TBP Balochi

ریاست ءِ ھلاپ ءَ بھتام : کریمہ بلوچ ءِ درگت ءَ سیمینارابی برجم دارگ ءَ بلوچ باسکانی ھکاپ ءَ ایف آئی آر نبشتگ کنگ بیتگ انت-

بلوچستان ءِ دمگ آواران ءِ ھند تیرتیج ءَ گوستگیں سال ءِ بیست ءُ یک دسمبر ءَ بلوچ نودربر گل ءِ گوستگیں سروک بانک کریمہ بلوچ ءِ کربانیانی ستاشانی کنگ ءَ برجم کرتگیں سیمینار ءَ ریاست ءِ بگیر داری ءِ پرکاریانی بھتام جنگ بیتگ انت-

آواران پولیس ءَ بلوچ وومن فورم ءِ ڈاکٹر شلی بلوچ، زکیہ بلوچ، ارض ملک ءُ دگرانی ھلاپ ءَ ارزی نبشتگ کتگ انت-

ایف آئی آر ءِ لڑ ءَ اے سیمینار ءَ ریاست ءِ گلاپ ءَ نپرتیں گپ کنگ ءُ زھگانی زھناں ریاست ءِ ھلاپ ءَ پندل سازگ ءَ سانمند کنگ ءِ جھد بیتگ انت-

بلوچ وومن فورم ءَ ایف آئی آر ءِ ھلاپ ءَ ترندین درشان دیان ءَ گوشتگ اے گامگیج انسانی ھکانی لگتمالی انت ءُ بلوچ راج ءِ توار ایرموش کنگ ءِ جھد انت-

مئے چاگر ءِ پدریں ءُ ندیستگیں راستی

نبشتہ کار: ملار بلوچ

دی بلوچستان پوسٹ

چوناها اَرچ وهد ءَ کہ تاکتے کَیت ءُ نزوریں راجے ءَ ایر دست کنت گڑا آ وتی زور ءَ بَرْج ءَ دارگ ءِ هاتر ءَ وڑ وڑیں پالیسی کارمرز کنت کہ آ دو ڈول ءَ بیت کن اَنت۔ یکے ساپٹ(Soft) ءُ دومی هارڈ(Hard) پالیسی اَنت. زورآور هرچ وهد ءَ لوٹ اِیت کہ ایردستیں راجے ءِ سُر ءُ پُر، نندگ ءُ پاد آیگ، آهانی وڑ ءُ ڈول درست منی داتگیں بہ بنت یا کہ ایردستیں چاگرد ءَ نشتگیں مهلوک منی گُشگ ءِ ھساب ءُ داب ءَ زند بہ گوازین ایت. اے سرجمیں شے بَرْج ءَ دارگ ءِ هاتر ءَ زورآور ساپٹ ءُ هارڈ پالیسیاں کارمرز کنت.

ھمے پالیسیاں تہ ءَ یکے اے هم بیت کہ زورآور وتی مردماں ایردستیں چاگردے ءِ تہ ءَ جاه بہ دنت۔ پہ درور: ما بلوچ چاگرد ءَ بہ زوریں گڑا زورآور هرچ وهد ءَ ھمے زور ءَ جنت کہ آ وتی مهلوک ءَ بزاں پنجابیاں ایردستیں(بلوچ) ءِ چاگرد ءِ تہ ءَ جاگہ دات بہ کنت، پرچا کہ ھمے دْراہ چہ اتکگیں مردم زورآور ءِ کِرد ءَ پیلو کن اَنت. بلے بازیں وهد ءَ زورآور وتی مهلوک ءِ آرگ ءُ جاه دیگ ءَ سوبمند نہ بیت.

وهدے کہ زورآور وتی مهلوک ءَ آورت ءُ جاگہ دات نہ کنت گُڑا آ نوکیں پالیسیانی سر ءَ کار کنگ بِنا کنت، آ پالیسی چو اے ڈول ءَ بیت کہ ھمے چاگرد ءِ نندوکیں مهلوک ءَ وتی وڑ ءَ جوڑ بہ کنت کہ آ ھمے چاگِرد ءِ تہ ءَ زورآور ءِ کِرد ءَ پیلو کُت بہ کن اَنت.

ایشی ءِ شوک تریں درور ما وتی چاگرد ءَ زُرت کنیں کہ مارا اے وڑیں مردم باز گندگ ءَ کیت کہ آ پہ نام بلوچ اَنت بلے زورآور بزاں کہ پنجابی ءِ کِرد ءَ پیلو کنگ ءَ اَنت. اے چہ استان ءِ نیمگ ءَ انسان ءِ سورت ءَ دلوت جوڑ کنگ ءُ مئے چاگرد ءَ یلہ دیگ بوتگ اَنت کہ اے لس بلوچ ءِ سر ءَ هرچی ایشانی دل بہ لوٹ اِیت بہ کن اَنت. ایشاناں سرکار ءِ نیمگ ءَ موکل دیگ بوتگ کہ شُما توپک ءِ زور ءَ کوچگ ءُ بازارانی تہ ءَ نشہ بھا بہ کن اِت، لس بلوچ ءَ دگانی سر ءَ بہ کُش اِت ءُ دور بہ دے اِت، بلوچ چاگرد ءَ لاهور ءِ هیرامنڈی جوڑ بہ کن اِت کسے کہ شُمئے نام ءَ هم نہ گپت.

