TBP Balochi

شھرک پنگنش ءِ ھند ءَ زالبول، زھگ ءُ ورنایاں تربت شال سی پیک دگ بند کتگ-

زھرشانی ءَ ھواریں مردمانی تہ ءَ بیگواھیِں منیراحمد ء میاہ جھمنند بلوچی بازار سامی، شیھک ء غلام قادر جھمنند بلوچی بازار سامی، شکیل احمد ء رند جھمنند گونگی شھرک ءِ کھول ھوار اَنت-

کھول گوشگ اِنت کہ آیانی چُک دوازدہ جنوری ءَ شپ ھشت ءَ چہ پسانی منڈی دوکرم آپسر ءَ پاکستانی پوج ءَ آوار جتگ ءُ ناشناسیں جاھے ءَ برتگ آیانی درگت ءَ ھچ وڑیں ھال نیست-

آیانی گوشگ اِنت کہ دانکہ مئے چک یل کنگ نہ بنت ما سی پیک دگ ءَ بند کن ایں-

ھمے وڑ دگہ ھپت مردم آیانی تہ ءَ ذاکر ء حیدر، صالح محمد ء نوک آف، یونس ء صوالی، دلسرد ء حسن، اعجاز ء صوالی ءِ کھولاں ھم اے زھرشانی ءِ نندانک ءُ دگ بند کنگ ءَ ھوار بیگ جار جتگ-

آیانی گوشگ اِنت کہ آیانی چُک بازیں روچاں چہ پاکستانی پوج ءِ دست ءَ اَنت ءُ ناشناسیں جاھے ءَ کتگ اَنت ئِے، ما ڈپٹی کمشنر ءُ دمگی انتزامیہ ءَ چہ وتی چکانی یل کنائینگ ھاتر ءَ گند ءُ نند کتگ بلے مئے کسے گپ گوشدارگ نہ بیت اَنت ھمے ھاتر ءَ لاچار بیتگ ءُ سی پیک دگ بندی ءَ ما زھرشانی ءَ ھوار بیگ ءَ اِنت دانکہ مئے چُکاں انتزامیہ یل نہ کنت ما دگ سر ءَ نندانک دے ایں-

بلیدہ زامران ءِ لبزانکی کاروان

نبشتہ کار: جہانزیب بلوچ

دی بلوچستان پوسٹ

نوکیں ءُ دلکشیں گامگیج بلیدہ زامران لبزانکی کاروان ءِ انوگیں وھداں بندات کنگ بوتگ کہ دمگ ءِ لبزانک دوستاں یکجاہ بہ کنت۔ اے گل ءِ مول ءُ مراد لبزانک ءِ مھر ءَ را گیش کنگ، نبشتہ کاری ءِ دیمروئی کنگ، ءُ بلوچستان ءِ مردمانی واستا یک پلیٹ فارمے جوڑ کنگ اِنت کہ آ نبشتہ کاری، شائری ءُ دگہ لبزانک ءِ وسیلگ ءَ وتی درشان ءَ بہ کن اَنت۔ کاروان ایوک ءَ یک گلے نہ اِنت بلکیں بلوچستان ءِ زرباری دود ءُ ربیدگ ءُ لبزانکی دود ءُ ربیدگانی وش آتک کنگ ءِ جنبش اِنت۔

بلیدہ زامران لبزانکی کاروان پہ ھرکس ءَ پچ اِنت کہ آئی ءَ گوں لبزانک ءَ ھُب ءُ واھگ ھست، آ نبشتہ کار بہ بنت، شائر بہ بنت، وانوک بہ بنت، یا ھما کہ بس لبزانی زیبائی ءَ ستا کن اَنت۔ کاروان ءِ مستریں مول ءُ مراد بلوچستان ءِ جتا جتائیں دمگاں چہ مردماں یکجاہ کنگ اِنت، ایشاں وتی نبشتہ کاری ءِ کار ءُ ھیالانی درشان کنگ ءِ موہ رس اِیت۔ اے کار ءَ گوں اے گل ءَ امیت اِنت کہ گیشتر مردماں نبشتہ کنگ، وانگ ءُ لبزانکی کارانی تہ ءَ ہوار بوہگ ءِ ہاترا دلبڈی دنت کہ آ چاگرد ءَ وشھال کن اَنت۔

