TBP Balochi

روکپتی بلوچستان ءِ بنجاھی شھر زاھدان ءِ جھمنندیں مردمے ماں شیراز عادل آباد ءَ پاھو دیگ بیتگ-

اھوالانی رد ءَ پاھو دیگ بیتگیں مردم دو روچ پیش پہ پاھو ءَ جتائیں کوٹی ءَ برگ بیتگ ءُ گوستگیں روچ ءِ سھب ءِ ساھت شش ءَ آ پاھو دیگ بیتگ-

پاھو دیگ بیتگیں مردم ءِ پجار خلیل عالیزئی ء مھمد عمر جھمنند زاھدان ءِ نام ءَ زانگ بیتگ –

خلیل عالیزئی دو سال پیش ایست ءُ بازرسی قطرویہ نی ریز ءِ شھر ءَ نشہ باپاری ءِ بھتام ءَ دزگیر کنگ بیتگ –

آ گوستگیں روچ ءَ دادگاہ انکلاب شیراز ءَ پاھو داتگ- اھوالانی رد ءَ آئی ءِ کھول ءُ نزیکیں مردم ھال دیگ نہ بیتگ انت گڈسر ءَ رھوتی دروشم ءَ ھال دیگ بیتگ انت-

آئی ءِ نماز جنازہ گوستگیں روچ ءَ ماں زاھدان ءَ وانگ بیتگ-

زانگ نہ بیت سال دوھزار ءُ بیست ءُ چار ءَ بازیں مردمے پاھو دیگ بیتگ انت بلے نوکیں سال ءِ بندات ءَ اے بنداتی وئیل انت کہ رپورٹ بیتگ –

رکھنی کسٹمز چیک پوسٹ سر ءَ پٹ پول میان ءَ یک لاپ پُریں زالبولے دگ سر ءَ چلگ بیتگ، بلے تُرندیں سارتی ءِ سبب ءَ نُنک نہ رک اِتگ ءُ بیران بیتگ-

گیشیں ھالانی رِد ءَ کسٹمز کارمنداں یک بروبکس گاڑی یے پٹ پول واستا داشتگ چریشی ءِ یک لاپ پُریں زالبولے ایمرجنسی ءِ جاوراں ساڑی بیتگ ءُ آئی ءَ نادُراھجاہ ءَ برگ ءَ بیتگ اَنت-

زالبول ءِ کھول ءَ کسٹمز کارمنداں گْوشتگ کہ گاڑی ءَ لاپ پُریں زالبولے ھست کہ آئی ءَ زوت نادُراھجاہ برگ الّمی اِنت. بلے کارمنداں آیانی گپ گوش نداشتگ ءُ گاڑی ءَ ساڑی ئیں سرجمیں مردم چہ گاڑی ءَ ایر گپتگ اَنت ءُ گاڑی وتی دست ءَ کتگ-

اشی ءَ پد زوت نادُراھجاہ سر نہ بیگ ءُ الاج نہ رسگ ءِ سبب ءَ چہ زالبول دگ سر ءَ چلگ بیتگ-

بدبھتی ءَ چہ تُرندیں ساری ءِ سبب ءَ ننک نہ رک اِتگ ءُ بیران بیتگ- اے دردناکیں وئیل پد دمگی مردماں تُرندیں گم ءُ زھر گپتگ اَنت-

دمگی مردمانی گوشگ اِنت کہ کسٹمز کارمندانی رویشگ پہ زانت بیتگ، چریشی ءِ مول ءُ مراد راج ءِ ننگ ءُ ناموس لگتمال کنگی بیتگ-

آیاں اے وئیل ءِ پٹ ءُ پول ءِ لوٹ کتگ ءُ کسٹمز کارمندانی ءِ ھلاپ ءَ تُرندیں کاروائی ءِ کنگ زور داتگ –

زانگ بہ بیت کہ بلوچستان ءَ پوج ءِ چیک پوسٹانی سر ءَ مساپراں کلاکانی کلاک ءِ دارگ سر ءَ ٹرانسپورٹراں زھرشانی کتگ-

وھدے کہ گوستگیں روچاں سروزیر بلوچستان نواب محمد اسلم خان رئیسانی ءَ بلوچستان اسمبلی ءَ پوائنٹ آف آرڈر ءِ سر ءَ وتی لیکہ درشان کنان ءَ گْوشتگ کہ سیکورٹی پوج ءِ چیک پوسٹ بلوچستان ءِ مردمانی واستا مزنیں جیڑھے، شال مستونگ شھدگ سر ءَ لک پاس ھند سر ءَ سے چار کلاکاں گاڑی دارگ بنت اے چیک پوسٹانی سر ءَ مارا ھم دارگ ءُ جُست پُرس کنگ بیت کجا چہ پیداگ ءِ کجا چہ آیگ ءَ ئے-

