TBP Balochi

بلوچستان ءِ دمگ ھُزدار ءَ مزنیں کچے ءَ سلاہ بندیں مردماں پولیس تھانہ سر ءَ اُرش کتگ-

گیشیں ھالانی رِد ءَ اورناچ پولیس تھانہ سر ءَ سلاہ بندیں مردماں اُرش کتگ سلاہ ءُ دگہ سامان دستیگ کتگ ءُ پولیس تھانہ مانداشتگ-

اِھوالکار رِد ءَ مزنیں کچے ءَ سلاہ بندیں مردماں دمگ انگیر ءَ کتگ پولیس تھانہ سر ءَ دستیگ کنگ ءَ سوبمند بیتگ اَنت-

ھالانی رِد ءَ اے میان ءَ اُرشکاراں راج ءَ گوں تران ھم کتگ-

بلے جانی تاوان ھال سر نہ بیتگ نانکہ اے درگت ءَ واکدار ءِ درشان دیم ءَ اَتکگ-

بلوچ راجی آجوئی ءِ سنگر براس ءِ جارکش بلوچ خان ءَ یک درشانے ءَ گوشتگ کہ سرمچاراں کوھلو ءِ دمگ بارکھان ءَ زوراکی ءِ نیمون ءَ پیشگامی کنوکیں پاکستانی پوج ءِ کارندی ٹریپ کتگ ءُ اُرش کتگ انت- چریشی ءَ سیزدہ کارندہ مرتگ ءُ ھشت زدگ بیتگ انت – سرمچاراں پوج ءِ گون ءَ جنگ ءَ دیم پہ دیمی ءَ بھادری ءِ درشان دیان ءَ پوج ءَ را سک ءَ جانی تاوانانانی دیمپانی بیتگ- ھمے وھد ءَ براس ءِ سرمچار سنگت غلام رسول مری پنام ءِ مُنشی عیدو شھیدی ءِ گچینی ءِ جاہ ءَ شتگ-

آئی ءُ گوشتگ بارکھان ءِ ھند گلو شمچودی ءَ 23 فروری 2025 ءَ زورگریں پاکستانی پوج ءِ پرپٹ، گاڑیانی کاروان ءُ پند ءَ روکیں کارندہ زوراکی ءِ نیمون ءَ پیشگامی کنگ ءَ بیتگ انت- کہ اود ءَ پیش ءَ سنگر گپتگیں سرمچاراں زورگریں پوج جتا جتائیں جاھاں اُرشانی بندات کتگ- اے اُرشاں زورگریں پوج ءِ پنچ کارندہ جہ پہ جاہ ءَ مرتگ انت ءُ دگہ گیش جانی تاوان ورگ ءَ پد دشمنیں پوج پشتکنز اتگ-

جارکش ءَ گوشتگ براس ءِ سرمچاراں شوربندی تک ءَ وتی لس بنجلے ءَ دشمن ءِ نگاھانی دیم ءَ کتگ- زوراکی ءِ دومی روچ ءَ زورگرین پوج ٹریپ بیتگ ءُ ھمے جاہ ءَ سر بیتگ، اود ءَ براس ءِ سرمچاراں دو نیمگاں ترندیں اُرشانی درچ بندات کتگ – اے اُرشاں دگہ ھشت کارندہ مرتگ انت ءُ کم چہ کم ھشت زدگ بیتگ انت- زورگریں پاکستانی پوج پروشی ءِ آماچ بیتگ ءُ وتی پرپٹے یل داتگ ءُ تتکگ-

آئی ءَ گوشتگ بارکھان ءِ زوراکی ءَ سرمچارانی اُرش ءِ آسر ءَ جانی تاوانانی چست کنگ ءَ پد زورگریں پاکستانی پوج ءَ لس میتگ نشانگ کتگ انت- دشمنیں لشکر ءَ مھلوک ءِ لوگانی سر ءَ بیڑ بران ءَ مردمانی لوگ سوتکگ ءُ ھشت مردم دزگیر کتگ ءُ بیگواہ کتگ انت ءُ دمگ ءَ ورگ ءِ بھر مندی بند کتگ-

