TBP Balochi

بلوچستان ءِ دمگ کیچ ءُ ڈیرہ بگٹی ءَ چار مردم پاکستانی پوج ءِ دست ءَ بیگواہ کنگ بیتگ اَنت-

گیشیں اھوالانی رد ءَ چہ کیچ ءِ بنجاھی شھر تربت ءَ سَے سالاں بیگواھیں مردم ءِ دو برات دگہ بیگواہ کنگ بیتگ اَنت-

کھول ءِ رد ءَ تربت آپسر بنڈ ءِ بازار ءَ پوج ءَ بیڑ برتگ ءُ اود ءَ شیر جان اسھاک ءُ فاروق اسھاک آوار جتگ ءُ برتگ اَنت-

کھول ءِ رد ءَ سَے سال پیش ایشانی برات شمس اسھاک ھم بیگواہ کنگ بیتگ –

کھول ءَ سرکاری واک، سیاسی پاٹی ءُ انسانی ھکانی گلاں گامگیج زیرگ ءِ دستبندی کتگ-

دومی نیمگ ءَ چہ ڈیرہ بگٹی ءَ دو مردم بیگواہ کنگ بیتگ اَنت-

اھوالانی رد ءَ دو روچ پیش ڈیرہ بگٹی ءَ ایف سی ءَ سوئی ءِ شھر ءَ دو ورنا آوار جتگ ءُ برتگ انت-

آوار جنگ بیتگین مردمانی پجار شریف ء بھورا خان بگٹی ءُ پتو خان ء سراج بگٹی ءِ ناماں زانگ بیتگ اَنت- ھردوکانی سیادی یکیں کھول ءَ انت-

ھمے وڑ چہ شال ءَ یک ورنایے آوار جنگ ءَ پد بیگواہ

اھوالانی رد ءَ شال ءَ جناح روڈ ءَ پاکستانی پوج ءَ کلات ھزینہ ءِ جھمنندین نودربر ولی مھمد ء علی اکبر آوار جتگ ءُ برتگ- کہ چریشی ءَ پد آ بیگواہ انت-

زانگ بہ بیت بلوچستان ءِ جتا جتائیں جاھاں زورانسری بیگواھیانی ھلاپ ءَ زھرشانی برجاہ انت-

کیچ ءُ گوادر ءَ دو ورنایانی بیگواھیانی ھلاپ ءَ کھولانی نیمگ ءَ زھرشانی نندانک برجاہ انت کہ اود ءَ مردم وتی بیگواھیں مردمانی یل کنگ ءِ لوٹ آں کنگ ءَ انت-

بلوچستان ءِ دمگ پسنی ءَ کوسٹ گارڈز کارمنداں ءُ کلات ءَ ڈپٹی کمشنر ءِ کارگس اُرشانی نشانگ کنگ بیتگ اَنت-

گوادر ءِ دمگ پسنی ءِ بنگلہ بازار ءَ ناشناسیں مردماں کوسٹ گارڈز بُنجل اُرش ءِ نشانگ کتگ-

اِھوالکار رِد ءَ اُرش وھد ءَ تراکانی توار اش کنگ بیتگ چریشی ءِ آسر ءَ پوج ءَ جانی تاوان ءِ دیمپانی کنگ کپتگ بلے واکدار نیمگ ءَ ھچ وڑیں درشان دیم ءَ نیتکگ-

ھمے وڑ کلات شھر ءَ ڈپٹی کمشنر کارگس ءِ بُنجاھی گیٹ سر ءَ ناشناسیں مردماں دستی بمب اُرشے کتگ-

پولیس رِد ءَ تراک ءَ چہ اود ءَ ساڑی ئیں پولیس کارمند ٹپی بیتگ اَنت-

ٹپی پولیس کارمند ڈسٹرکٹ ہیڈکوارٹر نادُراھجاہ ءَ برتگ- پولیس رِد ءَ سلاہ بندیں مردم اُرش ءَ پد تتک-