اے کاروان ءِ مول ءُ مراد ھم بلوچی لبزانک ءُ دودمان ءِ اھمیت ءَ دیم ءَ آرگ اِنت۔ وھدے کہ بلوچستان ءِ بازیں دمگاں وانگ ءُ زانگ ءُ وسیلگاں گوں سیادی داروکیں جیڑہ ءُ جنجالانی دیمپانی کنگ ءَ اِنت بلیدہ زمران لبزانکی کاروان ءِ مول ءُ مراد ایش اِنت کہ دمگی نبشتہ کاراں وتی ھیالانی پٹ ءُ پول ءُ درشان کنگ ءِ ھاترا یک ایمنیں جاھے ءِ پُجارینگ بہ بیت انت۔ اے یک انچیں پلیٹ فارمے کہ اودا بلوچی زبان ءُ آئی ءِ زرباری دود ءُ ربیدگاں وش آتک کنگ بیت انت ۔

نبشتہ کنگ ءِ ورکشاپ، وانگ ءِ سیشن، شائری ءِ گشتانک، ءُ لبزانکی گپ ءُ تران ءِ وڑیں جتا جتائیں کارانی وسیلگ ءَ اے گل وتی باسکاں وتی نبشتہ کنگ ءِ سنچ ءَ گیش کنگ ءَ کمک کنت ءُ نوکیں نسل ءَ را لبزانک ءِ تہ ءَ دلگوش دیگ ءِ ہاترا دلبڈی دنت۔ ایشی ءَ چہ بلوچستان ءِ نبشتہ کاراں ھم موہ رس ایت کہ آ وتی ازم ءَ پیش بہ دار اَنت ءُ وتی کارانی پجار ءَ بہ گِر اَنت۔ کاروان ءِ مول ءُ مراد لبزانک ءَ بلوچستان ءِ مردمانی زند ءِ تہ ءَ آرگ اِنت کہ اودا باز براں اے وڑیں دود ءُ ربیدگی کارانی رسگ ءِ راہ بند بوتگ۔

آسر ءَ بلیدہ زامران لبزانکی کاروان بلوچستان ءَ یک دلکشیں ءُ باز پکاریں گامگیجے۔ اے یک انچیں جاہے کہ اودا لبزانک ءِ دوست داروک یکجاہ بوت کن اَنت، نبشتہ کنگ ءِ شوق ءَ بھر کن اَنت ءُ دمگ ءِ دود ءُ ربیدگی ءِ رکھینگ ءُ دیمروئی ءَ وتی کرد ءَ ادا کناں اَنت۔

بلیدہ زمران لبزانکی کاروان ءَ وتی ھاسیں گچینکاری دیوان 12 جنوری 2025 ءَ گورنمنٹ ہائی اسکول میناز ءَ برجم داشتگ۔ اے مراگش پہ بلیدہ ءِ لبزانکی تک ءَ یک مزنیں گامگیجے ات چیاکہ اگدہ دارانی گچینکاری جوانیں رنگے ءَ سرجم بوت۔ اے دیوان ءَ ھما شوکیں مردم یکجاہ بوتگ اَنت کہ آ دمگ ءِ تہ ءَ لبزانک، دود ءُ ربیدگ ءُ وانگ ءُ زانگ ءِ دیمروئی ءِ ھاترا دلگوش اَنت۔

گچینکاری ءِ امل وش ءُ وشھال بوتگ ءُ اے مردم وتی وتی پجّار ءَ گچین کنگ بوتگ اَنت ،کارست مولابخش خاموش ،کمکار کارمستر حفیظ گل ، کارستر حسین داد، کمکار کارمستر: طاہر سبز ، شنگکار آصف پل ،اکاؤنٹنٹ ندیم رحیم –

اے مردم پہ وتی بلیدہ زامران ءِ لبزانکی ءُ دودمانی ءِ دیمروئی ءِ ھاترا وتی جھد ءُ کوشست، تجربگ ءُ جھد ءِ ھاترا گچین کنگ بوتگ اَنت۔ گچینکاری ءِ تہ ءَ کمیونٹی ءِ وتی سروکی ءُُ آیوکیں وھد ءِ وژن ءِ تہ ءَ ھما بھروسہ ءُُ کمک ءِ درشانی کنگ بیت۔