ءُ اے پالیسی زورآور درستاں چہ سوبمند تریں پالیسی اِنت کہ ھمے چاگرد ءَ نشتگیں مردم آئی ءِ کار ءَ کنگ ءَ اَنت. مارا بلوچ زمین ءِ سر ءَ چُشیں ویل همک روچ ءِ بنیات ءَ گندگ ءَ کاینت کہ بزگ ءُ بے وسیں بلوچ ورنا ءُ پیر دمک ءُ بازارانی تہ ءَ کُشگ ءُ دور دیگ بنت. آ بلوچ ورنا ھمے زُوت ءَ گوادر ءَ شهید بوتگیں زکریا بلوچ بہ بیت یا کہ سئے ماه پیش روبار ءَ شهید بوتگ عبدالباسط بلوچ.

زورآور ءِ اے پالیسی ءَ چو شُومک ءَ مئے چاگرد پتاتگ ءُ مئے هلک ءُ میتگاں اے ڈولیں مردماں چہ سر ریچ اَنت کہ هلک ءُ بازارانی تہ ءَ توپک ءَ گوں گرد اَنت ءُ نشہ بھا کن اَنت. ھمے وڑیں مردماں مرچی بلوچ ءِ چاگرد گیش گُلام داشتگ ءُ زورآور ءِ کوپگ ءَ سُبک کنگ اَنت کہ آ باندا دگہ دو ماتانی تاسُکیں بچ دگانی سرا ءَ بہ جَن اَنت ءُ دور بہ دی اَنت. ءُ باندا ھمے دلار دگہ دو گْوهارانی لاڈوکیں برات نِشہ(چرس ءُ هیرون) ءِ آماچ کُت بہ کن اَنت.

اگاں ما وش ءُ وشهالیں چاگردے ءِ لوٹ ءَ بہ کن ایں گڑا مارا درستاں پیش بلوچ ءِ پوشاک ءِ تہ ءَ ھمے پنجابی دلار وتی چہ هلک ءُ شهراں در کنگ لوٹ اَنت کہ مئے چاگرد ءَ ھما تاوان ءَ دیگ اَنت کہ زورآور وت هم دات نہ کنت.

کیتھارینابلوم ءِ گاریں اِزت

گدار(ناول)

نبشتہ کار: ھائنرش بول

رجانکار: شاھد اھمد

ششمی بھر

دی بلوچستان پوسٹ

چہ ھمے وھد ءَ کہ وھدے کیتھارینا وولٹرس ھائم ءِ اوتاک ءَ داھل بوت، پٹ ءُ پول آسان بوت پرچاکہ ھپت ءُ پانزدہ ءَ چہ پد، اگرچہ ھمے گپ ءَ آئی ءَ بلکل مالوم نہ اَت۔ آ پولیس ءِ نگرانی ءَ اَت۔ ھما بیگاہ ءِ روچ ءَ ھپت ءُ پانزدہ ءَ داں ساھت ھپت ءَ تک وھدے آ آئی ءِ ھمراھی ءَ اوتاک ءَ شُت، آ لڈوگ گوٹن ءِ ھمراھی، بکول آئی ءِ، مزن وتی ءُ دل ءِ گوم ءَ ناچ ئِے کُت۔

ھمے سَھرا ءِ بابت ءَ مارا پبلک پراسیکوٹر پیٹر ھاش ءِ منتوار بوگی اَت کہ آئی ءَ گُشت کہ کمشنر اردن بائز مینے ءَ وولٹرس ھائم ءُ بلوم ءِ گونکو چہ ھما وھد ءَ ٹیپ کنگ بندات کُتگ اَت وھدے بلوم ءَ گوٹن ءِ ھمراھی ءَ اوتاک یل داتگ اَت۔ چُشیں موھاں بائز مینے وتی اپسراں گُشتگ اَت” من ءَ وتی کسان کسانیں پلگس ءِ زلورت بوتگ اَت۔ اے چکر ءَ دو ءِ واست ءَ زلورت بوتگ اَت۔“

مالوم بیت کہ گوٹن ءَ چہ کیتھارینا ءِ اوتاک ءَ کس ءَ را پون ئِے نہ کُت یا ھمے کہ ھاش ءَ آئی ءِ بابت ءَ مالوم نہ اَت۔ بلے اے گپ وَ سدّک اِنت کہ کیتھارینا ءِ اوتاک سک ءَ نگران اَت۔ وھدے پشمبے ءَ داں دہ ءُ نیم ءَ ناں کہ گوانکو ءِ گوانک بوت ءُ ناں کہ گوٹن چہ اوتاک ءَ ڈن اتک گڑا بائز مینے ءِ گپانی پسویے دات ءُ آ ھشت پولیس والاھانی ھمراھی ءَ اوتاک ءِ دروزگ پروشت تہ ءَ پُترت اَنت۔

وھدے آیاں اوتاک پٹ ءُ پول کُت گڑا اود ءَ گوٹن ءِ ھچ نشان ءِ پد نیست اِت اَنت۔ کیتھارینا آسودگی ءِ جاور ءَ کِچن کاؤنٹر ءَ اوشتاتگ اَت ءُ چاہ ءِ ورگ ءَ اَت ءُ اسپیت نان ءِ مکھن ءُ بینگ ءِ سینڈوچ ورگ ءَ اَت شک ھمے واست ءَ اَت کہ آئی ءِ آیگ ءَ ناں کہ آ تُرس اِت ءُ ناں ھیران بوت۔ اگرچہ اے وڑ وَ گُشت کُت نہ کنیں کہ آئی دیم ءِ سر ءَ بچکندگی اَت، بلے آ وَ وتی سر ءَ باور اَت۔ ھما روچ روئی ءِ جوڑ کُتگیں سبز گاؤن گور ءَ کُتگ اَت کہ آئی ءِ ڈیزی ءِ پُل جوڑ کتگ اَت، آئی ءِ جَھل ءَ آئی ءَ ءُ دگہ نہ پوش اِتگ اَت۔ وھدے کمشنر بائز مینے ءَ آئی ءَ جُست کُت(گوں مڑاھی ءِ گون ءَ) کہ گوٹن کجا شُت؟ گڑا آئی ءِ گْوشگ اَت کہ لڈوگ کدی ءُ کجام وھد ءَ شُتگ اَت آئی ءَ آئی ءِ بابت ھچ مالوم نیست اَت، پرچا کہ وھدے آ نو ءُ نیم ءَ وپسگ ءُ پاد اَتگ اَت گڑا آ اے وھد شُتگ اَت۔” زاناں چہ وش روگی ءَ ابید، ھو“

