TBP Balochi

گیشیں اھوالانی رد ءَ ڈیرہ بگٹی بیھ لوٹی ءِ ھند ءَ گیرت ءِ نام ءَ تیرگواری ءَ دو زالبولاں چار مردم بیران بیتگ انت ءُ دمگدار وئیل ءِ پٹ ءُ پول ءَ کنگ ءَ انت-

زانگ بہ بیت بلوچستان ءَ جتا جتائیں وھداں گیرت ءِ نام ءَ کوشانی وئیل پیش آیگ ءَ انت – بلے داں انگت ءَ چوشیں وئیلانی مجرم کانون ءِ دست ءَ آرگ نہ بیتگ انت-

بازیں ھنچیں وئیل دیم ءَ اتکگ انت کہ زاتی رنجش ءِ سبب ءَ زالبول کُشگ بیتگ ءُ گیرت ءِ نام دیگ بیتگ انت ءُ پد ءَ اے ڈولیں وئیلانی سبب ءَ ٹکی رسم ءُ دوداں جرمکار رک اتگ انت-

بلوچستان ءَ زالبولانی ھک ءُ لٹ ءُ کٹانی ھلاپ ءَ کار کنوکیں این جی اوز ءُ گلانی رد ءَ سرجمیں پاکستان ءَ زالبول ھمک روچ لوگی جیڑہ ءُ چاگردی زُلمانج آماچ انت اے وئیلانی توک ءَ گیشتر بلوچستان ءَ رپورٹ بوگ ءَ انت-

زانگ بہ بیت گوستگیں سال ءَ بلوچستان ءَ گیرت ءِ نام ءَ کوشانی نوزدہ وئیل رپورٹ بیتگ انت-

بلوچستان ءِ دمگ بولان ءَ مزنیں کچے ءَ پوجی لشکر کشی برجاہ ءَ اِنت-

دمگی اِھوالکار رِد ءَ اے وھد ءَ بولان ءِ دمگ کھمبڑی ، ریکمی، کیرتہ ءُ کش گوراں مزنیں کچے پوجی لشکر کشی برجاہ ءَ اِنت-

اِھوالکار رِد ءَ لشکر کشی ءَ پاکستانی پوج لَس آبادیاں نشانگ کنگ ءَ اَنت ، بازیں ھندانی سر ءَ ھیلی کاپٹراں چہ شیلنگ ءُ بمبگواری کنگ بیتگ-

اِھوالکار گوشگ اِنت کہ لشکر کشی ءَ جنگی ھیلی کاپٹراں ھوار مزنیں کچے ءَ پیادگ پوجی کارندہ بھر زیرگ ءَ اَنت-

زانگ بہ بیت کہ گوستگیں روچاں بلوچ لبریشن آرمی ءِ نیمگ ءَ جعفر ایکسپریس سر ءَ اُرش کتگ ءُ ھائی جیک کتگ-

ھائی جیک میان ءَ بی ایل اے ءَ سرجمیں لَس مردم یل داتگ اَنت ءُ ریل ءَ سوار دوسد چاردہ پاکستانی پوج ءِ کارندہ دزگیر کتگ اَنت-

بی ایل اے ءَ دزگیریانی یل کنگ ءَ بندیگاں گوں مٹ کنگ ءَ چل ھشت اداراں وھدے داتگ اَت وھدے کہ اے میان ءَ پاکستانی لشکر ءَ لشکر کشی بندات کتگ ءُ بی ایل اے ءَ سرجمیں دزگیری کشتگ اَنت-

بلوچستان ءِ بُنجاھی شھر چہ شال ءَ پاکستانی پوج ءَ دو مردم آوار جتگ ءُ بیگواہ کتگ اَنت- کھول ءَ کلات دمگ منگچر ءَ نندانک، آر سی ڈی شھدگ بند، چہ نندانک ءَ دگہ یک مردمے بیگواہ-

گیشیں ھالانی رِد ءَ گوستگیں شپ ءَ پاکستانی پوج ءَ چہ شال ءَ فھیم احمد ء سعید احمد ء خادم علی ء علی احمد دو ورنا چہ بلوچستان بورڈ آفس میں جناح ٹاؤن آوار جتگ ءُ بیگواہ کتگ-

