TBP Balochi

بلوچستان ءِ دمگ کوھلو چہ بارکھان ءَ پاکستانی پوج ءِ دست ءَ زورانسری بیگواہ کنگ بیتگیں شش مردمانی پجّار بیتگ اَنت-

ھمے سال پنچ فروری ءَ پاکستانی پوج ءَ بارکھان ءِ دمگ بالا ڈھاکہ ءَ لوگانی سر ءَ بیڑبرگ میان ءَ شش مردم آوار جنگ ءَ پد ناشناسیں ھندے ءَ برتگ چریشی ءَ پد آئی ءِ درگت ءَ ھچ وڑیں سرپدی دز نہ کپتگ-

پوج ءِ دست ءَ زورانسری بیگواہ کنگ بیتگیں مردمانی پجّار ازمکار ناڑی اسماعیل ء حاجی بنگل ماندانی، زمان شاہ ء احمد شاہ، سلتو ء دلا ماندانی، دینمد ء مامند ماندانی، عیسو ء پتو ماندانی ءُ بانزو ء پیر بخش ماندانی نام ءَ چہ بیتگ اَنت-

بلوچستان ءَ ھمے ءَ زورانسری آوار جنیانی وئیلانی تہ ءَ گیشی گندگ اتکگ- گوستگیں یک ھپتگے ءِ میان ءَ پنجاہ ءَ گیش مردم زورانسری بیگواہ کنگ بیتگ اَنت آیانی تہ ءَ سی پنچ مردم یکیں وھد ءَ چہ کلات بیگواہ کنگ بیتگ اَنت-

زورانسری آوار جنی ءِ وئیل ھلاپ ءَ کلات، کردگاپ ءُ کیچ ءَ بُنجاھی شھدگانی سر ءَ نندانک برجاہ ءَ اِنت وھدے کہ سوراب بازیں روچ ءَ تاں برجاھیں نندانک وکدار ءِ دلجمی دیگ ءَ مھتل داشتگ ھمے وڑ شال ءَ ھم سے جتاجتائیں ھندانی سر ءَ دیگ بیگ ءَ اِنت-

پاکستانی پوج ءَ دگہ سے بلوچ آوار جنگ ءَ پد ناشناسیں جاھے ءَ برتگ اَنت-

ھالانی رِد ءَ تیابدپی شھر چہ گوادر ءَ پاکستانی پوج ءَ بیڑبرتگ کاروائی ءِ میان ءَ گوادر چہ فقیر کالونی ءَ قاسم ء میران آئی ءِ لوگ ءَ چہ آوار جتگ وھدے کہ چہ ڈور گوادر ءَ عارف ء علی جان لَٹ ءُ کُٹ کنگ ءَ پد آوار جتگ ءُ ناشناسیں جاھے ءَ برتگ-

اِھوالکار رِد ءَ دوئیں نودربر اَنت، پوج ءَ دزگیری ءَ پد انگت دیم ءَ نیاورتگ اَنت-

دومی نیمگ ءَ پاکستان ءِ بُنجاھی شھر چہ اسلام آباد ءَ ھالانی رِد ءَ بین الاقوامی اسلامی یونیورسٹی اسلام آباد ءَ کانود ءِ نودربر سجاد اسحاق گوستگیں بیگاہ ءَ پنچ نیم ءَ چہ دہ بُنجاہ، اسلام آباد ءَ ریاستی ادارھاں زورانسری آوار جتگ ءُ بیگواہ کتگ –

اے ورنا اشی ءَ ساری ھم چہ ھُزدار ءَ زورانسری آوار جنی ءِ نشانگ کنگ بیتگ آ یل کنگ ءَ پد یکرندے پد ءَ آوار جنی ءِ نشانگ کنگ بیتگ-

بلوچستان ءِ دمگ کیچ ءِ ھند سامی ءَ ناشناسیں مردماں پاکستانی پوج ءِ نیمگ ءَ چہ سے ھندانی سر ءَ پٹ کتگیں چاریگری کیمرہ نشانگ کتگ ءُ تباہ کتگ اَنت-