نوں اد ءَ ھمے جُست ءِ بارو ءَ دلگوش کنیں کہ بائز مینے ءَ جُست کتگ اَت۔ ھمے جُست ءَ چہ پَد ھاش ءَ درّائنت، بلے پد ءَ دوبر زُرت ئِے، پد ءَ درّائینت ئِے ءُ گُڈّی ءَ پد ءَ دوبر زُرت ئِے۔ بلورنا ھمے جُست ءَ سک ءَ گوں نازرکی ءَ پَھمگ ءَ اَت، پرچا کہ آئی ءِ ھیال اَت کہ اگاں راستی ءَ ھمے سوال گْوشتگ اَت، گڑا چہ ایشی ءَ کیتھارینا ءِ برانز گرگ ءُ ایشی ءِ مارشت ءِ تْرندی ءَ پیداک بوگ جائز اَت۔ بلورنا ءُ آئی ءِ جنین ءِ بیان ءِ ھساب ءَ کیتھارینا یک نازرکیں جنینے ءُ ھاس کر جنسی جیڑھاں سک پَھریز اَت۔ ھمے واست ءَ ھیال ایش اِنت کہ وھدے بائز مینے ءَ گوٹن ءَ گار ءُ چہ وتی دزگیر ءَ دور گندگ اَت گڑا آئی زھری ءِ ھالت ءَ ھمے لَس سوال ھما وھد چہ کیتھارینا گْوشت ئِے کہ وھدے آ سک ءَ پرآسوگیں جاور کاؤٹنر ءَ جُکّ اِتگ اَت۔

”زاناں شپ ءَ آئی ءَ ترا۔۔۔؟ چہ آئی ءَ کیتھارینا ءِ دیم سُھر بوت، بلے آئی مزن اُمیتی ءَ پَسو دات کہ۔ ” انّا اے اے وڑ نہ اَت۔“ اَتما اے گپ سابت اِنت کہ ایشی ءَ پد بائز مینے ءُ کیتھارینا ءِ میان ءَ بروسہ ھلاس بوت۔ اگرچہ اے ھم گْوشگ بیت کہ بائز مینے اِنچو ھرابیں مردمے نہ اَت ءُ آئی ءِ واھگ اَت کہ آئی ءِ ءُ کیتھارینا ءِ نزیکی سیادی پیداک بیت۔ ھمے سبب ءَ اے ھم گُشگ بیت کہ شاید آئی ءَ اے سوال جُست ئِے نہ کُت۔ اَتما ھما روچ ءَ اوتاک ءِ پٹ ءُ پول کُتگ اَت گڑا اود ءَ ھاش ھم ھمود ءَ بوتگ اَت۔ آئی ءِ بابت ءَ آئی ءِ سنگتانی لیکہ اَت کہ آ جنسی ھساب ءَ سک شُدیک اِنت۔ ھمے واست ءَ اے ھم بوت کنت کہ ھمے جُست آئی ءِ مجگ ءِ وسّاچ کُتگین اِنت، اے چہ ھمے سبب ءَ کہ وھدے آئی ءَ یک شررنگیں جنکے ءِ کاؤنٹر ءَ جُکّگ ءَ دیستگ گڑا ھما روچ ءَ آئی ءَ اے سوال کنگ ءِ جُست ءَ جیڑ اِتگ۔ یا وت آئی ءِ واھگ بہ بیت کہ آ کیتھارینا ءِ گوم ءَ وپت ءُ واب بکنت۔

بلوچ یکجھتی کمیٹی ءِ بنجاھی پتر ءِ باسک سمی دین بلوچ ءَ گوشتگ 25 جنوری بلوچ نسل کشی ءِ ھلاپ ءَ راجی یکجاھی ءِ روچ انت، اے روچ بلوچ نسل کشی ءَ سانمندین مردمانی یاتگیری انت- سمی دین بلوچ ءَ بلوچ راج ءَ 25 جنوری ءَ دالبندین ءَ بیوکیں راجی مُچی ءَ بھر زیرگ ءِ دزبندی کتگ ءُ گوشتگ نسل کشی ءِ یک گچینی راجے ءِ ھلاس کنگ ءِ واستا ریاست جتا جتائیں ترز ءُ رنگاں کارمرد کنگ انت، نسل کُشی نا ایوک ءَ کوش، زورانسری بیگواھی بلکیں زبان ءُ دودانی ھلاس کنگ ءِ دروشم کارمرد بوگ ءَ انت ءُ میان اُستمانی کانود ءِ تک ءَ اے مزنیں جرمے کہ ایشی ءَ ریاست کنگ اِنت-

آئی ءَ گوشتگ مروچی ما بلوچستان ءَ بہ چاریں گڑا مارا بسل کشی ءِ تک ءَ آیوکیں دراھیں دروشم دز کپ انت، چہ بلوچ راج ءَ بنکی ھک پچگرگ بیتگ انت ءُ وتی سرڈگار ءِ سر ءَ درامد جوڑ اَنت، مروچی ھزارانی کچ ءَ بلوچ وتی ھنداں لڈگ ءَ لاچار بیتگ اَنت ءُ ڈنی یک پورسے کیت اِنت ءُ گوش ایت من بلوچ زمین ءِ واھندآں مروچی ریاست جتا جتائیں رنگاں بلوچانی ھلاس کنگ ءَ چِست اِنت، بے روزگاری، شد، وئیل یا تچل ءَ کُشگ، زورانسری بیگواہ کنگ ءُ لٹ شاپ کرتگیں لاش اے درست نسل کشی ءِ بھر انت-