زانگ بہ بیت کہ سے شمبے ءِ روچ ءَ بلوچستان ءَ چار وئیلاں پاکستانی پوج نشانگ کنگ بیتگ-

مروچی سُھب ءَ زامران ءِ دمگ ءَ پاکستانی پوج ءِ کاروان ءَ ھوار یک گاڑی یے بمب اُرش ءِ نشانگ کنگ بیتگ اَت ءُ اُرش آسر ءَ کارمنداں جانی تاوان چست کنگ کپتگ-

زامران اُرش ءِ زمہ واری بلوچ لبریشن آرمی ءَ منّ اِتگ – جارکش جیئند بلوچ ءَ درشان ءِ تہ ءَ گْوشتگ کہ تراک ءِ آسر ءَ پوج ءِ پنچ کارمند مرتگ ءُ دو ٹپی بیتگ اَنت وھدے کہ آیانی گاڑی سرجم ءَ تباہ بیتگ-

آ دگہ اُرشانی زمہ واری انگت ھچ گل ءَ نہ زرتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں آواران ءَ پاکستانی پوج ءِ سر ءَ اُرش کتگ دو کارمند کُشتگ ءُ بازیں ٹپی کتگ وھدے کہ بارکھان ءُ کوھلو ءَ زورگریں پاکستانی پوج ءِ چوکی نوکیں ءُ مزنیں سلاھاں چہ نشانگ کتگ اَنت وھدے کہ بارکھان چہ کوھلو ءَ رؤکیں ھائی وے دگ روگ ءُ آیگ ءِ ھاتر ءَ بند کتگ ءُ گاڑیانی پٹ ءُ پول بندات کتگ-

جارکش ءَ گْوشتگ کہ سرمچاراں شش جنوری دوشمبے ءِ بیگاہ چار ءَ رڑکھن بارکھان ءَ شم ءِ ھند سر ءَ برجاھیں زورگریں پاکستانی پوج ءِ چوکی راکٹ لانچر ءُ دگہ نوکیں مزنیں سلاھاں چہ اُرش ءِ نشانگ کتگ چریشی ءِ آسر ءَ زورگریں پوج ءَ جانی ءُ مالی تاوان داتگ-

جارکش ءَ گْوشتگ کہ دومی کاروائی کوھلو ببرٹک ھند سر ءَ گوستگیں روچ ءَ بیگاہ ءِ ھشت نیم ءَ کتگ، اود ءَ سرمچاراں زورگریں پاکستانی پوج ءِ چوکی راکٹ لانچر ءُ دگہ سلاھاں چہ نشانگ کتگ چریشی ءِ آسر ءَ پوج ءَ جانی ءُ مالی تاوان داتگ-

جارکش ءَ گْوشتگ کہ وھدے کہ زی بیگاہ ءِ ساھت پنچ ءُ ھپت ءِ میانی ءَ سرمچاراں بارکھان ءَ چہ کوھلو ءَ رؤکیں ھائی وے دگ روگ ءُ آیگ واستا سرجمی ءَ بند کتگ ءُ پٹ ءُ پول کتگ-

جارکش ءَ دگہ یک درشانے ءِ تہ ءَ گْوشتگ کہ مئے سرمچاراں شش جنوری دوشمبے ءِ وھد ءَ ھپت نیم ءَ تیرتیج آواران ءَ برجاھیں زورگریں پاکستانی پوج ءِ بُنجل سر ءَ مزنیں ءُ وتکاریں سلاھاں چہ اُرش کتگ-

آئی ءَ گْوشتگ کہ پانزدہ ملٹ ءَ تاں برجاھیں اے اُرش ءَ دُژمن ءِ دو کارمند مرتگ ءُ بازین ئِے ٹپی بیتگ اَنت-

جارکش ءَ گْوشتگ بلوچستان ءِ ھرچ ھند سر ءَ ھزرانی پوجی چوکی ءُ سادانی کچ ءَ بُنجلانی بیگ دُژمن سر ءَ سوبمندیں اُرش چیرجنگی ءِ رُژنائی اِنت ءُ ھمے زبیائی سرڈگار ءَ چہ مھر ءِ درشان اِنت-

