نگدی سما(ھدادات)
نبشتہ کار: شاھد اھمد
دی بلوچستان پوسٹ
بندات کناں نام ءِ ھدا ءِ کہ آ اے جَھان ءِ مالک ءُ مُلک اِنت، آ چہ ھچ چیز ءَ بے ھچ نہ اِنت۔ ھداداتی ھُنراں وتی اندر ءَ مار اِیں ءُ ابید ایشی ءَ ساچوکے بوت نہ کن ئے۔
ودی بوگ ءَ پیسر ءُ داں گڈی ءَ ھدا داتگیں مڈّی ءَ نگدی سما اِنت دنیا تجربہ کُتگیں چیز ءَ پُر اِنت، ھمے تجربھاں اِلم گْوش اِیں، ھمے زانت ءُ اِلم ءِ بُنزہ ءَ اِلم شوھاز کنیں ءُ آیانی نگدی سماھاں زور اِیں ءُ دگہ سما پیداک کنیں۔
”مَٹّی آرگ ءِ گرانی ءَ اگل ءَ سَگّ اِتگ“ اگلی ھساب ءَ نگدی سسا ءُ ساچ بْراھدار بنت۔
نگدکار ءِ گْور ءَ سمائی بہ بیت وھدے ساچشتکار ءِ ساچ اِتگیں المی مواداں درچِنگ ءِ ھداداتی ھُنر ءِ تاکت بہ بیت۔ درور تو چے گند ئے؟ من ڈگار ءَ چارگ ءَ آں، ڈگار ءَ چے گند ئے؟ گَلّہ ءِ کِشار۔ نوں تو گَلّہ ءِ کِشار دیست بلے یک برے تو نگدی سِنچ کن ئے ءُ جیڑ ئے کہ اے گَلّہ ءِ کِشار چوں جوڑ بوتگ ؟ چوں؟ یک جُستے ودی بیت اگلمندیں داب ءَ تو گْوست ءِ تہ پُتر ئے چار ئے، وان ئے کہ اے چوں گَلّہ ءِ کِشار جوڑ بوتگ؟
وھد ءِ ھمراھی ءَ وانگ ءُ زانگ ءَ پَد گوں ھورتی ءَ سما کنان کن ئے کہ چوں گَلّہ ءِ کِشار جوڑ بوتگ؟ بندات ءَ تومے کِش ئے ھمے توم تِج جنت ”تِج“ تئی ساچ اِنت ءُ تج ءَ کاد ءُ ھاک پکار بیت ”کاد“ ءُ ”ھاک“ نگد اِنت، کِشار تئی ساچ اِنت گوات ءُ آپ نگد اِنت، گَلّہ ءِ دانگ ساچ اِنت ءُ کچ ءُ ماپ، تور نگد اِنت۔
درورے: کائد اعظم ءِ کدر گوں زرّ ءُ کلدار ءَ ماپ کنگ بیت اے درور ءِ تہ ءَ راستی کُشّگ بوتگ ءُ دروگ ءِ بازار ءَ یلچّر اِنت، شیتانی کنت۔
اد ءَ نگد ھما وھد ءَ زاھے نہ بیت کہ بدی مہ بیت، کَھار مہ بیت گڑا نگد شریں چَمّاں زانگ بیت، چَمّاں ھچ میار نیست میاری ھما ساچشتکار ئیگ اِنت کہ گوں دروگیں بانزلاں آپ چَنڈ اِیت۔
پرز کن یک گلے جوڑ کُرتگ پہ یک مکسدے ءَ ، یک ارادھے ءَ تو ھمے مراد ءَ چوں گندگ لوٹ ئے؟ ھمے مکسد ءِ واب ءَ گند ئے، جیڑ ئے، شور کن ئے کہ چوں مکسد ءَ گپت بکناں۔ اے بلاھیں کارے، ءُ گیشتر گوں مول ءُ مراد ءَ چارگ بیت۔
من ھمے واست ءَ گران گْوشگ ءَ آں کہ چوشیں چیزے ھست کہ پہ ارزانی ءَ دز بہ کپ اِیت، تو گُش ئے پورا ھر چیز پمن جریدگ اِنت، ھر چیز بہ لوٹاں ٹُپّگ ءَ بُن ءَ بہ کپ اِیت, اے وَ ھدا ءِ شُگر اِنت کہ مئے چم، دست ءُ پاد سلامت اَنت، بس من ءَ دگہ چے چیز ءِ ھاجت ھست؟
چُشیں کِسم ءِ آڑالیں مردم واب گند اِیت گل بیت، دستاں چیر ءَ کنت وپس اِیت درستیں کار باندا وت شر بنت، درست ھیر بیت ھدا مزن اِنت، کار درست شر بنت۔
اے گپاں اگاں کسے گوش بدار اِیت تو گُش ئے عراق فتح کُت مرد ءَ ھدا اوں دل ءِ ھال ءَ سھیگ اِنت، نام ءِ ھدا ءِ گرگ سواب اِنت بلے اے وَ کلاگے کہ باندا ھچ نہ بوت۔
کار ءِ کنگ ءُ گپ کنگ ءِ باز تپاوت ھست کہ ھو کار وَ الم کنگی اَنت۔ کَے کنت کاراں ءُ چوں کاراں بکن ئے؟ کار چارگ لوٹ اَنت، کار وانگ لوٹ اَنت، کار کنگ لوٹ اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی ءِ اِنت