براس ءِ جارکش ءَ گوشتگ پاکستانی پوج ءِ گون ءَ دیم پہ دیمی جنگ ےَ بلوچ راجی آجوئی سنگر ( براس) ءِ سرمچار گلام رسول مری پنام ءِ منشی عیدو شھید بیتگ- آئی ءِ کل ءُ کسارات براس ءِ سرمچاراں گوں شرپے ءَ گلزمین ءِ میار مرتگ-

بلوچ خان ءَ گوشتگ براس ءِ ھمسنتیں گل بلوچ لبریشن آرمی ءِ ھمراہ سنگت گلام رسول پنام ءِ منشی عیدو ء فیض مھمد مری ءِ بنکی سیادی چمالنگ ءَ بیتگ- تو بی ایل اے مجید بریگیڈ ءِ بنداتی پدائی شھید باز خان مری پنام ءِ درویش بلوچ ءِ برات بوتگ ئے – شھید گلام رسول مری گوستگیں پانزدہ سالاں بلوچ راجی آجوئی ءِ جد ءُ جھد ءَ گوں بندوک بیتگ- آئی ءَ بولان، کوھلو، کاھان ءُ دگہ جاھاں وتی کرد پیلو کتگ انت-

شھید سنگت گلام رسول مری پنام ءِ منشی عیدو وتی جنگی ھنرانی سبب ءَ بلوچ لبریشن آرمی ءِ گچینی ٹولی اسپیشل ٹیکٹیکل آپریشنز اسکواڈ ( ایس ٹی او ایس) ءِ باسکے ءِ دروشم ءَ راجی گلامی ءِ ھلاپ ءَ پرکار بیتگ ئے – آئی ءَ بازیں گچینی آپریشنزاں دشمن سرین پروش کتگ-

بلوچ راجی آئی ءِ سنگر شھید گلام رسول بلوچ ءِ گچینی ءِ شھیدی ءَ داد دنت ءُ کول کنت کہ شھیدیں ھمراھانی مشن ھر وڑ ءَ وتی منزل ءَ رسینگ بیت اِنت- آیانی آجوئیں بلوچستان ءِ واب سرجم کنگ بیت اِنت-

جارکش ءَ گوشتگ براس ءِ سرمچاراں یک دگہ کاروائی ءِ زورگریں پاکستانی پوج ءِ مڈی سر کنوکیں یک گاڑی یے گپتگ – ھمے وڑ یک ٹرک ءُ چار پرپٹ مانداشتگ انت-

جارکش ءَ گوشتگ بلوچ راجی آجوئی سنگر ( براس) ءَ بارکھان ءُ آئی ءِ ھواریں دمگاں پرکاریں لیویز پورس ءَ تچک کن ایں آ زورگریں پاکستانی پوج ءُ چیریں ادارھانی گوشگ ءَ بلوچ راجی آجوئی ءِ زرمبشت ءِ دیم ءَ اڑانک مہ بنت اِنت – دمگی مردمانی سبب ءَ اے پورسز ءَ بلوچ سرمچارانی نیمگ ءَ ریایت کنگ بیت اِنت- اگاں آ وتی بلوچ کش راہ ءَ گستا نہ بنت اِنت گڑا آ ھم زورگریں پوج ءِ پیم ءَ نشانگ بیت انت ءُ وتی جانی ءُ مالی تاوانانی زمہ وار وت بہ بنت انت- دمگی میر ءُ سردار وتی مردماں اے ڈولیں کاراں بہ دار انت-

آئی ءَ گوشتگ بلوچ راجی آجوئی سنگر ( براس) اے کول ءَ کنت کہ چہ بلوچ ڈیھ ءَ دشمنین پوج ءِ سرجمیں درایگ ءَ مئے کاروائی برجاہ بنت اِنت-

چہ پنجگور ءَ عاقل بلوچ ءِ زورانسری بیگواھی ءِ ھلاپ ءَ سی پیک شھدگ بند ءُ زھرشانی نندانک دیگ بیتگ ءُ کھول ءَ لوٹ کتگ کہ عاقل بلوچ سلامتی ءَ یل کنگ بہ بیت اِنت-

زانگ بہ بیت ھمے ھپتگ ءَ بلوچستان ءِ دمگ سوراب، کردگاپ، کلات، ھب، شال ءُ تربت ءَ زورانسری بیگواھیں مردمانی کھولاں گچینی شھدگ بند کتگ بیتگ انت ءُ مروچی پنجگور ءَ زھرشانی برجاہ انت-

