TBP Balochi

سلاہ بندیں مردماں جتاجتائیں پولیس تھانھانی سر ءَ اُرشانی میان ءَ کارمند گپتگ ءُ سلاہ دستیگ کتگ اَنت-

گیشیں ھالانی رِد ءَ بلوچستان ءِ دمگ مستونگ ءَ درزنانی سلاہ بندیں مردماں ھندو مھلہ نزیک ءَ پولیس پٹ ءُ پولی جاہ سر ءَ اُرش کتگ سرجمیں کارمند دزگیر کنگ ءَ پد سلاہ ءُ دگہ سامان دستیگ کتگ ءُ وتی ھمراھی ءَ برتگ اَنت-

اِھوالکار رِد ءَ سلاہ بندیں مردماں اے میان ءَ پولیس ءُ ایگل سکواڈ کارمند دزگیر کنگ ءَ پد یل داتگ اَنت-

ھمے وڑ بلوچستان ءِ دمگ ھُزدار ءِ تھسیل نال گروک لیویز چیک پوسٹ سر ءَ ناشناسیں سلاہ بندیں مردمانی اُرش، چیک پوسٹ ءَ سر ءَ ساڑی ئیں لیویز کارمندانی سلاہ ءُ پرپٹ برتگ اَنت-

مستونگ ءَ ھوار نال ءِ جتاجتائیں ھنداں اے وھد ءَ سلاہ بندیں مردمانی ساڑی بیگ ھال اِنت وھدے کہ پوج ءِ مزنیں کچے ءَ جتاجتائیں شھدگانی سر ءَ اوشتارینتگ اَنت-

ھمے وڑ اورماڑہ ءِ دمگ ماکولا ءَ ناشناسیں سلاہ بندیں مردماں کوسٹل ھاٹی وے پولیس ( N-10 ) گاڑی سر ءَ اُرش – سلاہ بندیں مردماں پولیس گاڑی مانداشتگ ، وھدے کہ پولیس کارمنداں چہ سرکاری سلاہ ءُ دگہ سامان دستیگ کتگ اَنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں یک درشانے ءَ گوشتگ سرمچارانی ھلاپ ءَ زورگریں پاکستانی پوج ءَ یک رندے پد ءَ گیر زمہ وارین ءُ اھمکی لشکری بیڑانی تک ءَ روان ءَ ڈرون اُرش کتگ ءُ دو گولہ آس داتگ انت- بلے بلوچ سرمچارانی چابکدستی ءَ جوانتریں رپک ءُ جنگ ءِ میدان ءِ کنٹرول کنگ ءَ دراھیں سرمچار سلامت انت- اے اُرش ھما درچ ءِ نا اوپار کنوکیں منانک انت کہ پاکستان بندیگیانی مٹینگ ءَ کجام ھم سنجیدگیں پیسلہ ءَ تیار نہ انت ءُ بس جنگی گنوکی ءُ پرکنگ ءَ اوشتاتگ –

جارکش ءَ گوشتگ بی ایل اے گپ ءَ تچک کنت کہ اگاں زورگریں پوج ءَ مئے الٹی میٹم ڈالچار کت گڑا آسر ءِ زمہ وار بس پاکستان ءِ سر ءَ بیت اِنت- مروچی بزدلی ءُ بے وسی بمبگواری ءِ پسو ءَ 10 دگہ بندیگاں کش ایں- بی ایل اے دشمن ءَ بیھار دنت کہ اگاں پاکستانی پوج ءَ دوبر زوراکی کت تُری یک گولھے آس دات گڑا دگہ 10 کارندھاں کش ایں-