دوئیں بیگواھیں ورنا ایف ایس سی ءِ نودربر اَنت-

ورنایانی زورانسری آوار جنی ءِ ھلاپ ءَ کھول شال کراچی راجی شھدگ جوھان کراس بازار نزیک ءَ باب ھند کتگ ءُ نندانک دیگ ءَ اَنت- نندانک ءِ سبب ءَ دوئیں نیمگاں مزنیں کچے ءَ گاڑی ءُ مساپر گٹّ اَنت-

کھول گوشگ اِنت کہ مروچی سُھب ءَ ایف سی ءَ نندانک پہ زور تاکت ءَ چہ ھلاس کنگ جُھد کتگ، گھگیری کنگ ءَ پاکستانی پوج ءَ دگہ یک زھرشانی کنوکی قدرت اللہ آوار جتگ ءُ بیگواہ کتگ-

زھرشانی کنوکانی گوشگ اِنت دانکہ مئے مردم یل کنگ نہ بنت مئے نندانک برجاہ بیت-

ھزدار ءِ دمگ چہ نال ءَ سر بیتگیں اھوالانی رد ءَ سرکاری پلامرزی ءَ ھستیں ٹولی ءِ تیرگواری ءَ شاہ جان نامیں ورنایے بیران بیتگ-

کشگ بیتگیں ورنا بلوچ اسٹوڈنٹس آرگنائزیشن آزاد ءِ بیگواھیں چیئرمین زاھد کرد ءِ برات انت-

زانگ بہ بیت زاھد کررد مارچ 2014 ءَ پاکستانی پوج ءَ اچ شال ءَ آوار جتگ ءُ برتگ-

بلوچستان ءَ پوج ءُ پاکستان ءِ دگہ ادارھانی سر ءَ یکشل ءَ اُرش برجاہ انت ، گوستگیں لھتے وھدانی میان ءَ پاکستانی پورسز ءِ سر ءَ اُرشانی توک ءَ یک ترندی یے گندگ اتکگ-

بلوچستان ءِ دمگ کیچ ءِ بنجاھی شھر تربت ءَ پاکستانی پوج ءِ کاروان ءِ سر ءَ بمب تراکے بیتگ-

مروچی سھب ءِ ساھت نُھ ءَ تربت ءَ ڈی بلوچ ءِ نزیک ءَ سی پیک روٹ ءِ سر ءَ پاکستانی پوج ءِ کاروان ءَ ھواریں یک گاڑی یے بمبے ءِ نشانگ کنگ بیتگ-

اھوالانی رد ءَ تراک ءَ پاکستانی پوج ءَ جانی تاوانانی چِست کنگ کپتگ- داں انگت ءَ واکداراں اے درگت ءَ دگہ گپ دیم ءَ نیاؤرتگ انت-

بلوچستان ءَ گوستگیں بیست ءُ چار ساھتانی میان ءَ پاکستانی پوج ءِ سر ءَ بیتگیں اے دومی بمب تراک انت-

ایشی ءَ پیش گوستگیں روچ ءَ ھرنائی ءَ پورسز ءِ بمب ڈسپوزل اسکواڈ ءِ پند ءَ روکیں کارندہ ھما وھد ءَ نشانگ کنگ بیتگ آ ریل ءِ ٹریک ءِ کلئرینس کنگ ءَ دزبند بیتگ انت-

ھمے ھپتگ ءَ بلوچ لبریشن آرمی ءِ نیمگ ءَ یک ھترناکیں اُرشے ءَ جعفر ایکسپریس ماں بولان ءَ دستیگ کنگ بیتگ چریشی ءَ سواریں پاکستانی پوج ءِ دو سد ءَ گیش کارندہ دزگیر کتگ ءُ برتگ انت-

بلوچ لبریشن آرمی ءَ دزگیر کتگین کارندھانی یل کنگ ءِ شرت بیگواھیں مردمانی یل دیگ ءِ سر ءَ ایر کتگ-

بولان ءَ مروچی چارُمی روچ ءَ پاکستانی پوج بازیں کچے ءَ سُر ءُ پر ءَ گندگ بیتگ – ھمے بلوچ لبریشن آرمی ءَ گوستگیں شپ ءَ وتی درشان ءَ گوشتگ ات کہ پاکستانی پوج ءِ گون ءَ جنگ برجاہ انت-

بلوچستان ءِ تیابدپی شھر گوادر ءَ پاکستانی لشکر ءَ یک لوگے ءَ بیڑ برتگ ءُ اود ءَ ورنایے آوار جتگ ءُ برتگ-