یک ھپتگے ءِ تہ ءَ چہ بلوچستان ءَ ھپتاد ءَ گیش زورانسری بیگواھیانی اھوال رپورٹ بیتگ انت-

اود ءَ چہ کلات ءَ بیگواہ کنگ بیتگیں مردمانی کھولاں انتزامیہ ءِ گون ءَ سوبمندین گپ ءُ تران ءَ پد زھرشانی نندانہ ھلاس بیتگ ءُ شال ءُ کراچی ءِ بنجاھی شھدگ ءِ سر ءَ ھستیں زھرشانی چار روچ ءَ پد دگ روانی ءِ واستا پچ بیتگ-

زھرشانی کنوکاں گوشتگ کلات ءَ گوستگیں چار روچاں برجاھیں زھرشانی ءَ اشفاق بلوچ ءَ ھوار دگہ بیگواھیں مردمانی کھول ءُ دمگدار ءِ میان ءَ گپ ءُ تران سوبمند بیتگ – ھمے درچ ءُ کھول ءُ بلوچ یکجھتی کمیٹی ءِ نیمگ ءَ شال ءُ مستونگ ءَ پیہ جام ھرتال ءِ مروچی ھپتگ ءِ روچ ءَ زھرشانی جتگ بیتگ ءُ پد ءَ آسر کتگ-

آیاں گوشتگ اگاں انتزامیہ ءَ وتی گپ ءُ کرار سرجم نہ کت انت گڑا سانمندین کھول ءُ بلوچ یکجھتی کمیٹی دوبر زھرشانی ءِ راہ ءَ گچین کنت –

ھمے وڑ مستونگ ءِ دمگ کردگاپ ءَ بنجاھی شھدگ ءِ سر ءَ یکشل ءَ زھرشانی برجاہ انت ءُ گوستگیں شپ ءَ کھول ءُ انتزامیہ ءِ گپ بے سوب بیتگ-

بلوچستان ءِ بنجاھی شھر شال ءَ گوستگیں شپ ءَ پورسز ءَ یک لوگے ءَ بیڑ برتگ ءُ ورنایے آوار جتگ ءُ برتگ-

اھوالانی رد ءَ کلی شاھنواز سریاب شال ءَ گوستگیں شپ ءِ ساھت دوازد ءُ چِل دمان ءَ پورسز ءَ یک لوگے ءِ سر ءَ بیڑ برتگ ءُ دادو بلوچ ءِ عنایت سمالانی بلوچ چہ جند ءِ لوگ ءَ آوار جتگ ءُ برتگ-

آوارجنی ءِ اھوال ءِ دیان ءَ بلوچ ایکٹویسٹ ھوران بلوچ ءَ گوشتگ منی ناکو ءِ گِس ءَ سی ٹی ڈی ءُ دگہ لس پوشاکی کارندھاں بیڑ برتگ ءُ اود ءَ منی ناکو زھگ آوار جتگ ءُ برتگ –

زانگ بہ بیت شال ءَ گوستگیں سَے روچاں بلوچستان سرکار ءِ نیمگ ءَ الرٹ جاری کنگ بیتگ-

الرٹ ءَ سرکار ءَ گوشتگ بلوچ سلاہ بندانی ترس ءِ گمان ءَ بیتگ کہ چریشی ءَ شھر ءَ بازیں جاھاں ناکہ بندی ءُ لوگانی پٹ ءُ پول بیتگ انت-

گوستگیں سَے روچاں شھر ءِ کوھی دمگاں ھیلی کاپٹر ھم برز ءَ بال بیتگ اَنت-

بلوچستان ءِ دمگ چہ کیچ ءُ پنجگور ءَ دو مردم زورانسری بیگواہ وھدے کہ چہ ڈیرہ بگٹی ءَ سے مردم آجو بیتگ اَنت-

گیشیں ھالانی رِد ءَ عاقل جلیل بلوچ ھپت پروری ءَ پنجگور ءِ دمگ چہ وشبود ءَ پاکستانی پوج ءَ زورانسری آوار جتگ ءُ بیگواہ کتگ وھدے کہ پنچ مارچ ءَ کیچ ءِ دمگ چہ دشت ملائی نگور زریں بُگ وسیم ھمزہ پاکستانی پوج ءَ آوار جتگ ءُ بیگواہ کتگ-

