TBP Balochi

جھانزیب بلوچ سرکاری پلامرزی ءَ ھستیں ٹولی ءِ نیمگ ءَ زھرشانی روانک ءِ سر ءَ گاڑی ءِ ٹکر جنگ ءِ سبب ءَ سک زدگ بیتگ ات-

بلوچ ورنا جھانزیب بلوچ دو ھپتگاں کراچی ءَ یک ھسپتالے ءَ مرگ ءُ زند ءِ میان ءَ بیتگ کہ سیزدہ جنوری دوھزار ءُ بیست ءُ پنچ ءِ شپ ءَ دردانی اوپار نہ کنگ ءَ آئی ءَ وتی ساہ داتگ انت-

جھانزیب بلوچ چار جنوری دوھزار ءُ بیست ءُ پنچ ءَ ھما وھد ءَ سک زدگ بیتگ کہ آ پاکستانی پورسز ءِ دمگی سلاہ بندیں ٹولی ءِ باسک ءَ زمان جان ءُ ابولھسن ءِ زورانسری بیگواھی ءِ ھلاپ ءَ یک پُر ایمنیں زھرشانی ءِ سر ءَ گاڑی ءِ سر ءَ ٹکر جتگ-

اے وئیل بلوچستان ءِ دمگ ھوشاپ ءَ پیش اتکگ کہ اود ءَ سانمندیں کھول ءَ وتی دوستیگیں مردمانی یل کنائینگ ءِ ھاتر ءَ زھرشانی کنگ ءَ بیتگ اَنت- وئیل ءَ پد جھانزیب بلوچ سک زدگ بیتگ کہ زدگیں جاوراں کراچی ءَ برگ بیتگ ءُ اود ءَ داں دو ھپتگاں بے ھوشی ءِ جاوراں بیتگ-

بلوچستان ءَ پاکستانی پورسز ءِ پلامرزی ءِ سلاہ بندیں ٹولی کہ آئی ءَ لس نام ءَ ‘ ڈیتھ اسکواڈ ’ ءِ نام ءَ زانگ بیت اِنت جتائیں وئیلاں بیگواھیں بلوچانی کھولاں ترسینگ، زھرشانیانی سر ءَ اُرش ءُ کُشت ءُ کوشاں دزمانجن انت-

ھوشاپ ءَ زھرشانی کنوکانی سر ءَ گاڑی ءِ سرکینگ ءُ جھانزیب بلوچ ءَ ھوار دگہ مردمانی زدگ کنگ ءِ وئیلانی ھلاپ ءَ بلوچ یکجھتی کمیٹی ءُ بلوچستان ءَ دگہ سیاسی ءُ چاگردی مھلوک ءَ ھواریں مردمانی ھلاپ ءَ کاروائی کنگ ءِ دزبندی کتگ بلے کس ءَ تنی وھدی ھچ دابیں گامگیج نہ زرتگ-

بلوچستان ءِ دمگ چہ ھُزدار ءُ کیچ ءَ دو مردمانی لاش دزکپتگ اَنت-

لاش ھُزدار ءِ دمگ زھری ءُ کیچ ءِ دمگ چہ مند ءَ دزکپتگ اَنت-

اِھوالکار رِد ءَ زھری مشک بازار دگ سر ءَ کشمی ءَ ناشناسیں مردمے ءِ لاش دزکپتگ کہ آ تیر جنگ ءُ کُشگ بیتگ-

دومی نیمگ ءَ کیچ ءِ دمگ کھنک ءَ ھال اِنت کہ گوستگیں شپ ءِ ساھت سے ءَ ناشناسیں مردم لوگ تہ ءَ پُترتگ ءُ محمد ء رضائی آوار جتگ کہ آئی ءِ لاش مرچی دزکپتگ-

تنی وھدے دوئیں وئیلانی سوب زانگ نہ بیتگ اَنت-

بیا گلامی ءِ سانکلاں پروش دئیں

نبشتہ کار: سنگت نُورک بلوچ

دی بلوچستان پوسٹ

( سرمچارے ءِ دپتر ءِ اولی تاکدیم )

