TBP Balochi

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ بولان ءِ دمگ ڈھاڈر ءِ ھند مشکاف ءَ یک گچینی کاروائی ءِ وھد ءَ ریل ءِ ٹریک تراکناکیں شورواں گوں تباہ کتگ ءُ جعفر ایکسپریس داشتگ – سرمچاراں ترندی ءَ ٹرین دستیگ کتگ ءُ دراھیں مساپر دزگیر کتگ انت-

جیئند بلوچ ءَ گوشتگ بی ایل اے اے گپ ءَ تچک کنت اِنت کہ اگاں زورگریں پوج ءِ نیمگ ءَ کجام ھم وڑیں آپریشنے کنگ بوت گڑا سنگینیں آسری بنت اِنت ءُ سدانی گپتگیں مردماں کش ایں ءُ ایشانی زمہ وار زورگریں پوج بیت اِنت-

جارکش ءَ گوشتگ اے آپریشن ءَ بی ایل اے ءِ مجید بریگیڈ، ایس ٹی او ایس ءُ فتح اسکواڈ ءِ گچینی سرمچار بھر اش زرتگ ءُ سرجمے کنگ ءَ انت اگاں پوج ءَ سُر ءُ پر کت گڑا ترندیں پسو دیگ بیت اِنت-

جیئند بلوچ ءَ گوشتگ جعفر ایکسپریس ءِ دستیگ کنگ ءَ داں انگت ءَ شش پوجی کارندہ کشتگ انت ءُ سدانی مساپر دزگیر کتگ انت- ایشی ءِ زمہ واری ءَ مئے گل من ایت –

بلوچستان ءِ دمگ ھزدار ءَ یک رندے پد ءَ سلاہ بندیں مردماں پولیس ےِ تھانہ ءِ سر ءَ اُرش کتگ ءُ سلاہ ءُ دگہ سامان برتگ انت-

سلاہ بندیں مردماں گوستگیں شپ ءِ ساھت یازدہ بج ءَ وڈھ ءَ کلی سالہ مھمد روڈ ءَ پولیس ءِ تھانہ ءِ سر ءَ اُرش کتگ-

اھوالانی رد ءَ اُرشکاراں پولیس ءِ سلاہ ءُ دگہ ساز ءُ سامان برتگ انت ءُ بلے دگہ جانی تاوانانی اھوال نہ بیتگ انت-

زانگ بہ بیت دو روچ پیچ ھزدار ءِ دمگ اورناچ ءَ پولیس ءُ لیویز ءِ تھانہ ءُ گاڑی سوچگ بیتگ ات اَنت- آئی ءِ زمہ واری بلوچستان لبریشن فرنٹ ءَ زرتگ ات- بلے وڈھ ءِ وئیل ءِ زمہ واری کس ءَ پہ وت نہ زرتگ-

بلوچستان ءِ دمگ چہ پنجگور ءَ پاکستانی پوج ءَ نماز ءِ وھد ءَ یک مردمے آوار جتگ ءُ بیگواہ کتگ-

بیگواہ کنگ بیتگیں ءِ مردم ءِ پجّار داؤد ء عبدالقادر ءِ نام ءَ چہ بیتگ کہ پنجگور ءِ دمگ چہ سریکوران ءَ آوار جتگ ءُ بیگواہ کتگ-

اِھوالکار ءِ رِد ءَ شش مارچ ءَ پاکستانی پوج ءَ پنجگور ءِ دمگ چہ سریکوران ءَ اشاء نماز ءِ وھد ءَ پاکستانی پوج ءَ مسیت ءَ بیڑبرتگ اے مرد آوار جتگ-

زانگ بہ بیت کہ پنجگور ءَ گوستگیں سے روچاں چہ زورانسری آوار جنی ھلاپ ءَ سی پیک شھدگ سر ءَ نندانک برجاہ ءَ اِنت ھمے وڑ دومی نیمگ ءَ زورانسری آوار جنی ءِ وئیل نکش بیگ ءَ اِنت-