بلیدہ زامران ءِ لبزانکی کاروان پہ وڑ وڑیں گامگیجانی وسیلگ ءَ لبزانک ءِ دوستی ءِ دلبڈی دیگ ءُ بلوچی دود ءُ ربیدگ ءِ پھازگ ءِ ھاترا ندر اِنت. نوک گچین بوتگیں ٹیم ءَ چہ امیت انت کہ آ وانندگی ءِ گیش کنگ ءِ مشن ءَ دیم ءَ برگ ءَ انت، دود ءُ ربیدگی مراگشانی میزبانی ءَ کنت ءُ دمگ ءِ نبشتہ کار، شاعر ءُ ازمکارانی واستہ پلیٹ فارم ءِ دیم ءَ برگ ءَ انت۔

چوناھا کہ کارمستر وتی نوکیں کرد ءَ پیلو کن اَنت، آ یکجاہ کار کنگ ءُ چاگرد ءَ را کمک ءُ کمک ءِ ھاترا جزم اَنت۔ ایشاں پہ بلوچی لبزانک ءِ دیم ءَ برگ ءِ ھاترا گوں دگہ گل، نبشتہ کار، دود ءُ ربیدگی ادارہاں ھمکاری کنگ ءِ ھاترا وتی تیاری ءِ درشانی کتگ۔

آسر ءَ بلوچستان زامران لبزانکی کاروان ءِ سوبمندیں گچینی دیوان بلوچستان ءَ لبزانک ءُ دود ءُ ربیدگ ءِ دیما برگ ءِ سفر ءِ یک نوکیں دورے ءِ نشان اِنت۔ کاروان ءِ گوں یک سرپدیں ٹیم ءِ کارمنداں گیش ءُ گیوار کنگ ءُ دمگ ءِ دود ءُ ربیدگ ءِ ندارگ ءَ جوانیں رنگے ءَ کمک کنگ ءِ ھاترا ٹھینگ بوتگ۔

￴

کیچ ءِ دمگ دشت شے زنگی ءَ پاکستانی پوج ءِ گاڑی یک بمب اُرشے ءِ نشانگ کنگ بیتگ-

بمب اُرش گوستگیں شپ ءَ کیچ دشت شے زنگی پورسز ءِ گاڑی ءِ سر ءَ تراکے بیتگ- دمگی مردمانی رد ءَ تراک ءَ پورسز ءَ جانی ءُ مالی تاوانانی دیمپانی کنگ کپتگ-

اُرش ءَ پد پورسز بازیں کچے ءَ دمگ ءَ سر بیتگ ءُ انگیر کرتگ ءُ لشکر کشی ءِ بندات کتگ- انگت ءَ اُرش ءِ زمہ واری کس ءَ پہ وت نہ زرتگ-

تربت ءَ پاکستانی پوج ءَ گوستگیں شپ ءَ لوگانی سر ءَ بیڑ برگ ءِ وھد ءَ دو مردم دزگیر کتگ ءُ بیگواہ کتگ انت- سانمندیں کھول ءِ گوشگ انت کہ پوج ءَ دو اداراں داں زالبول ءُ زھگ لٹ شاپ کتگ انت-

بلوچستان ءَ زورانسری بیگواھیانی درچ یکشل ءَ برجاہ انت کہ اے وئیلانی ھلاپ ءَ سوراب ءُ تربت ءَ سَے جتا جتائیں جاھاں زھرشانی دیگ بوگ ءَ انت-

کیچ ءِ بنجاھی شھر تربت ءَ پاکستانی ہوج ءَ دگہ دو مردم گوستگیں شپ ءَ زورانسری آوار جتگ انت-