آئی ءَ گوشتگ لاوارسیں لاش کہ توتک ءُ دشت ءَ دزکپتگ انت مارا مالوم انت کہ ھما بلوچانی ئیگ انت کہ آیانی مات ودار ءَ آں، مارا ادار انسان سرپد نہ بنت انت ھرچ لاشے دور دیگ بیت انت کسے ءَ مالوم نہ انت کجام بلوچ ئیگ انت؟

آئی ءَ گوشتگ بلوچ ھرکجا انت اے روچ ءِ درگت ءَ اَچ وتی لوگاں در بئیت ءُ ریاستی زوراکی ءِ ھلاپ ءَ توار چِست بہ کنت اِنت ءُ دالبندین ءَ راجی مُچی ءَ بھر بہ زور ایت-

روکپتی بلوچستان ءِ دمگ سیب و سوران ءَ دگ ءِ پیش اتکگیں وئیلے ءَ سَے مردم جاہ پہ جاہ ءَ بیران بیتگ اَنت-

وئیل گوستگیں شپ ءَ پیش اتکگ کہ یک سواری گاڑی ءُ دگہ یل تیل کشے ءِ میان ءَ ٹکر وری بیتگ ءُ چریشی ءَ ھردوکیں گاڑیاں آس لگ اتگ-

آس ءِ لگگ ءِ سبب ءَ ھردوکیں گاڑیاں سواریں سَے مردم ستکگ ءُ بیران بیتگ اَنت-

وئیل ءَ پد آس کُش ءُ انتزامیہ سر بیتگ ءُ لاش اش چِست کتگ ءُ ھسپتال ءَ رسینتگ انت-

روکپتی بلوچستان ءَ ھمک روچ دگی وئیلاں مردمانی گرانھادیں ساہ ءُ سر زورال بوگ ءَ اَنت –

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مئے سرمچاراں مستونگ، کوھلو، تمپ ءُ نوشکی ءَ چار جتا جتائیں کاروائیاں زورگریں پاکستانی پوج، وتگڑیں ڈیتھ اسکواڈ ءِ کارندہ ءُ مڈی بروکیں گاڑی نشانگ کتگ انت-

جارکش ءَ گوشتگ بی ایل اے ءِ سرمچاراں مروچی نیمروچ ءِ وھد ءَ مستونگ ءِ ھند اسپلنجی ءَ زورگریں پاکستانی پوج یک اُرشے ءِ نشانگ کتگ ، سرمچاراں دشمنیں پوج ھما وھد ءَ نشانگ کتگ کہ آ دمگ ءَ پیشگامی کنگ ءَ بیتگ- سرمچارانی اُرش ءِ وھد ءَ تچگ ءِ جھد ءَ دشمنیں پوج ءِ کم چہ کم دو کارندہ زدگ بیتگ انت-

آئی ءَ گوشتگ بلوچ لبریشن آرمی ءِ سرمچاراں گوستگیں روچ ءِ مگرب ءِ وھد ءَ کوھلو ءِ ھند نوئے شم ءَ لونڈ ءِ ھند ءَ محبت خان مری ءِ سروکی ءَ چَلوکیں وتگڑیں ڈیتھ اسکواڈ ءِ بنجل یک اُرشے ءِ نشانگ کتگ- اُرش ءَ ڈیتھ اسکواڈ ءِ ھشت بزدلیں کارندھاں وتی سلاہ ءُ دگہ ساز ءُ سامان چگل داتگ انت – تچگ ءِ وھد ءَ ڈیتھ اسکواڈ ءِ سَے کارندہ زدگ بیتگ اَنت کہ ایشانی توک ءَ یک سک زدگینے ھوار اِنت – سرمچاراں آیانی سلاہ دستیگ کتگ انت ءُ آیانی بنجل مانداشتگ –

گیش گوشگ بیتگ کہ اے کارندہ یکشل ءَ سرپد کنگ بیتگ انت کہ آ دشمن ءِ رھشونی ءَ یل بہ کن اَنت- ما کوھلو ءُ کش ءُ گوری ھنداں زورگریں پاکستانی پوج ءِ چیردستی ءَ کار کنوکیں مھلوک ءَ تچک کن ایں کہ آ راج دشمنی ءَ یل بہ کن اَنت اگاں ناں گڑا وتی جان ءُ مال ءِ تاوان ءِ وت بہ اِت انت-

جارکش ءَ گوشتگ بی ایل اے کوھستان مری ءَ ھوار سرجمیں بلوچستان ءَ بلوچ راجی مڈیانی پُلپھانچ کنگ ءِ اجازت ءَ نہ دنت ھرکس اے کار ءَ ھوار بوت آ مئے نشانگ ءَ بیت اِنت-

جارکش ءَ گوشتگ بلوچ لبریشن آرمی ءِ سرمچاراں یک کاروائی گوستگیں روچ ءَ تمپ ءِ ھند کوھاڈ ءَ سلاہ بندیں اُرشے ءَ زورگریں پاکستانی پوج ءِ چیردستی ءَ کار کنوکیں وتگڑیں ڈیتھ اسکواڈ ءِ گچینی کارندی جمیل ء ملک داد اللہ کشتگ ءُ آئی ءِ سلاہ ءُ پرپٹ دستیگ کتگ انت-

