TBP Balochi

پاکستان قومی اسمبلی ءِ نیشنل پاٹی ءِ باسک پھلین بلوچ ءَ گوشتگ کہ بی ایل اے ءِ گور ءَ وتکش کنوک ھمنچو باز انت کہ آئی ءَ نوکیں وتکش کنوک ءِ زیرگ بند کتگ – مروچی بلوچستان ءِ قومی اسمبلی ءِ ھچ باسک وتی ھند ءُ دمگاں شُت نہ کنت – تاں ھما وھد ءَ راستیں گچین کاری کنگ نہ بنت ءُ راجی نمائندگاں واک دیگ نہ بیت جیڑہ گیش گیوار نہ بنت –

آئی ءَ وزیر اعلی سرفراز بگٹی ءِ درگت ءَ گوشتگ کہ اگاں من آئیءِ سیاسی بگیر داروکی آں بلے امن ءُ آیمنی ءِ آرگے زمک داری بس ھمائی ءِ نہ انت –

آئی ءَ گوشتگ کہ بلوچستان ءِ جھد نوں سردارانی دست ءَ در اتکگ ءُ وانندھیں ورنایانی دست ءَ انت نوں گھگیری ءِ تہ ءَ ڈاکٹر، پروفیسر ءُ وانندھیں جنک ءُ بچک ھوار انت –

پھلین بلوچ ءَ گوشتگ کہ بلوچستان ءِ مستریں جیڑہ بیگواھیں مردمانی جیڑھ ایں – ھچ چُش ایں میتگ نیست کہ اودا بیگواھیں مردمے نیست انت – آئی ءَ یک وئیلے ءِ زکر کتگ ءُگوشتگ کہ یک ورنایے یازدہ سال ءَ بیگواہ بوتگ، ءُ آئی ءِ گس ءَ سَے وتکُش تراک کنوک در اتکگ –

آئی ءَ گوشتگ کہ مروچی بلوچستان ءَ تانہ ءُ نوکری بھا بوگ ءَ انت ءُ مزن وزیر ءَ یک سالے بیت کہ گوں بلوچستان ءِ باسکاں گوں گند ءُ نند کنگ ءَ نہ انت جیڑہ چوں گیش گیوار کنگ بہ بنت –

آئی ءَ گوشتگ کہ سردار اخترمینگل ءَ استعفی داتگ ءُ اگاں آئی ءِ پاٹی موکل بہ دنت آ ھم ایوان نندگ ءَ یل کنت –

ھالانی رِد ءَ ناشناسیں سلاہ بندیں مردماں نماز مغرب ءِ وھد ءَ وڈھ شھدا چیک پوسٹ سر ءَ اُرش کتگ لیویز فورس کارندھاں چہ سرکاری سلاہ دستیگ کتگ اَنت-

ھُزدار انتزامیہ اے وئیل ءِ پدری کنان ءَ ٹاہ داتگ کہ سلاہ بندیں مردم لیویز کارمنداں چہ یک تُپنگے ءِ بچگرگ ءَ سوبمند بیتگ اَنت-

زانگ بہ بیت کہ بلوچستان ءِ جتاجتائیں دمگاں چہ ھمکروچ پولیس ءُ لیویز کارمندانی سلاھانی دستیگ کنگ ھال آیگ ءَ اِنت-

ڈیرہ بگٹی ءَ سلاہ بندیں مردمانی اُرش ءَ دو مردم سک ٹپیگ بیتگ اَنت پہ الاج ھاتر ءَ پنجاب ءَ برگ بیتگ اَنت-

گیشیں ھالانی رِد ءَ ڈیرہ بگٹی شھر ءَ سلاہ بندیں مردماں تیرگواری کتگ سرکاری پلامرزی کنوکیں ٹولی ءِ دو مردم سک ٹپی کتگ اَنت-

ٹپی بیتگیں مردمانی پجّار محمد حیات ء غلام محمد ٹک شالوانی ءُ سلیم جان ء عبدالحق نام ءَ چہ بیتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ سیزدہ مارچ دوہزار بیست پنچ ءَ نیم روچ ادار یک نیم ءَ مئے سرمچاراں ھاران شھر گواش دگ سر ءَ برجاھیں ایف سی چیک پوسٹ دستی بمب اُرش ءَ نشانگ کتگ چریشی ءِ آسر ءَ دُژمن ءَ جانی ءُ مالی تاوان چست کنگ کپتگ-

