TBP Balochi

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مروچی زؤرگریں پاکستانی پوج ءِ نیمگ ءَ داتگیں وارننگ ءُ جنگی بندیگانی مٹ کنگ لشکری زوراکی ءَ ترند کنگ ءُ گڈی پسو داتگ- دشمنیں پوج ءَ مروچی توپ ھانہ ءُ مزنیں سلاھانی گون ءَ پیشکدمی ءِ جھد کتگ چریشی ءِ آسر ءَ ترندیں جنگ ءُ چوپ ءَ بی ایل اے ءِ سرمچاراں بنکی لشکری رپکاں دشمن ءِ سر ماں ھاکاں سرجھل کتگ ءُ دشمنیں پوج ءَ ٹوھیں پروشی ءِ پشکنزی کنگ ءَ لاچار کتف- اے تک ءَ بی ایل اے ءِ سَے سرمچار ڈیھ ءَ ندر بیتگ انت کہ بلوچ راجی جنگ ءِ آجوئی ءِ پڑ ءَ راجدپتر ءَ وتی نام اش نوک کتگ-

جارکش ءَ گوشتگ پاکستانی پوج اے زوراکی ءَ وتی مزنی ءَ پیش دارگ ءَ انت ءُ بندیگانی مٹینگ ءَ گیر سنجیدگ انت ءُ بی ایل اے ءَ یک کلاکے ءَ پیش دگہ 50 بندیگ یرگمالی پوجی کارندہ کشتگ انت – کہ بلوچ راجی آمیدگس ءَ بلوچ نسل کشی، زورانسری بیگواھی ءُ مڈیانی لٹ ءُ پُلاں دزمانجن بیتگ انت-

آئی ءَ گوشتگ ایشی ءَ پیز گوستگیں شپ ءَ پاکستانی پوج ءِ ڈرون اُرشے پسو ءَ 10 یرگمالی کارندہ کشتگ انت – ایشی ءَ ابید جنگ ءُ چوپانی وھد ءَ دگہ 10 ءُ گوستگیں روچ ءَ 30پاکستانی پوجی کشتگ انت – ایشی ءِ تک ءَ دشمن ءِ مرتگیں کارندھانی کساس 100 ءَ سر بیتگ انت ءُ اے وھد ءَ 150 ءِ نزیک ءَ یرگمالی انگت ءَ بی ایل اے ءِ دست ءَ انت-

آئی ءَ گوشتگ بی ایل اے دشمن ءَ را یک گڈی کلوہ ءَ دیگ ءَ انت کہ اگاں زورگریں پوج ءَ دوبر کجام ھم لشکری کاروائی ءِ کوشش کت دراھیں یرگمالیاں تچک ءَ زوت کش ایں-

آئی ءَ گوشتگ بی ایل اے وتی دراھیں پیسلھانی سر ءَ اوشتاتگ ءُ تاکت ءَ دار ایت، سنچ ءُ پر امیتی دار ایت کہ اے گھگیری یک جاھے ءَ نہ انت بلکیں بلوچ راجی آجوئی ءِ راہ ءَ نا پرموشوکیں راھے- زورگریں دشمن ءِ واستا ھمک دمان گران تر بیان انت- بی ایل اے بلوچ راجی گھگیری ءِ واستا ھرچ وڑیں گام ءَ چست کنت –

درشان ءِ گڈسر ءَ گوشتگ پاکستانی پوج ءِ گور ءَ بس بیست ادار پشکپتگ انت اگاں سنجیدگ نہ بیت ھمک گوزوکیں ادار ءِ سر ءَ بندیگاں بلوچ راجی آمیدگس ءِ پیسلہ ءِ تک ءَ سزا دے ایں-

بلوچ لبریشن آرمی ءَ وتی آفیشل چینل ھکل ءَ اُرش ءَ ھوار سیمی جنگول ءِ تواربندیں کلوہ شنگ کتگ کہ آئی ءِ تہ ءَ گل ءِ باسک وتی کماندار ءَ چہ ریل سر ءَ دستیگ ءُ دزگیریانی جاورھالاں سرپدی دیگ ءَ اِنت-