جارکش ءَ گْوشتگ کہ بلوچستان لبریشن فرنٹ ءَ اے اُرشانی زمہ واریاں منّ اِیت ءُ زورگریں پوج ءِ دراھگ ءَ تاں پوج ءُ آئی ءِ شوربندیانی نشانگ کنگ ءِ اِھد ءَ کنت-

شال ءَ پولیس ءِ گاڑی سر ءَ تیرگواری ءَ چہ دو کارمند بیران ءُ دو ٹپی بیتگ اَنت-

گیشیں ھالانی رِد ءَ شال ءِ دمگ سریاب دگ گاھی خان چوک سر ءَ پولیس ءِ گاڑی سر ءَ تیرگواری کتگ چریشی ءِ آسر ءَ دو پولیس کارمند جاہ پہ جاھی مرتگ وھدے کہ دو کارمند ٹپی بیتگ اَنت تیرگواری ءَ پد یک تراکے ءِ توار ھم اش کنگ بیتگ-

اِھوالکار رِد ءَ پولیس ءِ سر ءَ دستی بمب ھم اُرش کمگ بیتگ چریشی ءَ تُرندیں تراکے بیتگ، شال پولیس تیرگواری ءِ ھند سر ءَ سر بیتگ ءُ دمگ انگر ءَ کتگ گیشیں پٹ پول بندات کتگ-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مئے سرمچاراں مروچی کیچ ءِ ھند زامران ءَ زورگریں پاکستانی پوج یک آئی ای ڈی اُرشے ءِ نشانگ کتگ ءُ تاوانانی دیمپان کتگ-

جارکش ءَ گوشتگ سرمچاراں زامران پوگنزان ءَ زورگریں پوج ءِ کاروان ءَ ھواریں یک گاڑی ریموٹ کنٹرولڈ آئی ای ڈی ءِ اُرش ھما وھد ءَ کتگ کہ آ سنگوان پوسٹ ءِ رسد سر کنگ ءَ بوتگ – تراک ءِ آسر ءَ پوج ءِ پنچ کارندہ مرتگ ءُ دو زدگ بیتگ انت آیانی گاڑی سرجم ءَ تباہ بوتگ-

اے اُرش ءِ زمہ واری ءَ بلوچ لبریشن آرمی من ایت-

بلوچ یکجھتی کمیٹی ءِ سروک ڈاکٹر ماہ رنگ، سبغت اللہ ساجی، لالا وھاب، سمی دین ءُ ڈاکٹر صبیحہ ءِ ھواری ءَ دشت کبرستان ءِ ھند ءَ پریس کانفرنس کنان ءَ آیاں گوشتگ بیست ءُ پنچ جنوری دو ھزار ءُ بیست ءُ پنچ ءَ بلوچستان ءِ شھر دالبندین ءَ یک راجی مُچی یے برجم دارگ بیت اِنت-

آیاں پریس کانفرنس کنان ءَ گوشتگ مروچی اے کبرستان ءَ پریس کانفرنس ءِ مول ءُ مراد دنیا ءَ ستک دیگی انت کہ بلوچ راج اے وھد ءَ بدتریں ریاستی زوراکی ءُ زُلمانی دیمپان اِنت-

آیاں گوشت ات کبرستان زُلمانی چیدگی ءَ دنت کہ بلوچ ءِ روہ اے جاہ ءَ کل کنگ بیتگ انت اے جاہ ءَ سدانی کچ ءَ کل کنگ بیتگین ھما بلوچ پُسگ انت کہ آ وتی پجار ءُ نام ءِ ھوری ءَ ریاست ءِ پاکستان ءِ پوج ءُ چیریں ادارھانی کارمنداں لوگانی توک ءَ، کھولانی ءُ سرجمیں مھلوک ءِ دیم ءَ زورانسری آوار جتگ ءُ برتگ اَنت-

