TBP Balochi

ھُزدار ءِ تھسیل زھری ءِ جتاجتائیں دمگاں گوستگیں شپ ءَ پاکستانی پوج ءِ بیڑاں ءُ بازیِں مردمے ءِ زورانسری آوار جنی ءِ ھلاپ ءَ زھری بازار ءَ تھتگ بندیں ھڑتال برجاہ ءَ اِنت وھدے کہ اشی ءَ اَبید انجیرہ کراس سر ءَ بُنجاھی ھم بند کتگ-

بُنجاھی شھدگ سر ءَ زھرشانی کنوکانی تہ ءَ زالبول مزنیں کچے ءَ ساڑی اَنت اشی ءَ اَبید ھمے ھال اِنت کہ سوراب کراس سر ءَ ھم سی پیک شھدگ زھرشانی کنان ءَ بند کتگ-

زھرشانی کنوکانی گْوشگ اِنت کہ پاکستانی پوج ءَ خالد ء عبدالصمد ، شبیر ء علی اکبر، زبیر ء محمد اسحاق، فیض ء علی اکبر، عمران ء اکبر، بلال ء علی اکبر نادر ء سرور، جھانزیب ء عبدالاخالق لوٹانی، فردین ء کریم، فھد علی اکبر آوار جتگ ءُ بیگواہ کتگ اَنت-

زھرشانی کنوکاں سرجمیں مردمانی یل کنائینگ ءَ تاں زھرشانی برجاہ دارگ شور کتگ-

وھدے کہ بلوچ یکجھتی کمیٹی سوراب ءَ گوشتگ کہ چہ زھری ءَ مزنیں کچے ءَ مردم زورانسری آوار جتگ اَنت- چریشی ءِ سبب ءَ مھلوک ءُ آیانی کھولانی نیمگ ءَ چہ زھری ءَ تھتگ بندیں ھڑتال ءُ شال ٹو کراچی سوراب نزیک ءَ سی پیک شھدگ بند کتگ ءُ نندانک دیگ ءَ اَنت-

آیاں گوشتگ کہ بیگواھیِ مردمانی جیڑہ روچ پہ روچ نگیگ بیگ ءَ اِنت- ما انسانی ھکانی گلاں چہ دزبندی کن ایں کہ آ بیگواھیں مردمانی یل کنائینگ ھاتر ءَ وتی کرد ءَ پیلو بہ کن اَنت ءُ اے مزنیں جیڑہ ءَ میانی استمانی ھساب ءَ دیم ءَ بیار اَنت- ما اسرمندیں کھولانی گوم ءَ یکجاھی ءِ درشان کن ایں ءُ آیانی جھد ءَ ھرچ وڑ کمک کن ایں-

جارکش ءَ گوشتگ کہ سوراب ءِ شرپمندیں راج ءَ چہ دزبندی اِنت کہ آ بیگواھیں مردمانی کھولانی گوم ءَ یکجاھی درشان بہ کن اَنت-

مستونگ ءِ دمگ اسپلنجی ءَ آپریشن ءَ دزبندیں پاکستانی پوج ءِ سر ءَ سلاہ بندیں مردماں اُرش کتگ-

دمگی مردمانی رد ءَ مروچی پاکستانی پوج ءِ سر ءَ ھما وھد ءَ اُرش بیتگ کہ آ دمگ ءَ پیشگامی کنگ ءَ دزبند بیتگ- اُرش ءِ وھد ءَ تیرگواری ءُ تراکانی توار اشکنگ بیتگ انت-

واکداراں اے درگت ءَ انگت ءَ دگہ گپ دیم ءَ نیاؤرتگ انت-

اسپلنجی ءُ کش ءُ گوری دمگاں بلوچ سلاہ بندیں گل پرکار انت کہ پاکستانی پوج ءَ اُرشانی نشانگ کنگ ءَ انت بلے مروچی بیتگیں اُرش ءِ زمہ واری انگت کس ءَ پہ وت نہ زرتگ-

شمبے ءِ روچ ءَ بلوچستان ءِ دمگ کیچ ءُ کوھلو ءَ دو جتاجتائیں وھداں سرکاری پلامرزی ٹولی ءِ دو کارمند بیران ءُ سے ٹپی بیتگ اَنت-

پولیس ءِ رِد ءَ کیچ ءِ تھسیل تمپ ءِ دمگ کوھاڈ ءَ پرپٹ سواریں ناشناسیں سلاہ بندیں مردماں تیرگواری کتگ ءُ جمیل ء ملک داد اللہ جھمنند تمپ کوھاڈ کشتگ-