آئی ءَ گوشتگ اے مرد دمگ ءَ سلاہ بند بوگ ءُ لوگانی سر ءَ بیڑ برگ ءُ زورگریں پاکستانی پوج ءِ ھمراھی ءَ تچک ءَ گون بیتگ، اے کارندہ جمیل ءِ سروکی ءَ سلاہ بندیں ٹولی ءَ ورنایانی نشانگ کنگ ءَ ھم دزمانجن بیتگ – اے نیٹورک ءِ دگہ کارندھانی نشانی ھم پدر کنگ بی ایل اے ءِ انٹیلی جنس ونگ زراب ءَ کتگ انت زوت آ گڈسری انجام ءَ سر کنگ بنت اِنت-

جیئند بلوچ ءَ گوشتگ یک دگہ کاروائی بلوچ لبریشن آرمی ءِ سرمچاراں گوستگیں روچ ءِ مگرب ءِ وھد ءَ نوشکی ءَ بدل کاریز کراس ءَ بلوچ راجی مڈیانی بروکیں سَے ٹرک نشانگ کتگ انت – سرمچاراں یک ٹرکے مانداشتگ ءُ تباہ کتگ ءُ دو ٹرک تیرگواری کتگ ءُ تاوان داتگ انت-

گڈسر ءَ جارکش ءَ گوشتگ بلوچ لبریشن آرمی اے دراھیں اُرشانی زمہ واریاں من ایت ءُ دشمن ءِ سر ءَ اے نشانگی درچانی برجاہ دارگ ءِ کول ءَ کنت اِنت-

بلوچستان ءِ دمگ ڈیرہ بگٹی ءَ پاکستانی پوج ءَ بیڑبرتگ کم چہ کم نُھ مردم آوار جتگ ءُ ناشناسیں جاھے ءَ برتگ اَنت-

بیگواہ کنگ بیتگیں مردم ءِ پجّار رستم ء علی شیر بگٹی، سکندر ء علی خان بگٹی، محمد ء ھاشم بگٹی، علی شیر ء جنگھیان بگٹی، جمال دین ء شاہ میر بگٹی، داد خان ء اخلاق بگٹی، موج علی ء جنگھیان بگٹی، سندر ء عالی بگٹی ءُ عالی ء شاہ میر بگٹی نام ءَ چہ بیتگ اَنت-

اِھوالکار رِد ءَ ڈیرہ بگٹی ءِ دمگ سوئی، حمزائی کالونی ءَ فرنٹیئر کور ءُ سی ٹی ڈی ءَ بیڑبرتگ لوگانی لُٹ پُل کتگ ءُ مردم سک لَٹ ءُ کُٹانی نشانگ کتگ اَنت-

بیگواہ بیتگیں نُھمی ءِ پجّار انگت نہ بیتگ بلے اِھوالکار رِد ءَ بیگواہ بیتگینانی کچ اشی ءَ چہ ھم گیش اَنت-

بلوچستان ءِ باپاری شھر ھب چوکی ءَ بیگواھیں مردمانی کھول نیمگ ءَ چہ برجاھیں سے روچی شُدکشیں ھڑتالی بُنجل مروچی آسر بیتگ- بُنجل ءِ گُڈی روچ ءَ کھول ءَ ھب پریس کلب ءَ چہ یک زھرشانی روانک کش اِتگ، کہ شھر ءِ جتاجتائیں شھدگانی چہ گوزان واتر پریس کلب دیم ءَ ھلاس بیتگ-

اے شُدکشیں ھڑتالی بُنجل زورانسری آوار جنگ بیتگیں دوئیں برات جنید حمید ءُ یاسر حمید ءِ کھول نیمگ ءَ چہ جنگ بیتگ، کہ گوستگیں سال اکتوبر ءَ چہ ھب چوکی ءُ کلات ءَ پاکستانی پوج ءِ دست ءَ زورانسری بیگواہ کتگ-

بُنجل ءَ دگہ بیگواھیں مردمانی کھولاں اَبید بلوچ یکجھتی کمیٹی باسک، سیاسی باسک ءُ شھریاں ھم بھر زرتگ-

بُنجل ءَ ھوار دگہ بیگواھیِ مردمانی کھولانی تہ ءَ بلوچ باسک راشد حسین ءِ مات، بی ایس او آزاد ءِ نودربریں راھشون شبیر بلوچ ءِ گوھار سیماء بلوچ، بیگواھیں چاکر خان بگٹی ءُ نوروز اسلام ءِ کھول، ءُ نصیر جان ءِ مات ءَ ھوار پنجگور ءِ جھمنند زھیر بلوچ ءِ کھول مردم ھوار بیتگ اَنت-

روانک ھوار بیگواھیں یاسر ءُ جنید حمید ءِ گوھار یاسمین ءَ تران کنان ءَ گْوشتگ کہ، منی برات سے ماہ ءَ چہ ریاستی ادارھانی درکانودی آزارجاہ ءَ اِنت، ءُ مارا تنی وھدے گوشگ نہ بیتگ کہ اشانی سر ءَ چی بھتام یا کہ کجام جرم ءِ کتگ-

یاسمین حمید ءَ گْوشتگ کہ منی برات مھنتی اَنت- اشاں ھچ وڑیں سیاسی یا درکانودی پُرکاریاں چہ سیادی نیست – آیاں زورانسری بیگواہ کنگ آئین ءُ کانود ءِ ھلاپ ورزی اِنت-

شبیر بلوچ ءِ گْوھار سیماء بلوچ ءَ وتی تران ءِ تہ ءَ گْوشتگ کہ دوھزار شانزدہ ءَ چہ وتی براتانی یل کنائینگ ھاتر ءَ زھرشانی کنگ ءَ آں ھر روچ پریس کلبانی ڈن ءَ زھرشانی کنگ ھمگروچی گپے جوڑ بیتگ، بلے آمیدگس، کانود، ءُ ریاستی ادارہ وتی وجود ءُ کرد شموشتگ ئِے-