دمگی مردمانی رد ءَ گوستگیں شپ ءِ ساھت دو ءَ تربت ءِ دمگ نیو بھمن ڈنک ءَ پاکستانی فورسز فرنٹیئر کور ءَ جاوید کریم بلوچ ءُ آئی ءِ ھمساھگانی لوگانی سر ءَ بیڑ برتگ ءُ ھمے وھد ءَ جاوید کریم ءِ گوھارزتک بلال بلوچ ء ھیدر علی ءُ آئی ءِ ھمساھگ اسماعیل بلوچ ء ھیر مھمد دزگیر کتگ ءُ ناشناسیں جاھاں برتگ انت –

اھوالانی رد ءَ پورسز ءَ دو اداراں گیش لوگانی پٹ ءُ پول کتگ ءُ زھگ ءُ زالبول لٹ شاپ کتگ انت-

اے گپتگیں مردمانی بارو ءَ دگہ سرپدی بیتگ انت ءُ دمگداراں اے درگت ءَ دگہ گپ ھم پیش نہ کتگ انت-

گوستگیں روچ ءَ بلوچ یکجھتی کمیٹی ءِ سروک ڈاکٹر ماہ رنگ بلوچ ءَ مچ بولان ءَ مھلوک ءِ مُچی ءِ میان ءَ تران کنان ءَ گوشتگ کہ بلوچستان ءَ چوشیں ھِچ جاہ نیست انت کہ بلوچ ایمنی ءَ نِشت بہ کنت اِنت- بلوچ گلام کنگ ءُ در پہ در کنگ بوگ ءَ انت بلوچانی مُچانکیں لاش دزکپگ ءَ انت ءُ مئے براساں اَچ لوگوں چِست کنگ ءُ پد ءَ آیانی لاشاں ژانگول کنگ ءُ جنگلاں دور دیگ بوگ ءَ انت-

آئی ءَ گوشتگ ریاست بلوچ راج ءِ مڈیانی پُلگ ءَ پنجاپ ءَ مپت ءَ وانگ ءُ زانگ ءُ الاج ءُ دگہ آسراتی دیگ ءَ انت بلے بلوچانی واستا چھاونی جوڑ بوگ ءُ بلوچانی نسل کشی ءَ کنگ ءَ انت- ءُ آیاں درکانودی کشگ انت – سرجمیں دنیا ءَ وتی ھکانی درشان کنگ ءِ لیکہ دارگ بنت بلے بلوچانی لیکہ ءُ گپانی سر ءَ بندش جنگ بیت اِنت-

مچی ءَ مچھ ءَ سیادی داروکیں بیگواھیں کھول علی اھمد راھیجہ جنک، طارق عزیز بلوچ ءِ مات، نعمت اللہ بلوچ ءِ گوھار، اھمد نواز سمالانی ءِ لوگبانک، نبل مری ءِ جنک، بیگواھیں لعل خان ءِ برات ءُ دگہ مردماں تران کتگ ءُ وتی مردمانی یل کنگ ءِ لوٹ کتگ انت-

کھولاں گوشتگ آیانی مردم اچ لوگاں لٹ شاپ کنگ ءُ بیگواہ کنگ بیتگ انت اگاں کسے ءَ الزامے ھست گڑا آ آمیدگساں پیش کنگ بہ بیت اِنت-

مچی ءَ تران کنان ءَ ڈاکٹر ماہ رنگ بلوچ ءَ گوشتگ بلوچستان ءِ مھلوک ءَ گوں دزبندی انت کہ یکجاہ بہ بنت ءُ بلوچ کاز ءِ بھر جوڑ بہ بنت اِنت- پرچاکہ بلوچاں اے وھد ءَ یکجاھی ءِ سک ءَ درکاری انت – بلوچ راج ءَ سیاست ءِ بھر بوگ ءُ وتی مردمانی یل کنائینگ ءُ شھیدانی ھونانی نبشتگیں کلوھانی ھاتر ءَ چِست بوگی انت-

آئی ءَ دالبندین ءَ راجی مُچی ءَ بھر زیرگ ءِ دزبندی ءُ بلوچ کاز ءَ سدکی کنگ ءَ وتی بھر ءَ ھوارینگ ءِ دزبندی کتگ-

بلوچ یکجھتی کمیٹی ءِ رھشوناں مچ ءِ دمگی مردماں گند ءُ نند کتگ ءُ آ دالبندین ءَ بیست ءُ پنچ جنوری ءَ راجی مچی ءَ بھر زیرگ ءِ لوٹ اتگ انت-