بلوچستان ءِ دمگ ھاران ءَ سلاہ بندیں مردماں پاکستانی پوج ءِ چوکی اُرش ءِ نشانگ کتگ-

چوکی ھاران ءِ دمگ گزی دگ ھند سر ءَ نشانگ کنگ بیتگ-

دمگی اِھوالکار رِد ءَ اُرش وھد ءَ تُرندیں تیرگواری ءُ تراکانی توار اش کنگ بیتگ-

واکدار ءَ تنی وھدے اے درگت ءَ ھچ وڑیں درشان شنگ نہ کتگ-

زانگ بہ بیت ھاران ءَ بلوچ آجوئی لوٹوکیں سلاہ بندیں گل پُرکار اَنت بلے اے اُرش زمہ واری انگت ھچ گل ءَ نہ زرتگ-

دوشمبے ءِ روچ ءَ بلوچستان ءِ اسمبلی ءَ جمعیت علما اسلام ءِ اسمبلی باسک میر ظفر زہری ءَ بلوچستان سرکار ءِ سر ءَ نگد کتگ ءُ گوشتگ کی بلوچستان ءَ سرپراز بگٹی ءِ ناں بلکنہ بلوچ لبریشن آرمی ءِ سروک بشیر زیب ءُ بلوچستان لبریشن فرنٹ ءِ سروک ڈاکٹر اللہ نزر ءِ رٹ برجاہ انت – آیانی مردم شپ ءَ تر ءُ گرد کن انت ءُ دگ بندی کن انت –

آئی ءَ گوشتگ مردم پوج ءَ چہ گیشتر کوہ والا مردماں وتی ھیرواہ سرپد بنت – زالبول وتی سُھراں بی ایل اے والایاں دیگ ءَ انت – سرکار تاکت ءِ زور ءَ آیاں داشت نہ کنت – اگاں پہ چکچینی ءُ تاکت ءَ مردم جنگ بہ بنت گڈا مات دگہ زھگ پیداک کن انت –

آئی ءَ گوشتگ کہ اگاں سدام ءِ وڈا کیمکل کارمرز کن ئے گڈا اے مردم سدام ءِ وڈا ترا درنج انت –

آئی ءَ دیمتر ءَ گوشتگ کہ مروچی وانندہ ءُ زانتکار وتکُش ایں اُرشکار جوڈ بوتگ انت اے تئی تیراں چہ ناں بلکنہ وتی تیر ءَ وت ءَ وت جن انت – سرکار نوں سر ءَ ھوش بہ کنت – مناں گوش مالومی ءِ رستگ کہ قائد ایوان ءَ منی درگت ءَ گوشتگ کہ من سلاہ بندیں گل ءُ بلوچ یکجھتی کمیٹی ءَ کمک کنگایاں – سرکار ءِ ردیاں جاور ھال اے جاہ سر بوتگ انت – سرکار ءِ ھچ رٹ ءِ نیست انت اے جنگ ءَ شما بے سوب بوتگ ئے –

آئی ءَ گوشتگ کہ مناں ھما بھتام کہ جنگ بوتگ انت آئی ءِ سر ءَ جے آئی ٹی جوڈ کنگ بہ بیت، پٹ ءُ پول کنگ بہ بیت کہ کجام سلاہ بندیں گل ءَ لاجسٹک کمک کتگ –

آئی ءَ گوشتگ کہ زورانسری آوار جنگ بوتگیں مردم دگانی بند کنگ ءَ پد یل کنگ بوتگ انت مردمانی یکیں راہ دگ بندی ایں – سوراب ءَ من ھونریچی ءَ چہ رکینتگ ءُ دگ پچ کنائینتگ – جاور ھال سک باز ھراب انت سرکار چہ مارا سلاہ بہ زور ایت – وزیر اعلی سولجر جوڈ مہ بنت – وتی وزیر داخلہ ءِ بہ دار ئے –

پنجگور ءَ بیگواھیں مردمانی کھول وشبود پولیس اسٹیشن ءَ چہ سی پیک ءَ تاں زھرشانی روانک کش اِتگ-