آیاں گوشت آ بازیں وھداں لٹ دیگ ءَ پد آ کُشگ بیتگ انت ریاستی زوراکی ھمت وڑ گیش بوتگ کہ اے ورنا وتی کھولانی دیم ءَ پجار ءِ ھواری ءَ برگ بیتگ اَنے بلے آیانی لاش ھنچش ژانگول کنگ بیتگ اَنت آیانی کھولاں پجار کت نہ کتگ اَنت مروچی ھما بلوچ پسگ اے کبرستان ءَ بے نام ءَ کَل اَنت- بلوچستان ءِ ھمک شھر ءُ میتگانی کبرستاناں اے وڑیں بازیں کبر ھست انت کہ آیانی سر ءَ ناشناس نبشتگ انت-

آیاں گوشتگ ما سرپد بہ ایں کہ ریاست پاکستان بلوچ راج ءَ آیانی پجار ءِ بنیاد ءَ آیاں یک یک ءَ کُشگ ءَ انت ءُ آیانی لاشاں لٹ شاپ کنگ ءُ آیاں ناشناسانی نام ءَ کل کنگ ءَ انت- تپلاں بہ گر کماشاں درا ھرکس ءَ اے بیم ءِ دیمپان کنگ ءَ انت – اے درست پہ زانت کنگ بوگ ءَ انت کہ ایشی ءِ مول ءُ مراد بلوچ راج ءَ وتی سرڈگار ءَ نیست ءُ نابود کنگ اِنت اے امل میان اُستمانی تکانی رھبنداں بلوچ نسل کشی ءِ تک ءَ کیت اِنت-

آیاں گوشتگ گوستگیں سال ءَ بلوچ لانگ مارچ ءِ وھد ءَ بلوچ یکجھتی کمیٹی ءَ بیست ءُ پنچ جنوری طلوچ نسل کسی ءِ یادگار ءِ دروشم ءَ دارگ ءِ روچ دارگ ءِ جار جتگ بیتگ – اے روچ ءِ مول ءُ مراد سرجمیں ھما مردمانی یاد کنگ اِنت کہ بلوچ نسل کشی ءِ درچ ءَ کشگ بیتگ انت جسمانی مازگی بیمانی آماچ بیتگ انت ایشی ءِ ھوار ءَ اے روچ دنیا ءَ ٹاھور دیگی انت کہ ھما ڈول ءَ دگہ زیردستیں مردمانی نسل کشی جھانی پتر ءَ منگ بیت اِنت ھمے وڑ بلوچ راج ءِ سر ءَ بیوکیں زوراکی میان اُستمانی پتراں منگ ءُ زانگ بہ بیت اِنت- بلوچ راج ءِ نسل کشی ءَ دارگ ءَ ابید ھچ گامگیج سرجم نہ اِنت کہ دانکہ بلوچ راج پھریزگ مہ بیت اِنت-

پنچ جنوری دوھزار ءُ بیست ءُ چار ءَ بلوچ یکجھتی کمیٹی ءِ چارُنی بنجاھی پتر ءِ نیاد برجم دارگ بیتگ چریشی ءَ پیسلہ کنگ بیتگ کہ بیست ءُ پنچ جنوری بلوچ نسل کشی یادگار ءِ روچ انت ءُ اے روچ دارگ بیت اِنت- اے وھد ءَ بلوچستان ےِ شھر دالبندین ءَ یک گچینی مُچی یے اڑ دیگ بیت اِنت اے روچ ءِ مول ءُ مراد بلوچ نسل کشی ءِ درگت ءَ جھانی مھلوک ءِ سرپد کنگ ءَ آن لائن مھمان ءُ مراگز برجم دارگ بنت اِنت ءُ سرپدی ءِ واستا کتابچہ ءُ پنتاک بھر کنگ بنت اِنت-