گل ءِ گوشگ انت کہ اے روچ بلوچ راج ءِ ھکانی جد ءُ جھد ءَ دیم ءَ جنزینگ ءُ دنیا ءَ بلوچستان ءَ برجاھیں زُلمانی سرپدی ءَ دارگ بیت اِنت-

مچ ءِ مچی ءَ زالبول ءُ زھگ ءُ ورنایاں بازیں کچے ءَ بھر زرتگ-

روکپتی بلوچستان ءِ دو جتا جتائیں جاھاں پیش اتکگیں وئیلاں دو مردم بیران ءُ زدگ بیتگ اَنت-

گیشیں اھوالانی رد ءَ ھاش ءَ ناشناسیں مردماں تیرگواری کتگ ءُ یک مردمے کُشتگ-

کُشگ بیتگیں مردم ءِ پجار اسماعیل قلجائی ء ناصر ءِ نام ءَ زانگ بیتگ کہ آ ھاش ءِ جھمنند انت-

اھوالان رد ءَ اسماعیل اَچ لوگ ءَ دراتکگ کہ مراد ریگی میتگ ءَ روگ ءَ بیتگ کہ اود ءَ پرپٹ سواریں مردماں آئی ءِ سر ءَ تیرگواری کتگ-

ھمے وڑ میرجاوگ ءَ ایرانی لشکر ءَ تیرگواری کتگ ءُ یک مردمے زدگ کتگ-

گیشیں اھوالانی رد ءَ ایرانی لشکر ءِ تیرگواری ءَ افشین گمشادزئی ء رمزان نامیِن مردمے بیران بیتگ-

اھوالانی رد ءَ افشین تیل کشیں گاڑی ءِ ڈرائیور بیتگ کہ آ سیمسر ءَ روگ ءَ بیتگ ایرانی لشکر ءَ آئی ءِ سر ءَ تیرگواری کتگ-

بلوچستان ءِ تیاب دپی شھر گوادر ءَ زکریا زھیر ءِ یات ءَ ڈیوا رورانکے برجم دارگ بیتگ، چریشی ءَ شھریاں ، سیاسی ءُ چاگردی کارکنانی، ءُ بیگواھیں مردمانی کھول ءِ مزنیں کچے ءَ بھر زرتگ-

روانک ءَ زھرشانی کنوکاں زکریا ءِ ناھکیں کوش ایرجنان ءَ آئی ءِ واستا انساپ لوٹ کتگ-

زانگ بہ بیت کہ زکریا زھیر لیویز فورس ءِ کاردارے بیتگ ءُ آ انّیگاں زورانسری آوار جنی ءِ نشانگ کتگ، آ بیست ھپت ستمبر دوھزار بیست چار ءَ پاکستانی پوج ءَ آوار جتگ اَت ءُ پد ءَ یل داتگ اَت-

بلے یل کنائینگ ءَ پد گوستگیں روچاں ناشناسیں مردماں آ چہ گوادر ءَ تیر جتگ ءُ کُشتگ-

زکریا ءِ کوش ءَ پد رسانکدر ءَ سیاسی ءُ چاگردی گلانی نیمگ ءَ چہ تُرندیں گم ءُ زھری درشان کتگ ءُ انساپ لوٹ کتگ-

بلوچ نیشنل موومنٹ ءِ انسانی ھکانی ادارہ پانک ءَ اشی ءِ کوش ایر جتگ گوشتگ کہ زکریا ءِ کوش اے گپ ءَ پدر کنت کہ بلوچستان ءَ انسانی ھکانی تُرندیں ھلاپ ورزی برجاہ ءَ اِنت-

ھمے وڑ گوادر ءَ روانک ءَ ھواریں مردماں ڈیوا روک کتگ زکریا ءُ دگہ بیگواھیں مردم ءُ شھیدیں مردمانی دیمونی یات کتگ اَنت ءُ آیانی واستا انساپ دیگ ء دلجمی لوٹ کتگ-