سلاہ بندیں گل نیمگ ءَ چہ تنی وھدے آفیشل چینل ھکل سر ءَ بازیں تامُربند ءَ تواربندیں ریکاڈنگ شنگ کتگ اَنت-

تواربند ءَ بی ایل اے ءِ باسک کہ تچکی ءَ وتی کماندار ءَ چہ گپ کنگ ءَ اِنت راست کتگ کہ سرجمیں زالبول، زھگ ءُ کماشیں دزگیری یل داتگ اَنت وھدے کہ گل رِد ءَ دوسد ءَ چہ گیش پاکستانی پوج ءِ کارمند آیانی گور ءَ اَنت-

بی ایل اے ءِ شنگ کتگیں توار بند ءَ میڑانی ھم پدری کتگ ءُ گْوشتگ کہ ڈرون جتگ ءُ دور داتگ ءُ بیست کارمند کوش ءَ پد پوجی پیشکدمی داشتگ-

گل ءِ رِد ءَ مروچی سُھب ءَ پاکستانی پوج ءِ نیمگ ءَ چہ مارٹر گولہ آس داتگ چریشی ءِ آسر ءَ وتی بازیں دزگیریں کارندہ ٹپی ءُ مرتگ اَنت-

زانگ بہ بیت کہ شپ وھد ءَ درزنانی مساپر گیشتر زالبول، زھگ ءُ کماشیں مردم ھوار بیتگ اَنت شال ءَ سر بیتگ اَنت ءُ یل کنگ بیتگیں بازیں دزگیریاں رسانکدر ءَ داتگیں انٹرویوز ءَ اے گپ راست کتگ کہ آ اُرشکاراں وت پہ سلامتی یل داتگ اَنت-

ھمے وڑ بلوچ لبریشن آرمی ءَ وتی نوکیں درشان ءَ گْوشتگ کہ ریاستی واکدار گور ءَ تھنا بیست چار ادار ھست اگاں لوٹانی سر ءَ گامگیج زیرگ نہ بیت گُڑا سرجمیں بندیگیں بلوچاں راجی آمیدگس پیش کن ایں بلوچ راج ءِ ھلاپ ءَ زوراکی ءَ ھمگرنچی ءِ سر ءَ سزا دیگ بنت-

گل ءَ بیھار داتگ کہ وھدے ھلاس بیگ ءُ لوٹانی سر ءَ گامگیج نہ زیرگ ءِ دروشم ءَ آ ھرچ ادارے ءَ پنچ دزگیریانی سزا سر ءَ گامگیج زیرگ بیت-

گل ءَ دیمتر ءَ گْوشتگ کہ جعفر ایکسپریس ءُ سرجمیں دزگیریانی سر ءَ آیانی دستیگ یکشل ءَ برجاہ ءَ اِنت ءُ کجام وڑیں پیشکدمی ءِ دروشم ءَ دزگیری کشگ بنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ سرمچاراں گوستگیں بیست ءُ چار ساھتاں جعفر ایکسپریس ءُ آئی ءَ جاڑیگین یرگمالیاں کنٹرول داشتگ- دشمن ءِ 200 ءَ گہش ھازر سروس پوجی، انٹیلیجنس ایجنٹس، پولیس ءُ نیم پوجی کارندہ بی ایل اے ءِ دست ءَ انت- اے ھما مردم انت کہ بلوچ سرڈگار ءِ سر ءَ ریاستی ناشرکاری، زورانسری بیگواھی، ابید آمیدگس ءَ کوش ءُ راجی مڈیانی پُلپھانچی ءَ ھوار بیتگ انت-

جارکش ءَ گوشتگ بی ایل اے میان اُستمانی رھبندانی ءُ انسانی ھکانی یک داب ءَ چار ایت ءُ پاکستانی ریاست ءَ بندیگانی مٹ ءَ 48 ادار داتگ بیتگ بلے زورگرین پوج ءَ وتی مزن مری کنان ءَ بے وسی ءُ یکشل ءَ دیری ءِ نام ءَ دیگ ءَ انت پاکستان وتی پوجیانی زندگی ءِ رکینگ ءَ سنجیدگ نہ انت بلکین دودانی لگتمالی ءُ لپاشگی ءِ درشان ءَ کنگ ءَ انت-