“وھد” بدلی ءِ نام اِنت کہ ھرچ ساھت بدل بوان اِنت ، وھد کُلّیں چیزاں بدل کنت ، مردم ، جاگہ ءُ بلکیں ھرچ رنگ ءَ بدل کنان کَنت ۔ وھد ھما چیز اِنت کہ ھچبر دارگ نہ بیت ءُ ھچ شَئے ءَ چوشیں تاکت مان نیست کہ وھد ءَ وتی پَنجگانی تہ ءَ کُبل بہ کنت ۔

مھروان بہ گِند ئے ترا یات اِنت کہ پیش ءَ وھدے ھَور بوتگ اَت گڑا من ءُ تو وانگجاہ ءِ کوھنیں دَپتر کَورانی تہ ءَ دَور دات اَنت کہ بلّے مَجگ چِد ءُ گیشتر پُرتَوان بیت ءُ ما گیشتر وانگ ءَ زبْر بَئیں ۔ اے مئے ھرچ سال ءِ کار اَت ءُ ھما کَور مَستر ءُ دوٗرتِر شُت ما گڑا ھما کَور ءِ میان ءَ وتی دَپتر دَور دات اَنت کہ بلّے دَپتر دوٗرتِر رَو اَنت ءُ ما وانگ ءَ زبْر بَئیں ۔

آ وَھد گَوست اَنت نو تو جتا جاگھے ءَ ئے ، باریں چون ئے ءُ من کوہ ءَ یک سرمچارے زانگ باں ، نی بلکیں تو من ءَ چٹ بے ھیال کُرتگ یا بلکیں تئی مجگ ءِ تہ ءَ کُنڈے ءَ منی یات انگت زِندگ اَنت ۔ نی من ءَ وھد ءَ بدل کرتگ ، پیسر کہ من ءَ جوڑا یے کاٹن گد گور ءَ ، سیاھیں چشمکے چم ءَ ، 125 موٹرسائیکلے گون اَت ، مود کسان اِت اَنت بَلے نی چوش نہ اِنت ، نی منی ھَستیں میراس اَنت کہ آ تھنا یک دِرتگیں جوڑا یے گُد ، مزنیں مود ، توپکے ، کلّی یے ، جاٹایے ، دِرتگیں چادرے ءُ چَندے ھَر اَنت ، ایشاں ابید من پہ یک مزنیں میراسے ءَ جنْگ ءَ آں ، آ زَمین اِنت ۔

نی کہ ھَور بیت من گوں کَوراں دَپتر روان نہ کناں ، ھور ءَ پَد کجا کہ کَورے گِنداں گڑا گوں کَوراں دیوان کناں ، بزگی ءِ کسہ ، بے وسی ءِ کسہ ، زِندانیں مردمانی کسہ ، گلامی ءِ کسہ ءُ گوں کَور ءَ وڑ وڑیں کسہ روان کناں کہ بلکیں اے کسہ مَٹ بہ بنت ایشانی برورد آجوئی بہ بیت ۔

مھروان من ءَ کَرنے بیت ودار ءَ آں کہ کدی اے کِسہ مَٹ بنت بَلے کَور اَبید ء ھاموشی ءَ دگہ ھچ نہ دنت ۔ ھرچ رند ءَ کہ من گوں کَور ءَ وتی کِسھاں روان کناں گڑا مدام رواں کَور ءِ گُڈسر ءَ چاراں کہ کَور ءَ پہ من چے آرتگ گڑا ھرچ رند ءَ کَور پہ تھنا یک درتگیں کاگدے کار اِیت آ کاگد ءِ سر ءَ بَد ڈولیں ھسابے ءَ تھنا یک لَبزے نِبشتہ اِنت آ جنْگ اِنت ۔

کَور من ءَ مدام جنْگ ءِ بِزانت ءَ سوج دَنت کہ جنْگ تھنا توپک ءِ بَڈّ ءَ کَنگ نہ اِنت جنْگ توپک ءِ تچکیں ھساب ءَ کار گِرگ اِنت ۔ نو من زاناں کہ منی ھما کِسہ چتو ھلاس بَنت ، منی کسہ ھما وھد ءَ مٹ بَنت کہ اے توپک کہ مرچی من ءَ بَڈّ ءَ اِنت ایشی ءَ را تچکیں کارشوناں گوں کارمرز کنگ اِنت ۔