پولیس اسٹیشن وشبود ءِ دیم ءَ زھرشانی نندانک ءَ چہ بیگواھیں عاقل، ھولدار باب جان محمد بلوچ، زھیر بلوچ، شعیب بلوچ ءُ دگہ کھولاں بھر زرتگ-

پولیس اسٹیشن ءِ دیم ءَ زھرشانی نندانک ءَ چہ ترانکاراں تران کنان ءَ گْوشتگ کہ اگاں بیست چار کلاکانی تہ ءَ عاقل ءُ دگہ بیگواھیں مردم آجو کنگ نہ بیت اَنت گُڑا تربت ءَ رؤکیں دگ ءَ بند کن ایں-

آئی ءَ گْوشتگ کہ مارا دگ بندگ شوک نہ اِنت نانکہ رمزان مبارکیں ماہ ءَ زھرشانی کنگ، مئے دوستناکاں بیگواہ کنگ مارا زھرشانی کنگ ءِ لاچار کتگ-

آیاں گْوشتگ کہ عاقل ءُ دگہ بیگواھیں مردمانی یل کنائینگ ءَ تاں زھرشانی نندانک سی پیک دگ سر ءَ برجاہ بیت-

آئی ءَ گْوشتگ کہ پولیس دمگی انتزامیہ بے وسی ءِ زھرشانی ءَ کنگ ءَ اِنت پولیس اسٹیشن ءِ دیم ءَ چہ یک شھری یے چست کنگ ءُ برگ بیت بلے آ بے وسی ءِ اکس جوڑ بیت ءُ تھانہ ندارگ چار اِیت-

آیاں گْوشتگ کہ مئے دوستناک بے میار اَنت آیاں چست کنگ سرجمیں کھول ءَ سسّائی دروشم ءَ چہ گم ءُ رنجاں گوازین اِیت- آیاں گْوشتگ کہ مئے دوستانکاں یل بہ کن اِت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ ھشت مارچ ءِ سُھب ءَ بولان ءِ دمگ بارڈی ءَ لشکر کشی ءِ نیئت چہ کوھانی تہ ءَ پِتروکیں پاکستانی پوج ءِ سر ءَ بی ایل ایف ءِ سرمچاراں سنگر گپتگ ءُ اُرش کتگ- اُرش ءِ آسر ءَ پیراملیٹری پوج ایف سی ءِ نائب صوبیدار فلک ناز ءَ ھوار چار کارمند مرتگ ءُ سے کارمند ٹپی بیتگ اَنت-

جارکش ءَ گْوشتگ بلوچ گھگیری راجدپتر ءَ درہ بولان ءِ یک بلاھیں کردے بیتگ ءُ مروچی ھم بولان بلوچ گھگیری ءِ یک بلاھیں کردے دار اِیت اود ءَ گھگیری ءِ کرد ءَ چہ چست بیتگیں شئور ءِ رُژن بلوچستان ءِ کُنڈ کُنڈ ءَ رُژن ءَ کنگ ءَ اِنت-

جارکش ءَ گْوشتگ دُژمن ءِ ھلاپ ءَ اے اُرش ءَ بلوچستان لبریشن فرنٹ ءِ سرمچاراں آجوئی لوٹوکیں گل یونائٹیڈ بلوچ آرمی ( یو بی اے ) ءِ سرمچارانی جوانیں وڑے ءَ کُمک گون بیتگ-

جارکش ءَ گْوشتگ بی ایل ایف سرپد بیت کہ راجی آجوئی ءِ جنگ بلوچ راج ءُ آجوئی ھاتر ءَ پُرکاریں گلانی یکجاھی ءُ کُمک ءَ چہ کنگ بیت-

میجر گْوھرام بلوچ ءَ گْوشتگ کہ بی ایل ایف بولان ءَ دُژمنیں پوج سر ءَ اُرش ءِ زمہ واری ءَ منّ اِیت ءُ بلوچستان ءِ وتواجھی ءَ تاں زورگریں ریاست سر ءَ اُرش برجاہ دارگ ءِ اِھد کنت-