تیرگواری ءَ چہ معراج عارف ٹپی بیتگ آ تربت سول نادُراھجاہ ءَ برتگ بلے آئی ءَ نادُراھجاہ ءَ وتی ساہ داتگ انت-

دمگی اِھوالکار رِد ءَ اے مردمانی سیادی یک سرکاری پلامرزی ءَ ھستیں ٹولی ءَ چہ بیتگ اَنت-

ھمے وڑ کوھلو ءَ نو ئے شم ءِ دمگ لونڈو ءَ سرکاری پلامرزی مرد محبت خان مری ءِ بُنجل سر ءَ سلاہ بندیں مردماں اُرش کتگ چریشی ءِ آسر ءَ سے مردم ٹپی بیتگ اَنت-

اُرشکاراں آیانی بُنجل مانداشتگ سلاہ وتی دستیگ کتگ اَنت-

روکپتی بلوچستان ءِ تیابدپی شھر چھبار ءَ سلاہ بندیں مردماں تیرگواری کنان ءَ دو براتاں ھوار چار کَس زدگ کتگ انت-

اھوالانی رد ءَ گوستگیں روچ ءَ چھبار ءَ یک دکانے ءَ ناشناسیں مردماں تیرگواری کرتگ ءُ چار کس زدگ کتگ انت-

اھوالانی رد ءَ زدگ بیتگیں مردمانی پجار دنیال براھوئی ءُ شھرام براھوئی کہ ھردوک ھالد ءِ چُک انت ءُ ایرانشھر ءِ جھمنند اَنت ءُ دگہ یکے ءِ پجار آرمین براھوئی ءِ نام ءَ زانگ بیتگ کہ اے ھمے دکان ءَ نندوک بیتگ ءُ چارمی رھگوزی ءِ بیتگ کہ آ ھم زدگ بیتگ-

اھوالانی رد ءَ اے مردم وتی دکان ءَ نندوک بیتگ انت کہ ناشناساں توپکانی دپ پچ کتگ ءُ آیانی سر ءَ تیرگواری کتگ انت-

زدگ بیتگیں مردم امام علی بیمارستان چھبار ءَ برگ بیتگ انت کہ اود ءَ دنیال ءِ جاور ناگیگ گوشگ بوگ ءَ انت-

وئیل ءِ سبب زانگ نہ بیتگ ءُ ناکہ تیرگواری کنوک زانگ بیتگ اَنت-

بلوچ یکجھتی کمیٹی مستونگ زون، چہ ساروان ریجن ءِ نیمگ ءَ شمبے یازدہ جنوری ءَ بلوچ شھیدانی ءُ درکانودی کُشگ بیتگیں مردمانی دیمونیاں سُھرچکیں دروت ندر کنگ ءِ ھاتر ءَ یک روانکے ءُ مراگشے برجم دارگ بیتگ-

روانک چہ بس اڈہ مستونگ ءَ بندات بیتگ کلی دتو ءِ کبرستان ءَ تاں سر بیتگ، اود ءَ بلوچ یکجھتی کمیٹی ءِ بُنجاھی راھشون ڈاکٹر ماہ رنگ بلوچ ، شاہ جی صبغت اللہ ، بیبرگ بلوچ ءُ دگراں سنگت ثناء ءَ ھوار بلوچ شھیدانی کبرانی سر ءَ بلوچی چادر پر داتگ اَنت، پُل شانی کتگ ءُ سواب ءِ ھاتر ءَ فاتحہ وانی کتگ-

اے درگت ءَ زالبولاں ھوار راج ءِ مزنیں کچے ءَ آیانی ھمراھی ءَ ساڑی بیتگ اَنت-

روانک ءَ چہ تران کنان ءَ ڈاکٹر ماہ رنگ بلوچ ءَ گْوشتگ کہ بلوچ راج شھیدانی دیمونیاں ھچبر بے ھیال کنگ نہ بنت انت-

آیاں جار جتگ کہ بیست ءُ پنچ جنوری ءَ دالبندین ءَ یک راجی مُچی یے برجم دارگ بیت، کہ آئی ءِ مول ءُ مُراد جھان ءَ کلوہ دیگی اِنت کہ بلوچ راجی چُکچینی اوپار کنگ نہ بیت-