وئیل سامی ءِ دمگ گیشکور ءَ بیتگ کہ اود ءَ ناشناسیں مردماں ٹاور سر ءَ پٹّیں کیمرہ ءُ آئی ءَ چہ ھمگرنچ دگہ سسٹم نشانگ کتگ ءُ تباہ کتگ اَنت-

پاکستانی پوج ءَ سرجمیں بلوچستان ءَ کوہ ءُ شھرانی ھندانی سر ءَ چاریگری کیمرہ پٹ کتگ اَنت- اے کیمرہ سُر ءُ پُرانی چارگوزاری ءَ ھوار ءَ شپ ءِ وھد ءَ ھم گند اَنت-

بلوچ آجوئی لوٹوکانی نیمگ ءَ چہ اے کیمرھاں نشانگ کنگ بیتگ اَنت بلے اے وئیل زمہ واری انگت ھچ گل ءَ نہ زرتگ-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ سے ءُ چار مارچ ءِ میانی شپ ءَ بلوچستان لبریشن فرنٹ ءِ سرمچاراں پسنی ءُ اورماڑہ ءِ میانی بُزی ءِ ھند سر ءَ سے کلاکاں تاں کوسٹل ھائی وے سر بستگ ءُ درزنانی گاڑی پٹ ءُ پول کتگ اَنت وھدے کہ ھائی وے سر ءَ برجاھیں پولیس چوکی سر ءَ دستیگ کتگ ءُ چوکی مانداشتگ-

جارکش ءَ گْوشتگ کہ پٹ ءُ پول میان ءَ چہ پنجاب ، سندھ ءُ خیبرپختونخوا ءَ سیادی داروکیں درزنانی مساپرانی کارڈ چارتگ اَنت بلے پوج ءُ چیریں ادارھاں چہ ھچ وڑیں سیادی پدر نہ بیگ ءَ سرمچاراں آ پہ سلامتی روگ ءَ اِشتگ اَنت-

جارکش ءَ گْوشتگ کہ راہ بندگ میان ءَ پنجاب ءُ دگہ دمگانی واستا ایل پی جی بروکیں بازیں گاڑی یے مانداشتگ، وھدے کہ کوسٹل ھائی وے پولیس ءِ یک گاڑی یے پٹ ءُ پول میان ءَ داشتگ ءُ پولیس کارمندانی سلاہ دستیگ کتگ ءُ گاڑی مانداشتگ وھدے کہ پولیس کارمند انسانیت ءُ بلوچ بیگ ءِ سوب ءَ یل داتگ اَنت-

جارکش ءَ گْوشتگ کہ بی ایل ایف اے اُرشانی زمہ واری ءَ منّ اِیت ءُ بلوچستان ءِ واتواجھی ءَ تاں زورگریں دُژمن ءِ ھلاپ ءَ وتی کاروائیاں برجاہ دارگ اِھد کن ایں-

بلوچستان نیشنل پاٹی ءِ سروک سردار اختر مینگل ءُ آئی ءِ زھگ گورگین ءَ ھوار یازدہ سد مردمانی بگیری ءَ نبشتہ بوتگیں ارزی ءِ واپس نہ زورگے بگیری ءَ پاٹی باسکاں بلوچستان ءِ سَے شھدگ مروچی پنچ شمبے ءِ روچ ءَ بند کنگ بوتگ انت –

اے شھدگانی تہ ءَ شال تاں کراچی، شال ءُ تپتان ءُ شال تاں جیکب آباد شھدگ بند کنگ بوتگ انت –

دومی نیمگ ءَ بی این پی ءِ سروک سردار اختر مینگل ءَ گوستگیں بازیں روچ ءِ بیت کہ وتی زھگ گورگین ءَ ھوار دگہ مردمانی ھمرائی ءَ وتی دزگیر کنائینگے ھاتر ءَ وڈھ پولیس تانہ ءَ روگ ءَ انت –

وڈھ ءَ پولیس ءُ لیویز ءَ لھتے روچ ساری ارزی نبشتہ کتگ کہ گورگین ءَ ھوار سد مردمانی کچ ءَ نبشتہ کنگ بوتگ –