آیاں گوشتگ اے روچ بیست ءُ پنچ جنوری دوھزار ء چاردہ دردناکیں رنگے ءِ درداں پرینین ایت کہ وھدیکہ بلوچستان ءِ دمگ توتک ءَ پاکستانی پوج ءِ جھلی ملیشیا ( ڈیتھ اسکواڈ) ءِ یل داتھیں جاہ بلوچ کش بنجل ءَ زورانسری آوار جنی ءِ آماچیں بلوچ پسگانی سد ءَ گیش ژانگول کرتگیں لاش دزکپتگ انت – اے دل ترکینوکیں وئیل بلوچ راج ءِ یاداشت ءَ یک جھلانکداریں ٹپے – کہ مرعشی ھربلوچ ءِ ٹک، ھمک مات، ھمک برات، ھمک پت ءُ تپلین زھگ بیم ءِ ساھگ ءَ زندگ انت – توک ءِ مُچیں گور اے دردانی چیدگ اِنت ءُ ایشی ءِ آماچیں کھول مروچی ھم وتی جگرانی ٹکرانی پجار ءُ انساپ ءِ واستا تڑپگ ءَ انت ھمے سبب انت کہ بلوچ یکجھتی کمیٹی ءَ بلوچ نسل کشی یادگار ءِ روچ ءِ واستا بیست ءُ پنچ جنوری گچین کتگ-

آیاں گوشتگ مروچی ما اے پریس کانفرنس ءِ تک ءَ بلوچستان ءَ ھوار دنیا ءِ کجام جاہ ءَ جھمنندیں بلوچ راج ءَ گوں دزبندی کن ایں کہ آ بیست ءُ پنچ جنوری ءِ یادگار ءِ روچ ءِ چن ءُ لانچاں بہ کن اَنت – بلوچ راج ءِ ھمک پرد ءَ لوٹ ایت وتی کچ ءُ کساس ءَ اے روچ ءِ چن ءُ لانچ ءَ بہ کنت انت ءُ اے جد ءُ جھد ءَ گوں بلوچ یکجھتی کمیٹی ءَ یکپتر ءَ بہ اوشت انت-

بلوچ یکجھتی کمیٹی وتی دراھیں ھنکیناں کڈن کنت اِنت کہ آ بیست ءُ پنچ جنوری ءَ دالبندین ءَ راجی مُچانکی ءِ چن ءُ لانچانی بندات ءَ بہ کن اَنت ءُ بلوچستان ءِ ھمک شھر ءُ میتگاں سرپدی ءِ مھم ءَ برجاہ بہ دار اَنت ءُ بلوچ نسل کشی ءَ سانمندیں کھولانی گون ءَ رھوتی ءَ بہ دار اَنت-

اے روچ تھنا بلوچ راج ءِ جد ءُ جھد ءِ کول نہ انت بلکیں وابیں دنیا ءِ پاد کنگ ءِ وھد انت دانکہ بلوچ نسل کشی ءِ گپ میان اُستمانی پتر ءَ منگ بہ بیت کہ بلوچ راج ءِ نسل کشی بوگ ءَ انت ءُ ایشی ءِ گر ءُ دار کنگ بہ بیت اِنت-

بلوچستان ءِ دمگ کیچ زامران ءَ پاکستانی پوج آئی ای ڈی اُرشے ءِ نشانگ بیتگ-

اھوالانی رد ءَ مروچی سھب ءَ زامران ءِ ھند پوگنزان ءَ پاکستانی پوج ءِ کاروان ءَ ھواریں یک گاڑی یے بمب ءِ نشانگ بیتگ- چریشی ءَ پورسز ءَ جانی تاوانانی چست کنگ کپتگ-

دمگی مردمانی رد ءَ اُرش ءَ پد دو ھیلی کاپٹر سر بیتگ اَنت-

واکداراں داں انگت ءَ اے درگت ءَ ھچ وڑیں اھوال دیم ءَ نیاؤرتگ انت- زامران ءَ بلوچ آجوئی لوٹوکیں گل پرکار انت کہ پاکستانی پوج ءَ جتا جتائیں اُرشانی نشانگ کنگ ءَ اَنت-

گوستگیں سال ءِ گڈسر ءَ کیچ ءِ دمگ گورکوپ ءُ دشت ءَ دو بمب اُرشانی نشانگ پاکستانی پوج بیتگ کہ چریشی ءَ گمانی ھشت کارندہ مرتگ اَنت-