ڈاکٹر ماہ رنگ بلوچ ءَ گْوشتگ کہ ما جھان ءَ اے باور کنائین ایں کہ ناں مئے راج بے وارس اِنت ءُ ناں مئے سرڈگار بے وارس اِنت اے بے وارسیں لاش ءُ کبر ھکیکت ءَ مئے بے بھائیں شھیدانی چیدگ اَنت- ما سرجمیں بلوچ راج ءَ چہ دزبندی کن آں کہ آ بیست ءُ پنچ جنوری ءَ دالبندین ءَ برجم بیوکیں راجی مچی ءَ جوانیں وڑے ءَ بھر بزیر اَنت ءُ پدر بہ کن اَنت ما وتی شھیدانی وارس ایں-

بلوچ یکجھتی کمیٹی ءِ راھشون ءَ راج ءَ را زور داتگ کہ آ شھیدانی لیکہ ءُ جُھد ءَ زندگ بہ کن اَنت ءُ زُلم ءُ نا انساپیانی ھلاپ ءَ مُچی گھگیری ءَ مھکم بہ کن اَنت-

ھُزدار ءِ شھر زھری ءَ وتی زمہ واریاں پیلو نہ کنگ ءَ ڈی سی ھُزدار ءَ زھری لائن ءِ پانژدہ لیویز کارمند چہ کار ءَ کش اِتگ اَنت-

زانگ بہ بیت کہ چارشمبے ءِ روچ ءَ سلاہ بندیں مردمانی مزنیں کچے ءَ ھُزدار ءِ شھر زھری ءَ دہ کلاکاں چہ گیش وتی دستیگ کتگ ءُ ھمے میان ءَ سرکاری کارگس ءَ ھوار تھانہ دستیگ کنگ ءَ پد مانداشتگ انت-

بلوچ لبریشن آرمی ءَ زھری شھر ءِ دستیگ کنگ ءِ زمہ واری منّ اِتگ اَت-

گل ءِ جارکش جیئند بلوچ ءَ وتی درشان ءِ تہ ءَ گوشتگ اَت کہ زھری ءَ بی ایل اے ءِ سرجمی ءَ دستیگ، آپریشن ھیروپ ءِ دومی بھر ءِ چن ءُ لانچ ءِ ھیلکاری بیتگ- آئی ءَ گْوشتگ کہ اے آپریشن ءَ بی ایل اے ءِ ھاسیں ٹولی فتح اسکواڈ ءُ اسپیشل ٹیکٹیکل آپریشنز اسکواڈ ءَ کتگ-

دومی نیمگ ءَ سرکاری شنگ کتگیں جار ءَ بلوچستان ھکومت ءَ سے دمگاں لیویز فورس ءِ مستری پولیس ءِ دست ءَ داتگ-

بلوچستان ھکومت ءَ سے دمگ ءِ لیویز فورس پولیس ءَ ھمگرنچ کتگ، ھمگرنچ بیتگیں دمگ شال، گوادر ءُ لسبیلہ ھوار اَنت-

یکجاھی ھساب ءَ بلوچستان ءِ سئیں دمگاں چہ لیویز فورس ءِ یک ھزار ءَ یک سد ءُ شانژدہ کارمند پولیس ءِ تہ ءَ ھمگرنچ کتگ اَنت-

ھمگرنچ بیتگیں سلاھانی انسپکٹر، محرر ، رسالدار، نائب رسالدار، دفعدار، خاسدار، جمعہ دار، حوالدار، سپاھی ، وائرلس آپریٹر ءُ فٹ مین ھوار اَنت – پولیس فورس ءَ لیویز فورس ءِ گریڈ یک ءَ چہ یازدہ تہ ءِ کارمند ھوار اَنت-

پولیس ءَ چہ شال ءَ ھمگرنچ بیتگیں لیویز کارمندانی کچ سے سد ءُ چل ءُ شش اَنت ، پولیس ءَ چہ گوادر ھمگرنچ بیتگیں لیویز کارمندانی کچ سے سد ھشتاد یک اَنت، چہ لسبیلہ ءَ ھمگرنچ بیتگیں لیویز کارمندانی کچ دو سد بیست ءُ ھب پولیس ءَ چہ لسبیلہ ءَ ھمگرنچ بیتگیں لیویز کارمندانی کچ دوسد نوزدہ اَنت-

سرکاری رِد ءَ لیویز تھانھاں، گاڑیاں، سلاہ ءُ دگہ سرکاری سامانانی دستیگ اسسمنٹ ءَ پد کنگ بنت-

پاکستانی پوج ءَ یک مردمے آوار جنگ ءَ پد بیگواہ کتگ-

بیگواہ کنگ بیتگیں مردم ءِ پجّار گل حسن صابر ء کھٹا خان نام ءَ چہ بیتگ-

اے مرد سبی بولان مساپر جاہ ءِ دیم ءَ شپ نُھ نوزدہ نومبر دوھزار بیست چار ءَ آوار جتگ ءُ بیگواہ کتگ کہ آئی ءِ پدری مرچی کھول ءَ کتگ-

