ سما ءِ پیداک کنگ ءِ ھمبرائی ءَ زوراک ءِ ناروائیانی ولگوج کنگ ءَ لیکھے ءِ بنیاد ءَ یکجاہ کن اَنت۔

دنیا ءِ ھمک جُنزانی دیمروی دیوکیں مردم لھتیں گچینی بنت، اے ھما مُردم اَنت کہ آوانی گور ءَ رھشونی کنگ ءِ سنچ ءُ سما بیت۔ اے ھما در چتگیں مُردم اَنت کہ آ نہ تھنا وتی راجی جھد ءَ منزلے ءَ سر کن اَنت بلکیں آوانی لیکہ ءُ پاد کرتگیں آشوب ءِ سان دنیا ءِ ایدگہ استاناں سانمند کن اَنت۔ آشوب ءَ بگر داں دنیا ءِ سیاست ءَ بیا گڑا چندے تاکتوریں فردانی مزنیں کردے بوتگ۔ آشوب ءِ پڑ ءَ ولادیمیر لینن ھما نپر اِنت کہ روس ءِ سرجمیں مھلوک ءَ نہ تھنا جنز ءِ پتر ءَ یکجاہ کنگ ءِ تاکت ءَ داریت بلکیں درستیں کسان مزنیں گل ءُ ادارگاں وتی پارٹی ءِ ھوار گیجگ ءِ ھمراھی ءَ زار ءِ تھت ءُ تاج ءَ چپیگ کنت۔ آئی ءِ آشوب دنیا ءِ ایدگہ ایردستیں استاناں سکین رس اِیت ءُ دنیا پد ءَ ھمائی ءِ لیکہ ءِ بنیاد ءَ وتی راجی جنز ءِ بیرک ءَ بُرز دار بنت۔ اے داب ءَ آشوبی جنزانی جنگی ماڈلانی اندر ءَ جنرل گیاپ ہما تاکتوریں مردم بیت کہ آ نہ تھنا فرانس ءُ جاپان ءِ وڑیں تاکتاں چکپروش کنت بلکیں امریکہ وڑیں زوراکتریں تاکتے ءَ را نزور کنان ءَ آئی ءَ چہ وتی استان ءَ کشگ ءُ تچگ ءَ پہ لاچار کنت۔ پرچا کہ جنرل گیاپ ءِ ھما تاکتوریں ھیال ءُ لیکہ بیت کہ آئی ءِ سبب ءَ یکیں روچءَ ھشت ھزار مردم دیم پہ دیمی جنگ ءَ پوجی بنجلانی گرگ ءَ لانکبند بنت۔ اے ھشت ھزارانی دیم پہ دیم گوں دچار کپگ ءِ فلسفہ جند ندری اِنت۔ بزانکہ دژمن ءِ سرجمیں وجود ءَ ھلاس کن یا کہ تو دژمن ءِ دست ءَ بہ مر، بلے پشت ءَ چک ءُ پد بوگ نیست۔ اے ھشت ھزار جند ندریگانی سبب ءَ جنرل گیاپ جنگ ءَ باج بارت۔ ھمے داب ءَ دنیا ءِ سیاست ءِ پڑ ءَ ھنری کسنیجر ھما مردم اِنت کہ آ لوٹ اِیت ماں دنیا ءَ جنگ پاد کت کنت ءُ آ لوٹ اِیت ھما ساھت ءَ جنگاں ھلاس کت کنت۔ ھما ملک کہ امریکہ ءِ ھلاپ ءَ دنتان گدروش اَنت بلے ھنری کسینجر کجام وھد ءَ آئی ءِ دل لوٹ ایت چائنا ءَ روت سُھل ءُ تران ءِ گپاں دیم ءَ بارت ءُ یکیں دمان ءَ توجیلے ءِ نیمگ ءَ برگ ءِ تاکت ءَ دار ایت۔