وڈھ ءِ باپاریانی نیمگ ءَ اشی ءِ بگیری ءَ شال تاں کراچی شھدگ دو روچ ءَ بند کتگ کہ پدا رند ءَ واکدارانی گند ءُ نند ءَ پد نندانک ھلاس کنگ بوتگ بلے سردار اختر مینگل دو سد مردمانی ھمراھی ءَ پولیس تانہ ءَ.شتگ بوتگ کہ مارا دزگیر بہ کنت –

بلے محکمہ داخلہ ءِ نیمگ ءَ سَے ارزی واپس زورگ بوتگ وھدیکہ چارمی ارزی بیست ءُ چار اداراں پد واپس زورگے باور کنائینتگ کہ مردم چہ تانہ ءَ واتر شتگ انت بلے بیست ءُ چار اداراں پد ارزی واپس نہ زوراگ ءَ سردار اختر مینگل گوستگیں سے روچ ایں وتی ھمراھانی ھمرائی ءَ اے وھدی تانہ نشتگ –

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ نوبل امن داد ءِ نامینگ ءِ درگت ءَ گوشتگ نوبل امن داد منی واستا یک شرپے بلے اے داد بیگواھیں مردمانی ئیگ انت-

آئی ءَ گوشتگ رسانکدری باسک اے گپ ءِ راست کنگ ءَ من ءَ رھوت کنگ ءَ انت من اے گپ ءَ راست کن آں کہ اے راستے-

آئی ءَ گوشتگ من اے نامینگ ءَ یکدم شرپمند آں بلے منی درگت ءَ نہ اِنت- اے ھما ھزاراں بلوچانی نام ءَ انت کہ آ زورانسری بیگواہ کنگ بیتگ انت ءُ آیانی کھول انساپ ءِ لوٹ ءَ کنگ ءَ انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ پنچ مارچ شپ ھشت نزیک ءَ بی ایل ایف ءِ سرمچاراں کولواہ ءِ دمگ مادگ کلات ءَ برجاھیں زورگریں پاکستانی پوج ءِ بُنجل سر ءَ دو نیمگی ءَ چہ مزنیں سلاھاں چہ اُرش کتگ، چریشی ءِ آسر ءَ دُژمن ءَ مزنیں کچے ءَ جانی ءُ مالی تاوان رس اِتگ-

جارکش ءَ گْوشتگ دگہ یک اُرش مروچی سُھب ءَ یازدہ ءَ کیچ ءِ دمگ بلیدہ گلی ءَ بند ساچی شرکت ءِ دو گاڑیانی، کہ یک بلڈوزرے ءُ یی بورنگ گاڑی یے ھوار بیتگ اشانی سر ءَ اُرش کتگ ءُ ناکارہ کتگ اَنت-

جارکش ءَ گْوشتگ بلوچستان لبریشن فرنٹ اے دوئیں اُرشانی زمہ واریاں منّ اِیت ءُ بلوچ ورنایاں لگوش گور کنگ لوٹ ایں کہ دُژمن توانمندانی بلوچ دُژمنیں پالیسیانی ھلاپ ءَ یکجاہ بہ بنت بلوچ زْرمبشت آجوئی ءَ وتی کرد ءَ جوانیں وڑے ءَ پیلو بہ کن اَنت-

زورانسری بیگواھیں مردمانی کھول شال کراچی ءُ تفتان شھدگ سر ءَ گوستگیں بازیں روچ ءَ چہ نندانک داتگ ءُ دوستناکانی یل کنائینگ لوٹ ءَ کنگ ءَ اَنت-

چہ بلوچستان ءَ زورانسری آوار جنی ءِ نشانگ کنگ بیتگیں بازیں مردمانی کھول نیمگ ءَ چہ مروچی ھم زھرشانی نندانکانی دْرچ برجاہ ءَ اِنت، نندانکانی سبب ءَ شال کراچی ءُ تفتان رؤکیں بُنجاھی شھدگ بند اِنت-

