بلوچستان ءِ دمگ بولان ءَ مروچی سیمی روچ ءَ پاکستانی پوج ءِ آپریشن برجاہ انت – دمگ ءَ ھیلی کاپٹرانی نندگ ءُ پادایگ برجاہ انت-
دمگی مردمانی رد ءَ بولان ءِ دمگ بارڑی ءُ کش ءُ گوری دمگاں پاکستانی پوج ءِ آپریشن سیمی روچ ءَ برجاہ انت-
آپریشن ءِ بندات دو روچ پیش کنگ بیتگ کہ اود ءَ آپریشن ءَ دزگٹین پوج ءِ را جانی تاوانانی دیمپانی کنگ کپتگ- اُرشاں پوج ءَ سَے کارندھانی مرگ ءِ ھال راست کتگ انت-
آپریشن ءَ گن شپ دگہ ھیلی کاپٹراں ھوار ڈرون کارمرد بوگ ءَ انت-
روکپتی بلوچستان ءَ ایرانی لشکر ءَ سَے مردم لٹ کتگ ءُ برتگ انت ءُ پد ءَ یک ساھتے ءَ پد دو یل داتگ ءُ یکے گون وت برتگ –
آوار جنگ بیتگیں مردمانی پجار علم عزیزی ء گلام رسول جھمنند عزیز آباد، سعید عزیزی ء عبدالرھیم جھمنند گھجن ءُ جاوید کدخدائی مھمد جھمنند بگ جملگی کسرکند ھِ ناماں زانگ بیتگ انت-
اھوالانی رد ءَ ایرانی لشکر ءَ ابید وارنٹ ءَ یک لوگے ءِ سر ءَ بیڑ برتگ ءُ اود ءَ جاڑیگیں سَے مردم لٹ ءُ کُٹ کنگ ءَ پد گون وت برتگ انت-
گرگ بیتگیں مردمانی توک ءَ سعید ءُ جاوید ماں ایرانشھر ءَ یک ساھتے ءَ پد یل دیگ بیتگ اَنت ءُ علم عزیزی گون وت برتگ-
اھوالانی رد ءَ گوست ءَ علم عزیزی ما یوبیورسٹی چھبار ءِ نودربرے بیتگ کہ آ سیاسی بنیاد ءَ ایران ءِ بگیری ءَ اوگام جتگ –
بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ ھشت مارچ دوھزار بیست پنچ روچ ءَ بلوچستان لبریشن فرنٹ ءِ سرمچاراں ھُزدار ءِ دمگ اورناچ شھر بازیں کلاکاں تاں انگیر ءَ کتگ- اے میان ءَ پولیس ءُ لیویز ءِ تھانھانی سر ءَ دستیگ کتگ ءُ سلاھانی برگ ءَ پد دوئیں، پولیس ءُ لیویز تھانہ، مانداشتگ اَنت- سرمچاراں پولیس ءُ لیویز ءِ سے گاڑی ھم ماندوشتگ اَنت- کاروائی ءِ میان ءَ سرمچاراں جوانیں رپکاں چہ پولیس ءُ لیویز کارمند سنگر گرگ ءُ گھگیری ءَ موہ نداتگ اَنت-
جارکش ءَ گْوشتگ کہ بلوچ شھیدانی واھگ آزات بلوچستان ءِ زُرمبشت ءِ پلامرزی ءَ راج ءِ ھمدردی ءُ پلامرزی ءَ پدر کتگ کہ بلوچ راج آجوئی ءِ اے جنگ ءَ وتی سرمچارانی گوم ءَ اوشتاتگ اَنت-
جارکش ءَ گوشتگ کہ بلوچستان لبریشن فرنٹ اورناچ اُرش ءَ پولیس ءُ لیویز تھانھانی سر ءَ ساڑی ئیں سرجمیں پوجی سامانانی دستیگ کنگ ءُ اے دوئیں تھانہ ءُ آیانی گاڑیاں ماندارگ ءِ زمہ واری ءَ منّ ایں ءُ چہ رسانکدر ءَ سرجمیں بلوچستان ءِ وتی راج ءَ کڈن کن ایں کہ سرمچارانی نیمگ ءَ راھانی بندگ ءُ انگیر کنگ وھد ءَ وتی ءُ سرمچارانی پھازگ ءِ ھاتر ءَ سرمچارانی جوانیں وڑے ءَ ھمرھداری ءَ بہ کن اِت-