مھروان کَور ءِ آرتگیں ھمک درتگیں کاگد ءِ سر ءَ نبشتگیں لبز ء جنْگ ءِ سَے ئیں آب گوں وت انچش ڈَکّ وارینتگ اَنت کہ جنْگ ءِ سے ئیں آباں ھچ کس جتا کرت نہ کنت ۔ کَور ءِ ھرچ آرتگیں تاک ءِ لبز ء جنْگ ءِ آبانی ترندیں یکجاھی ترا گشگ ءَ اِنت بیا منی کسھانی مٹ کنگ ءِ کُمک بہ بو ، تو کہ کا ئے گڑا کِسھانی گرانیں بُوٗج کمو سُبک تِر بیت انت ۔

مھروان من زاناں کہ اے کسّہ بلکیں پہ تو نوک بہ بَنت بَلے منی وھد ءِ ھِساب ءَ مَٹ بُوَگ ءِ راستی ھمیش اِنت ، ھمے کِسّہ اَنت کہ من ءَ گِرّان کنگ اَنت ، من ءَ چو رُمیز ءَ اندر ءَ ھلاس کنگ ءَ اَنت ۔ تو بیا ، تو بیا من ءُ تو اے کِسّھاں نوکیں مانا یے دَئیں ، تو بیا من ءُ تو اے کِسّھاں آجوئی ءِ چادر ءَ گوں مانپوشیں ، تو بیا زمین ترا توار جَنَگ ءَ اِنت ۔

بلوچ یکجھتی کمیٹی ءِ راھشون ءُ پُرکاریں باسک ماہ رنگ بلوچ ءَ زھری، ھُزدار ءَ زورانسری آوار جنی ءُ درکانودی کوش ءِ انّگیں وئیلانی سر ءَ وتی درشان ءِ تہ ءَ گْوشتگ کہ زھری، ھُزدار ءَ پاکستانی پوج ءَ دوازدہ ورنا زورانسری بیگواہ کتگ اَنت ءُ دگہ یک ورنایے درکانودی کشتگ-

ماہ رنگ بلوچ ءَ گْوشتگ کہ اے وئیلانی پُشدر ءَ زھری ءُ کش گور ءِ دمگاں راج ءُ بیگواہ کنگ بیتگیں مردمانی کھول سوراب کراس سر ءَ گوستگیں شپ ءَ چہ یک پُرایمنیں نندانکے بندات کتگ-

آیاں دیمتر ءَ گْوشتگ کہ سوراب ءِ تُرندیں سارتی ءَ اَبید زالبول، چُک ءُ کماشانی مزنیں کچے ءَ اے زھرشانی ءَ ھواراں زھرشانی کنوکانی یکیں لوٹ اِنت کہ زورانسری آوار جنگ بیتگیں مردماں زوت یل بہ کن اِت-

ماہ رنگ بلوچ ءَ انسانی ھکانی گلاں چہ دزبندی کتگ کہ آ بلوچستان ءَ برجاھیں زورانسری آوار جنی ءُ درکانودی کوش ءِ پٹ ءُ پول ءَ بہ کن اَنت ءُ آیانی ھلاپ ءَ زوت کاروائی بہ کن اَنت-

زانگ بہ بیت کہ سوراب کراس ءُ زیرو پوائنٹ سر ءَ نندانک ھنی ھم برجاہ ءَ اِنت زھرشانی کنوکاں شال، کراچی شھدگ سرجمی ءَ بند کتگ، چریشی ءِ سبب ءَ گاڑیانی روگ آیگ مھتل اِنت-

نندانک ءَ نشتگیں مردمانی گْوشگ اِنت کہ سارتیں مولم ءَ اَبید آیانی زھرشانی ئیں نندانک برجاہ ءَ اِنت اے وھد ءَ تاں برجاہ بیت دانکہ آیانی دوستناک دیم ءَ آرگ نہ بنت-