آئی ءَ گوشتگ بی ایل اے ءِ کنٹرول یکشل ءَ مھکم ءُ برجم انت ءُ 12 ادار ءَ گیش وھد گوستگ، بلے پاکستانی ریاست ءُ آئی ءِ لشکری ادارہ اے راستی ءِ منگ ءَ ابید دروگیں پندل سازگ ءَ انت کہ وتی بے وسی ءُ بے سوبی ءَ چیر دیگ ءِ جھد ءَ انت – ریاست یکشل ءَ اے گوات دیگ ءَ انت کہ آئی ءِ کنٹرول انگت ھست انت بلے جنگ ءِ میدان ءَ راستی بلکل چپ انت-

آئی ءَ گوشتگ اے تچک کنگ بیت اِنت کہ بی ایل اے ءِ یک ھم سرمچارے شھید نا کہ ٹپی بیتگ – دشمن ءِ نیمگ ءَ اے شنگ کتگیں دروگ چَٹ سیاہ ءُ راستیانی چیر دیگ ءُ وتی بے سوبی ءَ چیر دیگ ءِ جھد ءَ انت-

آئی ءَ دیمتر ءَ گوشتگ پاکستانی واکدار بندیگانی مٹینگ ءَ گیر سنجیدگ انت ءُ بی ایل اے ھروھد ءَ میان اُستمانی جنگی رھبند ءُ شرپداری ءِ رھبندانی دارگ ءَ انت- دشمنیں ریاست ءِ پندل سازیں دروگ بند دروگ بندگ ءَ دزبند انت کہ پاکستانی پوج ءَ بندیگیں مردم یل کنائینتگ انت بلے راستی ایش انت کہ بی ایل اے ءَ جنگی، شرپداری ءُ آشوبی رھبندانی درچ ءَ دراھیں زالبول، زھگ، نادراہ ءُ بلوچ شھری وت یل داتگ انت – اے گامگیج ھچ درملکی تاکت ءَ نہ بیتگ، بلکیں اے بلوچ گھگیری ءِ برزشانیں شرپداریں دود ءُ جنگی رھبندانی دارگ ءِ درچ انت-

آئی ءَ گوشتگ بی ایل اے اے کول ءَ کنت کہ مئے دشمن لس شھری نہ انت بلکیں آ زورگر ءُ جابر ریاستی پورسز انت – کہ بلوچ سرڈگار ءِ پوج کشی ءُ لٹ ءُ پلی ءَ برجاہ کنگ ءُ زُلم ءُ زوراکیاں کنگ ءَ انت- ما وتی زبان ءَ اوشتوک انت ءُ پاکستانی گور ءَ الٹی میٹم بس 40 ادار ھست انت اگاں اے وھد ءَ مئے لوٹ منگ نہ بیت انت ءُ ریاست ءَ مزن مَری کت داں وھد ءِ آسر ءَ ھمک ادار ءَ 5 بندیگاں کش ایں-

گڈسر ءَ گوشتگ بی ایل اے دشمن ءَ یاداشت دنت کہ اے جنگ ءِ بندات زورگریں ریاست ءَ کتگ بلے آسر ءَ ما گوں وتی شرتاں کن این ئے – نی پیسلہ دشمن ءِ دست ءَ انت آ سنجیدگی ءِ درشانی ءَ کنت یا وتی کارندھانی گیشیں لاشاں چِست کنت اِنت-

بلوچ لبریشن آرمی ءِ جارکش جیئند بلوچ ءَ نوکتریں درشان ءَ گوشتگ سرمچاراں جنگی رپک ءُ ھنراں زوراکی کنوکیں پاکستانی پوج ءِ زمینی ءُ برزی لشکر ھشت اداراں دیمپانی کنگ ءَ پد پشتکنزی ءَ لاچار کتگ- ءُ اے دراجیں جنگ ءَ دشمن ءِ 30 کارندھاں گیش کشتگ انت ءُ بازینے زدگ کتگ انت-