آئی ءَ لوٹ کتگ کہ ایف سی ءِ چیک پوسٹاں زوت دیر بہ کن اِت-

یونس زھری ءَ گوشتگ کہ شال ءَ چہ کراچی ءَ رؤگ ءَ پنچ ءَ چہ ھشت کلاک ءَ مساپراں جتاجتائیں چیک پوسٹانی سر ءَ دار اَنت، شال ءَ چہ مستونگ سپر یک کلاکے ءِ جاہ ءَ مردم چار کلاک ءَ پد مستونگ ءَ سر بنت-

ریاست ءُ ادارہ زمہ وار اَنت، براتانی دیم ءَ آرگ نہ بیت اَنت گُڑا تُرندیں زھرشانی کنگ بیت-

چہ ھب چوکی ءَ سیادی داروکیں دو براتانی، یاسر ءُ جنید ء عبدالحمید، زورانسری آوار جنی ءِ ھلاپ ءَ آئی ءِ گْوھار یاسمین حمید ءَ رسانکدر ” ایکس” سر ءَ یک تامُر بندے شنگ کتگ-

آئی ءَ گْوشتگ کہ آئی ءِ دوئیں دوئیں برات گوستگیں سے ماہ ءَ چہ زورانسری بیگواہ اَنت-

یاسمین حمید رِد ءَ ھشت اکتوبر دوھزار بیست چار ءِ شپ دہ نزیک ءَ، ھب بھوانی شاہ پمپ نزیک ءَ جنید حمید سے گاڑیاں سوار سلاہ بندیں مردماں تُپنگ زور ءَ آوار جتگ اَنت- دو روچ ءَ پد، یازدہ اکتوبر ءَ آئی ءِ مستریں برات یاسر حمید چہ کلات ءَ پاکستانی پوج ءَ آوار جنگ ءَ پد بیگواہ کتگ-

اشی ءَ ساری اسرمندیں کھول ءَ ھب چوکی ءَ پریس کانفرنس ءُ زھرشانی کتگ، بلے سے ماہ ءِ گوزگ ءَ اَبید دوئیں برات انگت دیم ءَ آرگ نہ بیتگ اَنت-

یاسمین حمید ءَ وتی تامُربندیں درشان ءِ تہ ءَ گْوشتگ کہ وتی براتانی یل کنائینگ ھاتر ءَ آ دہ جنوری دوھزار بیست پنچ آدینگ روچ ءَ لسبیلہ پریس کلب دیم ءَ سے روچ ءَ شُدکشیں ھڑتالی بُنجلے جتگ-

اشی ءَ اَبید دوازدہ جبوری یکشمبے روچ ءَ نیمروچ ءِ دو ءَ یک زھرشانی یے ھم کنگ بیت-

آئی ءَ سرجمیں پڑ مردماں گوں دزبندی کتگ کہ آ اے زھرشانی ءَ بھر بزیر اَنت ءُ انسانی ھکانی ادارھاں چہ لوٹ کتگ کہ آ یاسر ءُ جنید ءِ یل کنائینگ ھاتر ءَ وتی کرد ءَ پیلو بہ کن اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کرتگیں درشان ءِ تہ ءَ گوشتگ مئے سرمچاراں کیچ ءِ دمگ سورو ءَ برجاھیں زورگریں پاکستانی پوج ءِ بُنجل سر ءَ اُرش کتگ-

جارکش ءَ گْوشتگ کہ پنچ جنوری ءَ ھپت ءُ پانزدہ ملٹ سر ءَ بُنجل گوں نوکیں مزنیں سلاھاں چہ اُرش کرتگ اُرش ءِ آسر ءَ دُژمنیں پوج ءِ یک کارمندے یے مرتگ ءُ چار ٹپی بیتگ اَنت-

جارکش ءَ گْوشتگ کہ بی ایل ایف اے اُرش زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج ءِ سر ءَ اُرش کنت-

بلوچستان ءِ دمگ چہ کیچ ءَ پاکستانی پوج ءَ دو براتاں ھوار بازیں مردمے آوار جتگ ءُ بیگواہ کتگ اَنت-

بیگواہ کنگ بیتگیں مردمانی پجّار سئید ء عبداللہ، حمید ء عبداللہ، رفیق ءُ عبید ناماں چہ بیتگ اَنت-

بیگواہ کنگ بیتگیں مردم کیچ ءِ دمگ مند لبلان ءَ اَبید پوج ءَ بازیں مردمے آوار جتگ- آیانی پجّار انگت نہ بیتگ اَنت-