سوراب دمگی انتزامیہ ءِ نیمگ ءَ چہ زھرشانی کنوکانی گوم ءَ گپ دیوان بے سوب بیتگ وھدے کہ زھرشانی کنوکاں ریاستی زوراکی ایر جتگ-

بلوچ یکجھتی کمیٹی ءَ تربت ءَ اتفاق منظور ءِ کوش تُرندی ءَ ایرجنان ءَ اے ریاستی زُلم ءُ زوراکی دگہ یک مسالے ایر کتگ-

بلوچ یکجھتی کمیٹی ءَ وئیل ءِ درگت ءَ چہ وتی بُنجاھی درشان ءِ تہ ءَ گْوشتگ کہ اتفاق منظور، کہ دہ دسمبر دوہزار بیست چار ءَ پاکستانی پوج ءَ مردمانی دیم ءَ زورانسری آوار جتگ، کہ درکانودی آزارجاھاں دارگ ءَ پد دروگیں بمبے ءَ کُشتگ-

زانگ بہ بیت کہ دوشمبے ءِ روچ ءَ تربت ءَ پولیس ءَ ٹاہ داتگ کہ اتفاق منظور تربت جوسک ءِ ھند سر ءَ بمب ایر کنگ تراک نشانگ بیتگ-

بلوچ یکجھتی کمیٹی ءُ وئیل ءَ بیرام بیتگیں اتفاق منظور ءِ کھول ءَ پولیس ءِ اے ٹاہ رد کتگ گْوشتگ کہ اے وئیل یک درکانودی کوشے بیتگ-

بلوچ یکجھتی کمیٹی ءَ وتی درشان ءَ گْوشتگ کہ اتفاق منظور ءِ کھول آئی ءِ ءُ آئی ءِ دگہ بیگواھیں براتانی یل کنائینگ ھاتر ءَ بازیں زھرشانی یے کتگ، ءُ آئی ءِ دوئیں برات کہ پاکستانی پوج ءِ دست ءَ بیتگ اِت اَنت آ آجو بیتگ اِت اَنت بلے اتفاق منظور یک دروگیں بمبے تراکے ءَ کُشتگ-

بی وائی سی ءِ رِد ءَ اے وئیل بلوچ راج ءَ را تُرس آماچ کنگ ءُ آیانی توار ءِ ایرموش کنگ ریاستی پالیسی ءِ بھر اِنت زورانسری آوار جنی، درکانودی کوش، ءُ دروگیں ایف آئی آر بلوچ راج ھلاپ ءَ ریاستی زوراکی یک مھکمیں دْرچے-

بلوچ یکجھتی کمیٹی ءَ میان استمانی مردم، انسانی ھکانی گل ءُ رسانکدر ءَ چہ دزبندی کتگ کہ آ بلوچستان ءَ انسانی ھکانی نگیگیں جاور ھالانی گامگیج ءَ بزور اِیت ءُ ریاستی زوراکی ءِ ھلاس کنگ ھاتر ءَ کرد پیلو بہ کنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ کیچ ءُ تمپ ءَ پاکستانی پوج ءِ سر بیتگیں اُرشانی زمہ واری منّ اِتگ اَنت-

جارکش میجرگوھرام بلوچ ءَ گوشتگ کہ مئے سرمچاراں دوازدہ جنوری ءِ شپ ءِ ھپت ءُ نیم ءَ کیچ ءِ ھند تمپ ءَ برجاھیں پاکستانی پوج ءِ بنجل ءِ سر ءَ اُرش کُرتگ۔

جارکش ءَ گْوشتگ کہ اُرش ءَ مئے سرمچاراں مزنیں سلاہ کارمرز کُرتگ ءُ دژمنیں پوج ءِ تمپ کلات سر ءَ برجاھیں بنجل ءِ یک سنگرے نشانگ کُرتگ۔چریشی ءَ چہ دژمن ءَ جانی ءُ مالی تاوان دیمپانی کنگ کپتگ۔