بلوچستان لبریشن فرنٹ ءِ جارکش میجر گوھرام بلوچ ءَ شنگ کتگیں درشان ءِ تہ ءَ گْوشتگ کہ چاردہ جنوری سے شمبے ءِ سُھب ھپت ءَ مشکے ءِ دمگ بنڈکی ءَ یکیں وھدے ءَ چار جتاجتائیں اُرشاں زورگریں پاکستانی پوج ءُ ایف ڈبلیو او نشانگ کتگ ءُ جانی ءُ مالی تاوان دیمپان کتگ اَنت-

جارکش ءَ گوشتگ کہ مئے سرمچاراں مروچی سُھب ءَ بنڈکی ءَ ایف ڈبلیو او ءِ کارمندانی پھازوکی ءَ اوشتوکیں زورگریں پاکستانی پوج ءِ سنگر نوکیں سلاھاں چہ نشانگ کتگ اَنت چریشی ءِ آسر ءَ دُژمنیں پوج ءِ چار کارمند مرتگ ءُ دو ٹپی بیتگ اَنت-

جارکش ءَ گْوشتگ اے اُرش تامُر زوت آشوب میڈیا سیل نیمگ ءَ چہ شنگ کنگ بیت-

جارکش ءَ گْوشتگ کہ اُرش ءَ سرمچاراں زورگریں پوج ءِ پیادگی کارمند نشانگ کتگ اَنت، کہ وتی کارمندانی کُمک ءِ ھاتر ءَ آیگ ءَ بیتگ اَنت ءُ سرمچاراں پیسر ءَ سنگر گپتگ ءُ وتکاریں سلاھاں چہ نشانگ کتگ – چریشی ءَ سے کارمند مرتگ ءُ یکے ٹپی بیتگ-

جارکش ءَ گْوشتگ سیمی اُرش ھم بنڈکی شرین گز ھند سر ءَ بیتگ اود ءَ سرمچاراں پوج ءِ بند ساچی شرکت ایف ڈبلیو او ءِ کارمندانی سر ءَ وتکاریں سلاھاں چہ اُرش کتگ چریشی ءِ نشانگ آیگ ءَ چہ کارمنداں جانی ءُ مالی تاوان ءِ دیمپانی کنگ کپتگ-

جارکش ءَ گْوشتگ چارمی اُرش سرمچاراں بنڈکی ءَ برجاھیں زورگریں پاکستانی پوج ءِ چیک پوسٹ سر ءَ مزنیں ءُ نوکیں سلاھاں چہ اُرش کتگ چریشی ءِ آسر ءَ زورگریں پوج ءِ یک کارمند یے جاہ پہ جاھی مرتگ ءَ یکے ٹپی بیتگ-

جارکش ءَ گْوشتگ اُرش ءَ پد زورگریں پوج ءَ اے ھند ءَ ھیلی کاپٹر دیم داتگ ءُ وتی مرتگیں ءُ ٹپی کارمند چست کتگ اَنت-

جارکش ءَ گوشتگ کہ بی ایل ایف ءِ اے گھتریں کاروائیاں گل ءِ گھتریں کاروائی ءُ جوانیں جنگی رپکاں چہ ریاست سک نپسیاتی ءُ سسّائی نادُراھیانی آماچ اِنت-

جارکش ءَ گْوشتگ بلوچستان لبریشن فرنٹ اے اُرشانی زمہ واری ءَ منّ اِیت ءُ زورگریں پوج ءِ دراھگ ءَ تاں ریاستی پوج ءُ آئی ءِ شوربندیانی نشانگ کنگ ءِ اِھد کنت-

بلوچستان ءِ دمگ ھُزدار ءِ تھسیل زھری ءَ زورانسری آوار جنی ءِ یک مزنیں وئیلے پاکستانی پوج ءَ دوازدہ مردم آوار جنگ ءَ پد بیگواہ کتگ اَنت کہ اود ءَ اسرمندیں کھول ءَ زھرشانی کنان ءَ جتاجتائیں دمگاں دگ بند کتگ اَنت ءُ بیگواھیں مردمانی زوت یل کنگ لوٹ کتگ-