زامران ءَ پیش اتکگیں اُرش ھنچیں وھدے ءَ دیم ءَ اتکگ کہ دو روچ پیش تربت شھر ءِ نزیک ءَ پاکستانی پوج ءِ کاروان ءَ ھواریں بس بلوچ لبریشن آرمی ءِ مجید بریگیڈ ءَ ‘ فدائی’ اُرش ءِ نشانگ کتگ ات-

زانتکارانی گوشگ اِنت کہ سال ءِ بندات ءَ تربت ءَ بیتگیں اے دابیں مزنیں اُرش ءَ بلوچ سلاہ بندانی نیمگ ءَ کاروائیانی ترند بوگ ءِ گمان کنگ بوگ ءَ انت-

واب پْروش

نبشتہ کار: شاھد اھمد

دی بلوچستان پوسٹ

وابانی ھیال زُرتگ ءُ نشتگاں وت دل ءَ زندگی ءَ مانا کناں، ھر چپ ءُ چاگرد ءِ سیرکگیں ڈاکاں چاراں وت ءَ وت تسلہ دے آں زندگی یک سبر ءُ اُمیتے ءَ داشتگ اَت۔ دیم کِنز بوگ ءَ واب گنداں۔

بانور منی وابانی تہ ءَ لَیب کنت، ھُشکیں ھساب اَنت، ھُشکیں جیڑگ اَنت، یکشل ءَ ھمے داب ءِ زندگی مونجائی ءَ سر کشّ اِیت۔

گُش ئے پورا ھدا پہ سبر ءِ دامن ءَ بستگ، اَنچوش گْوش ئے بولم پتاتگ ءُ ڈک داتگ کہ ابید اُمیتانی سبر ءَ دگہ کِشکے اد ءَ نہ گْواہ اِیت۔

اے منی گوش ءُ چمانی رد پَھمی اَنت کہ وت ءَ وت تسلہ دیان ءُ نشتگاں۔ واباں من ءَ چون چونیں زیبائی پیشداشتگ، چم ءُ زاھری ءَ گْوش ئے چراگانی اُمیت اتکگ، نوں نزّیک ءُ سر اِنت۔ بس کمو ساھتے ءَ ودار کن، ھمے ودار چنکیاس زیبائی ءَ براھدار کنت، جیڑگانی بازاراں دور دنت، ودار اُمیت ءِ براھی ءَ پدّر کنت۔

گُش ئے پورا آپ، نان ورگی نہ آں۔ ھمے ساھت ءَ کہ من گل ءَ بال باں اے ساھت اُمیت ءِ ودار اِنت، کہ براھی ءَ گوستگیں ساھتاں بے ھیال اِش نہ کنت بلے مجگ ءِ ردوم ءَ پراہ ءُ شاھگان کنت۔

وھد ءُ ساھت منی کیمتی ئیں مڈی اِنت، وھدے اے چہ من گستا بوت گڑا مردمے بے سمائی ءَ پیری ءَ سر کشّ اِیت، گُش ئے اے بے سمائی ءِ وشی پمن مرچی بلاھیں سزایے پشت گیجگ ءَ اِنت۔

”واب ھچ دروگ نہ اَنت دروگ ھما وھد ءَ بنت کہ پہ اَملے ءَ سر ماں چک ئِے نہ کن ئے، دل چے چے نہ لوٹ اِیت، کہ تو ئِے بہ لوٹ ئے کُت اِش کن ئے“-

نوکیں سال ءِ بندات

ٹی بی پی شونگال

نوکیں سال ءِ بندات بلوچستان ءَ آجوئی ءِ سلاہ بندانی نیمگ ءَ پاکستانی پوج ءِ سر ءَ یک ھترناکیں اُرشے ءَ گوں بیتگ- چار جنوری ءَ تربت ءِ ھند بھمن ءَ بلوچ لبریشن آرمی ءِ فدائی یونٹ مجید بریگیڈ ءَ پاکستانی پوج ءِ یک کاروانے ءَ ھواریں بسے ءِ سر ءَ تباھکاریں اُرشے کتگ، چریشی ءِ سبب ءَ چِل ءُ ھپت کارندہ مرتگ اَنت، سِی ءَ گیش زدگ بیتگ انت ءُ بازیں گاڑی یے تباہ بیتگ اَنت-