جارکش ءَ گْوشتگ کہ بلوچستان ءِ وتواجھی ءَ تاں زورگریں ریاست پاکستان ءِ پوج، دگہ سیکورٹی فورسز ءُ پُلپانچیں پروجیکٹانی ھلاپ ءَ اُرش برجاہ بنت-
پنجگور ءَ سلاہ بندین مردمانی تیرگواری ءَ سَے مردم بیران –
گیشین اھوالانی رد ءَ پنجگور ءِ کوچگی دمگ کاٹاگری ءَ سلاہ بندیں مردمانی تیرگواری ءَ ھجام ءِ دکان ءَ کار کنوکیں سَے ھجام بیران بیتگ انت-
بیران بیتگیں مردمانی پجار عبدالستار ء بجار،زبیر ء بجار ءُ مھمد زمان ءِ ناماں زانگ بیتگ انت-
دمگی مردمانی رد ءَ اے مردم دری جھمنند بیتگ انت کہ آیانی سیادی سندھ ءِ دمگ میرپور ھاس ءَ انت-
مستونگ ءِ دمگ کردگاپ ءَ زھرشانی نندانک برجاہ انت، زورانسری بیگواھیں مردمانی کھولاں نُھ روچ سرجم بیتگ- مروچی بلوچ یکجھتی کمیٹی ءِ رھشون ڈاکٹر ماہ رنگ بلوچ ءُ دگہ بنجاھی باسکاں بھر زرتگ-
ھمے وھد ءَ آئی ءَ گوشتگ کہ زورانسری بیگواھیانی ھلاپ ءَ سرجمیں راج ءَ یکجاہ بیگ ءُ توار چِست کنگ لوٹ ایت، ریاست زورانسری بیگوھیانی پژدر ءَ بلوچاں بے توار کنگ لوٹ ایت اے ممکن نہ انت- مروچی بلوچ ءِ پدریچ ءِ سوال انت، زورانسری بیگواھیں مردمانی بھادریں مات ءُ گوھار زوراک ءِ دیم ءَ اوشتاتگ انت-
کھول ءَ گوشتگ چہ شال ءُ تپتان ءَ روکیں دگ گوستگیں نَھ روچاں بند انت- اے نُھیں روچاں مارا بس تپلی گلایگ بیتگ انت ءُ انتزامیہ سنجیدگی ءِ درشان ءَ کنگ ءَ نہ انت ما پیسلہ کتگ وتی نندانک ءَ گیش ترند کن ایں-
جیڑگ ءِ کِساس
نبشتہ کار: شاھد اھمد
دی بلوچستان پوسٹ
انوں من یک کسانیں ءُ تنکیں کوٹیُکّکے ءِ تَہ ءَ تَھنا ایوک ءَ دیم کبلہ ءَ کُتگ ءُ نشتگ آں ءُ ھمے جیڑگ ءَ آں۔ کہ راجے چوں مھکم بوت کنت؟، من وت ءَ وت جُست کنگ ءُ مارگ ءَ اِت آں۔
اے ساھت پمن گُش ئے جْوانیں موہ ءُ وھدے اَت کہ بہ جیڑ آں ءُ ھچ تُرس نیست، بلے توار منی گوشاں میزان میزان ءَ پیداک اِت اَنت، الم بے وسی ھمے چیز اِنت تو ستر جُھد ءُ کوشست بکن بلے تو تَھنا ئے۔ تَھنائی تئی زند ءِ گُڈی اُمیت اِنت کہ ترا وتی بے وسی ءِ چَھر ءُ شُبینگ ءَ ھر نیمگ ءَ پیشدار اِیت۔
وھدے کہ من جیڑگ بنا کناں الم ھمے ساھت ءَ اناگہ یک تُرسے چہ جبین ءَ ودی بیت، بگند ئے اے تُرس ھیالی یے بہ بیت بلے ھمے چیز منی دنیا ءَ بدل کنت۔ ھمے مارگ ءَ اِت آں کہ کسے منی کش ءَ نشتگ ءُ سُر ءُ پُر کنگ ءَ انت۔ یک برے منی ھیال پروش اِیت، وس کناں وت ءَ بدار آں، بلے ناشریں چم ءَ منی سر ءَ اُرش کُت ءُ گڑ ءُ منج ءِ زِر ءَ دور ئِے دات۔