آئی ءَ گوشتگ نی یک روچے سرجم بیتگ ءُ زورگریں ریاست ءِ گور ءَ بس بیست ءُ چار ساھت پشکپتگ – اگاں ات مھلت ءِ وھد ءَ پاکستانی پوج ءَ ھچ گامگیج نہ زرت گڑا دراھیں یرگمالی بلوچ راجی آمیدگس ءَ پیش کنگ ءُ آیانی سر ءَ بلوچستان ءَ ریاستی زُلم، نوآبادیاتی زورگری، نسل کشی، لٹ ءُ پلی ءُ جنگی جرمانی دزمانجنی ءِ بھتام ءَ مقدمہ ھلاینگ بیت انت-

آئی ءَ گوشتگ اے ٹرائل سرجمی ءَ گیر جانبدار ءُ تچکی ءَ بیت اِنت، ءُ جرم ءِ منانک ءَ بلوچ راجی رھبندانی رد ءَ مجرماناں سزا دیگ بیت اِنت- پاکستان ءُ آئی ءِ لشکری ادار اے سرپد بنت کہ دیری ءِ پندل ءُ دروگاں جاورھالاں گپت کن انت اے آیانی سنگینیں رد پھمی انت ءُ بی ایل اے وتی جتگیں جار ءَ سرجمی ءَ واک ءُ تاکت ءَ دار ایت-

جارکش ءَ گوشتگ اے راستی تچک بیتگ کہ پاکستانی پوج ءَ نہ وتی کارندھانی جانانی پروا ھست ناکہ آ گپ ءُ تران ءَ سنجیدگی ءَ دلمانگ انت- اگاں اے رویش برجاہ بیت گڑا داں مھلت ءِ ھلاسی ءَ پد ھمک کلاک ءَ پنچ یرگمالیاں بلوچ راجی آمیدگس ءِ پیسلہ ءَ سزا دیگ بنت اِنت-

آئی ءَ گوشتگ بی ایل اے دشمن ءَ گڈی موکہ ءَ دیگ ءَ انت کہ آ پندل ءُ دروگاں یل بہ دنت راستی ءَ بئیت راستی ءَ بندیگیانی مٹ ءَ جوانیں گامیج بہ زیر ایت اگاں ناں بلوچ راجی گھگیری پیسلہ نا واتر بیت ھمک دمان دشمن ءِ واستا سنگین بیت اِنت-

بلوچ لبریشن آرمی ءِ آفیشل چینل ھکل ءِ نیمگ ءَ بولان ءَ جعفر ایکسپریس ءِ سر ءَ بیوکیں اُرش ءِ وھد ءِ تامر شنگ کنگ بیتگ-

تامر بند ءَ گندگ بیت اِنت اود ءَ بنداتی ءَ ریل ءَ بمب اُرش ءِ نشانگ کن انت ءُ پد ءَ جھل ءَ مردم گندگ بنت اِنت-

زانگ بہ بیت چِد ءُ پیش بی ایل اے ءَ اُرشکارانی توار بندیں کلوہ شنگ کتگ ات اَنت-

ھمے وڑ بازیں ادارھانی گوزگ ءَ پد ھم بی ایل اے ءِ نیمگ ءَ جعفر ایکسپریس ءِ دستیگی برجاہ انت-

بی ایل اے ءِ جارکش ءَ گوشتگ سرکار مئے لوٹاں سرجم کنت یا وتی بندیگ کتگیں پوجیانی لاشاں چِست کنت انت-

بی ایل اے ءَ گوستگیں روچ ءَ چہ چِل ءُ ھشت کلاکانی ودار داتگ ءُ انگت ءَ بیست ءُ چار ادار ءَ گیش گوستگ ءُ بلے داں انگت ءَ سرکار گپ ءُ تران ءِ نیمگ ءَ سُر ءُ پُری ءَ گندگ نہ بیت اِنت-

کیچ ءِ دمگ بلیدہ بٹ ءَ تیرسپتگیں لاشے دزکپتگ کہ آئی ءِ پجار نہ بیتگ-

لیویز پورس ءَ لاش چِست کتگ ءُ اژدری چار ءُ ٹپاس ءِ ھاتر ءَ دمگی نادراہجاہ ءَ سر کتگ-