بلوچستان ءِ تیابدپی شھر چہ گوادر ءُ بارکھان ءَ پاکستانی پوج ءَ شش مردم آوار جتگ ءُ بیگواہ کتگ اَنت-

گیشیں ھالانی رِد ءَ چہ پسنی ءَ لیویز کارمند قیس نثار بیگواہ بیتگ، سادھیں پوشکانی تہ ءِ کارمنداں آ چہ لوگ ءَ لَٹ ءُ کُٹ کتگ ناشناسیں جاھے ءَ برتگ-

لیویز کارمند قیس نثار ءِ مات ءَ گْوشتگ کہ آئی ءِ چُک قیس نثار شمبے ءِ شپ ءَ سادھیں پوشاکانی تہ ءِ مردماں چہ لوگ ءَ چست کتگ ءُ برتگ-

آئی ءَ گْوشتگ کہ منی چُک لیویز کارمندے یے آ ھچ درکانودی کاراں ھوار نہ اِنت ءُ آئی ءَ واکداراں چہ دزبندی کتگ کہ قیس نثار یل بہ کن اِت-

ھمے وڑ دگہ یک ورنایے کریم بخش ھم شپ وھد ءَ بیگواہ کنگ بیتگ- ِاِھوالکار رِد ءَ ورنا شپ وھد ءَ چہ لوگ ءَ آوار جنگ بیتگ-

دومی نیمگ بلوچستان ءِ دمگ بارکھان ءَ ھشت پروری دوھزار بیست پنچ ءِ روچ ساھت سے وھد ءَ ایف سی ءُ پولیس کارمنداں لوگانی سر ءَ بیڑبرتگ ءُ یکیں کھول ءِ چار مردم حاجی احمد بخش، عبداللہ جان ، محمد طاھر ءُ محمد اکبر آوار جتگ ءَ گوں وت برتگ اَنت-

زانگ بہ بیت اے کھول ءِ لھتے مردم گوستگیں روچاں ھم آوار جنگ ءُ بیگواہ کنگ بیتگ اِت اَنت-

یات بہ بہ اِت ھمے یکیں ماہ ءَ بلوچستان ءِ جتاجتائیں دمگاں تنی وھدے شست مردم ءَ گیش آوار جنگ ءُ بیگواہ کنگ بیتگ اَنت-

ھندوستان ءِ رسانکدر ءَ ٹاہ داتگ ءُ گوشتگ ھندوستانی شھری ءُ بھریہ ءِ گوستگیں ملازم کلھبوشن یادیو چہ ایران آوار جنوکیں مذھبی اسکالر تربت ءَ جنگ بیتگ-

اے ٹاہ دو روچ پیش بلوچستان ءِ دمگ کیچ ءِ بنجاھی شھر تربت ءَ کشگ بیتگیں مذھبی دھشت مفتی شاہ میر ءِ درگت ءَ کنگ بیتگ-

مفتی شاہ میر بزنجو آدینگ ءِ شپ ءَ تربت ءِ دمگ ملک آباد ءَ ھما وھد ءَ تیرگواری کنگ ءُ نشانگ کنگ بیتگ کہ آ نماز تراویح ءَ وانگ ءَ بیتگ- آئی ءِ سر ءَ یک تیرے ءِ لگگ ءَ آ جاہ پہ جاہ ءَ بیران بیتگ-

چاگردی ءُ سیاسی پھناتانی گوشگ انت مفتی شاہ میر ءِ سیادی بلوچستان ءِ دمگ کیچ ءَ بیتگ ءُ آ جے یو آئی (ف) ءِ پرکاریں باسکے بیتگ- آ یک عالم دینے ءِ نام ءَ نامان بیتگ ءُ وتی دینی ءُ سیاسی لیکھانی پژدر ءَ نامان بیتگ – بلے آئی ءِ سیادی پاکستانی چیریں ادارھاں گوں ھم بیتگ ءُ آئی ءِ سر ءَ بھتام بیتگ کہ آ بلوچ سیاسی باسکانی کُشگ ءُ زورانسری بیگواھیاں ھوار بیتگ-