گیشیں اھوالانی رد ءَ رمزان ءِ سیمی روچ ءَ گوادر ءِ شھر ءَ شمبے اسماعیل میتگ ءَ کندیل چوک ءَ پاکستانی پوج ءَ یک ورنایے آوار جتگ ءُ برتگ-

اھوالانی رد ءَ آوار جنگ بیتگیں مردم ءِ پجار شَے مزار ء برکت علی ءِ نام ءَ زانگ بیتگ-

اھوالانی رد ءَ شَے مزار رمزان ءِ سیمی روچ ءَ روچ ءِ ساھت سَے بَج ءَ پوج ءُ چیریں ادارھانی کارندھاں چہ جند ءِ لوگ ءَ آوار جتگ ءُ برتگ-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ یازدہ مارچ بی ایل ایف ءِ سرمچاراں ڈیتھ اسکواڈ ءِ رکن عبدالرسول ء کریم بخش ساجدی جھمنند کولواہ، ھوار کور گیشکور دودر ءِ ھند سر ءَ دارگ ءُ دزگیر کنگ جُھد کتگ بلے آئی ءَ دارگ جاہ ءَ گھگیری بندات کتگ گُڑا سرمچاراں گھگیری ءِ میان ءَ نشانگ کتگ – میڑ میان ءَ حارث ء ریاست نامیں مردمے آئی ءِ ھمراہ بیتگ ءُ آ ٹپی بیتگ-

بی ایل ایف دمگی مردماں رسانکدر ءَ چہ سرپد کنت کہ حارث بلوچ وئیلی دروشم ءَ ٹپی بیتگ ءُ آئی ءَ بلوچ جُھد ھلاپ ءَ پُرکاری ءِ ھچ وڑیں بھر نیست-

زانگ بہ بیت کہ عبدالرسول ء کریم بخش ساجدی نوزدہ نومبر دوھزار بیست چار ءَ گیشکور ءِ دمگ دودر ءَ بی ایل ایف ءِ سنگت سرمچاراں کیپٹن نیاز قادر پنّام ءِ گمان جان ءُ لیفٹیننٹ ظریف بلوچ پنّام ءِ شے جان شھیدی ءَ تچکی ءَ ھوار بیتگ اَنت، چریشی ءِ پُشدر ءَ سرمچاراں آ یازدہ مارچ ءَ مرگ سزا داتگ-

جارکش ءَ گْوشتگ آواران ءُ کولواہ ءَ پاکستانی پوج ءِ سروکی ءَ سلاہ بندیں ٹولی، کہ آ ڈیتھ اسکواڈ گوشگ بنت، جوڑ کتگ ءُ آ سلاہ بند ءُ مھکم کتگ ءُ بلوچ چُکچینی ءِ واستا یل داتگ اَنت بلے بلوچستان لبریشن فرنٹ ءِ سرمچار وتی سنگتانی ءُ بلوچ راج ءِ پھاز ءِ سرجمی ءَ تاکت دار اِیت- مئے اِھد اِنت کہ زورگریں پاکستانی پوج، ڈیتھ اسکواڈ ءِ کارمند ءُ آیانی واستا چاریگی کنوکاں گُڈی آسر ءَ سر کن ایں-

جارکش ءَ گْوشتگ بی ایل ایف ھرچ کھول ءُ مردم ءَ دزبندی کنت کہ آ وتی چُکاں سرمچار ءُ وتی راج ءِ ھلاپ ءَ دُژمنیں توانمندانی واستا چاریگی کنوکاں چہ گستا بہ بنت- اگاں کسے کھول ءَ شک / ستک اِنت کہ آیانی کسے مردمے بلوچ چُکچینی ءَ زورگریں ریاست چاریگی جوڑ بیتگ ءُ راج ھلاپ ءَ چاریگی یا سلاہ بندیں پُرکاریاں ھوار اِنت گُڑا آ وتی کھول ءِ مردم ءَ وت سرپد بہ کن اَنت راجدروھی ءَ چہ گستا بہ کنائین اَنت اگاں آ ھچ وڑ نہ منّ اِیت گُرا وتی راجی زمہ واری ءَ پیلو بہ کن اَنت کمکاری ءِ دروشم ءَ بلوچ سرمچاراں ھال بدے اَنت-