بی ایل اے گوستگیں ھشت اداراں ٹرین ءُ آئی ءَ جاڑیگیں یرگمالیانی سرجمی ءَ کنٹرول کنگ ءَ راست کنت اِنت- جنگی رھبندانی رد ءَ 214 یرگمالی جنگی بندیگی ءَ راست انت- بی ایل اے اے بندیگانی مٹ کنگ ءَ جاڑیگ انت- زورگریں پاکستانی پوج ءَ 48 ادارانی مھلت انت بلوچ سیاسی، بیگواھین ءُ زورانسری بیگواھی ءِ آماچ بیتگیں مردم ءُ راجی گھگیری ءِ باسکانی ابید دگہ چیز ءَ یل کنگ –

بی ایل اے ءِ دستگی ءَ 214 پاکستانی کارندہ، پوجی، نیم پوجی کارندہ، پولیس ءُ چیرین ادارھانی کارندہ ءُ سیکیورٹی ءُ جنگی رھبندانی رھبند ءَ داشتگ انت اگاں داتگیں وھد ءَ مئے لوٹ سرجم نہ بیت انت ھمے وھد ءَ پوج ءَ لشکری پیشکدمی کت گڑا دراھیں بندیگیں مردم کشگ ءُ ٹرین سرجم ءَ تباہ کنگ بیت اِنت-

جارکش ءَ گوشتگ اے گپ ءَ تچک کنت ءُ زورگریں پوج ءَ بیھار دنت کہ بی ایل اے وتی ھمک پیسلہ ءِ سر ءَ اوشتاتگ ءُ سرجمی ءَ واک ءَ دار ایت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں مروچی یازدہ مارچ سُھب ھپت ءَ کیچ ءِ دمگ بلیدہ ، میناز ءَ زورگریں پاکستانی فورس فرنٹیئر کور ءِ سے گاڑیانی سر ءَ ھمگرنچیں کاروان آئی ای ڈی بمب اُرش ءَ نشانگ کتگ- سرمچاراں کاروان پُشت گاڑی بمب اُرش ءِ نشانگ کتگ چریشی ءَ ھپت کارمند ھوار بیتگ اَنت ءُ تراک آسر ءَ پوج ءِ گاڑی سرجمی ءَ تباہ بیتگ ءُ اشی ءَ سوار سرجمیں ھپتیں کارمند مرتگ اَنت-

جارکش ءَ گْوشتگ اُرش ءَ پد زورگریں پوج وتی مُرتگیں کارمندانی لاش زرتگ ءُ زوت وتی بُنجل نیمگ ءَ شتگ-

جارکش ءَ گْوشتگ دگہ یک اُرشے دہ مارچ شپ ءَ ساھت یازدہ نزیک ءَ بی ایل ایف ءِ سرمچاراں ھُزدار ءِ دمگ وڈھ ءَ کلی صالح محمد ءَ برجاھیں پولیس چوکی انگیر ءَ کتگ اود ءَ ساڑی سے پولیس کارمنداں چہ آیانی سرکاری سلاہ دستیگ کتگ ءُ بلوچ بیگ سبب ءَ آ پہ شرپی یل داتگ اَنت-

جارکش ءَ گْوشتگ کہ بلوچستان ءِ کوچگی دمگاں گیشتر لیویز ءُ پولیس تھانہ جوڑ کنگ اود ءَ سلاھانی امبار کنگ مول ءُ مراد جنگی جاوراں آیاں زورگریں پاکستانی پوج ءِ سھارگ جوڑ کنگ سرمچارانی ھلاپ ءَ کارمرز کنگ اِنت- زورگریں ریاست کارے دیگ بلوچانی بلوچ سرمچارانی دیم پہ دیم اوشتگ ءِ جھد ءَ اِنت – ما یکرندے پد ءَ چہ رسانکدر ءَ سرجمیں بلوچستان ءَ لیویز ءُ پولیس تھانانی ساڑی ئیں بلوچ کارمنداں سرپد کنگ لوٹ ایں کہ بلوچ سرمچارانی نیمگ ءَ چہ انگیر میان ءَ گھگیری ءَ چہ پھریز بہ کن اَنت اشی ءَ آیانی ءُ بلوچ راج ءِ بھتری اِنت-