سلاہ بندیں مردماں مڈی بروکیں گاڑیانی سر ءَ اُرش کتگ ءُ یکے گاڑی یے مانداشتگ-

بلوچستان ءِ دمگ نوشکی ءِ ھند بدل کاریز کراس سر ءَ مڈی بروکیں سے گاڑی اُرش ءِ نشانگ کنگ بیتگ اَنت – اُرشکاراں یک گاڑی یے مانداشتگ وھدے کہ دگہ دوئیں گاڑیانی سر ءَ تیرگواری کتگ ءُ سک تاوان داتگ اَنت-

زانگ بہ بیت کہ بلوچستان ءَ گیشتریں وھداں بلوچ آجوئی لوٹوکیں سلاہ بندیں گلانی نیمگ ءَ چہ مڈی بروکیں گاڑیانی سر ءَ اُرش کتگ، اے گل اے اُرشاں بلوچ مڈیانی لُٹ ءُ پُل ءِ ھلاپ کاروائی ءَ گوش اَنت-

زانگ بہ بیت تربت ءَ مجید برگیڈ اُرش ءِ وھد ءَ بلوچ لبریشن آرمی ءَ یک درشانے ءِ تہ ءَ گْوشتگ کہ بی ایل اے بلوچ مڈیانی لُٹ ءُ پُل ءَ ھمگرنچیں گاڑیانی واھننداں ھم کڈن کنت کہ آ بلوچ مڈیاں لُٹ ءُ پُل وتی ھمگرنچی ءَ بند بہ کن اَنت اگاں ناں آیانی سرجمیں گاڑی ماندارگ بنت-

تنی وھدے اُرش زمہ واری انگت ھچ گل ءَ نہ زرتگ –

بلوچستان ءِ تیاب دپی شھر گوادر ءَ زورانسری آوار جنی پد ءَ آجو بیتگیں مردمے ناشناسیں سلاہ بندیں مردماں تیرگواری کتگ کُشتگ-

کشگ بیتگیں مردم ءِ پجّار ذکریا زھیر نام ءَ چہ بیتگ-

پولیس رِد ءَ کشگ بیتگیں لیویز فورس ءِ کارمند یے بیتگ کہ انّیگاں پاکستانی پوج ءِ دست ءَ زورانسری آوار جنی ءِ نشانگ ءَ پد آجو بیتگ اَت-

بلوچ نیشنل موومنٹ ءَ انسانی ھکانی ادارہ پانک ءَ بلوچستان ءِ گوادر شھر ءَ ذکریا زھیر ءِ کوش ایر جتگ گْوشتگ کہ ذکریا زھیر، کہ اشی ءَ ساری پاکستانی پوج دست ءَ زورانسری آوار جنی ءِ نشانگ بیتگ- آئی ءَ گْوشتگ کہ بیست ھپت ستمبر دوھزار بیست چار ءَ آوار جنگ ءَ پد بیگواہ کنگ بیتگ ءُ پد ءَ یل کنگ بیتگ اَت-

نمیرانیں بلوچ استاد کندیل سباء دشتیاری ءِ کتاب ‘ سیت ماں شکلیں جنگان انت’ چہ نیشنل انسٹی ٹیوٹ آف بلوچیالوجی ءِ نیمگ ءَ چھاپ ءُ شنگ بیتگ-

نیشنل انسٹی ٹیوٹ ءِ نیمگ ءَ شنگ بیتگیں درشان ءَ گوشگ بیتگ کہ اے کتاب پہ وانوکیں یک مستاگی یے کہ آیاں بلوچستان ءَ ھوار دری ڈیھاں دز کپ ایت-

بلوچیالوجی ءِ نیمگ ءَ شنگ بیتگیں ڈساں گوشگ بیتگ کہ اے کتاب: بلوچستان ءِ ڈس کیچ، شال، کراچی، گوادر، پسنی، ڈیراغازی خان، سراوان، چہابھار، پنچگور، آواران، خاران، نوشکی، مند، تمپ، دشت، دالبندن، مستونک، قلات، خضدار، حب، اورماڈہ، نصیرآباد۔

بلوچستان ءَ ھوار دری ڈیھ بحرین، دبئی، مسکت، اسلام آباد، لاہور، ملتان، باولپور، فیصل آباد ءَ اے کتاب پہ بلوچی ءِ وانوکاں دز کپ ایت-