2013 ءَ بلوچ آجوئی لوٹوکیں گل ‘بی ایل ایف’ ءَ آئی ءِ سر ءَ اُرش کتگ بلے آ رک اتگ ات – ایشی ءَ پد 2024 ءَ یک دگہ اُرشے ھمے مسیت ءَ بیتگ پد ءَ کشگ بیتگ چریشی ءَ پنچ زھگ زدگ بیتگ ات اَنت-

مارچ 2016 ءَ پاکستانی واکداراں ھندوستانی شھری کلبھوشن یادو ءِ دزگیر کنگ ءِ ٹاہ داتگ ءُ ھمے ماہ ءَ پاکستانی پوج ءِ نیمگ ءَ ڈاہ دیگ بیتگ کہ کلبھوشن یادو ھندوستانی بھریہ آفسر ءُ ھندوستانی چیریں ادارہ ‘را’ ءِ ایجنٹے-

ھمے لھتے روچاں پد پاکستان ءِ نیمگ ءَ کلبھوشن یادو ءَ دزگیری جاہ ءَ منانکی درشانی تامر ءَ شنگ کنت ءُ بلوچستان ءِ سرکار ءَ ناشرکاری ءِ تک ءَ آئی ءِ ھلاپ ءَ ایف آئی آر نبشتگ کنگ بیتگ-

اپریل2017 ءَ کلبھوشن یادو فوجی آمیدگس ءَ ملک ءَ ناشرکاری ءِ پرکاری ءَ ھواری ءِ مجرم نامینتگ ءُ 10 اپریل ءَ آئی ءَ را مرگ ءِ سزا داتگ-

کلبھوشن یادو ءِ پاھو ءَ مرگ ءِ سر ءَ 10مئی 2017 ءَ بھارتی آمیدگس ءُ انساپ ءِ تک ءَ مرگ ءِ سزا ءِ دارگ ءِ دزبندی کتگ – 15 مئی 2017 ءَ میان اُستمانی آمیدگس ءَ بھارتی دزبندی گوشدارگ ءُ ھردوکانی گپانی گوشدارگ ءَ پد آمیدگس ءَ پیسلہ ایر کتگ-

سَے روچ ءَ پد میان اُستمانی آمیدگس ءَ انساپ ءَ وتی پیسلہ پاکستان ءِ بنگپ ءِ گڈی پیسلہ ءَ داں کلبھوشن یادو ءَ را پاھو نہ دیگ ءِ کڈنی کتگ-

بلوچستان ءِ دمگ ڈیرہ بگٹی ءَ چلگی ءِ میان ءَ بیرانی ءِ دْرچ برجاہ ءَ اِنت، دگہ یک ماتے الاج ءِ آسراتی نہ بیگ ءَ گوں چُک ءَ ھوار بیران بیتگ اَنت-

یک کساسے ءِ رِد ءَ سیزدہ ماہ میان ءَ درستی چلگی ءِ میان الاج نہ بیگ ءِ سبب ءَ چہ بیرانیانی کچ ھپتاد شش بیتگ اَنت- زالبول ءُ نیم توامیں چُک ھوار اَنت-

زانگ بہ بیت کہ ڈیرہ بگٹی ءَ چلگی میان ءَ زالبولانی واستا الاج ءِ آسراتی نہ بیگ برابر اِنت چریشی ءِ سبب ءَ مردم ایمرجنسی دروشم ءَ پنجاب ءِ دمگ رحیم خان یا دگہ شھرانی نیمگ ءَ جُنزگ ءَ لاچار اَنت-

ڈسٹرکٹ ہیلتھ آفیسر ( ڈی ایچ او ) ڈیرہ بگٹی ءَ منّ اِتگ کہ دمگ ءِ سرکاری نادُراھجاہ ھچ وڑیں گائنا لوجسٹ یا زالبولیں ڈاکٹر نیست اَنت-