جارکش ءَ گْوشتگ کہ بی ایل ایف اے دوئیں اُرشانی زمہ واری ءَ منّ اِیت ءُ اے اِھد کنت کہ بلوچستان ءِ وتواجھی ءَ تاں سرجمیں بلوچستان ءَ زورگریں پاکستانی پوج ءُ نیم پوجی ادارھاں ھوار پُلپانچیں پروجیکٹانی سر ءَ جوانیں وڑے ءَ اُرش ءَ برجاہ دار ایں-

بلوچستان ءِ دمگ بولان ءِ ھند مشکاف، ڈھاڈر ءَ 11 مارچ 2025 چہ شال ءَ پشاور ءَ روکیں مساپر ٹرین جعفر ایکسپریس ءِ سر ءَ اُرش ،اُرشکاراں ریل ءِ ٹریک تراک ءَ گوں تباہ کتگ ٹرین داشتگ مساپر دزگیر کتگ ءُ برتگ انت-

بلوچ لبریشن آرمی ءَ اے اُرش ءِ زمہ واری من اتگ-

بی ایل اے ءِ جارکش ءِ رد ءَ بنداتی ءَ چار سد مردم دزگیر کتگ ءُ برتگ انت پد ءُ زھگ ءُ زالبول یل داتگ انت ءُ 182 مردم انگت ءَ دزگیری ءَ انت- جارکش ءَ گوشتگ ات اُرش ءِ وھد ءَ داں انگت ءَ 20 کارندہ کشگ بیتگ انت-

وئیل ءَ پد پاکستانی پوج ءَ آپریشن ءِ بندات کتگ ڈھاڈر ءُ کش ءُ گوری دمگاں ھیلی کاپٹر ءُ جنگی بالیگ برز ءَ گندگ بیتگ انت ءُ پاکستانی پوج ءَ دمگ انگیر کتگ ءُ گیشیں کارندہ آورتگ انت-

ایشی ءَ پیش بی ایل اے ءَ بیھار دیان ءَ گوشتگ اگاں سیکیورٹی پورسز ءَ آپریشن برجاہ داشت گڑا دزگیر کتگیں مردماں تاوان رس ات کنت – پوجی کاروائی ءِ دروشم ءَ درستیں دزگیریاں کش ایں-

دومی نیمگ ءَ بلوچستان ءِ سرکار ءَ جاورانی ناگیگی ءَ شال ءُ سبی ءَ ھسپتالاں ایمرجنسی جتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ جعفر ایکسپریس ءِ دستیگ کنگ ءَ پد 182 مردم دزگیر کتگ انت گوستگیں شش اداراں مئے دست ءَ انت – اے آپریشن ءَ پیشکدمی کنوکیں ھشت پاکستانی پوج ءِ کارندہ کشتگ انت، چریشی ءَ کساس بیست ءَ گیش پوجی کارندہ مرتگ انت-

جارکش ءَ گوشتگ بی ایل اے یک نیمگے برجاھیں آپریشن ءِ وھد ءَ پاکستانی پوج ءِ برزی اُرش ءَ بالیگانی توپانی دیمپانی ءَ کنگ ءَ انت چریشی ءَ چہ دشمن ءَ بازیں کچے ءَ تاوانانی دیمپانی انت- بی ایل اے ءِ جنگجول یکشل ءَ پوزیشنز ءَ مھکم کنگ ءَ انت ءُ اے آپریشن ءِ رھشونی ءَ کنان ءَ زورگریں پاکستانی پوج ءِ تاکت ءَ چیلنج کنگ ءَ انت-