زانگ بہ بیت بلوچستان ءَ ناپجار ءُ زانگولیں لاشانی دزکپگ ءَ انسانی ھکانی واستا سنگینے جیڑھے بیتگ- بلے سرکاری تکاں اے درگت ءَ دگہ گپ دیم ءَ نیتکگ انت-

جعفر ایکسپریس ءِ انگت ءَ بی ایل اے ءِ دست ءَ انت، بیست ءُ دو کلاک سرجم بیتگ انت داں انگت ءَ ریل بی ایل اے ءِ سرمچارانی دست ءَ انت-

نوکیں ھالانی رد ءَ بی ایل اے ءَ گوستگیں روچاں ارش کنوک ءِ نیمگ ءَ چہ آڈیو کلوہ شنگ کتگ۔ کہ انگت ریل ءِ تہ ءَ یرگمالانی گور ءَ جاڑیگ انت۔

اے وھد ءَ کم چہ کم دو سد ءُ چاردہ مردم بی ایل اے ءِ دست ءَ ٹرین ءِ تہ ءَ یرگمال انت ایشانی تہ ءَ گیشتریں بھر پاکستانی لشکر ءِ کارندہ اَنت۔

دومی نیمگ ءَ ریل ءِ انتظامیہ ءِ نیمگ ءَ جوڑ کتگیں انفارمیشن ڈیسک شھریانی سرپدی دیگ ءَ بے سوب اِنت۔

سیاد ءُ وارسانی گشگ اِنت کہ کوئٹہ ریل ءِ اسٹیشن ءَ 10 تابوت آرگ بوتگ اسٹیشن انتظامیہ ءِ رد ءَ تابوتانی بابت ءَ مارا ھچ وڑیں سرپدی نیست انفارمیشن ڈیسک مارا جچ وڑیں سرپدی دیگ ءَ نہ اِنت۔ چہ سُھب ءَ مارا انفارمیشن ڈیسک ءُ کنٹرول روم ءِ کش ءُ گوراں پِر ترگ ءَ ایں-

زانگ بہ بیت کہ گوستگیں روچ ءَ بی ایل اے ءَ بولان ءِ دمگ مشکاپ ءَ جعفر ایکسپریس ءِ سر ءَ اُرش کتگ ءُ ٹرین ءِ تہ ءَ سواریں پاکستانی اُرد ءِ مزنیں کساسے ءَ کارندہ یرگمال کتگ اَنت ءُ ٹرین ءِ تہ ءَ سواریں جنین ءُ چُکاں ھوار پیریں مردم یلہ کنگ بوتگ اَنت۔

بی ایل اے ءَ یرگمالاں جنگی بندیگ ءِ درجہ داتگ بی ایل اے ءَ پاکستانی لشکر ءَ را 48 کلاک ءِ وھد داتگ کہ آ یرگمالانی بدل ءَ مئے بندیگیں یل بہ کنگ ءِ سر ءَ تپاک بہ کن اَنت۔

بی ایل اے ءِ جارچین جیئند بلوچ ءَ لشکر ءَ را ھال داتگ کہ پاکستانی لشکر ءِ زوراکیں گامگیج ءِ آسر ءَ ھر رند ءَ 10 یرھمال کشگ بنت ءُ اگاں واکدار اے لوٹاں منّگ ءَ نہ اَنت گڑا الٹی میٹم ءِ گڈسر ءَ ھر کلاک ءَ پنچ یرگمال کشگ بنت۔

دومی نیمگ ءَ بی ایل اے ءِ لوٹانی بابت ءَ پاکستانی واکدارانی نیمگ ءَ انگت ءَ سرکاری لیکہ دیم ءَ آرگ نہ بوتگ ۔

بی ایل اے ءِ نیمگ ءَ یلہ داتگیں بازیں کچے ءَ جنین، چُک ءُ پیریں مردم گوستگیں شپ ءِ بے وھد ءَ شال ءَ سر بوتگ اَنت۔