نوں وھدے کہ ما بلوچ ءِ ھستیں وھد ءِ جھد ءَ چار ایں کہ دو ھزار ءِ دھک ءَ وتی گوستگیں درچ ءِ کڑیاں زوران ءَ چست بیت۔ ھستیں جُنز ءِ مستریں تاکتوری ھمیش اِنت کہ ایشی ءَ گوں زالبولانی مزنیں رھشونی یے گندگ ءَ کیت اِنت۔ زالبولانی رھشونی وتسر ءُ دیم ءَ نہ یتکگ بلکیں یک مردمے ءِ عظیمیں پیسلہ ءِ سبب بیت۔ اے ھما پیسلہ اِنت کہ ایشی ءِ برورد ءَ زورگیر ءِ ھپتادیں سالانی پندل، آئی ءِ جتگیں مال ءُ متاہ، آئی ءِ گپتمان، آئی ءِ ربیدگی چُکچینی ءُ وتگڑیں مذھب گر ءُ بند یک زانت ءِ گواڈگے ءِ سرپگ ءَ گوں زلم ءِ سینگ چاک چاک بیت۔ نارواھی ءِ سر چگل بیت، زنگ گپتگیں چاگرد، موچ ءُ ناسلامتیں راجمان؛ بزاں ھما راجما کہ اود ءَ جنین لوگانی چلوپگ ءُ کاراں ابید زند ءِ ایدگہ سرپاں مردماں گوں ھمکوپگ بوگ ءِ سوالے چست کت نہ کن اَنت۔ بلے ھمے زانت ءِ گواڈگ لمہ کریمہ بیت کہ آ وھدے بی ایس او (آزاد) ءِ آشوبی پتر ءَ وتی کدماں ایر کنت گڑا نہ تھنا بی ایس او ءِ دپتر ءَ مٹینّ اِیت بلکیں بلوچ ءِ سیاست ءِ تب ءَ ھم مٹ ءُ بدل کنگ ءِ تاکت ءَ داران ءَ لس مھلوک ءِ سر ءَ بگر داں زالبولانی سر ءَ مزنیں سانے دور اَنت۔ مروچی کہ ھر زالبولے دگانی سر ءَ ، سیاست ءِ قیادت ءِ پاسداری ءَ کنگ ءَ اِنت گڑا ھمے زانت ءِ گواڈگ ات کہ آئی ءَ ڈکال جتیں زمانگے ءَ وتی اھدسازیں کردے پیلو کنان ءَ وتی زانت ءِ وشبوہ سرجمیں بلوچ ءِ ھند ھند ءُ کوچگ کوچگ ءَ سر کنان ءَ داں ھستیں وھد ءِ بلوچ زالبولیں قیادت ءِ میان ءَ تالان کت۔