ھمے وڑ چہ ڈیرہ بگٹی ءَ پنچ جنوری ءَ ایف سی ءِ دست ءَ سوئی شھر ءَ زورانسری آوار جنی ءِ نشانگ کنگ بیتگیں اشرف ء بھورا خان بگٹی ءُ پتو خان ء سراج بگٹی گوستگیں روچاں آجو بیتگ ءُ وتی لوگاں سر بیتگ اَنت-

ھمے وڑ ایاز ءُ راھو بگٹی کہ بیست شش دسمبر دوھزار بیست چار ءَ پاکستانی پوج ءَ چہ ڈیرہ بگٹی ءَ زورانسری آوار جنی ءِ نشانگ کتگ اَنت، گوستگیں شپ ءَ یل بیتگ ءُ وتی لوگ ءَ سر بیتگ-

دومی نیمگ ءَ چہ پنجگور وشبود ءَ آوار جنگ بیتگیں عاقل جلیل ءِ کھول اے وھد ءَ پنجگور سی پیک سر ءَ نندانک داتگ ءُ نشتگ اَنت وتی دوستناک ءِ یل کنائینگ ءِ لوٹ ءَ کنگ ءَ اَنت-

سعید بلوچ ءِ کھول ءُ اسٹنٹ کمشنر کیچ ءِ میان گپ ءُ دیوان بیتگ، کمشنر کیچ ءِ سے روچ ءِ تہ ءَ سعید بلوچ یل کنائینگ ءِ دلجمی داتگ-

کیچ ءِ دمگ سنگ آباد ءِ جھمنند ءُ تربت لا کالج سیکورٹی گارڈ سعید بلوچ ء نیک بخت کہ پنچ مارچ بیگاہ شش ءِ وھد ءَ چہ کالج ءَ زورانسری آوار جنی ءِ نشانگ کنگ بیتگ اَنت کھول نیمگ ءَ چہ مروچی ایم ایٹ شھدگ گاڑیانی واستا سرجمی ءَ بند کتگ چریشی ءَ پد اسٹنٹ کمشنر کیچ محمد جان نیمگ ءَ چہ دمگ ءِ شرمندیں مردمانی ھمراھی ءَ مروچی سعید بلوچ ءِ کھول ءَ چہ گپ دیوان بیتگ-

اسٹنٹ کمشنر کیچ ءَ کھول دلجمی داتگ کہ سے روچ ءِ تہ ءَ سعید بلوچ یل کنگ بیت چریشی ءَ پد کھول ءَ ھداروکی وتی نندانک آسر کتگ-

کھول گوشگ اِنت کہ اگاں سے روچ ءِ تہ ءَ سعید بلوچ دیم ءَ آرگ نہ بیت گُڑا آئی ءِ درانسانی زورانسری آوار جنی ءِ ھلاپ ءَ وتی زھرشانی ءَ دْراجکش کنگ بندات کن ایں-

کھول ءُ اسٹنٹ کمشنر ءِ میان ءَ سوبمندیں گپ ءُ دیوان ءَ پد سی پیک شھدگ ھداروکی گاڑیانی واستا پچ کتگ-

زانگ بہ بیت کہ سعید ء نیک بخت گوستگیں روچاں پنچ مارچ لا کالج چہ تربت ءَ ڈیوٹی ءِ وھد ءَ ناشناسیں مردماں کہ سادھیں پوشکانی تہ ءَ بیتگ اَنت زورانسری بیگواہ کتگ- آ گوستگیں ھشت سالاں چہ سیکورٹی گارڈ ڈیوٹی دیگ ءَ بیتگ-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں نال، شال ءُ سامی ءَ زورگیریں پاکستانی پوج، کشندہ ٹولی ءِ کارمند ءُ چاریگیں کیمرہ نشانگ کتگ انت –

جارکش ءَ گوشتگ کہ بی ایل اے ءِ سرمچاراں پنچ مارچ ءَ ھزدار ءِ دمگ نال ءَ زورگیریں پاکستانی پوج ءِ جوڈ کتگیں کشندہ ٹولی ءِ کارمند صمد سمالانی سر ءَ ریموٹ کنٹرول بمب اُرش ءِ کتگ، اُرش ءَ دژمن پوج ءِ کارمند زدگ بوتگ وھدیکہ آئی ءِ سَے ھمراہ مرتگ ءُ گاڑی تباہ بوتگ –