جارکش ءَ گوشتگ کہ بلوچستان لبریشن فرنٹ گوں نوکیں جنگی رپکاں زورگریں پوج ءِ سر ءَ گھتر ءُ مھکمیں اُرش کنگ ءَ اِنت۔ سرمچار نوکیں ٹیکنالوجی، چیرجنگی راھبند ءُ مھکمیں شوربندی کارمرز کنگ ءُ دژمن ءِ سُر ءُ پُر داشتگ ءُ آئی ءِ ھال اھوالی نزام ءَ نزور اَنت۔ چہ اے راہ راھبندی ءَ دژمن ءِ لَڑ ءَ تُرس ودی کنگ ھمراھی ءَ مئے گھگیری ءَ گیش مُھکم ءُ توانمندی جوڑ کنت-

جارکش ءَ وتی دگہ یک درشانے ءَ گْوشتگ کہ سرمچاراں دوازدہ جنوری ءَ آبسر بلوچی بازار تربت ءَ برجاھیں زورگریں پاکستانی پوج ءِ بنجل ءِ سر ءَ باز گرینیڈ لانچر جتگ کہ چہ ایشی ءَ زورگریں پوج ءَ جانی ءُ مالی تاوان دیمپانی کنگ کپتگ۔

جارکش ءَ گْوشتگ اُرش ءَ پد زورگریں پوج ءِ کارمنداں سر ءُ دیم تیرگْواری کُرتگ بلے سرمچار گوں جوانیں چیرجنگی رپکاں درکپتگ ءُ وتی مُھریں اوتاکاں سر بیتگ اَنت۔

جارکش ءَ گْوشتگ کہ بی ایل ایف نہ تھنا کوچگاں بلکیں بلوچستان ءِ ھاسیں شھراں ھم چیر جنگی رپکانی بنیاد ءَ زورگریں پوج ءَ نشانگ کرتگ ءُ سَسّائی نادراھی ءِ آماچ کُرتگ۔ھمے ھاتر ءَ پروش وارتگیں پوج ءِ کارمند لس مردماں دروگیں میڑاں کُش ایت یا زور بیگواہ کنت کہ اے آئی ءِ مدامی ءُ ترس پروش ورگ ءِ نشانی اِنت۔

میجر گوھرام بلوچ ءُ اُرش ءِ زمہ واری منّ اِتگ ءُ گْوشتگ کہ ما اِھد کن ایں کہ داں زورگریں پوج ءِ دراھگ ءَ تاں ھر جاہ ءَ نشانگ کن ایں-

بلوچ یکجھتی کمیٹی کلات ھنکین ءِ نیمگ ءَ دوشمبے 13 جنوری ءَ بلوچ شھید ءُ درکانودی کوشاں سانمندیں کربانیانی ستاشانی ءِ درشان کنگ ءَ یک سرپدی دیگ ءِ روانکے کشگ بیتگ –

روانک مگل چوک ءَ بندات بیتگ شھیدانی ادیرہ جاہ ءَ سر بیتگ کہ اود ءَ روانک کشوکاں شھیدانی مانشاں بلوچ دودانی چاردر پر داتگ، پل درشان کتگ ءُ سواب ءِ ھاتر ءَ پاتہ ونتگ –

روانک ءِ رھشونی بلوچ یکجھتی کمیٹی ءِ بنجاھی سروک ڈاکٹر ماہ رنگ بلوچ ءُ بیبرگ بلوچ ءَ کتگ، ھمے مھلوک بازیں کچے ءَ کہ آیانی توک ءَ زالبول ھوار بیتگ انت –

روانک ءَ تران کنان ءَ ڈاکٹر ماہ رنگ بلوچ ءَ گوشت بلوچ راج وتی شھیدانی دیمونیاں ھچ بر پراموش نہ انت ءُ نہ بیت اِنت-

آئی ءَ گوشتگ اے دیمونی مئے جد ءُ جھد ءِ چیدگ انت ءُ مارا وتی لڑانی تہ ءَ یکجاھی بوگ ءُ آیانی کربانیانی مکسد دیم ءَ برگی انت-