اے چونیں دنیا ءُ نوکیں جیڑگے کہ دْرپش اِت۔ بندات ءَ من ءَ وتی آدتانی سر ءَ بَد اَتک، نوک نوک ءَ مجگ ھم گڑ ءُ منجانی تہ ءَ کپتگ اَت، سر ئِے پر بوگ ءَ نہ اَت کہ من وتی زند ءَ چوں بہ گَلا آں؟ چموداں کہ نیلیں زر ءَ کہ کپتگ اِت آں ھمود ءَ منی زند ءَ آسر کُتگ اَت بلے تو ستر جُھد ءُ کوشست بکن ئے، تو تھنا اِت ئے۔ منی مھر بازیں اُرشانی تہ ءَ مانگیشّ اِتگ اَت۔ وھد ءُ پاس بدل بوت انت، جاگہ، ندارگ، ھیال درست چہ من پچگرگ بوت انت، بس منی ایُکی پشت کپتگ اَت، چہ من درست جتا بوت انت، ھما کہ من کسانی ءَ اود ءَ لَیب کُتگ اَت، ءُ منی مھکمیں دوارجا چہ من گستا بوت انت، منی ھیالانی بُنزہ اود ءَ کِشتگ اِت انت، منی پس ءُ گوک شوانگی، تلاوگ چمود ءَ چِہ گوں آپ ءَ زندگی کُتگ اَت،” او!منی وَا ءِے وتن ھُشکیں دار“ مُجّتی بان ءِ دپ سازند(کاپَر) ءِ چیر ءَ کلّیگ ءُ کُپتّگ مشکیں ماھگ منی ھیالانی شررنگیاں سھرا کنگ ءَ اِت اَنت۔ مومنے ءِ جَھسری شموشت اَنت! زوت زوت ءَ وتی شوھاز ءَ در کپت آں۔بازیں انچیں اَیباں منی سر ءَ رھشونی کنگ ءِ کوشست کُتگ اَت کہ من ءَ وت وتی سر ءَ وت پشومانی ءِ گمان بوگ ءَ اَت، انچوش گُش اَنت کہ ”ھدا ءِ لَٹّ ءَ آواز مان نیست“ من جُھد کُت، وتی آشنا بوگ ءَ پد بے کساس ءِ دریا ءَ اوژناگ کنگ بندات کُت۔بگند ئے آ بس وتی دنیا ءِ تہ ءَ راست اَت، آ اوں رد بوت نہ کنت کہ من وتی نِز ءَ بگند آن ءُ بگوشاں۔ چو وَ بدنیتی یے بیت۔
نہ زاناں من ءَ چوشیں چیزانی گم چونی ءَ پِر بوت بلے آ الم یک چیزے ءَ من ءَ وتی تہ ءَ الکاپی ءَ گندگ ءَ اَت۔
بلے اے ساھت ءَ انوں من گِسر کپتگاں، وتی جند ءِ مردمے نہ آں انگت ءَ وت ءَ شوھاز ءَ آں کہ چہ کجا مانگیشّ اِتگ آں۔
آ من ءَ دلجم کنگ ءِ ھاتر ءَ اوشتارینگ ءَ اَت آ بس من ءَ وتی ساھگ ءِ تہ ءَ مان کنگ لوٹگ ءَ اَت۔ اے انچیں مارشتے کہ بگند ئے دو بر پیداک مہ بیت بلے من ءَ وتی تہ ءَ آشنا کنگ ءِ جُھد ءُ کوشست ءَ اَت۔ مھر ءِ مونِس درد باز انت ءُ من نہ لوٹاں کہ تئی وڑیں شررنگیں انسان پہ منئیگی بے وس بہ بیت، چوشیں وشیں زند ءِ لزتاں زِبھر بہ بیت۔ بے کساسیں دریا ءِ جُھلانکی ءَ وت ءَ دراجیں مُدّتے ءَ وت ءَ ھمدپ بکنت۔ من بِھ وتی گون ءَ گپ کنگ یل نہ دات، اناگہ من چہ آئی ءِ دستاں لگش آں وتی جاگہ کایاں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