جارکش ءَ گْوشتگ اُرش ھمے وھد ءَ کنگ بیتگ وھدے پوج ءِ یک آفیسرے چوکی ءِ تر ءُ گرد ءَ ساڑی بیتگ- اُرش ءَ پد پروش وارتگیں پوج ءَ تُرندیں گواری کتگ- بلے شھری چیرجنگی ءِ رپکاں چہ سرمچاراں شھر ءِ ھاسیں جاگھانی سر ءَ دُژمن ءَ را اُرش ءِ نشانگ کنگ ءَ پد پہ سلامتی دراھگ ءَ سوبمند بیتگ اَنت-

جارکش ءَ گْوشتگ دگہ یک اُرشے دوازدہ مارچ دوھزار بیست پنچ ءِ شپ ءَ بی ایل ایف ءِ سرمچاراں کیچ ءِ دمگ دشت ھوچات ءِ ھند سر ءَ چاریگی ءِ ھاتر ءَ کارمرز بیوکیں زونگ ٹاور ءِ مشینری مانداشتگ ءُ تاوان داتگ-

جارکش ءَ گْوشتگ کہ بی ایل ایف اے اُرشانی زمہ واری ءَ منّ اِیت ءُ اے اِھد کنت کہ چہ بلوچستان ءَ پوج ءِ سرجمی ءَ دراھگ ءَ تاں مئے اُرش برجاہ بنت-

سَے شمبے ءِ نیمروچ ءَ بلوچستان ءِ دمگ بولان ءِ نزیک ءَ جعفر ایکسپریس ءِ سر ءَ بلوچ لبریشن آرمی ءِ دستیگ کنگ ءَ کساس 36 ادار ءِ گوزگ ءَ پد پاکستانی پوج ءِ نیمگ ءَ چار شمبے ءِ شپ ءَ ٹاہ دیم ءَ اتکگ کہ دراھیں بندیگ سلامتی ءَ یل دیگ بیتگ انت ءُ 33 اُرشکار جنگ بیتگ انت-

دومی نیمگ ءَ بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں یک نوکیں درشانے ءَ گوشتگ پاکستانی پوج ءِ جارکش آئی ایس پی آر ءِ ٹاہ دروگ ءُ پروشی ءِ بے سوبی ءِ جھد انت- زمینی راستی ایش انت کہ جنگ یکشل ءَ جتا جتائیں پھناتاں برجاہ انت – دشمن ءَ بازیں کساسے ءَ جانی ءُ لشکری تاوانانی دیمپانی کنگ کپگ انت – زورگریں پوج نا جنگ ءِ میدان ءَ سوبمندی گپت کتگ ءُ نا کہ وتی بندیگیں مردماں بچینت کت کنگ ءَ انت-

بی ایل اے ءِ جارکش ءِ رد ءَ پاکستانی ریاست ءُ آئی ءِ پندل سازوکیں مھلوک ھما مردماں یل کنائینگ ءِ نام ءَ دیگ ءَ انت راستی ایش انت کہ بی ایل اے ءَ وتی جنگی سلاھت ءُ میان اُستمانی رھبندانی رد ءَ وت یل داتگ انت – ایشی ءِ راستی ایش انت پاکستانی پوج داں انگت ءَ وتی کارندھانی پچگرگ وتی جاہ ءَ وتی پروش دیگ ءَ دزبند انت-

آئی ءَ گوشتگ انگت ءَ جنگ ترندی ءَ گوں برجاہ انت ءُ سرمچار ھمک مھاز ءَ دشمن ءَ پشتکنزی ءَ لاچار کنگ ءَ انت-

مشکاف ءِ نزیک ءَ جھمنندیں مردمانی گوشگ انت کہ کوھی دمگاں تراک ءُ بمب ءُ ھیلی کاپٹر ءُ ڈرونانی بال برجاہ انت-