جارکش ءَ گْوشتگ بی ایل ایف کولواہ، ھوار ءَ ڈیتھ اسکواڈ رکن عبدالرسول ءِ کوش زمہ واری ءَ منّ اِیت اِھد کنت کہ بلوچستان ءِ وتواجھی ءُ وتمستری ءِ بستار ءَ تاں آجوئی ءِ اے جنگ برجاہ بیت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشگگ پاکستانی پوج ءَ را جنگی بندیگانی مٹ ءَ 48 ادار داتگ، کہ چریشی ءَ زورگریں پوج ءِ واستا وتی کارندھانی زند ءِ رکینگ ءِ گڈی وھد بیتگ بلے پاکستان ءَ وتی روایتی مزنی ءُ لشکری گرور ءِ درشان کنان ءَ نا ایوک ءَ سنجیدگیں گپ ءُ تران کتگ بلکیں زمین ءِ راستی ڈب اتگ انت – زورگریں پوج ءِ ھمے مزنی ءِ سبب ءَ دراھیں 214 گپتگیں پوجی کارندہ کشتگ انت-

آئی ءَ گوشتگ بی ایل اے ھروھد ءَ جنگی رھبند ءُ میان اُستمانی رھبندانی رد ءَ کاروائی کنت اِنت- بلے پاکستانی ریاست ءَ وتی کارندھانء زند ءِ رکینگ ءَ ابید جنگ ءَ را آس داتگ – ھمے مزنی ءِ سبب ءَ دشمن ءَ وتی 214 کارند مردگی ءَ رس اتگ انت-

جارکش ءَ گوشتگ بی ایل اے ءِ اے درچ ءَ وتی 12 سرمچارانی شھیدی ءَ را داد دنت کہ آیاں دشمن ءِ ھلاپ ءَ نا پرموش کنومیں دیمونی ءِ داتگ- چارشمبے ءِ شپ ءَ 3 سرمچار، ھمے وڑ گوستگیں شپ ءَ 4 سرمچاراں جنگ کنان ءَ شھید بیتگ انت، اے شھیدانی توک ءَ 5 مجید بریگیڈ ءِ فدائین ھوار انت، آیاں وتی ساہ ءُ سر بدر کنان ءَ دشمن ءَ را یک ھنچیں پروشے داتگ راجدپتر مدام یاداشتی ءَ دنت اِنت-

آئی ءَ گوشتگ آپریشن درہ بولان ءِ تَک ءَ فدائیناں دشمن ءَ را یک تباہ کاریں رپکے کتگ ءُ اُرش کتگ – فدائیناں لھتے گپتگین پوجی کارندہ گچینی بوگیانی توک ءُ بند کتگ ءُ سنگر گپتگ انت آ دگہ گپتگیں سرمچاراں وتی گون ءَ مھکمیں جاھاں برگ ءَ سوبمند بیتگ انت ءُ ھمے وڑ زورگریں پاکستان ءِ ایس ایس جی کمانڈوزانی زرا کمپنی جعفر ایکسپریس ءِ بوگیاں بندیں گپتگیانی پچگرگ ءَ سر بیتگ انت – فدائیناں انگیر کتگ ءُ ترندیں ارش کتگ انت بازیں اداراں برجاھیں اے جنگ ءَ ایس ایس جی کمانڈوزاں بازیں کچے ءَ جانی تاوان بیتگ انت – گپتگیں ھم کشتگ انت – فدائیناں وتی گڈی تیر ءَ داں جنگ کنان ءَ دشمن ءَ را یک پیسلہ داریں تاوانے داتگ ءُ وتی گڈی تیر وت ءَ وت جتگ ءُ شھیدی وتی نام ءَ کتگ-

درشان ءَ گوشتگ زورگریں پوج نی فدائینانی لاشاں سوبمندی ءِ رنگ ءَ پیش کنگ ءَ بے سوبیں جھد کنگ اِنت- کہ آیانی مشن واتری ءِ زندگی ءَ ابید گڈی ساہ ءَ جنگ کنگ بیتگ-پوج وتی دراھیں لشکری ءُ انٹیلیجنس ءِ بازیں کچے ءَ ابید ھم گپتگیں مردمانی رکینگ ءَ بے سوب بیتگ- گیش ایش انت کہ ھما مردماں کہ پاکستانی ریاست ریسکیو ءِ نام ءَ پدر کنگ انت آ دراھیں مردم بنداتی روچ ءَ بی ایل اے ءَ جنگی رھبندانی درچ ءَ مھکمیں راہ داتگ ءَ یل داتگ انت-