آئی ءَ گوشتگ صمد سمالانی ءَنال، گریشہ، پنجگور ءُ کش ءُ گور ءِ ھند ءُ دمگاں کشندہ ٹولی ءِ سروکی کتگ ءُ آ مردمانی زورانسری آوار جنی، پوجی زوراکی ءُ چادر ءُ چار دیوالی ءِ لگتمالی ءَ پوج ءِ کمکار بوتگ ءُ اے ھند ءُ دمگاں مردمانی ٹارگٹ کنگ ءُ کشگ ءَ ھم دست مان بوتگ -.

جارکش ءَ گوشتگ کہ زورگیریں پوج ءَ بلوچ چکچینی کنگ ءِ بدل ءَ صمد سمالانی منشیات، ملام ءُ دزی ڈنگی کنگ ءَ مھار گٹ ءَ داتگ ءُ یل کتگ ءُ آئی ءَ راغے، ھب ءُ کودہ ءَ مردمانی زمین ھم زورانسری دستیگ کتگ انت ءُ توپک ءِ زور ءَ بازیں کھول ءِ لاچار کتگ کہ وتی جنکاں سانگ بدئینت –

آئی ءَ گوشتگ کہ ھمے کتکاریانی کنگ ءَ صمد سمالانی بلوچ لبریشن آرمی ءِ ہٹ لسٹ انت وھدیکہ آئی ءِ ھمراہ ھم سرمچارانی نشانگ انت –

آئی ءَ گوشتگ کہ نال ءِ اُرش صمد سمالانی ءُ آئی ءِ کارمندانی سر ءَ کنگ بوتگ، بلوچ سرمچار ھمے گوشگ بنت کہ راج ءَ تاوان بہ رکین انت بلے پدا ھم آیاں دژمن پوج ءُ آئی ءِ کارمند کارمرز کن انت بلے پدا ھم بازیں پھریز ءَ ابید ھم راج ءِ تاوان بوت کنت ـ راجی آجوئی جھد ءَ مھلوک ءِ تاوان ءَ ما ھم درد بہ ایں – ما چہ بلوچ راج ءَ لوٹ کن ایں کہ پہ تاوان ءَ رککگے ھاتر ءَ راج چہ زورگیریں پوج ءُ آئی ءِ ھندی چانوگراں دور بہ بنت –

جارکش ءَ وتی درشان ءِ تہ ءَ گوشتگ کہ بلوچ لبریشن آرمی ءِ سرمچاراں چار مارچ ءِ شپ ءَ شال ءَ کمبرانی دگ ءَ زورگیریں پاکستانی پوج یک پوسٹ ءِ سر ءَ دز بمب اپرش ءِ کتگ –

آئی ءَ گوشتگ کہ بلوچ لبریشن آرمی ءِ سرمچاراں یک دگہ اُرش ءِ کیچ ءِ دمگ سامی گیشکور زورگیریں پاکستانی پوج ءِ سَے جاھاں کل کتگیں چاریگی کیمرھانی سرا اُرش کتگ ءُ تباہ کتگ انت -.

گڈسر ءَ جارکش ءَ گوشتگ کہ بی ایل اے اے درسیں اُرشانی زمہ واری ءَ من ایت –

تربت ءِ مزھبی راھشون مفتی شاہ میر ناشناسیں سلاہ بندیں مردماں ھما وھد ءَ تیرگواری کتگ ءُ کُشتگ وھدے آ جامع مسیت ملک آباد ءَ اشا نماز ءَ وانینگ ءَ بیتگ-

آ سکیں ٹپی ئیں جاوراں نادُراھجاہ ءَ برگ بیتگ اود ءَ ٹپّانی درد نہ سگ اِتگ ءُ بیران بیتگ-