آئی ایس پی آر ءِ ٹاھانی چپ ءَ داں انگت ءَ تامر یا اکس ھچ شنگ نہ بیتگ انت-

گوستگیں شپ ءَ شال ءَ سر بیتگین مساپرانی گوشگ انت کہ آ اُرشکاراں وت یل داتگ انت کہ یک دمگی اھوالکارے ءِ رد ءَ آئی ایس پی آر ءِ آپریشن ءِ ھلاس کنگ ءَ پد شال پریا کلب ءَ بندوکیں اھوالکاراں نزیک ءَ روگ ءِ جھد کتگ گڑا ترندی ءَ گوں مکن کنگ بیتگ انت-

چہ شال ءَ اھوال انت کہ مروچی دگہ 30 لاش دگہ آرگ بیتگ انت کہ جنگ ءِ وھد ءَ مرتگیں کارندھانی ئیگ انت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ پاکستانی پوج ءِ جارکش آئی ایس پی آر ءِ نیمگ ءَ داتگیں دروگ انت ءُ پروش ورگ ےِ بے سوبیں جھد انت- زمینی راستی ایش انت.جنگ یکشل ءَ برجاہ انت- ءُ دشمن ءَ بے کساس جانی ءُ لشکری تاوان بوگ ءَ انت- زورگریں پوج ناں جنگ ءِ میدان ءَ سوبمند بیتگ نا مہ وتی بندیگیں کارندھانی رکینگ ءَ سوبمند بیتگ-

جارکش ءَ گوشتگ پاکستانی ریاست ءُ آئی ءِ دروگ بندیں پندل سازوک کہ ھما مردماں یل کنائینگ ءِ ٹاہ ءَ دیگ ءَ انت جک آ راستی ءَ بی ایل اے ءَ وتی جنگی رھبندانی تک ءَ وت یل داتگ انت – ایشی ءِ بوگ ءَ ابید ھم پاکستانی پوج ءَ وتی بندیگ یل داتگ ءُ پندل سازگ ءَ انت ءُ وتی پروشی ءَ چیر دیگ ءِ جھد ءَ انت-

آئی ءَ گوشتگ انی جنگ ترندی ءَ گوں برجاہ انت ءُ سرمچار ھمک تک ءَ دشمن ءَ پشتکنزی لاچار کنگ ءَ انت ءُ پوج ءَ زمینی درچ ءَ پروش ورگ ءَ پد بلوچ آبادیاں نشانگ کنگ دانکہ وتی لشکری بے وسی ءِ بیراں بہ گراں –

آئی ءَ دیمتر ءَ گوشتگ بی ایل اے جنگی بندیگیانی جیڑہ ءَ ریاست پاکستان ءَ را وھد داتگ آ سنجیدگی ءِ درشان ءَ بہ کنت ءُ وتی بندیگانی مٹ کنگ ءَ گامگیج بہ زیر ایت – بلے زورگریں پوج وتی سپاھیگانی زندگی ءَ بچینگ ءَ بس جنگی رھبندانی چیر ءَ ساہ زورگ ءَ انت نی ریاست ءَ وتی کارندہ مرگ ءِ دپ ءَ داتگ ءُ یل داتف انت ءُ ایشانی مرگ ءِ زمہ وار ھم آئی ءِ وتی سر ءَ کیت انت-

بی ایل اے زمینی راستی ءَ منینگ ءَ پاکستان ءَ چیلنج کن آں کہ اگاں زورگریں پوج ءَ جنگ ءَ باج برتگ گڑا آزاد اھوالکار ءُ گیر جانبداریں اھوالاں جنگ آماچین جاھاں آیگ ءَ بِل ایت – دانکہ ھرکس بہ گند ایت پاکستانی پوج چنکس کساس تاوانانی دیمپان انت-

گڈسر ءَ گوشتگ اے جنگ پاکستانی ریاست ءِ دست ءَ لگوشتگ ھر تک ءَ دشمن ءِ پروش دیگ ءُ بی ایل اے وتی شرتانی سر ءَ اے جنگ ءَ داں گڈسری ءَ سرجمی ءَ تاکت ءُ واک ءَ دار ایت-