جارکش ءَ گوشتگ اے جنگ انگت ءَ ھلاس نہ بیتگ بلکیں ترندی ءَ گوں برجاہ انت – بلوچ سرمچاراں جتا جتائیں جاھاں راہ بستگ ءُ پوج ءَ یکشل ءَ نشانگ کنگ ءَ انت – دشمن ءَ انگت ءَ وتی مرتگیں کارندھانی لاشانی چِست کنگ ءَ بے سوبی ءِ دیمپانی انت – ھمک آیوکیں وھد ءَ بی ایل اے ءَ گیش مھکمی رسگ ءَ انت-

گیش گوشتگ بلوچ لبریشن آرمی آپریشن درہ بولان ءِ بارو ءَ سرجمی ءَ پد رسانکدر ءَ درشان ءَ شنگ کنت اِنت-

بلوچ یکجھتی کمیٹی ءِ بنجاھی رھشون سمی دین بلوچ بلوچستان ءِ بار کونسل ءَ اتکگ،بلوچستان ءِ بارکونسل ءِ وائس چیئرمہن راحب خان بلیدی، ایڈووکیٹ چیئرمہن ایگزیکٹوو کمیٹی امان اللہ خان کاکڑ کارگس ءَ گند ءُ نند کتگ ءُ بلوچستان ءَ درکانودی بیگواھیں بلوچانی بارو ءَ سرپدی یے داتگ-

سمی دین بلوچ ءَ گوشتگ بلوچستان ءَ بیگواھیں مردمانی جیڑہ سک ءَ سنگین انت-

آئی ءَ گوشتگ منی پِت ڈاکٹر دین مھمد بلوچ ءَ بیگواہ بوگ ءَ بازیں سال گوستگ انت داں آ ھچ آمیدگس ءَ پیش کنگ نہ بیتگ کہ آ چتور انت زندگ یا ناں مارا گوش بہ بیت اِنت بلوچستان ءِ مات ءُ گوھار وتی دوستگیں مردمانی ودار ءَ آں ھمک روچ وتی زند ءِ روچاں آسر کنان ءُ ابدی جاھاں روگ ءَ انت اگاں آیاں جرمے ھست گڑا وتی آمیدگساں پیش اش بہ کن ات-

بلوچستان بارکونسل ءِ وائس چیئرمین ءُ چیئرمین ایگزیکٹوو کمیٹی ءَ سدکی داتگ بلوچستان بارکونسل ھمک شھری ءَ درکانودی کُشگ ءُ بیگواہ کنگ ءِ ھلاپ ءَ توار ءَ بُرز کنت اِنت-

بلوچستان ءِ بُنجاھی شھر شال، ھُزدار ءُ پنجگور ءَ سے جتاجتائیں اُرش رپورٹ بیتگ اَنت-

گیشیں ھالانی رِد ءَ شال کیچی بیگ تھانہ ناشناسیں مردماں گوستگیں شپ ءَ دستی بمب اُرش ءَ نشانگ کتگ کہ گوں تُرندی ءَ ترکّ اِتگ-

تراک ءِ سبب ءَ تھانہ ءِ تہ ءَ اوشتوکیں گاڑیانی آس گپتگ بلے جانی تاوان ھال سر نہ بیتگ-

دومی نیمگ ءَ ھُزدار سنی ءِ ھند سر ءَ گوستگیں شپ ءَ کار کنوکیں بند ساچی شرکت ءِ بازیں گاڑی یے ءُ مشینری ناشناسیں مردماں اُرش ءَ پد مانداشتگ اَنت-

اِھوالکار رِد ءَ ناشناسیں مردماں اود ءَ ساڑی ئیں کارکنوک پٹ ءُ پول ھم کتگ اَنت ءُ روگ ءَ ساڑی پیٹرول پریتکگ بازیں گاڑی یے ءُ بند ساچی مشینری مانداشتگ اَنت-

ھمے وڑ چہ پنجگور ءَ ھال اِنت کہ سی پیک دگ این 85 ءَ برجاھیِں کسٹم چیک پوسٹ سر ءَ پرپٹ سواریں سلاہ بندیں مردماں کسٹم کارندہ گپتگ ءُ آیانی پجّار کارڈ چارتگ اَنت ءُ کمرھاں ھستیں بُکسانی کُبّل پروشتگ اَنت-

ھالانی رِد ءَ اُرشکاراں کارمندانی سلاہ دستیگ کتگ اَنت بلے وئیل ءَ ھچ وڑیں جانی تاوان نہ بیتگ-