بلوچستان ءِ دمگ مستونگ کردگاپ ءِ ھند ءَ چہ گوستگیں ھشت روچاں ھمے وڑ پنجگور ءَ گوستگین سِی ءُ شش ساھتانی نزیک ءَ زورانسری بیگواھیانی ھلاپ ءَ زھرشانی برجاہ انت-
مستونگ ءِ ھند کردگاپ ءَ زھرشانی کنوکاں گوستگیں روچ ءَ زھرشانی کنوکاں ریل ءِ روانی سروس داشتگ ءُ مھتل کتگ-
کردگاپ ءِ ھند ءَ چہ گوستگیں ھشت روچاں زھرشانی برجاہ انت کہ ڈسٹرکٹ انتزامیہ ءِ باسک اے ڈی سی مستونگ منان ترین ءِ سروکی ءَ کھولاں گوں گپ ءُ تران کنگ ءَ زھرشانی نندانک جاہ ءَ سر بیتگ-
کھولاں وتی دراھیں بیگواھیں مردم کہ آ پاکستانی پوج ءُ چیریں ادارھاں آوار جتگ ءُ بیگواہ کتگ انت آیانی دیم ءَ آرگ ءُ بیگواھیں مردماں دروگیں میڑانی جنگ ءُ کشگ ءَ بند کنگ ءِ لوٹ کتگ-
کھول ءَ ڈسٹرکٹ انتزامیہ ءَ گپ ءُ تران بے سوب بیتگ ءُ زھرشانی نندانک ءَ دہ بیگواھیں مردمانی یل دیگ ءَ داں نندانک ءِ برجاہ کنگ ءِ پیسلہ کتگ-
زھرشانی کنوکاں ریاست ءِ واکدارانی گچینی مردماں زھرشانی نندانک جاہ ءَ آرگ ءِ لوٹ کتگ ءُ چریشی ءَ انتزامیہ ءِ واکداراں آرگ ءِ سدکی داتگ-
پنجگور 14 چوک سرادُک ءِ ھند ءَ وشبود ءِ جھمنند عاقل جلیل ءِ یل کنائینگ ءِ ھاتر ءَ زھرشانی برجاہ انت- سدانی کچ ءَ مساپر پس اتگ انت ءُ گاڑیانی دراجیں لین لگ اتگ اَنت-
زھرشانی نندانک ءَ کھول ءَ رسانکدر ءَ گوں گپ کنان ءَ گوشتگ عاقل ءِ یل کنگ ءَ داں مئے زھرشانی نندانک برجاہ بیت اِنت-
شال کراچی ءَ روکیں مساپر ءُ بس ڈرائیوراں رمزان ءِ ماہ ءَ دگ ءِ بندش ءِ سبب ءَ گوشتگ کہ سرادُک ءِ ھند ءَ دگ ءِ بندش ءِ سبب ءَ سکیں مشکلانی دیمپان انت ءُ انتزامیہ ءَ زھرشانی کنوکاں گپ ءُ تران کنگ لوٹ ایت-
چیئرمین ءِ سُتکگیں مند
نبشتہ کار : دُرّین بلوچ
دی بلوچستان پوسٹ
چیئرمین ءِ مند آشوب ءِ مزنیں چیدگے بیتگ، بلے مروچاں سُتکگیں بوه ءَ کنت. آ آشوب تُرس ءُ بیم ءَ وتی پادانی چیر ءَ لگتمال کُتگ ، کسے پہ وتی لاپ ءِ تُرس ءَ ءُ کسے جان ءِ تُرس ءَ دپ بند اِنت. اگاں مروچی چیئرمین زندگ بوتیں گُڑا اے آشوب چو پادمال بوگ ءَ نہ اِشتگ اَت لوگ پہ لوگ بوتگ اَت مھلوک تِچکیں راه ءَ آؤرتگ اَت، تُرس ءِ بدیں سیمسر ھلاس ئِے کُتگ اِت اَنت، درستیں کوریں چمّ ءُ کرّیں گوش پد ءَ پچ ئِے کُتگ اِت اَنت-
چیئرمین ءِ روگ ءَ چہ پد مند ءِ کُنڈ کُنڈ ءَ تُرس ءِ بوه چو نود ءُ نمب ءَ شلان اِنت .اُستاداں بِگر داں پوریاگِراں در ءَ ھرکس انچیں تُرسے ءِ تہ ءَ مانگیشِّینَگ بوتگ گُش ئے زاناں زورگِر ءَ تُپنگ آئی ءِ سر ءَ داشتگ ءُ ھاموش ئِے کُتگ-