بلوچ لبریشن آرمی ءِ بے مٹّیں گامگیج

ٹی بی پی شونگال

لھتے روچ پیش بلوچستان ءِ گوستگیں وزیر داکلہ زپر اللہ زھری ءَ اسمبلی ءِ پیش آیوکیں راستی درشان کنان ءَ گوشتگ بلوچستان ءَ پاکستان ءِ پوج ءِ ناں بلکیں بشیر زیب (سروک بلوچ لبریشن آرمی) ءُ ڈاکٹر اللہ نزر ( بلوچستان لبریشن فرنٹ ءِ سپریم کمانڈر) ءِ رٹ انت ءُ بلوچستان ءِ گچینی شھدگانی سر ءَ آجوئی لوٹوکیں گلانی دزرس اِنت – گوستگیں روچ ءَ بولان مشکاپ ءِ ھند ءَ بلوچ لبریشن آرمی ءِ جتا جتائیں یونٹساں پاکستان ریل جعفر ایکسپریس ٹرین دستیگ کتگ ءُ پاکستان ءِ پوج ءُ ملٹری انٹیلیجنس ءِ دو سد ءَ گیش کارندھانی گرگ تچک کنت کہ بلوچ سلاہ بندیں گل آپریشنل ءِ زور گیش بوگ ءَ انت ءُ بلوچستان ءَ پاکستانی پوج ءِ رٹ ھلاس بوان ءُ پیداک انت-

دنیا ءِ توک ءَ آجوئی ءِ زرمبشتاں اے ڈولیں درور کم گندگ ءَ کیت اِنت کہ گوریلا جنگولاں اے داب ءَ مزنیں کچے ءَ کجام ھم لشکر ءِ کارندہ الگار کتگ انت- مشکاپ ءَ بلوچ لبریشن آرمی ءَ جعفر ایکسپریس ءِ ٹرین ءَ ھوار سدانی کچ ءَ پاکستانی پوجی کارندھانی الگار کنگ جنگی زور، مٹ بوتگیں گامگیج ءُ تاکت ءِ زور ءِ درشان انت – جعفر ایکسپریس ٹرین ءِ دستیگ کنگ بلوچ سلاہ بندانی مھکم ءُ دراج کشیں اُرشانی برجاہ کنگ ءِ درور ءَ پدر کن اَنت-

بلوچ لبریشن آرمی ءَ الگار کتگیں کارندہ جنگی بندیگ گشتگ ءُ مٹ ءَ بلوچ سیاسی بیگواھینانی مٹ کنگ ءَ سنجیدگی ءُ زمہ واریں رویش ءِ درشان کتگ ءُ میان اُستمانی جنگی رھبندانی روگ ءَ ٹرین ءَ سواریں زالبول، زھگ ءُ سویلین یل داتگ انت ءُ یک زمہ واریں گلے ءِ کلوہ داتگ – پوجی مزن مَری ءِ سبب ءَ پاکستانی پوج ءُ انٹیلیجنس ادارھانی الگاریں کارندھانی یل بوگ ءِ گمان کم انت- پاکستان ءِ مزن واکداریں تاکت بلوچ لبریشن آرمی ءِ پیسلہ ءَ ٹپاس کنگ ءُ پوجی کارندھانی گون ءَ گپ کنگ ءِ دروشم ءَ گامگیج زیرگ لوٹ ایت-

بلوچستان ءِ پیش آیوکیں راستیاں تچک بیت اِنت کہ تاکت ءِ زور ءَ بلوچ زرمبشت ءَ سرین پروش کنگ ممکن نہ انت – سلاہ بندیں گلانی پالیسی ءُ گامگیج آسری ءِ گمان گوشگ مشکل نہ انت بلکیں اے ڈولیں ترند ءُ ھترناکیں اُرش پاکستانی پوج ءِ سر ءَ برجاہ بنت اِنت-

بلوچستان ءِ مانگش اتگیں سرکار ءِ وزیر ءُ پاکستان ءِ واک ءَ داروکیں سیاسی دھشت ءُ پاٹی بلوچ جیڑہ ءَ گپ ءُ تران کنگ ءَ گشینگ ءَ یکشل ءَ درشان ءَ کنگ ءَ انت بلے بلوچ لبریشن آرمی ءِ سنجیدگیں پیشکش ءِ سر ءَ پیش گامی کنگ ءَ ابید گیرسنجیدگیں رویش ءِ درشان ءَ کنگ ءَ انت – بلوچ لبریشن آرمی ءِ سنجیدگیں جھد ءَ منگ ءِ پسو ءَ الگاریاں ریاستی کارندھاں رکینت کت انت – اگاں تاکت ءِ دروشم ءَ جیڑہ ءِ گشینگ ءِ پالیسی برجاہ بیت گڑا دیر نہ بیت کہ ایشی ءِ آسر ریاست ءِ واستا نُکسان بیت اِنت-