سیماء بلوچ ءَ گْوشتگ کہ مئے جُستانی پسّھانی دیوک ھچ کس نیست – ما تھنا وتی دوستناکانی زندمان ءُ آجوئی ءَ لوٹگ ءَ ایں، پرچا اے ھم جرمے؟

راشد حسین ءِ مات ءَ اے درگت ءَ گوشتگ کہ شش سال سرجم بیگ ءَ اِنت، بلے آمیدگس، کمیشنز ءُ جے آئی ٹیز ءَ مارا ھچبر انساپ نداتگ من وتی چُک ءِ یل کنائینگ ھاتر ءَ ھنی ھم زھرشانی کنگ ءَ لاچاراں – پرچا یک ماتے وتی چُک ھاتر ءَ انساپ لوٹگ ھم جرمے جوڑ بیتگ-

بلوچ یکجھتی کمیٹی ءِ ھب ءُ کراچی ءَ چہ آؤکیں باسکاں ھم زھرشانی ءَ تران کتگ-

آیانی گوشگ اِنت کہ اے یک گمے کہ بلوچستان ءَ ھرچ دومی روچ ءَ کسے ناں کسے ءِ کھول زورانسری آوار جنی ءِ دیمپانی کنگ کپ اِیت ھب چوکی ءَ زھرشانی کنوکیں کھولانی کسہ مئے واستا نوک نہ اَنت اے درچ دھکاں چہ برجاہ ءَ اِنت، بلے ریاستی ادارھانی بے حسی روچ پہ روچ گیش بوان اِنت-

آیاں گْوشتگ کہ ما لوٹ کن ایں کہ اے بیگواھی مردماں زوت دیم ءَ بیار اِت ءُ زورانسری آوار جنی ءِ اے درانسانی کار ءَ بدار اِت-

آیاں گوشتگ کہ ریاستی ادارہ ءُ آمیدگس زمہ واری یات بہ کن اَنت کہ بلوچ راج وتی دوستناکاں یل کنائینگ ھاتر ءَ کجام ھد ءَ چہ شت کن اَنت- اگاں مروچی ھب چوکی ءِ اے کھول اد ءَ اوشتاتگ اَنت، گُڑا باندا بلوچستان ءِ ھرچ کُنڈ ءَ چہ مردم اوشت اَنت-

روانک ءَ ھوار دگہ بیگواھیں مردمانی کھول ھیال ءُ لیکہ درشان کنان ءَ گْوشتگ کہ ما ریاست ءَ چہ لوٹ کن ایں کہ مئے دوستناکاں آمیدگس ءَ پیش بہ کن اِت- اگاں آیانی سر ءَ چُشیں بھتامے ھست گُڑا کانود رِد ءَ کاروائی بہ کن اِت، بلے چو زورانسری بیگواہ کنگ مارا درد ءُ رنجانی تہ ءَ کنگ کجے انساپ اِنت؟

زھرشانی کنوکاں ھکومت ءَ چہ زورانسری آوار جنی ءِ ھلاس کنگ ءُ بیگواھیں مردماں زوت یل کنگ لوٹ کتگ آیانی گْوشگ اِنت اے زھرشانی تھنا بندات اِنت ، اگاں آیانی دوستناکاں یل نہ کنگ نہ بیت اَنت گُڑا زھرشانی ءَ دراجکش کن ایں سرجمیں بلوچستان ءَ تلان کن ایں-

بلوچ اسٹوڈنٹس ایکشن کمیٹی ءِ چارمی بنجاھی کمیٹی ءِ دیوان کماش شبیر بلوچ ءِ سروکی ءَ برجم دارگ بیتگ۔ بساک

ماتی زبانانی میان اُستمانی روچ ءِ درگت ءَ عبدالکریم شورش ءُ عبدالعزیز کرد ءِ یات ءَ مستونگ ءَ مراگشے برجم دارگ بیت اِنت۔ بلوچ زمین ءِ سر ءَ ودی بیتگیں اوبادگے ءَ بیھ وتی امل سرجم ءُ گُڈی پھمگی نہ اَنت بلکیں ھمک امل ءُ کار ءِ تہ ءَ ھمک روچ ءُ ماہ ءُ سال ءِ ھساب ءَ گھتر، شرتر ءُ مھکم تر کنگ ءِ ھیال زیرگی اِنت ءُ جھد کنگی اِنت۔
چئیرمین شبیر بلوچ

بلوچ اسٹوڈنٹس ایکشن کمیٹی ءِ چارمی بنجاھی کمیٹی ءِ دیوان گل ءِ کماش شبیر بلوچ ءِ سروکی ءَ دو پُریں روچاں برجم دارگ بیتگ۔ دو روچی دیوان ءِ بن گپ گل ءِگوستگیں اھوال، نگدکاری، گَل کاری،ہندی ءُ میان اُستمانی سیاسی جاورھال ءُ آؤکیں گامگیج بیتگ اَنت۔ دیوان ءَ سرجمیں بنگپانی سر ءَ یک یک ءَ گپ ءُ ترانے ءَ پد پہ آؤکیں کاراں جتائیں پیسلہ زیرگ بیتگ انت۔