آئی ءَ گوشتگ انگریزانی گلامانی گلام ھچ بر بہ ایں – انگریزاں ھچبر چوش نہ گوشتگ کہ بلوچانی لوگاں مان رچ،سرکاری سرداراں گوشگ لوٹ آں کہ وتی سرڈگار ءِ گون ءَ گداری مہ کن ات ءُ گلامی ءَ یل بہ کن ات ءُ بیا ات اے زرمبش ءِ بھر جوڑ بہ بیت –

بیبرگ بلوچ ءَ روانک ءِ وھد ءَ دزبندی کتگ کہ آ بیست ءُ پنچ جنوری ءَ دالبندین ءَ بیوکیں راجی مُچی ءَ گیش ءَ گیش بھر بہ زور انت دانکہ بلوچ نسل کشی ءِ ھلاپ ءَ یک مھکمیں مُچیں توارے چِست کنگ بہ بیت اِنت-

بلوچ یکجھتی ءَ اے جار جتگ کہ دالبندین ءَ اے راجی مُچی ءِ لڑ ءَ میان اُستمانی برادری ءَ اے کلوہ دیگی انت کہ بلوچ راج وتی شھیدانی وارس اِنت ءُ زُلم ءُ نا انساپیاں اوپار کت نہ کنت اِنت-

آیاں گوشتگ شھیدانی مانش ءُ آیانی کربانی مئے جد ءُ جھد ءِ رژنائیں چراگ انت ءُ مارا آیانی زانشت زندگ کنگ ءُ وتی سرڈگار پھریزگی انت-

روانک ءِ آسری ءَ شھیدانی واستا دوا ءُ کھول کنگ بیتگ کہ آ انساپ ءِ رھبندانی تَک ءَ وتی جد ءُ جھد ءَ برجاہ دار اَنت-

زھری ءُ آئی ءِ کش ءُ گوری دمگاں زورانسری آوار جنی ءُ دگہ یک ورنایے ءِ درکانودی کوش ءِ ھلاپ ءَ راجی زھرشانی گیش تُرندتر کنگ بیتگ دمگی اِھوالکار ءِ رِد ءَ زھری ءَ زوتاں پوج ءِ کاروائیانی میان ءَ پاکستانی پوج ءَ دوازدہ مردم زورانسری بیگواہ وھدے کہ یک ورنایے کُشگ بیتگ-

اے وئیلانی ھلاپ ءَ زھری ءِ جھمننداں جتاجتائیں ھندانی سر ءَ نندانک داتگ، آیانی تہ ءَ زھری شھر، زھری کراس انجیرہ ءُ زیرو پوائنٹ سوراب ھوار اَنت-

گوستگیں روچ ءَ زھری کراس انجیرہ ءَ زھرشانی کنوک بازیں کلاکاں پیادگ ءَ پند ءَ پد زیرو پوائنٹ سوراب ءَ سر بیتگ اَنت ءُ اود ءَ برجاھیں نندانک ءَ ھوار بیتگ اَنت اے نندانک ءِ سبب ءَ شال، کراچی شھدگ سرجمی ءَ بند اِنت، وھدے کہ زھرشانی کنوکاں جار جتگ کہ نندانک آیانی دوستناکانی یل کنائینگ ءَ تاں برجاہ بیت انت-

دومی نیمگ ءَ دمگی انتزامیہ ءَ نیمگ ءَ چہ زھرشانی کنوکاں گوں گپ دیوان کنگ جُھد کتگ بلے گپ دیوان بے سوب بیتگ، وھدے کہ دومی نیمگ ءَ زھری بازار سرجمی ءَ تھتگ بندیں ھڑتال برجاہ ءَ اِنت، اود ءَ دکانداراں پوج ءِ کاروائی ءُ زورانسری آوار جنی ءِ ھلاپ ءَ دکان بند کتگ اَنت-

اے درگت ءَ بلوچ یکجھتی کمیٹی ءِ راھشوناں شھری ءُ دگہ سیاسی ءُ چاگردی گلانی باسک نندانکجاہ ءَ اَتکگ ءُ زھرشانی کنوکاں گوں یکجاھی درشان اِتگ-