گوستگیں سال پاکستانی پوج ءُ چینی سرمایہ کارانی واستا سنگین بیتگ، ءُ سرجمیں بلوچستان ءَ بلوچ لبریشن آرمی ءُ بلوچستان لبریشن فرنٹ ءِ پرکاریانی توک ءَ بے کساس ترندی اتکگ انت – بلوچستان ءِ بیست ءُ پنچ دمگاں سلاہ بندیں گلاں نُھ سد ءُ سِی ءُ ھپت اُرش کتگ انت، چریشاں یک ھزار ءَ گیش مردم مرتگ انت ءُ شش سد ءُ ھپتاد ءُ نُھ مردم زدگ بیتگ انت – بازیں کچے ءَ کارجاھاں تاوانی بیتگ اَنت-

دو ھزار ءُ بیست ءُ چار بلوچ لبریشن آرمی ءِ کول ءُ تاکت ءِ سال ءِ درشان بیتگ، کہ آئی ءَ آپریشن ھیروپ ءَ بلوچستان ءِ گچینی جاہ گپتگ انت – آپریشن زرپھازگ ءَ گوادر ءُ کیچ ءَ لشکر ءِ گچینی جاہ نشانگ کنگ بیتگ اَنت ءُ کراچی ءَ بالی پٹ جاہ ءِ وڑیں پھزداریں دمگ ءَ چینی زرکاراناں بے کساسیں تاوانے داتگ ات-

گوستگیں سال ءِ اُرش ءُ نوکیں سال ءِ بندات گوں فدائی اُرش ءَ گپ گیش ایت کہ دو ھزار ءُ بیست ءُ پنچ ءَ مجید بریگیڈ ءِ کوشکاریں ءُ پیچیدگیں اُرش برجاہ بنت اِنت- آجوئی ءِ واستا پرکاریں سلاہ بندیں گل وتی سرجمیں زور ءَ جنان بنت اِنت، چریشی ءِ سبب ءَ بلوچستان ءَ چین ءِ لوٹ ءُ پاکستان ءِ پوج گیر مھپوز بنت اِنت-

بلوچستان ءِ دمگ چہ کیچ ءَ پاکستانی پوج ءِ دست ءَ دو ورنایانی بیگواھی ءِ ھلاپ ءَ کھول ءَ زھرشانی کنان ءَ سی پیک دگ بند کتگ-

زورانسری بیگواہ کنگ بیتگیں ورنایانی پجار رمزان ء جان مھمد ءُ شگر اللہ ء مھمد علی ءِ ناماں زانگ بیتگ اَنت-

کھول ءِ گوشگ انت کہ رمزان ء جان مھمد چہ مند ءَ گوستگیں شپ ءَ پوج ءَ دزگیر کتگ ءُ برتگ-

رمزان جان مھمد پاکستان ءِ سرکاری ڈیٹا بیس ءِ ادارہ نیشنل ڈیٹا بیس اینڈ رجسٹریشن اتھارٹی نادرا ءِ ملازم انت-

رمزان ءِ زورانسری بیگواھی ءِ ھلاپ ءَ کھول ءَ سی پیک دگ ءِ سر ءَ نندانک داتگ ءُ ھروڑیں رپت آمد ءِ واستا بند کتگ-

کھول ءِ گوشگ انت دانکہ رمزان یل کنگ نہ بیت انت شھدگ بند بیت اِنت-

ھمے وڑ شگر اللہ گوستگیں شپ ءَ پورسز ءَ تربت شاھی تمپ ءَ آئی ءِ لوگ ءِ سر ءَ بیڑ برتگ ءُ آوار جتگ ءُ برتگ-