جارکش ءَ گوشتگ داں انگت ءَ بی ایل اے ءِ سرمچار زدگ یا شھید نہ بیتگ انت ھمے وڑ دزگیر کتگیں مردم بی ایل اے ءِ فدائی یونٹ مجید بریگیڈ ءِ گور ءَ انت ءُ اے گپ ءَ تچک کنت کہ اگاں پاکستانی پوج ءَ نزیک ءَ آیگ ءِ جھد ءَ کنت گڑا فدائین ابید ءِ پشت کنزی ءَ شھادت ءَ گوں پاکستانی پوج ءِ دیمپانی ءَ کنت-

بلوچستان ءِ دمگ کیچ ءَ ناشناسیں مردماں پاکستانی پوج آئی ای ڈی اُرش ءِ نشانگ کتگ –

پوج کیچ ءِ دمگ میناز مزن کور ھند ءَ نشانگ کنگ بیتگ-

اِھوالکار ءِ رِد ءَ اُرش ءِ نشانگ ءَ آؤکیں گاڑی سرجمی ءَ تباہ بیتگ آئی ءَ سوار کارمند بیران ءُ ٹپی بیتگ اَنت-

بلے اے درگت ءَ چہ واکدار درشان دیم ءَ نیتکگ-

زانگ بہ بیت کہ بلیدہ ءَ آجوئی لوٹوکیں سلاہ بندیں گل پُرکار اَنت بلے اے اُرش زمہ واری انگت ھچ گل ءَ نہ زرتگ-

نوکتریں اھوال: بلوچ لبریشن آرمی ( بی ایل اے) ءَ بولان ءِ دمگ ڈھاڈر مشکاف ءَ جعفر ایکسپریس دستیگ کتگ، ءُ سد ءَ گیش پاکستانی پوج ءِ کارندہ دزگیر کتگ انت- بنداتی اھوالانی رد ءَ گھگیری ءَ شش پوجی کارندہ مرتگ انت-

زمینی کاروائی پشتکنزی: پاکستانی زمینی لشکر ءَ ریسکیو آپریشن بندات کتگ، بلے بی ایل اے ءِ سرمچاراں ترندیں جنگ ءَ پد پاکستانی پوج پشتکنزیتگ ءُ زورگریں پوج دوبر کنٹرول کنگ ءَ بے سوب کتگ-

برزی بمبگواری: زمینی کاروائیانی بے سوبی ءَ پد پاکستانی ھیلی کاپٹر ءُ ڈرونز بمبگواری برجاہ انت، چریشی ءَ جنگ ءِ توک ءَ گیشی آیگ ءَ انت-

بی ایل اے ءِ بیھار: بی ایل اے ءَ تچک ءَ بیھار داتگ کہ اگاں برزی اُرش دارگ نہ بیت دراھیں 100+ دزگیریں مردم آیوکیں یک ادارے ءِ توک ءَ کُشگ بنت-

دزگیریں مردم کے انت؟ بی ایل اے ءِ رد ءَ پاکستانی پوج، پولیس، آئی ایس آئی ءُ اے ٹی ایف ءِ کارندہ دزگیری ءَ انت کہ پنجاپ ءَ موکلانی وھد ءَ روگ ءَ بیتگ انت- زالبول، زھگ ءُ بلوچ مساپر یل دیگ بیتگ انت-

بی ایل اے ءِ جنگی یونٹ:اے آپریشن ءَ بی ایل اے ءِ مجید بریگیڈ( فدائی یونٹ) سروکی کنگ ءَ انت ایشی ءَ ایس ٹی او ایس، فتح اسکواڈ ءُ زراب یونٹ کمک گون انت-

پاکستان ءِ واستا مشکلیں وھد:پاکستانی ریاست ءِ گور ءَ گچینی پیسلہ ھست انت— یا برزی اُرش ءَ بہ دار ایت ءُ گپ ءُ تران ءِ سر ءَ دزگریں کارندھانی زند ءَ بہ رکین ایت یا وتی 100 ءَ گیش کارندھانی مرگ ءَ نزیک بہ کنت –

مزنیں منزل: اے وئیل بلوچ گھگیری ءِ گیش بوگ ءِ سانمندی ءَ دیم ءَ کار ایت، پرچاکہ بی ایل اے ءِ اسٹریجک ءِ مول ءُ مراد ءُ مزنیں پوجی کارندھانی نشانگ کنت-

دیم ءَ چی بیت انت؟ ھاں پاکستان برزی اُرشاں دار ایت یا دیم ءَ گیش کاروائی کنت، چریشی ءِ آسر ءَ وتی پوجی کارندھانی مرگ ءِ ترس گیش بیت انت؟

نہ بچار ات: اے یک برجاھیں جاورھالے، ءُ گیش نوکتریں اھوال کاینت –

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں جعفر ایکسپریس سر ءَ دستیگ کنگ ءَ پد زورگریں پوج ءِ جھلی کاروائی سرجمی ءَ پُشتکنز کتگ- تُرندیں میڑ ءَ پد پاکستانی جھلی ٹولی پُشت کنزگ ءَ لاچار بیتگ اَنت، بلے پاکستانی ھیلی کاپٹر ءُ ڈرونز ءِ بمبگواری انگت برجاہ ءَ اِنت-

بی ایل اے تچکی ءَ بیھار دنت کہ اگاں بُرزی اُرش زوت بند کنگ نہ بیت گُڑا سرجمیں سد ءَ گیش دزگیریاں آؤکیں یک کلاکے ءِ تہ ءَ کوشین ایں- اے کاروائی ءَ بی ایل اے مجید بریگیڈ، ایس ٹی او ایس، فتھ اسکواڈ ءُ زراب یونٹ ءِ سرمچار جوانیں وڑے ءَ پسّھی کاروائی ءَ دلگوش اَنت، ءُ کجام وڑیں پوجی سرکپگ ءَ سنگین ایں آسر بیت-

جارکش ءَ گْوشتگ دُژمنیں پوج ءِ سد ءَ چہ گیش کارمند تنی وھدے بی ایل اے دزگیری توک ءَ اَنت- زورگریں پوج ءِ گور ءَ انگت ھم وھد ھست کہ آ بُرزی بمبگواری ءَ بند بہ کنت وتی کارمندانی زندمان ءَ بہ رکین اِیت، اگاں ناں سرجمیں دزگیریانی کوش زمہ واری پاکستانی پوج سر ءَ بیت-

بلوچ لبریشن آرمی ءِ جارکش جیئند بلوچ ءَ گوشتگ مروچی بولان ءِ دمے ڈھاڈر مشکاف ءَ یک گچینی کاروائہ ءِ وھد ءَ جعفر ایکسپریس پٹری ءَ ایرگپتگ ءُ گپتگ- گھگیری کنگ ءَ شش پوجی کارندہ کشتگ انت ءُ سَد ءَ گیش مساپر بی ایل اے ءِ دست ءَ انت-

جیئند بلوچ ءَ گوشتگ گپتگیں مردمانی توک ءَ پاکستانی پوج، پولیس، اے ٹی ایف ءُ آئی ایس آئی ءِ ھازر سروس کارندہ ھوار انت کہ چُٹیانی موکل ءَ پنجاپ ءَ روگ ءَ بیتگ انت – بی ایل اے گپ ءَ بیھار دنت اگاں زورگریں پوج ءِ نیمگ ءَ سُر پُر بیت گڑا گپتگیں مردم کُشگ بنت انت-

جارکش ءَ گوشتگ اے آپریشن وھد ءَ بی ایل اے ءِ سرمچاراں زالبول، زھگ ءُ بلوچ مساپر یل داتگ انت آ دگہ درست زورگریں پوج ءِ کارندہ انت-

جیئند بلوچ ءَ گوشتگ اے کاروائی ءِ سروکی ءَ بی ایل اے ءِ فدائی یونٹ مجید بریگیڈ کنگ ءَ انت – کہ ءُ فتح اسکواڈ، ایس ٹی او ایس ءُ زراب سرجمی ءَ کمک کنگ ءَ انت-