زانگ بہ بیت کہ گوستگیں روچاں بلوچ لبریشن آرمی ءَ زھری ءَ لشکر کشی ءَ پد چہ پاکستانی پوج ءِ نیمگ ءَ چہ کاروائیانی دْرچ برجاہ ءَ اِنت اود ءَ انٹرنیٹ ءُ موباھل نیٹ ورک بند کتگ اَنت چریشی ءَ چہ رد ھال اھوالی جیڑھے دیمپانی اِنت-

اِھوالکار ءِ رِد ءَ زھری ءَ پوج ءَ بازیں لوگانی سر ءَ بیڑبرتگ ءُ بازیں ورنایے آوار جتگ اَنت، آیانی تہ ءَ یکیں کھولے بازیں مردمے ھوار اِنت-

سوراب ءَ زھرشانی کنوکانی گْوشگ اِنت کہ سارتیں مولم ءَ اَبید زالبول، چک، ءُ کماشاں ھوار مھلوک ءِ مزنیں کچے ءَ نندانک ءَ ھوار اَنت ءُ آیانی لوٹ اِنت کہ زورانسری آوار جنی بیتگیں مردماں یل بہ کن اِت-

بلوچستان ءِ دمگ تربت ءَ پاکستانی پوج ءَ دروگیں بمبے تراکے ءَ چہ پیسر ءَ بیگواھیں مردمے کُشتگ-

گیشیں ھالانی رِد ءَ گوستگیں شپ ءَ تربت ءِ دمگ جوسک ءِ ھند ءَ یک تراکے ءَ تربت پولیس ءَ اتفاق ء منظور نامیں مردمے ءِ بمب پٹ کنگ وھد ءَ وت تراک ءَ چہ بیران بیگ بھتام جتگ-

کھول ءَ پولیس نیمگ ءَ جتگیں بھتام رد کتگ اَنت گْوشتگ اتفاق منظور ءَ دہ دسمبر دوھزار بیست چار ءَ پاکستانی پوج ءَ آوار جتگ ءُ بیگواہ کتگ وھدے آ پوج ءِ دست ءَ بیتگ ءُ پوج ءَ وت آ بمب پٹ کتگ ءُ کُشتگ-

زانگ بہ بیت کہ آئی ءِ کھول ءَ گوستگیں سال ءِ گُڈی ءَ یک پریس کانفرنس ءَ اتفاق منظور ءُ آئی ءِ دگہ براتانی سیکیورٹی ادارھانی دست ءَ زورانسری آوار جنی ءِ درگت ءَ رسانکدر ءَ چہ گپ کتگ اَت بلے اتفاق منظور دوئیں برات یل کتگ اَنت بلے آ دوشی یک بمبے تراکے ءَ کُشتگ-

بلوچستان ءُ ھیبرپکتونکوا ءَ ھساف کنوکیں جوڑ بوھوکیں ژوب میر علی خیل ٹانک روڈ ءں سیکشن ٹو ءِ سر ءَ یک بند ءُ ساچی کمپنی ءِ بنجل ءِ سر ءَ سلاہ بندیں مردماں اُرش کتگ ءُ چہ بنجلطءَ ٹھیکیدار ءَ ھوار سَے مردم آوار جتگ انت-

وئیل ژوب ءِ شھر ءَ کساس ھپتاد کلومیٹر دو بلوچستان ءُ ھیبرپکتونکوا ءِ سیمسر کچھ مینا ءَ پیش اتکگ- دمگی پولیس ءِ رد ءَ آوار جنگ بیتگیں مردمانی سیادی ژوب ءِ دمگ کلی خوژکزئی ءَ انت-

دمگی مردمانی رد ءَ آوار جنی ءِ وئیل ھما وھد ءَ پیش اتکگ کہ کمپنی ءِ مردم بنجل ءَ آرام کنگ ءَ بیتگ انت-

پولیس ءَ وئیل ءَ پد پٹ ءُ پول بندات کتگ ءُ دمگ ءَ سرچ آپریشن بندات کتگ-