من ءَ ڈاکٹر شلی ءِ گپ گیر کاینت کہ چیئرمین ءِ مند پیسرگیں مند نہ اِنت کہ آشوب ءِ بازار بیتگ مروچاں وکشیگاں مند ءِ مھلوک اَنچو ھاموش کُتگ کہ مھلوک ءِ دپ بند ءُ گوش کرّ اَنت. کسے اگاں زورانسری بیگواہ کنگ بہ بیت ھم کسی توار چست نہ بیت. نہ گُش ئے زاناں زندگیں مردُمے گار ءُ بیگواه کنگ بوتگ ، یکے ءِ لوگ دپ ءِ پس گار بہ بیت آ لوگ پہ لوگ بیت پہ پس ءِ شوھاز ءَ داں اوپار ئِے ھست آئی ءِ شوھاز ءَ یل نہ کنت اد ءَ مردُم رُمب رُمب ءَ گار ءُ بیگواه کنگ بنت بلے کسے FIR ءِ ھم نہ کنت-
دومی نیمگ ءَ مند ءِ اسکولانی اُستاد ھما 1950 ءِ دھک ءَ زندگی کنگ ءَ اَنت وتی نودربراں اَنچیں دابے ءَ وانینگ ءَ اَنت کہ نودربر کسانیں جُستے ھم چست کُت نہ کن اَنت اِے ھم ریاست ءِ اَڈ داتگیں یک مزنیں پالیسی ءِ کہ اَنچو نودربر colonized کنگ به بنت کہ آوانی مجگ ءِ تہ ءَ جست کنگ ءِ اِزم پچ گِرگ بہ بیت۔ اے پالیسی ھمُک گُلامیں راجانی سر ءَ کنگ بیتگ ءُ مارا سرپد بوگی اِنت کہ ریاست ءِ مزنیں ٹارگِٹ ءِ وانگجاہ اَنت کہ وانگجاه آیوکیں وھد ءِ واستا مردُم ودی کنت ءُ colonizer اَنچیں مردُم ودی کنگ لوٹ اِیت کہ آ ایردستی ءِ بدیں نوبتانی درگت ءَ سرپد مہ بنت ءُ ایردستی ءِ تہ ءَ زندگی کنگ ءَ وتی بھت بہ پھم اَنت ءُ دپ بند بہ بنت ۔ بلے مارا سرپد بوگی اِنت کہ آشوب ءِ تہ ءَ اُستادانی مزنیں role ءِ ھست . آ وتی وانگجاھاں نودربراں اَنچیں دابے ءَ بہ وانین اَنت کہ نودربر بہ پھم اَنت کہ آ colonialism ءِ آماچ اَنت آوانی سر ءَ دگہ دریں راجے ھُکمرانی کنگ اِنت ءُ آوانی ھکاں جَنگ ءَ اِنت. هیر اپسوز ءِ گپ ایش اِنت کہ مروچگیں اُستاد اُستاد شھید سبا دشتیاری ءِ شھزانت ءِ منّوک نہ اَنت اگاں مروچگیں اے اُستاداں استاد شھید سبا ءِ پلسپہ بہ زُرتیں ءُ نودربر بہ وانیتین اَنت گڑا آ روچ دور نہ اَنت کہ بلوچ ءِ ھمُک لوگ ءَ کندیل بل اِیت-
راجدپتر اِے چیز ءِ ھم شاھِد اِنت کہ ھمُک ایردستیں راجاں ایردست کنوکیں دُراھیں پالیسی پُروشتگ اَنت ءُ مُھکمی ءَ ایردست ءِ دیم ءَ اوشتاتگ اَنت. اگاں ویتنام ءِ مسال ءَ بُزوراں گڑا ویتنام ءِ جنگ یک powerful مُلکے ءَ گون بوتگ بلے اَنگت آئی ءَ پُشت کِنزگ مکن کُتگ ءُ مروچی ویتنام ءَ وت ءَ رکّینت چہ فرانس ءِ پیمیں پاورپُلیں مُلکے ءِ دست ءَ ءُ مروچی وتی سر زمین ءَ پد ءَ وت واجھی کنگ اِنت. مارا آوانی ھمے مُھکم بوگ ءِ درس زورگی اِنت. واجکار ءَ اے موه دیگی نہ اِنت کہ ما تُرس ءِ آماچ ایں تُرس ءُ بِیمّ لگوریں راجانی تہ ءَ بیت ءُ بلوچ ءِ گْوست ءَ بگر داں ھستیں وھد ءَ اے پیش داشتگ کہ آئی ءَ تُرس داشت نہ کنت آئی ءَ زورانسری بیگواہ کنگ ءُ بمب ٹوپ تُرّسینت نہ کن اَنت ۔ مئے مھلوک باید اِنت واجکاراں اے موه ءَ مدے اَنت کہ آ مارا گیشتِر پُشت ءَ پَشت بہ گیج اَنت آوانی پالیسی ھمیش اِنت کہ برے وانینگ ءِ نام ءُ برے کار دیگ ءِ نام ءَ مارا بھا زورگ لوٹ اَنت ۔ مئے مند ءِ مھلوک ءِ ھاموش بوگ ءِ مستریں سَوب ھمیش اِنت کہ آواں شریں دابے ءَ کار ءُ بار کنگ ءَ کِلّگ بوگ ءَ اِنت ءُ آ satisfactory ءِ آماچ بوگ ءَ اَنت .پرانس ءِ نامداریں آشوبی نبشتکار فرانز پینن وتی کتاب “سامراج کی موت”ءِ تہ ءَ ساپ نبشتہ کنت کہ آ( colonizer)ترا بھا زورگ ءِ ھاتر ءَ وڑ وڑیں چانس دنت لھتیں بر ءَ تئی کِرد ءِ توسیپ ءَ کنت ءُ ترا بھا زور اِیت ءُ لھتیں بر ءَ ترا وتی گوماکار کنگ ءِ شرّیں کیمتے پیش کنت ءُ بھا زور اِیت. مئے مھلوک چئیرمین ءِ روگ ءَ پد یک comfort zone ءِ تہ ءَ زندگی کنگ ءَ اِنت ءُ ارزانی ءَ واجکارانی واست راہ ءَ پچ کنگ ءَ اِنت کہ نوکیں نسل ءَ ھمے داب ءَ کارمرز بہ کن اَنت۔
Marie von ebnerگْوش اِیت کہ
“Happy slaves are the worst enemies of freedom”,
شات ءُ گَلیں گُلام آزادی ءِ مستریں دژمن اَنت .گُلامی ءِ تہ ءَ گَل بوگ گوں ھما ماتاں نا اِنساپی اِنت کہ آوانی شیرمزاریں بچّ شھید کنگ بیتگ اَنت. مارا چئیرمین ءِ داتگیں دیمونی ءُ آئی رِتکگیں ھون ءُ ھما شھید بوتگیں بچانی داتگیں دیمونی چوں دیم ءَ نیا اَنت ؟ کہ آواں سر داتگ بلے زمین نہ داتگ ءُ وتارا گوں وتی دُراھیں واھگاں ندر کُتگ تھنا ھمے گُلامانی واستا کہ باندا وشیں زندے بہ گوازین اَنت مروچی اے گُلام” خوابے خرگوش” ءِ آماچ اَنت . بژن ءِ گپ ایش اِنت کہ اے گَلیں ٹولی ھمے لوٹ اِیت کہ نوکیں نسل ھمے satisfactory ءِ آماچ بہ بیت بلے سرجمیں لوگ ءِ بُنگِرگ ءَ ساری مارا آس کُشگی اِنت. مند ءِ نوکیں نسل باید اِنت چئیرمین ءِ دیستگیں وابانی سرجم کنگ ءِ واستا وت ءَ پُشت ءَ پَشت مہ گیج اَنت ءُ استاد شھید سبا دشتیاری پیمیں intellectual ءِ شھزانت ءَ وتیگ بہ کن اَنت ءُ وتارا گیشتِر تُرس ءُ بِیمّ ءِ تہ ءَ گار مہ کن اَنت-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