اھوالانی رد ءَ بلوچ لبریشن آرمی ءِ نیمگ ءَ یلہ داتگیں مردماں رسانکدر ءَ گْوشتگ کہ آیاں اے وئیل ءِ وھد ءَ ناوشیں جاورھال دیستگ اَنت، اُرش کنوکاں مارا یلہ داتگ ءُ ما وتی جان رکینتگ۔

برطانیہ ءِ شنگکاری ادارہ بی بی سی اردو ءِ رد ءَ 80 ءِ نزیک ءَ یرگمال رکّینگ بوتگ اَنت کہ آھانی تہ ءَ گیشتریں مردم جنین، زھگ ءُ پیریں مردم اَنت۔

بی بی سی ءَ گوں تران کنان ءَ یلہ داتگیں یرگمالیانی اے وئیل ءِ بابت ءَ چوش بیان کتگ: اُرش گوں مزنیں تراک ءَ بندات بوتگ ءُ یک کلاکے ءَ تیر گواری برجاہ بوتگ، ایشی ءَ پد سلاہ بندیں مردم ٹرین گاڑی ءِ تہ ءَ اتکگ ءُ مردمانی پجار کنگ اش بندات کتگ۔

چہ رکّینتگیں ٹولی ءِ تہ ءَ یکے مشتاق احمد ءَ بی بی سی ءَ گوں تران کنان ءَ گْوشتگ کہ مئے بوگی ءِ دروازگاں سئے سلاہ بندیں مردم پھریز کنگ ءَ اَنت ایشاں مردماں گْوشتگ کہ ما لس مردماں، جنیناں، پیریں مردماں ءُ بلوچ ءَ ھچ نہ کن ایں۔

آھاں گشت کہ اے مردم بلوچی ءَ گوں یکے دومی ءَ گپ کنگ ءَ بیتگ انت ءُ آہانی سروک وار وار آھاں گشگ ءَ بیتگ کہ سیکورٹی کارندگانی سر ءَ ھاسیں چمے بدار ات، اے چہ دست ءَ در مہ کپ انت۔

دگہ یرگمال اسحاق نور ءَ اے وئیل ءِ بابت ءَ گپ جنان ءَ گْوشتگ کہ آیاں کم چہ کم یازدہ مردم چہ مئے بوگی ءَ ایر کتگ ءُ گْوشتگ کہ اے جاہ ءَ یک مردمے ءَ کمو مزاحمت کنگ ءِ جھد کتگ پمیشکا آئی ءَ را ٹارچر کنگ بوتگ ءُ ایر کنگ بوتگ پد ءَ تیرگواری ءِ توار بوتگ چہ ایشی ءَ پد بوگی ءِ تہ ءَ ھواریں مردماں گپانی رندگیری کتگ۔

اسحاق نور ءَ گشت کہ بیگاہ ءَ آہاں گشت کہ ما بلوچ، جنین، زھگ ءُ پیریں مردماں یلہ کنگ ءَ انت من ءَ یلہ کنگ ءَ نہ آں ، بلے وہدے من آہاں گشت کہ من تربت ءِ نندوکے ءُ منی ھمراھی ءَ زھگ ءُ جنین گون انت گڑا آھاں من ءَ ہم یلہ داتگ۔

سیمی رکّیتگیں یرگمال محمد اشرف ءَ بی بی سی ءَ گوں تران کنان ءَ گْوشتگ کہ سلاہ بندیں مردماں پیریں مردم، لس مردم، جنین ءُ چُک یلہ داتگ اَنت ءُ پد ءَ بیگاہ ءَ آھانی دراجیں راہ پہ پنیر اسٹیشن ءَ بندات بوتگ۔

آئی ءَ گْوشت کہ ما سئے ءُ نیم کلاک ءَ گوں مزنیں مشکلے ءَ پنیر ءِ اسٹیشن ءَ سر بوتیں، پرچا کہ ما تھنائی ءِ آماچ بوتگ اِتیں ءُ مئے ھمراہ ورنائیں جنک، جنین، پیریں مردم ءُ چُک ھم ھست بیتگ انت۔