اگاں ھورت چارگ بہ بیت گڑا ھچ پدکردے وتی گوستگیں کڑی ءَ چہ نہ سستگ۔ لمہ کریمہ ءِ بلوچ سیاست ءَ آھگ ءُ مزنیں جنزے چست کنگ یک نوکیں ویلے نہ بیت بلکیں اے ویل وتی گوستگیں کڑی ءِ بھرے۔ بزانکہ اے ربیدگی endorsement ءِ ھیالے کہ دیم ءَ کیت گڑا اشی ءِ کڑی بانڑی ءِ ویل ءَ ھمگرنچ اِنت۔ اگاں چوش گشگ بہ بیت کہ بلوچ راجمان ءَ بانڑی ءِ وڑیں کردار ودی مہ بوتیں گڑا بوت کنت کہ لمہ کریمہ ودی نہ بوتگ ات۔ اے اسل ءَ ھما درچ اِنت کہ اشی ءَ پرانسیسی شھزانت مشل پوکو بندپتر ءِ ویل ءُ واکیاتانی درچے سرپد بیت۔ پمیشکہ آئی ءِ نز ءَ ھچ واکیہ وتی ناگمانی ءُ اناگتی بوت نہ کنت۔ بلکیں کڑی بندپتر ءِ یک ویلے ءَ گوں الم بندوک بیت۔ ھما بُن ءُ بیھ ءِ ویل ءِ بنیاد ءَ بلوچ ھر نوکیں پیسلہ زور اِیت گڑا اشی ءِ کڑی بلوچ ءِ گوست ءَ بوتگیں ویل ءِ کڑیاں گوں ھمگرنچ اَنت۔ اے کڑی ءَ وتی ھمزیلی نسیب ءَ بوت، بلے جُست اِش اِنت کہ اے پدکرد ءِ میان ءَ آشوبی ترندی چون کیت؟ آشوب زاناں ترند ءُ گشادیں پدکردے؟ بلے یک گپے پدر اِنت آشوب ءِ ھر پدکرد سُبک سُبک ءَ کیت، مدان مدان ءَ مٹی آیان بیت۔ وھدے کہ آشوب ءِ میان ءَ سنچ ءُ سما ءِ پدکرد ترندتر بیت گڑا آشوب وتی گردانک ءَ سرجم کنت۔ زانت ءِ گواڈگ ءَ ھما راجی سنچ ءُ سما ءِ توم مھلوک ءِ مجگانی اندر ءَ چنڈ ات ءُ نوں اے توم ءَ چُنک جتگ، روچ پہ روچ ودّان اِنت بلے شرت ھمیش اِنت کہ ہستیں زانت ءِ گواڈگ وتی پیسریگیں ویل(لمہ ءِ سیاست ءَ آھگ) ءَ چہ مستریں کچ ءُ کساسے ءَ داں وت ءَ سر کنگ ءِ ھاٹیگ ءَ بہ دار ایت اگاں دیمتر ءُ برزتریں مکامے ءِ ھاٹیگ ئِے نہ داشت گڑا اے ابرمی کانود اِنت کہ آئی ءَ ابرم سر چگل کنت۔ بلے پمیشکا ما گند ایں اے زانت ءِ گواڑگ وتی گوستگیں ویل ءَ دستے دیم ءَ اِنت۔ اے وت ماں وتی میان ءَ گو یے (ریسے) نہ اِنت بلکیں ابرم ءِ پدکرد ءِ وت گو یے۔ گڑا ابرم ءِ میان ءَ زندگیں ھر شے ہمے گو ءِ پشت ءَ جنزگ ءَ اَنت ھر کس کہ اے گو ءَ ھوار نہ کپت گڑا آئی ءَ ابرم سرچنڈ کنت۔ “اے زیند مرادانی گُو یے”

یزد ءَ زاھدان ءِ جھمنندیں دو مردم دزگیر کنگ ءَ پد بیگواہ کنگ بیتگ اَنت-

اھوالانی رد ءَ گوستگیں بیگاہ ءَ یزد ءَ لس پوشاکی کارندھاں یک پارکے ءَ دو مردم لٹ ءُ کُٹ کنگ ءَ پد گون وت برتگ اَنت-

آوار جنگ بیتگیں مردمانی پجار بیست ءُ چار سالی ئیں عبدالغفور شاہ بخش ء ھنیپ ءُ بیست ءُ نُھ سالی ئیں مسعود شاہ بخش ء اسماعیل کہ ھردوک زاھدان ءِ جھمنند گوشگ بوگ ءَ اَنت-

اھوالانی رد ءَ ھردوک ابید دگہ جست ءُ پُرس ءَ لس پوشاکی کارندھاں لٹ ءُ کُٹ کتگ ءُ پد ءَ گون وت برتگ اَنت-

اھوالانی رد ءَ ایشانی گرگ ءَ پد ایشانی سنگت ءُ ھمراہ واتر سیکورٹی ادارھانی گور ءَ شتگ اَنت گڑا آیاں ایشانی دزگیری نہ من اتگ-