بلوچستان ءِ تیابدپی شھر گوادر ءَ زورانسری بیگواھی ءِ آماچیں نعمان اسھاک ءِ یل نہ کنگ ءِ ھلاپ زھرشانی نندانک مروچی دومی روچ ءَ جی ٹی گیٹ ءِ دیم ءَ برجاہ انت-

ھمے وھد ءَ آئی ءِ برات ءَ گوشتگ نعمان 27 نومبر 2024 ءَ گوادر ڈوریا تیاب ڈیپ ءَ پاکستانی پوج ءَ آوار جتگ ءُ برتگ- ایشی ءَ پیش ما آمیدگس ءُ پاکستانی واکدارانی گور ءَ دز بندی برتگ اگاں آئی ءَ جرمے کتگ گڑا آ دیم ءَ آرگ بہ بیت اِنت ءُ آمیدگس ءَ پیش کنگ بہ بیت اِنت-

آئی ءَ گوشتگ برات ءِ یل نہ کنگ ءَ داں اے زھرشانی برجاہ بیت اِنت ءُ ترندی ایشی ءِ توک ءَ کیت اِنت-

زھرشانی نندانک ءَ زالبول ءُ کماشانی مزنیں کچے ھوار اِنت کہ آیاں زورانسری بیگواھیانی دارگ ءِ لوٹ.کنان ءَ بلوچ چاگرد ءَ اے زوراکی ءِ رکگ ءَ یکجاہ بوگ ءُ توار چست کنگ ءِ لوٹ کتگ-

کامریڈ سدّام ابدمانیت ءِ نہ ترسیں بامرد

نبشتہ کار: سنگت نورَک بلوچ

دی بلوچستان پوسٹ

نزور بالاد ءُ تمردیں پگرے ءٙ گوں لھتیں نہ ترسیں زند لھتیں انچیں ھشیمیں کار کن اٙنت تاں نزوریں بالاد ءِ ھرچ بند وتی تہ ءٙ شرمندگی سما کنت ۔ اگاں پگر نہ ترس منتگ تاں زیبائیں منزل ءِ راہ ءٙ ھرچ اڑاندے بئیت پرائی ھچّے نہ بیت ۔ پرائی زیبائیں منزل ءِ راہ ءٙ مٙرْگ ھچ مانا نہ دار ایت ، آئی ءِ بدن جنگ ءِ تک ءُ پھناتاں گوں اٙنچیں لیب کنت بلکیں مَرْگ چرائی زند ءٙ بیم زور ایت ءُ ابدمانیت آئی ءٙ گوں بشکنداں ھمباز کنت ۔

ابدمانیت ءُ انسان ءِ کرد ءِ میان ءٙ مزنیں سیادی یے ھست ۔ ابدمانیت ءِ ھمبازاں ھما مردم شر ایر کیت کہ آ وتی زند ءِ ھرچ ساھت ءَ گواچنیت ءِ رکینگ ءِ جھد ءٙ بہ گوازین اِیت ،  آ آجوئی ءِ جھد ءِ ھرچ تک ءُ پھناتاں پوہ بہ بیت ، آ بہ زانت کہ وھد چہ من چے لوٹ اِیت ءُ من ءَ چے کنگی اِنت ۔ اے راستے اگاں ترا اے وھد مَٹ کنگی اِنت ، اے ھَستیں جاورھال مَٹ کنگی اَنت ، اگاں ترا گلامی ءِ سانکل سِندگی اَنت گڑا ھرچی کہ وھد ءِ ھژدری لوٹ اَنت یا راجی جھد ءِ الّمی ئیں لوٹ اَنت آ ایمانداری ءَ گوں پیلو کنگی اَنت ۔ اگاں تو وھد ءِ لوٹانی ھساب ءَ وھد ءِ مَٹ کنگ ءِ واستا وتی کِرداں گوں ایمانداری ءَ پیلو کن ئے گڑا بہ زان ئے کہ تو ابدمانیت ءِ پڑ ءَ وتی گام ایر کرتگ اَنت ۔