بی بی سی ءِ اھوالکارے ءَ گوں تران کنان ءَ محمد اشرف ءَ گْوشتگ کہ گیشتریں مردماں وتی سامان یلہ داتگ اَنت ءُ لھتے وتی ساماناں گوں وت آرگ ءَ اَنت کہ من آھاں گْوشتگ کہ اد ءَ مردمانی جان ءِ رکّینگ گران بوھگ ءَ اِنت البت لھتے نزوریں مردم ھست اَنت پمیشکا ما آیاں وتی شانک ءَ برتگ ءُ اد ءَ سر بوتگیں ۔

آئی ءَ گوشت کہ مساپرانی تہ ءَ سک باز ترس ءُُ بیم بوتگ، اے قیامت ءِ ندارگ بوتگ۔

ھمے رنگ ءَ بھاوالپور ءَ روکین مسافر بشیر ھم گوں وتی جن ءُ دو چُکاں سفر کنگ ءَ اَت آئی ءَ بی بی سی ءَ گْوشتگ کہ سلاہ بندیں مردم اتکگ اَنت ءُ مارا گْوشتگ کہ جھل ءَ بہ کپ اِت ءُ ما چمیشکا رک اتگ انت-

سلاہ بندیں مردماں مارا گشت کہ پُشت ءَ مہ چار اِت، ایشی ءَ پد ما چہ گرانیں راہاں پنیر اسٹیشن ءَ سر بوتگ انت۔

بلوچستان ءِ دمگ چہ ھاران ءَ گوستگیں شپ ءَ سلاہ بندیں مردمانی مزنیں کچے ءَ پاکستانی پوج ءِ یک پوسٹے ءِ سر ءَ اُرش کتگ-

اِھوالکار ءَ ٹی بی پی ءَ گْوشتگ کہ ھاران ءَ گرُک ءُ دالی ءِ میانی دمگ ءَ برجاھیں پاکستانی پوج ءِ پوسٹ سلاہ بندیں مردماں نشانگ کتگ-

تُرندیں میڑ ءَ پاکستانی پوج ءِ کارمندانی بیرانی ءِ ھال اِنت-

واکدار ءَ تنی وھدے اے درگت ءَ ھچ وڑیں درشان شنگ نہ کتگ – دمگ ءَ بلوچ آجوئی لوٹوکیں گل پُرکار اَنت بلے اے اُرش زمہ واری انگت ھچ گل ءَ نہ زرتگ –

بلوچ لبریشن آرمی ءَ گوشتگ پاکستانی پوج اگاں زوراکی ءِ نیمگ ءَ جنز ات گڑا ھمک گام ءَ 10 بندیگاں کشان کن ایں-

بلوچ لبریشن آرمی ءِ نیمگ ءَ بولان ءِ نزیک ءَ چہ شال ءَ دیم پہ پشاور ءُ پنجاپ ءَ روکیں جعفر ایکسپریس ءِ دستیگی برجاہ انت، ھمے وڑ ریل ءِ واکداراں 144 ءَ گیش پاکستانی پورسز بندیگیں کارندھانی ھال راست کتگ-

ریل ءِ واکداراں رسانکدراں داتگیں کچ ءُ کساسانی رد ءَ ٹرین ءَ بندیگانی توک ءَ 37 سپاھی، 28 نائیک، 23 لانس نائیک، 15 ھوالدار،14 سنگل مین، 8 سپیپر،4 نان کمیشنڈ آفسر،2 بمبار ڈر، 1 گنر، 3 نائب سوپیدار، 4 لوئر ھوالدار ءُ 15 مرد ءُ زالبولیں کارندہ ھوار انت-

ریل ءِ واکداراں گیش ھال راست کنان ءَ گوشتگ اے 144 ءِ کارندھاں میجر ءُ کیپٹن رینک ءِ آفسر ھوار انت-

زانگ بہ بیت پاکستان ءِ وزیر داکلہ طلال چوھدری ءَ پاکستانی پورسز ءِ بندیگانی ھال راست کتگ ات بلے آئی ءَ کچ ءُ کساس نہ گوشتگ انت –