بلوچستان ءِ دمگ بولان ءَ پاکستانی پوج ءِ لشکر تنی وھدے برجاہ، مشکاف ءُ کش گور ءِ دمگ پاکستانی پوج ءِ انگیر ءَ اَنت-

بلوچ لبریشن آرمی ءِ نیمگ ءَ چہ سے شمبے روچ ءَ جعفر ایکسپریس ءِ دستیگ کنگ ءَ پاکستانی پوج ءِ کارمندانی یرگمال کنگ ءَ پد بولان ءِ دمگ مشکاف ءُ کش گوراں تنی وھدے پوجی لشکر کشی برجاہ ءَ اِنت-

اِھوالکار ءَ ٹی بی پی ءَ گْوشتگ کہ مشکاف ءُ کش گور ءِ دمگاں تنی وھدے لشکر کشی برجاہ ءَ اِنت، ھیلی کاپٹر ءُ چاریگی بالگردانی بُرز بال برجاہ ءَ اِنت-

دمگی اِھوالکار رِد ءَ پوج ءَ روگ ءُ آیگی راہ بند کتگ اَنت ھچ کس ءَ سُر ءُ پُر کنگ ءِ موکل ءَ دیگ ءَ نہ اِنت-

زانگ بہ بیت گوستگیں شپ ءَ ھم بلوچ لبریشن آرمی ءِ جنگلول ءُ پاکستانی پوج ءِ کارندھانی میان ءَ تُرندیں میڑ بیتگ وھدے کہ پاکستان پوج ءَ ڈرون بالگرد سر ءَ گولہ آس داتگ-

بی آر جی ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گْوشتگ کہ مئے سرمچاراں سے جتاجتائیں کاروائیاں سھبت پور ءَ بند ءُ ساچی شرکت ءِ مشینری تیرگواری کتگ گاڑی ءُ مشینری سک تاوان داتگ اَنت، ڈیرہ بگٹی ءَ گیس پائپ لائن تراکناکیں شورواں چہ تراکینتگ ءُ ڈیرہ مراد جمالی ءَ دیمروئی ءِ کارکنوکیں شرکت ءِ ایکسیویٹر تراک ءَ چہ تباہ کتگ-

جارکش ءَ گْوشتگ کہ یازدہ مارچ ءَ بلوچ ریپبلکن گارڈز ءِ سرمچاراں مگرب ءِ وھد ءَ سھبت پور ءِ دمگ گور ناڑی ءَ دگ جوڑ کنوکیں شرکت سر ءَ تیرگواری کتگ اود ءَ کار کنوکیں گاڑی ءُ مشینری سک تاوان داتگ اَنت-

جارکش ءَ دیمتر ءَ گْوشتگ کہ دومی نیمگ ءَ دوازدہ مارچ ءِ شپ ءَ مئے سرمچاراں ڈیرہ بگٹی ءِ دمگ سوئی ءِ نزیک دولی ءِ ھند سر ءَ سوئی ءَ چہ پنجاب ءَ رؤکیں سی شش انچ گیس پائپ لائن تراکناکیں شور پٹ کتگ ءُ تباہ کتگ-

جارکش ءَ درشان ءِ تہ ءَ گْوشتگ کہ ھمے شپ ءَ بلوچ ریبپلکن گارڈز ءِ سرمچاراں ڈیرہ مراد جمالی ءَ ھادی بخش ھوٹل سر ءَ دیمروئی کار کنوکیں شرکت ءِ یک ایکسیویٹر مشین تراکناکیں شورو پٹ کتگ تباہ کتگ-

جارکش ءَ گْوشتگ بلوچ ریپبلکن گارڈز اے سرجمیں اُرشانی زمہ واری ءَ منّ اِیت ءُ مئے اے وڑیں کاروائی بلوچستان ءِ وتواجھی ءَ تاں برجاہ بنت-