دیوان ءِاولی روچ ءِ بندات چہ گل ءِ کماش شبیر بلوچ ءِ رزا ءَ کنگ بوتگ ، اولی بن گپ گل ءِگوستگیں اہوال اَت کہ دیوان ءِ دیم ءَ پیش کنگ بیت اَنت، آئی ءِ تہ ءَ مزن کارگشاد ءِ اہوال، گل ءِ کُلیں کمیٹیانی اہوال کہ آہانی تہ ءَ لبزانکی، رسانکدری، فائنانس،بلوچ لٹریسی کیمپئین ءُ بلوچستان کتاب کاروان کمیٹی ءِ اھوال ھوار اِت اَنت۔ کمیٹیانی اھوالاں ہوار گل ءِ سرجمیں ھنکینانی سر ءَ ھیرتی ءَ گوں چمشانک ءُ صباء لٹریری فیسٹیول ءِ مراگشانی اہوال ءُ ایدگہ کسان ءُ مزنیں اہوال دیوان ءَ ایر کنگ بیت اَنت۔

آیاں گوشتگ دیوان ءِ دومی بن گپ نگدکاری ءِ تہ ءَ سنگتاں گل ءِ کسان ءُ مزنیں نزوریانی سرءَ یک یک ءَ گپ ءُ تران کُت ءُ آہانی گِرگءَ پہ شور ءُ سلاہ اِش دات۔ سنگتاں سیاست ءُ سیاسی گلانی تہ ءَ نگد ءِ سر ءَ درائینت ءُ گوشت کہ نگد ہما پدیانک اِنت کہ ایشی ءِ گوزگ ءَ چہ جھدکارےچہ ہر وڑیں رد آشوبی روشتاں پاک ءُ پلگار بیان بیت ءُ نہ تہنا وتی سیاسی مکسد ءَ سر بیت بلکیں کاملیں آشوبے بیت ءُ در کئیت۔ دنیا ءِ ہمک راج یاکہ سیاسی گلاں نگد ءِ چاگرد ءَ گوں سپر جتگ، آ مرچی بازیں وتگڑیں گپچلاں چہ پاک وتی دیمروئی ءِ سپر ءَ مھکمی ءَ گوں گام جنان اَنت، ایشی ءِ مستریں سوباں چہ یکے کہ آہاں وتی سیاسی امل ءِ شر ءُ گھتر کنگ ءَ پہ نگدکتگ ءُ راجی نپ ءُ سیت پھازیتگ اَنت ۔ ھمے پیم مارا وتی راجی نپ ءُ سیت چارگی اَنت ءُ ہمک ردیں امل کہ راج ءَ پہ تاوان اِنت نگد ءِ راستیں امل ءَ گوں شر کنگی اَنت پمیشکا نگد ءِ چاگردے ودی کنگ ءِ ہاتر ءَ پہ المی اِنت کہ نگد کنوک ءُ نگد گوشداروک ءَ ہردوئیناں سگگ ءِ ہاٹیگ بہ بیت۔ اوپار ءُ سگگ ءِ ہاٹیگ ءَ گوں نہ تہنا نگد ءَ گوں بندوکیں آشوبی چاگردے ودی بیت بلکیں جہد ءِ تہ ءَ ہمک ڈولیں ردیں امل ءُ روشت دارگ ءُ شر کنگ بنت۔