بلوچ یکجھتی کمیٹی ءِ رھشون ڈاکٹر ماہ رنگ بلوچ ءَ زالبولانی میان استمانی روچ ءِ درگت ءَ گوشتگ مروچی جھان ءِ ھما درسیں زالبولانی گوم ءَ ھمکوپگاں کہ زوراکی ءِ بگیری ءَ گھگیری کنگ ءَ انت ءُ انساپ، پجار ءُ آجوئی ءِ ھاتر ءَ جھد کنگ ءَ انت –
آئی ءَ گوشتگ کہ بلوچستان ءَ بگر جھان ءِ کُنڈ کُنڈ ءَ مئے توار ءَ ایرموش ءُ مئے جھد نادلگوش کنگ نہ بیت – بلوچ زالبول زوراکیانی بگیری ءَ مدامی اوشت ایت – زورانسری آوار جنگ بوتگیں مردمانی دلیریں مات، گھار، زھگ ءُ لوگبانک زورانسری آوار جنی، بندیگانی کوش، پہ شرپ زند گوازینگے بگیری ءِ جنگ ءَ بید ترس ءَ رھشونی کنگ ءَ انت – مناں پہ دل ستک باور ایں کہ بلوچ زالبول یک ناں یک روچ ءِ زورانسری آوار جنی ءِ ھلاس کنگ ءَ کمک کن انت تاں انساپ ءِ رسگ ءَ پشت ءَ نہ کنز انت –
آئی ءَ گوشتگ کہ بیا ات اے روچ ءَ وتی مجگ ءَ دار ایں کہ ھشت مارچ بس یک روچ ئے نہ ایں، اے جھد ءِ روچ ایں –
آئی ءَ گوشتگ کہ مناں باور ایں بلوچ زالبول ھکانی گرگ ءَ سوبمند بنت – ما سرجمیں جھان ءِ مردم دوست ءُ ھک ءُ انساپ ءِ منوگراں لوٹ کناں کہ آ زلم ءُ زوراکیانی بگیری ءَ آیانی جنگ ءَ ھمکوپگی ءَ یکجاہ بہ بنت –
آئی ءَگوشتگ کہ من درسیں زالبولاں دل جھلانکی ءَ دروت ندر کناں ھاسکر دلیر ءُ نہ تُرسیں بلوچ زالبولاں کہ آیانی ھمت ءُ توکل ءَآجوئی ءِ راہ رژناہ انت –
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ بی ایل ایف سرمچاراں نوشکی ءُ پنجگور ءَ دو جتاجتائیں کاروائیاں پولیس بمب اُرش ءَ نشانگ کتگ ءُ زورگریں پاکستانی پوج آسراتی واستا ڈیم جوڑ کنوکیں شرکت ءِ مشینری مانداشتگ اَنت-
آئی ءَ گْوشتگ کہ ھپت مارچ شپ ھشت نزیک ءَ بی ایل ایف ءِ سرمچاراں نوشکی شھر ءَ مسلم کمرشل بینک نزیک ءَ یک پولیس پٹ ءُ پولی ءَ اوشتوکیں گاڑی دستی بمب اُرش ءَ نشانگ کتگ، چریشی ءِ آسر ءَ یک پولیس کارمندے یے ٹپی بیتگ ءُ پولیس گاڑی کو تاوان رس اِتگ-
جارکش ءَ گْوشتگ دگہ یک اُرشے ءَ، شش مارچ ءَ پنجگور ءِ دمگ تسپ ءَ، سرمچاراں زورگریں پوج ءِ آسراتی ءِ واستا ڈیم جوڑ کنوکیں شرکت ءِ مشینری مانداشتگ اَنت-
جارکش ءَ گْوشتگ کہ بلوچستان لبریشن فرنٹ اے اُرشانی زمہ واری ءَ منّ اِیت ءُ پولیس ءَ کڈن کن ایں کہ آ زورگریں پاکستانی پوج ءُ چیریں ادارھانی چیردستی ءَ بلوچ زرمبشت ءِ ھلاپیں پُرکاریانی بھر مہ بنت، اگاں ناں آ وتی تاوانانی زمہ وار وت بنت-