چہ مستونگ کرگاپ ءَ سیادی داروکیں سرپرہ ٹک ءِ مردم وتی دوستناکانی یل کنائینگ ھاتر ءَ گوستگیں شش روچ ءَ چہ شال نزیک ءَ شال تفتان شھدگ سر ءَ نندانک دیگ ءَ اَنت-

زھرشانی سبب ءَ شال تفتان شھدگ ءِ سرجمیں گاڑیانی روگ آیگ بند اِنت وھدے کہ زھرشانی کنوکاں دوستناکانی یل کنائینگ ءَ تاں زھرشانی برجاہ دارگ جار جتگ-

دومی نیمگ ءَ بلوچستان ءِ دمگ چہ کلات ءَ سے روچ ءَ ساری پوج ءَ بیڑبرگ میان ءَ دزگیریاں پد زورانسری آوار جنگ بیتگیں سی پنچ مردمانی کھول ءَ کلات نزیک بُنجاھی شھدگ سر ءَ نندانک شال چہ کراچی واستا دگ بند کتگ-

چہ کلات ءَ آوار جنگ بیتگیں ھشت مردم گوستگیں روچ ءَ دیم ءَ آرگ بیتگ اَنت بلے آ دگہ بیگواھیں مردمانی کھول وتی دوستناکانی دیم آرگ ءَ تاں نندانک برجاہ دارگ جار جتگ اے میان ءَ کھول، بلوچ یکجھتی کمیٹی ءِ گوم ءَ دمگی انتزامیہ، ڈپٹی کمشنر ءُ ایس پی کی گپ دیوان بیتگ-

بیگواھیں مردمانی کھول ءَ واکدار ءَ چہ گپ دیوان واستا وتی گپ ایر کتگ اَنت، یک کلاکے ءِ تہ ءَ ایف سی ءِ ھلاپ ءَ ایف آئی آر نکش کنگ ءُ زورانسری بیگواھیں مردمانی بیست چار کلاکانی تہ ءَ یل کنگ ھوار اِنت-

کلات کھول ءَ دیمتر ءَ گْوشتگ کہ اگاں بیست چار کلاکانی تہ ءَ مئے دوستناک یل کنگ نہ بیت اَنت زھرشانی ءِ تہ ءَ تُرندی آرگ بیتگ، چریشی ءَ مھلوک ءَ سک دلسیاھی دیمپانی بیت ءُ اشی ءِ سرجمیں زمہ واری ھکومت بلوچستان، کلات دمگی انتزامیہ ءُ ھکومت ءِ سر ءَ بیت-

آیاں گُڈی ءَ گْوشتگ ما بلوچ راج ءِ کمک ءَ چہ دزبندی کن ایں ءُ ما وتی زھرشانی ءَ گیش دراجکش دے ایں بلوچستان ءِ آ دگہ بُنجاھی شھدگاں ھم بند کن ایں-

بلوچستان ءَ زورانسری بیگواھیانی درچ برجاہ، جتا جتائیں جاھاں پاکستانی پوج ءَ دگہ شش مردم آوار جتگ ءُ بیگواہ کتگ انت ءُ ھمے وڑ سَے بندیگیں مردم یل دیگ بیتگ انت-

گیشیں اھوالانی رد ءَ بلوچستان ءِ تیابدپی شھر گوادر ءَ جلال اھمد سَے مارچ ءِ شپ ءِ ساھت نُھ ءَ سبزی منڈی گھٹی ڈور گوادر ءَ پوج ءَ آوار جتگ ءُ بیگواہ کتگ –

کھول ءِ رد ءَ جلال اھمد بازیں سالاں چہ یک ڈیزل ڈپوے ءَ مزوری ءَ بیتگ-

چار مارچ ءَ بلوچستان ءِ دمگ مشکے رونجھان ءَ پاکستانی پوج ءَ لیاقت بلوچ ء بجار، بکتیار بلوچ ء ھسن دزگیر کتگ ءُ ناشناسیں جاھے ءَ برتگ اَنت- ھمے وڑ چہ مشکے ءَ یک دگہ اھوالے ھست لیویز کارندہ پاکستانی پوج ءَ دزگیر کتگ ءُ برتگ –