آیاں گوشت دیوان یک روچے ءِ آسر ءَ پد دومی روچ ءَ گوں کماش ءِ رزا ءَ بندات کنگ بوت ءُ سیمی بن گپ گَل کاری ءِ تہ ءَ سنگتاں گل کاری ءِ سر ءَ نبشتگیں وتی پیشنھاد ونت اَنت کہ آہانی تہ ءَ اے میان ءَ بیتگیں کار ءُ پہ دیم ءِ کارانی گہتریءُ نوکیں کارانی نیمگ ءَ روگ ءِ سر ءَ گپ ءُ شور ہوار اِت اَنت۔ سنگتاں گَل کاری ءِ سر ءَ گپ کنان ءَ گوشت کہ گوستگیں سالے ءُ کپے ءِ تہ ءَ گل ءَ وت ءَ کساس سرجمیں بلوچستان ءَ نہ تھنا سر کُتگ بلکیں بلوچ ورنایانی ہاتر ءَ زانت ءُ زانشتی چاگردے ودی کنگ ءَ ہم یک ھدے ءَ سوبین بیتگ۔ اے گل ءِ مھکمی ءُ سنگتانی ہمت ءُ ہاٹیگ ءِ برورد اِنت کہ ادارہ ءِ کار ءُ پالیسی روچ پہ روچ شرتر ءُ گھتر بیان اَنت، بلے بلوچ زمین ءِ سر ءَ ودی بیتگیں اوبادگے ءَ بیھ وتی امل سرجم ءُ گُڈی پھمگی نہ اَنت بلکیں ہمک امل ءُ کار ءِ تہ ءَ ہمک روچ ءُ ماہ ءُ سال ءِ ھساب ءَ گھتر، شرتر ءُ مھکم تر کنگ ءِ ھیال زیرگی اِنت ءُ جھد کنگی اِنت۔ پہ بلوچ ورنائے ءَ وتی ہمک امل پہ راجی جُہدءَ کسانیں بھرشتے سرپد بیگی اَنت، مدام گیشءُ گھتر ءَ چہ گھتر ءِ نیت ءَ گوں پھتوئیں پگر ءَ سیاسی امل جنزینگی اِنت دانکہ آ ہستیں ھرڈولیں گامبیلانی (چیلنج) دیمپانی ءَ کُت بہ کن اَنت۔ بلوچ ورنایاں وت ءَ پگری ہوالہ ءَ انچو پُہتو کنگی اِنت کہ آئی ءِ ہمک سیاسی عمل یک دلجمیں آسرے ءِ دیگ ءَ ہوار آ ہمک ڈولیں گرانی ءُ اڈاندانی دیم ءَ دیرچاری ءَ گوں بہ اوشت ایت ۔ پگری ہوالہ ءَپُہتو ءُ وتی عمل ءِ سر ءَ بیسہ داروکیں جہدکار بیھ پُشت نہ کنز ایت بلکیں مدام اڈاندانی دیم ءَ مہکمی ءَ اوشت ایت ءُ آہاں توجیل کنگ ءِ جہد ءَ کنت۔ اے پُہتوئی ورنایاں چہ وتی بلوچ زمین ءِ لگتمالی ءِ راستی ءُ ایدگہ دنیائی زانت ءُ زانشت ءِ پہمگ ءُ دربرگ ءَ چہ کئیت پمشکا ہمک عمل گوں سنچءُ شعور ءِ عینک ءَپہ راجی سیتاں کارمرز گی اِنت۔ہمے پیم مرچی بلوچستان کتاب کاروان ءِ وسیلہ ءَ بلوچ ورنا ءُ مہلوک ءِ تہ ءَ وانگ ءُ زانشت ءِ ماھول ودی کنگ بہ بیت یاکہ بی ایل سی ءِ وسیلہ ءَ بلوچستان ءِ وانگی وادارہانی زوالی ءِبگیری ءَ توار چست کنگ ءُ آہاں شر کنگ ءِ عملی جہد بہ بیت، گل ءَ نودربر گل ئے ءِ بستار ءَ پہ بلوچ راجءَ اے کارانی عملی دروشم ءَ جہدے کنگ ءَ اِنت ءُگلءَمرچی سوبینی ءِ کشک ءَ وت ءَ ہمدپ کتگ۔
دیوان ءِ گُڈی بن گپ آؤکیں گامگیج ءِ تہءَ سنگتانی داتگیں شور ءُسلاہاں چہ پہ گیشیں کار ءُ کاراں شرترءَ چہ شرتر کنگ ءِ واستہ نوکیں فیصلہ زیرگ بیت اَنت۔آؤکیں وھد ءَ صباء لٹریری فیسٹیول ملیر ءُڈی جی خان ءَ برجم دارگ بیت،میان استمانی ماتی زبانانی روچ ءِ درگت ءَ عبدالکریم شورش ءُ عبدالعزیز کرد ءِ یات ءَ مستونگ ءَ مراگشے اڈ دیگ بیت، بلوچستان کتاب کاروان ءَ مہکم کنان ءَنوکیں سال ءِ درگت ءَ سرجمیں بلوچستان ءَ کتاب میڑہانی مہمےجنزینگ بیت ءُ آسر ءَ سیمینارے اڈ دیگ بیت، بلوچ نودربر سیاست ءِ سرءَ شال ءُ اوتھل ءَ سیمنار اڈ دیگ بیت، بلوچ لٹریسی کیمپئین ءِ کاراں گیش مہکم کنا ن ءَ بلوچستان ءِ بنداتی وانگی ادارہانی جیڑہانی سر ءَ نکان شِنگ کنگ ءَ ہوار وانگجاہانی جم کتگیں ڈیٹایانی یک بریفینگ سیمنارے اڈ دیگ بیت، بلوچستان کتاب کاروان، رسانکدر ءُ کیرئیر کونسلنگ ءِ سر ءَ کتابُک اڈ دیگ بیت ءُ ماتی زبان ءِسر ءَ براہوئی ءَ کتابُکے چاپ ءُشِنگ کنگ بیت۔ اشاں ہوار بنجاہی کمیٹیءِ سئے باسک شیرازبلوچ، فوزیہ بلوچ ءُ مصدق بلوچ ءِ چہ بنجاہی کمیٹی ءِ اُگدہاں دزکشی منگ بیتگ ءُ پہ ہورکیں اُگدہاں خضدار ھنکین ءِ گوستگیں کارمستر جویریہ بلوچ، شال ھنکین ءِ ہستیں کارمسترفہد بلوچ ءُ گوستگیں کارگُشاد علی بلوچ پہ بنجاہی کمیٹی ءِ ہاتر ءَ گچین کنگ بیتگ اَنت۔

آیاں گوشت دو روچی دیوان ءِ سرجمیں بھرانی سر ءَ یک یک ءَ دلجمی ءَ گوں گپ ءُ تران ءَ پد آؤکیں گامگیج ءِ تہءَ جتائیں فیصلہانی زیرگ ءَ گوں دومی روچ ءِ آسر ءَ پد کماش ءِ رزا ءَ چہ آسر کنگ بیتگ۔

بلوچستان لبریشن فرنٹ ءِ جارکش میجر گوھرام بلوچ ءَ شنگ بیتگیں درشان ءَ تمپ ءَ پوج ءِ سر ءَ اُرش من اتگ ءُ گوشتگ یازدہ جنوری ءِ بیگاہ ءِ چار ءَ زورگریں پاکستانی پوج ءِ یک کارندھے نشانگ کتگ ءُ کشتگ-

جارکش ءَ گوشتگ اسنائپر ٹیکٹیکل ٹیم ءَ دشمنیں پوج ءِ تمپ آزیان ءَ ھستیں چوکی ءَ ڈن اوشتوکیں پوجی کارندہ نشانگ کتگ چریشی ءَ چہ آ جاہ پہ جاہ ءَ مرتگ – چریشی ءَ پد سرمچاراں چوکی وتکاریں سلاھاں گوں نشانگ کتگ زورگریں دشمن گیش جانی ءُ مالی تاوانانی دیمپان کتگ-

جارکش ءَ گوشتگ بلوچستان لبریشن فرنٹ اے اُرش ءِ زمہ واری من ایت ءُ سرڈگار ءِ آجوئی ءَ داں زورگریں پوج ءِ سر ءَ اُرش برجاہ بنت اِنت-