نادُراھجاہ گوشگ رِد ءَ آئی سر ءُ شھگوار ءَ دو تیر لگّ اِتگ پمیشکا آ نہ رکّ اِتگ-

یکشلیں زھرشانی

ٹی بی پی شونگال

چہ یک ھپتگے ءَ گیش سرجمیں بلوچستان زھرشانی کنگ ءَ اِنت ءُ گچینی ءِ شھدگانی سر ءَ بیگواھیں مردمانی کھول ءُ بلوچ یکجھتی کمیٹی ءِ باسک زھرشانی کنگ ءَ انت – سرجمیں بلوچستان ءَ بس یک ھپتگے ءِ وھد ءَ پنجاہ ءَ گیش مردم پاکستانی پوج ءِ دست ءَ زورانسری بیگواہ بیتگ انت، ایشانی توک ءَ کوسٹل ھائی وے ءِ پولیس ءُ بلوچستان ءِ لیویز کارندہ ھوار اَنت-

رمزان ءِ ماہ ءَ زورانسری بیگواھیانی آماچین مردمانی کھول وتی دوستگین مردمانی یل کنائینگ ءِ ھاتر ءَ شال- کراچی ءِ شھدگ کلات ءُ سوراب ءِ ھند ءَ بند اش کتگ ءُ نندانک اش دیگ ءَ انت ءُ شال – تپتان ءِ شھدگ ءِ سر ءَ کردگاپ ءِ ھند ءَ زھرشانی برجاہ انت ھمے وڑ بلوچستان ءِ اڑوکی سرکار ءِ سر وزیر سرفراز بگٹی ءُ پیپلز پاٹی ءِ سرکار ءِ واکداریں باسک اے سنگینیں جیڑہ ءِ سر ءَ زورانسری بیگواھی ءِ آماچین مردمانی کھولانی سر ءَ دست ءِ ایرمرزگ ءَ ابید آیانی ھلاپ ءَ اسمبلی ءَ گشتانک دیگ ءُ مزنیں واکدارابی درشانداباں جنزینگ ءَ انت-

ریاست پاکستان ءِ پالیسی ساز کنوک سرپد بنت کہ مردماں زورانسری بیگواہ کنگ ءَ آ بلوچ آجوئی زرمبشت ءَ سرین پروش کت کن انت- بلے آیانی ردیں پالیساں درد چست کنوکیں بلوچستان ءِ لس مھلوک سگگ ءَ انت ءُ بلوچ جنگولانی ھترناکیں اُرشانی کمی ءَ ابید گیشی بوگ ءَ انت-

زورانسری بیگواھی ءُ ریاستی زوراکی ءَ بلوچ زرمبشت ءِ سرین پروش آسان نہ انت – بلے سرکار ءِ گیر سنجیدگی ءَ اے سنگینین جیڑہ گیش ناگیگی ءِ دیم ءَ جنزگ ءَ انت-

ریاست پاکستان ءِ اکتیار داریں پھناتانی چہ پالیسیاں بلوچستان ءِ ھمک لوگ سانمند بوگ ءَ انت، بلے بلوچستان ءَ سیاسی مَٹی ءَ پد بلوچ مھلوک ریاستی زوراکیانی سر ءَ بے تواری ءِ نندگ ءَ ابید زورانسری بیگواھیں مردمانی یل کنائینگ ءُ انساپ ءِ رھبندانی وڑ ءَ ھمے رنگ ءَ زھرشانی ءِ راہ ءَ گچین کنگ ءَ انت-

آواران سلاہ بندیں مردماں کنیرہ کنڈگ ءِ ھند ءَ دگ ءِ جوڑ کنوکیں کمپنی ءِ سر ءَ اُرش کتگ ءُ گاڑی ماندارگ بیتگ انت-

ھمے وڑ لونی ءِ ھند کلی بگٹ ءُ سلاپ بندیں مردماں بند ءُ ساچی شرکت ءِ رولر مانداشتگ انت-

لیویز بنشون ءِ رد ءَ کنسٹریکشن کمپنی دکی داں چمالنگ دگ ءَ جوڑینگ ءَ بیتگ- رولر کیمپ سائٹ ءِ وھد ءَ یک لوگے ءِ دیم ءَ بیتگ، سلاپ بندین مردماں مانداشتگ ءُ رولر سرجم ءَ ستکگ ءُ ھاک ءُ پر بیتگ-

ھمے وڑ ھب بھوانی ءِ ھند ءَ کسٹم ڈیزل ءِ گاڑیانی چھاپہ جنگ ءِ وھد ءَ ھواریں مردماں گاڑی ءَ را آس جتگ ءُ مانداشتگ –