اھوالانی رد ءَ بیست ءُ ھپت پروری ءَ پاکستانی پوج ءَ لیویز کارندہ ارشاد ء واھد بلوچ جھمنند مشکے آوار جتگ ءُ برتگ –

ھمے وڑ چہ پنجگور ءَ اھوال انگ کہ شَے مزار ء برکت علی جھمنند تسپ پنجگور ءَ پوج ءَ آوار جتگ ءُ برتگ ٹ

کھول ءَ انسانی ھکانی گلاں دزمانجنی ءِ دزبندی کتگ ءُ آئی ءِ یل کنگ ءِ لوٹ کتگ-

ھمے وڑ نوزدہ پروری ءَ ملیر کوھی گوٹھ ءَ پاکستانی پوج ءَ ولید ء عطا مھمد ءُ زوھیب ء زباد زورانسری بیگواھی ءِ آماچ کتگ انت – کھول ءَ گوشتگ مارا ترس ءِ گمان انت کہ کجام ھم دروگیں کیسے یا بھتامے ءِ تاوان ءَ سر اش مہ کنت اِنت-

آیاں گوشتگ ما ریاست ءُ آئی ءِ واکداریں ادارھاں لوٹ کن ایں بیگواھیں مردماں یل بہ دنت ءُ اگاں آیاں جرمے کتگ گڑا کانون ءِ درچ ءَ آیاں پیش بہ کنت اِنت-

شال ءَ کلی کمالو ءَ زورانسری بیگواھیں آماچیں ورنا پنچ ماہ ءَ پد آجو-

اھوالانی رد ءَ شال ءِ دمگ کلی کمالو سریاب ءَ دو اکتوبر دوھزار ءُ بیست ءُ چار ءَ پاکستانی پوج ءِ دست ءَ آوار جنگ بیتگیں مزمل مری پنچ ماہ ءَ پد یل بیتگ-

ھمے وڑ چہ تربت ءَ زورانسری آوار جنی ءِ آماچیں زمان بلوچ ءُ ابوالھسن چار مارچ ءَ یل بیتگ انت-

انسانی ھکانی منوکیں بلوچ رھشون ڈاکٹر ماہ رنگ بلوچ نوبل امن ءِ داد ءِ واستا نامینگ بیتگ- اے داد ءِ واستا سرجمیں دنیا ءَ 338 نام دیم ءَ آرگ بیتگ انت کہ ایشانی توک ءَ 244 شکسیات ءُ 94 ادار ھوار انت-

بلوچ اھوالکار کیّا بلوچ ءِ رد ءَ ڈاکٹر ماہ رنگ بلوچ سرجمیں بلوچستان ءَ برجاھیں انسانی ھکانی لگتمالیانی ھلاپ ءَ برزشانین جد ءُ جھد ءِ سبب ءَ نامینگ بیتگ-

زانگ بہ بیت ڈاکٹر ماہ رنگ بلوچ، بلوچ یکجھتی کمیٹی ءِ سروکی ءَ کنگ ءَ انت- بلوچانی ھکانی واستا ءُ زورانسری بیگواھیانی ھلاپ ءَ برزین تواری ءَ کنگ ءَ انت- آئی ءِ سروکی ءَ بازیں زھرشانی ءُ لانگ مارچ کنگ بیتگ انت کہ آئی ءِ سبب ءَ بلوچ مھلوک ءِ جیڑہ میان اُستمانی تکاں نامان بیتگ-

ایشی ءَ پیش بی بی سی ءَ سرجمیں دنیا ءَ سد زالبولانی ناماں ھوار میان اُستمانی میگزین ٹائمز ءِ نیمگ ءَ ھم آ سد دیم ءَ اشتوکیں زھشونانی دروشم ءَ منگ بیتگ- پد ءَ آ نیویارک ءَ ٹائمز میگزین ءِ بھر زیرگ ءَ روگ ءَ بیتگ کہ آ کراچی بالی پٹ ءَ پاکستانی واکداراں داشتگ-