دومی نیمگ ءَ بی ایل اے ءَ گوستگیں بیست ءُ چار ساھاتاں جعفر ایکسپریس ءِ سر ءَ دستیگی برجاہ داشتگ ءُ چہ واکداراں جنگی بندیگیانی مٹ کنگ ءِ لوٹ ءَ کنگ ءَ آئی ءَ 48 ادارانی مھلت داتگ بیتگ-

بلوچ لبریشن آرمی ءِ رد ءَ جعفر ایکسپریس ءِ ھائی جیکنگ کنگ ءِ وھد ءَ سدانی مردم گپتگ انت ءُ ھمے وھد ءَ بی ایل اے ءَ 80 گیش لس مھلوک، بلوچ شھری ءُ زالبول یل داتگ انت – بی ایل اے ءَ گیش گوشتگ 214 پورسز ءِ کارندہ ءُ سویلینز ءِ بندیگ کنگ ءِ جار پرینتگ-

بی ایل اے ءِ جارکش جیئند بلوچ ءَ پورسز ءَ را بیھار داتگ ءُ گوشتگ پاکستانی پوج ءِ نیمگ ءَ زوراکی ءِ ھمک گام ءِ سر ءَ 10 بندیگاں کشان کن ایں ءُ اگاں واکداراں مئے لوٹ نہ من ات انت الٹی میٹم ءِ ھلاسی ءِ ھمک ادار ءَ 5 بندیگ کشان کن ایں –

داں انگت ءَ پاکستانی واکدارانی نیمگ ءَ بی ایل اے ءِ لوٹانی بارو ءَ ھچ گپ دیم ءَ نیتکگ انت-

چہ شال ءَ پشاور ءَ رؤکیں جعفر ایکسپریس دوازدہ کلاکانی گوزگ ءَ پد تنی وھدے سُرنگ ءِ تہ ءَ بی ایل اے ءِ دست ءَ اِنت-

دمگی اِھوالکار رِد ءَ پوج تنی وھدے اود ءَ روگ ءَ سوبمند نہ بیتگ، پوج مزنیں کچے ءَ براھم باران ءَ دیم ءَ شُت نہ کتگ اِت-

دمگی اِھوالکار رِد ءَ پوج ءِ لھتے ٹولی کوہ ءَ شتگ ءُ تیرگواری بمبگواری کنگ ءَ اَنت – ءُ براھم بارام ءَ لوگاں شتگ ءُ مردماں دمگ ءِ ھالیگ کنگ بیھار ءَ دیگ ءَ اِنت، چریشی ءِ سبب ءَ چہ دمگی واجکار ءُ پوج ءِ میان ھم جاور نگیگ بیتگ اَنت-

زانگ بہ بیت کہ براھم بارام کسانیں میتگے کہ اود ءَ کساس سی ءِ نزیک ءَ لوگ اَنت وھدے کہ دمگ ءَ نیٹورک ھم بند کنگ بیتگ اَنت-

دومی نیمگ ءَ پوج ءَ ٹاہ داتگ کہ دمگ آپریشن برجاہ ءَ اِنت ءُ بازیں سلاہ بندیں مردمے جنگ بیتگ اَنت-

دومی نیمگ ءَ بی ایل اے ءِ نوکیں درشان ءِ تہ ءَ گْوشگ بیتگ تنی وھدے بی ایل اے ءِ یک سرمچارے شھید ناں ٹپی بیتگ-

درشان ءِ تہ ءَ گوشگ بیتگ کہ دُژمن ءِ نیمگ ءَ چہ تلان کتگیں دروگ ءُ گمراھی ٹاہ راستی ءَ چہ سرجمی ءَ چیر اِنت ءُ وتی پروشی چیر دیگ ناکامیں جُھد ءَ اِنت-

بی ایل اے ءِ نیمگ ءَ چہ پہ سلامتی یل کتگیں مساپر شال ءَ سر بیتگ اَنت رسانکدر ءَ گْوشتگ اِت کہ سلاہ بندیں مردماں ریل دستیگ کنگ ءَ پد زالبول ءُ زھگ ءُ کماش چہ ریل ءَ ایرگپتگیں دیم داتگ اَنت ءُ آ چار اداراں چہ پیادگ اَتکگ ءُ پولیس تھانہ ءَ سر بیتگ اَنت-