لھتیں کارست چاگرد ءِ تہ ءَ کندیل ءِ پیما بنت کہ پورھیں چاگردے ءَ یا یک راجے ءَ مدامی واستا رژنائی یے ءِ پَنجگاں دور دے اَنت ، آ کارست چاگرد ءَ یک تچکیں راھے ءَ راھی کنگ ءِ وسیلہ بنت ءُ ھما چاگرد ءِ ھرچ نپر ھمے رژنائی ءِ پَداں گِران بیت ءُ پہ یک نوکیں بانداتے ءَ راھی بیت ۔ ھمے کندیل گونگیں کارست بلکیں پہ تھاریں چاگرداں رژنائیں باندات بنت ءُ مدامی پہ گلزمین ءَ کامریڈ ءُ زمین شیدا یے زانگ بنت ءُ دائمی ماں جھان ءَ ابدمان بنت ۔ مرچی اگاں تئی نام ءُ نشان گار نہ اِنت گڑا اے ھمے کندیل گونگیں کارستانی برورد اِنت کہ تئی چاگرد اِش مدام رُژنا کرتگ ءُ ترا زندگ بوگ ءِ سکین اِش داتگ۔

اے وَ تچک اِنت انسان ءٙ آئی ءِ کِرد ابدمان جوڑ کنت انچشکہ اھد ساچیں بی ایس او ءِ کامریڈ سدّام ھم ھمے ابدمانیت ءِ پاداں چُکّان چُکّان ءٙ ابدمانی ءٙ ھمباز کنت – کامریڈ بی ایس او ءِ نہ ترسیں کامریڈے اَت ، بلوچستان ءِ مرواردیں بیرک ئِے دست ءٙ کمبر گونگیں کامریڈے ءِ شھر ءٙ دمک ماں دمک ، چارراہ ماں چارراہ سرگردان اَت ، کامریڈ زھگ ، جٙوان ءُ کماشاں مُچّان ءٙ بلوچستان ءٙ آژناگ کنگ ءٙ اَت ۔ ھمے وڑ ءَ وھد گوزان ءُ جاور بدل بوان بوت اَنت ،  کامریڈ سدّام ھم ھمے بدلی ءِ دْرچ ءَ پشت نہ کپت ، کامریڈ ھم سرمچارے بوت ۔ کامریڈ نزور جانے اَت بلے کامریڈ ءِ ھرچ گام ھمے پنت ءٙ دیگ ءٙ اَت کہ نزور جانی کسی مھکمیں پگر ءِ دیم ءٙ اڑاند بوت نہ کنت ۔ کامریڈ گواچنیں کِرد ساچے اَت ، کامریڈ ءٙ انچش گواچنیت ءِ تہ ءٙ وتی کِرد دور دات اَنت کہ گواچنیت ءِ بوستان ھم پرائی واستا دائمی تُنیگ بوت ۔

مھکمیں ءُ تمردیں پگرے ءَ گوں بندوکیں کامریڈ سدّام کہ ھرچ رنگیں اڑاندانی دیمپانی ءٙ پد ھم دژمن ءِ دیم ءٙ چو کوہ ءٙ مِکّ ، نہ تستگیں بچکندگاں ھوار وتی شورہ بستیں بدن ءٙ گوں ابدمانیں گاماں ترند کنت ءُ وت ءٙ زمین ءِ میار کنت ۔ بلکیں آ ساھت ءٙ کامریڈ ابدمانی ءِ پٹّ ءٙ وتی اولی گاماں ایر کنگ ءٙ بیت تہ ابدمانیت چہ واب ءٙ پچ لرز ایت ءُ کامریڈ ءِ وش آتک ءٙ گوں سھریں دروتے ءٙ کنت ۔

بلوچستان ءِ دمگ بولان ءَ پاکستانی پوج ءِ مزنیں کچے ءَ لشکر کشی برجاہ ءَ اِنت-

ھالانی رِد ءَ چہ سبی ءَ مزنین کچے ءَ پوجی ٹرک ءُ دگہ گاڑیاں ھوار پرپٹانی کاروان بولان ءِ دمگ سانگان ءُ کش گوراں مروچی سھب ءَ چہ پیشگامی کنگ ءَ اِنت-

واکدار ءَ انگت ھچ وڑیں درشان شنگ نہ کتگ-

زانگ بہ بیت بلوچستان ءِ جتاجتائیں دمگاں وھد وھد سر ءَ پوجی لشکر کشیانی درچ برجاہ ءَ اِنت-

روکپتی بلوچستان ءِ دمگ کنرک ءَ ناشناسیں مردمانی تیرگواری ءَ یک ورنایے بیران بیتگ-

بیران بیتگیں مردم ءِ پجار نوزدہ سالی ئیں ابراھیم مولازئی ء ارشد جھمنند کنرک ءِ نام ءَ زانگ بیتگ-

وئیل گوستگیں روچ ءَ کنرک ءِ ھند نزر آباد ءَ پیش اتکگ کہ اود ءَ تیرگواری ءَ ابراھیم نامیں مردمے بیران بیتگ-

وئیل ءِ سبب زانگ نہ بیتگ ءُ لاش کھول ءِ ھوالگ ءَ کنگ بیتگ-