گوستگیں روچ ءَ بندات بیتگیں زھرشانی ءَ پد زھرشانی کنوکانی زور ءُ گپ دیوان ءَ چہ پنچ مردم یل کنگ بیتگ، بلے سرجمیں بیگواھیں مردمانی یل نہ کنگ ءَ اسرمندیں کھولاں مروچی دوبر زھرشانی بندات کتگ ءُ جتاجتائیں ھندانی سر ءَ دگ بند کتگ اَنت-

ھالانی رِد ءَ بیگواہ کنگ بیتگیں مردماں چہ چار آمیدگس ءَ پیش کتگ اَنت، بلے سے مردم انگت بیگواہ ءَ اِنت آیانی کھول آیانی یل کنائینگ ھاتر ءَ زھرشانی برجاہ ءَ اِنت-

چہ زھری ءَ زورانسری آوار جنی ءِ نشانگ کنگ بیتگیں مردمانی کھول سوراب نزیک ءَ زھرشانی نندانک ءَ نشتگ اَنت ءُ آیانی لوٹ اِنت کہ سرجمیں بیگواھیں مردم زوت یل کنگ بہ بنت-

اسرمندیں کھولانی گوشگ اِنت کہ دانکہ مئے مردم واتر نیا اَنت ، زھرشانی برجاہ بیت-

ھمے وڑ چہ زھری ءَ پاکستانی پوج دست ءَ زورانسری بیگواھی ءِ ھلاپ ءَ بلوچ یکجھتی کمیٹی ءُ دمگی مردمانی نیمگ ءَ چہ روانک کشگ بیتگ، چریشی ءَ زورانسری آوار جنی ایر جنان ءَ بیگواھیں مردماں زوت یل کنگ لوٹ کتگ-

روانک ءَ ھکومت ءُ ریاستی ادارھانی سر ءَ زور دیگ بیتگ کہ آ انسانی ھکانی ھلاپ ورزیاں بند بہ کن اَنت ءُ بیگواھیں مردماں یل بہ کن اَنت-

آیاں گوشتگ کہ بلوچستان ءَ انسانی ھکانی ھلاپ ورزی بلوچستان ءَ زورانسری آوار جنیانی دْرچ انسانی ھکانی ھلاپ ورزیانی درچ جوڑ بیتگ-

زھرشانی کنوکانی گوشگ اِنت کہ اے گامگیج ناں تھنا اسرمندیں کھولانی واستا درد ءُ گم ءِ سبب جوڑ بیگ ءُ اِنت بلکیں دمگ ءَ تُرس ءِ آزمان ھم ودی کنگ ءَ اِنت-

بلوچستان ءِ دمگ کوھلو ءَ پاکستابی پوج ءَ چار مردم زورانسری بیگواہ کتگ انت-

اھوالانی رد ءَ پاکستانی پوج ءَ بالاچ لوھانی وتی بنجل ءَ لوٹارینتگ ءُ زورانسری بیگواہ کتگ-

اھوالانی رد ءَ بالاچ لوھانی ءِ دو چک دو ماہ ءَ پیش پاکستانی پوج ءَ زورانسری بیگواہ کتگ انت- پورسز ءِ واکداراں بالاچ لوھانی دو زھگانی یل دیگ ءَ بنجل ءَ لوٹارینتگ ءُ بیگواہ کتگ-

ھمے وڑ سَے روچ پیش یار خاب جملبانی چہ لوگ ءَ آوار جنگ ءُ بیگواہ کنگ بیتگ ءُ ھمے وڑ سَے روچ پیش کوڈے ء میشداد لوھارانی ءُ جنعہ شاھیجو راہ ءَ گرگ ءُ بیگواہ کنگ بیتگ انت-

بلوچستان ءَ ھمک روچ زورانسری بیگواھیانی وئیل رپورٹ بوگ ءَ انت-

گوستگیں روچاِ ھزدار ءِ دمگ زھری ءَ 12 مردم، ڈیرہ بگٹی ءَ 9 ،ھاران ءَ 2 ءُ نوشکی ءَ 2 زورانسری بیگواہ کنگ بیتگ انت-

زورانسری بیگواھیانی ھلاپ ءَ سوراب ءِ ھند ءَ سی پیک دگ ءِ سر ءَ چہ دو روچاں زھرشابی نندانک برجاہ انت ءُ تربت ءَ ھم زھرشانی درچ برجاہ انت-